138-р хичээл: Сургаал ба Гэрээ 125–128

Сургаал ба Гэрээ 127–128, 2-р хэсэг

“Та нарын нас барагсдын төлөөх баптисм”

Иосеф Смит нас барагсдын төлөөх баптисмын сургаалын талаар гэгээнтнүүдэд захидлууд бичиж байжээ. Тэрээр гэгээнтнүүдэд нас барсан төрөл садныхаа өмнөөс баптисм хүртэхийн ач холбогдлыг ойлгуулахад туслахын тулд Библийн бошиглолуудыг тайлбарласан. Энэ хичээл нь нас барсан өвөг дээдсийнхээ тухай мэдээлэл олж авч, ариун сүмд тэдний төлөө ёслол гүйцэтгэхэд бэлтгэхэд нь суралцагчдад тусална.

Боломжит суралцах үйл ажиллагаа

Таны өвөг дээдэс

Өвөг дээдсийнхээ талаар бодоход суралцагчдад тусалснаар хичээлээ эхлүүлж болно. Та өөрсдийн мэдэх аль болох олон өвөг дээдсээ жагсаан бичихэд суралцагчдыг урьж болох юм. Суралцагчид Есүс Христийн Хожмын Үеийн Гэгээнтнүүдийн Сүмд баптисм хүртэх ёслолыг аль өвөг дээдэс нь хүлээн авч, аль нь аваагүйг тодорхойлж болно.

• Та өвөг дээдсийнхээ төлөө ариун сүм, гэр бүлийн түүхийн ажлыг хийж чадах эсэхдээ хэр итгэлтэй байна вэ?

Сургаал ба Гэрээ 127–128-ын агуулгын талаар юу санаж байгаагаа хуваалцахад суралцагчдыг урь. Мөн та дараах нэмэлт агуулгыг хуваалцаж болно.

Миссуригийн албаны хүмүүс Иосеф Смитийг захирагч асан Лилберн В.Боггс руу халдлага үйлдэхээр төлөвлөхөд тусалсан гэж буруутгав. Иосефт Миссурид буцаж очвол алуулах байх гэсэн сэжиг төржээ. Эдвард Хантэрын гэрт нуугдаж байхад нь Иосефт нас барагсдын төлөөх баптисмын тухай олон бодол, мэдрэмж төрж байв (Сургаал ба Гэрээ 128:1-ийг үзнэ үү). Иосеф Смит гэгээнтнүүдэд нас барагсдын төлөө гүйцэтгэх баптисмын ёслолын тухай чухал сургаал заахаар захидлууд бичжээ (Гэгээнтнүүд: Хожмын Үеийн Есүс Христийн Сүмийн түүх, 1-р боть, Үнэний жишиг, 1815–1846 [2018], 466–477-г үзнэ үү).

Та нарын нас барагсдын төлөөх баптисм

Арван хоёр төлөөлөгчийн чуулгын ахлагч Квинтин Л.Күк тодорхой хүмүүсийн төлөө ариун сүмийн ёслолуудыг гүйцэтгэх үүрэг хариуцлага бидэнд бий гэж заасан.

Гэр бүлийн талаарх сургаал нь гэр бүлийн түүх болон ариун сүмийн ажилтай уялдаа холбоотой байх нь тодорхой. Их Эзэн эхэн үеийн илчлэлтээр өгсөн заавартаа ‘өөрсдийн нас барагсдын төлөөх баптисм’-ын [Сургаал ба Гэрээ 127:5; тодотгол нэмсэн] тухай дурдсан байдаг. Бид сургаалын хувьд хүлээсэн үүрэг хариуцлагаа өвөг дээдсийнхээ өмнө хүлээнэ. Учир нь тэнгэр дэх селестиел зохион байгуулалт нь гэр бүл дээр үндэслэгдсэн байдаг. (Ахлагч Квинтин Л.Күк, “Үндэс ба мөчрүүд,” 2014 оны 4-р сарын Ерөнхий чуулган, 64)

Сургаал ба Гэрээ 127:5–6-г уншаад, ахлагч Күкийн онцолсон “та нарын нас барагсдын төлөөх баптисм” гэснийг тэмдэглэж ав.

