“Lēsoni 143—Tokāteline mo e Ngaahi Fuakava 133:1–40: Ko e Teuteu ke Feʻiloaki mo e Fakamoʻuí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 133:1–40,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 143: Tokāteline mo e Ngaahi Fuakava 133–134
Tokāteline mo e Ngaahi Fuakava 133:1–40
Ko e Teuteu ke Feʻiloaki mo e Fakamoʻuí
ʻI Nōvema 1831, naʻe loto ʻa e kau taki ʻo e Siasí ke ʻilo lahi ange ki hono malangaʻi ʻo e ongoongoleleí mo hono tānaki fakataha ʻo ʻIsilelí. ʻOku fakamatalaʻi ʻe he fakahā ʻi he Tokāteline mo e Ngaahi Fuakava 133 ʻa e ngaahi meʻa ʻe hoko kimuʻa ʻi he Hāʻele ʻAnga Ua Mai ʻa e Fakamoʻuí mo e founga ʻe lava ke teuteu ai ʻEne Kāingalotú ki he ngaahi meʻa ko iá. ʻE lava ke tokoni ʻa e lēsoni ko ʻení ke teuteu ʻa e kau akó ki he Hāʻele ʻAnga Ua Mai ʻa Sīsū Kalaisí.
Laʻiʻata ne faʻu ʻe he AI
Ngaahi ʻEkitivitī Ako ʻOku Ala Fakahokó
Taimi ke teuteú
Kole ki he kau akó ke lau maʻuloto ʻa e kupuʻi lea mahuʻinga mei he potufolofola fakataukei fakatokāteline Tokāteline mo e Ngaahi Fuakava 29:10–11 (ʻo ʻikai fakaʻaongaʻi ʻenau folofolá pe maʻu ha taimi ke teuteu). Te ke lava ʻo ui ʻa e ʻekitivitií ko ha kiʻi sivi fakaʻohovale. Fai ange leva ki he kau akó ʻa e fehuʻi ko ʻení.
-
Naʻe mei kehe fēfē nai ʻa e olá kapau naʻá ke ʻilo fekauʻaki mo e siví ni ʻi ha ngaahi ʻaho pe naʻa mo ha ngaahi uike kimuʻa?
Te ke lava ʻo ʻoange ki he kau akó ha miniti ʻe 2 ki he 3 ke nau teuteu ai ke toe fai ʻa e siví. Hili iá pea vakai ki he founga ʻoku tupulaki ai ʻenau malava ke lau maʻuloto ʻa e kupuʻi leá.
Fakaafeʻi ʻa e kau akó ke fakafehoanaki ʻa e ʻekitivitī ko ʻení ki he founga ʻe liliu ai ʻetau aʻusiá kapau te tau feinga ke teuteu ki he Hāʻele ʻAnga Ua Mai ʻa e Fakamoʻuí. Fakaafeʻi kinautolu ke fakalaulauloto pe lekooti ʻenau ngaahi tali ki he ngaahi fehuʻi ko ʻení.
-
Ko e hā hoʻo ongo fekauʻaki mo e feʻiloaki mo e Fakamoʻuí ʻi Heʻene toe hāʻele maí?
-
ʻOkú ke ongoʻi mateuteu fēfē ki Heʻene toe hāʻele maí? (Ko e hā ʻokú ke vēkeveke taha ki aí? Ko e hā ʻokú ke hohaʻa ki ai fekauʻaki mo e ʻaho ko iá?)
ʻI he ako ʻa e kau akó ʻi he ʻaho ní, poupouʻi kinautolu ke fekumi ki ha ngaahi ueʻi fakalaumālie fekauʻaki mo e founga ke teuteu ai ki he liuaki mai ʻa e Fakamoʻuí.
ʻE lava ke tokoni ʻeni ke mahino lelei ange ki he kau akó ʻa e puipuituʻa ʻo e Tokāteline mo e Ngaahi Fuakava 133. Te ke lava pe ko ha tokotaha ako ʻo lau pe fakamatalaʻi fakanounou ʻa e palakalafí.
