Lēsoni 139: Tokāteline mo e Ngaahi Fuakava 129–132

Tokāteline mo e Ngaahi Fuakava 130

Ko Hono Akoʻi e Ongoongolelei ʻa e Fakamoʻuí

ʻE lava ke akoʻi lelei ʻa e ongoongoleleí ʻi ha ngaahi fakatahaʻanga lalahi pe ʻi ha fanga kiʻi fakatahaʻanga iiki mo feongoongoi. Naʻe fakaʻaongaʻi ʻe he Fakamoʻuí ʻa e ongo foungá fakatouʻosi lolotonga ʻEne ngāue fakafaifekaú, pea naʻe fai pehē foki mo e Palōfita ko Siosefa Sāmitá. ʻOku ʻi he fakamatala ʻo e Tokāteline mo e Ngaahi Fuakava 130 ha niʻihi ʻo e ngaahi akonaki ʻa e Palōfitá ki ha kiʻi fakatahaʻanga ʻo e Kāingalotu naʻe nofo ʻi Leimasi, ʻIlinoisí. ʻOku fakataumuʻa ʻa e lēsoni ko ʻení ke tokoni ke akoako ʻe he kau akó hono akoʻi ʻa e ngaahi konga ʻo e tokāteline ʻa Sīsū Kalaisí.

Ngaahi ʻEkitivitī Ako ʻOku Ala Fakahokó

ʻOku fakataumuʻa ʻa e ngaahi ʻekitivitī ako ko ʻení ke tokoni ki he kau akó ʻi hono akoʻi ha ngaahi konga kehekehe ʻo e lēsoní. Kapau ʻoku ʻikai te ke fiemaʻu ke faiako ʻa e kau akó, vakai ki he “Ngaahi ʻEkitivitī Fakalahi ki he Akó” ki ha ngaahi fakakaukau fakafaiako te ke lava ʻo fakaʻaongaʻi.

Ko Sīsū Kalaisi ʻa e Faiako Tuʻukimuʻá

Ke kamata ʻa e kalasí, fakakaukau ke fakaʻaliʻali ha fakatātā ʻo hono akoʻi ʻe Sīsū Kalaisi ʻa e kakaí pea fakaafeʻi ʻa e kau akó ke fakakaukauloto pe naʻe mei fēfē nai kapau ne nau ʻi ai. Fakakaukau ke ʻeke ange ʻa e ongo fehuʻi ko ʻení:

• Ko e hā nai ha meʻa naʻá ke mei fakakaukau ki ai pe ongoʻi kapau naʻá ke ʻi ai lolotonga ʻa e akonaki ʻa Sīsuú?

• ʻOkú ke pehē ko e hā e meʻa ʻokú ne ʻai ʻa e Fakamoʻuí ke hoko ko ha faiako leleí?

Fakamatalaʻi ange ʻi heʻetau hoko ko e kau mēmipa ʻo e Siasi ʻo e Fakamoʻuí, ʻoku tau maʻu ai ha ngaahi faingamālie lahi ke akoʻi ʻEne ongoongoleleí. Te ke lava foki ʻo fakaʻaliʻali ʻa e pōpoaki ko ʻeni mei he Kau Palesitenisī ʻUluakí fekauʻaki mo e akoʻí:

Siʻi kāinga ʻofeina,

Ko ha faingamālie nāunauʻia moʻoni ia ke akoʻi ʻa e ongoongolelei ʻo Sīsū Kalaisí! Tatau ai pē pe ʻoku ʻi ai hao uiuiʻi pau ke faiako pe ʻikai, ka ko ha faiako koe. ʻI hoʻo hoko ko e ākonga ʻa e Faiako Tuʻukimuʻa ko Sīsū Kalaisí, ʻokú ke maʻu ai ha ngaahi faingamālie ke vahevahe ʻEne māmá ʻi ha feituʻu pē te ke ʻalu ki ai—ʻi ʻapi, ʻi he lotú, ʻi hoʻo ngāue fakaetauhi ki he niʻihi kehé, pea ʻi he lotolotonga hoʻo ngaahi kaungāmeʻá. Ko hono akoʻi ʻo e ongoongoleleí ko ha falala toputapu ia. Ko ha konga mahuʻinga ia ʻo e ngāue ʻa e ʻEikí, pea ʻoku ngāue lelei taha ia ʻi he taimi ʻoku tau fakahoko ai ia ʻi Heʻene foungá. (Ko e Faiako ʻi he Founga ʻa e Fakamoʻuí: Maʻa Kinautolu Kotoa ʻOku Faiako ʻi he ʻApí pea ʻi he Siasí [2022], 1)

• Ko e hā ha ngaahi faingamālie ʻoku maʻu ʻe he toʻu tupú ke nau akoʻi mo fakamoʻoni ai kia Sīsū Kalaisi mo ʻEne ongoongoleleí?

