“Lēsoni 145—Tokāteline mo e Ngaahi Fuakava 134: Ko ha Fanongonongo kau ki he Ngaahi Puleʻangá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 134,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 145: Tokāteline mo e Ngaahi Fuakava 133–134
Tokāteline mo e Ngaahi Fuakava 134
Ko ha Fanongonongo kau ki he Ngaahi Puleʻangá
ʻI he tali ki he ngaahi fakatangá mo e ngaahi tukuakiʻi fekauʻaki mo e ngaahi tui ʻa e Siasí, naʻe hiki ʻe he kau taki ʻo e Siasí ha tohi ke fakamahinoʻi ʻaki ʻa e tuʻunga ʻo e Siasí ʻi he puleʻangá mo e tui fakalotú. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e mahuʻinga ʻo e tauʻatāina fakalotú pea mo e talangofua ki he ngaahi lao ʻa e puleʻangá ʻi he feituʻu ʻoku nau nofo aí.
Ngaahi ʻEkitivitī Ako ʻOku Ala Fakahokó
Ko e aʻusia ʻa Palesiteni Nalesoni mo ha tuʻí
Ke kamata ʻa e kalasí, fakakaukau ke fakamatalaʻi fakanounou ʻa e palakalafi ko ʻení pea lau ʻa e fakamatala ʻa Palesiteni Lāsolo M. Nalesoni ʻi laló. Pe ko hoʻo hulu ʻa e foʻi vitiō “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?” mei he taimi 0:00 ki he 3:16. ʻOku maʻu ʻa e vitioó ni ʻi he ChurchofJesusChrist.org.
ʻI he 1986, naʻe hoko ʻa Palesiteni Lāsolo M. Naʻesoni ko ha fakaafe lea fakalāngilangi ʻi ha ʻunivēsiti ʻi ʻAkalā, Kana. Hili ʻa e lea ʻa Palesiteni Nalesoní, naʻe fakafeʻiloaki ange ha tuʻi ʻo ha matakali kiate ia ʻo ne fai ha ngaahi fehuʻi fekauʻaki mo Sīsū Kalaisi. Naʻe vahevahe ʻe Palesiteni Nalesoni ha ngaahi fakakaukau mei he 3 Nīfaí ʻa ia naʻe ongo lahi ki he tuʻí.
Hili ʻene aʻusia ʻa e mālohi ʻo e folofola ʻa e Fakamoʻuí ʻi he 3 Nīfaí, ne folofola mai ʻa e tuʻí, “Kapau te u ului ki he Siasí, te u fekauʻi kotoa hoku matakalí ke nau kau mai.” (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 61)
Kimuʻa pea vahevahe ʻa e tali ko ʻeni meia Palesiteni Nalesoní, kiʻi taʻofi ke fehuʻi ki he kau akó pe te nau fēfē kapau naʻa nau hoko ko ha faifekau ʻi he kakai ʻo e tuʻi ko ʻení pea nau fanongo ki heʻene lea ʻaki ʻení.
Naʻe tali ange ʻe Palesiteni Nalesoni, “ʻE hoʻo ʻAfio, … ʻoku ʻikai ke pehē ia” (“Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 61).
-
Ko e hā ʻokú ke ʻilo fekauʻaki mo e palani ʻa e Tamai Hēvaní ʻe lava ʻo tokoni ke fakamatalaʻi ʻa e tali ʻa Palesiteni Nalesoní?
-
Neongo naʻe ʻi ai ha ngaahi taumuʻa lelei ʻa e tuʻí, ko e hā ʻoku mahuʻinga ai ke hoko ʻa e ului ʻa e kakaí ki he ongoongolelei ʻa e Fakamoʻuí ko ha fili fakafoʻituitui?
Kapau ʻoku fie ʻilo ʻa e kau akó pe ko e hā mo ha toe meʻa naʻe talaange ʻe Palesiteni Nalesoni ki he tuʻí, vahevahe ʻa e meʻa naʻá ne akoʻí: “Ko e uluí ko ha meʻa fakataautaha ia. … ʻOku maʻu ʻe he fakafoʻituituí ha fakamoʻoni mo e ʻilo ki he ongoongolelei ʻo Sīsū Kalaisí” (“Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” 61).
