“Lēsoni 147—Tokāteline mo e Ngaahi Fuakava 135: Ko Hono Fakapoongi ʻo Siosefa Sāmita ko e Palōfitá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 135,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 147: Tokāteline mo e Ngaahi Fuakava 135–136
Tokāteline mo e Ngaahi Fuakava 135
Ko Hono Fakapoongi ʻo Siosefa Sāmita ko e Palōfitá
Hili ha ngaahi taʻu hono tataki ʻe he Palōfita ko Siosefa Sāmitá ʻa e Kāingalotú, naʻe tuku pōpula ia mo hono tokoua ko Hailamé ʻi he Fale Fakapōpula Kātesí. ʻI he ʻaho 27 ʻo Sune, 1844, naʻe ʻohofi kinaua ʻe ha kau fakatanga pea fakapoongi fakatouʻosi ʻa e ongo tangatá. ʻOku fakataumuʻa ʻa e lēsoni ko ʻení ke tokoni ki he kau akó ke fakamālohia ʻenau fakamoʻoni kia Siosefa Sāmita ko e Palōfita ʻa e ʻOtuá ki hono Fakafoki Mai ʻo e Ongoongoleleí.
Ngaahi ʻEkitivitī Ako ʻOku Ala Fakahokó
“Ko e Palōfita mo e Tangata Kikite ʻa e ʻEikí”
Fakakaukau ke fakaʻaliʻali ha fakatātā ʻo Siosefa Sāmita pea fakaafeʻi ʻa e kau akó ke fakakaukauloto ʻoku ʻamanaki ke nau talanoa mo ha taha ʻoku ʻikai ke ne ʻilo ha meʻa fekauʻaki mo Siosefa Sāmita. Kole ange ke nau hiki ha lisi ʻo e meʻa ʻoku nau pehē ko e ngaahi meʻa mahuʻinga taha ʻe fā pe nima naʻe fai ʻe he ʻEikí maʻatautolu ʻo fakafou ʻi he Palōfita ko Siosefa Sāmitá. ʻE lava ke tokoni atu ʻa e ongo fehuʻi ko ʻení:
-
Naʻe mei kehe fēfē nai hoʻo moʻuí ka ne taʻeʻoua e ngaahi tāpuaki naʻe foaki mai ʻe he ʻEikí ʻo fakafou ʻi he Palōfita ko Siosefa Sāmitá?
-
Kuo tākiekina fēfē hoʻo ʻilo mo e vā fetuʻutaki mo e Tamai Hēvaní mo Sīsū Kalaisí ʻe Siosefa Sāmita mo ʻene ngāue fakaepalōfitá?
Fakamatalaʻi ange ʻe ako ʻa e kau akó ʻi he lēsoni ko ʻení fekauʻaki mo hono fakapoongi ʻo Siosefa Sāmitá pea mo e meʻa naʻe fai ʻe he ʻEikí ʻo fakafou ʻiate iá. ʻI heʻenau akó, fakaafeʻi kinautolu ke fekumi ke mahino lelei ange ʻa e founga kuo tāpuekina ai kinautolu ʻe he ʻEikí ʻo fakafou ʻi he Palōfitá.
Ko e hala ki he Fale Fakapōpula Kātesí
Ke tokoni ke teuteu ʻa e kau akó ke ako ʻa e Tokāteline mo e Ngaahi Fuakava 135, fakakaukau ke fakamatalaʻi fakanounou ʻa e ngaahi palakalafi ko ʻení ʻi he lea pē ʻaʻau.
