Lēsoni 140: Tokāteline mo e Ngaahi Fuakava 129–132

Tokāteline mo e Ngaahi Fuakava 131

Ko e Fuakava Foʻou mo Taʻengata ʻo e Malí

Ko e mali ʻi he vahaʻa ʻo ha tangata mo ha fefiné ko ha konga mahuʻinga ia ʻo e palani ʻa e Tamai Hēvaní maʻa ʻEne fānaú. Naʻe fakahā ʻe he ʻEikí ʻo fakafou ʻi he Palōfita ko Siosefa Sāmitá, ko e taimi ʻoku silaʻi ai ʻa e husepānití mo e uaifí ʻi he mālohi ʻo e lakanga fakataulaʻeikí pea ʻokú na tauhi faivelenga ki heʻena ngaahi fuakavá, ʻe tolonga ʻena malí ʻo fakalaka atu ʻi he maté. ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e mali taʻengatá ʻi he palani ʻa e Tamai Hēvaní.

Ngaahi ʻEkitivitī Ako ʻOku Ala Fakahokó

Ko e mahino ki he malí

Fakakaukau ke hiki ʻa e kupuʻi lea ko ʻení ʻi he palakipoé pea fakaafeʻi ʻa e kau akó ke hiki ʻenau ngaahi fakakaukau fekauʻaki mo e meʻa ʻokú ne akoʻí. Hangē ko ʻení, te ke lava ʻo vahevahe ʻa e kau akó ki ha fanga kiʻi kulupu iiki pea aleaʻi ʻa e ngaahi fehuʻi ko ʻení.

Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e taha ʻo e ngaahi ngāue maʻongoʻonga ʻo hotau kuongá … ke tokoni ke mahino ki he kakaí ʻa e ʻuhinga mo e taumuʻa totonu ʻo e malí. (David A. Bednar, “The Divine Pattern of Eternal Marriage,” Ensign, Sepitema 2020, 41)

• Te ke fakamatalaʻi fēfē ʻa e “ʻuhinga mo e taumuʻa totonu ʻo e nofo-malí”?

• Ko e hā ha ngaahi sīpinga ʻo e taʻefemahinoʻaki ʻa e kakaí fekauʻaki mo e malí ʻi he ʻahó ni?

ʻE lava ke vahevahe ʻe he kau akó ha ngaahi taʻefemahinoʻaki hangē ko e ongoʻi ʻe ha kakai ʻe niʻihi ʻoku lelei ange ʻenau taʻemalí pe ʻoku ʻikai fiemaʻu ke ʻi he vahaʻa ʻo ha tangata mo ha fefine ʻa e malí.

Fakaafeʻi ʻa e kau akó ke faʻu ha ʻuluʻi tohi ʻi heʻenau tohinoa akó ʻo ui ko e Ko e hā ʻoku mahuʻinga ai ʻa e malí ki he ʻOtuá? Fakaafeʻi kinautolu ke tohi ʻa e founga te nau tali ʻaki ʻa e fehuʻi ko iá. ʻE lava foki ke fakaafeʻi kinautolu ke nau fakalaulauloto ki heʻenau ngaahi ongo pe fehuʻi fakataautaha ʻoku nau maʻu fekauʻaki mo e malí.

Poupouʻi kinautolu ke tānaki ha ngaahi tali ki heʻenau tohinoa akó ʻi he lele ʻa e lēsoní. Fakamoʻoni ange ʻi heʻenau fekumi ʻi he loto-fakatōkilalo ke mahino ʻa e ʻuhinga ʻoku mahuʻinga ai ʻa e malí ki he ʻOtuá, ʻe lava ke fakamālohia ʻe he Laumālie Māʻoniʻoní ʻenau fakamoʻoni ki he nofo-malí mo tokoni ke tali ʻenau ngaahi fehuʻí pe ngaahi meʻa ʻoku nau hohaʻa ki aí.