• Та нас барсан өвөг дээдэстэйгээ уулзвал ямар байх бол гэж төсөөлж байна вэ? Тэд таны ариун сүм, гэр бүлийн түүхийн ажилд оролцсоныг хэрхэн хүлээн авч болох вэ?

ChurchofJesusChrist.org дээрх “Hearts Bound Together” видеог цагийн код 14:30-аас 15:02 хүртэл үзүүлэхийг бод. Энэ видеон дээр Тэргүүн зөвлөлийн ерөнхийлөгч Хэнри Б.Айринг нас барсан өвөг дээдэстэйгээ уулзахад ямархуу байж болох талаар хуваалцсан.

Тэдний аврал бидний авралд зайлшгүй чухал

Сургаал ба Гэрээ 128:15–18-ыг уншаад, бошиглогчид мөнхийн гэр бүлийн сургаал, нас барагсдын төлөөх баптисмын тухай юу заасныг олж мэд.

Сургаал ба Гэрээ 128:15–18-ыг судлахын тулд суралцагчдыг гурван бүлэгт хуваарилж, дараах бошиглогчдын заасан зүйлийг олж мэдэж болно. Бүлэг бүрийн нэг суралцагчийг бүлгийн удирдагч болоход урь. Энэ хүн хариуцах үүрэгт ажлуудыг хуваарилж болно. Нэг үүрэгт ажил нь бүлгийнхэн судраас юу судалсныг ангийнхандаа нэгтгэн дүгнэх юм.

• Иосеф Смит—15, 18-р шүлэг

• Төлөөлөгч Паул—15–16-р шүлэг

• Бошиглогч Малахи—17-р шүлэг

Суралцагчдыг эдгээр шүлгийг уншиж дууссаны дараа бүлэг бүрийг шүлгүүдээ нэгтгэн дүгнэхэд урь. Мөн та тэдний асуумаар байгаа зүйлсийг эсвэл чухал гэж үзсэн үг хэллэгүүдийн талаар ярилцаж болно.

• Бидний өвөг дээдсийн авралын талаар бошиглогчид юу заасан бэ?

  Суралцагчид хуваалцаж байхдаа олон үнэнийг тодорхойлж болно. Жишээлбэл:

  • Өвөг дээдсээ аврах нь бидний авралд зайлшгүй чухал.

  • Сайн мэдээгүйгээр нас барсан бидний өвөг дээдэс өөрсдийнх нь төлөө ариун сүмийн ёслолуудыг гүйцэтгэхээс нааш төгс төгөлдөр болтлоо өсөж хөгжиж чадахгүй.

  Эдгээр үнэн өнөөдөр яагаад чухал болохыг ойлгоход суралцагчдад тусал. Дараах асуултууд тусалж болно.

• Есүс Христ ямар ямар арга замаар бидний нас барсан өвөг дээдэст аврал авчрах боломжтой болгодог вэ?

• Ариун сүм, гэр бүлийн түүхийн ажилд оролцох нь Аврагчийн үлгэр жишээг дагахад тань хэрхэн тусалж болно гэж та бодож байна вэ?

Тэргүүн зөвлөлийн ерөнхийлөгч Хэнри Б.Айринг бидний чухал үүрэгт ажлын талаар гэрчилсэн.

Олон өвөг дээдэс тань эдгээр ёслолоос хүртээгүй ч Бурхны авралаар та хүртсэн. Мөн та өвөг дээдсээ хайрлаж, тэдэнд татагдахыг мөн танд тэднийгээ олоход шаардагдах техник технологи өгөгдөнө гэдгийг Бурхан бас л мэдэж байсан. Түүнээс гадна ёслолуудыг гүйцэтгэдэг ариун сүмүүдэд орох боломж түүхэнд урьд өмнө хэзээ ч байгаагүй их олдох цаг үед амьдарна гэдгийг тань ч гэсэн Тэр мэдэж байв. Мөн бас өвөг дээдсийнхээ өмнөөс энэ ажлыг хийнэ гэдэгт танд итгэж болно гэдгийг Тэр бас мэдэж байсан. …