Naʻe nofo melino ʻa Siosefa Sāmita pea mo e Kāingalotú ʻi ʻIlinoisi ʻi ha taʻu nai ʻe tolu. ʻI he 1842, naʻe kamata ke nau toe aʻusia ʻa e fakafepakí. Naʻe fakatahaʻi ʻe he kau angatuʻu ʻi loto ʻi he Siasí mo e kau fakafepaki mei tuʻa ʻi he Siasí ʻenau ngaahi ngāue ke fakafepaki ki he Palōfitá mo e Kāingalotú. Naʻe kamata ke ilifia pea fehiʻa ha kau tangataʻifonua ʻe niʻihi ʻo ʻIlinoisi ʻi he ivi tākiekina fakapolitikale ʻo e Kāingalotú. Naʻe fakaʻau ke meheka ha niʻihi ʻi he tupulaki fakaʻekonōmika ʻa Nāvuú. Naʻe tupu foki ʻa e fakatanga ki he Kāingalotú mei he ngaahi fetaʻemahinoʻaki fekauʻaki mo e ngaahi founga ngāue, hangē ko e mali tokolahí, ʻa ia naʻe fakahoko hala ʻe ha niʻihi ʻo e kāingalotu ʻo e Siasí ne hē mei he moʻoní. ʻI he faʻahitaʻu māfana ʻo e 1844, naʻe fakalalahi ange ʻa e fakafepaki ki he Siasí.
ʻI he ʻaho 7 ʻo Sune 1844, ne hanga ai ʻe Viliami Lao ne hoko kimuʻa ko ha Tokoni Ua ʻi he Kau Palesitenisī ʻUluakí mo ha kakai kehe ne hē mei he moʻoní, ʻo paaki ʻa e ʻuluaki pulusinga ʻo ha nusipepa ne ui ko e Nauvoo Expositor ke fakatupu ha ʻita ʻa e kakaí ki he Palōfitá pea mo e Siasí. Naʻe pehē ʻe Siosefa Sāmita mo e tokolahi taha ʻo e fakataha alēlea fakakolo ʻi Nāvuú ko ha fakatupu moveuveu ʻa e nusipepá ki he kakaí pea tuʻutuʻuni ke fakaʻauha ʻa e Nauvoo Expositor. Naʻe fenāpasi ʻa e tuʻutuʻuni ko ʻení mo e lao ʻi he kuonga ʻo Siosefa Sāmitá.
Naʻe fakafepakiʻi ʻe ha kakai ʻe niʻihi ʻo e ngaahi feituʻu takatakaí ʻa e Kāingalotú mo hono fakaʻauha ʻo e fale pākí. Naʻe faleʻi ʻe Kōvana Tōmasi Footi ʻo ʻIlinoisí ʻa Siosefa Sāmita mo e kau taki kehe ʻo e Siasí ke nau fononga ki he kolo ko Kātesí pea fakaleleiʻi fakalao ʻa e tūkungá. Naʻá ne palōmesi ange ha maluʻi kakato mo ha hopo faitotonu ʻo kapau te nau omi loto-fiemālie. Neongo ʻa e ngaahi palōmesi ko ʻení, ka naʻe tui ʻa e Palōfitá ʻe tāmateʻi ia kapau te ne ʻalu (vakai, Tokāteline mo e Ngaahi Fuakava 135:4). Ka neongo ia, ʻi he ʻaho 24 ʻo Sune, 1844, naʻe mavahe ʻa Siosefa mo Hailame Sāmita mo ha niʻihi tokosiʻi kehe mei Nāvū ki Kātesi ke feinga ke maluʻi ʻa e Kāingalotú mei he fakamamahi ʻa e kau fakatangá.
Hili ʻa e nofo pōpula ʻa Siosefa mo Hailame ʻi ha ngaahi ʻaho siʻí, naʻe ʻohofi kinaua ʻe ha kau fakatanga.
Ko e fakapōngí
Kimuʻa pea lau ʻe he kau akó ʻa e potufolofola ko ʻení, fakakaukau ke kole ange ke nau vahevahe ha faʻahinga meʻa kuo nau ʻosi ʻilo fekauʻaki mo hono fakapoongi ʻo Siosefa mo Hailame Sāmitá.
