“Lēsoni 141—Tokāteline mo e Ngaahi Fuakava 132: Mali Tokolahí,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 132,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 141: Tokāteline mo e Ngaahi Fuakava 129–132
Tokāteline mo e Ngaahi Fuakava 132:1–2, 34–66
Mali Tokolahí
Neongo ko e fono tuʻu pau ʻa e ʻOtuá ki he malí ʻoku fakahoko ia ʻi he vahaʻa ʻo e tangata ʻe toko taha mo e fefine ʻe toko taha (vakai, Sēkope 2:27, 30), ka kuo ʻi ai ha ngaahi taimi kuó Ne fekauʻi ai ha niʻihi ʻo ʻEne fānaú ke fakahoko ʻa e mali tokolahí. Ko e taha ʻo e ngaahi taimi fakaʻatā makehe ko iá ʻa e ngaahi fuofua taʻu ne fakafoki mai ai e Siasí. Naʻe fekauʻi ʻe he ʻEikí ʻa e Palōfita ko Siosefa Sāmitá ke fakahoko ʻa e mali tokolahí pea ke akoʻi ʻa e tefitoʻi moʻoní ki he niʻihi kehé. ʻE lava ke tokoni ʻa e lēsoni ko ʻení ke mahino lahi ange ki he kau akó ʻa e fekau ʻa e ʻEikí ke fakahoko ʻe he Kāingalotu ʻe niʻihi ʻa e mali tokolahí ʻi he ngaahi ʻaho ne kamakamata ai ʻa e Siasí.
Ngaahi ʻEkitivitī Ako ʻE Ala Fakahokó
Ngaahi fekau faingataʻá
Naʻe akonaki ʻa Palesiteni Lāsolo M. Nalesoni ʻo pehē:
Kuo kole maʻu mai pē ʻe he ʻOtuá ki Heʻene fānau ʻo e fuakavá ke nau fai e ngaahi meʻa faingataʻá. (Russell M. Nelson, “Tuʻu Ko ha Kau Nofotuʻi Moʻoni,” Liahona, ʻOkatopa 2016, 49)
-
Ko e hā ha ngaahi sīpinga ʻo e ngaahi meʻa faingataʻa kuo kole ʻe he ʻOtuá ki Heʻene fānaú ke nau faí?
Kapau ʻe fiemaʻu, vakai ki ha ngaahi talanoa ʻe niʻihi ʻi he folofolá ke fakakaukau ki ai ʻa e kau akó. ʻE lava ke kau ʻi he ngaahi sīpingá ʻa hono kole kia ʻĒpalahame ke feilaulauʻi ʻa ʻAisaké (vakai, Sēnesi 22:1–2, 10), ko hono tali ʻe Mele ʻa e ui ke hoko ko e faʻē ʻa Sīsū Kalaisí (vakai, Luke 1:26–38), mo e mamahi ʻa Sīsū Kalaisi mo fakalelei maʻá e faʻahinga kotoa pē ʻo e tangatá (vakai, Mātiu 26:39). Fakakaukau ke fakaʻaliʻali ha ʻū fakatātā ʻokú ne fakatātaaʻi ʻa e ngaahi meʻa ko ʻeni naʻe hokó.
-
ʻOkú ke pehē ko e hā ʻoku faʻa fekau ai ʻe he ʻOtuá ʻa ʻEne fānaú ke fakahoko e ngaahi meʻa faingataʻá?
ʻE lava ke mou lau ʻa e ʻĒpalahame 3:23–25, ko ha konga ʻo e fealēleaʻaki ko ʻení. Te ke lava foki ʻo huluʻi ʻa e vitiō “Ko ha Uiuiʻi Fakaʻeiʻeiki Makehe” (1:54), ʻoku maʻu ʻi he ChurchofJesusChrist.org.
ʻI hotau kuongá ni, naʻe kole ʻe he ʻEikí ki he Palōfita ko Siosefa Sāmitá ke fakahoko ha ngaahi meʻa lahi naʻe faingataʻa. Ko e fekau faingataʻa ʻe taha naʻe tuku ʻe he ʻOtuá kia Siosefa Sāmitá ko e fiemaʻu ke fakahoko ʻa e mali tokolahí, ʻi he ngaahi ʻaho ne kamakamata ai ʻa e Siasí.
Fakamatalaʻi ange ʻoku ʻuhinga ʻa e mali tokolahí ki he mali ʻa ha tangata ʻe taha mo ha fefine tokolahi ange he toko tahá. Tokoni ke mahino ki he kau akó ʻoku angamaheni pē ke fefaʻuhi mo e ongoʻi puputuʻú pe ʻi ai ha ngaahi fehuʻi fekauʻaki mo e founga ko ʻení. Fakakaukau ke ʻoange ha taimi ki he kau akó ke hiki ha ngaahi fehuʻi te nau ala maʻu ʻi heʻenau tohinoa akó.
