«Դաս 150. Ռահվիրաներ ամեն երկրում. Ճանապարհ պատրաստել ուրիշների համար», Վարդապետություն և Ուխտեր․ Սեմինարիայի ուսուցչի ձեռնարկ (2025)
«Ռահվիրաներ ամեն երկրում», Վարդապետություն և Ուխտեր․ Սեմինարիայի ուսուցչի ձեռնարկ
Դաս 150. Վարդապետություն և Ուխտեր 135–136
Ռահվիրաներ ամեն երկրում
Ճանապարհ պատրաստել ուրիշների համար
1847-1868 թվականներին հազարավոր ռահվիրաներ մեծ հավատք դրսևորեցին առ Հիսուս Քրիստոս՝ սայլով կամ ձեռնասայլով ուղևորվելով դեպի Սոլթ Լեյքի հովիտ՝ Սրբերի հետ հավաքվելու համար: Այսօր աշխարհասփյուռ ռահվիրաները շարունակում են մեծ հավատք դրսևորել՝ հավաքվելով Սրբերի հետ, անկախ նրանից, թե որտեղ են իրենք ապրում։ Այս դասը կօգնի ուսանողներին ռահվիրա լինելու ցանկություն զգալ՝ Հիսուս Քրիստոսին հետևելու համար ճանապարհ պատրաստելով ուրիշների համար:
Հնարավոր ուսումնական վարժություններ
Ռահվիրաներ
Նշում․ օգտակար կլինի դասի ընթացքում գտնել ձեր ցցի, ծխի կամ երկրի ռահվիրաների օրինակները և պատրաստ լինել կիսվելու նրանց պատմություններով: Հնարավորության դեպքում կարող եք նույնիսկ առաջարկել նրանց գալ դասի և կիսվել իրենց փորձառությամբ:
Կարող եք ցուցադրել հետևյալ վարժությունը, որպեսզի օգնեք ուսանողներին հասկանալ ռահվիրա բառի սահմանումը: Ուսանողները կարող են իրենց ենթադրություններով կիսվել դասարանի հետ կամ փոքր խմբերում: Կարող եք հարմարեցնել այս վարժությունը՝ ներառելով ռահվիրաների, որոնց կյանքն ազդել է ձեր տարածքում ապրող մարդկանց վրա:
Համապատասխանեցրեք մարդկանց իրենց ձեռքբերումների հետ:
|
Մարդիկ |
Ձեռքբերումներ |
|---|---|
Մարդիկ 1. Յոհաննես Գուտենբերգ | Ձեռքբերումներ Ա. Սփոփող Միության առաջին նախագահը Թայվանում |
Մարդիկ 2. Էլիզաբեթ Ջեքսոն | Ձեռքբերումներ Բ. Առաջին կինը, որն արժանացել է Նոբելյան մրցանակի, որը շնորհվել է ճառագայթման վերաբերյալ իր կատարած հետազոտության համար |
Մարդիկ 3. Չեն Լին Շու-Լանգ | Ձեռքբերումներ Գ. Հայտնագործել է տպագրական մեքենան |
Մարդիկ 4. Էդմունդ Հիլարի և Թենզինգ Նորգայ | Ձեռքբերումներ Դ. Առաջինն է, ով բարձրացել է Էվերեստի գագաթը |
Մարդիկ 5. Մարի Կյուրի | Ձեռքբերումներ Ե. Ձեռնասայլով ուղևորվել է Սոլթ Լեյքի հովիտ |
Երբ ուսանողներն անեն իրենց ենթադրությունները, տրամադրեք նրանց ճիշտ պատասխանները (1-Գ, 2-Ե, 3-Ա, 4-Դ, 5-Բ):
-
Ի՞նչ ընդհանուր բան ունեն այս մարդիկ:
Օգնեք ուսանողներին հասկանալ, որ այս մարդիկ մեկ ընդհանուր բան ունեին՝ նրանք ռահվիրաներ էին: Ռահվիրա կարող է կոչվել այն մարդը, որը գնում է առջևից և ուրիշների համար ճանապարհ է պատրաստում, որով պետք է գնալ։ Կարող եք նաև դիտել «Ես ռահվիրա եմ» տեսանյութը (1։16), որը հասանելի է ChurchofJesusChrist.org կայքում։
2:3 -
Ինչպե՞ս են այս ռահվիրաների ձեռքբերումները ճանապարհ պատրաստել ուրիշների համար։
Հիսուս Քրիստոսի օրինակը
Տասներկու Առաքյալների Քվորումի նախագահ Մ․ Ռասսել Բալլարդը կիսվել է հետևյալով Հիսուս Քրիստոսի մասին.
