Leksiyon 152: Doktrina ug mga Pakigsaad 137–138

Doktrina ug mga Pakigsaad 138, Bahin 1

Ang Panan-awon sa Pagbisita sa Manluluwas ngadto sa Kalibotan sa mga Espiritu

Tungod sa grabeng kaguol tungod sa kamatayon sa minahal nga mga sakop sa pamilya ug sa kadaot tungod sa Unang Gubat sa Kalibotan ug sa tibuok kalibotang pandemya sa trangkaso, si Presidente Joseph F. Smith nangitag kahupayan diha sa mga kasulatan. Samtang iyang gipamalandongan ang mga tudling gikan sa 1 Pedro 3–4, nakadawat siyag mahimayaong panan-awon sa mga paningkamot sa Manluluwas sa pagpangalagad sa kalibotan sa mga espiritu tali sa Iyang kamatayon ug Pagkabanhaw. Ang panan-awon ni Presidente Smith mao na karon ang Doktrina ug mga Pakigsaad 138. Kini nga leksiyon makatabang sa mga estudyante nga masabtan kon sa unsang paagi ang Manluluwas nagtanyag og kaluwasan sa mga anak sa Langitnong Amahan diha sa kalibotan sa mga espiritu.

Posibleng mga Kalihokan sa Pagkat-on

Asa kita moadto kon mamatay kita?

Dapita ang mga estudyante nga pamalandongan ang mosunod nga senaryo o maghimog senaryo nga haom sa ilang mga panginahanglan. Ang katuyoan sa senaryo mao ang pagtabang sa mga estudyante sa pagsusi sa ilang nahibaloan bahin sa kalibotan sa mga espiritu. Pwedeng ipakigbahin sa mga estudyante kon unsay ilang nasabtan nga mahitabo niadtong midawat ug wala midawat sa ebanghelyo ni Jesukristo.

Human sa lubong sa iyang Lola Roberts, giingnan ka ni Julie nga namatay ang iyang Lola ug Lolo Roberts nga ang duha wala mabunyagi sa Ang Simbahan ni Jesukristo sa mga Santos sa Ulahing mga Adlaw. Ang lain pa niyang mga apohan (si Lola ug Lolo Jones) namatay nga matinud-anon ug tibuok kinabuhing mga miyembro sa Simabahan. Gipangutana ka ni Julie, “Unsa may mahitabo sa akong mga apohan nga wala mabunyagi?”

Pamalandongi kon unsay imong nahibaloan bahin sa kalibotan sa mga espiritu.

• Unsa ka kamasaligon nga mopakigbahin kang Julie sa mga kamatuoran bahin sa kalibotan sa espiritu?

Pahinumdomi ang mga estudyante nga usa sa mga tahas sa Espiritu Santo mao ang pagpamatuod sa kamatuoran. Dapita sila nga mahimong sensitibo sa pagsaksi sa Espiritu sa mga kamatuoran bahin sa plano sa Langitnong Amahan sa kaluwasan nga ilang tun-an karong adlawa.

Ang panan-awon sa katubsanan sa mga patay

Aron makahatag og konteksto sa kasaysayan sa Doktrina ug mga Pakigsaad 138, ikonsiderar ang pagpakigbahin sa mosunod nga pamahayag ni Presidente Ballard o ang pag-summarize sa Mga Santos: Ang Istorya sa Simbahan ni Jesukristo sa Ulahing mga Adlaw, Vol. 3, Maisogon, Halangdon, ug Gawasnon, 1893–1955 [2018], 196–207.

Si Presidente M. Russell Ballard sa Korum sa Napulog Duha ka Apostoles, apo sa tuhod ni Presidente Joseph F. Smith, mipakigbahin sa mosunod bahin sa panan-awon nga mao karon ang Doktrina ug mga Pakigsaad 138.