Mali taʻengatá

Fakakaukau ke vahevahe pe fakamatalaʻi fakanounou ʻa e palakalafi ko ʻení ke tokoni ke mahino ki he kau akó ʻa e puipuituʻa ki he ngaahi akonaki ʻi he Tokāteline mo e Ngaahi Fuakava 131:

ʻI Mē ʻo e 1843, lolotonga ʻa e ʻi Leimasi, ʻIlinoisi ʻa Siosefa Sāmitá, naʻá ne talaange kia Penisimani mo Melisa Sionisoni naʻá ne fakataumuʻa ke fakahoko ʻena malí ʻo fakatatau ki he fono ʻa e ʻEikí. Koeʻuhí naʻá na ʻosi mali, naʻe tukuhua ʻa Penisimani te ne toe mali pē mo Melisa kapau te ne kole ange ki ai. Ka naʻe fakamātoato ʻa Siosefa. Naʻe akoʻi ange ʻe he Palōfitá ʻa e tokāteline ʻo e mali taʻengatá, peá ne silaʻi ʻa e ongomeʻa malí ki he taʻengatá. Naʻe hoko ʻa Uiliami Keleitoni ko e tangata tohi ʻa Siosefa ʻi he taimi ko iá peá ne lekooti ʻene ngaahi akonakí, ʻa ia ʻoku maʻu ʻi he taimí ni ʻi he Tokāteline mo e Ngaahi Fuakava 131 (vakai, “Our Hearts Rejoiced to Hear Him Speak,” ʻi he Revelations in Context [2016], 279–280).

Kimuʻa peá ke fakaafeʻi ʻa e kau akó ke lau ʻa e ngaahi veesi ko ʻení, ʻe ala tokoni ke nau ʻiloʻi ko e tuʻunga māʻolunga taha ʻo e puleʻanga fakasilesitialé ʻoku faʻa ui ia ko e moʻui taʻengatá pe hakeakiʻí. Ko kinautolu ʻoku hakeakiʻí te nau nofo taʻengata mo e Tamai Hēvaní pea mo Sīsū Kalaisi pea hoko ʻo hangē ko Kinauá. ʻOku ʻuhinga ʻa e “fuakava foʻou mo taʻengata ʻo e malí” ki he fuakava ʻoku fakahoko ʻe he ngaahi hoa-malí ʻi he temipalé ʻa ia ʻoku nau malava ai ke sila ki taimi mo ʻitānití.

Lau ʻa e Tokāteline mo e Ngaahi Fuakava 131:1–4, ʻo kumi ʻa e meʻa naʻe akoʻi ʻe he Palōfitá fekauʻaki mo e malí.

Ko e Tokāteline mo e Ngaahi Fuakava 131:1–4 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

• Ko e hā ʻoku akoʻi ʻe he ngaahi veesi ko ʻení fekauʻaki mo e mahuʻinga ʻo e malí ʻi he palani ʻa e Tamai Hēvaní?

  Hiki ha foʻi moʻoni hangē ko ʻení ʻi he palakipoé ʻo fakaʻaongaʻi ʻa e ngaahi lea ʻa e kau akó, kapau ʻe lava: Ke hoko ʻo hangē ko e ʻOtuá pea toe nofo mo Ia ʻi he puleʻanga fakasilesitialé, kuo pau ke tau fakahoko ʻa e fuakava foʻou mo taʻengata ʻo e malí. Fakaafeʻi ʻa e kau akó ke tānaki ʻa e foʻi moʻoni ko ʻení ki he lisi ʻo e ngaahi talí ʻi heʻenau tohinoa akó.

• ʻOkú ke pehē ʻe lava fēfē ʻe he malí ʻo teuteuʻi kitautolu ke tau hoko ʻo hangē ko e ʻOtuá?

