136-р хичээл: Сургаал ба Гэрээ 125–128

Сургаал ба Гэрээ 126

Их Эзэн Бригам Янгийн үйлчлэлийг хүлээн авав

1841 оны 7-р сарын 9-нд Их Эзэн Бригам Янгад бошиглогч Иосеф Смитээр дамжуулан илчлэлт өгөв. Бригамыг АНУ, Канад, Их Британид хэд хэдэн номлолд үйлчилсний дараа Их Эзэн түүний номлолын аяллуудыг хүлээн авснаа хэлэв. Тэрээр Бригамыг гэр бүлдээ онцгой анхаарал халамж тавих цаг болсон хэмээн хэлсэн. Энэ хичээл нь Бригам Янгтай адил хичээнгүйлэн хөдөлмөрлөх суралцагчдын хүслийг нэмэгдүүлэхэд тусална.

Боломжит суралцах үйл ажиллагаа

Их Эзэнд үйлчлэх нь

Их Эзэнд үйлчлэх нь гэсэн үг хэллэгийг самбарт бичээд, суралцагчдыг дараах байдлаар үйлдэхэд урь.

Гадасны эсвэл дүүргийн удирдагч танай бүсийн Сүмийн гишүүн өсвөр үеийнхнээс санал асуулга явуулж, дараах асуултуудыг тавьсан гэж төсөөл. Зарим суралцагч юу гэж хариулсан байж болох вэ?

• Та Тэнгэрлэг Эцэг, Есүс Христ хоёрт ямар арга замаар үйлчлэхийг хичээдэг вэ? Та яагаад Тэдэнд үйлчилдэг вэ?

• Их Эзэнд үйлчлэхэд юу саад болдог вэ? Яагаад бид заримдаа Түүнд үйлчлэхийг хүсдэггүй байж болох вэ?

Хуваалцсаных нь дараа суралцагчдыг дээрх асуултад хэрхэн хариулж болохоо тунгаан бодоход урь.

Хичээл дээр Бригам Янгийн жишээг судалж байхад нь суралцагчдыг Их Эзэнд хичээнгүйлэн үйлчлэхэд тулгарах саад бэрхшээлийг даван туулахдаах Ариун Сүнсээр туслуулахыг эрэлхийлэхэд урь.

Их Эзэн Бригам Янгийн талаар ямар сэтгэгдэлтэй байсан бэ?

Хичээлийн эхэнд хэдэн суралцагчид дараах мэдээллийг өг. Тэднийг Бригам Янгийн талаар утга учиртай, сонирхолтой санагдсан зүйлээ нэгтгэн дүгнэхэд урь.

• Бригам Янг ядуу амьдралд өссөн бөгөөд айлын 11 хүүхдийн 9 дэх нь байжээ.

• Түүнийг 14 настай байхад ээж нь нас барав.

• 16 настайдаа тэрээр мужаан, шилний үйлдвэрийн ажилчин бас зураач болж, дэлхийд өөрийн зам мөрийг гаргахаар гэрээсээ явсан юм.

• 23 настайдаа тэрээр Мириам Воркстэй гэрлэж, тэд дараа нь хоёр охинтой болсон.

• Бригам Сүмд нэгдэхээсээ өмнө Мормоны Номыг хоёр жилийн турш Библитэй харьцуулан судалжээ. Тэрээр дараа нь “Би Мормоны Номыг үнэн гэдгийг мэддэг байсан, мөн би нүдээрээ харж, хуруугаараа тэмтэрч мэдсэн” хэмээсэн байдаг (Teachings of Presidents of the Church: Brigham Young [1997], 2).

• Бригам АНУ, Канад, Их Британид 10 номлолд үйлчилсэн.

• Тэрээр 33 насандаа Арван хоёр төлөөлөгчийн чуулгын гишүүн болжээ.

• 1841 оны 7-р сарын 9-нд Их Эзэн Бригам Янгад бошиглогч Иосеф Смитээр дамжуулан илчлэлт өгөв.