ʻOku fakamatalaʻi ʻe he Tokāteline mo e Ngaahi Fuakava 135, ʻa ia naʻe ʻuluaki paaki ʻi loto ʻi ha māhina ʻe tolu hili ʻa e fakapōngí, ʻa e meʻa naʻe hokó. Lau ʻa e Tokāteline mo e Ngaahi Fuakava 135:1–2, ʻo kumi ʻa e ngaahi fakaikiiki fekauʻaki mo e fakapōngí pea mo e niʻihi ne nau fakamoʻoniʻi iá. (Kapau ʻokú ke fiemaʻu ha fakaikiiki lahi ange, lau ʻa e Tokāteline mo e Ngaahi Fuakava 135:4–7.)
-
Ko e hā naʻá ke ʻiló?
-
Ko e hā naʻá ke mei fakakaukau ki ai pe ongoʻi, kapau naʻá ke hoko ko ha fakamoʻoni ki he meʻa fakamamahi ko ʻení?
Ke tokoni ke fakakaukauloto ʻa e kau akó ki he meʻa naʻe hokó, fakakaukau ke huluʻi ʻa e foʻi vitiō “Joseph Smith—Prophet of the Restoration” (mei he taimi 0:00 ki he 3:06) pe “Joseph Smith: The Prophet of the Restoration” (mei he taimi 55:50 ki he 59:51).
Kapau ʻe fiemaʻu, fakamatalaʻi ange naʻe kau ʻa ʻEletā Sione Teila (1808–87) ʻi he taha ʻo e kau fakamoʻoni ki he fakapōngí. Naʻe faifai peá ne fakaakeake mei hono kafo mei he ʻaho ko iá pea hoko atu ko e Palesiteni hono tolu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Lau ʻa e Tokāteline mo e Ngaahi Fuakava 135:3, ʻo kumi ha niʻihi ʻo e ngaahi founga naʻe tāpuekina ai kitautolu ʻe he ʻEikí ʻo fakafou ʻi he Palōfita ko Siosefa Sāmitá.
Ko e Tokāteline mo e Ngaahi Fuakava 135:3 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
-
Ko e hā ha ngaahi moʻoni ʻoku ʻuhingamālie kiate koe? Ko e hā hono ʻuhingá?
Fakaafeʻi ʻa e kau akó ke hiki ha ngaahi moʻoni mahuʻingamālie mei he veesi 3 ʻi he palakipoé pea vahevahe ʻenau ngaahi fakakaukau fekauʻaki mo kinautolú.
Mahalo ʻe fakaʻaongaʻi ʻe he kau akó ha ngaahi lea kehe, ka ko e moʻoni ʻe taha ʻe lava ke nau ʻiló, kuo fakahoko ʻe Siosefa Sāmita ha ngaahi meʻa lahi ki he fakamoʻui ʻo e māmaní ʻo laka ange ʻi ha toe taha, tukukehe pē ʻa Sīsū Kalaisi. Fakakaukau ke hiki ha foʻi moʻoni hangē ko ʻení ʻi he palakipoé. Mahalo ʻe mahuʻinga ke fakamahinoʻi ʻoku toki malava pē ʻa e fakamoʻuí ʻia Sīsū Kalaisi, ʻa ia ko e Fakamoʻui ʻo e faʻahinga kotoa ʻo e tangatá. Ka neongo ia, naʻe ngāue ʻa Sīsū Kalaisi ʻo fakafou ʻi he Palōfita ko Siosefa Sāmitá ke fakaaʻu ʻa e ngaahi tāpuaki ʻo ʻEne Fakaleleí ki he fānau ʻa e Tamai Hēvaní ʻi he kuonga fakakosipeli ko ʻení.
Fakakaukau ke fakaafeʻi e kau akó ke fakaʻaongaʻi ha ngaahi miniti siʻi pea fakalaulauloto ki he mahuʻinga ʻo e moʻoni ko ʻení ʻi heʻenau moʻuí.
