Leksiyon 151: Doktrina ug mga Pakigsaad 137–138

Doktrina ug mga Pakigsaad 137

Kadtong mga Manununod sa Celestial nga Gingharian

Niadtong Enero 1836, samtang didto sa wala pa mahuman nga Templo sa Kirtland, ang Propeta Joseph Smith nakakitag panan-awon sa celestial nga gingharian. Niini nga panan-awon, nga mao karon ang Doktrina ug mga Pakigsaad 137, gipadayag sa Manluluwas ang mga kamatuoran bahin sa plano sa Langitnong Amahan. Kini nga leksiyon makatabang sa mga estudyante nga modako ang ilang pasalamat sa plano sa Langitnong Amahan sa kaluwasan.

Posibleng mga Kalihokan sa Pagkat-on

Plano sa Langitnong Amahan alang sa Iyang mga anak

Ang mga istorya mao ang usa ka paagi nga moapil ang mga estudyante diha sa kasinatian sa pagkat-on. Ikonsiderar ang pagbasa o pag-summarize sa mosunod nga parapo. Pwede usab nimong tan-awon ang bidyo nga “Joseph Smith: Ang Propeta sa Pagpahiuli,” nga anaa sa ChurchofJesusChrist.org, gikan sa time code nga 2:05 hangtod 4:21 o 11:57 hangtod 15:22, o kining duha.

Niadtong 1823, ang kalit nga kamatayon ni Alvin, ang kamagulangang anak, nakapaguol pag-ayo sa pamilyang Smith. Gihangyo sa pamilya ang usa ka lokal nga ministro sa pagdumala sa lubong ni Alvin. Kay wala man mabunyagi si Alvin nga sakop sa kongregasyon sa ministro, miingon ang klerigo nga dili maluwas si Alvin. Ang igsoon ni Joseph nga si William miingon sa ulahi, “[Ang ministro] … mipasabot og maayo nga [si Alvin] maadto sa impyerno, tungod kay si Alvin dili man miyembro sa simbahan” (sa Mga Pagtulun-an sa mga Presidente sa Simbahan: Joseph Smith [2007], 489). Sa iyang tibuok kinabuhi, nakasinati si Joseph og mas daghan pang kapildihan diha sa kamatayon uban sa iyang asawa nga si Emma, samtang ilang gilubong ang upat sa ilang unom ka masusong mga anak.

• Unsang mga pangutanaha ang naa tingali si Joseph Smith ug ang iyang pamilya bahin sa kamatayon sa ilang mga minahal?

Panan-awon sa celestial nga gingharian

Niadtong Enero 1836, nakigmiting si Joseph sa ubang mga lider sa Simbahan sa usa ka kwarto sa wala pa mahuman nga Templo sa Kirtland. Didto, nakadawat si Joseph og usa ka panan-awon sa umaabot nga celestial nga gingharian. Niini nga panan-awon, nga mao karon ang Doktrina ug mga Pakigsaad 137, gitudloan si Joseph bahin sa mahangtorong mga kamatuoran bahin sa kaluwasan sa mga anak sa Langitnong Amahan, apil ang mga masuso ug ang iyang igsoon nga si Alvin.

Samtang basahon sa mga estudyante kini nga seksiyon, pwede kamong mohunong kadiyot human matun-i ang mga bersikulo 1–6. Dapita ang mga estudyante sa pagpakigbahin kon unsay mipatigbabaw diha kanila sa paglarawan ni Joseph sa celestial nga gingharian.

Basaha ang Doktrina ug mga Pakigsaad 137:1–10, nga pangitaon ang mga kamatuoran nga gitudlo sa Manluluwas bahin sa plano sa kalipay sa Langitnong Amahan.

• Unsay gitudlo sa Manluluwas niini nga mga bersikulo nga makapahupay tingali kang Joseph Smith ug sa iyang pamilya? Nganong makapahupay man kini?

  Ang mga bersikulo 7–10 naghatag og maayong kahigayonan sa mga estudyante nga magpraktis sa pag-ila sa mga kamatuoran sa ebanghelyo, nga isulti kini gamit ang kaugalingon nilang mga pulong. Tabangi ang mga estudyante nga mailhan ug mopakigbahin sa mga pamahayag sa kamatuoran nga makita niini nga mga bersikulo, apil ang mosunod:

  • Ang tanan nga midawat unta sa ebanghelyo kon naa lang silay kahigayonan makasulod sa celestial nga gingharian (tan-awa sa mga bersikulo 7–8).

