“Lēsoni 150—Kau Paionia ʻi he Fonua Kotoa Pē: Ko Hono Teuteuʻi ʻo e Halá maʻá e Niʻihi Kehé,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Kau Paionia ʻi he Fonua Kotoa Pē,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 150: Tokāteline mo e Ngaahi Fuakava 135–136
Ko e Kau Paionia ʻi he Fonua Kotoa Pē
Ko Hono Teuteu ʻo e Halá maʻá e Niʻihi Kehé
Naʻe fakahaaʻi ʻe ha kau paionia ʻe lauiafe mei he 1847 ki he 1868, ha tui lahi kia Sīsū Kalaisi ʻi heʻenau fononga saliote toho tangata ke fakataha mo e Kāingalotú ʻi he Teleʻa Sōlekí. ʻI he ʻaho ní, ʻoku hokohoko atu hono fakahaaʻi ʻe he kau paionia mei he funga ʻo e māmaní ha tui lahi ʻi heʻenau fakataha mo e Kāingalotú ʻi ha feituʻu pē ʻoku nau nofo ai. ʻE lava ke tokoni ʻa e lēsoni ko ʻení ke ongoʻi ʻe he kau akó ha holi ke hoko ko ha kau paionia ʻaki ʻenau teuteu ʻa e halá ke muimui ai ʻa e niʻihi kehé kia Sīsū Kalaisi.
Ngaahi ʻEkitivitī Ako ʻOku Ala Fakahokó
Kau Paioniá
Fakatokangaʻi ange: Mahalo ʻe lelei ke kumi ha kau paionia ʻi homou siteikí, uōtí, pe fonuá pea teuteu ke vahevahe ʻenau ngaahi talanoá ko ha konga ʻo e lēsoní. Kapau ʻe lava, te ke lava ʻo fakaafeʻi kinautolu ke nau haʻu ki he kalasí ʻo fakamatalaʻi ʻenau aʻusiá.
Fakakaukau ke fakaʻaliʻali ʻa e ʻekitivitī ko ʻení ke tokoni ke mahino ki he kau akó ʻa e ʻuhinga ʻo ha paionia. Hili iá, ʻe lava ke vahevahe ʻe he kau akó ʻenau ngaahi fakakaukaú mo e kalasí pe ʻi ha fanga kiʻi kulupu iiki. Te ke lava ʻo liliu ʻa e ʻekitivitī ko ʻení ke fakakau ai ʻa e kau paionia naʻe liliu ʻe heʻenau moʻuí ʻa e kakai ʻi homou feituʻú.
Fakatauhoa ʻa e kakaí mo ʻenau ngaahi lavameʻá.
|
Kakai |
Ngaahi lavameʻá |
|---|---|
Kakai 1. Sōnesi Kutenipeiki | Ngaahi lavameʻá A. ʻUluaki palesiteni Fineʻofa ʻi Taiuaní |
Kakai 2. ʻIlisapeti Siakisoni | Ngaahi lavameʻá E. Ko e fuofua fefine ke ne maʻu ha Pale Fakalāngilangi, ʻa ia naʻe foaki ko ʻene fakatotolo kau ki he huelo ʻo e laʻaá |
Kakai 3. Seni Lini Sūliangi | Ngaahi lavameʻá F. Fuofua faʻu ʻo e mīsini pākí |
Kakai 4. ʻEtimani Hilalī mo Tenisingi Nōkei | Ngaahi lavameʻá D. ʻUluaki ke kaka ki he tumuʻaki ʻo e Moʻunga ʻEvalesí |
Kakai 5. Malia Kuili | Ngaahi lavameʻá E. Fononga saliote toho tangata ki he Teleʻa Sōlekí |
ʻI he ʻosi hono mateʻi ʻe he kau akó, ʻoange ʻa e ngaahi tali tonú (1-F, 2-I, 3-A, 4-H, 5-E).
-
Ko e hā ʻoku faitatau ai ʻa e kakai ko ʻení?