Fakamatalaʻi ange ki he kau akó te nau maʻu ʻa e faingamālie ke teuteu ha lēsoni nounou mei ha niʻihi ʻo e ngaahi akonaki ʻi he Tokāteline mo e Ngaahi Fuakava 130 pea akoako hono akoʻi ʻenau lēsoní ki he niʻihi kehé. Kapau ʻokú ke palani ke akoʻi ʻe ha niʻihi tokosiʻi ʻo e kau akó ʻa e kalasí fakakātoa, ko ha taimi lelei ʻeni ke fakapapauʻi ange ai he ʻikai te ke kole ki ha taha ʻoku ʻikai ke ne fie fai ia.

Kimuʻa pea kamata teuteu ʻe he kau akó ʻa e ngaahi lēsoní, fakakaukau ke vahevahe ʻa e fakamatala puipuituʻa ko ʻení.

ʻI he ʻaho 2 ʻo ʻEpeleli 1843, naʻe fetaulaki ʻa e Palōfita ko Siosefa Sāmitá mo ha Kāingalotu ʻi Leimasi, ʻIlinoisi, fakafuofua ki ha maile ʻe 20 ʻi tuʻa ʻi Nāvū. Naʻe akoʻi ʻe Siosefa ha ngaahi moʻoni kehekehe ʻo e ongoongoleleí, kau ai ha ngaahi fakaikiiki fekauʻaki mo e Toluʻi ʻOtuá, mahuʻinga ke maʻu ha ʻilo ʻi he moʻuí ni, mo e founga te tau lava ai ʻo maʻu ʻa e ngaahi tāpuaki ʻa e ʻOtuá. ʻOku lekooti ʻa e ngaahi akonaki ʻa e Palōfitá ʻi he Tokāteline mo e Ngaahi Fuakava 130.

Teuteu ke akoʻí

Ke tokoni ke teuteu ʻa e kau akó ke faiakó, tufa ʻa e laʻipepa tufa ʻoku ui ko e “Ko Hono Akoʻi e Ngaahi Moʻoni mei he Tokāteline mo e Ngaahi Fuakava 130.” Fakaafeʻi ʻa e kau mēmipa ʻo e kalasí ke muimui ki he ngaahi sitepu teuteu ʻo e lēsoní ki ha fakahinohino. Koeʻuhí ko e Tokāteline mo e Ngaahi Fuakava 130:22–23 ko ha potufolofola fakataukei fakatokāteline ia, mahalo ʻe fiemaʻu ke ke kole ki ha kau ako tokosiʻi ke nau ngāue ki he tefito ko iá ke fakapapauʻi ʻe akoʻi ʻa e ngaahi veesi ko iá lolotonga ʻa e lēsoní.

Lolotonga ʻa e teuteu ʻa e kau akó, takai holo ʻi he lokí ʻo tokoni ʻi hano fiemaʻu. Te ke lava ʻo ʻoatu ha ngaahi fokotuʻu ʻo e meʻa te nau lava ʻo fakaʻaongaʻi ke tokoniʻi ʻa e niʻihi kehé ke nau kau longomoʻui maí. ʻE lava ke kau heni ha ngaahi fehuʻi ke aleaʻi, ngaahi naunau ki he sió, ngaahi meʻa, vahevahe ʻo ha ngaahi aʻusia fakataautaha, pe ngaahi ʻekitivitī tohi.

Ko Hono Akoʻi ʻo e Ngaahi Moʻoni mei he Tokāteline mo e Ngaahi Fuakava 130

Teuteu ʻo e lēsoní:

Sitepu 1: Fili ha taha ʻo e ngaahi tefito ako ʻi laló pea ako ʻa e ngaahi maʻuʻanga tokoni ʻoku ʻoatú. Tokanga ki he ngaahi fakakaukau mo e ngaahi ueʻi mei he Laumālie Māʻoniʻoní fekauʻaki mo e meʻa ʻokú ke laú. Te ke lava foki ʻo maʻu ha ngaahi maʻuʻanga tokoni kehe ke fakaloloto hoʻo mahino ki he tefito kuó ke filí.