Մեր Փրկիչ Հիսուս Քրիստոսը ճանապարհ պատրաստելու բարձրագույն ռահվիրան է: Հիրավի, Նա է «ճանապարհը», որով պետք է իրականացվի փրկության ծրագիրը, որպեսզի մենք կարողանանք ապաշխարել և Նրա հանդեպ հավատքի միջոցով վերադառնանք դեպի մեր Երկնային Հայրը: (Մ. Ռասել Բալլարդ, «Հետևեք Հիսուս Քրիստոսին հավատքի քայլերով», Լիահոնա, նոյ․ 2022, 35)
Որպեսզի օգնեք ուսանողներին վերլուծել այս խոսքերը, առաջարկեք նրանց նշել սուրբ գրություններ, որոնք ցույց են տալիս, թե Հիսուս Քրիստոսն ինչպես է ռահվիրա եղել: Եթե նրանք օգնության կարիք ունենան, կարող եք տրամադրել հետևյալ հատվածները կամ այլ հատվածներ՝ ըստ ձեր ընտրության։
Կարդացեք հետևյալ հատվածներից մի քանիսը. Հովհաննես 13.15, 14․2–6, 2 Նեփի 31.5–12 և Մոսիա 16.7։ Փնտրեք, թե Հիսուս Քրիստոսը ինչու կարող է ռահվիրա համարվել:
-
Ի՞նչ գտաք:
-
Ձեզ համար ճանապարհ պատրաստելու Փրկչի գործողություններն ի՞նչ օրհնություն են բերել ձեր կյանք:
Ուսանողներին բացատրեք, որ Փրկիչը ռահվիրա է բազմաթիվ առումներով և եղանակներով, որոնցով միայն Նա կարող է գործել: Այնուամենայնիվ, կան որոշ եղանակներ, որոնցով մենք կարող ենք հետևել Նրա «օրինակին … [և] անել նույն կերպ, [ինչպես Նա է արել]» (Հովհաննես 13.15), որպեսզի ռահվիրաներ լինենք ուրիշների համար: Ուսանողներին առաջարկեք իրենց ուսումնասիրության օրագրում որպես վերնագիր գրել հետևյալը. «Փրկչի նման, ես կարող եմ լինել ռահվիրա՝ հավատարմորեն ցույց տալով ուրիշներին այն ճանապարհը, որով պետք է գնալ»:
Կարող եք ցուցադրել ստորև ներկայացվող հարցերը և առաջարկել ուսանողներին գրել դրանց պատասխաններն իրենց ուսումնական օրագրերում գրված վերնագրի ներքո.
-
Զգո՞ւմ եք, որ օրինակ եք հանդիսանում, որին կցանկանայիք, որ ուրիշները հետևեն:
-
Ի՞նչն է ձեզ ոգեշնչում, որպեսզի լինեք ռահվիրա: Ի՞նչն է ձեզ անհանգստություն պատճառում:
-
Ըստ ձեզ, Հիսուս Քրիստոսն ինչպե՞ս կարող է օգնել ձեզ լինել ռահվիրա ուրիշների համար:
Այս դասի մնացած հատվածում հրավիրեք Սուրբ Հոգու ազդեցությունը, որպեսզի մեծացնի ձեր ցանկությունը՝ ուրիշների համար լինել Քրիստոսանման ռահվիրա, որին պետք է հետևել:
Ձեռնասայլերով ռահվիրաներ
Առաջարկեք ուսանողներին կիսվել, թե ինչ են հիշում դեպի արևմուտք գաղթի մասին իրենց սովորածից և Վարդապետություն և Ուխտեր 136 բաժնից: Առաջարկեք կրկնել Վարդապետություն և Ուխտեր 136.6–7 հատվածները՝ պատկերացնելու համար, թե ինչպես դեպի արևմուտք ուղևորվող առաջին Սրբերին առաջարկվեց լինել ռահվիրաներ:
Կարող եք ցուցադրել ձեռնասայլի նկար և ամփոփ ներկայացնել հետևյալ տեղեկությունները։