Tokoni ke mahino ki he kau akó ko e taha ʻo e ngaahi meʻa naʻe faitatau ai ʻa e kakai ko ʻení ko ʻenau hoko ko ha kau paioniá. ʻE lava ke fakaʻuhingaʻi ʻa e paioniá ko ha taha ʻoku ʻalu muʻomuʻa peá ne teuteuʻi ʻa e halá ke muimui atu ai ʻa e niʻihi kehé. Te mou lava foki ʻo mamata ʻi he “I Am a Pioneer” (1:16), ʻoku maʻu ʻi he ChurchofJesusChrist.org.
2:3 -
Kuo teuteuʻi fēfē ʻe he ngaahi lavameʻa ʻa e kau paionia ko ʻení ha founga ke muimui ai ha niʻihi kehe?
Ko e sīpinga ʻa Sīsū Kalaisí
Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo Sīsū Kalaisi:
Ko hotau Fakamoʻui ko Sīsū Kalaisí ko e paionia maʻongoʻonga taha Ia ʻi hono teuteuʻi ʻa e halá. Ko e moʻoni, ko Ia ʻa e “hala” ke aʻusia ai ʻa e palani ʻo e fakamoʻuí kae lava ke tau fakatomala pea toe foki hake ki heʻetau Tamai Hēvaní, ʻo fakafou ʻi he tui kiate Iá. (M. Russell Ballard, “Muimui ʻia Sīsū Kalaisi ʻo Laka Atu ʻi he Tui,” Liahona, Nōvema 2022, 35)
Ke tokoni ki he kau akó ke vakavakaiʻi ʻa e lea ko ʻení, fakakaukau ke fakaafeʻi kinautolu ke ʻiloʻi ʻa e ngaahi potufolofola ʻokú ne fakatātaaʻi ʻa e ngaahi founga naʻe hoko ai ʻa Sīsū Kalaisi ko ha paioniá. Kapau te nau fiemaʻu tokoni, te ke lava ʻo ʻoange ʻa e ngaahi potufolofola ko ʻení pe ko ha ngaahi potufolofola kehe te ke fili.
Lau ha niʻihi ʻo e ngaahi veesi ko ʻení: Sione 13:15; 14:2–6; 2 Nīfai 31:5–12; mo e Mōsaia 16:7. Kumi ha ngaahi founga ʻe lava ke lau ai ʻa Sīsū Kalaisi ko ha paionia.
-
Ko e hā naʻá ke maʻú?
-
Kuo hoko fēfē ʻa e ngaahi ngāue ʻa e Fakamoʻuí ke teuteu ha founga maʻaú ko ha tāpuaki ʻi hoʻo moʻuí?
Fakamatalaʻi ange ki he kau akó ʻoku lahi ha ngaahi founga ʻoku hoko ai ʻa e Fakamoʻuí ko ha paionia ko Ia pē te Ne toki lavá. Ka neongo ia, ʻoku ʻi ai ha ngaahi founga te tau lava ai ʻo muimui ʻi Heʻene “sīpingá … [pea] fai ʻo tatau mo ia [kuó Ne] faí” (Sione 13:15) ke hoko ko ha kau paionia maʻá e niʻihi kehé. Fakaafeʻi ʻa e kau akó ke hiki ʻeni ko ha ʻuluʻi tohi ʻi heʻenau tohinoa akó: “Hangē ko e Fakamoʻuí, te u lava ʻo hoko ko ha paionia ʻaki ʻeku fakahaaʻi faivelenga ki he niʻihi kehé ʻa e hala ke nau muimui aí.”
Fakakaukau ke fakaʻaliʻali ʻa e ngaahi fehuʻi ko ʻení pea fakaafeʻi ʻa e kau akó ke tali kinautolu ʻi lalo ʻi he ʻuluʻi tohi ʻi ʻolunga ʻi heʻenau tohinoa akó:
-
ʻOkú ke ongoʻi nai ʻokú ke tā ha sīpinga ʻokú ke loto ke muimui ki ai ʻa e niʻihi kehé?
-
Ko e hā ʻokú ne ʻai koe ke ke fiefia ʻi hoʻo hoko ko ha paioniá? Ko e hā ha meʻa ʻokú ke manavasiʻi aí?
-
ʻOkú ke ongoʻi fēfē ʻe lava ke tokoniʻi koe ʻe Sīsū Kalaisi ke ke hoko ko ha paionia maʻá e niʻihi kehé?
ʻI he toenga ʻo e lēsoni ko ʻení, fakaafeʻi ʻa e ivi tākiekina ʻo e Laumālie Māʻoniʻoní ke fakatupulaki hoʻo holi ke hoko ko ha paionia anga faka-Kalaisi ke muimui ki ai ʻa e niʻihi kehé.
Kau paionia fononga saliote toho tangatá
Fakaafeʻi ʻa e kau akó ke vahevahe ʻa e meʻa ʻoku nau manatuʻi naʻa nau ako fekauʻaki mo e fononga fakahihifó mo e Tokāteline mo e Ngaahi Fuakava 136. Fakakaukau ke toe vakaiʻi ʻa e Tokāteline mo e Ngaahi Fuakava 136:6–7 ke fakatātaaʻi ha founga ʻe taha naʻe kole ai ki he fuofua Kāingalotu ke fononga fakahihifó ke nau hoko ko ha kau paioniá.
Fakakaukau ke fakaʻaliʻali ha fakatātā ʻo ha saliote toho tangata pea fakamatalaʻi fakanounou ʻa e fakamatala ko ʻení.
Hili ha fononga ha ngaahi kulupu lahi ki Sōleki Siti ʻi ha ngaahi salioté, ʻa ia naʻe faʻa toho ʻe ha fanga pulu, naʻe poupouʻi ʻe Pilikihami ʻIongi ʻa e kāingalotú ke nau fakaʻaongaʻi ʻa e ngaahi saliote toho tangatá. Naʻe toho ʻe he kau paioniá ha ngaahi saliote toho tangata ko ʻene maʻamaʻa fakapaʻangá mo vave ange ʻenau fonongá. Ko ha kulupu pē ʻe toko 10 mei he ngaahi kulupu hikifonua ʻe toko 350 tupu ne nau fononga saliote toho tangatá. Neongo naʻe fononga ʻa e lahi taha ʻo e ngaahi kulupu saliote toho tangatá taʻe ʻi ai ha palopalema lalahi, ka naʻe fakatupu ʻe he ngaahi matangi ʻo e faʻahitaʻu momokó ʻi he 1856 ke faingataʻaʻia ai ʻa e ongo kulupu fononga saliote toho tangata ʻa Uili mo Mātini ʻi he halá. Ne mole ʻa e moʻui ʻa ha tokolahi koeʻuhí ko e fiekaiá mo e momokó. Naʻe ʻomi ʻe he ngaahi ngāue fakahaofi moʻui naʻe fai ʻe he kāingalotu ʻo e Siasí ʻi ʻIutaá ha ngaahi naunau naʻe fiemaʻu mo tokoni ki he kau fonongá ke fakakakato ʻenau fonongá, ʻo fakahaofi moʻui ai ha toko 1,200 tupu (vakai, Ngaahi Tefito ʻi he Hisitōlia ʻo e Siasí, “Ngaahi saliote toho tangatá,” ChurchofJesusChrist.org/study/history/topics).
Fakakaukau ke vahevahe ha talanoa pe fakamoʻoni mei ha paionia fononga saliote toho tangata hangē ko ʻení. Fakaafeʻi ʻa e kau akó ke kumi ha ngaahi founga te nau lava ai ʻo fakaʻaongaʻi ʻa e sīpinga ʻa e paioniá ʻi heʻenau moʻuí.
Naʻe vahevahe ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakamatala ko ʻení ʻo ha paionia fononga saliote toho tangata.