Pagka-Oktubre 3, 1918, human nakasinati sa grabeng kasubo tungod sa minilyon nga nangamatay sa kalibotan tungod sa gubat ug sakit ingon man usab sa kamatayon sa mga sakop sa iyang kaugalingong pamilya, si Presidente Smith nakadawat og langitnong pagpadayag nga nailhan isip “ang panan-awon sa katubsanan sa mga patay.” …

Ang pinadayag nga iyang nadawat sa Oktubre 3 mihupay sa iyang kasingkasing ug nakahatag og tubag sa daghan sa iyang mga pangutana. Kita usab mahupay ug makakat-on pa kalabot sa atong kaugalingong umaabot kon kita ug ang atong mga minahal mamatay ug moadto sa kalibotan sa espiritu pinaagi sa pagtuon niini nga pinadayag ug pagpamalandong sa kamahinungdanon niini diha sa paagi sa atong pagpakabuhi matag adlaw. (M. Russell Ballard, “Ang Panan-awon sa Katubsanan sa mga Patay,” Liahona, Nob. 2018, 72–73)

Basaha ang Doktrina ug mga Pakigsaad 138:1-4, nga pangitaon ang mga kamatuoran nga gipamalandongan ni Presidente Smith dihang nadawat niya ang panan-awon.

• Unsay mipatigbabaw diha kanimo sa gipamalandongan ni Presidente Smith samtang nagtuon siya?

• Unsay nahibaloan ni Presidente Smith bahin kang Jesukristo ug sa Iyang halad nga pag-ula?

  Tabangi ang mga estudyante nga mailhan ang kamatuoran nga parehas sa mosunod: Pinaagi sa Pag-ula ni Jesukristo ug sa pagtuman sa mga baroganan sa Iyang ebanghelyo, mahimong maluwas ang matag usa sa mga anak sa Langitnong Amahan.

  Pwede nimong i-summarize ang Doktrina ug mga Pakigsaad 138:5–10 pinaagi sa pagpakigbahin nga Presidente Smith midangop sa 1 Pedro 3–4 samtang namalandong siya sa katubsanan sa mga patay nga gisaad sa maulaong sakripisyo sa Manluluwas. Pwede nimong ipasabot nga ang 1 Pedro 4:6 maoy usa ka tudling sa doktrinal nga kahanas.

• Unsay imong nahibaloan bahin kon sa unsang paagi nahimo ni Jesukristo ang kaluwasan nga posible sa tanang anak sa Langitnong Amahan?

Ang pag-adto sa Manluluwas sa kalibotan sa mga espiritu

Samtang tun-an sa mga estudyante ang panan-awon, makatabang tingali ang pagpasabot nga nakita ni Presidente Smith ang Manluluwas nga mibisita sa kalibotan sa mga espiritu tali sa panahon sa Iyang kamatayon ug sa Iyang Pagkabanhaw.

Pahinumdomi ang mga estudyante nga ang kalibotan sa mga espiritu gibahin sa paraiso ug prisohan. Kon kinahanglan, pwede nimong ipatin-aw nga ang prisohan niini nga konteksto nagtumong sa temporaryong dapit sa kalibotan sa mga espiritu alang niadtong namatay nga walay kahibalo bahin sa kamatuoran (imbes nagtumong sa prisohan o selda). Apil sa mga espiritu nga naa niini nga mga prisohan kadtong mga dili masinugtanon sa mortalidad (tan-awa ang Mga Hilisgotan ug mga Pangutana, “Impyerno,” topics.ChurchofJesusChrist.org).

Basaha ang mosunod nga pamahayag ni Presidente Dallin H. Oaks sa Unang Kapangulohan bahin sa buhat sa kaluwasan para sa tanang anak sa Langitnong Amahan diha sa kalibotan sa mga espiritu.

Ang buhat sa kaluwasan didto sa kalibotan sa mga espiritu naglangkob sa pagpalingkawas sa mga espiritu gikan sa sagad nga gitawag sa mga kasulatan nga “pagkaulipon.” Tanan diha sa kalibotan sa mga espiritu anaa sa gitawag nga pagkaulipon. (Dallin H. Oaks, “Salig sa Ginoo,” Liahona, Nob. 2019, 26)

Samtang imong tun-an ang panan-awon nga narekord sa Doktrina ug mga Pakigsaad 138, pangitaa kon sa unsang paagi naulipon ang espirituhanong mga anak sa Langitnong Amahan ug kon giunsa sila pagpagawas pinaagi sa Manluluwas ug sa Iyang maulaong sakripisyo.