Sitepu 2: Faʻu ha fokotuʻutuʻu lēsoni miniti ʻe nima ki he fitu ki he tefito kuó ke filí. Fakakaukau ke fakaʻaongaʻi ha niʻihi ʻo e ngaahi fehuʻi ko ʻení ke tokoni atu ki hoʻo teuteú:

• ʻE lava fēfē pe ʻoku totonu nai ke liliu fēfē ʻe he ngaahi moʻoni ko ʻení hotau vā fetuʻutaki mo e Tamai Hēvaní mo Sīsū Kalaisí?

• Te u fakaʻaongaʻi fēfē ʻa e folofolá mo e ngaahi lea ʻa e kau palōfitá ke tokoni ke mahino lelei ange ki he niʻihi kehé ʻa e tefito ko ʻení?

• Ko e hā ha meʻa te u lava ʻo fai ke tokoni ki he niʻihi kehé ke nau kau mai ki he lēsoní mo longomoʻuí?

• Ko e hā ha ngaahi aʻusia te u lava ʻo vahevahe pe ko e hā te u lava ʻo fakamoʻoni ki aí?

• Ko e hā ha meʻa te u lava ʻo fai ke tokoni ki he niʻihi kehé ke nau fakaʻaongaʻi ʻa e tefito ko ʻení ʻi heʻenau moʻuí?

Ngaahi tefito mo e maʻuʻanga tokoni ki he akó:

Fili 1: Ko e poto mo e ʻilo ʻoku tau tuʻu mo ia ʻi he Toetuʻú.

Ngaahi maʻuʻanga tokoni ke akó:

Tokāteline mo e Ngaahi Fuakava 130:18–19; vakai foki, Tokāteline mo e Ngaahi Fuakava 88:118; 93:36

Naʻe akoʻi ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Kapau te tau fakalaulauloto ki he meʻa ko ia ʻe lava ke tau toe tuʻu mo ia ʻi he toetuʻú, hangē ʻoku mahino mai te tau toe tuʻu mo e poto ʻoku tau maʻú, ʻo ʻikai ʻuhinga pē ʻeni ki hotau poto fakaʻatamaí, ka ko ʻetau lava ko ia ke tali pea fakaʻaongaʻi ʻa e moʻoní. Te tau toe tuʻu mo hotau ngaahi talēnití, ngaahi ʻulungāngá, mo ʻetau ngaahi pōtoʻi ngāué; pea pehē pē foki ki heʻetau malava ko ia ke akó, ko e tuʻunga ʻo e mapuleʻi kitá, mo ʻetau malava ko ia ke ngāué. (Neal A. Maxwell, We Will Prove Them Herewith [1982], 12)

Fili 2: ʻOku tau maʻu ʻha ngaahi tāpuaki mei he ʻOtuá ʻi heʻetau talangofua ki Heʻene ngaahi fonó.

Ngaahi maʻuʻanga tokoni ke akó:

Tokāteline mo e Ngaahi Fuakava 130:20–21; vakai foki, Sione 7:17; Tokāteline mo e Ngaahi Fuakava 82:10

Naʻe akonaki ʻa Palesiteni Lāsolo M. Nalesoni ʻo pehē:

Kapau ʻokú ke fiemaʻu moʻoni ha tāpuaki pau, ʻe lelei ke ke fekumi pe ko e hā ʻa e ngaahi fono ʻoku nau puleʻi ʻa e tāpuaki ko iá pea ngāue leva ke talangofua ki he ngaahi fono ko iá. (Russell M. Nelson, “The Mission and Ministry of the Savior: A Discussion with Elder Russell M. Nelson,” Ensign, June 2005, 19)

Fili 3: ʻOku maʻu ʻe he Tamai Hēvaní mo Sīsū Kalaisi ha sino ʻo e kakano mo e hui. Ko e Laumālie Māʻoniʻoní ko ha laumālie pē ia.