ʻI Nōvema 1831, naʻe tokolahi ha kau taki ʻo e Siasí naʻa nau fie ʻilo lahi ange ki hono malangaʻi ʻo e ongoongoleleí mo hono tānaki fakataha ʻo ʻIsilelí. Naʻe ʻomi ʻe Sīsū Kalaisi ʻa e fakahā ko ʻení ko ha tali ki he ngaahi holi fakamātoato ko ʻení. Naʻe ʻuluaki pulusi ʻa e fakahā ʻoku ʻi he Tokāteline mo e Ngaahi Fuakava 133 ʻi he taimi ní, ko ha fakamatala fakalahi ki he Tohi ʻo e Ngaahi Fekaú. Naʻe maʻu ia hili ha ʻaho ʻe ua mei he vahe 1, ʻa ia naʻe ʻuluaki ʻiloa ko e “talamuʻaki ʻa e ʻEikí.”
Lau ʻa e Tokāteline mo e Ngaahi Fuakava 133:1–4, 10–11, ʻo fekumi ki he meʻa naʻe fakahā ʻe he Fakamoʻuí fekauʻaki mo ʻEne liuaki ki he māmaní.
-
Ko e hā naʻá ke ʻiló?
-
Ko e hā ʻokú ke ako mei he veesi 4 fekauʻaki mo e finangalo ʻo e Fakamoʻuí maʻatautolú?
Lolotonga ʻa e vahevahe ʻa e kau akó, te ke lava ʻo hiki ʻa e foʻi moʻoni ko ʻení ʻi he palakipoé: ʻOku fakaafeʻi kitautolu ʻe Sīsū Kalaisi ke tau teuteu ki Heʻene Hāʻele ʻAnga Ua Maí.
-
ʻOkú ke pehē ko e hā ha niʻihi ʻo e ngaahi founga mahuʻinga taha ke teuteu ai ki he Hāʻele ʻAnga Ua Mai ʻa e Fakamoʻuí?
Teuteu ki he Hāʻele ʻAnga Ua Maí
Ke tokoni ke ʻiloʻi ʻe he kau akó ʻa e ngaahi founga te nau lava ai ʻo teuteu ki he Hāʻele ʻAnga Ua Maí, te ke lava ʻo tānaki ʻa e “ʻakí …” ki he ngataʻanga ʻo e foʻi moʻoni ʻoku tohi fakamamafaʻi ʻi he palakipoé. Fakaafeʻi ʻa e kau akó ke ako ʻa e ngaahi veesi ko ʻení ʻi ha fanga kiʻi kulupu tokosiʻi ange. Kole ange leva ke nau hiki ʻi he palakipoé ʻa e ngaahi founga ʻoku fakaafeʻi ai kitautolu ʻe he Fakamoʻuí ke tau teuteu ki Heʻene Hāʻele ʻAnga Ua Maí.
Lau ʻa e Tokāteline mo e Ngaahi Fuakava 133:5–16, 36–40, 62, ʻo kumi ʻa e ngaahi foʻi lea mo e kupuʻi lea ʻe tokoni ke tau teuteu ai ki he liuaki mai ʻa e Fakamoʻuí.
ʻE lava ke tokoni ʻa e ʻekitivitī ko ʻení ke vahevahe ʻe he kau akó ha ngaahi fakakaukau ki he founga te tau lava ai ʻo teuteu ki he Hāʻele ʻAnga Ua Mai ʻa e Fakamoʻuí. Fakaafeʻi ʻa e ngaahi kulupú ke fili ha taha ʻo e ngaahi fakakaukau teuteu ʻi he palakipoé, pe vahe ki he kulupu takitaha ha tefito. ʻE lava ke teuteu ʻe he kau akó ha fakamatala fakaʻaliʻali ke akoʻi ʻa e niʻihi kehé ʻi he founga ke mateuteu ai ki he Hāʻele ʻAnga Ua Maí. Fakakaukau ke ʻoange ha papa pousitā pe ʻū laʻipepa mo ha ngaahi peni fakaʻilonga lanu kehekehe ke tokoni ki he kau akó ʻi hono faʻu ʻenau fakamatalá. Poupouʻi kinautolu ke fakaʻaongaʻi ʻa e polokalama Gospel Library, Fakahinohino ki he Ngaahi Folofolá, mo ha ngaahi maʻuʻanga tokoni kehe ke tokoni ki heʻenau teuteú. ʻE lava ke kau ʻi he fakamatala fakaʻaliʻali takitaha ʻa e ngaahi meʻa ko ʻení:
-
Ko e fakamatala ʻo e moʻoní ʻa ia naʻe fili ʻe he kulupú pe naʻe vahe angé
-
Ngaahi fakakaukau pau ki he founga ʻe lava ke fakaʻaongaʻi ai ʻe he toʻu tupú ʻa e meʻa ne nau akó ke nau mateuteu lelei ange ke feʻiloaki mo e Fakamoʻuí
-
Ngaahi potufolofola fekauʻakí, fakamatala ʻa ha taki ʻo e Siasí, pe ha potufolofola mei he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí fekauʻaki mo e tefitó
-
Ko ha tā fakatātā, pousitā, kupuʻi lea, pe ngaahi fakatātā kehe ʻe lava ʻo tokoni ke mahino ki ha taha ʻa e founga ke teuteu ai ki he Hāʻele ʻAnga Ua Maí
Ka fiemaʻu ʻe he kau akó ha fakahinohino lahi ange, te ke lava ʻo ʻoange ki he ngaahi kulupú ha konga ʻo e laʻipepa tufa ko ʻení ʻoku fekauʻaki mo ʻenau tefitó.