… Олон өсвөр үеийнхэн цаг заваа гэр бүлийн түүхийн судалгаа, ариун сүмийн ажил зэрэгт зарцуулах нь авралын төлөвлөгөөний талаарх тэдний гэрчлэлийг гүнзгийрүүлдэг гэдгийг олж мэдсэн. Энэ нь тэдний амьдрал дахь Сүнсний нөлөөг нэмэгдүүлж, дайсны нөлөөг сулруулсан. Мөн гэр бүлдээ болон Их Эзэн Есүс Христэд илүү ойртоход нь тусалсан байна. Тэд бас энэ ажил зөвхөн нас барагсдыг биш харин бид бүгдийг авардаг гэдгийг мэдсэн [Сургаал ба Гэрээ 128:18-ыг үзнэ үү]. (Хэнри Б.Айринг, “Бурханы гэр бүлийг цуглуулах нь,” 2017 оны 4-р сарын Ерөнхий чуулган,)

• Ариун сүм, гэр бүлийн түүхийн ажилд оролцохын тулд та юу хийсэн бэ? Их Эзэн үүнийг хийсний төлөө таныг хэрхэн адисалсан бэ?

• Энэ ажилд оролцох нь Есүс Христэд илүү ойр байгаагаа мэдрэхэд танд хэрхэн тусалсан бэ?

Ариун сүм, гэр бүлийн түүхийн ажилд оролцох

Хичээлийн энэ хэсэг нь гэр бүлийн түүхийн ажилд оролцож, ариун сүмд ёслолуудыг гүйцэтгэхээр бэлтгэхэд нь суралцагчдад туслах зорилготой. Суралцагчдыг үүнд оролцоход урих олон арга зам бий. Санаа авч болох зарим жишээг өгөв.

• Дараах үйл ажиллагааны жагсаалтыг харуулаад, тэдгээрийн талаар ангийнхандаа зааж чадах эсэхийг нь суралцагчдаас асуу. Дараа нь суралцагчид даалгавруудыг хэрхэн гүйцэтгэхээ харуулж болно.

• Ангийнхныг жижиг бүлгүүдэд хуваарилж, суралцагчдыг үйл ажиллагаанууд дээр хамтран ажиллахад урь. Туршлагатай суралцагчид туршлагагүй суралцагчдадаа тусалж болно.

• Зарим үйл ажиллагаанд суралцах өртөөг бий болго. Үйл ажиллагааг сайн мэддэг нэг суралцагчийг өртөөг удирдахад урь. Суралцагчид сонгосон өөр өөр өртөөгөөр тойрон оролцож болно.

Тойргийнхоо ариун сүм, гэр бүлийн түүхийн зөвлөхийг урих талаар бодож үз. Хэрэв технологийн хүртээмж хязгаарлагдмал бол доор жагсаасан эхний үйл ажиллагаанд анхаарлаа хандуулж болно.

• Миний гэр бүл: Биднийг нэгтгэдэг түүхүүд товхимол дээрх төрөл бүрийн үйл ажиллагааг гүйцэтгэ.

• FamilySearch дээрх гэр бүлийн модтойгоо танилц.

• Ариун сүм рүү авч явах нэрс олохын тулд FamilySearch дээрх “Ёслолууд нь бэлэн” функцийг ашигла.

• Ариун сүмд очих цагаа temples.ChurchofJesusChrist.org дээр товло.

• FamilySearch дээрх гэр бүлийн модондоо хэрхэн хүн нэмэх эсвэл түүхийн тэмдэглэл хавсаргахтай танилц.

• FamilySearch дээрх гэр бүлийн модныхоо хүмүүст дурсамж нэм.

• FamilySearch.org дээрх “Үйл ажиллагаа” хэсгийг судал.

• Gospel Library дахь “Гэр бүл ба ариун сүм” хэсгийг судал.

Хангалттай цаг гаргаж өгсний дараа суралцагчдыг юу хийж, юу олж мэдсэнээ ангийнхантайгаа хуваалцахад урь. Суралцагчид ариун сүм, гэр бүлийн түүхийн ажилд оролцох итгэл нь хэрхэн өссөн тухай ярилцаж болно.