Երբ բազմաթիվ խմբեր Սոլթ Լեյք Սիթի էին մեկնել սայլերով, որոնք սովորաբար քաշվում էին եզներով, Բրիգամ Յանգը խրախուսեց Սրբերին օգտագործել ձեռնասայլեր: Ռահվիրաներն իրենք էին քաշում ձեռնասայլերը, ինչը հնարավորություն էր տալիս ավելի էժան և արագ ուղևորություն կատարել։ Ավելի քան 350 գաղթող խմբերից միայն 10 խումբ ուղևորվեց ձեռնասայլերով: Թեև ձեռնասայլերով խմբերի մեծ մասն ուղևորությունը կատարեց առանց լուրջ խնդիրների, 1856 թվականի ձմռան փոթորիկների պատճառով Ուիլիի և Մարտինի ձեռնասայլերով խմբերը մնացին ճանապարհին: Շատերը մահացան քաղցի և ծայրահեղ ցածր ջերմաստիճանի պատճառով։ Յուտա նահանգում Եկեղեցու անդամների կատարած փրկարարական ջանքերի շնորհիվ անհրաժեշտ պարագաներ և օգնություն տրամադրվեց ուղևորներին՝ ավարտին հասցնելու իրենց ուղևորությունը, ինչի շնորհիվ փրկեց ավելի քան 1200 կյանք (տես Եկեղեցու պատմության թեմաներ, «Handcart Companies,» ChurchofJesusChrist.org/study/history/topics):
Կարող եք կիսվել ձեռնասայլով մի ռահվիրայի մասին հետևյալ պատմությամբ կամ վկայությամբ։ Ուսանողներին առաջարկեք փնտրել եղանակներ, որոնցով իրենք կարող են կիրառել ռահվիրայի օրինակն իրենց կյանքում:
Տասներկու Առաքյալների Քվորումից երեց Քվենթին Լ. Քուքը կիսվել է ձեռնասայլով ռահվիրայի մասին հետևյալ պատմությամբ:
Ինձ հուզեց Էլիզաբեթ Ջեքսոնի պատմությունը, որի ամուսինը՝ Ահարոնը մահացավ Մարտինի ձեռնասայլերի խմբի հետ՝ Փլաթ գետի վերջին անցումից հետո: Նա գրել է.
«Ես չեմ փորձի նկարագրել իմ ապրումները, երբ ինձ զգում էի լքված այրի՝ երեք երեխաների հետ, այդպիսի ծայրահեղ հանգամանքներում: … Ես հավատում եմ, … որ հանուն Ավետարանի իմ տառապանքները կսրբագործեն ինձ ի բարին: …
«Ես [աղաչեցի] Տիրոջը … Նրան, ով խոստացել էր ամուսին լինել որբևայրիներին և հայր՝ հայրազուրկներին: Ես աղաչեցի Նրան և Նա եկավ ինձ օգնության»:
Էլիզաբեթը նշում է, որ գրել է պատմությունը բոլոր նրանց անունից, ովքեր անցել են այդ տեսարանների միջով այն հույսով, որ հետնորդները հոժարակամ կտոկան և կզոհաբերեն բոլոր բաները հանուն Աստծո թագավորության: (Քվենթին Լ. Քուք, «ՎՕՍ կանայք սքանչելի են», Լիահոնա, մայիս 2011, 18)
-
Ի՞նչ վկայեց Էլիզաբեթը Տիրոջ մասին:
-
Ինչի՞ հույսն ուներ նա, որ ուրիշները կսովորեն իր օրինակից:
Ուսանողներին առաջարկեք բացահայտել վարդապետության սերտման հատվածները կամ այլ սուրբ գրություններ, որոնք ցույց են տալիս, թե Էլիզաբեթն ինչպես կարողացավ ուժ ստանալ Փրկչից: Օրինակներից են՝ Մատթեոս 11.28–30, Ալմա 7.11–13 կամ Վարդապետություն և Ուխտեր 6.36 հատվածները։
Հարցրեք, թե այս սուրբ գրություններն ինչպես կարող են օգնել ուրիշների համար ռահվիրա լինելու մեր ցանկությանը:
Ռահվիրաների օրինակներ