Сургаал ба Гэрээ 126:1–3-ыг уншаад, Их Эзэн Бригамд үйлчлэлийнх нь талаар юу гэж хэлснийг олж мэд.

• Эдгээр шүлгээс танд юу нь таалагдсан бэ эсвэл та юу сурсан бэ?

  Суралцагчдыг хуваалцах үед анхааралтай сонс. Хэрэв та хэрэгтэй гэж үзвэл, “Илчлэлтэд Бригамд хамаатай ямар үгс ашигласан бэ?” “Эдгээр үг Бригамд ямар санагдах байсан гэж та бодож байна вэ?” “Эдгээр шүлэг Их Эзэний тухай юуг танд зааж байна вэ?” гэх мэтчилэн асуу.

  Хэрэв суралцагчид ямар нэг зарчим олж тогтоохгүй бол “Бригам Янгад өгсөн Их Эзэний зааварчилгаа бидэнд хэрхэн хамаатай байж болох вэ?” гэж асуухыг бодоорой. Суралцагчид өөр өөрөөр хэлж болох ч дараах зарчмыг олж тогтоох ёстой. Хэрэв бид Их Эзэний төлөө хичээнгүйлэн хөдөлмөрлөвөл Тэрээр бидний зөв шударга өргөлүүдийг хүлээн авах болно. Та суралцагчдад энэ зарчмыг судар дээрээ тэмдэглэхийг зөвлөж болно.

• Бригам Янг шиг хүмүүс Их Эзэний төлөө хичээнгүйлэн үйлчлэхэд түлхэц болдог юуг мэддэг гэж та бодож байна вэ? Энэ нь бидэнд хэрхэн тусалж болох вэ?

Бригам Янгийн жишээ

Дараах тараах материалд Бригам Янгийн Их Эзэний төлөө хичээнгүйлэн хөдөлмөрлөсөн жишээнээс суралцахад нь суралцагчдад туслах 3 боломжит ярилцлага бий. Хичээлийн өмнө гурван суралцагчийг дараах ярилцлагуудын аль нэгийг удирдан ангид үйлчлэхэд урь. Эсвэл ангийг гурав гурваар нь бүлгүүдэд хуваарилаад, бүлгийн гишүүн тус бүрийг ярилцлагын аль нэгийг удирдахад урь. Энэ ярилцлагыг суралцагчдадаа илүү утга учиртай, үр дүнтэй болгохын тулд асуултыг өөрчилж тохируулж болно гэдгийг хэлээрэй.

Бригам Янгийн жишээ

1-р ярилцлага

Илтгэх чадварын сорилт

Дараахтай төстэй асуултыг тавьснаар эхэл.

• Та илтгэл тавих талаар ямар бодолтой байдаг вэ? Яагаад?

Дараахыг унш эсвэл нэгтгэн дүгнэ.

Бригам Янгад тохиолдож байсан хамгийн хүнд сорилтуудын нэг бол илтгэл тавих байсан. Тэрээр: “Би хэл яриандаа хамгийн тааруу хүмүүсийн нэг байлаа” гэж хэлжээ (Journal of Discourses, 5:97). Баптисм хүртсэнийхээ дараагийн долоо хоногт тэрээр Сүмийн гишүүн байсан дөрвөн туршлагатай илтгэгчийг номлохоор ирнэ гэж хүлээж байсан ч ирээгүй гэж дурссан байдаг. Тэрээр ийн ярьсан байдаг.

Би илтгэл тавихдаа, басертөнцийн талаарх мэдлэгийн хувьд нялхаараа байв. Гэвч Их Эзэний Сүнс миний дээр байсан бөгөөд би үзэж, сонсож, сурсан—туулж, баяссан зүйлээ хүмүүст ярьж хэлэхгүй л бол яс минь янгинах мэт мэдэрч, тэгээд анхны илтгэлээ нэг цаг гаруй тавьсан. Намайг амаа ангайхад л Их Эзэн дүүргэж байв. (Бригам Янг, Journal of Discourses,, 13:211)

• Бригам Янгийн хийсэн зүйлийн юу нь хэцүү байсан бэ?