Хүндлэл хүлээж, үнэ цэнтэй гэдгээ мэдрэхэд нь суралцагчдад тусал. Та суралцагчдыг хүндэлж, үнэлдгээ хэрхэн харуулах талаар илүү ихийг мэдэхийн тулд “Send a message to a student’s parent about something positive you have noticed about their child” гэсэн гарчигтай сургалтыг үзнэ үү. Энэ сургалтын материалыг Багшийн хөгжүүлбэл зохих ур чадвар: Заадаг хүмүүсээ хайрла гарын авлагаас олох боломжтой.

Сургаал ба Гэрээ 128:24-ийг уншаад, Их Эзэнд өгч болох өргөлийн талаар олж мэд.

• Бидний хийдэг ариун сүм, гэр бүлийн түүхийн ажлыг та яагаад Их Эзэнд өргөх шударга өргөл гэж бодож байна вэ?

• Та Их Эзэнд ариун сүм, гэр бүлийн түүхийн ажлын ямар өргөлийг өгөхөөр сүнслэгээр өдөөгдөж байна вэ?

Суралцагчдыг хүлээн авсан сэтгэгдлийнхээ дагуу үйлдэхэд урь. Гэртээ гэр бүлийнхэнтэйгээ ариун сүм, гэр бүлийн түүхийн ажилд оролцоход суралцагчдыг урамшуул.

Нэмэлт эх сурвалж

Сургаал ба Гэрээ 128:20. “Цаг хугацааны бүрэн байдлын эрин үе” гэж юу вэ?

Эрин үе бол Их Эзэн Өөрийн сургаал, ёслолуудыг болон санваарыг илчилдэг цаг үе юм. Одоогийн эрин үе нь Иосеф Смитээс эхэлсэн бөгөөд цаг хугацааны бүрэн байдлын эрин үе гэж нэрлэгддэг. Бошиглогч Иосеф Смит (1805–1844) ийн заасан. “Цаг хугацааны бүрэн байдлын эрин үе нь өмнөх бүх эрин үед илчлэгдсэн зүйлсийг, бас өмнө нь илчлэгдээгүй бусад зүйлийг илчлэх болно. Тэрбээр Христ дотор бүх зүйлийг сэргээхийн тулд бошиглогч Елиа болон бусдыг илгээх болно” (Сүмийн ерөнхийлөгчдийн сургаалаас: Иосеф Смит [2007], х. 510–511-ийг мөн Сургаал ба Гэрээ 128:18-ыг үзнэ үү).

Өвөг дээдсийнхээ төлөө ёслолуудыг гүйцэтгэх нь Есүс Христтэй адил болоход бидэнд хэрхэн туслах вэ?

Арван хоёр төлөөлөгчийн чуулгын ахлагч Гэррит В.Гонг ийн тунхагласан.

Өөрсдөд нь хэрэгтэй боловч өөрсдийнхөө төлөө хүлээн авч чадахгүй байгаа нас барагсдын төлөө үйлдэх ариун сүмийн ёслолуудыг гүйцэтгэх үед Их Эзэн Өөртэй нь илүү адил болох бурханлаг боломжийг бидэнд өгдөг. Бид “Сион уул өөд … Эзэнийх болох” үедээ илүү бүрэн дүүрэн, төгс болдог [Обадиа 1:21]. (Гэррит В.Гонг, “Үүрд мөнхөд аз жаргалтай,” 2022 оны 10-р сарын Ерөнхий чуулган)

Тэргүүн зөвлөлийн ерөнхийлөгч Хэнри Б.Айринг ийн заасан.

Дараа нь тэд өсвөр насандаа ариун сүмд төлөөлөн гүйцэтгэх баптисм хүртэх ариун сүмийн эрхийн бичиг хүлээн авах өдөр ирнэ. Энэхүү туршлага нь, ариун сүмийн ёслолууд нь үргэлж Аврагч руу болон Түүний Цагаатгал руу чиглэдэг гэсэн тэдний мэдрэмжийг өсгөн нэмэгдүүлэх болно. Тэд сүнсний дэлхийд байгаа нэгэнд нүглээсээ ангижрах боломж олгож байгаагаа мэдрэх үедээ Тэнгэрлэг Эцэгийн маань хүүхдүүдийг адислах Аврагчийн ариун ажилд туслах тэдний хүсэл улам нэмэгдэх болно. (Хэнри Б.Айринг, “Би ариун сүм харах дуртай,” 2021 оны 4-р сарын Ерөнхий чуулган)

Ариун сүм, гэр бүлийн түүхийн ажлыг хийдэг хүмүүст ямар адислал амладаг вэ?