Բացատրեք, որ Սրբերին այլևս չի առաջարկվում հավաքվել Սոլթ Լեյքի հովտում: Նրանց առաջարկվում է դառնալ ռահվիրաներ՝ հավաքվելով Սիոնի ցցերում, անկախ նրանից, թե որտեղ են իրենք ապրում, և ճանապարհ պատրաստելով ուրիշների համար՝ հետևելու Հիսուս Քրիստոսին: Ողջ աշխարհում ռահվիրաների օրինակները կարող են օգնել մեզ հետևել Հիսուս Քրիստոսին և լինել ռահվիրաներ, որտեղ էլ որ լինենք:
Հետևյալ վարժության համար ուսանողներին տրամադրեք «Ռահվիրաներն ամբողջ աշխարհում» աշխատաթերթը, որը պարունակում է պատմություններ՝ հարմարեցված Պատմությունն աշխարի երկրներում նյութից, որը հասանելի է ChurchofJesusChrist.org կայքում։
Որպես այլընտրանք, կարող եք առաջարկել ուսանողներին կարդալ իրենց նախնիների պատմությունները FamilySearch.org կայքում կամ խորհել նրանց մասին, ում նշել են, եթե կատարել են ուսանողների նախապատրաստման աշխատանքը: Նրանք կարող են նաև կարդալ իրենց երկրում ապրող ռահվիրաների մասին Պատմությունն աշխարի երկրներում նյութում՝ Gospel Library հավելվածի «Եկեղեցու պատմություն» բաժնում:
Կատարեք հետևյալ վարժությունը՝ փնտրելով, թե ինչպես կարող են ռահվիրաների օրինակներն ամբողջ աշխարհում օգնել ձեզ ռահվիրա լինելու ձեր ջանքերում:
-
Կարդացեք մեկ կամ մի քանի ռահվիրաների պատմություն:
-
Բացահայտեք, թե ինչպես են նրանք ռահվիրա եղել:
-
Փնտրեք եղանակներ, որոնցով Երկնային Հայրը և Հիսուս Քրիստոսն օգնեցին նրանց:
-
Ձեր ուսումնասիրության օրագրում գրեք, թե նրանց քրիստոսանման օրինակներն ինչպես կարող են ոգեշնչել ձեզ՝ ռահվիրա լինել ուրիշների համար:
Ռահվիրաները ողջ աշխարհում
Ամերիկյան Սամոա
«Աստված ասաց այո»
Լեվա այա Լեվաոն ծանր առողջական խնդիրներ ուներ: 2015 թվականին նրա աչքերի վրա թարախոտ չիբաններ էին առաջացել։ Չիբանները բուժվեցին, երբ միսիոներները նրան քահանայության օրհնություն տվեցին: Նրանք սկսեցին կարդալ Մորմոնի Գիրքը նրա հետ:
Կղզու փոքր համայնքի որոշ մարդիկ դժգոհ էին, որ Լևաոն նոր կրոն ընդունելու մասին է մտածում: Նրանք ծիծաղում էին նրա գործադրած ջանքերի վրա և նսեմացնում նրան։ Այնուամենայնիվ, նա հաստատակամ մնաց և շուտով մկրտվեց։ Նրա ամուսինը՝ Տույը, և նրա երեք երեխաները շուտով հետևեցին նրան իր հավատքում և Լևաոն հետագայում ծառայեց իր ճյուղում որպես Սփոփող միության նախագահ: Ուրիշները՝ նրա նվիրվածության օրինակի ազդեցության տակ, անվանեցին նրան Օլոսեգայի Եկեղեցու սիրտը:
Հարավային Կորեա
«Ես այլևս երբեք իրապես ցուրտ չեմ զգա»:
Չոյ Դոնգ Սուլը երիցական սպասավոր էր, որը կարծում էր, որ իր պարտականությունն է պաշտպանել իր միաբանության անդամներին Հիսուս Քրիստոսի Վերջին Օրերի Սրբերի Եկեղեցուց: Այնուամենայնիվ, նա սկսեց հանդիպել միսիոներների հետ և հստակություն գտնել վարդապետության վերաբերյալ իրեն անհանգստացնող հարցեր շուրջ: Նա գիտեր, որ իր նոր համոզմունքները կպահանջեն կարիերայի փոփոխություն և վտանգի տակ կդնեն իր հարաբերությունները հոր հետ, որն այդ ժամանակ Կորեայի երիցական եկեղեցու նախագահն էր:
Դոնգ Սուլը նախընտրեց մկրտվել Հան գետում: «Ես ուզում էի, որ իմ մկրտությունը հնարավորինս շատ նմանվի Հիսուս Քրիստոսի մկրտությանը»,- բացատրեց նա: 1981 թվականի սեպտեմբերի 5-ի մառախլապատ առավոտյան Հան գետի ջուրը սառն էր, սակայն երբ Դոնգ Սուլը դուրս եկավ ջրից, նա նկարագրեց իր ներսից բխող ջերմությունը։ «Այժմ ես պատկանում եմ Աստծո ճշմարիտ Եկեղեցուն»,- ասաց նա: «Ես այլևս երբեք իրապես ցուրտ չեմ զգա»: Երկու շաբաթ անց նրա կինը և երկու որդիները նույնպես մկրտվեցին, այս անգամ տաք հավաքատանը։ Եկեղեցուն միանալը չհեշտացրեց Դոնգ Սուլի և նրա ընտանիքի կյանքը, սակայն այն հնարավորություն տվեց նոր օրհնությունների ստանալ: «իմ մկրտությունից հետո հալածանքներն ու տառապանքները նկարագրելը … իմ կարողությունից վեր է»,– ասաց Դոնգ Սուլը: «Մենք շատ բան կորցրինք [Եկեղեցուն միանալու] ընթացքում, սակայն մենք շահել ենք ավելին, քան երբևէ երազել ենք»:
Կոտ դ’Իվուար
«Կյանքի և երջանկության դռներ»
Լիդի Զեբո Բահին իր ընտանիքի վերջին երեխան էր, որն ապրում էր իր տանը, երբ երկու ծնողներն էլ մահացան: Այս կորուստը հանգեցրեց ծանր ընկճախտի: Նրա եղբորորդին՝ Ֆաետ Նադեջը, նրան ծանոթացրեց Հիսուս Քրիստոսի Վերջին Օրերի Սրբերի Եկեղեցուն:
Երբ Լիդին առաջին անգամ գնաց եկեղեցի, նա մեծ սեր զգաց Սփոփող միության և Երիտասարդ կանանց կազմակերպությունների քույրերի կողմից: Թեև նա դադարել էր կարդալ իր ընկճախտի ժամանակ, սակայն կարողացավ կրկին կենտրոնանալ՝ Մորմոնի Գիրքն ուսումնասիրելու համար: Նա մկրտվեց 1995 թ. նոյեմբերի 18-ին:
Իր մկրտությունից կարճ ժամանակ անց, նա հնարավորություն ստացավ վերադարձնելու այն սերը, որը ցուցաբերվել էր իր հանդեպ՝ ծառայելով Սփոփող միությունում և Երիտասարդ կանանց կազմակերպություններում: Նա նաև ծառայել է որպես ճյուղի միսիոներ՝ առաջարկելով մարդկանց գտնել այն ընկերակցությունն ու խաղաղությունը, որն ինքը վերջերս գտել էր: «Այս բոլոր կոչումներն ինձ զորացրին և օգնեցին առաջընթաց ունենալ՝ ինչպես հոգևոր, այնպես էլ մտավոր առումներով»,- ասաց Լիդին:
Լիդին դարձավ առաջին քույր միսիոներներից մեկը, որը ծառայեց Կոնգոյի Դեմոկրատական Հանրապետությունում՝ Կինշասայի միսիայում:
Երբ ուսանողներն ավարտեն ուսումնասիրությունը, կարող եք նրանց բաժանել փոքր խմբերի, որպեզի կիսվեն իրենց սովորածով:
Ուսանողներին առաջարկեք գրել այն, ինչ իրենք սովորեցին կամ ուսումնասիրեցին այսօր, որը կօգնի մեծացնել ռահվիրա լինելու իրենց ցանկությունը: Նրանք կարող են նաև գրել, թե ինչ եղանակներով կցանկանան հետևել Փրկչի օրինակին և լինել ռահվիրա ուրիշների համար և ինչու: