Lēsoni 148: Tokāteline mo e Ngaahi Fuakava 135–136

Ko e Hokohoko ʻi he Kau Palesitenisií

Fili ʻe he ʻEikí ke Tataki ʻa e Siasí

Kuo teʻeki ai aʻusia ʻe he kāingalotu ʻo e Siasí ʻi he kuonga ʻo Siosefa Sāmitá ʻa e pekia ʻa ha palōfita. Naʻe ʻikai ngata pē ʻi he hoko hono fakapoongi ʻo Siosefa mo Hailamé ko ha taimi faingataʻa fakaelotó ka ko e taha ʻo e ngaahi meʻa naʻe fakatupu puputuʻu mo taʻepaú ko e tokotaha te ne tataki ʻa e Siasí. Ka neongo ia, naʻe teuteuʻi ʻe he ʻEikí ha founga ke hokohoko atu ai Hono Siasí ʻi he malumalu ʻo e tataki fakaepalōfitá. ʻOku fakataumuʻa ʻa e lēsoni ko ʻení ke tokoni ke fakatupulaki ʻe he kau akó ʻenau falala ʻoku hokohoko atu hono tataki ʻe he ʻEikí ʻEne ngāué naʻa mo e pekia ʻa ha palōfita.

Ngaahi ʻEkitivitī Ako ʻOku Ala Fakahokó

Ko ha taki foʻou ʻo e Siasí

Ke kamata ʻa e kalasí, fakakaukau ke vahevahe ʻa e tūkunga ko ʻení.

Fakakaukauloto ʻoku ʻi ai haʻo kaungāmeʻa ko Kepaleli naʻe toki kau ki he Siasí mo hono fāmilí. Hili ʻene mavahe mei he seminelí ʻi ha ʻaho ʻe taha, ʻokú ne fai atu ha ngaahi fehuʻi fekauʻaki mo e tuʻunga fakatakimuʻa ʻi he Siasí. ʻOkú ne fifili pe ko e hā ʻoku hoko ʻi he taimi ʻoku pekia ai ʻa e Palesiteni ʻo e Siasí pea mo e founga ʻoku fili ai ha palōfita foʻoú. ʻOkú ne fifili foki pe ʻoku founga fēfē haʻatau fakapapauʻi ko e tokotaha totonú ʻa e palōfitá.

• ʻI ha meʻafua 1 ki he 5, ko e 1 ko e maʻulalo pea māʻolunga ʻa e 5, ʻoku fēfē hoʻo loto-falala ki ho tuʻunga malava ke tali ʻa e fehuʻi ʻa Kepalelí?

• ʻOkú ke pehē ko e hā ʻe mahuʻinga ai ke mahino ʻa e founga ʻoku liliu ai ʻe he tuʻunga fakatakimuʻá ʻa e ngāue ʻi he Siasí?

Mahalo te ke fie poupouʻi ʻa e kau akó ke nau fekumi ki he tokoni ʻa e Laumālie Māʻoniʻoní ʻi heʻenau akó ʻi heʻetau ako lahi ange fekauʻaki mo e sīpinga kuo fokotuʻu ʻe he ʻEikí ki hono fili ʻo kinautolu ʻoku nau tataki Hono Siasí. Fakaafeʻi kinautolu ke fekumi ki ha fakahā ki he ʻuhinga ʻoku mahuʻinga ai ke mahino ʻeni kiate kinautolu ʻi he taimí ni ʻi heʻenau moʻuí.

Ko hai te ne fetongi ʻa Siosefa Sāmitá?