Neongo naʻe ngata ʻa e moʻui ʻa Siosefa Sāmita ʻi he māmaní ʻi he ʻaho 27 ʻo Sune, 1844, ka kuo tokoni ʻene ngāué, fakamoʻoní mo e ivi tākiekiná ki ha fānau ʻe laumiliona ʻa e Tamai Hēvaní ke nau haʻu kia Sīsū Kalaisi pea maʻu ʻa e ngaahi tāpuaki ʻo e fakamoʻuí.
“[Ko] hono tufakangá mo ʻene ngaahi ngāué”
Ke tokoni ke ʻiloʻi lelei ange ʻe he kau akó ʻa e founga naʻe fakaʻaongaʻi ai ʻe he Tamai Hēvaní mo Sīsū Kalaisi ʻa Siosefa Sāmita ke tokoniʻi kitautolu ke tau ofi ange kiate Kinauá, fakakaukau ke fakaafeʻi ʻa e kau akó ke nau fai ʻa e sitepu ʻe tolu ko ʻení. ʻOku ʻoatu ha ngaahi sīpinga ʻe niʻihi ʻi he mataʻitohi fakahihifí.
Fakaafeʻi ʻa e kau akó ke vahevahe: Ke ako lahi ange fekauʻaki mo hono fakaafeʻi ʻo e niʻihi kehé ke vahevahé, vakai ki he ako “Toutou fai hoʻo fakamoʻoní, pea fakaafeʻi e kau akó ke vahevahe ʻenau ngaahi ongó, aʻusiá, mo e fakamoʻoní,” ʻoku maʻu ʻi he Fakatupulaki ʻa e Ngaahi Taukei Fakalakalaka ʻa e Faiakó: Faiako ʻaki e Laumālié. Fakakaukau ke akoako ʻa e taukei “Faʻu ha ngaahi sētesi fakaʻaiʻai ʻe tokoni ke fakamatalaʻi ʻe he kau akó ʻenau ngaahi ongó, aʻusiá, mo e fakamoʻoní.”
-
Hiki ʻa e “Ko e ngāue ʻa e ʻEikí ʻo fakafou ʻia Siosefa Sāmitá” ʻi lotomālie ʻi ha laʻipepa ʻi hoʻo tohinoa akó.
-
ʻI he kupuʻi lea ko ʻení, hiki pe tā ha meʻa ʻe 4-5 naʻe akoʻi pe fakahoko ʻe he Tamai Hēvaní mo Sīsū Kalaisi ʻo fakafou ʻia Siosefa Sāmita. Kapau ʻe lava, fakakau ha potufolofola ki he founga takitaha. Sīpingá: “Ko e ʻUluaki Mata Meʻa-Hā-Maí” (Siosefa Sāmita—Hisitōlia 1:17–19).
-
Fakakau hoʻo ngaahi fakakaukau mo e ngaahi ongo fekauʻaki mo e founga ʻoku tokoniʻi ai koe ʻe he meʻa takitaha naʻá ke lisí ke ke ofi ange ai ki he Tamai Hēvaní mo Sīsū Kalaisi. Sīpingá: Koeʻuhí ko Siosefa Sāmita, ʻoku ou maʻu ha mahino lahi ange fekauʻaki mo e Tamai Hēvaní mo Sīsū Kalaisi. ʻOku ou ʻilo ʻe tali ʻe he Tamai Hēvaní ʻeku ngaahi lotú pea ʻoku sino mavahevahe ʻa e Tamai Hēvaní mo Sīsū Kalaisi.
Kapau ʻoku fiemaʻu tokoni ʻa e kau akó ʻi heʻenau fakakaukau ki ha toe sīpinga ʻo e meʻa ke tohi pe tā fakatātaaʻí, te nau lava ʻo fakamanatu ʻa e ngaahi tefito mo e ngaahi veesi ko ʻení: lakanga fakataulaʻeikí (Tokāteline mo e Ngaahi Fuakava 13:1); ko e Tohi ʻa Molomoná (Tokāteline mo e Ngaahi Fuakava 17:5–6; 135:3); ngāue fakafaifekaú (Tokāteline mo e Ngaahi Fuakava 4; 110:11); mālohi faisilá (Tokāteline mo e Ngaahi Fuakava 110:13–16).
