Lēsoni 142: Tokāteline mo e Ngaahi Fuakava 129–132

Akoako Fakataukei Fakatokāteline 9

Ako Maʻulotó; Ko Hono Maʻu ʻo e ʻIlo Fakalaumālié

ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga ki heʻenau moʻuí ʻia Sīsū Kalaisi mo ʻEne ongoongoleleí. ʻE ʻoange ʻe he lēsoni ko ʻení ha ngaahi faingamālie ki he kau akó ke akoako ako maʻuloto ʻa e ngaahi fakamoʻoni fakafolofola ʻo e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻinga ʻoku fekauʻaki mo iá. ʻE tokoni foki ia ke nau ako mo fakaʻaongaʻi ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.

Ngaahi ʻEkitivitī Ako ʻOku Ala Fakahokó

Toe Vakaiʻi ʻo e fakataukei fakatokāteliné: Ako Maʻulotó

Fakakaukau ke fakaʻaliʻali ha sioki vai ʻoku maha mo ha ʻū ipu ʻoku fonu vai. Fakafonu vai ʻa e ʻū ipú. Fakaafeʻi ha tokotaha ako ke ne lau maʻuloto ha ngaahi potufolofola fakataukei fakatokāteline mo ha ngaahi kupuʻi lea fakafolofola mahuʻinga kuó ne ako maʻuloto. ʻI he potufolofola kotoa pē ʻoku lau maʻulotó, ʻe lava ke lingi ʻe he tokotaha akó ha ipu vai ʻe taha ki he siokí.

• ʻOkú ke pehē ʻe lava fēfē ke tatau hono ako maʻuloto ʻo e folofolá mo ha vai talifaki ki he taimi ʻo e faingataʻá?

• Ko e hā ha ngaahi tūkunga te ke fiemaʻu ai ke ʻi ai ha ngaahi potufolofola maʻuloto ke ke fakaʻaongaʻi?

Fakakaukau ke kole ki he kau akó ke fakamanatu ha taimi kuo haʻu ai ha potufolofola ki heʻenau fakakaukaú. ʻE lava pē ke hoko ko ha ngaahi lea pau ki ha veesi pe ko ha akonaki fakalūkufua naʻa nau manatuʻi. Fakaafeʻi ʻa e kau akó ke vahevahe ʻenau ngaahi aʻusiá.

Fakamahinoʻi ange ʻi heʻetau maheni mo e ngaahi potufolofola ʻi he folofolá, ʻe lava ke fakamanatu kinautolu ʻe he Laumālie Māʻoniʻoní ki hotau ʻatamaí ʻi he taimi ʻo e fiemaʻú (vakai, Sione 14:26). ʻAi ke ʻilo ʻe he kau akó te mou fakaʻaongaʻi ʻi he ʻahó ni ha taimi ke maheni ange ai mo ha niʻihi ʻo e ngaahi potufolofola fakataukei fakatokāteliné. Ko ha founga ʻeni ʻe taha ke fakahoko ai ʻení. ʻOku maʻu ha ngaahi fakakaukau lahi ange ki he ako maʻulotó ʻi he fakamatala fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

ʻEkitivitī ako maʻulotó

Fakakaukauʻi pe ko e ngaahi potufolofola fakataukei fakatokāteline fē ʻokú ke fiemaʻu ke fakamanatu ʻe he kalasí. Ko e lelei taha ʻa e ʻekitivitī ko ʻení ke fakaʻaongaʻi ha potufolofola ʻe ua ki he fā.

Tufa ha laʻipepa ʻoku teʻeki tohi ai ha meʻa ki he tokotaha ako takitaha. Fakaafeʻi kinautolu ke hiki ʻa e ngaahi potufolofola fakataukei fakatokāteliné mo e ngaahi kupuʻi lea mahuʻingá takitaha ʻi he laʻipepá. Fakaafeʻi leva kinautolu ke kosi tahataha ʻa e lea ki he potufolofolá mo e kupuʻi lea mahuʻingá. Hili iá ʻe lava ke tuifio ʻe he kau akó ʻa e ngaahi kongá pea toe fokotuʻutuʻu kinautolu ʻi honau hokohoko totonú. Ko ʻenau lavaʻi fiemālie pē ʻa e foʻi ngāue ko iá, fakaafeʻi kinautolu ke toe fai ʻa e meʻa tatau mo e potufolofola mo e kupuʻi lea fakafolofola mahuʻinga hokó. Kapau te nau ako lelei ʻa e ngaahi potufolofolá mo e ngaahi kupuʻi lea fakafolofola mahuʻingá, te nau lava ʻo tuifio ʻa e ngaahi kongokonga kotoa pē mei he ngaahi potufolofolá mo e ngaahi kupuʻi lea fakafolofola mahuʻingá pea feinga ke toe fakahokohoko fakafoki kinautolu ke tonu.