ʻE ala tokoni ke mahino ki he kau akó ha niʻihi ʻo e meʻa ne hoko ʻo aʻu ki he ʻuluaki liliu ʻo e tuʻunga fakatakimuʻa ʻi he Siasí. Ke fai ʻení, te ke lava ʻo fakamatalaʻi fakanounou pe lau ʻeni:

ʻI he taimi ne fakapoongi ai ʻa Siosefa Sāmitá, naʻe teʻeki ai aʻusia ʻe he kāingalotu ʻo e Siasí ha pekia ʻa ha palōfita. Makehe mei he mamahi lahi ʻi he pekia ʻa Siosefá, naʻe ʻi ai ha niʻihi naʻe ʻikai ke nau fakapapauʻi pe ʻe anga fēfē ha hoko atu ʻa e Siasí. Ko e tokolahi taha ʻo e kau ʻAposetoló naʻa nau ʻi he fakahahake ʻo e ʻIunaiteti Siteití ʻo ngāue fakafaifekau ʻi he taimi ne nau ongona ai ʻa e pekia ʻa Siosefa mo Hailamé. ʻI heʻenau ʻilo ʻa e ongoongo fakamamahí, naʻa nau kamata fononga foki leva mo ha kau faifekau kehe ki Nāvū.

ʻI he ʻikai ke ʻi ai ha Palesiteni ʻo e Siasí, naʻe ʻi ai ha kakai tokosiʻi ne nau fai ha ngaahi fokotuʻu kehekehe fekauʻaki mo e meʻa ʻoku totonu ke hoko ʻi he tuʻunga fakatakimuʻa ʻo e Siasí.

Fakakaukau ke fakaafeʻi ha kau ako ʻe toko tolu ke omi ki muʻa ʻi he kalasí. Te ke lava ʻo ʻai ke lau leʻolahi ʻe he tokotaha ako takitaha ha taha ʻo e ngaahi palakalafi ʻe tolu ko ʻení. ʻOku ʻuhinga ʻa e ʻuluaki fakamatala ʻi laló kia Sitenei Likitoni. ʻOku fekauʻaki ʻa e fakamatala hono uá mo Pilikihami ʻIongi. ʻOku fekauʻaki ʻa e fakamatala hono tolú mo Sēmisi Sitālingi. Kiʻi tatali hifo hono fakahā ʻa e ngaahi hingoá ki he kau akó.

Naʻe pehē ʻe he Tokoni ʻUluaki ʻi he Kau Palesitenisī ʻUluakí naʻe fakahā ange kiate ia ʻi ha meʻa-hā-mai he ʻikai lava ʻe ha taha ʻo fetongi ʻa Siosefa. Naʻá ne fokotuʻu mai ʻoku totonu ke ne hoko ko e “tauhi” ʻo e Siasí.

Naʻe pehē ʻe he Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá naʻe foaki ʻe Siosefa Sāmita ʻa e mafai ʻo e Fakamoʻuí ke tataki ʻa e Siasí ki he Kōlomu ʻo e Toko Hongofulu Mā Uá.

Naʻe fakahaaʻi ʻe ha mēmipa naʻe papitaiso ʻi ha māhina ʻe fā kimuʻa pea pekia ʻa Siosefá, ha tohi mo ha fakamoʻoni hingoa ʻo Siosefa Sāmita ʻa ia naʻá ne fili ai ia ko e fetongi ʻo Siosefá.

• ʻOkú ke pehē ko e hā naʻá ke mei fai ʻi he ngaahi meʻa ne hoko ko ʻení, kapau ne ke hoko ko ha mēmipa ʻo e Siasí lolotonga ʻa e taimi ko ʻení?

• Ko e hā ha ngaahi hohaʻa naʻá ke mei maʻu fekauʻaki mo e ngaahi fokotuʻú ni?

Ko ha sīpinga naʻe fokotuʻu ʻe he ʻEikí

Fakakaukau ke fakaafeʻi ʻa e kau akó ke kumi ha ngaahi potufolofola, ngaahi fakamatala mei he kau taki ʻo e Siasí, mo ha ngaahi maʻuʻanga tokoni kehe kuo fokotuʻu fakalangi ki he founga ʻe lava ke tau ʻilo ai ko e palōfitá ko e tamaioʻeiki ia ʻa e ʻEikí kuo filí. Fakaafeʻi ʻa e kau akó ke fakaʻaongaʻi ʻa e laʻipepa tufa ko ʻení ko ha konga ʻo ʻenau akó, ke ʻiloʻi ʻa e founga naʻe ʻilo ai ʻe he Kāingalotú ʻa e tokotaha ke nau muimui ki ai hili ʻa Siosefa Sāmitá:

Tokotaha ke Muimui Ki Ai hili ʻa Siosefa Sāmitá

Kimuʻa pea pekia ʻa e Palōfita ko Siosefa Sāmitá, naʻá ne akoʻi ʻeni ki he Kōlomu ʻo e Kau ʻAposetolo ʻe Toko Hongofulu Mā Uá:

Ngaahi tokoua, … ʻoku ofi ke hoko ha ngaahi meʻa mahuʻinga. Mahalo pē ʻe fakapoongi au ʻe hoku ngaahi filí. Pea kapau te nau fai ia, kae ʻikai foaki kiate kimoutolu ʻa e ngaahi kī mo e mālohi naʻe tuku kiate aú, ʻe mole ia mei māmani. Ka, kapau te u lava ʻo foaki kinautolu ki homou ʻulú, pea tuku ā ke u tō ki he ngaahi nima ʻo e kau fakapoó ʻo kapau ʻe tuku ʻe he ʻOtuá ke hoko, pea te u ʻalu ʻi he fiefia mo e fiemālie kakato, ʻi heʻeku ʻilo kuo lava ʻeku ngāué, pea kuo ʻosi fokotuʻu mo e fakavaʻe ʻa ia ʻe ohi hake ai ʻa e puleʻanga ʻo e ʻOtuá ʻi he kuonga ko ʻeni ʻo e kakato ʻo e ngaahi kuongá.

Kuo pau ke ʻi he uma ʻo e Toko Hongofulu Mā Uá ʻa e fatongia ʻo hono taki ʻo e siasí ni mei heni ʻo fai atu pea ʻoua naʻa mou mālōlō kae ʻoua kuo mou fokotuʻu ha niʻihi ke nau fetongi kimoutolu. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 616)

Naʻe akoʻi foki ʻe Siosefa Sāmita ko e Kau Palesitenisī ʻUluakí pē ʻa e kulupu māʻolunga hake ʻi he Kōlomu ʻo e Kau ʻAposetolo ʻe Toko Hongofulu Mā Uá, ka ʻi he taimi ʻoku pekia ai ʻa e palōfitá, ʻoku veteki leva ʻa e Kau Palesitenisī ʻUluakí (vakai, History, 1838–1856 [Manuscript History of the Church], volume B-1, 691, josephsmithpapers.org).

• Mei he meʻa naʻá ke akó, ko e hā ʻe tokoni atu ke ke tali e ngaahi fakamatala ʻe tolu naʻe fai kimuʻá?

• Ko e hā ʻa e sīpinga naʻe fokotuʻu ʻe he ʻEikí ki he hokohoko atu ʻa e tuʻunga fakatakimuʻa ʻo Hono Siasí ʻi he pekia ʻa e palōfitá?

ʻI he taimi naʻe lea ai ʻa Pilikihami ʻIongi ki he Kāingalotú ʻi ha fakatahaʻanga lahi, naʻe lekooti ʻe ha tokolahi ha aʻusia fakaofo pea nau ongoʻi ha fakapapau mei he Laumālie Māʻoniʻoní.

Naʻe vahevahe ʻe Palesiteni Siaosi Q. Kēnoni (1827–1901), ʻa ia ne kau ʻi he Kau Palesitenisī ʻUluakí kimui ange:

Naʻe tuʻu hake ʻa Pilikihami ʻIongi … peá ne lea ki he kakaí. … He ʻikai teitei ngalo ʻi ha taha naʻe ʻi ai, ʻa e ongo naʻa nau maʻú! Kapau naʻe toe tuʻu ʻa Siosefa mei he maté ʻo toe lea kiate kinautolu, ʻe kei tatau pē ʻa e ofo ai ʻa e tokolahi naʻe ʻi he fakatahaʻangá. Ko e leʻo tonu pē ʻeni ia ʻo Siosefá; pea ʻikai ngata pē ʻi heʻenau fanongo ki he leʻo ʻo Siosefá; ka naʻe hangē ki he vakai ʻa e kakaí ko e fōtunga tonu pē ia ʻo Siosefá naʻe tuʻu ʻi honau lotolotongá. Ko ha meʻa fakaofo mo fakaʻofoʻofa lahi ia ne hoko ʻi he ʻaho ko iá ʻi he ʻao ʻo e fakatahaʻangá, ʻa ia kuo teʻeki ai ke mau fanongo ai. Naʻe foaki ʻe he ʻEikí ki Hono kakaí ha fakamoʻoni ʻo ʻikai ha toe veiveiua pe ko hai ʻa e tangata kuó Ne fili ke taki kinautolú. Naʻa nau fakatou mamata mo fanongo ʻaki honau mata mo e telinga fakakakanó, pea naʻe ongo ki honau lotó ʻa e ngaahi lea naʻe fakahokó fakataha mo e mālohi ʻo e ʻOtuá, pea naʻa nau fonu ʻi he Laumālié mo e nēkeneka. Naʻe ʻi ai ha fakapoʻuli, pea mahalo mo ha ngaahi loto-veiveiua mo tālaʻa; ka naʻe mahino mai ʻi he taimí ni ki he tokotaha kotoa pē ko e tangata ʻeni kuo foaki ki ai ʻe he ʻEikí ʻa e mafai ʻoku fiemaʻú ke ngāue ʻi honau lotolotongá ko e fetongi ʻo Siosefá (George Q. Cannon, “Joseph Smith, the Prophet,” Juvenile Instructor, Oct. 1870, 174–75).

Naʻe lekooti ʻeni ʻe ʻEmelī Sāmita Hoiti, ko ha mēmipa naʻe ʻi ai ʻi he taimi naʻe lea ai ʻa Pilikihami ʻIongi ki he Kāingalotú:

Ne hanga ʻe he founga ʻo e fakaʻuhingá, fōtunga hono fofongá, mo e ongo ʻo hono leʻó ʻo fakafiefiaʻi kotoa hoku laumālié. Naʻe mamata hoku matá ki he sino ʻo Siosefa kuo fakapōngí. Naʻe ongoʻi ʻe hoku ongo nimá, ʻa e moko ʻīʻī ʻo e maté ʻi hono fofonga fakaʻeiʻeikí. Ne u ʻiloʻi kuo ʻosi mālōlō ʻa Siosefa. Ka naʻá ku faʻa ʻohovale mo toutou vakai ki he tuʻunga malangá ke sio pe ko Siosefa naʻe ʻi aí. Ka naʻe ʻikai, ko Pilikihami ʻIongi ia pea kapau ʻoku veiveiua ha taha he totonu ʻa Pilikihami ke ne puleʻi ʻa e ngaahi ngāué maʻá e Kāingalotú, ko ʻeku lea ʻeni kiate kinautolú. Te ke lava ʻo ʻilo ia maʻau ʻo fakafou ʻi he laumālie ʻo e ʻOtuá. ʻE fakahoko ia ʻe he ʻEikí maʻa Hono kakaí (Emily Smith Hoyt, ʻi he Lynne W. Jorgensen, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, no. 4 [1996–97], 164).

• Kapau naʻá ke ʻi ai, naʻe mei liliu fēfē nai koe ʻe he aʻusia ko ʻení?

• ʻOku fekauʻaki fēfē ʻa e Molonai 10:5 mo e meʻa naʻá ke akó?

Fakaafeʻi ʻa e kau akó ke vahevahe ʻa e meʻa naʻa nau ʻilo mei heʻenau akó. Fakapapauʻi ʻoku mahino ki he kau akó ʻi he taimi ʻoku pekia ai ʻa e Palesiteni ʻo e Siasí, ʻoku veteki ʻa e Kau Palesitenisī ʻUluakí pea tataki ʻe he Kōlomu ʻo e Kau ʻAposetolo ʻe Toko Hongofulu Mā Uá ʻa e Siasí. Tokoni ke mahino ki he kau akó ʻoku foki ʻa e kau ʻAposetolo ʻoku ngāue ʻi he Kau Palesitenisī ʻUluakí ki honau tuʻunga ʻi he Kōlomu ʻo e Toko Hongofulu Mā Uá ʻo fakatatau mo e fakahokohoko ʻo e fuoloa ʻo ʻenau ngāué. Fakapapauʻi ʻoku mahino foki ki he kau akó ko e ʻAposetolo kuo ngāue fuoloa tahá, ko e Palesiteni ia ʻo e Kōlomu ʻo e Kau ʻAposetolo ʻe Toko Hongofulu Mā Uá, pea ʻokú ne hoko ai ko e Palesiteni hono hoko ʻo e Siasí.