Lolotonga ʻa e fakalaulauloto mo tohi ʻa e kau akó, te ke lava ʻo tā ʻa e foʻi hiva “ʻOku Mau Fakamālō” (Ngaahi Himí, fika 16). Fakamatalaʻi ange naʻe hiki ʻa e himi ko ʻení ʻe Uiliami W. Felipisi hili ʻa e pekia ʻa e Palōfitá ko ha fakaʻapaʻapa kiate ia.
Fakaafeʻi ʻa e tokolahi taha ʻo e kau akó ke vahevahe ʻenau ngaahi fakakaukau ki he founga kuo tāpuekina ai kinautolu ʻe he ʻEikí ʻo fakafou ʻi he Palōfita ko Siosefa Sāmitá pea fakakaukau ke faʻu ha lisi ʻi he palakipoé. ʻI hono vahevahe ʻe he kau akó ʻenau ngaahi fakakaukau mo e ongo ʻi ha kaveingá, fakakaukau ke fai ha ngaahi fehuʻi hangē ko e “Naʻe fakakaukau nai ha taha kehe ki he tāpuaki tatau ko iá? Te ke fie tānaki nai ha ngaahi fakakaukau ki heʻetau fealeaʻakí?” pe “Naʻe mei kehe fēfē nai hoʻo moʻuí ka ne taʻeʻoua ʻa e tāpuaki ko ʻení?” Fakaafeʻi ʻa e kau akó ke vahevahe fekauʻaki mo ha ngaahi tāpuaki kehekehe. Fakakaukau ke vahevahe foki hoʻo ngaahi fakakaukaú mo e ngaahi ongó.
Ke fakaʻosí, te ke lava foki ʻo vahevahe ʻa e lea ko ʻeni naʻe fai ʻe Palesiteni M. Lāsolo Pālati, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá. Ko Palesiteni Pālatí ko e mokopuna tolu ia ʻo Hailame Sāmitá.
ʻOku totonu ke tau manatuʻi maʻu pē ʻa e feilaulau naʻe fai ʻe Siosefa mo Hailame Sāmitá, fakataha mo ha kau tangata, kau fafine, mo e fānau faivelenga kehe tokolahi, ke fokotuʻu ʻa e Siasí ka tau lava ʻo fiefia ʻi he ngaahi tāpuaki lahi mo e ngaahi moʻoni ne fakahā mai ʻoku tau maʻu ʻi he ʻaho ní. ʻOku ʻikai totonu ke teitei ngalo ʻenau faivelengá! (M. Russell Ballard, “He ʻIkai Koā Ke Tau Fai Atu ʻi ha Ngāue Mahuʻinga Pehē?,” Liahona, Mē 2020, 11)
-
Kapau naʻe fiemaʻu ʻe ha taha ke mahino lelei ange ʻa e founga naʻe tāpuekina ai kinautolu ʻe he ʻEikí ʻo fakafou ʻi he Palōfita ko Siosefa Sāmitá, ko e hā te ke fokotuʻu ange ke nau faí?
Ako Ma‘uloto
Mahalo te ke fie tokoni ki he kau akó ke ako maʻuloto ʻa e potufolofola mo e kupuʻi lea fakafolofola mahuʻinga ʻo e Tokāteline mo e Ngaahi Fuakava 135:3 pea fakamanatu kinaua ʻi he ngaahi lēsoni he kahaʻú. Ko e kupuʻi lea fakafolofola mahuʻinga ki he potufolofola ko ʻení ko e “Ko Siosefa Sāmita naʻá ne ʻomai ʻa e Tohi ʻa Molomoná, ʻa ia naʻá ne liliu ʻi he foaki mo e mālohi ʻo e ʻOtuá.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”