ʻOku Fakaafeʻi Kitautolu ʻe Sīsū Kalaisi ke Tau Teuteu ki Heʻene Hāʻele ʻAnga Ua Maí ʻaki ʻetau …
… mavahe mei Pāpilone (angahalá) (vakai, Tokāteline mo e Ngaahi Fuakava 133:4–5, 7, 12–14).
Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:
Kuo fuoloa ʻa e holofa ʻa e kolo motuʻa ko Pāpiloné. Kuo mole atu hono fakaʻofoʻofá. Ka ʻoku kei tukuʻau mai pē ʻa e anga fakaemāmani mo e faiangahala ʻa Pāpiloné. ʻOku ʻatautolu leva ʻi he taimí ni ke tau hoko ko ha kakai tui ʻi ha māmani taʻetui. … Kuo pau ke tau ikunaʻi ʻa e mālohi ʻo e fakatamaikí, ʻoua ʻe ʻāvea ʻi he ngaahi meʻa ʻoku manakoá pe ko e kau palōfita loí, tukunoaʻi ʻa e manuki ʻa e kau taʻe tui ʻOtuá, fakaʻehiʻehi mei he fakatauvele ʻa e filí pea mo ikunaʻi ʻetau fakapikopikó. (Dieter F. Uchtdorf, “ʻOua Naʻá ke Manavahē, Ka ke Tui Pē,” Liahona, Nōvema 2015, 77–78)
… tānaki fakataha ʻa ʻIsileli (vakai, Tokāteline mo e Ngaahi Fuakava 133:4, 7–9, 37–38).
Naʻe fakamanatu mai ʻe Palesiteni Lāsolo M. Nalesoni kiate kitautolu ʻo pehē:
Ko e taimi kotoa pē ʻokú ke fai ai ha faʻahinga meʻa pē ke tokoni ki ha faʻahinga taha pē—ʻi ha faʻahinga tafaʻaki pē ʻo e veilí—ke ne laka ki muʻa ʻi hono fakahoko ʻa e ngaahi fuakava mo e ʻOtuá mo maʻu honau ngaahi ouau mahuʻinga ʻo e papitasó mo e temipalé, ʻokú ke tokoni ai ke tānaki fakataha ʻa ʻIsileli. ʻOku faingofua pehē ia. (Russell M. Nelson, in “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], broadcasts.ChurchofJesusChrist.org)
… fakatomala pea fakamāʻoniʻoniʻi ʻo fakafou ʻia Sīsū Kalaisi (vakai, Tokāteline mo e Ngaahi Fuakava 133:5, 16, 34–35, 62).
