“137-р хичээл—Сургаал ба Гэрээ 127–128, 1-р хэсэг: Нас барагсдын аврал,” Сургаал ба Гэрээний семинарын багшийн гарын авлага (2025)
“Сургаал ба Гэрээ 127–128, 1-р хэсэг,” Сургаал ба Гэрээний семинарын багшийн гарын авлага
137-р хичээл: Сургаал ба Гэрээ 125–128
Сургаал ба Гэрээ 127–128, 1-р хэсэг
Нас барагсдын аврал
1840 оны 8-р сард Иосеф Смит анх нас барагсдын төлөөх баптисмын сургаалыг заасан. Сүмийн гишүүд нас барсан төрөл төрөгсдийнхөө төлөө авралын ёслолууд гүйцэтгэх боломж олдсонд баяртай байв. Иосеф Смит нас барагсдын төлөөх баптисмын ёслолын талаар гэгээнтнүүдэд зааварлан захидал бичжээ. Энэ хичээл суралцагчдад ариун сүмийн ёслолуудаар илэрдэг Тэнгэрлэг Эцэгийн хайрыг мэдрэхэд тусална.
Боломжит суралцах үйл ажиллагаа
Жишээ
Дараах жишээ нь суралцагчдад нас барагсдын төлөө баптисм хүртэх Аврагчийн сургаалын талаар ямар бодолтой байгаа талаараа эргэцүүлэн бодоход тусалж чадна. Суралцагчид Аннад хэрхэн хариулахаа дүрд хувиран үзүүлж болно.
Анна номлогчидтой ярилцах үеэрээ Аврагчийн үлгэр жишээг дагаж баптисм хүртэх шаардлагатайг мэдсэн (Матай 3:13–17; Иохан 3:5; 2 Нифай 31:4–11-ийг үзнэ үү). Тэрээр баптисм хүртэхийг чин сэтгэлээсээ хүсэж байсан ч нас барсан эгчийнхээ төлөө санаа зовниж эхлэв. Анна номлогчдоос “Баптисм хүртэхээсээ өмнө нас барсан эгч минь яах вэ?” гэж асуув.
-
Аврагчийн сургаалын элементүүдийг бодсоны дараа танд ямар мэдрэмжээ хуваалцмаар санагдаж байна вэ?
Сүмийн анхны гишүүд гээд үе үеийн хүмүүс Аннатай адил асууж байсныг суралцагчдад сануул. Тэнгэрлэг Эцэг бошиглогч Иосеф Смитээр дамжуулан Өөрийнх нь төлөвлөгөө аврагдахыг хүссэн хүн бүхнийг хэрхэн аварч болохыг илчилсэн.
Тэнгэрлэг Эцэгийн төлөвлөгөө
Их Эзэн Иосеф Смитэд нас барагсдын төлөөх баптисмын сургаалаа аажим аажмаар илчилжээ. 1840 оны 8-р сард Иосеф Смит, Шэймоур Брансоны оршуулга дээр номлосон. Тэрээр номлон ярих зуураа баптисм хүртэхээсээ өмнө нас барсан хүүгийн бэлэвсэн ээж Жэйн Нэйман руу харав. Иосеф 1 Коринт 15:29-ийг эш татаж, Бурханы төлөвлөгөөгөөр амьд хүмүүс нас барагсдын төлөө өмнөөс нь баптисм хүртэх боломжтой болсныг заасан. Хожим нь Жэйн, хүү Сайрусынхаа төлөө баптисм хүртсэн. Энэ бол энэ эрин үед гүйцэтгэсэн анхны баптисм байжээ (Гэгээнтнүүд: Хожмын Үеийн Есүс Христийн Сүмийн түүх, 1-р боть, Үнэний жишиг, 1815–1846 [2018], 421–422-ыг үзнэ үү).
Дараа нь Их Эзэн нас барагсдын төлөөх баптисмыг ариун сүмд гүйцэтгэх ёстой хэмээн илчилжээ (Сургаал ба Гэрээ 124:29–32-ыг үзнэ үү). 1841 оны 11-р сард гэгээнтнүүд дуусаагүй байсан Наувугийн ариун сүмд өвөг дээдсийнхээ төлөө баптисм хүртэж эхлэв. 1842 оны 9-р сард Иосеф Смит гэгээнтнүүдэд эдгээр ёслолын болон бусад нарийн ширийн чухал зүйлсийн цэдгийг хөтлөхийг зааварлажээ. Тэдгээр заавар нь одоо Сургаал ба Гэрээ 127, 128-д бий (Гэгээнтнүүд, 1:476–477-г үзнэ үү). Иосеф Смит цэдэг хөтлөгч нь ёслолыг гэрчилж байх ёстой бөгөөд сүмийн ерөнхий бүртгэлийн дэвтэрт үнэн зөв цэдгүүдийг оруулах ёстой хэмээн тайлбарлав. Мөн тэрээр бусад хүн ёслолын гэрч болох ёстой тухай заав. (Сургаал ба Гэрээ 128:2–4-ийг үзнэ үү). Дараа нь тэрээр юмсын энэ дэг жаяг маш тодорхой байх ёстой шалтгааныг тайлбарлав.