Ngaahi maʻuʻanga tokoni ke akó:

Tokāteline mo e Ngaahi Fuakava 130:22–23; vakai foki, Mātiu 3:13–17; Ngāue 7:55–56

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tau tui ʻoku hoko ʻa e toko tolu fakalangi ko ʻeni ko e Toluʻi ʻOtuá ʻo nau taha ʻi he taumuʻa, founga, fakamoʻoni pea mo e misiona. ʻOku tau tui ʻoku Nau tatau pē ʻo fonu ʻi he ongo faka-ʻOtua ʻo e ʻaloʻofa mo e ‘ofá, fakamaau totonú, faʻa kātakí, faʻa fakamolemolé, mo e huhuʻí. ʻOku ou tui ʻe totonu ke pehē ʻoku tau tui ʻoku Nau taha ʻi he ngaahi meʻa kotoa pē ʻoku mahuʻinga mo taʻengatá tukukehe pē ʻoku ʻikai ke tau tui ʻoku sino pē ʻe taha ʻa e toko tolú ni. … ʻOku mau fakahā ʻoku hā mahino pē ia mei he folofolá ko e Tamaí, ʻAló, mo e Laumālie Māʻoniʻoní ʻoku nau sino mavahevahe, ko ha toko tolu fakalangi. (Jeffrey R. Holland, “The Only True God and Jesus Christ Whom He Hath Sent,” Liahona, Nov. 2007, 40–41)

Aʻusia fakafaiakó

Fakahaaʻi ki he kau akó ʻoku fakamahuʻingaʻi ʻenau ngaahi tokoní: ʻI hono vahevahe ʻe he kau akó ʻa e ngaahi lēsoni ne nau teuteú, tokoni ke nau ʻiloʻi ʻoku fakamahuʻingaʻi mo fakahoungaʻi ʻenau ngaahi tokoni ki he lēsoní. Ki ha akoako lahi ange heni, vakai ki he ako “ʻAi ke ʻilo ʻokú ke mahuʻingaʻia he fānau akó kimuʻa pea nau fakamatala pe hiki honau nimá ke fakamatalá” ʻoku maʻu ʻi he Fakatupulaki ʻa e Ngaahi Taukei ʻa e Faiakó: ʻOfa ʻi he Niʻihi ʻOkú ke Akoʻí.

Hili hoʻo ʻoange ha taimi ki he kau akó ke teuteu ha fokotuʻutuʻu fakalēsoní, fakakaukau ke fakaafeʻi ha niʻihi ke akoʻi ʻenau lēsoní ʻi muʻa ʻi he kalasí. Te ke lava foki ʻo fokotuʻutuʻu ʻa e kau akó ki ha fanga kiʻi kulupu iiki, pea te nau lava ʻo taufetongi ʻi hono feakoʻiʻaki ʻiate kinautolú. Poupouʻi ʻa e kau mēmipa ʻo e kalasí ke nau fakahaaʻi ha fakaʻapaʻapa mo kau kakato ki he akó ʻi he lolotonga ʻo e ngaahi fakamatalá. Kapau ʻoku ʻi ai ha kau ako ʻoku ʻikai ke nau ongoʻi fiemālie ke faiako ʻi he seminelí pe ʻosi ʻa e taimí kimuʻa pea maʻu ʻe he taha kotoa ha faingamālie, poupouʻi kinautolu ke feinga ke akoʻi ʻenau lēsoní ʻi ʻapi, ʻi ha kalasi he lotú, pe ki ha kaungāmeʻa. Ke fakaʻosí, fakakaukau ke ʻeke ha ngaahi fehuʻi hangē ko ʻení:

• Ko e hā ha meʻa naʻá ke ako fekauʻaki mo e Tamai Hēvaní mo Sīsū Kalaisi ʻe lava ʻo tokoni atu ʻi ho ngaahi tūkunga lolotongá?

• Ko e hā ha meʻa naʻá ke ako he ʻahó ni fekauʻaki mo hono akoʻi e ongoongolelei ʻa e Fakamoʻuí?

• ʻE lava fēfē ke ʻaonga hono fakaʻaongaʻi ʻo e ngaahi faingamālie ke akoʻi ʻa e ongoongolelei ʻo Sīsū Kalaisí kiate koe ʻi he taimí ni pea ʻi he kahaʻú?

Ko e Tokāteline mo e Ngaahi Fuakava 130:22–23 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofolá mo e kupuʻi lea fakafolofola mahuʻinga ʻo e Tokāteline mo e Ngaahi Fuakava 130:22–23 pea toe fakamanatu kinautolu ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he potufolofolá ni ko e “ʻOku maʻu ʻe he Tamaí ʻa e sino ʻo e kakano mo e hui …; pehē foki mo e ʻAló; ka [ko e] Laumālie Māʻoniʻoní … ko e tokotaha ia ko e Laumālié pē.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e fē te u lava ʻo ako lahi ange ai fekauʻaki mo e ngaahi akonaki ʻi he Tokāteline mo e Ngaahi Fuakava 130:1–17?

