Lēsoni 149: Tokāteline mo e Ngaahi Fuakava 135–136

Tokāteline mo e Ngaahi Fuakava 136: Ko e Fononga Fakahihifó

Ko ha Fononga ʻi he Fuakavá ki he Teleʻa Sōlekí

ʻI Fēpueli ʻo e 1846, naʻe mavahe ʻa e fuofua kulupu ʻo e Kāingalotu ʻo e Siasí mei Nāvū ʻo fononga ki he ngaahi fonua taʻeʻiloa ʻo e Hihifó. ʻI he Nofoʻanga Fakafaʻahitaʻu Momokó, ʻi Nepulasikā, naʻe maʻu ai ʻe Palesiteni Pilikihami ʻIongi ʻa e fakahā ʻoku hoko ʻi he taimí ni ko e Tokāteline mo e Ngaahi Fuakava 136. ʻI he fakahā ko ʻení, naʻe talaʻofa ʻe he Fakamoʻuí ke tāpuakiʻi ʻa e Kāingalotú ʻi heʻenau tauhi faivelenga ʻenau ngaahi fuakavá ʻi heʻenau fononga ki he hihifó. ʻE lava ke tokoni ʻa e lēsoni ko ʻení ke mahino ki he kau akó ʻe tāpuekina kinautolu ʻe he Tamai Hēvaní ʻi heʻenau feinga ke tauhi ʻenau fuakava ke talangofua ki Heʻene ngaahi fekaú.

Ngaahi ʻEkitivitī Ako ʻOku Ala Fakahokó

Ko ha fononga lōloa mo faingataʻa

Ke kamata ʻa e kalasí, fakaʻaliʻali ha fakatātā ʻo ha saliote fakafale pea mo ha mape ʻo e hala paioniá. Fakaafeʻi ʻa e kau akó ke fakakaukauloto pe te nau ongoʻi fēfē kapau naʻe pau ke nau foua ha fononga ʻo hangē ko ia naʻe fai ʻe he fuofua Kāingalotú. Te ke lava ʻo lau pe fakamatalaʻi fakanounou ʻa e palakalafi ko ʻení ke tokoni ke mahino ki he kau akó ʻa e meʻa naʻe feilaulauʻi ʻe he fuofua Kāingalotú ke talangofua ki he fekau ʻa e ʻEikí ke fakahoko ʻenau fononga ki he hihifó.

Naʻe laka hake ʻi he toko 60,000 ʻo e Kāingalotu naʻe fononga saliote pe saliote toho tangata mei Nāvū ki he Teleʻa Sōlekí ʻi he vahaʻa ʻo e 1846 mo e 1868. Naʻe faʻo ʻe he ngaahi fāmilí ʻa e meʻa pē naʻe lava ke hao ki ha saliote fakafale pe saliote toho tangatá. Naʻe liʻaki ʻa e toenga ʻo e meʻa kotoa pē. Naʻe ʻikai mei ʻi ai ha feituʻu ʻatā ʻi he ngaahi salioté moʻó e kau pāsesé tukukehe kapau naʻa nau puke pe kafo. Ko e tokolahi taha ʻo e fāmilí naʻe pau ke nau lue ʻi he maile ʻe 1,200 (1,900 km) mei Nāvū ki he Teleʻa Sōlekí.

Ki ha fakafuofuá, fakakaukau ke fakaʻaliʻali ha mape homou feituʻú pea fakaʻilongaʻi ha feituʻu ʻoku maile ʻe 1,200 (1,900 km) hono mamaʻó.

• Ko e hā ha ngaahi hohaʻa naʻá ke mei maʻu fekauʻaki mo e fononga ko ʻení?

• ʻE tokoniʻi fēfē koe ʻe he Fakamoʻuí ke ke kātakiʻi ʻa e faʻahinga fononga ko ʻení? Te ke lava fēfē ʻo ngāue ʻi he tui kiate Ia ʻi hoʻo fefonongaʻakí?