Ko e mahuʻinga ʻo e malí ʻi he palani ʻa e ʻOtuá

Fakaafeʻi ʻa e kau akó ke hokohoko atu ʻenau ako fekauʻaki mo e mahuʻinga ʻo e malí ʻi he palani ʻa e ʻOtuá. Te nau lava ʻo ngāue fakafoʻituitui pe fakakulupu iiki ʻi he ʻekitivitī ko ʻení. Kapau ʻe fiemaʻu, fakakaukau ke paaki ha ngaahi lea pe fakamatala mei he kau taki ʻo e Siasí ʻe lava ke ako ʻe he kau akó. Fakaafeʻi ʻa e kau akó ke lekooti ʻa e meʻa ʻoku nau akó ʻi heʻenau tohinoa akó.

Te ke lava foki ʻo huluʻi ʻa e foʻi vitiō “Eternal Marriage, an Apostolic Perspective” (5:26), ko ha konga ʻo e ʻekitivitī ko ʻení, ʻoku maʻu ʻi he blog Inspiration ʻi he ChurchofJesusChrist.org.

Fili ha fokotuʻu ʻe taha pe lahi ange mei he ngaahi fokotuʻu ko ʻení ke ke ʻiloʻi ai ha toe ngaahi tali ki he fehuʻi “Ko e hā ʻoku mahuʻinga ai ʻa e malí ki he ʻOtuá?” Tānaki ha ngaahi moʻoni ʻokú ke ako ki he lisi ʻo e ngaahi tali ʻi hoʻo tohinoa akó.

1. Fekumi ʻi he ngaahi folofolá. Ako ʻa e Tokāteline mo e Ngaahi Fuakava 49:15–17; 132:19. Kumi ha ngaahi potufolofola kehe ke ako ʻaki haʻo kumi ʻa e “Malí” ʻi he Fakahinohino ki he Ngaahi Folofolá.

2. Ako ʻa e ngaahi akonaki ʻa e kau taki ʻo e Siasí. Kumi ʻa e “malí” ʻi he polokalama Gospel Library pe ʻi he konga ki he ngaahi tefitó ʻo e ʻākaivi lea konifelenisi lahí.

3. ʻAve ha pōpoaki text ki ha mēmipa ʻo e fāmilí pe tokotaha lahi falalaʻanga ʻo ʻeke ange pe te nau tali fēfē ʻa e fehuʻi “Ko e hā ʻoku mahuʻinga ai ʻa e malí ki he ʻOtuá?”

ʻI he ʻosi ʻa e ako ʻa e kau akó, fakaafeʻi kinautolu takitaha ke hiki ʻi he palakipoé ha foʻi moʻoni ʻe taha ne nau ako fekauʻaki mo e ʻuhinga ʻoku mahuʻinga ai ʻa e malí ki he ʻOtuá. Te nau lava foki ʻo fakakau ʻa e maʻuʻanga tokoni naʻa nau fakaʻaongaʻi ke maʻu ʻa e foʻi moʻoni ko iá. Fakaafeʻi ʻa e kalasí ke vakai ki he meʻa kuo tohi ʻe honau kaungāakó pea feinga ke ʻiloʻi ha ngaahi moʻoni te nau lava ʻo tānaki ki heʻenau tohinoa akó. Fakakaukau ke aleaʻi ʻa e meʻa kuo ako ʻe he kau akó ʻaki haʻo fai ha ngaahi fehuʻi hangē ko ʻení:

• Ko e hā ha meʻa naʻá ke ako naʻe ʻikai ke ke ʻilo kimuʻa?

• ʻE lava fēfē ke tokoniʻi koe ʻe he ngaahi akonaki ko ʻení ʻi he taimi ʻokú ke fakatokangaʻi ai ha ngaahi fakakaukau ʻi he māmaní ʻoku fepaki mo e ngaahi fono ʻa e ʻOtuá fekauʻaki mo e malí?

• ʻE lava fēfē ʻe he vakai ki he malí mei he fakakaukau ʻa e ʻOtuá ʻo tākiekina hoʻo ngaahi ongo fekauʻaki mo e malí?

