Leksiyon 153: Doktrina ug mga Pakigsaad 137–138

Doktrina ug mga Pakigsaad 138, Bahin 2

“Naandam sa Pag-anhi sa Tukma nga Panahon sa Ginoo”

Isip kabahin sa iyang panan-awon sa kalibotan sa mga espiritu, nakita ni Presidente Joseph F. Smith ang daghang hamili ug halangdong mga espiritu sa Langitnong Amahan. Nakita niya ang karaang mga propeta nga matinud-anong mihimo sa buluhaton sa Ginoo. Nakita usab niya ang uban pa nga gireserba sa Ginoo nga matawo sa ulahing mga adlaw aron magtukod og mga templo ug mopahigayon og mga ordinansa alang sa namatay na. Ang ingon nga mga ordinansa nahimong posible pinaagi sa buhat sa templo ug family history. Kini nga leksiyon makatabang sa mga estudyante nga mobati nga madasig sa pag-apil sa buhat sa templo ug family history.

Posibleng mga Kalihokan sa Pagkat-on

Akong importante nga buhat

Ang mosunod nga mga pag-aghat makatabang sa mga estudyante sa paghunahuna bahin sa importanteng buluhaton nga ipahimo kanila sa Langitnong Amahan. Human sa panahon sa pagpamalandong ug pagsulat, pwedeng ipakigbahin sa andam nga mga estudyante ang ilang mga tubag.

• Pipila sa labing importanteng mga butang nga akong gihimo sa akong kinabuhi mao ang …

• Pipila sa labing importanteng mga butang nga akong mahimo sa akong kinabuhi naglakip sa …

• Gipadala ko sa Langitnong Amahan sa yuta niining panahona aron …

Dapita ang mga estudyante sa pagtinguha og personal nga pagpadayag aron mahibaloan ang pipila sa importanteng mga butang nga gusto sa Langitnong Amahan ug ni Jesukristo nga himoon nila. Pwede usab tun-an sa mga estudyante sa ang patriyarkal nga mga panalangin sa ilang panimalay aron makakat-on og dugang bahin niini.

Pinili nga mga espiritu kinsa gitagana sa pagtungha diha sa kahingpitan sa mga panahon

Dapita ang mga estudyante nga ipakigbahin ang ilang nahinumdoman bahin sa plano sa Langitnong Amahan gikan sa panan-awon ni Presidente Joseph F. Smith sa kalibotan sa mga espiritu (tan-awa sa Doktrina ug mga Pakigsaad 138:11–60).

Tabangi ang mga estudyante nga masabtan nga diha sa Doktrina ug mga Pakigsaad 138:38–49, 53, nakita ni Presidente Joseph F. Smith ang daghang hamili ug halangdong mga espiritu. Pwede nimong dapiton ang mga estudyante nga magpunting sa mga tawo nga nakita ni Presidente Smith sa iyang panan-awon.

Basaha ang Doktrina ug mga Pakigsaad 138:53–56, nga mangita sa buhat nga giandam sa Langitnong Amahan sa hamiling mga espiritu aron matuman sa ulahing mga adlaw.

• Unsang mga hugpong sa mga pulong niini nga mga bersikulo ang tingali nagtumong nimo?

• Unsay imong nakat-onan bahin sa buhat sa Langitnong Amahan para nimo?

• Unsaon nimo pag-summarize kining mga bersikulo ngadto sa usa ka pamahayag sa kamatuoran?

  Samtang i-summarize sa mga estudyante kini nga mga bersikulo, tabangi sila nga mailhan ang kamatuoran nga sama sa mosunod: Nagtagana ang Langitnong Amahan og pinili nga mga espiritu nga magtrabaho sa ubasan sa Ginoo alang sa kaluwasan sa Iyang mga anak.

• Unsa ang pipila ka paagi nga kita makatrabaho diha sa ubasan sa Ginoo aron makatabang nga maluwas ang Iyang mga anak?