Naʻe pehē ʻe Sisitā Kalo F. Makongikī, ko e Tokoni ʻUluaki mālōlō ʻi he Kau Palesitenisī Lahi ʻo e Kau Finemuí:
Te tau lava [ʻo] hoko ʻo maʻa, mo taʻe-mele, ʻi he taimi ʻoku tau fakafisi ai mei he anga taʻe-māʻoniʻoni kotoa pē ʻi heʻetau tui kia Sīsū Kalaisi mo ʻEne Fakaleleí pea fakatomala moʻoní. ʻOku papitaiso kitautolu ʻi he vaí, ke fakamolemoleʻi ʻetau ngaahi angahalá. ʻOku [fakamāʻoniʻoniʻi] hotau laumālié ʻi he taimi ʻoku tau tali loto-fiefia ai ʻa e Laumālie Māʻoniʻoní. ʻOku tau maʻu fakauike ʻa e ouau ʻo e sākalamēnití. ʻI he laumālie ʻo e fakatomala mo e holi moʻoni ki he angamāʻoniʻoní, ʻoku tau fuakava ai ʻoku tau loto-fiemālie ke toʻo kiate kitautolu ʻa e huafa ʻo Kalaisí, manatu kiate Ia, mo tauhi ʻEne ngaahi fekaú ke ʻiate kitautolu maʻu ai pē Hono Laumālié. (Carol F. McConkie, “Ko e Matamatalelei ʻo e Māʻoniʻoní,” Liahona, Mē 2017, 10)
Fakaafeʻi ʻa e kulupu takitaha ke vahevahe ʻenau fakamatala fakaʻaliʻalí mo e niʻihi kehé. Fakapapauʻi ʻoku vahevahe ʻe he kau akó, ʻo kau ʻi heʻenau fakamatala fakaʻaliʻalí, ʻa ʻenau ngaahi fakakaukau ki he founga ʻe lava ke fakaʻaongaʻi ai ʻe he toʻu tupú ʻa e meʻa ne nau akó.
Ko hono fakaʻaongaʻi ʻo e meʻa kuó ke akó
Naʻe fakaafeʻi kitautolu ʻe Palesiteni Tāleni H. ʻOakesi ʻo e Kau Palesitenisī ʻUluakí ke fakakaukau ki he meʻa te tau fai ʻi he ʻahó ni kapau naʻa tau ʻiloʻi ʻa e taimi pau ʻo e Hāʻele ʻAnga Ua Maí.
ʻE fēfē nai kapau ko e ʻaho te Ne hāʻele mai aí ko ʻapongipongi? Kapau naʻa tau ʻilo te tau feʻiloaki mo e ʻEikí ʻapongipongi—ʻi haʻatau mate fakafokifā pe ko ʻEne hāʻele fakatuʻupakē maí—ko e hā te tau fakahoko ʻi he ʻaho ní? Ko e hā ha ngaahi vetehia te tau fakahoko? Ko e hā ha ngaahi angafai te tau taʻofi? Ko e hā ha ngaahi moʻua te tau totongi? Ko e hā ha ngaahi fakamolemole te tau fakahoko? Ko e hā ha ngaahi fakamoʻoni te tau fai?
Kapau te tau fai ʻa e ngaahi meʻa ko ʻení ʻi he taimi ko iá, ko e hā ʻoku ʻikai ke tau fai ai ia ʻi he taimi ní? Ko e hā ʻoku ʻikai ke tau fekumi ai ki he melinó ʻi he kei lava ʻo maʻu ʻa e melinó? (Dallin H. Oaks, “Preparation for the Second Coming,” Liahona, Mē 2004, 9)
Hiki ʻi hoʻo tohinoa akó ha meʻa ʻokú ke ongoʻi ʻoku ueʻi koe ke ke fai ke mateuteu lelei ange ai ke feʻiloaki mo e Fakamoʻuí, mei he fakaafe ʻa Palesiteni ʻOakesí mo e meʻa naʻá ke ako ʻi he ʻaho ní. Hili iá pea tali ʻa e ngaahi fehuʻi ko ʻení:
-
Ko e hā ha ngaahi faingataʻa te ke ala fehangahangai mo ia ʻi he meʻa kuo ueʻi koe ʻe he Laumālié ke ke faí?
-
Ko e hā ha ngaahi ngāue ʻe ala tokoni atu ke ke fehangahangai ai mo e ngaahi faingataʻa ʻokú ke fehangahangai mo iá? Te ke fakafalala fēfē nai ki he Fakamoʻuí?
-
Ko e hā kuó ke ongoʻi ʻi he ʻahó ni fekauʻaki mo e ngaahi lelei ʻo e teuteu ʻi he taimí ni ki he Hāʻele ʻAnga Ua Mai ʻa e Fakamoʻuí?
Kapau ʻe feʻunga, ʻe lava ke vahevahe ʻe he kau akó ʻa e meʻa kuo ueʻi kinautolu ʻe he Laumālié ke nau fai ke teuteu ki he liuaki mai ʻa e Fakamoʻuí. Te ke lava ʻo fakaʻosi ʻa e lēsoní ʻaki hano fakamanatu ki he kau akó ʻoku finangalo ʻa e Tamai Hēvaní mo Sīsū Kalaisi ke tau mateuteu ki he Hāʻele ʻAnga Ua Maí pea ke fakakaukau ki ai ko ha ʻaho fakafiefia.