Fakamatalaʻi ʻa e tokāteline ʻo e malí

Kapau ʻokú ke ongoʻi ʻe ʻaonga ki he kau akó hono fakamatalaʻi fakanounou ʻa e meʻa kuo nau akó, fakakaukau ke fakakulupu tautau toko ua kinautolu. Fakaafeʻi kinautolu ke tali ʻa e tūkunga mo e ongo fehuʻi ko ʻení mo honau hoá:

Fakakaukauloto ʻokú ke aleaʻi hoʻo ngaahi taumuʻa ʻi he kahaʻú mo ha kaungāmeʻa. ʻI he taimi ʻokú ke talaange ai ʻokú ke ʻamanaki ke malí, ʻoku fehuʻi atu ho kaungāmeʻá, “Ko e hā ʻoku mahuʻinga ai ʻa e malí?”

• Te ke tali fēfē ki ho kaungāmeʻá ʻo fakaʻaongaʻi ʻa e ngaahi akonaki kuó ke ako ʻi he ʻaho ní?

Poupouʻi ʻa e kau akó ke teuteu ke maʻu ʻa e ngaahi tāpuaki ʻo e mali taʻengatá. Fakamoʻoni ange ʻi heʻenau ngāue ʻaki ʻenau tui kia Sīsū Kalaisí, te nau aʻusia ʻa e ngaahi tāpuaki ʻokú Ne finangalo ke foaki kiate kinautolú.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola ki he fakataukei fakatokāteliné mo e kupuʻi lea fakafolofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻingá ko e “[Ko e] fuakava foʻou mo taʻengata ʻo e malí.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko fē te u lava ʻo ako lahi ange ai fekauʻaki mo e mali taʻengatá?

• “Fekauʻaki mo e Ngaahi Sila ʻi he Temipalé,” temples.ChurchofJesusChrist.org

• “The Divine Pattern of Eternal Marriage,” David A. Bednar, Ensign, Sept. 2020, 34–41

ʻOku kau ʻi he fuakava foʻou mo taʻengatá ʻa e malí pē?

Vakai, Fakahinohino ki he Ngaahi Folofolá, “Fuakava Foʻou mo Taʻengatá,” scriptures.ChurchofJesusChrist.org.

Ko e hā ha ngaahi tāpuaki te tau lava ʻo maʻu ʻi he taimi ʻoku tau mali ai ʻi he temipalé?

Naʻe akonaki ʻa Palesiteni Lāsolo M. Nalesoni ʻo pehē:

Kapau naʻe malava ke u talanoa fakafoʻituitui mo e taautaha kei talavou kotoa, te u kole fakamātoato atu ke kumi haʻo hoa ʻe lava ke mo sila ʻi he temipalé. Mahalo te ke fifili pe ko e hā hano ʻaonga ki hoʻo moʻuí. ʻOku ou palōmesi atu ʻe ʻaonga kotoa ia! ʻI hoʻo mali ʻi he temipalé mo toutou foki ki aí, ʻe fakamālohia ai koe mo tataki hoʻo ngaahi filí.

Kapau ne u lava ke talanoa mo e husepāniti mo e uaifi kotoa pē ʻoku teʻeki ai sila ʻi he temipalé, te u kole fakamātoato ange ke nau fakahoko ʻa e ngaahi sitepu ʻoku fiemaʻu ke nau maʻu ai ʻa e fungani ouau liliu moʻui ko iá. ʻE ʻaonga nai? Kapau pē te mo fie fakalakalaka fakataha ʻo taʻengata. He ʻikai ke lava ʻe he fakaʻamu pē ke mo fakataha ʻo taʻengatá, ʻo fakahoko ia. He ʻikai lava ʻe ha toe ouau pe aleapau ʻo fakahoko ia. (Russell M. Nelson, “Ko e Temipalé mo Hoʻo Fakavaʻe Fakalaumālié,” Liahona, Nōvema 2021, 95)

ʻE lava fēfē ʻe kinautolu ʻoku teʻeki mali ʻi he taimi ní ʻo maʻu ʻa e ngaahi tāpuaki ʻo e moʻui taʻengatá?