  • Hukman sa Ginoo ang matag usa kanato pinaagi sa atong mga buhat ug sa mga tinguha sa atong mga kasingkasing (tan-awa ang bersikulo 9).

  • Ang tanang bata nga namatay sa wala pa silay tulobagon maluwas diha sa celestial nga gingharian (tan-awa sa bersikulo 10).

  Ikonsiderar ang paglista niini nga mga baroganan diha sa pisara.

• Unsa kahay gibati sa pamilyang Smith bahin sa mga kamatuoran nga gitudlo sa Manluluwas niini nga mga bersikulo?

• Unsay imong gibati bahin niini nga mga kamatuoran? Sa unsang paagi kining mga kamatuoran nakaapektar sa imong pasalamat sa Langitnong Amahan ug kang Jesukristo?

Human sa igo nga gidugayon sa panahon sa pagpamalandong, dapita ang mga estudyante sa pagpili og mga kamatuoran nga gusto nilang mas tun-an pa. Pwede silang magtuon ingon nga klase, mag-inusara, o diha sa gagmay nga mga grupo. Pwedeng idrama-drama sa mga estudyante ang mga senaryo.

Ang tanang modawat sa ebanghelyo sa Manluluwas kwalipikado para sa celestial nga gingharian (tan-awa sa mga bersikulo 7–8)

Dapita ang mga estudyante nga ikonsiderar ang mosunod nga senaryo o sama niini nga nagpakita sa mga pangutana nga naa sila bahin niadtong namatay nga wala makadawat sa makaluwas nga mga ordinansa sa Langitnong Amahan.

Senaryo: Handurawa nga nakig-istorya ka sa usa ka pamilya nga parehas og sitwasyon sa pamilyang Smith niadtong namatay si Alvin.

Mga kapanguhaan sa pagtuon: Basaha ang Doktrina ug mga Pakigsaad 137:7–8; 1 Pedro 4:6; Mosiah 15:24; ug ang mosunod nga pamahayag ni Presidente Russell M. Nelson:

Sa mapuangoron nga paagi, ang mahinungdanon nga laraw sa kalipay sa Dios ug sa mahangtoron nga mga panalangin niini mahimo nga ihatag ngadto niadtong kinsa wala makabaton og kahigayonan sa pagpaminaw sa ebanghelyo diha sa pagka-mortal. Ang mga ordinansa sa templo mahimo nga buhaton sa puli nga paagi alang kanila. (Russell M. Nelson, “Celestial nga Kaminyoon,” Liahona, Nob. 2008, 93)

Mga Pangutana nga Pagahisgotan:

• Sa unsang paagi kini nga mga kasulatan ug ang mga pagtulun-an ni Presidente Nelson makatabang tingali sa pamilya nga masabtan ang plano sa Langitnong Amahan alang sa Iyang mga anak?

• Sa unsang mga paagi makaapektar kini nga kamatuoran sa imong pagbati bahin sa Langitnong Amahan, kang Jesukristo, ug sa plano sa kaluwasan?

Pagahukman sumala sa atong mga binuhatan ug sa mga tinguha sa atong mga kasingkasing (tan-awa sa bersikulo 9)

Duha ka senaryo ang gihatag aron tabangan ang mga estudyante nga mabati ang kaimportante niini nga kamatuoran. Pwedeng mopili ang mga estudyante og senaryo nga hisgotan o maghimog kaugalingon nilang senaryo nga nagpakita sa ilang mga pangutana. Ang tumong niini nga kalihokan anaa diha sa wala makab-ot nga matarong mga tinguha. Kon para ninyo makabenepisyo ang mga estudyante gikan sa pagtuon kon unsaon kita paghukom sa Ginoo, dapita silang basahon ang Alma 41:3–7.

Mga senaryo:

• Nabalaka si Lorenzo nga basin wala na gayod siyay kahigayonan nga makakitag mahangtorong kauban ug magminyo diha sa templo.

• Si Amy lang ang miyembro sa Simbahan sa iyong pamilya. Nabalaka siya nga dili siya maselyo sa iyang mga ginikanan.