Kon dili kini hisgotan sa mga estudyante, pwede nimong makuha ang ilang atensiyon ngadto sa bersikulo 54. Tabangi sila nga makaila nga makatrabaho kita sa ubasan sa Ginoo pinaagi sa pag-apil sa mga ordinansa sa templo alang sa mga patay. Pwede nimong pahinumdoman ang mga estudyante nga ang pagpahigayon sa mga ordinansa sa templo alang sa mga tawo sa laing habig sa tabil mao ang usa ka paagi nga makatabang kita sa pagpundok sa Israel.

Ang mosunod nga pamahayag makatabang sa mga estudyante nga mailhan nga magamit diha kanila ang Doktrina ug mga Pakigsaad 138:53–56. Aron sa pagbansay sa pag-link sa Librarya sa Ebanghelyo, makahimog link ang mga estudyante tali sa mga bersikulo sa kasulatan ug pamahayag.

Si Presidente Russell M. Nelson mipamatuod:

Sa tanang katawhan nga nakapuyo niining kalibotana, kita ang makahimo sa pag-apil niini nga kalihokan sa kataposan, dakong panagtapok. Makapahinam gayod kana!

Gireserba sa atong Langitnong Amahan ang daghan sa Iyang labing halangdong mga espiritu—tingali moingon ko nga labing nindot Niya nga team—alang niining kataposang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo! (Russell M. Nelson ug Wendy W. Nelson, “Paglaum sa Israel” [tibuok kalibotan nga debosyonal sa kabatan-onan, Hunyo 3, 2018], ChurchofJesusChrist.org)

Ang mosunod nga mga pangutana makatabang sa mga estudyante sa pagsusi sa ilang gibati karon bahin sa pag-apil sa buhat sa templo ug family history. Human sa igong panahon sa pagpamalandong, pwedeng ipakigbahin sa andam nga mga estudyante ang ilang mga hunahuna ug mga pagbati.

• Unsay imong gibati sa pagkahibalo nga ang Ginoo nag-andam kanimo sa pagtabang sa pagpundok sa Israel pinaagi sa buhat sa templo ug family history?

• Unsa kamadasigon ang imong gibati nga moapil sa buhat sa templo ug family history? Nganong ingon niini ang imong gibati?

Sa leksiyon nga “Doktrina ug mga Pakigsaad 127–128, Bahin 2,” giawhag ang mga estudyante nga moapil sa buhat sa templo ug family history. Pwede nimong dapiton ang mga estudyante nga ipakigbahin kon unsay ilang nahimo ug kon giunsa sila pagpanalangin sa Ginoo.

Gitagana aron motabang sa pagpundok sa Israel pinaagi sa buhat sa templo ug family history

Ang mosunod mao ang usa ka paagi aron tabangan ang mga estudyante nga mahimong responsable sa ilang pagkat-on.

Dapita sila sa paghimo og mensahe nga pwede nilang ipakigbahin aron madasig ang mga tawo nga moapil sa buhat sa templo ug family history. Pwedeng usa kini ka flyer, post sa social media, bidyo nga message, o laing matang sa imbitasyon. Tugoti ang mga estudyante sa pagpili sa matang sa mensahe nga himoon.

Ang materyal sa handout nga “Gitagana aron Motabang sa Pagpundok sa Israel pinaagi sa Buhat sa Templo ug Family History” makahatag og mga ideya sa mga estudyante kon unsay iapil sa ilang mensahe. Dapita ang mga estudyante nga tun-an kini nga materyal ayha mohimo og ilang mensahe. Pwedeng pilion sa mga estudyante nga magtuon sa indibidwal o sa gagmayng grupo.

Gitagana aron Motabang sa Pagpundok sa Israel pinaagi sa Buhat sa Templo ug Family History

1. Basaha ang Doktrina ug mga Pakigsaad 138:57-59, nga mangita kon sa unsang paagi kadtong anaa sa kalibotan sa mga espiritu matubos.

2. Basaha ang mosunod nga pamahayag ni Presidente Henry B. Eyring sa Unang Kapangulohan. Pangitaa kon unsay gibati sa Manluluwas niadtong kinsa moapil sa buhat sa templo ug family history.