Pe ko hoʻo fakaafeʻi ʻa e kau akó ke fakaʻaongaʻi ʻa e polokalama Fakataukei Fakatokāteliné ke feinga ke ako maʻuloto.

Kapau ʻokú ke maʻu ha taimi feʻunga, te ke lava ʻo fakaafeʻi ha niʻihi ʻo e kau akó ke nau omi ʻo vahevahe ha potufolofola ako maʻuloto mo ha kupuʻi lea fakafolofola mahuʻinga pea huaʻi ha ipu vai ki he siokí.

Fakapapauʻi ʻoku miniti pē ʻe 10–15 ʻa e ʻekitivitī ako maʻulotó kae ʻi ai ha taimi feʻunga ki hono akoako fakaʻaongaʻi ʻo e fakataukei fakatokāteliné ʻamui ange ʻi he lēsoní.

Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié

Kapau ʻokú ke ongoʻi ʻoku fiemaʻu ke fakamanatu ʻe hoʻo kau akó ʻa e tefitoʻi moʻoni ki hono maʻu ʻo e ʻilo fakalaumālié, fakaʻaongaʻi ha taimi ke fakamanatu ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokateliné (2023). ʻOku kau ʻa e ngaahi ʻekitivitī fakamanatu ʻoku fokotuʻu atú ʻi he fakamatala fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Fakaafeʻi ʻa e kau akó ke fili ha taha ʻo e ngaahi tūkunga ko ʻení pe ko ha tūkunga kehe te ke faʻu ʻokú ne feau ʻa e ngaahi fiemaʻu hoʻo kau akó. Hili hono fili ʻe he kau akó ha tūkungá, aleaʻi ʻa e ʻuhinga ʻe ala ongoʻi pehē ai ha tahá. ʻE lava ke tokoni hono fai iá ke ongoʻi moʻoni ange ʻe he kau akó ʻa e ngaahi tūkungá.

Te ke lava foki ʻo fakakaukau ki he ngaahi tefito kehe ʻi he konga “Ngaahi ʻEkitivitī Fakalahi Ki he Akó” ʻi he fakaʻosinga ʻo e lēsoni ko ʻení.

Tūkunga 1: Fakakaukauloto ʻoku ʻi ai haʻo kaungāmeʻa ʻoku ʻikai ke ne fakapapauʻi pe ʻe mali ʻi he temipalé. ʻOkú ne fakakaukau ʻoku fiemaʻu ha meʻa lahi ki he mali temipalé pea ko ha tukupā faingataʻa ia. ʻOkú ne hohaʻa ki he ngaahi meʻa kotoa pē ʻoku fiemaʻu meiate iá.

Tūkunga 2: ʻOku fehuʻi atu ʻe ha kaungāmeʻa, “ʻOku fuʻu fiemaʻu nai ʻa e mali temipalé? ʻIkai ʻoku feʻunga ki ha ongomeʻa mali ke na mali fakapuleʻanga pē kapau ʻokú na feʻofaʻaki moʻoni?”

Ke tokoniʻi ʻa e kau akó ke fatongia ʻaki ʻenau akó, ʻoange ha taimi ke nau fakakaukau ai mo tali ʻa e ngaahi fehuʻi ko ʻení ʻi heʻenau tohinoa akó.

• Ko e tefitoʻi moʻoni fē ki hono maʻu ʻo e ʻilo fakalaumālié ʻokú ke pehē ʻe ʻaonga tahá? Ko e hā hono ʻuhingá?

• Ko e ngaahi potufolofola fakataukei fakatokāteline fē ʻe ala ʻaongá?