Сургаал ба Гэрээ 128:5-ыг уншихын өмнө “дэлхийн сууринаас өмнө” гэдэг нь дэлхий бүтээгдэхээс өмнө тэнгэрт зөвлөл байсан үеийг хэлдэг гэдгийг тайлбарлах нь тустай байж болно (Абрахам 3:22–27-г үзнэ үү).
Сургаал ба Гэрээ 128:5-ыг уншаад, та Тэнгэрлэг Эцэгийн төлөвлөгөөн дэх нас барагсдын төлөөх баптисмын талаар юу сурч мэдэж болохыг олж мэд.
-
Энэ шүлэг нь Тэнгэрлэг Эцэгийн тухай болон Түүний төлөвлөгөөний талаар бидэнд юу заадаг вэ?
Энэ үнэнийг олж тогтооход нь суралцагчдад тусал. Сайн мэдээний тухай мэдлэггүй байх үедээ нас барсан хүмүүсийг аврахын төлөө Тэнгэрлэг Эцэг арга замыг бэлтгэсэн.
Энэ үнэнийг самбарт бичиж, ярилцахад нь суралцагчдад тусалж болно. Дараах асуултуудаас заримыг тавих нь энэ үнэнийг ойлгоход суралцагчдад тусална. Та ангийнхныхаа сэтгэгдэл дээр санал бодлоо хуваалцахыг суралцагчдаас хүссэнээр ярилцлагыг илүү сонирхолтой болгож болно.
-
Энэ үнэн Тэнгэрлэг Эцэгийн онцлог шинж, зан чанар, зорилгын талаар бидэнд юу заадаг вэ?
-
Энэ үнэн танд болон танай гэр бүлд хэрхэн нөлөөлж болох вэ?
Энэ үнэний ач холбогдлыг мэдрэхэд нь суралцагчдад туслахын тулд гэрчлэлээ хуваалцах талаар бод. Эсвэл та дараах мэдэгдлийг хуваалцаж, суралцагчдыг өөрсдийн бодол, мэдрэмжийг хуваалцахад урьж болно.
Арван хоёр төлөөлөгчийн чуулгын ахлагч Д.Тодд Кристоффэрсон Есүс Христийн талаар болон нас барагсдын гэтэлгэлийг гэрчилсэн.
Бурхан бүхий л цаг үеийн бүхий л газрын хүүхдүүдээ хамруулж хайрладаг шиг бид тийм л өргөн цар хүрээтэй үүрэг хүлээдэг. Нас барагсдыг төлөөлөн гаргадаг бидний хичээл зүтгэл Есүс Христ бол бүх хүн төрөлхтний тэнгэрлэг Гэтэлгэгч мөн гэх гэрчлэлийг яруу тод илэрхийлдэг. Түүний ач ивээл, амлалтууд энэ амьдралдаа Түүнийг олоогүй хүмүүст ч хүрдэг. Түүний ачаар хоригдлууд үнэхээр чөлөөлөгдөх болно. (D. Todd Christofferson, “The Redemption of the Dead and the Testimony of Jesus,” Ensign, Nov. 2000, 11)
Дэлхий дээр ч, тэнгэрт ч цэдэглэгдсэн
Ариун сүмийн баптисмын өрөөний зургийг үзүүлэхийг бод. Цэдэг хөтлөгч болон гэрч нарыг олж заахад суралцагчдыг урь. Дараа нь суралцагчдыг Сургаал ба Гэрээ 128:3 дээрээс эдгээр даалгаврыг олж, тэмдэглэхэд урь. Хэрэв суралцагчид гэрчээр үйлчилж байсан бол тэднийг туршлагаа хуваалцахад урь.
Эдгээр хэсэг доторх хамаарлыг олоход нь суралцагчдад туслах нэг арга бол Аннагийн жишээг эргэн санах явдал юм.
Анна баптисм хүртсэнийхээ дараа ариун сүмд очиж, нас барсан эгчийнхээ төлөө баптисм хүртсэн. Тэрээр энэ ёслол тэнгэрт хүчинтэй эсэхийг хэрхэн мэдэж болох вэ гэж боддог.