Usa ka paagi sa pag-organisar sa klase mao ang pagbahinbahin nila sa grupo nga naay tagutlo ka sakop. Dapita ang mga estudyante sa pagtuon sa usa sa mosunod nga tulo ka seksiyon. Pagkahuman sa panahon sa panaghisgot sa gihatag nga mga pangutana, pwedeng ipakigbahin sa mga estudyante ang ilang nakat-onan ngadto sa ilang mga kagrupo nga laing seksiyon ang gitun-an.

Awhaga ang mga tigkat-on sa pagpakigbahin sa mga kamatuoran nga ilang nakat-onan. Alang sa pagbansay kon unsaon ni paghimo, tan-awa ang pagbansay nga nag-ulohan og “Awhaga ang mga tigkat-on sa pagpakigbahin sa mga kamatuoran nga ilang nakat-onan,” makita sa Pagpalambo sa mga Kahanas sa Magtutudlo: Pagdapit og Makugihon nga Pagkat-on. Ikonsiderar ang pagraktis sa kahanas nga “Dapita ang mga estudyante sa pagpakigbahin sa usag usa kon unsay ilang nakat-unan.”

• Unsay imong nadiskobrehan?

• Sa unsang paagi mitubag ang mga espiritu sa ebanghelyo sa Manluluwas sa mortalidad?

• Sa unsang paagi naulipon kini nga mga espiritu? Sa unsang paagi sila giluwas sa Manluluwas?

• Unsang mga kahigayonan ang gihatag sa Manluluwas sa mga espiritu diha sa paraiso? Sa bilanggoan?

• Unsaon ang atong matabang sa Manluluwas sa Iyang buluhaton?

1. Gihatagan og kagawasan sa Manluluwas ang espiritu sa paraiso.

Basaha ang Doktrina ug mga Pakigsaad 138:11–19, 23–24, 50–52, nga pangitaon kon giunsa pagluwas sa Manluluwas kadtong anaa sa paraiso sa espiritu.

2. Gihatagan og kagawasan sa Manluluwas ang mga espiritu gikan sa prisohan.

Basaha ang Doktrina ug mga Pakigsaad 138:20–22, 29–37, 57–59, nga pangitaon kon giunsa pagluwas sa Manluluwas ang kadtong anaa sa bilanggoan sa espiritu.

3. Giorganisar sa Manluluwas ang pagsangyaw sa ebanghelyo diha sa kalibotan sa mga espiritu.

Basaha ang Doktrina ug mga Pakigsaad 138:30–37, 57–59, nga pangitaon kon giunsa pag-organisar sa Manluluwas ang pagsangyaw sa ebanghelyo ngadto sa bilanggoan sa mga espiritu.

Ipakita ang pagsabot

Aron tabangan ang mga estudyante nga ipakita ang ilang pagsabot sa Doktrina ug mga Pakigsaad 138, pwedeng idrama-drama sa mga estudyante ang senaryo nga gihisgotan sa sinugdanan sa klase. Pwedeng magpulihanay ang mga estudyante sa papel ni Julie ug magpraktis kon unsaon pagtubag sa iyang mga pangutana para sa matag pares sa iyang mga apohan. Human sa panahon nga makapraktis ang mga estudyante, pwede nilang ipakigbahin sa klase ang ilang gibati ug kon sa unsang paagi nila maggamit kini nga mga pagtulun-an.

Pwede nimong ipakigbahin ang imong pamatuod sa Langitnong Amahan, kang Jesukristo, ug sa kaluwasan nga Ilang gitanyag ngadto sa mga buhi ug mga patay.

Dugang nga mga Kapanguhaan

Asa ko makakat-on og dugang bahin sa panan-awon sa kalibotan sa mga espiritu ug kaluwasan para sa mga patay?

• Mga Santos, 3:245-266

• Mga Hilisgotan ug mga Pangutana, “Kalibotan sa mga Espiritu,”topics.ChurchofJesusChrist.org

• Lisa Olsen Tait, “Susa Young Gates ug ang Panan-awon bahin sa Katubsanan sa mga Patay,” sa Kinatibuk-ang Saysay sa mga Pagpadayag [2016], 315

Unsaon nako pagtubag ang akong mga pangutana bahin sa kalibotan sa mga espiritu?