ʻE lava foki ke ʻilo ʻe he kau akó ʻo fakafou ʻi he Laumālie Māʻoniʻoní, te tau lava ʻo maʻu ha fakamoʻoni naʻe ui ʻe he ʻOtuá ʻa kinautolu ʻoku nau tataki ʻa e Siasí.

• Ko e hā te tau lava ʻo fai, pe ko e hā kuó ke fai, ke maʻu ha fakamoʻoni fakalaumālie naʻe fili ʻe he ʻEikí hotau palōfitá ke tataki Hono Siasí?

Ke fakaʻosí, fakakaukau ke fakaʻatā ʻa e kau akó ke fakaʻaongaʻi ʻa e meʻa kuo nau akó ke tali ʻaki ʻa e tūkunga mei he kamataʻanga ʻo e lēsoní. Ko e founga ʻe taha ke fakahoko ai ʻení ko hano ʻai ʻa e kau akó ke nau fakatātaaʻi ia mo hanau ngaahi hoa. Te ke lava ʻo poupouʻi ʻa e kau akó ke fakakau ʻenau fakamoʻoni ko e palōfitá ko e taki ia kuo fili ʻe he ʻEikí, ko ha konga ʻo ʻenau talí.

Ngaahi Maʻuʻanga Tokoni Kehé

Naʻe hoko fēfē nai ʻa e fakamoʻoni fakalaumālié ki he Kāingalotú ʻi he taimi naʻe fili ai ʻa Pilikihami ʻIongi mo e Toko Hongofulu Mā Uá ʻe he ʻEikí ke tataki Hono Siasí?

Naʻe lekooti ʻe ha Kāingalotu kehe, hangē ko Penisimani F. Sionisoni, Uiliami C. Sitēnisi, mo Uilifooti Utalafi, ʻa ʻenau fanongo ki he leʻo ʻo Siosefa Sāmitá pe mamata kia Siosefa ʻi he lea ʻa Pilikihami ʻIongí (vakai, Benjamin F. Johnson, My Life’s Review [1947], 104; History, 1838–1856 [Manuscript History of the Church], volume F-1, 300, josephsmithpapers.org).

Ki ha fakamatala lahi ange fekauʻaki mo e tali ʻa e kāingalotu mo e kau taki ʻo e Siasí ki he fehuʻi fekauʻaki mo e founga ʻoku totonu ke hoko atu ai ʻa e tuʻunga fakatakimuʻa ʻo e Siasí, vakai, vahe 45 ʻo e Kau Māʻoniʻoní, voliume 1 ([2018], 606–23).

Ko e fē te u lava ʻo ako lahi ange ai fekauʻaki mo e fetongi ʻo e Kau Palesitenisī ʻUluakí?

Hili ʻa e pekia ʻa Palesiteni Tōmasi S. Monisoní, naʻe vahevahe ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe akonaki ʻa Palesiteni ʻEselā Tafu Penisoni (1899–1994) ʻo pehē:

ʻOku ʻafioʻi ʻe he ʻOtuá ʻa e ngaahi meʻa kotoa pē, ʻa e ikuʻangá mei he kamataʻangá, pea ʻoku ʻikai hoko noa pē ha tangata ko e palesiteni ʻo e siasi ʻo Sīsū Kalaisí, pe faingamālie ke kei nofo noa ai, pe mate tupukoso pē. (Ezra Taft Benson, “Jesus Christ—Gifts and Expectations,” New Era, May 1975, 16–17)

ʻOku ʻomi ʻe he Tefito ʻo e Hisitōlia ʻo e Siasí ko ʻení ha fakamatala lahi ange ki he ngaahi meʻa naʻe hoko hili ʻa e pekia ʻa e Palōfita ko Siosefa Sāmitá fekauʻaki mo e tuʻunga fakatakimuʻa ʻo e Siasí: “Fetongi ʻo e Kau Taki ʻo e Siasí,” ChurchofJesusChrist.org/study/history/topics.