ʻOku kau ʻi he talaʻofa ʻa e ʻOtuá ki he moʻui taʻengatá ʻa e mali taʻengatá, fānaú, mo e ngaahi tāpuaki kehe kotoa pē ʻo e fāmili taʻengatá. ʻOku kaunga ʻa e talaʻofa ko ʻení kiate kinautolu ʻoku ʻikai ke nau lolotonga mali pe ʻikai kau ki ha fāmili ʻi he Siasí (vakai, 38.1.4). Neongo ʻoku ʻikai ke ʻiloʻi ʻa e taimi totonu mo e founga ʻoku maʻu ai ʻa e ngaahi tāpuaki ʻo e hakeakiʻí, ka ʻoku fakapapauʻi ʻa e ngaahi tāpuaki ko ʻení kiate kinautolu ʻoku fāifeinga ke moʻui ko e kau ākonga ʻa Sīsū Kalaisí. (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 2.1)

Tokāteline mo e Ngaahi Fuakava 132:19. Ko e hā hono ʻuhinga ʻo e fakamaʻu ʻe he Laumālie Māʻoniʻoni ʻo e talaʻofá?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e Laumālie Māʻoniʻoni ʻo e Talaʻofá ko e mālohi fakamoʻoni ia ʻo e Laumālie Māʻoniʻoní. ʻI he taimi ʻoku fakamaʻu ai ʻi he Laumālie Māʻoniʻoni ʻo e Talaʻofá, ʻoku fakamaʻu ʻi māmaní pea ʻi he langí ha ouau, fakapapau, pe fuakava. (Vakai, Tokāteline mo e Ngaahi Fuakava 132:7.) Ko hono maʻu ʻa e “fakaʻilonga fakangofua” ko ʻeni mei he Laumālie Māʻoniʻoní ko e ola ia ʻo e faivelengá, faitotonú, mo e tuʻu taʻeueʻia ʻi hono fakaʻapaʻapaʻi ʻa e ngaahi fuakava ʻo e ongoongoleleí “[ʻi he moʻuí]” (Mōsese 7:21). Ka neongo ia, ʻe malava ke fakataʻeʻaongaʻi ʻe he taʻe-māʻoniʻoní mo e maumau fonó ʻa e fakamaʻu ko ʻení. (David A. Bednar, “Ye Must Be Born Again,” Liahona, May 2007, 22)

Ngaahi ʻEkitivitī Fakalahi ki he Akó

ʻAho ke ngata ai hono ʻaongá

Kapau ʻe lava, ʻomi ha meʻakai kuo ʻosi faʻo fakatolonga (packaged food) ʻoku ʻi ai hano ʻaho ke ngata ai hono ʻaongá.

• Ko e hā ʻa e taumuʻa ʻo ha ʻaho ʻoku ngata ai hono ʻaongá?

• Ko e hā ʻe lava ʻo fai ke fakatolonga ʻa e meʻakaí ʻo laka ange ʻi he ʻaho ʻoku ʻosi ki aí?

• ʻE lava fēfē ke fekauʻaki ʻeni mo e malí?

Lau pe mamataʻi ʻa e ngaahi meʻa ko ʻení. Kumi ʻa e meʻa naʻe fai ʻe ʻEletā ʻEniliki R. Falapela, ko ha Fitungofulu mālōlō, pea mo hono uaifí ke toʻo ʻa e ʻaho ʻoku ngata ki ai ʻa e ʻaonga ʻo ʻena malí.

ʻI heʻeku foki mei heʻeku ngāue fakafaifekaú, ne u feʻiloaki mo ha finemui fakaʻofoʻofa, ʻulu ʻuliʻuli loloa ʻo aʻu hifo ki hono kongalotó. Naʻe fakaʻofoʻofa hono fofongá pea fakatupu fie malimali ʻene malimali maí. Naʻá ne maʻu ʻeku tokangá ʻi he fuofua taimi ne u sio ai kiate iá.

Ne fokotuʻu ʻe hoku uaifí ʻa e taumuʻa ke mali ʻi he temipalé, neongo ko e taimi ko iá ko e temipale ofi taha naʻe fie-maʻu ke fononga ki aí naʻe kilomita ʻe 6,400 tupu.