Суралцагчдыг Сургаал ба Гэрээ 100:5–6 (мөн Гэтлэл 4:12; Сургаалт үгс 16:1-ийг үзнэ үү)-г уншихад урь. Тэгээд дараах асуултыг тавь.

• Бригам Янгад тохиолдож байсан зүйлүүд хэрхэн эдгээр шүлэгтэй хамааралтай вэ?

• Та Их Эзэн өөрт тань тусалж чадах юуны талаар мэдэж авсан бэ?

Их Эзэнд итгэх, мэддэг зүйлээ хуваалцах хүсэлтэй байх талаар ямар бодолтой байгаагаа хуваалц.

2-р ярилцлага

Бригам үйлчлэхийн төлөө золиос гаргасан нь

Дараахтай төстэй асуулт тавьж эхлүүлээрэй.

• Номлолд үйлчлэхэд ямар золиос гаргах хэрэгтэй болдог вэ?

Дараахыг унш эсвэл нэгтгэн дүгнэ.

Бригам Янгийг баптисм хүртсэн жил эхнэр нь нас барав. Их золиослол гарган, тэрээр хоёр хүүхдээ бусдын асрамжинд орхин, Нью-Йоркод болон дээд Канадын олон номлолд үйлчилж, тэндээ хэд хэдэн хүнд баптисм хүртээжээ.

Нэг жил орчим номлолд үйлчилснийхээ дараа Бригам Охайогийн Көртландад ирсэн тухайгаа ийн тайлбарлав.

Гэгээнтнүүдтэй хамт цугларсан хэн нэгэн хүн надаас илүү ядуу байсан бол энэ нь түүнд юу ч байхгүй байсантай холбоотой. … Надад харж асрах ёстой хоёр хүүхэд байсан. … Би бэлэвсэрсэн байсан. … [Миний хөлд] зээлсэн гуталнаас өөр гутал байгаагүй. Гурав, дөрвөн жил өмссөн гараараа оёсон хүрмээс өөр өвлийн хувцас надад байгаагүй. Би аялж, номлож, өөртөө байсан өмчийнхөө доллар бүрийг зарцуулсан байсан. (Teachings of Presidents of the Church: Brigham Young [1997], 243)

Нэг суралцагчийг Лук 18:18–23-ыг уншаад, үйлчлэх урилгад Бригам Янгийн үзүүлсэн хариу үйлдэл энэ цэдэг дээрх Аврагчтай харилцаж байсан хүнийхээс хэр ялгаатай байсныг олж мэдэхэд урь.

• Бригам Янгтай адил золиос гаргахыг хүсдэг байхад бидэнд тусалж болох Их Эзэний талаар та юу мэдэх вэ?

• Номлолд үйлчлэхээс гадна Их Эзэний Өөрт нь үйлчлэхийн тулд биднээс золиослоосой гэж хүсэж болох өөр ямар ямар арга зам байдаг вэ?

Их Эзэнд үйлчлэхийн тулд золиос гаргах хүсэлтэй байх нь танд ямар санагдаж байгааг хуваалц.

3-р ярилцлага

Бригамын Их Британи дахь номлол

Дараахтай төстэй асуулт тавьж эхлүүлээрэй.

• Их Эзэний тусламж номлогчид хэрэг болох зарим шалтгаан юу вэ?

Дараахыг унш эсвэл нэгтгэн дүгнэ.

Дахин гэрлэж, өөр таван номлолд үйлчилснийхээ дараа Бригам бусад төлөөлөгчийн хамт Их Британид номлолд үйлчлэхээр дуудагджээ.

Бригам номлолоо ийн дүрсэлсэн.