Makehe mei he ngaahi tefito ʻoku fakamatala ki ai ʻa e lēsoni ko ʻení, naʻe akoʻi ʻe he Palōfita ko Siosefa Sāmitá ha ngaahi tefito kehe ʻoku lekooti ʻi he Tokāteline mo e Ngaahi Fuakava 130. ʻOku kau heni ʻa e natula taʻengata ʻo ʻetau feohi mo e niʻihi kehé, ko e tokaimaʻanga ʻa e ʻOtuá, ikuʻanga ʻo e māmaní, mo e Hāʻele ʻAnga Ua Mai ʻa Sīsū Kalaisí. Ki ha fakamatala lahi ange ki he ngaahi tefito ko ʻení, vakai ki he tohi ʻinisititiuti Tokāteline mo e Ngaahi Fuakavá – Tohi Lēsoni ʻa e Tokotaha Akó (2018), 751–58.

Tokāteline mo e Ngaahi Fuakava 130:18–19. Ko e hā ʻoku totonu ai ke hokohoko atu ʻeku akoʻi hoku ʻatamaí mo hoku laumālié?

Naʻe akonaki ʻa Palesiteni Lāsolo M. Nalesoni ʻo pehē:

Ko e meʻa ia ʻaʻau ke ako. He ʻikai ke lava ʻo fai ia ʻe ha taha maʻau. Ko e fē pē ʻokú ke ʻi aí, fakatupulaki ha holi ke ako. ʻOku ʻikai hoko e ako fakaʻatamaí, kiate kitautolu Kāingalotu ʻo e Ngaahi ʻAho Kimui Ní ko ha faingamālie pē, ko ha fatongia fakalotu ia. Ko e nāunau ʻo e ʻOtuá ʻa e ʻatamai potó (vakai, Tokāteline mo e Ngaahi Fuakava 93:36). ʻOku moʻoni, ko ʻetau akó ki he ngaahi taʻengatá kotoa. … Ko e akó ko e faikehekehe ia ʻo e fakaʻamu ke ke lava ʻo tokoniʻi ʻa e kakai kehé pea mo e malava ko ia ke tokoniʻi kinautolú. (Russell M. Nelson, “Will You Choose to Increase in Learning?,” New Era, Sepitema 2014, 2–3)

Tokāteline mo e Ngaahi Fuakava 130:20–21. Ko e hā ʻa e tāpuaki taupotu taha ʻo e talangofua ki he ngaahi fono ʻa e ʻOtuá?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

Naʻe akoʻi ʻe Siosefa Sāmita naʻe “fokotuʻu ʻe he ʻOtuá ʻa e ngaahi fonó ke lava ʻe he ngaahi laumālie te Ne tuku mai ki he māmaní ʻo maʻu ʻa e faingamālie ke nau fakalakalaka ʻo hangē pē ko Iá.” [Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 238.] Ko e ʻofa ʻa e ʻOtuá ʻoku mātuʻaki haohaoa pea ko Hono finangaló ia ke tau talangofua ki Heʻene ngaahi fekaú koeʻuhí, he ʻokú Ne ʻafioʻi ko e talangofua pē ki Heʻene ngaahi fonó ʻa e founga ʻe lava ke tau hoko ai ʻo haohaoa tatau mo Iá. (Dallin H. Oaks, “ʻOfá mo e Fonó,” Liahona, Nōvema 2009, 27)

Tokāteline mo e Ngaahi Fuakava 130:22–23. Ko e fē te u lava ʻo ako lahi ange ai fekauʻaki mo e Toluʻi ʻOtuá?

Sio ʻi he vitiō “What Is the Godhead?” (7:03) ke ako lahi ange fekauʻaki mo e mēmipa takitaha ʻo e Toluʻi ʻOtuá mo ʻEnau ngāue fakataha ke faitāpuekina ʻetau moʻuí.

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 130:18–19. ʻIló mo e Potó

Fakaafeʻi ʻa e kau akó ke fakakaukauloto ʻoku nau mavahe mei ʻapi ʻi ha ngaahi uike siʻi. ʻOku fakangofua kinautolu ke nau faʻo pē ʻa e meʻa ʻe hao ʻi ha katoleta pe kato ʻe taha. Fehuʻi ange pe ko e hā e meʻa te nau faʻó.