Human mapakigbahin nga daghan pa kaayo tang wala mahibaloi bahin sa kalibotan sa mga espiritu, gipasabot ni Presidente Dallin H. Oaks sa Unang Kapangulohan kon unsaon nato pagtubag ang atong mga pangutana:

Sa tanang mga pangutana bahin sa kalibotan sa mga espiritu, mosugyot ko og duha ka tubag. Una, hinumdomi nga ang Dios naghigugma sa Iyang mga anak ug mobuhat gyod sa labing maayo alang sa matag usa kanato. Ikaduha, hinumdomi kining pamilyar nga pagtulun-an sa Biblia, nga labing nakatabang kanako sa daghang wala matubag nga mga pangutana:

“Sumalig ka sa Ginoo sa bug-os mong kasingkasing; ug ayaw pagsalig sa imong kaugalingong salabutan.

“Sa tanan nimong mga dalan ilha siya, ug siya magamando sa imong mga alagianan” (Mga Proverbio 3:5–6). …

Mahimong mangutana kita sa tago bahin sa mga sirkumstansya sa kalibotan sa mga espiritu o gani maghisgut niini o sa ubang wala matubag nga mga pangutana diha sa pamilya o sa laing suod nga panagpundok. Apan dili nato itudlo o gamiton isip opisyal nga doktrina kanang wala mohaom sa mga sumbanan sa opisyal nga doktrina. Ang pagbuhat niini dili makapauswag sa buhat sa Ginoo ug gani mahimong makapaluya sa mga indibidwal sa pagpangita sa ilang kaugalingong kahupayan o paglambo pinaagi sa personal nga pagpadayag nga gihatag sa matag usa kanato diha sa plano sa Ginoo. (Dallin H. Oaks, “Salig sa Ginoo,” Liahona, Nob. 2019, 28)

Sa unsang paagi giluwas sa Manluluwas gikan sa pagkaulipon kadtong naa sa kalibotan sa mga espiritu?

Si Presidente Dallin H. Oaks sa Unang Kapangulohan mitudlo:

Ang dakong pagpadayag ni Presidente Joseph F. Smith, nga gihimong kasulatan diha sa seksyon 138 sa Doktrina ug mga Pakigsaad, nag-ingon nga ang mga matarong nga patay na, kinsa anaa sa kahimtang sa “kalinaw” (Doktrina ug mga Pakigsaad 138:22) samtang maghulat sila sa Pagkabanhaw (tan-awa sa Doktrina ug mga Pakigsaad 138:16), “nagtan-aw diha sa dugay nga pagkawala sa ilang mga espiritu gikan sa ilang mga lawas ingon sa usa ka ulipon” (Doktrina ug mga Pakigsaad 138:50).

Ang mga daotan mag-antos usab og dugang nga pagkaulipon. Tungod sa wala mahinulsoli nga mga sala, anaa sila sa gitawag ni Apostol Pedro nga “bilanggoan” sa espiritu (1 Pedro 3:19; tan-awa usab sa Doktrina ug mga Pakigsaad 138:42). Kini nga mga espiritu gihulagway isip “ginapos” o isip “mga binilanggo” (Doktrina ug mga Pakigsaad 138:31, 42) o isip “sinalikway ngadto sa kawanangan sa kangitngit” nga adunay “paghilak, ug pagdangoyngoy, ug pagpangagot sa mga ngipon” samtang maghulat sila sa pagkabanhaw ug paghukom (Alma 40:13–14).

Ang pagkabanhaw sa tanang anaa sa kalibotan sa mga espiritu gipaniguro pinaagi sa Pagkabanhaw ni Jesukristo (tan-awa sa 1 Mga Taga-Corinto 15:22), bisan mahitabo kini sa lain-laing panahon sa lain-laing mga grupo. Hangtod nianang panahona, ang gisulti sa mga kasulatan kanato mahitungod sa kalihokan sa kalibotan sa mga espiritu nakasentro sa buhat sa kaluwasan. Gamay ra ang gipadayag. Ang ebanghelyo gisangyaw ngadto sa mga ignorante, mga wala maghinulsol, ug mga masinupakon aron sila makalingkawas gikan sa ilang pagkabinilanggo ug magpadayon ngadto sa mga panalangin nga giandam sa usa ka mahigugmaong Langitnong Amahan alang kanila.