Суралцагчдыг дараах судруудыг уншихаас өмнө та Сургаал ба Гэрээ 128:8 дээрх “өөрсдийнхөө зохих хүнээр” гэдэг нь өөрсдийнхөө төлөө баптисм хүртсэн хүмүүсийг, “өөрсдийгөө төлөөлсөн тэдний” гэдэг нь хэн нэгнээр дамжуулан баптисм хүртсэн хүмүүсийг хэлдэг гэдгийг тайлбарлаж болно.
Сургаал ба Гэрээ 127:5–7; 128:6–8-ыг уншаад, Аннагийн асуултад хариулж болох зүйлийг олж мэд.
-
Та ямар үг эсвэл хэллэгийг Аннатай хуваалцах вэ?
-
Тэнгэрлэг Эцэгийн төлөвлөгөөнд ёслолуудын цэдэг хөтлөх нь яагаад чухал гэж та бодож байна вэ?
-
Эдгээр шүлгийг ойлгох нь таны ариун сүмийн туршлагад хэрхэн нөлөөлөх вэ?
Бошиглогч Иосеф Смитээр сэргээгдсэн санваарын түлхүүрүүдийн ачаар ариун сүмд гүйцэтгэсэн ёслолууд дэлхийд төдийгүй тэнгэрт холбогдоно гэдгийг тайлбарла (Сургаал ба Гэрээ 128:9–11-ийг үзнэ үү).
“Зүрх сэтгэл чинь баясаг, мөн үлэмжийн баяртай байг”
Энэ хэсэг нь Тэнгэрлэг Эцэгийн авралын төлөвлөгөө агуу гэдгийг суралцагчдад мэдрүүлэхэд туслах зорилготой. Самбарт Тэнгэрлэг Эцэгийн төлөвлөгөө гэж бичээд, суралцагчдаас түүний талаарх мэдрэмжээ илэрхийлэх үг, хэллэгийг нэмж бичихэд урихыг бод. Яагаад тэгж санагдаж байгаагаа хуваалцахыг цөөн суралцагчаас хүс.
Суралцагчид мөн ариун сүмд баптисм болон гишүүний баталгааны ёслолд оролцохдоо мэдэрсэн зарим мэдрэмжээ самбарт нэмж бичиж болно.
Суралцагчид дараах судрын хэсгийг уншиж, асуултуудыг ярилцаж байх үедээ самбарт үг, хэллэг нэмж болно.
Иосеф Смит нас барагсдын гэтэлгэлийн алдар суут сургаалын талаарх үзэл бодлоо захидалдаа уран яруу илэрхийлсэн. Сургаал ба Гэрээ 128:22–23-ыг уншаад, Тэнгэрлэг Эцэгийн төлөвлөгөөний талаар илэрхийлсэн сэтгэл хөдлөлийг олж мэд.
-
Тэнгэрлэг Эцэгийн хүүхдүүдээ аврах төлөвлөгөөний талаарх таны мэдрэмжийг эдгээр шүлгийн ямар үг, хэллэг илэрхийлж байна вэ?
-
Та ариун сүм, гэр бүлийн түүхийн ажилд оролцож байхдаа эдгээр мэдрэмжийн аль нэгийг хэзээ мэдэрсэн бэ?
-
“Хоригдлууд чөлөөтэйгөөр явах болно” гэсэн нь юу гэсэн утгатай гэж та бодож байна вэ? (22-р шүлэг). Энэ яагаад агуу баяр баясгалангийн шалтгаан байж болох вэ?
Суралцагчдыг нас барагсдын төлөөх гэтэлгэлийн сургаалын талаар мэдрэмжээ илэрхийлэхэд урих талаар бод. Ийн илэрхийлэх үедээ Сүнсний өдөөлтүүдэд анхаарлаа хандуулахад тэднийг урь. Тэд бичиж, зурж эсвэл яриагаа бичлэг болгон үлдээж болно. Суралцагчид Тэнгэрлэг Эцэгийн төлөвлөгөө нь сайн мэдээний тухай мэдэхгүй байж байгаад нас барсан хүмүүст хэрхэн итгэл найдвар өгдгийг тайлбарлахын тулд самбар дээр жагсаасан хэллэгийн заримыг ашиглаж болно. Тэд мөн авралын төлөвлөгөө тэдний гэр бүлд үзүүлж байгаа нөлөөний талаар бичиж болно. Суралцагчид ариун сүм, гэр бүлийн түүхийн ажилд оролцсон утга учиртай туршлагаа дүрслэн ярихыг хүсэж болох юм.
Хангалттай хугацаа өгсний дараа, захиагаа сайн дураараа хуваалцахад суралцагчдыг урь. Мөн та Тэнгэрлэг Эцэгийн төлөвлөгөөн дэх нас барагсдын гэтэлгэлийн талаар сэтгэгдлээ хуваалцаж болно.