Naʻe fakatou fakafiefia mo fakamamahi ʻa ʻema mali fakapuleʻangá, he ne ma mali pē ki he moʻuí ni. Naʻe lea ʻaki ʻe he ʻōfisá ʻa e ngaahi leá ni “Pea ʻoku ou fakahā atu ko e husepāniti mo e uaifi kimoua,” ka naʻá ne toe pehē leva, “kae ʻoua kuo fakamāvae kimoua ʻe he mate.”

Ko ia ne ma feilaulau ke [tātānaki] ha paʻanga feʻunga ke totongi haʻama tikite ʻalu pē ki he Temipale Mesa ʻAlesoná.

ʻI heʻema tūʻulutui ʻi he ʻōlita ʻi he temipalé, naʻe lea ʻaki ʻe ha tamaioʻeiki maʻu mafaí ʻa e ngaahi lea ne u holi ke u fanongoá, ʻa ia naʻá ne fakahaaʻi mai ko e husepāniti mo e uaifi kimaua ki taimi mo e kotoa ʻo e taʻengatá. (Enrique R. Falabella, “Ko e ʻApí: Ko e Akoʻanga ʻo e Moʻuí,” Liahona, Mē 2013, 102)

Ko e meʻa te tau malava fakalangí

ʻOmi ha tengaʻi ʻakau ki he kalasí, pe ko ha fakatātā ʻo ha tengaʻi ʻakau ke fakaʻaliʻali ki he kau akó. Fakamatalaʻi ange ki he kalasí ʻa e faʻahinga tengaʻi ʻakau ko iá.

• Ko e hā ʻa e tuʻunga ʻe aʻu ki ai ʻa e tengaʻi ʻakau ko ʻení?

• Ko e hā kuo pau ke tomuʻa hoko ki he tengaʻi ʻakaú kae lava ke ne aʻusia hono tuʻunga malavá?

Hili iá pea fakaʻaliʻali ha fakatātā ʻo ha ongomeʻa mali ʻi muʻa ʻi he temipalé pea fakaafeʻi ʻa e kau akó ke aleaʻi ʻa e founga ʻe lava ke tokoniʻi ai kitautolu ʻe he mali taʻengatá ke fakahoko ʻa e meʻa ʻoku tau malavá ʻi heʻetau hoko ko e ngaahi foha mo e ngaahi ʻofefine ʻo ha mātuʻa fakalangí.

Ko hono paotoloaki ʻo e malí

Ki ha sīpinga ʻe taha ʻo e ngaahi tāpuaki ʻoku maʻu ʻi he malí, fakakaukau ke mamata ʻi hono vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻene aʻusia mo e fakamoʻoni ʻi he “Renaissance of Marriage” (2:36), ʻoku maʻu ʻi he ChurchofJesusChrist.org.

Ko hono faʻu ha mali ʻoku mālohi mo taʻengatá

Naʻe vahevahe ʻe ʻEletā F. Pētoni Hauati, naʻá ne hoko kimuʻa ko ha Fitungofulu, ha aʻusia mei heʻene nofo-malí ʻokú ne fakatātaaʻi ʻa e mahuʻinga ʻo hono tauhi ʻo e malí ke toputapú. Fakakaukau ke huluʻi ʻa e foʻi vitiō “Eternal Marriage” mei he taimi 6:42 ki he 12:00.

Hili ʻa e mamata ʻa e kau akó ʻi he vitioó, fakaafeʻi kinautolu ke vahevahe ha ngaahi fakakaukau ne nau maʻu fekauʻaki mo e fatongia ʻo e husepānití mo e uaifí ʻi hono paotoloaki ʻa e nofo-malí ke taʻengatá. Te ke lava foki ʻo fakaafeʻi kinautolu ke aleaʻi ʻa e meʻa te nau lava ʻo kamata fai ʻi he taimí ni ke teuteu ki ha nofo-mali ʻoku mālohi ʻi he kahaʻú.