ʻOku lelei ke fekumi e kau akó ki heʻenau ngaahi talí. Fakaafeʻi ke nau tokanga ki he fakahinohino ʻoku nau maʻu ʻo fakafou ʻi he Laumālie Māʻoniʻoní ʻi heʻenau akó. ʻOku ʻikai ko ho fatongia ko e faiakó ke tali kotoa e ngaahi fehuʻi ʻa e kau akó. ʻOku sai pē ke ke pehē ʻoku ʻikai ke ke maʻu ʻa e ngaahi talí. Te ke lava ʻo fakahaaʻi neongo ʻoku ʻikai ke tau maʻu kotoa e ngaahi talí, ka te tau kei lava pē ʻo laka ki muʻa ʻi he tui kia Sīsū Kalaisi.
Ko e ngaahi fakahinohino ʻa e ʻEikí ki he mali tokolahí
Lolotonga hono liliu ʻo e Tohi Tapú, naʻe laukonga ʻa e Palōfita ko Siosefa Sāmitá ʻo fekauʻaki mo ha niʻihi ʻo e kau tamaioʻeiki ʻa e ʻOtuá ne tokolahi ange honau uaifí he toko tahá. Ke ʻiloʻi e meʻa naʻe fehuʻi ʻe Siosefa ki he ʻOtuá, lau ʻa e Tokāteline mo e Ngaahi Fuakava 132:1. Lau leva ʻa e veesi 2 mo e 34–37, ʻo kumi e tali ʻa e ʻEikí ki he fehuʻi ʻa e Palōfitá.
-
Ko e hā ha moʻoni ʻokú ke ako mei he ngaahi veesi ko ʻení fekauʻaki mo e taimi ʻoku hōifua ai ʻa e ʻEikí ki he mali tokolahí?
Fakaafeʻi e kau akó ke fakamatala e meʻa ʻoku nau akó mo tokoni ke nau ʻiloʻi e moʻoni ko ia ʻoku hōifua ʻa e ʻEikí ki he mali tokolahí ʻi he taimi ʻokú Ne fekauʻi aí.
ʻOku tau ako ʻi he Tohi ʻa Molomoná, naʻe kamata ʻe he kau Nīfai ʻe niʻihi ʻa e mali tokolahí ʻo fepaki ia mo e finangalo ʻo e ʻOtuá. Naʻa nau fakatonuhiaʻi ʻenau ngaahi angafaí ʻo fakatefito ʻi he ngaahi fakamatala fakafolofola mei he Fuakava Motuʻá (vakai, Sēkope 2:23–24; vakai foki, Tokāteline mo e Ngaahi Fuakava 132:38–39). Naʻe fakamalaʻiaʻi ʻe he ʻEikí ʻa e ngaahi angafai ko ʻení mo akoʻi ki he kau Nīfaí ʻa ʻEne tuʻunga moʻui ki he nofo-malí.
Lau ʻa e Sēkope 2:26–27, 30, ʻo kumi e ngaahi akonaki ʻa e ʻEikí ki he kau Nīfaí.
-
Ko e hā ha meʻa naʻe tānaki atu ʻe he ngaahi veesi ko ʻení ki he mahino ʻokú ke maʻu fekauʻaki mo e mali tokolahí?
Kapau ʻe fiemaʻu, tokoni ke mahino ki he kau akó ko e mali ʻi he vahaʻa ʻo ha tangata ʻe taha mo ha fefine ʻe tahá ko e fono tuʻu-pau ia ʻa e ʻOtuá ki he malí. Ka neongo ia, kuo tuʻutuʻuni ʻe he ʻOtuá he taimi ʻe niʻihi ke fakahoko ʻa e mali tokolahí ko ha fakaʻatā makehe mei he fono tuʻu-pau ko ʻení. Ko ha ʻuhinga ʻe taha kuo ʻomi ʻe he ʻOtuá ki hono fakahoko ʻo e mali tokolahí ke “fakatupu ha hako kiate [Ia]” (Sēkope 2:30).
-
ʻE tokoni fēfē nai ʻa e ʻilo ko ʻení ki ha ngaahi fehuʻi te ke ala maʻu fekauʻaki mo hono fakahoko ʻo e mali tokolahí ʻi he ngaahi ʻaho ne kamakamata ai ʻa e Siasí?
Mali tokolahi ʻi he lotolotonga ʻo e fuofua Kāingalotú
ʻE ala tokoni ki he kau akó ʻa e faingamālie ke fakaʻaongaʻi ʻa e ngaahi maʻuʻanga tokoni kuo fokotuʻu fakalangí ke mahino lelei ange ʻa hono fakahoko ʻo e mali tokolahí ʻi he ngaahi ʻaho ne kamakamata ai ʻa e Siasí.