Kole ange leva ki he kau akó ke nau fakakaukauloto ko ʻenau fakataumuʻá ki he maama ʻo e ngaahi laumālié, ʻa ia te tau ō ki ai ʻi heʻetau maté. Fakaafeʻi kinautolu ke vahevahe pe ko e fē ʻi he ngaahi meʻa ne nau fakakaukau ki ai kimuʻá te nau lava ʻo ʻave mo kinautolu ʻi heʻenau maté.

Lau ʻa e Tokāteline mo e Ngaahi Fuakava 130:18–19, ʻo kumi ʻa e ngaahi meʻa te tau lava ʻo ʻave mo kitautolu ʻi he taimi te tau mate aí. Hili hono kole ki he kau akó ke lipooti ʻa e ngaahi meʻa ne nau maʻú, tokoni ke nau ʻiloʻi ha moʻoni hangē ko ʻení: Te tau toe tuʻu mo e ʻilo mo e poto ʻoku tau maʻu ʻi he moʻui ko ʻení ʻi he Toetuʻú.

Aleaʻi ha ngaahi fehuʻi hangē ko ‘ení:

• ʻE tokoni fēfē hono ʻiloʻi ʻa e moʻoni ko ʻení ki hoʻo ngaahi filí mo e ngaahi meʻa ʻoku fakamuʻomuʻá?

• Ko e hā e meʻa ʻokú ke ako mei he ngaahi veesi ko ʻení fekauʻaki mo e founga te ke lava ai ʻo fakatupulaki ʻi he ʻiló mo e potó?

Tokāteline mo e Ngaahi Fuakava 130:20–21. Ko hono maʻu ha ngaahi tāpuaki mei he ʻOtuá

Fakaafeʻi ʻa e kau akó ke fakakaukauloto ne nau fiemaʻu ke fakaleleiʻi ʻenau tohinimá. Kole ange ke nau vahevahe ha ngaahi meʻa te nau lava ʻo fai ke aʻusia ai ʻa e taumuʻa ko ʻení.

Hili iá pea ʻai ke nau fakakaukauloto ne nau fakakaukau te nau lava ʻo fakaleleiʻi ʻenau tohinimá ʻaki haʻanau lele ʻi ha maile ʻe tolu, ʻaho ʻe nima ʻi he uiké, ʻi ha māhina ʻe taha.

• Ko e hā ʻa e ola ʻe maʻú? Ko e hā hono ʻuhingá?

Hili iá, ʻe lava ke lau ʻe he kau akó ʻa e Tokāteline mo e Ngaahi Fuakava 130:20–21, ʻo kumi ha foʻi moʻoni ʻe lava ke fekauʻaki mo e ngaahi tāpuaki fakalaumālie ʻoku tau holi ke maʻú. (Mahalo te ke fie fakamatalaʻi ange ʻoku ʻuhinga ʻa e “makatuʻungá” ki he “fakatefito ʻi he” pea ʻoku tuʻuloa mo taʻefeliliuaki ha fono “naʻe tuʻutuʻuni pau”.)

• Fakatatau ki he Tokāteline mo e Ngaahi Fuakava 130:20–21, te tau maʻu fēfē ha tāpuaki mei he ʻOtuá?

ʻO ka fiemaʻu, tokoni ke ʻilo ʻe he kau akó ʻa e foʻi moʻoni ko ʻení: Kapau ʻoku tau fiemaʻu ha tāpuaki mei he ʻOtuá, kuo pau leva ke tau talangofua ki he fono ʻa ia ʻoku makatuʻunga aí.

ʻE ala tokoni ki he kau akó ke nau kumi ha ngaahi sīpinga ʻi he folofolá ʻokú ne fakahaaʻi ʻa e ngaahi tāpuaki te tau lava ʻo maʻu ʻi heʻetau muimui ki ha ngaahi fono pau ʻa e ʻOtuá. Hangē ko ʻení, te ke lava ʻo fokotuʻu ange ke nau ako ʻa e Sione 7:17; 2 Nīfai 32:3; Tokāteline mo e Ngaahi Fuakava 10:5; 88:124.