Hili hano maʻu ʻe he kau akó ha taimi ke teuteuʻi ʻenau ngaahi talí, fakakaukau ke vahevahe kinautolu ki ha fanga kiʻi kulupu iiki. ʻE ala tokoni ke vahe ki ha taki fakakulupu ke ne tokoniʻi ʻa e fealēleaʻakí. ʻE lava ke fili ʻe he takí pe ko hai ʻe ʻuluaki leá pe ko e hokohoko ʻe aleaʻi ai ʻa e ngaahi tefitoʻi moʻoni ki hono maʻu ʻo e ʻilo fakalaumālié. Fakaafeʻi ʻa e ngaahi kulupú ke vahevahe mo aleaʻi ʻenau ngaahi tali ki he ngaahi fehuʻi kimuʻá. ʻOange ki he ngaahi kulupú ha taimi feʻunga ke vahevahe ai ʻa e mēmipa takitaha.

Hili iá, te ke lava ʻo fakaafeʻi ʻa e ngaahi kulupú ke nau feinga ke ʻiloʻi ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālie naʻe ʻikai filí pea aleaʻi ʻa e founga ʻe lava ke fakaʻaongaʻi ai ʻa e ngaahi tefitoʻi moʻoni ko iá ki he ngaahi tūkungá.

Fengāueʻaki mo e ngaahi kulupú ke fakafuofuaʻi ʻenau malava ke aleaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. ʻO ka fiemaʻu, fakaʻaongaʻi ʻa e ongo fehuʻi ko ʻení ke tokoni ki he kau akó ke nau fai ha fealēleaʻaki ʻoku mahuʻingamālié.

Ngāue ʻi he tuí

• ʻE lava fēfē ke kumi tokoni ha taha mei he Tamai Hēvaní mo Sīsū Kalaisi kapau ʻoku ʻi ai haʻanau veiveiua, hohaʻa, pe ngaahi fehuʻi fekauʻaki mo e mali temipalé?

• Ko e hā mo ha toe founga ʻe lava ke ngāue ai ha taha ʻoku hohaʻa fekauʻaki mo e mali temipalé ʻi he tui kia Sīsū Kalaisí?

Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

• Ko e hā ʻokú ke ʻilo kau ki he Tamai Hēvaní mo ʻEne palani ʻo e fakamoʻuí ʻe lava ke tokoni ʻi he tūkungá?

• ʻE tākiekina fēfē ʻe ha mali temipale ʻa e moʻui ʻa ha taha ʻi he taimí ni pea ʻi he taʻengatá?

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• ʻE tokoni fēfē nai ʻa e tokāteline naʻe akoʻi ʻi he Tokāteline mo e Ngaahi Fuakava 131:1–4 ki he tūkunga naʻá ke filí?

• Ko e hā ha ngaahi potufolofola pe fakamatala kehe mei he kau palōfitá ʻe ala tokoni? (hangē ko ʻení, Tokāteline mo e Ngaahi Fuakava 132:19; 1 Kolinitō 11:11; Sēnesi 2:24). (Te ke lava foki ʻo kumi ʻa e “Mali Taʻengatá” ʻi he Gospel Library.)

• Ko e hā ha ngaahi maʻuʻanga fakamatala ʻokú ne tākiekina ʻa e ngaahi mahalo ʻa e tokotahá ni?

Tokoniʻi ke vakaiʻi ʻe he kau akó ʻenau aʻusiá ʻo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Mahalo ʻe ʻaonga ʻa e ngaahi fehuʻi ko ʻení:

• Naʻe tokoniʻi fēfē koe ʻe he ngaahi tefitoʻi moʻoni ki hono maʻu ʻo e ʻilo fakalaumālié ke ke fakahoko ha tali ki he tūkungá?

• Ko e hā ha ngaahi faingataʻa naʻá ke fehangahangai mo ia ʻi hoʻo feinga ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki he ngaahi tūkungá?

• Ko e hā kuó ke ako pe ongoʻi fekauʻaki mo e mali taʻengatá ʻokú ke pehē ʻoku mahuʻinga ke manatuʻi?

Ngaahi Maʻuʻanga Tokoni Kehé

ʻOku tatau fēfē ʻa e mali fakasilesitialé mo ha toe meʻa kehe?

Naʻe akonaki ʻa Palesiteni Lāsolo M. Nalesoni ʻo pehē:

ʻE ala fakatātaaʻi ʻa e mahuʻinga ʻo e filí ʻaki ha fakakaukau faingofua ne u maʻu lolotonga ʻeku fakatau ʻi ha falekoloa fakatau fakamovetevete. ʻOku ui ia “ko e founga ʻa e tokotaha fakatau koloá.” ʻOku angamaheni ʻaki ʻeni ʻi heʻetau fakatau fakaʻahó.