Бид хүний нутагт харийн газрын мөнгөгүй хүмүүс шиг очсон боловч Бурханы нигүүлслийн ачаар бид олон найзтай болж, Их Британий хаант улсын ихэнх томоохон хот, тосгонд сүмээ байгуулан, 7–8 мянган хүнд баптисм хүртээж, 5000 Мормоны Номыг хэвлэсэн, … мөн олон мянган хүний зүрх сэтгэлд мөнхийн үнэний үрийг тарьсан… ба эдгээр бүх зүйлийн төлөө би Бурханы мутарт талархаж байна. (Teachings of Presidents of the Church: Brigham Young [1997], 6)

Нэг суралцагчийг Алма 26:12–13 дээрх Аммоны үгийг уншихад урь. Тэгээд дараах асуултыг тавь.

• Бригам Янгийн хэлсэн зүйлийг Аммоныхтай харьцуулахад ямар байна вэ?

• Их Эзэнд үйлчлэхийг хичээхдээ Түүнд тулгуурлах нь яагаад чухал гэж та бодож байна вэ?

• Та Их Эзэнд үйлчилж байхдаа хэрхэн Түүнд тулгуурлахыг хичээсэн бэ?

Их Эзэнд үйлчлэхдээ Түүнд тулгуурлах тухай бодол, мэдрэмжээ хуваалц.

Таны сурч мэдсэн зүйлс

Ярилцлагын дараа та суралцагчдыг Ариун Сүнсний удирдамжийг эрэлхийлж, Их Эзэнд үйлчлэх талаар юу сурч, мэдэрч байгаагаа бичихэд урамшуулж болно. Тэд дараах асуултуудад хариулж болно.

• Бригам Янгийн жишээнээс та юу сурсан бэ? Их Эзэн түүнд хэрхэн тусалсан бэ?

• Их Эзэнд үйлчлэх хүслийг тань юу нэмэгдүүлсэн бэ?

Өмнө нь тэмдэглэж авсан бодол, мэдрэмжээсээ хуваалцахад суралцагчдыг урьснаар хичээлээ дуусга. Та бас туршлагаасаа хуваалцаж болно.

Нэмэлт эх сурвалж

Бид Бригам Янгийн Их Британид аялсан аяллаас өөр юуг мэдэх вэ?

Бригам бусад төлөөлөгчийн хамт 1839 оны 4-р сарын 26-нд Миссуригийн Фар Вестээс Английн номлолд явахаар Их Эзэний зааврыг дагажээ (Сургаал ба Гэрээ 118-ыг үзнэ үү). Тэд Айова болон Иллинойд дараагийн хэдэн сарыг өнгөрөөсөн ба Их Британи руу аялах цаашдын бэлтгэлээ базаажээ. 1839 оны зун хумхаа өвчний тахал газар авч, тэд тахалд өртөв. Бригам бүхээгт тэрэгт бусдын тусламжгүй сууж чадахааргүй бие нь муу байлаа. Тэрээр ийн цэдэглэсэн байдаг.

Би юу ч болсон хамаагүй Их Британи руу явах шийдвэр төгс байсан. Юу ч болсон бай, би амьдрал, авралын сайн мэдээний төлөө шаардлагатай бүх зүйлийг хийх шийдвэр төгс байсан. (Teachings of Presidents of the Church: Brigham Young [1997], 5)

Анхны эхнэрээ нас барсны дараа Бригам 1834 онд Мэри Анн Анжеллтэй гэрлэжээ. Хэдийгээр эхнэр нь нялх хүүхэдтэй, өвчтэй байсан ч түүнд тус дэм болж байв. Тэр номлол бол тэднийг гэрлэснээс хойш Бригамын үйлчилсэн 5 дахь номлол байв. Тэрээр нийтдээ 10 номлолд үйлчилсэн юм.

Нэгэн удаа Бригамыг Охайо мужийн Фэйрпортоос Нью-Йоркийн Баффало руу усан онгоцоор аялж байтал шуурга болж, хөлөг онгоц урагшлахад саад учирчээ. Тэрээр дараах зүйлийг бичсэн юм.