Te u lava fēfē ʻo maʻu ha fakamoʻoni fakalaumālie ʻoku uiuiʻi ʻe he ʻOtuá ʻa e Palesiteni foʻou ʻo e Siasí?

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa naʻe fai ʻe hono uaifi ko Kefí, ke maʻu ha fakamoʻoni ko e uiuiʻi ʻo Palesiteni Lāsolo M. Nalesoní naʻe mei he ʻOtuá ia:

ʻOku tau maʻu ʻa e faingamālie ʻi heʻetau hoko ko e Kāingalotu ʻo e Ngaahi ʻAho Kimui Ní ke maʻu ha fakamoʻoni fakataautaha ko e ui ʻe he ʻOtuá ʻa Palesiteni Nalesoni. Neongo kuo ʻiloʻi fakataautaha ʻe hoku uaifi ko Kefí, ʻa Palesiteni Nalesoni ʻi ha meimei taʻu nai ʻeni ʻe tolungofulu pea ʻikai ke ne fehuʻia hono mafai fakalangí, ka ʻi hono fakanofo mo vaheʻi iá, ka naʻe kamata ke ne lau ʻene ngaahi lea konifelenisi lahi ʻi he taʻu ʻe 34 kuohilí, mo lotua ha fakapapau lahi ange ki hono fatongia fakaepalōfitá. ʻOku ou palōmesi atu te ke maʻu ʻa e fakamoʻoni mālohi ange ko ʻení ʻi hoʻo fekumi ki ai ʻi he loto-fakatōkilalo pea ʻi he moʻui taau foki. (Neil L. Andersen, “Ko e Palōfita ʻa e ʻOtuá,” Liahona, Mē 2018, 25–26)

Ngaahi ʻEkitivitī Fakalahi ki he Akó

Ko e tali ʻa Pilikihami ʻIongi ki he pekia ʻa Siosefa Sāmitá

Ki ha fakamatala lahi ange ki he foʻi moʻoni ko ia ʻoku tataki ʻe he Kōlomu ʻo e Kau ʻAposetolo ʻe Toko Hongofulu Mā Uá ʻa e Siasí hili ʻa e pekia ʻa e palōfitá, fakakaukau ke vahevahe ʻa e aʻusia ʻa Pilikihami ʻIongi ʻi heʻene lau ʻa e tohi fanongonongo ʻo e pekia ʻa Siosefa Sāmitá. Naʻe lekooti ʻe Pilikihami ʻIongi ʻa e fakamatalá ni:

ʻI he taimi ne ma maʻu ai ʻa e tohi ko iá, ne u ʻi ai mo ʻOasoni Pālati ʻo lau ʻa e tohí. Ne u ongoʻi ai ha meʻa kuo teʻeki ke u ongoʻi ʻi heʻeku moʻuí. … Naʻe fuʻu mamahi ʻaupito hoku ʻulú [ʻo u] pehē ʻe mafahi. … ʻOku mole ʻa e Lakanga Fakataulaʻeikí mei he māmaní? Kuo mālōlō ʻa Siosefa mo Hailame. Naʻe ongo mai [leva] ia hangē ha pā haʻa foʻi pasiʻi ʻo e ongo nimā. Naʻe hoko mai ia kiate au ʻo hangē ha Fakahaá—ʻoku ʻi heni ʻa e ngaahi kī ʻo e puleʻangá. (Brigham Young, ʻi he Historian’s Office General Church Minutes, Feb. 12, 1849, 2, Church History Library, Salt Lake City; naʻe fakaleleiʻi ʻa e sipelá, fakaʻilonga leá mo e kalamá)

• Ko e hā naʻá ne fakafiemālieʻi ʻa Pilikihami ʻIongi hili ʻene ʻilo kuo mālōlō ʻa Siosefa Sāmitá?