ʻOku ongo kiate au ʻa e fakamatala ʻa ʻIlisapesi Siakisoni ʻa ia ne mālōlō hono husepāniti ko ʻĒloné hili ʻa e kolosi fakamuimuitaha ʻa e Kau Fononga Sāliote Toho tangata ʻa Mātiní ʻi he Vaitafe Palaté. Naʻá ne tohi ʻo pehē:
“He ʻikai ke u feinga ke fakamatala e ngaahi ongo naʻá ku maʻu ʻi heʻeku hoko ko ha uitou ne ʻi ai haʻane fānau ʻe toko tolu, ʻi he ngaahi tūkunga fakamamahi ko ʻení. … ʻOku ou tui … ʻe lau ʻoku fakamāʻoniʻoniʻi au ʻe heʻeku faingataʻaʻia koeʻuhí ko e Ongoongoleleí ke u lelei ai. …
Naʻá ku [tangi] ki he ʻEikí, … ʻa Ia kuó Ne talaʻofa te Ne hoko ko ha husepāniti ki he uitoú, mo e tamai ki he tamai maté. Ne u tangi kiate Ia pea naʻá Ne tokoniʻi au.”
Naʻe pehē ʻe ʻIlisapesi naʻá ne hiki ʻa e hisitōliá maʻanautolu ne nau foua ʻa e ngaahi tūkunga tataú, mo e ʻamanaki ʻe loto-fiemālie ʻa e ngaahi toʻu tangata ʻo e kahaʻú ke nau faingataʻaʻia mo feilaulauʻi ʻa e meʻa kotoa maʻá e puleʻanga ʻo e ʻOtuá. (Quentin L. Cook, “ʻOku Fakaofo e Houʻeiki Fafine ʻo e Siasí,” Liahona, Mē 2011, 18)
-
Ko e hā naʻe fakamoʻoniʻi ʻe ʻElisapeti fekauʻaki mo e ʻEikí?
-
Ko e hā naʻá ne ʻamanaki ʻe ako ʻe he niʻihi kehé mei heʻene sīpingá?
Fakakaukau ke fakaafeʻi ʻa e kau akó ke feinga ke ʻiloʻi ha ngaahi potufolofola fakataukei fakatokāteline pe ngaahi potufolofola kehe ʻokú ne fakatātaaʻi ʻa e founga naʻe lava ai ʻe ʻElisapeti ʻo maʻu ha mālohi mei he Fakamoʻuí. ʻE lava ke hoko ʻa e Mātiu 11:28–30; ʻAlamā 7:11–13; pe Tokāteline mo e Ngaahi Fuakava 6:36 ko ha ngaahi sīpinga.
Fehuʻi ange pe ʻe tokoniʻi fēfē ʻe he ngaahi potufolofola ko ʻení ʻetau loto-holi ke hoko ko ha paionia maʻá e niʻihi kehé.
Ngaahi sīpinga ʻo e kau paioniá
Fakamatalaʻi ange ʻoku ʻikai toe kole ki he Kāingalotú ke nau fakataha ki he Teleʻa Sōlekí. ʻOku fakaafeʻi kinautolu ke nau hoko ko ha kau paionia ʻaki ʻenau tānaki fakataha ki he ngaahi siteiki ʻo Saioné ʻi ha feituʻu pē ʻoku nau nofo ai mo teuteu ʻa e halá maʻá e niʻihi kehé ke nau muimui ʻia Sīsū Kalaisi. ʻE lava ke tokoniʻi kitautolu ʻe he ngaahi sīpinga ʻa e kau paioniá ʻi he funga ʻo e māmaní ke tau muimui ʻia Sīsū Kalaisi mo hoko ko ha kau paionia ʻi ha feituʻu pē ʻoku tau ʻi ai.
ʻI he ʻekitivitī ko ʻení, ʻoange ki he kau akó ʻa e laʻipepa tufa “Kau Paionia ʻi he Funga ʻo e Māmaní,” ʻa ia ʻoku ʻi ai ha ngaahi talanoa naʻe toʻo mei he Ngaahi Hisitōlia Fakaemāmani Lahí ʻoku maʻu ʻi he ChurchofJesusChrist.org.
Pe ko hoʻo fakaafeʻi ʻa e kau akó ke lau ʻa e ngaahi talanoa ʻo ʻenau ngaahi kuí ʻi he FamilySearch.org pe fakakaukauloto ki he ngaahi talanoa ne nau ʻiló kapau naʻa nau fakakakato ʻa e ʻekitivitī teuteu ʻa e tokotaha akó. Te nau lava foki ʻo laukonga fekauʻaki mo e kau paionia ʻi honau fonuá ʻoku maʻu ʻi he Ngaahi Hisitōlia Fakaemāmani Lahí ʻi he konga ʻo e Hisitōlia ʻo e Siasí ʻi he Gospel Library.
