“Leksiyon 137—Doktrina ug mga Pakigsaad 127–128, Bahin 1: Ang Kaluwasan sa mga Patay,” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 127–128, Bahin 1,” Manwal sa Magtutudlo sa Seminary sa Doktrina ug mga Pakigsaad
Leksiyon 137: Doktrina ug mga Pakigsaad 125–128
Doktrina ug mga Pakigsaad 127–128, Bahin 1
Ang Kaluwasan sa mga Patay
Sa Agosto 1840, unang gitudlo ni Joseph Smith ang bahin sa doktrina sa bunyag alang sa mga patay. Naglipay ang mga miyembro sa Simbahan sa kahigayonan nga makahatag og makaluwas nga mga ordinansa alang sa ilang namatay nang mga paryente. Si Joseph Smith mipadala og sulat sa mga Santos aron hatagan silag instruksiyon bahin sa ordinansa sa bunyag para sa mga patay. Kini nga leksiyon makatabang sa mga estudyante nga mobati sa gugma sa Langitnong Amahan para nila, nga gipakita pinaagi sa mga ordinansa sa templo.
Posibleng mga Kalihokan sa Pagkat-on
Usa ka sitwasyon
Ang mosunod nga senaryo makatabang usab sa mga estudyante nga mamalandong kon unsay ilang gibati bahin sa doktrina sa Manluluwas sa bunyag alang sa mga patay. Pwedeng idrama-drama sa mga estudyante kon unsaon nila pagtubag si Anna.
Atol sa panaghisgotan uban sa mga misyonaryo, nakat-onan ni Anna ang panginahanglan sa pagsunod sa ehemplo sa Manluluwas ug magpabunyag (tan-awa sa Mateo 3:13–17; Juan 3:5; 2 Nephi 31:4–11). Kinasingkasing siyang nagtinguha nga mabunyagan, pero nabalaka usab siya sa iyang namatay na nga igsoong babaye. Gipangutana ni Anna ang mga misyonaryo, “Unsaon na man lang ang akong igsoon nga namatay na nga wala nabunyagi?”
-
Samtang imong ikonsiderar ang mga elemento sa doktrina sa Manluluwas, unsay imong mga pagbati nga pwede nimong ipakigbahin?
Pahinumdomi ang mga estudyante nga sa tanang panahon, apil ang unang mga miyembro sa Simbahan, nakapangutana sama sa pangutana ni Anna. Pinaagi ni Propeta Joseph Smith, gipadayag sa Langitnong Amahan nga sa unsang paagi ang Iyang plano makaluwas sa tanang gustong maluwas.
Ang plano sa Langitnong Amahan
Anam-anam nga gipadayag sa Ginoo kang Joseph Smith ang doktrina sa bunyag alang sa mga patay. Sa Agosto 1840, si Joseph Smith nagsangyaw sa lubong ni Seymour Brunson. Panahon sa wali, mitan-aw siya kang Jane Neyman, usa ka biyuda nga namatyag anak nga lalaki nga wala pa mabunyagi. Gikutlo ni Joseph ang 1 Mga Taga-Corinto 15:29 ug mitudlo nga gitugotan sa plano sa Dios ang usa ka buhing tawo nga mabunyagan puli sa usa ka tawo nga namatay na. Sa ulahi, gibunyagan si Jane para sa iyang anak nga si Cyrus. Kini ang unang bunyag alang sa patay nga gihimo niini nga dispensasyon (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 480–82).
Sa ulahi gipadayag sa Ginoo nga ang mga bunyag para sa mga patay gipahigayon diha sa templo (tan-awa sa Doktrina ug mga Pakigsaad 124:29–32). Sa Nobiyembre 1841, gisugdan sa mga Santos ang pagpabunyag alang sa ilang mga katigulangan diha sa wala pa nahuman nga Templo sa Nauvoo. Niadtong Septiyembre 1842, gihatagan og instruksiyon ni Joseph Smith ang mga Santos nga magtipig og rekord sa mga ordinansa ug uban pang importanteng mga detalye. Kini nga mga instruksiyon anaa na karon sa Doktrina ug mga Pakigsaad 127 ug 128 (tan-awa sa Mga Santos, 1:476–77). Gipasabot ni Joseph Smith nga ang tigrekord kinahanglang nakasaksi sa ordinansa ug magtipig siyag tukmang mga rekord nga ibutang unya sa katibuk-ang basahon sa simbahan. Mitudlo usab siya nga ang uban kinahanglang mahimong mga saksi sa ordinansa (tan-awa sa Doktrina ug mga Pakigsaad 128:2–4). Dayon, iyang gipasabot kon nganong kini nga han-ay sa mga butang kinahanglan nga makuti.