Hunahunaa ang Manluluwas kon mahimamat nimo Siya. Maangkon nimo kana nga interbiyo. Iyang gibayran ang bili sa mga sala nimo ug sa tanang espiritu nga mga anak sa Langitnong Amahan. Siya si Jehova. Gipadala niya si Elias. Iyang gihatag ang gahom sa pagkapari sa pagselyo ug pagpanalangin tungod sa hingpit nga gugma. Ug misalig Siya nimo pinaagi sa pagtugot nga imong madungog ang ebanghelyo sa imong tibuok kinabuhi, nga naghatag nimo og higayon nga dawaton ang obligasyon nga itanyag kini ngadto niadtong imong mga katigulangan nga wala makabaton sa imong bililhon nga kahigayonan. Hunahunaa kon unsa ka dako ang Iyang pasalamat niadtong nagsakripisyo sa pagtrabaho ug sa hugot nga pagtuo aron makit-an ang mga ngalan sa ilang mga katigulangan ug niadtong nahigugma kanila ug Kaniya igo nga makatanyag kanila og kinabuhing dayon diha sa mga pamilya, ang labing dako sa tanang gasa sa Dios. Siya mitanyag kanila og walay kinutoban nga sakripisyo. Iyang higugmaon ug pasalamatan kadtong nagsakripisyo sa bisan unsang bili nga ilang mahimo aron tugotan ang ilang mga katigulangan sa pagpili sa Iyang tanyag sa kinabuhing dayon. (Henry B. Eyring, “Mga Kasingkasing Nahiusa sa Pagkabugkos,” Liahona, Mayo 2005, 78–79)

3. Sa imong hunahuna, sa unsang paagi ang pag-apil sa buhat sa templo ug family history makatabang nimo sa pagsunod sa ehemplo ni Jesukristo?

4. Naa bay personal nga kasinatian, kasulatan, o pamahayag sa usa ka lider sa Simbahan nga gusto nimong ipakigbahin?

Kon makabenepisyo ang mga estudyante nga makita ang bidyo sa pamahayag ni Presidente Eyring, pwede nimong ipasalida ang bidyo nga “Mga Kasingkasing Nahiusa sa Pagkabugkos” gikan sa time code nga 10:21 hangtod 11:29 sa ChurchofJesusChrist.org.

Kon paminaw nimo nga madasig ang imong mga estudyante sa gisaad nga mga panalangin tungod sa pag-apil sa buhat sa templo ug family history, pwede nimong ipatan-aw nila ang usa o duha niini nga mga bidyo: “Ang Gisaad nga mga Panalangin sa Buhat sa Templo ug Family History” (3:26) ug “Ang Gisaad nga mga Panalangin sa Buhat sa Templo ug Family History 2” (4:04).

Pwede usab nimong hisgotan kon giunsa pagpadako sa Ginoo ang atong abilidad sa paggamit sa mga templo ug teknolohiya aron makatabang sa buhat sa family history. Naay mga pamahayag diha sa “Dugang nga mga Kapanguhaan” nga nagtudlo niini.

• “Mga Kasingkasing Nahiusa sa Pagkabugkos”

• “Ang Gisaad nga mga Panalangin sa Buhat sa Templo ug Family History”

• “Ang Gisaad nga mga Panalangin sa Buhat sa Templo ug Family History 2”

Nadasig sa pag-apil sa buhat sa templo ug family history

Hatagi og panahon ang mga estudyante nga maghimo ug magpakigbahin og mensahe aron motabang nga madasig ang mga tawo nga moapil sa buhat sa templo ug family history. Dasiga ang mga estudyante nga ipakigbahin ang ilang mga mensahe sa panimalay.

Ang mosunod nga mga pangutana makatabang sa mga estudyante sa pagpamalandong sa kaugalingon nilang kadasig sa pag-apil sa buhat sa templo ug family history. Ang pagtubag sa mga pangutana diha sa ilang mga journal maoy usa ka paagi nga madapit sa mga estudyante ang Espiritu Santo sa pagtudlo kanila. Dapita ang andam nga mga estudyante nga ipakigbahin ang ilang mga tubag nganha sa klase.