Mga kapanguhaan sa pagtuon: Rebyoha ang Doktrina ug mga Pakigsaad 137:9 ug kini nga pamahayag ni Presidente Russell M. Nelson:

Kadto diayng wala maminyo niining kinabuhia o kadtong dili maselyo sa ilang mga ginikanan niining kinabuhia? Nasayod kita nga ang Ginoo mohukom sa matag usa kanato sumala sa mga tinguha sa atong mga kasingkasing, ingon man usab sa atong mga buhat, ug nga ang panalangin sa kahimayaan ihatag sa tanan nga angayan. (Russell M. Nelson, “Kaluwasan ug Kahimayaan,” Liahona, Mayo 2008, 10)

Mga Pangutana nga Pagahisgotan:

• Unsay kahulogan para nimo nga hukman kita sa Ginoo pinaagi sa atong mga binuhatan ug sa tinguha sa atong mga kasingkasing?

• Sa unsang paagi ang kamatuoran nga gitudlo sa bersikulo 9 makatabang kang Lorenzo o Amy nga mas masabtan ang plano sa Langitnong Amahan para sa matag usa sa Iyang mga anak?

• Sa unsang mga paagi makaapektar kini nga kamtuoran sa imong pagbati bahin sa gugma sa Langitnong Amahan ug sa Iyang plano sa kaluwasan?

Maluwas ang gagmayng mga bata diha sa celestial nga gingharian (tan-awa sa bersikulo 10)

Ipakigbahin ang mosunod nga senaryo, o ipakita ang istorya nga gisulti ni Presidente Boyd K. Packer (1924–2015) sa Kurom sa Napulog Duha ka Apostoles sa “And a Little Child Shall Lead Them.” Kini nga bidyo anaa sa ChurchofJesusChrist.org, ug ang istorya naa sa time code 4:40 hangtod 6:00. Dapita ang mga estudyante sa paghanduraw nga mga misyonaryo sila nga nakasugat sa eksina sa senaryo nga gihulagway.

Senaryo: Isip misyonaryo, nakaila nimo ang nagbangutan nga mga ginikanan sa dos anyos nga batang lalaki nga nalumos. Nabalaka ang mga ginikanan nga dili malangit ang maong bata kay wala kini mabunyagi.

Mga kapanguhaan sa pagtuon: Basaha ang Moroni 8:8, 11–12; Doktrina ug mga Pakigsaad 29:46; 137:10.

Mga Pangutana nga Pagahisgotan:

• Unsang mga aspeto sa plano sa Langitnong Amahan sa kaluwasan ang gusto nimong ipakigbahin niini nga mga ginikanan?

• Unsang dugang nga paghupay ang pwede nimong itanyag sa mga ginikanan diha sa senaryo?

• Sa unsang mga paagi makaapektar kini nga kamatuoran sa imong pasalamat alang sa Langitnong Amahan, kang Jesukristo, ug sa plano sa kaluwasan?

Ipakigbahin ang imong mga pagbati

Ikonsiderar ang paghatag sa mga estudyante og kahigayonan nga ipakigbahin ang ilang pagbati ug pagpamatuod sa Langitnong Amahan, kang Jesukristo, ug sa mga kamatuoran nga ilang gitun-an karon. Aron tabangan ang mga estudyante sa pagpahayag sa ilang personal nga pagsaksi, pwede nimo silang dapiton nga ipakigbahin ang ilang mga tubag sa mosunod nga mga pangutana.

• Sa unsang paagi ang mga kamatuoran nga imong nakat-onan karon magamit sa imong kasamtangan nga mga kahimtang o mga gikabalak-an?

• Sa unsang mga paagi nakaapektar ang imong nakat-onan ug gibati sa imong pasalamat alang sa Langitnong Amahan, kang Jesukristo, ug sa plano sa kaluwasan?

Dugang nga mga Kapanguhaan

Unsay mahitabo niadtong wala makadawat sa mga panalangin sa ebanghelyo niining kinabuhia?