Sa dili pa basahon ang Doktrina ug mga Pakigsaad 128:5, makatabang tingali ang pagpasabot nga “sa wala pa matukod ang kalibotan” nga nagpasabot sa panahon nga wala pa mahimo ang yuta, dihang adunay konseho sa langit (tan-awa sa Abraham 3:22–27).
Basaha ang Doktrina ug mga Pakigsaad 128:5, nga mangita kon unsay imong nakat-onan bahin sa mga bunyag alang sa patay diha sa plano sa Langitnong Amahan.
-
Unsay gitudlo kanimo niini nga bersikulo bahin sa Langitnong Amahan ug sa Iyang plano?
Tabangi ang mga estudyante nga mailhan kini nga kamatuoran: Giandam sa Langitnong Amahan ang paagi aron maluwas kadtong namatay na nga wala mahibalo sa ebanghelyo.
Ikonsiderar ang pagsulat niini nga kamatuoran diha sa pisara ug tabangi ang mga estudyante nga hisgotan kini. Makatabang ang pagpangutana sa mosunod aron matabangan ang mga estudyante nga masabtan kini nga kamatuoran. Pwede nimong pauswagon ang panaghisgot pinaagi sa paghangyo sa mga estudyante nga ipakigbahin ang ilang mga hunahuna bahin sa mga komento sa ilang mga klasmeyt.
-
Unsay gitudlo kanimo niini nga kamatuoran bahin sa mga hiyas, mga kinaiya, o katuyoan sa Langitnong Amahan?
-
Unsay epekto niini nga kamatuoran kanimo ug sa imong pamilya?
Aron matabangan ang mga estudyante nga mabati ang kaimportante niini nga kamatuoran, ikonsiderar ang pagpakigbahin sa imong nasaksihan bahin niini. O pwede nimong ipakigbahin ang mosunod nga pamahayag ug dapiton ang mga estudyante nga ipakigbahin ang ilang reaksiyon niini.
Mipamatuod si Elder D.Todd Christofferson sa Korum sa Napulog Duha ka Apostoles bahin kang Jesukristo ug sa katubsanan sa mga patay.
Ang atong katungdanan naglugway kutob sa gilay-on ug giladmon sa gugma sa Dios aron sa paglukop sa Iyang mga anak sa matag panahon ug dapit. Ang atong mga paningkamot alang sa atong mga patay mobunga og tataw nga saksi nga si Jesukristo mao ang balaang Manunubos sa tanang katawhan. Ang Iyang grasya ug mga saad moabot bisan niadtong kinsa samtang buhi pa wala makakaplag Kaniya. Tungod Kaniya, ang mga binilanggo sa pagkatinuod mahimong gawasnon. (D. Todd Christofferson, “The Redemption of the Dead and the Testimony of Jesus,” Ensign, Nov. 2000, 11)
Narekord sa yuta ug sa langit
Ikonsiderar ang pagpakita og larawan sa bunyaganan sa templo. Dapita ang mga estudyante nga hatagan og gibug-aton ang tigrekord ug ang mga saksi. Dayon dapita ang mga estudyante nga pangitaon ug markahan kini nga mga buluhaton diha sa Doktrina ug mga Pakigsaad 128:3. Kon nakaserbisyo na ang mga estudyante isip saksi, pwede nilang ipakigbahin ang ilang mga kasinatian.
Ang usa ka paagi nga matabangan ang mga estudyante nga makita ang kalambigitan niini nga mga seksiyon mao ang pagbalik ngadto sa senaryo ni Anna.
Human mabunyagi, mitambong sa templo si Anna ug nabunyagan para sa iyang igsoong babaye nga namatay na. Naghunahuna siya kon unsaon niya pagkahibalo nga balido ba sa langit ang ordinansa.