Fakakakato ʻa e ʻekitivitī ko ʻení, ʻo kumi ʻa e founga ʻe lava ke tokoniʻi ai koe ʻe he ngaahi sīpinga ʻa e kau paionia ʻi he funga ʻo e māmaní ʻi hoʻo feinga ke hoko ko ha paioniá.
-
Lau ʻa e talanoa ʻo ha paionia ʻe toko taha pe tokolahi ange.
-
Feinga ke ʻiloʻi ʻa e founga naʻa nau hoko ai ko ha paioniá.
-
Kumi ha ngaahi founga naʻe tokoniʻi ai kinautolu ʻe he Tamai Hēvaní mo Sīsū Kalaisi.
-
Hiki ʻi hoʻo tohinoa akó ʻa e founga ʻe lava ke ueʻi ai koe ʻe heʻenau ngaahi sīpinga faka-Kalaisí ke ke hoko ko ha paionia maʻá e niʻihi kehé.
Kau paionia ʻi he funga ʻo e Māmaní
Haʻamoa ʻAmelika
“[Naʻe Folofola ʻa e ʻOtuá ʻIo]”
Naʻe moʻui ʻa Levaʻaia Levao mo ha ngaahi palopalema fakaemoʻui lelei lahi. ʻI he 2015, naʻe kamata tupu ha hangatāmaki ʻi hono fofongá. Naʻe fakamoʻui ʻa e ngaahi hangatāmakí hili hono foaki ange ʻe he ongo faifekaú ha tāpuaki lakanga fakataulaʻeiki kiate ia. Naʻá na kamata lau fakataha mo ia ʻa e Tohi ʻa Molomoná.
Naʻe loto-mamahi ha kakai ʻe niʻihi ʻi he kiʻi kolo ʻo e motú ke sio kia Levao ʻoku fakakaukau ki ha tui fakalotu foʻou. Naʻa nau manukiʻi ʻene ngaahi ngāué mo tukuhifo ia. Ka naʻá ne kei tuʻu maʻu pē pea ʻikai fuoloa kuo papitaiso. Naʻe ʻikai fuoloa kuo muimui atu hono husepāniti ko Tuí, mo ʻene fānau ʻe toko tolú ki he siasí, pea naʻe hoko ʻa Levao kimui ange ko e palesiteni Fineʻofa ʻi hono koló. Naʻe ʻi ai ha niʻihi kehe, naʻe tākiekina kinautolu ʻe heʻene sīpinga ʻo e mateakí, naʻa nau ui ia ko e mafu ʻo e Siasí ʻi ʻOloseka.
Kōlea Tonga
“[He ʻIkai Moʻoni Te u Toe Mokosia]”
Ko Soi Tongi Sulá ko ha faifekau Pelesipiteliane ia naʻá ne ongoʻi ko hono fatongia ia ke maluʻi ʻa e kāingalotu ʻo hono haʻofangá mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka neongo ia, naʻe kamata ke ne talanoa mo e kau faifekaú mo maʻu ha mahino ki he ngaahi meʻa fakatokāteline naʻá ne hohaʻa ki aí. Naʻá ne ʻiloʻi ʻe fiemaʻu ʻe heʻene tui foʻoú ha liliu ʻi heʻene ngāue maʻuʻanga moʻuí pea he ʻikai lelei ki hono vā mo ʻene tamaí, ʻa ia naʻe hoko ko e sea ʻo e Siasi Pelesipiteliane ʻo Kōleá ʻi he taimi ko iá.