ʻE tomuʻa vakaiʻi ʻe he kau fakatau fakapotopotó ʻa e ngaahi meʻa ke nau fili mei aí. ʻOku nau tokanga taha ki he lelei mo e tolonga ʻo e koloa ʻoku nau fie-maʻú. ʻOku nau fie-maʻu ʻa e lelei tahá. ʻI he tafaʻaki ʻe tahá, ko e niʻihi ʻoku nau fakasio pē ʻa e fakamaʻamaʻá, niʻihi ʻoku nau fakamole lahi toki— loto-mamahi—tā naʻe hala ʻenau filí. Ko e meʻa fakamamahi he ʻoku ʻi ai ʻa e niʻihi tokosiʻi ʻoku ʻikai ke nau angatonu pea nau kaihaʻasi ʻa e meʻa ʻoku nau fie-maʻú. ʻOku tau ui kinautolu ko e kau kaihaʻa koloa.

ʻE ala fakatatau ʻa e tokotaha fakatau koloá ki he tefito ʻo e nofo-malí. ʻE lava ke fili ha ongomeʻa ʻokú na feʻofaʻaki ki he tuʻunga lelei taha ʻo e nofo-malí pe tuʻunga maʻulalo ange ʻe ʻikai tolongá. Pe ko e ʻikai ke na fili ha taha ʻo e ongo meʻá ni peá na kaihaʻasi fakamālohi ai ʻa e meʻa ʻokú na fiemaʻú peá na hoko ai ko ha ongo “kaihaʻa koloa ʻo e nofo-malí.”

ʻOku tālangaʻi ʻa e tefito ʻo e nofo-malí ʻi he funga ʻo e māmaní ʻa ia kuo ʻi ai ha ngaahi founga kehekehe ʻo e nofo fakamalí. Ko e ʻuhinga ʻeku lea ʻi he taumuʻa ko ʻení ke u fakahaaʻi ʻi heʻeku hoko ko ha ʻAposetolo ʻa e ʻEikí ʻoku toputapu ʻa e mali ʻi he vā ʻo ha tangata mo ha fefine—naʻe tuʻutuʻuni ia ʻe he ʻOtuá. ʻOku ou poupou foki ki hono lelei ʻo e mali temipalé. Ko e faʻahinga mali lelei mo tolonga taha ia ʻoku lava ke ʻomi ʻe hotau Tupuʻangá ki Heʻene fānaú. (Russell M. Nelson, “Ko e Mali Fakasilesitialé,” Liahona, Nōvema 2008, 92)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fakakaukau ke fakaʻaliʻali ʻa e fakatātā ko ʻení pea hiki ʻi he palakipoé ʻa e kupuʻi lea “He ʻikai te ke lava ʻo ʻutu vai mei ha vaitupu ʻoku maha”.

• ʻOkú ke pehē ko e hā ʻe lava ke ʻuhinga ki ai ʻa e kupuʻi lea ko ʻení ʻi heʻetau moʻuí?

• ʻE lava fēfē ke fakaʻaongaʻi ʻeni ki hono ako maʻuloto ʻo e ngaahi potufolofola fakataukei fakatokāteliné?

Fulifulihi ʻa e ngaahi tūkungá

Ko ha tūkunga ʻeni ʻe ua ʻe lava ke fakaʻaongaʻi ko ha konga ʻo e akoako ʻo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié.

1. “ʻOku totonu nai ke u totongi vahehongofulu kapau ʻoku ʻikai ke u maʻu ha paʻanga feʻunga ke totongi ʻa e ngaahi meʻa kehé?” (Vakai, Tokāteline mo e Ngaahi Fuakava 82:10; 119.)

2. “Fakakaukauloto lolotonga haʻo talanoa mo ha kaungāmeʻa, ʻokú mo talanoa ki he anga ʻene tui ki he ʻOtuá. ʻOkú ne vahevahe mo koe kuo akonekina ia ʻoku ʻikai ko ha taha ʻa e ʻOtuá, ka ko ha mālohi pē ʻoku taka holo pea ʻoku maʻu ia ʻi he feituʻu kotoa ʻi he taimi pē ʻe taha. Hili ʻa e vahevahe ho kaungāmeʻá, ʻokú ne tafoki ʻo fehuʻi atu pe ʻoku moʻoni ʻeni.” (Vakai, Tokāteline mo e Ngaahi Fuakava 130:22–23.)