Ko hono Fokotuʻutuʻu Foʻou ʻo e Kau Palesitenisī ʻUluakí

Ke tokoni ke mahino ki he kau akó ʻa e meʻa naʻe hoko ki he Kau Palesitenisī ʻUluakí hili ʻa e pekia ʻa Siosefa Sāmitá, mahalo te ke fie fakamatalaʻi ange kuo teʻeki ai fokotuʻutuʻu foʻou maʻu pē ʻa e Kau Palesitenisī ʻUluakí ʻi he hili pē ʻa e pekia ʻa ha Palesiteni ʻo e Siasí.

Te ke lava ʻo ʻeke ki he kau akó pe ʻoku nau ʻilo pe ko e hā ʻa e fuoloa hili ʻa e pekia ʻa Siosefa Sāmitá pea toki fokotuʻutuʻu foʻou ʻa e Kau Palesitenisī ʻUluakí.

Te ke lava ʻo vahevahe ha niʻihi pe kotoa ʻo e ngaahi meʻá ni, ʻo makatuʻunga ʻi he mahino ʻoku nau maʻú:

Hili ʻa e pekia ʻa e Palōfita ko Siosefa Sāmitá, naʻe tataki ʻe he Kōlomu ʻo e Kau ʻAposetolo ʻe Toko Hongofulu Mā Uá ʻa e Siasí ʻi ha taʻu ʻe tolu mo e konga kimuʻa pea toe fokotuʻutuʻu foʻou ʻa e Kau Palesitenisī ʻUluakí. Naʻe tatau pē mo hono tataki ʻe he Kōlomu ʻo e Toko Hongofulu Mā Uá ʻa e Siasí ʻo laka hake ʻi he taʻu ʻe tolu hili e pekia ʻa Palesiteni Pilikihami ʻIongí pea ʻi ha meimei taʻu ʻe ua hili ʻa e pekia ʻa Palesiteni Sione Teilá. Ka neongo ia, ʻi he mālōlō ʻa Palesiteni Uilifooti Utalafi ʻi he ʻaho 2 ʻo Sepitema, 1898, naʻe ueʻi fakalaumālie ʻe he ʻEikí ʻa Lōlenisou Sinou mo e niʻihi kehe ʻo e kau mēmipa ʻo e Toko Hongofulu Mā Uá ke nau fokotuʻutuʻu foʻou ʻa e Kau Palesitenisī ʻUluakí ʻi ha ʻaho pē ʻe 11 mei ai, ʻi he ʻaho 13 ʻo Sepitemá (vakai, George Q. Cannon, “Remarks,” Deseret Weekly, Oct. 8, 1898, 514). Talu mei ai mo hono tataki ʻe he Kōlomu ʻo e Kau ʻAposetolo ʻe Toko Hongofulu Mā Uá ʻa e Siasí ʻi ha vahaʻataimi nounou, kimuʻa pea vaheʻi ha Palesiteni foʻou ʻo e Siasí, mo toe fokotuʻutuʻu ʻa e Kau Palesitenisī ʻUluakí.

Ko hai ʻe hoko ko e palōfita hono hoko ʻi he ʻaho ní?

Ke ʻoange ha faingamālie ki he kau akó ke fakamatalaʻi fakanounou ʻa e meʻa kuo nau akó, fakakaukau ke ʻoange ha ngaahi ʻata ʻo e Kau Palesitenisī ʻUluaki lolotongá mo e Kōlomu ʻo e Kau ʻAposetolo ʻe Toko Hongofulu Mā Uá ki ha kau ako ʻe toko 15. ʻE lava ke tuʻu ʻa e fānau ako ko ʻení ʻi muʻa ʻi he lokí pea fokotuʻutuʻu kinautolu ko e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kau akó ke fakatātaaʻi ʻa e meʻa ʻe hoko ki he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá, ʻo fakatatau ki he sīpinga ʻa e ʻEikí, kapau naʻe pekia ʻa e Palesiteni ʻo e Siasí.