Салхи ойролцоогоор үүрийн нэг цагт ширүүссэн. Би тавцан дээр гарч, Есүсийн нэрээр Эцэгт хандан бүх нүглийг минь өршөөхийг гуйн залбирсан бөгөөд надад салхинд намдахыг бас, бидний аяллыг аюулгүй байлгахыг тушаах мэдрэмж төрсөн юм. Салхи намдахад бүх зүйлийг захирдаг Бурханд алдар суу, хүндэтгэл, магтаалыг өргөхийг би хүссэн. (Бригам Янг, “History of Brigham Young,” Millennial Star, Oct. 17, 1863, 663– 64)

Сургаал ба Гэрээ 126:3. Бригам Янг гэр бүлдээ хэрхэн “онцгой халамж тавьж” байсан бэ?

Бригам Янг Их Британиас гэртээ буцаж ирээд, “гэр бүлдээ онцгой халамж тавих” (Сургаал ба Гэрээ 126:3) Их Эзэний зарлигийг дагасан. Тэрээр хүүхдүүддээ өдөр бүр зааж, хамт залбирдаг байв.

Бригам 40 настай байхдаа, Сургаал ба Гэрээ 126 дахь илчлэлтийг сонсохоосоо ч өмнө гэр бүлдээ үнэнч байснаа харуулсан. Энэ тухай дараах цэдэгт ийн дүрсэлжээ.

Тэрээр 23 настайдаа Мириам Анжелин Воркстой гэрлэсэн. Залуу хосын гэр бүлд хоёр охин мэндэлжээ. Бригам сандал, ширээ, ханын шүүгээ хийж, засварлаж мөн цонх, хаалга, шат барьж, ханын зуухны дээгүүр тавиур тогтоож, гэр бүлээ тэжээдэг байсан.

Мириамыг сүрьеэ өвчнөөр өвдөх үед Бригам өөрийн үүрэг хариуцлагын хажуугаар түүний хийдэг байсан гэрийн ажлыг хийдэг болов. Эхнэрийгээ улам бүр дордож, хэвтэрт ороход тэрээр байнга гэр бүлдээ өглөөний унд бэлтгэж, охидоо хувцаслаж, гэр орноо цэвэрлэн, “орой иртлээ эхнэрээ ханын зуухны хажуу дахь түшлэгтэй сандал дээр суулгаад явдаг байсан” ба ирээд, оройн хоол хийж, гэрийнхнийгээ унтуулаад, гэр орны ажлаа дуусгадаг байжээ. (Teachings of Presidents of the Church: Brigham Young [1997], 2)

Бригам энэ илчлэлтийг дагаснаараа өөр ямар ямар адислал хүлээн авсан бэ?

Энэ илчлэлтийн дараа Бригам Янг гэр бүлтэйгээ илүү их цагийг өнгөрөөх боломжтой болсон. Тэрээр мөн Иосефын амьдралын сүүлийн 36 сарын 28-д нь бошиглогч Иосеф Смитийн дэргэд байжээ. Энэ цаг хугацаа нь Иосефыг нас барсны дараа Бригамыг Сүмийн ерөнхийлөгчөөр үйлчлэхэд бэлтгэсэн аж.

Нэмэлт суралцах үйл ажиллагаа

Хичээлийг эхлүүлэх өөр хувилбар

Суралцагчдыг дараагийн таван зуны турш номлолд үйлчлэхийн тулд гэр бүлээ орхиж яваад, дараа нь бараг хоёр жилийн турш гадаад улс оронд номлолд үйлчлэхээр дуудагдаж байна хэмээн төсөөлөхөд урь. Дараах асуултуудыг тавь.

• Гэр бүлээ ийм олон удаа орхиж явах нь танд ямар санагдах вэ?

• Хэрэв та гэр бүлийнхээ хэрэгцээг хангах үүрэг хариуцлагатай байсан бол эдгээр номлолд явах нь танд ямархуу санагдах байсан бэ?

Видео

Хэрэв Бригам Янг, Хибэр Ч.Кимбаллын Англи руу номлолд явж буйг харуулсан видеог үзүүлэх нь суралцагчдад хэрэгтэй гэвэл “The Heart and a Willing Mind” видеог цагийн код 4:08-аас 7:57 хүртэл үзүүлнэ үү.