Ang pagkaulipon diha sa kalibotan sa espiritu nga masinati sa matarung nga kinabig nga mga kalag mao ang ilang panginahanglan sa paghulat—ug tingali tugotan nga moaghat—sa pagpahigayon sa ilang puli [proxy] nga mga ordinansa dinhi sa kalibotan aron sila mabunyagan ug makatagamtam sa mga panalangin sa Espiritu Santo (tan-awa ang Doktrina ug mga Pakigsaad 138:30–37, 57–58). Kining mortal nga puli [proxy] nga mga ordinansa makatabang usab kanila sa pagpadayon ubos sa katungod sa pagjkapari aron mopadaghan sa mga panon sa mga matarong nga makasangyaw sa ebanghelyo ngadto sa mga espiritu nga naa sa bilanggoan. (Dallin H. Oaks, “Salig sa Ginoo,” Liahona, Nob. 2019, 26–27)

Unsay gikinahanglan gikan niadtong naa sa bilanggoan sa mga espiritu?

Samtang nanguna sa usa ka bidyo nga paglibot sa Templo sa Rome Italy sa wala pa ang pagpahinungod niini, si Elder David A. Bednar ug Elder Ronald A. Rasband sa Kurom sa Napulog Duha ka mga Apostoles mitudlo:

Ang Manluluwas miingon, “Gawas kon ang tawo igaanak sa tubig ug sa Espiritu, dili siya makasulod sa gingharian sa [langit].” Ang bunyag pinaagi sa pagpaunlod alang sa kapasayloan sa mga sala mao ang gikinahanglang makaluwas nga ordinansa sa ebanghelyo ni Jesukristo. Ug diri sa templo, nagahimo kami og pagbunyag alang sa mga patay. Duha ka miyembro sa among Simbahan ang moadto sa bunyaganan nga nagsul-ob og puti, ug didto bunyagan sila para sa ilang mitaliwan na nga mga katigulangan. Ang bunyag alang sa mga patay gitudlo ni Apostol Pablo sa Bag-ong Tugon, ug aduna kitay oportunidad sa pagpadayon karon sa maong ordinansa sa Simbahan karon diha sa tanang templo sa tibuok kalibotan.

Usa sa dakong mga pangutana sa Kristiyanidad mao ang kon unsay mahitabo niadtong wala gyod makadungog bahin kang Jesukristo. Siya lamang ang bugtong ngalan ilawom sa langit diin ang usa ka lalaki o unsa ka babaye maluwas. Pero sa tanang nabuhi, gamay ra kaayo ang nakadungog bahin Niya, nakabaton og kahigayonan sa pagkat-on sa Iyang doktrina, ug pagdawat sa makaluwas nga ordinansa pinaagi sa pagbunyag. Nahimong posible kana pinaagi sa puli [proxy] nga pagbunyag alang sa mga patay. Naay pipila ka tawo nga mangutana kon gipugos o gipugngan ba nato ang atong mga katigulangan nga mahimong mga miyembro sa Ang Simbahan ni Jesukristo sa mga Santos sa Ulahing mga Adlaw. Ug ang tubag kay wala. Mahigugmaon ni nga tanyag. Ug naa silay kahigayonan nga dawaton o balibaran ang maong ordinansa. (David A. Bednar ug Ronald A. Rasband, sa “Two Apostles Lead a Virtual Tour of the Rome Italy Temple” [bidyo], ChurchofJesusChrist.org)

Dugang nga mga Kalihokan sa Pagkat-on

Idrama-drama ang panan-awon sa seksiyon 138

Ikonsiderar ang pagtabang sa mga estudyante nga matinahurong dramahon kon giunsa ang pagsangyaw sa ebanghelyo diha sa kalibotan sa mga espiritu. Pwede ninyong dramahon ang senaryo ni Julie gikan sa leksiyon. Pwede kamong mopili og duha ka estudyante nga mahimong iyang Lola ug Lolo Roberts, nga moadto sa bilanggoan sa mga espiritu. Ug laing grupo sa mga estudyante nga mahimong Lola ug Lolo Jones, nga moadto sa paraiso sa mga espiritu. Dapita ang mga estudyante nga nagrepresentar sa mga Jones nga mobisita sa mga Roberts aron tudloan sila sa ebanghelyo. Pagpili og laing estudyante nga mahimong si Julie ug sa iyang igsoong lalaki, nga gibunyagan diha sa templo para sa ilang mga apohan nga mga Roberts. Dayon makagawas na ang mga Roberts sa prisohan sa mga espiritu ug mosulod sa paraiso sa mga estpiritu.