Арван хоёр төлөөлөгчийн чуулгын ахлагч Дэвид А.Бэднар ийн амлажээ.

Залуучууд мэдээлэл харилцааны технологитой ийм их ойр болсон өнөө үед FamilySearch болон бусад хэрэгсэл гарч ирсэн нь тохиолдлын хэрэг биш ээ. Зөвхөн найзуудтайгаа харилцахын тулд биш харин Их Эзэний ажлыг урагшлуулахын тулд та нар гар утас болон компьютер дээрээ мессеж маш хурдан бичиж сурсан. Өнөөгийн залуучуудын авьяас, ур чадварыг авралын ажилд хувь нэмрээ оруулахад ашиглаж болно.

Елиагийн сүнсний тухай мэдэж авч, үүнийг мэдрэхийг би Сүмийн залуучуудаас хүсэж байна. Түүнчлэн тэднээс өвөг дээдсийнхээ тухай сурч мэдэн, тэднийг эрж хайж, нас барагсдынхаа өмнөөс баптисм хүртэхэд өөрсдийгөө бэлдэхийг хүсэж байна (С ба Г 124:28–36-г үзнэ үү). Мөн бусад хүнд гэр бүлийн түүхээ олж мэдэхэд нь туслахыг би та бүхэнд уриалж байна.

Та ийн үйлдэх аваас таны зүрх сэтгэл эцгүүд рүүгээ эргэх болно. Абрахам, Исаак, Иаков нарт өгсөн амлалтууд та нарын зүрх сэтгэлд суух болно. Таны патриархын адислал, түүн дээр мэдэгдсэн уг гарал таныг эцгүүдтэй тань холбож, ингэснээр танд илүү утга учиртай болж ирнэ. Та өвөг дээдсээ улам илүү хайрлаж, тэдэнд илүү их талархах болно. Аврагчийн тухай таны гэрчлэл илүү гүн гүнзгий, бат бөх болно. Та нар өсөн нэмэгдэж буй дайсны нөлөөнөөс хамгаалагдах болно гэдгийг би та нарт амлаж байна. Та энэхүү ариун нандин ажилд оролцож, энэ ажлыг хийх хүсэлтэй болсноор залуу насандаа мөн амьдралынхаа туршид хамгаалагдах болно. (Дэвид A.Бэднар, “Хүүхдүүдийнх нь зүрх сэтгэл эцгүүд уруугаа эргэх болно,” 2011 оны 10-р сарын Ерөнхий чуулган, 26–27)

Арван хоёр төлөөлөгчийн чуулгын ахлагч Дэйл Г.Рэнланд ийн амласан.

Бид өнөөдөр ариун сүм, гэр бүлийн түүхийн ажилд оролцсоноор бошиглогч, төлөөлөгчдийн амласан “эдгээх” адислалуудаас хүртэх эрхтэй болдог. Эдгээр адислал нь мөнх бус байдалд хамрах хүрээ, онцлог шинж, үр нөлөөгөөрөө үнэхээр гайхамшигтай билээ. Тэрхүү урт жагсаалтад дараах адислалуудыг оруулжээ. Үүнд:

• Аврагч болон Түүний цагаатгагч золиослолын талаарх өсөн нэмэгдсэн ойлголт;

• Амьдралдаа хүч чадал, чиг баримжааг мэдрэхэд нөлөөлөх Ариун Сүнсний өсөн нэмэгдсэн нөлөө;

• Аврагчид хөрвөгдөх хөрвөлтийг гүнзгийрүүлж, бат бөх болгох өсөн нэмэгдсэн итгэл;

• Бид хэн болох, хаанаас ирсэн тухай ойлголтын ачаар мөн хаашаа явж байгаа талаарх илүү тодорхой алсын харааны ачаар суралцаж, наманчлах өсөн нэмэгдсэн чадвар, урам зориг;

• Зүрх сэтгэлд маань өсөн нэмэгдсэн цэвэршүүлэх, ариусгах, зөөлрүүлэх нөлөө;

• Их Эзэний хайрыг мэдрэх өсөн нэмэгдсэн чадвараар дамжуулан өсөн нэмэгдсэн баяр баясгалан;