Te ke lava ʻo fehuʻi ki he kau akó ʻa e founga ʻoku faitatau ai ʻetau fononga fakafoʻituitui ʻi he moʻuí mo e fononga paionia ʻa e Kāingalotú ki he hihifó. Ke tānaki atu ki he tali ʻa e kau akó, ʻoange ʻa e fakamatala ko ʻeni meia Palesiteni M. Lāsolo Pālatí:

Naʻe akonaki ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Neongo ʻoku feʻunga mo mahuʻinga ke manatuʻi ʻa e fononga paionia fakahisitōlia ʻa e Kau Māmongá ʻi he senituli 19, ka ʻoku fiemaʻu ke tau manatuʻi ʻoku “kei hoko atu pē ʻa e fonongaʻanga ia ʻo e moʻuí!” ke fakamoʻoniʻi ai ʻetau “tui ʻi he foʻi laka kotoa peé.” …

Ko e hala fononga ko ia ki heʻetau Tamai Hēvaní, ko e fonongaʻanga mahuʻinga taha ia ʻo ʻetau moʻuí, pea ʻoku hokohoko atu ia ʻi he ʻaho, uike, māhina mo e taʻu takitaha, ʻi heʻetau fakatupulaki ʻetau tui kiate Ia mo Hono ʻAlo ʻOfaʻanga ko Sīsū Kalaisí. …

Nofo maʻu ʻi ha halá ʻaki hoʻo “tui ʻi he foʻi laka kotoa pē,” ke ke lava ʻo foki malu ai ki he ʻao ʻo e Tamai Hēvaní mo e ʻEiki ko Sīsū Kalaisí. (M. Russell Ballard, “ʻOku Hoko Atu e Fonongá!,” Liahona, Nōvema 2017, 105–6).

• Ko e hā ʻoku mahuʻinga kiate koe mei he akonaki ʻa Palesiteni Pālatí?

ʻI hoʻo ako ʻi he ʻaho ní, fakakaukau ki he tuʻunga ʻoku ʻi ai hoʻo fononga ʻi he moʻuí. ʻOkú ke ofi fēfē nai ki he Tamai Hēvaní mo Sīsū Kalaisí? Kuó ke mamata fēfē ki Heʻena tokoní ʻi he kotoa ʻo e fononga ko ʻení? Fakalaulauloto ʻi he faʻa lotu ki hoʻo ongo fekauʻaki mo hoʻo fakalakalaká mo e founga ʻokú ke faingataʻaʻia aí.

Poupouʻi ʻa e kau akó ke fekumi ki he fakahinohino ʻa e Laumālié ke tokoni ke nau ʻiloʻi ʻa e founga ʻoku tāpuekina ai kinautolu ʻe he Tamai Hēvaní mo Sīsū Kalaisi ʻi he ʻahó ni pea lava ke hokohoko atu hono tāpuekina fakataautaha kinautolu ʻi he kotoa ʻo ʻenau fonongá.

Ko e folofola mo e finangalo ʻo e ʻEikí

Te ke lava ʻo lau pe fakamatalaʻi fakanounou ʻa e palakalafi ko ʻení ke ʻomi ha puipuituʻa fakahisitōlia ʻo e Tokāteline mo e Ngaahi Fuakava 136. Te ke lava foki ʻo kole ki he kau akó ke kumi ʻa e Nofoʻanga Fakafaʻahitaʻu Momokó ʻi he mapé.

Hili ha fononga lōloa mo faingataʻa ʻi ʻAiouā, naʻe kumi ʻe he Kāingalotú ha nofoʻanga fakataimi ʻi ha feituʻu naʻa nau ui ko e Nofoʻanga Fakafaʻahitaʻu Momokó ʻi Nepulasikā. Naʻe faingataʻaʻia ʻa e Kāingalotú ʻi he fiekaiá, mahakí, mo e maté, ʻi heʻenau taʻemateuteu ke nofo ai ʻi he faʻahitaʻu momokó, ʻo siviʻi ai honau iví mo e kātakí. Naʻe maʻu ʻe Palesiteni Pilikihami ʻIongi ʻi he Nofoʻanga Fakafaʻahitaʻu Momokó ʻi Sānuali ʻo e 1847 ʻa e meʻa ʻoku hoko ʻi he taimí ni ko e Tokāteline mo e Ngaahi Fuakava 136. Naʻe fakahinohinoʻi ʻe he Fakamoʻuí ʻa e Kāingalotú ʻi he fakahā ko ʻení ki he founga ke nau teuteu mo hoko atu ai ʻenau fononga mamaʻo atu ki he hihifó.