Si Presidente Henry B. Eyring sa Unang Kapangulohan mipasabot:

Diyotay ra kaayo sa mga anak sa Dios ang makabaton niining kinabuhia sa kompleto nga panabot sa plano sa Dios, sa pag-akses sa mga ordinansa sa pagkapari ug pakigsaad nga mohimo sa maulaong gahom sa Manluluwas nga hingpit nga magamit sa atong kinabuhi. …

… Gusto gayud sa atong Langitnong Amahan nga pundukon ug panalanginan ang tanan sa Iyang pamilya. Samtang nasayod Siya nga dili tanan nila mopili nga maapil sa pundok, ang Iyang plano maghatag sa tanan Niyang mga anak sa oportunidad nga modawat o mosalikway sa Iyang pagdapit. Ug ang mga pamilya maoy sentro niini nga plano. (Henry B. Eyring, “Pagpundok sa Pamilya sa Dios,” Liahona, Mayo 2017, 20–21)

Ihatag ba sa Langitnong Amahan ang tinguha sa atong mga kasingkasing?

Si Presidente Dieter F. Uchtdorf, kanhi sa Unang Kapangulohan, nagtudlo:

Ingnon ta mo nga gidungog ang inyong mga pag-ampo. Nahibalo ang inyong Langitnong Amahan sa mga tinguha sa inyong kasingkasing. Dili ko kasulti ninyo nganong ang mga pag-ampo sa usa ka indibidwal gitubag sa usa ka paagi samtang ang mga pag-ampo sa lain gitubag sa lahi nga paagi. Apan mao kini ang akong masulti kaninyo: ang matarong nga mga tinguha sa inyong mga kasingkasing matuman.

Usahay lisod makita ang bisan unsa nga saylo sa dalan nga imong giatubang. Dili kita mapailobon ug dili kita gustong maghulat para sa umaabot nga katumanan sa mga butang nga gitinguha gayod nato. Apan, ang kamubo sa panahon niining kinabuhia gamay ra kaayo kon itandi sa kahangtoran. Ug kon makalaom lamang kita ug magbaton og hugot nga pagtuo, ug malipayong molahutay hangtod sa kataposan—didto, nianang umaabot nga maanindot nga langit, kita makabaton sa katumanan sa matarong nga mga tinguha sa atong mga kasingkasing, ug daghan pa kaayo nga dili nato kaayo masabtan karon. (Dieter F. Uchtdorf, “The Reflection in the Water” [Church Educational System fireside para sa mga young adults, Nob. 1, 2009], broadcasts.ChurchofJesusChrist.org)

Unsang sayop nga mga tradisyon ang gitul-id sa Doktrina ug mga Pakigsaad 137?

Si Elder Quentin L. Cook sa Korum sa Napulog Duha ka Apostoles mitudlo:

Nianang higayona nga si Joseph Smith nakadawat og pagpadayag ug mitukod sa Simbahan, ang kadaghanan sa mga simbahan mitudlo nga ang Pag-ula sa Manluluwas dili makaluwas sa kadaghanan sa mga katawhan. Ang sagad nga panghunahuna mao nga gamay lamang ang maluwas apan ang kadaghanan pagalaglagon sa walay kataposan nga pagsilot sa labing makalilisang ug dili mahubit sa pulong nga kagrabe. Ang talagsaon nga doktrina nga gipadayag ngadto kang Propeta Joseph Smith mipahibalo kanato og usa ka plano sa kaluwasan nga magamit sa tanang katawhan, apil niadtong wala makadungog kabahin ni Kristo niini nga kinabuhi, mga bata nga namatay sa wala pa ang panuigon sa pagkamay-tulubagon, ug niadto kinsa walay kahibalo niini [tan-awa ang Doktrina ug mga Pakigsaad 29:46–50; 137:7–10]. (Quentin L. Cook, “Ang Plano sa Atong Amahan—Paigo Alang sa Tanan,” Liahona, Mayo 2009, 36–37)

Dugang nga mga Kalihokan sa Pagkat-on

Dugang nga media

Kon makabenepisyo ang mga estudyante sa mas maayong pagsabot sa panan-awon diha sa Doktrina ug mga Pakigsaad 137 ug ang mga gikabalak-an ni Joseph bahin sa iyang igsoon nga Alvin, pwede nimong ipasalida ang bidyo nga “Pagpangalagad ni Joseph Smith: Mga Templo” (2:19).

Ang mosunod nga mga bidyo makatabang sa mga estudyante nga masabtan kon sa unsang paagi ang mga baroganan sa plano sa kaluwasan makapahupay sa kahadlok sa kamatayon ug sa kasakit nga mawad-an og minahal sa kinabuhi: “If We Are Well Prepared, Death Brings No Terror” (1:10) ug “Rise” (1:42).