• Бидний одоогийн болон өнгөрсөн үеийн мөн ирээдүйн гэр бүлийн нөхцөл байдал эсвэл гэр бүлийн мод маань хэр төгс бус байхаас үл хамааран өсөн нэмэгдсэн гэр бүлийн адислалууд;

• Өвөг дээдэс болон амьд байгаа хамаатан саднуудаа хайрлах өсөн нэмэгдсэн хайр, талархал, үүнээс уламжлаад бид ахиад хэзээ ч ганцаардахгүй байх;

• Эдгээх хэрэгцээ шаардлагыг ялган таних, мөн Их Эзэний тусламжтайгаар бусдад үйлчлэх өсөн нэмэгдсэн хүч чадал;

• Уруу таталт болон хурдацтай өсөж байгаа дайсны нөлөөнөөс хамгаалах өсөн нэмэгдсэн хамгаалалт;

• Зовсон, цөхөрсөн, түгшсэн зүрх сэтгэлийг засаж, шархадсаныг анагаах өсөн нэмэгдсэн тусламж дэмжлэг зэрэг нь багтдаг.

Хэрэв та эдгээр адислалын аль нэгний төлөө залбирч байсан бол гэр бүлийн түүхийн болон ариун сүмийн ажилд оролц. Ингэснээр залбирал тань хариулагдах болно. Нас барагсдын өмнөөс ёслолуудыг гүйцэтгэхэд дэлхий дээрх Бурханы хүүхдүүд эдгээгддэг. (Дэйл Г.Рэнланд, “Гэр бүлийн түүх, ариун сүмийн ажил: Лацдан холболт ба эдгээлт,” 2018 оны 4-р сарын Ерөнхий чуулган)

Нэмэлт суралцах үйл ажиллагаа

Ариун сүм, гэр бүлийн түүхийн ажлын адислалууд

Хэрэв та суралцагчдадаа ариун сүм, гэр бүлийн түүхийн ажилд оролцоход амласан адислалуудын заримыг судлах нь тустай гэж бодож байвал дараах видеоны нэгийг эсвэл аль алиныг үзүүлж болно: “The Promised Blessings of Temple and Family History Work” (3:26); “The Promised Blessings of Temple and Family History Work 2” (4:04).

Мөн та суралцагчдыг “Нэмэлт эх сурвалж” дээрх мэдэгдлүүдэд амласан адислалуудыг уншиж, тэмдэглэхэд урьж болно. Суралцагчид амьдралдаа ямар адислалуудыг хүртэж, ямар адислалуудыг хүсэж байгаа талаар ярилц.

FamilySearch-ийг ашиглахад суралцах

Суралцагчид ангийн үйл ажиллагаанууд дээр ажиллахдаа “Video Tutorials on How to Use FamilySearch” хуудсыг ашиглаж болно.

Сургаал ба Гэрээ 128:18. Гагнагч холбоос

Энэ үйл ажиллагаа нь суралцагчдад гагнагч холбоосны сургаалыг ойлгоход тусална. Та нас барсан гэр бүлийн гишүүдийнхээ төлөө ариун сүмийн ёслолуудыг гүйцэтгэх нь тэдний хооронд гагнагч холбоосыг хэрхэн үүсгэдэг талаар ярилцахдаа гинж үзүүлж болно. Мөн суралцагчид цаасан гинж хийж, холбоос бүр дээр гэр бүлийн гишүүд болон өвөг дээдсийнхээ нэрийг бичиж болох юм. Суралцагчид ариун сүмийн ёслолуудыг гүйцэтгэх нь өвөг дээдэстэйгээ илүү ойр болж байгааг мэдрэхэд нь хэрхэн тусалдаг талаар хуваалцаж болно.

Видео

Дараах видеонуудад өсвөр үеийнхний ариун сүм, гэр бүлийн түүхийн ажилд оролцсоноор адислагдсан туршлагыг харуулдаг. Үүнийг үзсэнээр суралцагчид хувь хувьдаа туршлагаа хуваалцахад бэлтгэгдэнэ.

• “Improve Your Temple Experience; Change Your Life” (3:21)

• “Personal Stories: Temple and Family History” дээрх видеонууд