Lau ʻa e Tokāteline mo e Ngaahi Fuakava 136:1–11, ʻo kumi ʻa e meʻa naʻe kole ʻe he Fakamoʻuí ki he Kāingalotú ke nau fai ʻi heʻenau fononga ki he hihifó.

• Ko e hā ʻa e meʻa naʻe makehe kiate koe mei he ngaahi veesi ko ʻení?

Fakafanongo fakalelei ki he ngaahi tali ʻa e kau akó. ʻO ka tokoni, ʻeke ha niʻihi ʻo e ngaahi fehuʻi ko ʻení: “ʻI he veesi 2 mo e 4, ko e hā naʻe akoʻi ʻe he Fakamoʻuí ki he Kāingalotú fekauʻaki mo hono fakahoko mo tauhi ʻenau ngaahi fuakavá?” “Naʻe fiemaʻú ke fetauhiʻaki fēfē ʻa e Kāingalotú mo tokangaʻi ʻa kinautolu naʻe muimui mai ʻiate kinautolú?” “Fakatatau ki he veesi 11, ko e hā ʻa e ngaahi tāpuaki naʻe talaʻofa ʻe he Fakamoʻuí kapau ʻe fakahoko mo tauhi ʻe he Kāingalotú ʻenau ngaahi fuakavá ʻi he kotoa ʻo e fonongá?”

Tokoni ke ʻiloʻi ʻe he kau akó ʻa e foʻi moʻoni, ʻi he taimi ʻoku tau fakaʻapaʻapaʻi ai ʻetau ngaahi fuakava ke tauhi ʻa e ngaahi fekau ʻa e ʻEikí, te Ne tāpuakiʻi kitautolu ʻi he meʻa kotoa pē.

Lau ʻa e Mōsaia 18:8–10 mo e Tokāteline mo e Ngaahi Fuakava 20:77, ʻo kumi ha ngaahi faitatau mo ha ngaahi fuakava ʻoku tau fai ʻi he papitaisó mo e sākalamēnití.

Tui ʻi he foʻi laka kotoa pē

ʻI he konga hono hoko ʻo e lēsoní, fakakaukau ke fokotuʻutuʻu ʻa e kau akó ki ha “ngaahi kulupu paionia.” Te mou lava ʻo fokotuʻutuʻu ha ʻū tesi pe sea fuopotopoto maʻá e ngaahi kulupú ke nau aleaʻi fakataha ʻa e ngaahi vēsí mo e ngaahi fehuʻí. ʻE lava ke fili ʻe he kulupu takitaha ha “kapiteni” ke lipooti ki he kalasí ʻa e meʻa ne nau ongoʻi naʻe ʻuhingamālie ʻi heʻenau fealēleaʻakí.

Lau ʻa e Tokāteline mo e Ngaahi Fuakava 136:19–29 pea fakaʻilongaʻi ʻa e ngaahi fekau naʻe fai ʻe he Fakamoʻuí ki he Kāingalotú ʻi heʻenau fononga fakahihifó. Fili ha ngaahi fekau ʻe niʻihi ʻoku makehe kiate koe.

• Ko e hā ka mahuʻinga ai ʻa e ngaahi fekau naʻá ke filí ke muimui ki ai ʻa e ngaahi kulupu paioniá?

• ʻE lava fēfē ke tokoniʻi kitautolu ʻe he tauhi ʻo e ngaahi fekau tataú?

• Ko e hā ha ngaahi tāpuaki ʻe ala foaki mai ʻe he ʻEikí kiate kitautolu ʻi heʻetau tauhi ʻa e ngaahi fekau ko iá ʻi he ʻaho ní?

ʻE lava ke ako ʻe he kau akó ʻa e ngaahi talanoa fakapaionia ko ʻení pea aleaʻi ʻa e ngaahi fehuʻi ko ʻení ʻi he ngaahi kulupú pe ko ha kalasi. Kapau ʻe fakahoko ʻi he ngaahi kulupú, fakapapauʻi ʻoku maʻu ʻe he kau akó ʻa e ngaahi fakahinohino mo e ngaahi fehuʻi kotoa te nau fiemaʻú pea ʻoku ʻiloʻi ʻe he kau taki ʻo e kulupú te nau lipooti ʻa e ngaahi meʻa mahuʻinga ʻo e fealēleaʻakí pe lava ke vahe ki ha mēmipa ʻe taha ʻo e kulupú ke lipooti.