Fakaafeʻi ʻa e kau akó ke fekumi ki he fakahinohino ʻa e Tamai Hēvaní lolotonga ʻa e lēsoni ʻo e ʻaho ní fekauʻaki mo e ʻuhinga ʻoku mahuʻinga ai ke nau maʻu ʻa e tauʻatāina ke fili ke muimui ʻia Sīsū Kalaisí ʻo fakatatau mo ʻenau ngaahi holí. Fakaafeʻi foki kinautolu ke fakakaukau ki he mahuʻinga ʻo e talangofua ki he ngaahi lao ʻo e fonuá mo fakaʻapaʻapaʻi ʻa kinautolu ʻoku kehe ʻenau tuí meiate kinautolú. Mahalo te ke fie ʻoange ha taimi ki he kau akó ke hiki ʻenau ngaahi fakakaukau fekauʻaki mo ha fakakaukau ʻe taha pe lahi ange mei he ngaahi fakakaukau ko ʻení kimuʻa pea mou hoko atú.
Ko e mahuʻinga ʻo e puleʻangá mo e tui fakalotú
ʻI he 1830 tupú, naʻe fehangahangai ʻa e kāingalotu ʻo e Siasí mo ha fakatanga, naʻe kau ʻi he ngaahi ʻuhingá ha maʻuhala te nau taʻetokaʻi ʻa e ngaahi lao ʻo e puleʻangá ʻi he mālohi ʻo e tui fakalotú. Ke tokoni ke fakamahinoʻi ʻa e tukupā ʻa e Kāingalotú ke muimui ki he ngaahi lao ʻo e fonuá fakataha mo hono fakaʻaongaʻi ʻa e tauʻatāina ʻo e tui fakalotú, naʻe tohi ʻe he kau taki ʻo e Siasí ha fanongonongo ʻo e tuí ʻoku ʻiloa ʻi he taimí ni ko e Tokāteline mo e Ngaahi Fuakava 134.
Ke tokoni ke mahino ki he kau akó ʻa e kakano ʻo e vahe ko ʻení, fakakaukau ke vahevahe ʻa e kau akó ke nau tauhoa. ʻE lava ke vahe ki he hoa takitaha ke tokanga taha ki ha taha ʻo e ongo moʻoni ko ʻení:
-
ʻOku tau tui ki he talangofua ki he ngaahi lao ʻo e puleʻanga ʻoku tau nofo aí (vakai, Tokāteline mo e Ngaahi Fuakava 134:1, 3, 5–6).
-
ʻOku tau tui ki he tauʻatāina ʻo e lotú mo e konisēnisí (vakai, Tokāteline mo e Ngaahi Fuakava 134:2, 4–5, 7).
ʻE lava ke lau ʻe he hoa takitaha ʻa e ngaahi veesi ʻoku fekauʻaki mo ʻenau foʻi moʻoní, ʻo kumi ha ngaahi foʻi lea mo ha ngaahi kupuʻi lea ʻoku nau poupouʻi pe fakamahinoʻi ʻa e moʻoni ko iá. Hili iá ʻe lava ke feakoʻiʻaki ʻe he ngaahi hoá ʻa e meʻa ne nau akó.
ʻI he ʻosi ʻa e vahevahe ʻa e kau akó mo honau ngaahi hoá, fakaafeʻi ha niʻihi ʻe loto-fiemālie ke tali ʻa e ngaahi fehuʻi ko ʻení:
-
Ko e hā naʻe makehe kiate koe ʻi he meʻa naʻá ke laú?
-
Ko e hā ha ngaahi fehuʻi ʻe ala maʻu ʻe ha taha hili ʻene lau ʻa e ngaahi veesi ko ʻení?
Ke tokoni ke maʻu ʻe he kau akó ha ngaahi tali ki heʻenau ngaahi fehuʻí pea mahino lelei ange kiate kinautolu ʻa e ngaahi moʻoni ʻi he lēsoni ko ʻení, fakakaukau ke fai ʻeni:
Vahevahe ʻa e kau akó ki ha fanga kiʻi kulupu iiki. ʻE lava ke ako mo aleaʻi ʻe he kulupu takitaha ʻa e ʻuluaki laʻipepa tufá. Hili iá pea ʻe lava ke toe fokotuʻutuʻu ʻa e kau akó ki ha ngaahi kulupu foʻou ke nau ako mo aleaʻi ʻa e laʻipepa tufa hono uá.
Ka ʻikai, ʻe lava ke ako ʻe ha vaeua ʻe taha ʻo e ngaahi kulupú ha laʻipepa tufa ʻe taha pea ako ʻe he vaeua ʻe tahá ʻa e laʻipepa tufa ʻe tahá. Hili iá, ʻe lava ke vahevahe ʻe he ngaahi kulupú ʻa e meʻa ne nau akó mo ha kulupu naʻa nau ako ha laʻipepa tufa kehe.
ʻOku Tau Tui ki he Talangofua ki he Ngaahi Lao ʻo e Puleʻanga ʻOku Tau Nofo Aí
Lau ʻa e tūkunga ko ʻení.