Sa dili pa basahon sa mga estudyante ang mosunod nga mga kasulatan, pwede nimong ipasabot nga sa Doktrina ug mga Pakigsaad 128:8 ang hugpong sa mga pulong nga “propria persona” nagtumong sa mga tawo nga nabunyagan para sa ilang kaugalingon ug ang hugpong sa mga pulong nga “ilang kaugalingon nga mga tinugyanan” nagtumong sa mga tawo nga gibunyagan para sa uban.
Basaha ang Doktrina ug mga Pakigsaad 127:5–7; 128:6–8, nga mangita kon unsay imong ipakigbahin kang Anna aron matubag ang iyang pangutana.
-
Unsang mga pulong o hugpong sa mga pulong ang imong ipakigbahin kang Anna?
-
Sa imong hunahuna, nganong importante ang pagtipig og rekord sa mga ordinansa diha sa plano sa Langitnong Amahan?
-
Sa unsang paagi ang pagkasabot niini nga mga bersikulo makaimpluwensiya sa imong kasinatian sa templo?
Ipasabot nga nabugkos sa yuta ug sa langit ang mga ordinansa nga gihimo sa templo tungod sa napahiuli nga mga yawe sa pagkapari pinaagi ni Propeta Joseph Smith (tan-awa sa Doktrina ug mga Pakigsaad 128:9–11).
“Himoa ang inyong mga kasingkasing nga magmaya, ug paglipay sa hilabihan”
Ang katuyoan niini nga seksiyon mao ang pagtabang sa mga estudyante nga mobati sa kahalangdon sa plano sa kaluwasan sa Langitnong Amahan. Ikonsiderar ang pagsulat og plano sa Langitnong Amahan diha sa pisara ug dapita ang mga estudyante sa pagdugang og mga pulong o hugpong sa mga pulong nga nagpahayag sa ilang mga pagbati bahin ninii. Hangyoa ang pipila ka estudyante sa pagpakigbahin kon nganong mibati sila sa ingon.
Pwede usab dugangan sa mga estudyante ang pipila sa mga pagbati diha sa pisara nga ilang nasinati dihang miapil sa mga bunyag ug kompirmasyon diha sa templo.
Samtang basahon sa mga estudyante ang mosunod nga mga tudling sa kasulatan ug hisgotan ang mga pangutana bahin niini, pwede silang magdugang og mga pulong o hugpong sa mga pulong diha sa pisara.
Sa iyang sulat, balaknong gipahayag ni Joseph Smith ang iyang panglantaw bahin sa mahimayaong doktrina sa katubsanan sa mga patay. Basaha ang Doktrina ug mga Pakigsaad 128:22-23, nga mangita sa mga emosyon nga gipahayag bahin sa plano sa Langitnong Amahan.
-
Unsang mga pulong o hugpong sa mga pulong gikan niini nga bersikulo ang nagpahayag sa imong mga gibati bahin sa plano sa kaluwasan sa Langitnong Amahan alang sa Iyang mga anak?
-
Kanus-a nimo nasinati ang bisan hain niini nga mga pagbati samtang nag-apil sa buhat sa templo ug family history?
-
Sa imong hunahuna, unsay kahulogan sa “ang binilanggo mahimo nga gawasnon”? (bersikulo 22). Nganong pwede kining mahimong rason sa hilabihang paglipay?
Ikonsiderar ang pagdapit sa mga estudyante nga ipahayag ang ilang kaugalingong gibati bahin sa doktrina sa katubsanan sa mga patay. Dapita sila nga hatagan og pagtagad ang bisan unsang mga pag-aghat sa Espiritu samtang himoon nila kini. Pwede silang magsulat, magdrowing, o magrekord og mensahe. Pwedeng gamiton sa mga estudyante ang pipila sa mga hugpong sa mga pulong nga nakalista sa pisara aron ihulagway kon sa unsang paagi makahatag og paglaom ang plano sa Langitnong Amahan alang niadtong namatay nga wala mahibalo sa ebanghelyo. Pwede usab nilang isulat ang epekto sa plano sa kaluwasan diha sa kaugalingon nilang pamilya. Pwedeng ihulagway sa mga estudyante ang makahuloganong mga kasinatian sa pag-apil sa buhat sa templo ug sa family history.
Human sa igo nga panahon, dapita ang mga estudyante nga andam sa pagpakigbahin sa ilang mensahe. Pwede usab nimong ipakigbahin ang imong mga pagbati bahin sa katubsanan sa mga patay diha sa plano sa Langitnong Amahan.