Naʻe talangofua ʻa e Kāingalotú ʻo fononga ʻi ha maile ʻe lauiafe “ki he potu ʻe fokotuʻu ai ʻe he ʻEikí ha siteiki ʻo Saione” (Tokāteline mo e Ngaahi Fuakava 136:10). Ke tokoni ke mahino ki he kau akó ha niʻihi ʻo e ngaahi founga naʻe tāpuakiʻi ai ʻe he ʻEikí ʻa e kau paioniá ʻi heʻenau feinga ke tauhi ʻenau ngaahi fuakava ke talangofua ki he ʻEikí, te ke lava ʻo fai ha taha ʻo e ngaahi meʻá ni:

• Fakaafeʻi ʻa e kau akó ke fili ha talanoa manako ʻo e fononga ʻa e kau paioniá ki he Teleʻa Sōlekí ke vahevahe mo ʻenau kulupú.

• ʻOange ha ngaahi talanoa filifili mei he Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 2, ʻIkai Ha Nima Taʻe Maʻa, 1846–1893 (2020), 62–104 pea mei he “Pioneers” pe “The Trek West” ʻi he ChurchofJesusChrist.org ʻa ia ʻe lava ke lau ʻe he kau akó ki heʻenau ngaahi kulupú.

• Huluʻi ʻa e foʻi vitiō “Watched Over by God: Elizabeth Panting’s Journey to Zion” mei he taimi 7:47 ki he 11:16, ko e talanoa ʻo ha mana ʻi he fononga paioniá.

• ʻOku fakahaaʻi fēfē ʻe he talanoa paionia ko ʻení ʻa e ngaahi tāpuaki ʻa e ʻEikí ʻi heʻetau feinga ke tauhi ʻEne ngaahi fekaú?

• ʻE tokoni fēfē nai ʻa e talanoa ko ʻení ki he toʻu tupu ʻo e ʻaho ní ʻi heʻenau fuakava ke tauhi ʻa e ngaahi fekau ʻa e ʻOtuá?

Ngaahi lēsoni ʻo e fononga paioniá

Fakaafeʻi ʻa e kau akó ke fakalaulauloto ki he founga kuo tāpuekina ai kinautolu ʻe he Tamai Hēvaní ʻi heʻenau fononga ʻi he moʻuí ʻi heʻenau tauhi ʻEne ngaahi fekaú. ʻEke ange pe ʻoku fie vahevahe ʻe ha kau ako ʻe niʻihi ʻenau ngaahi aʻusiá. Fakakaukau ke vahevahe foki hoʻo ngaahi aʻusiá.

Fakaafeʻi ʻa e kau mēmipa kotoa ʻo e kalasí ke hiki ʻa e meʻa ne nau ako ʻi he ʻaho ní ʻa ia ʻe lava ke nau vahevahe mo ha mēmipa ʻo e fāmilí pe kaungāmeʻa. ʻE lava ke fakakau ai ʻe he kau akó ʻa e founga ʻe lava ke tokoniʻi ai kitautolu ʻe he ngaahi talanoa ʻo e kau paioniá ke tauhi faivelenga ʻetau ngaahi fuakava ke tauhi ʻa e ngaahi fekau ʻa e ʻEikí ʻi he ʻahó ni pea mo e founga ʻe tāpuekina ai kitautolu ʻe he ʻEikí ʻi heʻetau ngaahi ngāué. Fakaafeʻi kinautolu ke vahevahe ʻa e meʻa ne nau akó mo ha fāmili pe kaungāmeʻa ʻi tuʻa ʻi he kalasí.

Ngaahi Maʻuʻanga Tokoni Kehé

ʻOku tatau fēfē ʻeku fononga ʻi he moʻuí mo e fononga paioniá?