Fakakaukau ke tufa ʻa e laʻipepa tufa ʻoku ui “Ko e Ngaahi Meʻa Naʻe Toʻo mei he ʻMali Tokolahi ʻi Ketilani mo Nāvuú.ʼ” Te ke lava ʻo kole ki he kau akó ke ako fakafoʻituitui ʻa e naunau ko ʻení pe ʻi ha fanga kiʻi kulupu iiki. Fakaafeʻi ke nau kumi ha fakamatala ʻe lava ʻo tokoni ke tali e ngaahi fehuʻi te nau ala maʻú.
ʻI he ʻosi e ako ʻa e kau akó, ʻoange ha faingamālie ke nau vahevahe ʻa e meʻa ne nau akó ʻaki hano fai ange ha ngaahi fehuʻi hangē ko ʻení:
-
Ko e hā ha meʻa naʻá ke ako mei hoʻo akó naʻá ke ʻilo naʻe ʻaonga?
-
Naʻe fēfē nai hono kole kia Siosefa Sāmita mo e fuofua kāingalotu kehe ʻo e Siasí ke fakahoko e mali tokolahí?
-
Naʻe tokoniʻi fēfē ʻe he ʻOtuá ʻa e Kāingalotú ʻi he fekau faingataʻa ko ʻení?
Tokoni ke mahino ki he kau akó ʻoku sai pē kapau ʻoku kei ʻi ai haʻanau ngaahi fehuʻi fekauʻaki mo e kaveingá ni. Ko ha fekau faingataʻa ia ki he fuofua Kāingalotú ke nau moʻui ʻaki pea ʻe lava ke faingataʻa ke mahino ia he taimí ni. Ka neongo ia, ʻe lava ke tokoni e tokanga taha ki he ngaahi moʻoni mahuʻinga ʻoku tau ʻilo fekauʻaki mo e Tamai Hēvaní, Sīsū Kalaisi, pea mo e ongoongolelei kuo fakafoki maí ke tau laka ki muʻa ʻi he tui. Mahalo te ke fiemaʻu ke fai ha fakamoʻoni fakataautaha pea vahevahe ha fakamatala hangē ko ʻení:
Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku teʻeki ke fakamālohiʻi mai ʻe he tuí ia ke ʻoange ha tali ki he fehuʻi kotoa pē ka ʻoku fekumi ʻa e tuí ki ha fakapapau mo ha loto-toʻa ke laka atu, ʻo pehē he taimi ʻe niʻihi, “ʻOku ʻikai ke u ʻilo ʻa e meʻa kotoa pē, ka ʻoku ou maʻu ha ʻilo feʻunga ke u vivili atu ʻi he hala ʻo e moʻui fakaākongá.” (Neil L. Andersen, “ʻOku ʻIkai Hokonoa ʻa e Tuí, ka ʻi hoʻo Fili Ki ai,” Liahona, Nōvema 2015, 66)
Fakamatalaʻi fakanounou ‘a e meʻa naʻá ke akó
Ke tokoni ke lea ʻaki ʻe he kau akó e meʻa ne nau ako he ʻaho ní, fakakaukau ke fakafeʻiloaki ha tūkunga hangē ko ʻení:
Fakakaukauloto ʻokú ke fepōtalanoaʻaki mo ha kaungāmeʻa ʻokú ne fifili pe naʻe fakafepaki nai ʻa Siosefa Sāmita ki he finangalo ʻo e ʻOtuá ʻi he taimi naʻá ne kamataʻi ai ʻa e mali tokolahí ʻi he Siasí. Tuku ha kiʻi taimi ke hiki ha ngaahi meʻa ʻi hoʻo tohinoá te ke lava ʻo vahevahe mo ho kaungāmeʻá ʻi he angaʻofa mo e faʻa kātaki.
Hili hono maʻu ʻe he kau akó ha faingamālie ke tohi ʻi heʻenau tohinoá, te ke lava ʻo kole ki ha taha ʻi he kau akó ʻokú ne ongoʻi fiemālie ke vahevahe ʻa e meʻa naʻá ne tohí. ʻE lava foki ke hoko ʻeni ko ha taimi lelei ki he kau akó ke nau fakamatalaʻi ai ha ngaahi tali ne nau maʻu ki ha niʻihi ʻo ʻenau ngaahi fehuʻí pe hohaʻá.
Fakakaukau ke fakamoʻoniʻi ki he kau akó ʻi heʻenau ngāue ʻaki e tui kia Sīsū Kalaisí pea tafoki ki heʻenau Tamai Hēvaní ke maʻu ha tokoní, te Ne tokoniʻi kinautolu ʻi he ngaahi faingataʻa pe ngaahi fehuʻi ʻoku nau fehangahangai mo ia ʻi heʻenau moʻuí.