Fakaafeʻi ʻa e kau akó ke hiki hifo ʻa e ngaahi tāpuaki ʻoku nau fiemaʻú. Hili iá pea fakaafeʻi kinautolu ke hiki ʻa e fono pe ngaahi fono ʻoku fiemaʻu ke nau talangofua ki ai ke maʻu ʻa e ngaahi tāpuaki ko iá. Fakamahinoʻi ange ʻoku mātuʻaki pau ha ngaahi fono mo ha ngaahi tāpuaki ʻe niʻihi kae fakalūkufua ange ha niʻihi. Fakamanatu ki he kau akó ʻe ala hoko mai ha ngaahi tāpuaki ʻe niʻihi ʻi he moʻui ka hokó. Te ke lava foki ʻo vahevahe ʻa e fakamatala ko ʻení meia ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ʻikai totonu ke tau fakakaukau ʻoku hangē ʻa e palani ʻa e ʻOtuá ko ha mīsini fakatau (vending machine) lahi ke tau (1) fili atu pē ha tāpuaki ʻoku fiemaʻu, (2) ʻoatu ʻa e lahi ʻo e ngāue lelei ʻoku fiemaʻú, pea (3) maʻu mai ʻi he taimi pē ko iá ʻa e fakataú.

ʻE tauhi moʻoni ʻe he ʻOtuá ʻEne ngaahi fuakavá mo e talaʻofá kiate kitautolu takitaha. … Ka ʻoku ʻikai ke tupunga, faʻu, mo taimiʻi ʻa e tāpuaki kotoa pē ʻo fakatatau ki he talangofua ki he fonó [Tokāteline mo e Ngaahi Fuakava 130:20–21] mo ʻetau ʻamanakí. ʻOku tau fakahoko hotau lelei tahá ka kuo pau ke tuku kiate Ia hono tokangaʻi ʻo e ngaahi tāpuakí, ʻo fakatou tatau ki he fakatuʻasinó mo e fakalaumālié. (D. Todd Christofferson, “Ko Hotau Vā Fetuʻutaki mo e ʻOtuá,” Liahona, Mē 2022, 78–79)

Tokāteline mo e Ngaahi Fuakava 130:22–23. Ko e natula ʻo e Toluʻi ʻOtuá

Fakaafeʻi ʻa e kau akó ke fakakaukauloto ki he tūkunga ko ʻení:

Lolotonga hoʻo talanoa mo ha kaungāmeʻa, ʻoku ʻohake ai ʻa e kaveinga ʻo e tui ki he ʻOtuá. Kuo akoʻi ho kaungāmeʻá ʻoku ʻikai ko ha taha ʻa e ʻOtuá ka ko ha mālohi pē ʻoku taka holo pea ʻoku maʻu ia ʻi he feituʻu kotoa pē ʻi he taimi pē ʻe taha.

Kole ki he kau akó ke ako ʻa e Tokāteline mo e Ngaahi Fuakava 130:22–23, ʻo kumi ha ngaahi moʻoni fekauʻaki mo e Toluʻi ʻOtuá naʻe fakahā ʻe he ʻEikí ki he Palōfita ko Siosefa Sāmitá ʻe lava ʻo tokoni ki he ngaahi hohaʻa hangē ko ia naʻe vahevahe ʻi he tūkungá.

Te ke lava foki ʻo fakaafeʻi kinautolu ke fekumi ʻi he ngaahi fakamatala “ʻOtuá” ʻi he Fakahinohino ki he Ngaahi Folofolá ke maʻu ha ngaahi potufolofola lahi ange te nau lava ʻo vahevahe mo honau kaungāmeʻá.

Hili ʻa e ako ʻa e kau akó, aleaʻi ʻa e meʻa ne nau akó ʻaki hano ʻeke ha ngaahi fehuʻi hangē ko e:

• Ko e hā ha ngaahi moʻoni naʻá ke maʻu mei he folofolá te ke lava ʻo vahevahe? (ʻE lava ke ʻilo ʻe he kau akó ha ngaahi moʻoni hangē ko ʻení: ʻOku sino mavahevahe ʻa e toko Toluʻi ʻOtuá. ʻOku maʻu ʻe he Tamaí mo e ʻAló ha sino hā mai, nāunauʻia ʻo e kakano mo e hui. Ko e Laumālie Māʻoniʻoní ko ha laumālie pē ia.)

• ʻE liliu fēfē hoʻo moʻuí pe ko ho vā fetuʻutaki mo e ʻOtuá ʻi hoʻo ʻiloʻi mo tui ki he ngaahi moʻoni ko ʻení?