Naʻe pehē ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá:

Naʻe fehangahangai ʻeku ngaahi kui-uá mo e kau paionia ʻi he kuonga muʻá mo ha ngaahi fakafeʻātungia kehekehe lolotonga ʻenau fononga mai ʻi he salioté mo e lue lalo ki he Teleʻa Sōlekí. Te tau fehangahangai foki mo kitautolu mo ha ngaahi pole ʻi heʻetau ngaahi fononga fakafoʻituitui ʻi he moʻuí. ʻOku ʻikai ke tau teke ha saliote pe heka ʻi ha saliote kuo fakafale pea fononga ʻi he ʻotu moʻunga māʻolungá mo e ngaahi tafungofunga sinou matolú; ka ʻoku tau feinga ʻo hangē ko ia ne nau fakahokó ke ikunaʻi fakalaumālie ʻa e ngaahi ʻahiʻahi mo e ngaahi pole ʻo hotau kuongá. ʻOku ʻi ai ʻa e ngaahi halanga ke tau foua; ʻoku ʻi ai ʻa e ngaahi tafungofunga—pea taimi ʻe niʻihi ko e ʻotu moʻunga—ke tau kaka ai. Neongo ʻoku kehekehe ʻa e ngaahi ʻahiʻahi ʻi he kuonga ní mei he ngaahi ʻahiʻahi ʻo e kau paionia ʻi he kuonga muʻá, ka ʻoku ʻikai siʻi ange ai ʻene faingataʻa kiate kitautolú. (M. Russell Ballard, “Muimui ʻia Sīsū Kalaisi ʻo Laka Atu ʻi he Tui,” Liahona, Nōvema 2022, 35)

ʻOku tau mamata nai ki ha ngaahi mana ʻi he ʻahó ni ʻo hangē ko ia naʻe mamata ki ai ʻa e kau paioniá?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku faʻa fehuʻi mai ʻe he kāingalotu ʻo e Siasí pe ko e hā ʻoku ʻikai ke tau maʻu ai ha ngaahi mana lalahi ʻi he ʻahó ni ʻo hangē ko ia naʻe hoko ʻi he ngaahi fuofua ʻaho ʻo hono Fakafoki Mai ʻo e Ongoongoleleí. ʻOku tatau maʻu pē ʻeku talí: “ʻOku tau maʻu ha ngaahi mana!” …

ʻOku tatau tofu pē ʻa e ngaahi mana lalahi ʻi heʻetau moʻuí ʻi he ʻahó ni mo ia kuo hoko maʻu pē ki he kau ākonga mateaki ʻa e ʻEiki ko Sīsū Kalaisí: ko hono fakahoko ʻo e ngaahi fuakava toputapu mo e ʻOtuá mo hono maʻu ʻa e ngaahi ouau ʻo e lakanga fakataulaʻeikí ʻi he moʻui tāú, ko e ngāue ʻa e mālohi ʻo e ngaahi fuakava māʻoniʻoni ko iá ʻiate kitautolú, pea mo hono maʻu ʻo e mālohi ʻo e anga faka-ʻOtuá ʻi heʻetau moʻuí ʻi heʻetau tauhi ʻa e ngaahi fuakava ko iá mo “ʻaʻeva ʻi he ngaahi ouau kotoa pē ʻa e ʻEikí.” … ʻOku teʻeki ai ngata ʻa e kuonga ʻo e ngaahi maná. (David A. Bednar, “As Long as the World Shall Stand” [fakataha lotu ʻa e ʻUnivēsiti Pilikihami ʻIongí, 9 Sānuali, 2021], 5, speeches.byu.edu)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 136:8: Ko e Patalione Māmongá

Kapau ʻokú ke ongoʻi ʻe ʻaonga ke tokoniʻi hoʻo kau akó ke nau ʻilo fekauʻaki mo e Patalione Māmongá, fakaafeʻi kinautolu ke lau ʻa e Tokāteline mo e Ngaahi Fuakava 136:8. Te nau lava foki ʻo toe vakaiʻi ha niʻihi ʻo e ngaahi fakaikiiki mei he Ngaahi Tefito ʻi he Hisitōlia ʻo e Siasí, “Patalione Māmongá,” ChurchofJesusChrist.org/study/history/topics.