Naʻe fili ʻa Tongi Sula ke papitaiso ʻi he Vaitafe Haní. Naʻá ne fakamatala ʻo pehē, “Naʻá ku fiemaʻu hoku papitaisó ke hoko ko ha aʻusia hangē ko Sīsū Kalaisí ʻi he lahi taha ʻe ala lavá”. ʻI he pongipongi kakapu ʻo e ʻaho 5 ʻo Sepitema 1981, naʻe momoko ʻa e vai ʻo e Vaitafe Haní, ka ʻi he tuʻu hake ʻa Tongi Sula mei he vaí, naʻá ne fakamatalaʻi ha māfana fakaeloto. Naʻá ne pehē, “Kuó u kau ʻeni ki he Siasi moʻoni ʻo e ʻOtuá. He ʻikai moʻoni te u toe mokosia.” Hili ha uike ʻe ua mei ai, naʻe papitaiso foki mo hono uaifí mo hono ongo fohá—ʻi ha falelotu māfana ʻi he taimi ko ʻení. Naʻe ʻikai faingofua ʻa e moʻuí kia Tongi Sula mo hono fāmilí ʻi heʻenau kau ki he Siasí, ka naʻe malava ai ke nau maʻu ha ngaahi tāpuaki foʻou. Naʻe pehē ʻe Tongi Sula, “Ko e ngaahi fakatanga mo e ngaahi mamahi … hili hoku papitaisó ʻoku ope atu ia ʻi he meʻa ʻoku ou malava ke fakamatalá. Naʻe mole ha meʻa lahi ʻi heʻemau [kau ki he Siasí], ka kuo mau maʻu ʻo lahi ange ʻi he meʻa ne mau fakaʻānaua ki aí.”
Côte d’Ivoire
“Ngaahi Matapā ʻo e Moʻuí mo e Fiefiá”
Ko Laiti Sipo Pei ʻa e fakamuimuitaha ʻo hono fāmilí naʻe nofo ʻi ʻapi ʻi he taimi ne fakatou mālōlō ai ʻene ongomātuʻá. Naʻe iku ʻa e mole ko ʻení ki ha loto-mafasia lahi. Naʻe fakafeʻiloaki ia ʻe hono fakafotu ko Feiti Natesí, ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻI he fuofua taimi naʻe ʻalu ai ʻa Laiti ki he lotú, naʻá ne ongoʻi ha ʻofa lahi mei he kau fafine ʻo e houalotu ʻa e Fineʻofá mo e Kau Finemuí. Neongo naʻe ʻikai ke ne toe laukonga lolotonga ʻa e taimi ʻo ʻene loto-mafasiá, ka naʻá ne fakatokangaʻi ʻene toe malava ke tokanga ʻi heʻene ako ʻa e Tohi ʻa Molomoná. Naʻá ne papitaiso ʻi he ʻaho 18 ʻo Nōvema, 1995.
Naʻe ʻikai fuoloa mei hono papitaisó, kuó ne maʻu ha faingamālie ke fakafoki ʻa e ʻofa naʻá ne aʻusiá ʻi heʻene ngāue ʻi he houalotu ʻa e Fineʻofá mo e Kau Finemuí. Naʻá ne hoko foki ko ha faifekau fakakolo, ʻo fakaafeʻi ha niʻihi kehe ke nau ʻiloʻi ʻa e feohi mo e melino tatau naʻá ne toki maʻú. Naʻe pehē ʻe Laiti, “Naʻe fakamālohia mo tokoniʻi au ʻe he ngaahi uiuiʻi kotoa ko ʻení ke u fakalakalaka fakalaumālie mo fakaʻatamai fakatouʻosi”.
Naʻe hoko ʻa Laiti ko e taha ʻo e kau fuofua faifekau sisitā ke ngāue ʻi he Misiona Lepapulika Fakatemokālati ʻo Kongokou Kinisasá
ʻI he ʻosi ʻa e ako ʻa e kau akó, fakakaukau ke fakakulupu iiki kinautolu ke vahevahe ʻa e meʻa ne nau akó.
Fakaafeʻi ʻa e kau akó ke hiki ʻa e meʻa ne nau ako pe ako ʻi he ʻahó ni ʻa ia ʻoku tokoni ke fakatupulaki ʻenau loto-holi ke hoko ko ha paioniá. Te nau lava foki ʻo hiki ha ngaahi founga te nau fie muimui ai ʻi he sīpinga ʻa e Fakamoʻuí pea hoko ko ha paionia maʻá e niʻihi kehé pea mo hono ʻuhingá.