Timan-i: Ang tumong niini dili ang pagpakita kinsa ang nagtudlo sa ebanghelyo niadtong anaa sa kalibotan sa espiritu; hinoon, kini ang pagpakita sa unsang paagi ang mga espiritu mibiya sa bilanggoan sa espiritu human nila nadawat ang ordinansa sa bunyag nga gipahigayon sa templo(tan-awa sa Doktrina ug mga Pakigsaad 138:31).

Pagbisita gikan sa kalibotan sa mga espiritu para sa lolo ni Presidente Nelson

Aron kompirmahon ang mga kamatuoran nga nadiskobrehan sa mga estudyante samtang nagtuon sa seksiyon 138, pwede nimong ipakigbahin ang asoy nga gipakigbahin ni Presidente Nelson bahin sa iyang lolo. Pwede nimong ipasalida ang bidyo nga “A Visit from Father” (3:20). Human sa istorya, pwede nimong pangutan-on ang mga estudyante og mga pangutana sa paghisgot nga parehas sa mosunod:

• Unsay imong nakat-onan gikan sa istorya ni Presidente Nelson?

• Unsay gitudlo kanimo niini nga asoy bahin sa plano sa Langitnong Amahan?

Pagpamalandong ug paghunahuna sa mga kasulatan

Kon makabenepisyo ang mga estudyante gikan sa panaghisgot kon sa unsang paagi ang pagpamalandong sa mga kasulatan nagdapit og pagpadayag, dapita silang basahon ang Doktrina ug mga Pakigsaad 138:1–4, 11, 29. Hangyoa sila nga pangitaon ang mga pulong nga gigamit ni Presidente Smith sa paghulagway kon giunsa niya paghimo kini nga pagtuon sa kasulatan. Tingali mailhan sa mga estudyante ang kamatuoran nga parehas sa mosunod: ang pagpamalandong sa mga kasulatan ug sa paghunahuna sa maulaong sakripisyo sa Manluluwas makatabang aron maandam kita sa pagdawat og pagpadayag gikan sa Dios.

Kon dili kaayo personal, dapita ang mga estudyante nga ipakigbahin ang ilang mga kasinatian sa pagdawat og pagpadayag dihang namalandong sa mga kasulatan. Pwede nimong ipangutana ang parehas sa mosunod:

• Sa imong hunahuna, nganong ang pagpamalandong sa mga kasulatan modala ngadto pagpadayag?

Mga kapilian nga bidyo

Kon makabenepisyo ang mga estudyante gikan sa pagkat-on og dugang bahin sa kasinatian nga mitultol sa panan-awon ni Presidente Joseph F. Smith, pwede nimong tan-awon ang “Ministry of Joseph F. Smith: A Vision of the Redemption of the Dead” (3:06).

Aron tabangan ang mga estudyante nga makita ang mga hitabo nga gihulagway diha sa seksiyon 138, ikonsiderar ang pagpasalida sa bidyo nga “To This End Was I Born” gikan sa time code 21:20 hangtod 24:23. Gipakita niini ang pagsulod sa Manluluwas ngadto sa kalibotan sa mga espiritu human sa Iyang Paglansang sa Krus.

Aron matabangan ang mga estudyante nga makasabot og dugang bahin sa kon unsay nahitabo sa atong mga espiritu human sa kamatayon, ikonsiderar ang pagpasalida sa bidyo nga “What Happens to Our Bodies and Spirits after We Die?” (4:19).

Aron matabangan ang mga estudyante nga masabtan ang pagpalingkawas sa Manluluwas sa mga anak sa Langitnong Amahan gikan sa pagkaulipon, pwede nimong ipasalida ang “Handel’s Messiah: Debtor’s Prison” (3:35).