Te ke lava foki ʻo vahevahe ha taha ʻo e ngaahi vitiō ko ʻení:

• “Elder Christofferson Celebrates the 175th Anniversary of the Mormon Battalion” (2:58)

• “Faith-Filled Action” (3:12)

• “A Legacy More Precious Than Gold: Contributions of the Mormon Battalion (1998)”

Tokāteline mo e Ngaahi Fuakava 136:28–29: “Kapau ʻokú ke fiefia, … [pea] kapau ʻokú ke loto-mamahi …”

Te ke lava ʻo vahevahe mo e kau akó, neongo ʻa e ngaahi faingataʻá, ka naʻe finangalo ʻa e Fakamoʻuí ke hoko ʻa e fononga lōloa ki he Teleʻa Sōlekí ko ha aʻusia fakafiefia ki he Kāingalotú. Naʻe mahino foki kiate Ia ʻe ʻi ai pē ha ngaahi taimi ʻo e mamahí. Kole ki he kau akó ke nau lau ʻa e Tokāteline mo e Ngaahi Fuakava 136:28–29. ʻE lava ke kau ʻeni ʻi he ngaahi fehuʻi alēleá:

• Ko e fē ha taimi kuo hoko ai ʻa e mūsiká pe hulohulá ko ha founga ke ke fakafetaʻi ai ki he ʻEikí? Kuo ʻomi fēfē ʻe he meʻá ni ha fiefia ki hoʻo moʻuí?

• ʻOkú ke pehē ko e hā ʻoku finangalo ai ʻa e Fakamoʻuí ke tau fiefia, neongo ʻa e ngaahi tūkunga faingataʻa tahá?

• ʻOkú ke pehē ko e hā ʻoku mahuʻinga ai ke lotu ʻi he taimi ʻoku tau ongoʻi loto-mamahi aí? ʻE iku fēfē nai ia ki he fiefiá?

ʻI he talangofua ʻa e Kāingalotú ki he ʻEikí, naʻa nau faʻa hulohula mo hiva ʻi he poʻulí hili ha ʻaho lahi ʻo e fonongá.

ʻE lava ke ke vahevahe ʻa e fakamatala ko ʻení meia Palesiteni Lāsolo M. Nalesoni:

Siʻoku kāinga ʻofeina, ʻoku siʻi ha kaunga ʻa e fiefia ʻoku tau maʻú, ki he tūkunga ʻetau moʻuí mo e meʻa ʻoku tukutaha ai ʻetau tokangá.

ʻI hono tukutaha ʻetau tokangá ʻi he palani ʻa e ʻOtuá ki he fakamoʻuí … pea mo Sīsū Kalaisi mo ʻEne ongoongoleleí, te tau lava ʻo ongoʻi fiefia ʻo tatau ai pē ko e hā ʻa e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu ʻa e fiefiá meiate ia pea koeʻuhí ko Ia. Ko Ia ʻa e tupuʻanga ʻo e fiefia kotoa pē. (Russell M. Nelson, “Fiefiá mo e Moʻui Fakalaumālié,” Liahona, Nōvema 2016, 82)

• Kuo ʻomi fēfē ʻe he Fakamoʻuí ʻa e fiefiá ki hoʻo moʻuí, naʻa mo e lolotonga ʻo e ngaahi faingataʻá?

• Ko e hā ha ngaahi founga lelei ʻokú ke feinga ai ke fiefia, naʻa mo hoʻo fehangahangai mo ha faingataʻá?

Ngaahi vitiō ke fili mei aí

Te ke lava ʻo fakaʻaongaʻi ha taha ʻo e ngaahi maʻuʻanga tokoni kehe ko ʻení ʻi hoʻo lēsoní.

Ke tokoni ke mahino ki he kau akó ʻa e mālohi ʻoku tau maʻu mei hono fakahoko ʻo e ngaahi fuakavá, te ke lava ʻo huluʻi ʻa e foʻi vitiō “Inspiring Short: The Fire of Temple Covenants” (3:39). Ko e vahevahe ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e mālohi ʻo e ngaahi fuakava fakatemipalé ʻi Nāvuú pea mo e lolotonga ʻa e mahaki fakaʻauha COVID-19 ʻo e 2020.

Ke fakamamafaʻi ʻa e mahuʻinga ʻo hono tokangaʻi ʻo kinautolu ʻoku faingataʻaʻiá, te ke lava ʻo fakaʻaliʻali ʻa e “Our Pioneer Legacy” (1:17). ʻOku fakamatalaʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻi he foʻi vitiō ko ʻení ʻa e fiemaʻu ke tokangaʻi ʻa e masivá mo e faingataʻaʻiá ʻo hangē ko e akonaki ʻa e Fakamoʻuí ʻi he Tokāteline mo e Ngaahi Fuakava 136:8.