ʻOku ngāue fakafaifekau ʻa Talia ʻi ha feituʻu ʻoku ʻikai fakangofua ai ʻe he puleʻangá ke vahevahe ʻa e ongoongoleleí ʻi tuʻa mei ha falelotu ʻo e siasí. ʻOkú ne ongoʻi loto-foʻi koeʻuhí ʻokú ne ʻiloʻi ʻoku ʻi ai ha kakai ʻi he koló te nau tali ʻa e ongoongolelei ʻo Sīsū Kalaisí kapau te ne lava ʻo talanoa tauʻatāina ange fekauʻaki mo ia. ʻOkú ne fakakaukau ke talanoa tokanga ki he kakai ʻi he halá ke akoʻi kinautolu fekauʻaki mo e Fakamoʻuí.
-
Ko e hā haʻo tali ki he tūkunga ko ʻení?
Lau ʻa e ngaahi naunau ko ʻení, ʻo fakakaukau ki he founga te nau ala tokoni ai ke mahino kia Talia ʻa e meʻa ʻoku finangalo ʻa e Tamai Hēvaní ke ne faí.
Lau ʻa e Mātiu 22:15–22 pea mo e lea ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí, ke vakai ki he founga naʻe fakahoko ai ʻe he Fakamoʻuí ha tali ki ha fepaki ʻe ala hoko ʻi he vahaʻa ʻo e puleʻangá mo e tui fakalotú:
Neongo ʻoku fakaʻapaʻapa ʻa e kakai tui kotoa pē ki he fono fakalangí, ka ʻoku pehē foki ʻe ha tokalahi naʻe tuʻutuʻuni ʻe he ʻOtuá ʻa e ngaahi lao fakapuleʻangá. Naʻe fakahinohino ʻe he ʻEiki ko Sīsū Kalaisí, “ʻAnge kia Sisa ʻa e ngaahi meʻa ʻa Sisá; pea ʻange ki he ʻOtuá ʻa e ngaahi meʻa ʻa e ʻOtuá” (Mātiu 22:21). Ko ia ai, kuo pau ke tau feinga hotau tūkuingatá, ke talangofua ki he ongo laó fakatouʻosi. ʻI he taimi ʻoku ʻi ai ai ha ngaahi fepakipaki, kuo pau ke tau feinga ke fakaleleiʻi kinautolu. ʻI he taimi ʻoku fuʻu faingataʻa ai ke fakaleleiʻí, ʻoku totonu ke tau kau mo e niʻihi kehe ʻoku tau fakakaukau tataú ʻi he feinga ke liliu ʻa e lao fakapuleʻangá ke fenāpasi mo e fakalangí. Kuo pau ke tau mātuʻaki tokanga ʻaupito ʻi he meʻa kotoa pē kimuʻa pea toki fai ha tuʻutuʻuni—ʻi he ngaahi tūkunga makehé—ke fili ʻa e meʻa ʻoku lelei tahá. (Dallin H. Oaks, “The Boundary between Church and State” [lea naʻe fakahoko ʻi he Konifelenisi Fakatakimuʻa Fakataʻu Hono Ua ʻa Sākalamenó, 20 ʻOkatopa, 2015], newsroom.ChurchofJesusChrist.org)
Tali ʻa e ongo fehuʻi ko ʻení.
-
Ko e hā naʻá ke ako ʻe lava ʻo tokoni ke mahino kia Talia ʻoku totonu ke ne fakaʻapaʻapaʻi ʻa e ngaahi lao ʻo e feituʻu ʻokú ne ngāue aí?
-
ʻOkú ke pehē ko e hā ʻoku hoko ai ʻa e talangofua ki he lao ʻo e feituʻu ʻokú ke nofo aí ko ha tefitoʻi moʻoni ʻo e ongoongolelei ʻo Sīsū Kalaisí?
ʻOku Tau Tui ki he Tauʻatāina ʻo e Tui Fakalotú mo e Konisēnisí
Tali ʻa e ongo fehuʻi ko ʻení.
-
Ko e fē ha taimi kuó ke aleaʻi ai ʻa e tui fakalotú pe tui fakalaumālié mo ha taha ʻoku kehe ʻene tuí meiate koe?
-
Naʻe fēfē ʻenau tali ki hoʻo ngaahi tuí? Naʻe fēfē hoʻo tali ki heʻenau ngaahi tuí?
Fakakaukau ki he tūkunga ko ʻení.
ʻOku kau ʻa Liami ʻi he timi soka ʻa hono ʻapiakó. ʻOku maʻu ʻe ha taha ʻo e kau mēmipa ʻo ʻene timí, ko Sani, ha tōʻonga fakalotu fakataautaha ʻokú ne fai kimuʻa ʻi he vaʻinga takitaha. Ko Sani pē ʻa e tokotaha ʻi heʻene tui fakalotú ʻi he timí. Kuo fakatokangaʻi ʻe he kau mēmipa kehe ʻo e timí ʻa e meʻa ʻoku fai ʻe Saní pea kuo nau kamata ke fakafaingataʻaʻiaʻi ʻene meʻa ʻoku faí. ʻOku ʻiloʻi ʻe Liami ʻoku ʻikai saiʻia ʻa e kakai ʻi honau koló ʻi he taimi ʻe niʻihi ʻi he tui fakalotu ʻa Saní.
Ako ʻa e naunau ko ʻení, ʻo fakakaukau ki he founga te nau ala ʻaonga ai ki he tūkunga ʻo Liamí pea mo hoʻo feohi mo kinautolu ʻoku kehe ʻenau tuí meiate koé.
Naʻe akonaki ʻa e Palōfita ko Siosefa Sāmitá (1805–44) ʻo pehē:
Kapau naʻe ʻosi fakafōtunga atu naʻá ku fie mate maʻa ha taha “Māmonga,” ʻoku ou loto-lahi ke u fakahā ʻi he ʻao ʻo e Langí ʻoku ou mateuteu pehē ke mate ʻi hano maluʻi ha ngaahi totonu ʻa ha taha siasi Pelesipitiliane, ʻa ha taha siasi Papitaiso, pe ko ha tangata lelei ʻo ha faʻahinga siasi pē; ʻi he tefitoʻi moʻoni tatau pē ʻoku tāmoloki ai ʻa e ngaahi totonu ʻa e Kau Māʻoniʻoni ʻo e Ngaahi ʻAho Kimui Ní mo tāmoloki ai e ngaahi totonu ʻa … ha toe faʻahinga siasi ʻe ʻikai manakoa pea fuʻu vaivai fau ke maluʻi kinautolu.
Ko e ʻofa ʻi he tauʻatāiná ʻokú ne ueʻi hoku lotó—ʻa e tauʻatāina ko ia ʻa e kakaí pea mo e tui fakalotu ʻa e faʻahinga kotoa ʻo e tangatá. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 398)
-
Ko e hā te ke lava ʻo vahevahe mo Liami ʻe ala tokoni kiate ia ke ne tali ʻa e tūkunga ʻokú ne ʻi aí?
-
Ko e hā naʻá ke ako fekauʻaki mo e founga ʻoku finangalo ʻa e Tamai Hēvaní mo Sīsū Kalaisi ke ke feohi ai mo kinautolu ʻoku kehe ʻenau tuí meiate koé?
Hili hono maʻu ʻe he ngaahi kulupú ha faingamālie ke ako mei he ongo laʻipepa tufá fakatouʻosi, fakakaukau ke ʻoange ha faingamālie ke nau aleaʻi ai ʻa e meʻa ne nau akó pe ke ʻeke ha ngaahi fehuʻi fekauʻaki mo e meʻa ne nau akó.
Kapau ʻokú ke ongoʻi ʻe ʻaonga ke toe aleaʻi lahi ange ʻa e meʻa naʻe ako ʻe he kau akó fekauʻaki mo e ongo foʻi moʻoní, fakakaukau ke fakaʻaongaʻi ʻa e ngaahi fehuʻi ko ʻení.
-
ʻE lava fēfē ʻe ha taha ʻo taukaveʻi ʻene tuí kae fakaʻapaʻapaʻi foki ʻa e ngaahi tui kehe ʻa e niʻihi kehé?
-
ʻOku liliu fēfē ʻe he talangofua ki he ngaahi laó ʻa ʻetau malava ke muimui ki he palani ʻo e fakamoʻui ʻa e Tamai Hēvaní?
-
ʻOkú ke pehē ko e hā ha ngaahi founga lelei ke poupouʻi ai ʻa e tauʻatāina fakalotú ʻi loto ʻi he ngaahi lao ʻo e feituʻu ʻokú ke nofo aí?
Te ke lava ʻo fakaʻosi ʻa e lēsoní ʻaki hono fakaafeʻi ʻa e kau akó ke tali ʻa e fehuʻi ko ʻení ʻi heʻenau tohinoa akó. ʻE lava ke vahevahe ʻe ha kau ako ʻe niʻihi ʻa e meʻa ne nau tohí.
-
Ko e hā ʻokú ke ongoʻi ʻe finangalo ʻa e Tamai Hēvaní ke ke fakahoko ʻi he ngaahi meʻa kuó ke ako ʻi he ʻaho ní?