• Sa unsang paagi ang imong nakat-onan o gibati sa imong pagtuon sa Doktrina ug mga Pakigsaad 138 nakaimpluwensiya sa imong kadasig nga moapil sa buhat sa templo ug family history?

• Ngano kaha nga ang pag-apil sa buhat sa templo ug family history mahimong pipila sa labing importanteng buluhaton nga imong mahimo?

Dugang nga mga Kapanguhaan

Unsa ang gihatag sa Ginoo aron makatabang kanato nga mapahigayon ang buhat sa templo ug family history?

Si Elder Quentin L. Cook sa Korum sa Napulog Duha ka Apostoles mitudlo:

Ang kombinasyon sa pagdaghan sa mga templo ug sa pag-uswag sa teknolohiya aron mabuhat nato ang atong sagrado nga responsibilidad sa family history alang sa atong mga katigulangan nakapahimo niini nga labing bulahan nga panahon sa tibuok kasaysayan. Malipayon ako sa talagsaong kamatinud-anon sa atong mga batan-on sa pag-indexing ug sa pagpangita sa ilang mga katigulangan ug dayon sa pagbuhat sa pagbunyag ug pagkompirma diha sa templo. Kamo tinuod nga apil sa gipanagna nga mga manluluwas sa Bukid sa Zion. (Quentin L. Cook, “Hunahunaa ang Inyong Kaugalingon nga anaa sa Templo,” Liahona, Mayo 2016, 98)

Si Elder Neil L. Andersen sa Korum sa Napulog Duha ka Apostoles mitudlo:

Ang Ginoo mihatag sa inyong henerasyon nga adunay mas daghan sa Iyang balaang mga templo nga magamit kay sa uban pang henerasyon sa kasaysayan sa kalibutan.

Nakasulay na ba kamo nga magbarug sulod sa templo, nagsinina og puti, naghulat aron mopahigayon og bunyag? Unsay inyong gibati? Dunay pagbati sa kabalaan diha sa templo. Ang kalinaw sa Manluluwas mobuntog sa nagliyok-liyok nga mga alimpulos sa kalibutan.

Ang inyong pagbati sulod sa templo usa ka sumbanan sa unsay gusto ninyong bation sa inyong kinabuhi.

Pangitaa ang inyong mga apohan ug inyong kaparyentihan nga nag-una kaninyo. Dad-a ang ilang mga ngalan ngadto sa templo. (Neil L. Andersen, “Espirituhanong mga Alimpulos,” Liahona, Mayo 2014, 20–21)

Unsay gibati sa atong mga katigulangan bahin sa buhat sa templo ug family history?

Si Presidente Brigham Young (1801–77) mitudlo:

Unsa sa inyong pagtuo ang isulti sa mga amahan kon sila mamulong gikan sa mga patay? Dili ba sila moingon, “Ania kami gibutang dinhi sulod sa liboan ka mga tuig, dinhi niining bilanggoan nga balay, naghulat niini nga dispensasyon nga moabot?” … Unsa ang ilang ihung-hong sa atong mga dunggan? Ngano, kon sila aduna pay gahum ang mga dugdug sa langit mosulod sa atong mga dunggan, kon kita makaamgo sa kaimportante sa buhat nga atong gibuhat. Ang tanang mga anghel sa langit nagtan-aw niining pipila ka mga katawhan, ug nag-awhag kanila sa kaluwasan sa tawhanong pamilya. (Mga Pagtulun-an sa mga Presidente sa Simbahan: Brigham Young [1997], 356)

Dugang nga mga Kalihokan sa Pagkat-on

Sa video nga “Sesyon sa Pagpangulo sa RootsTech 2017: Elder M. Russell Ballard,” gikan sa time code nga 0:00 hangtod 5:58, gipakigbahin ni Presidente Ballard ang usa ka kasinatian sa iyang mga katigulangan nga nagpakita kon unsaon pagtabang sa Ginoo kadtong miapil sa buhat sa templo ug family history.

Mga Bidyo

Sa iyang pakigpulong nga “Mga Kasingkasing Nahiusa sa Pagkabugkos,” si Presidente Henry B. Eyring namulong bahin sa panan-awon ni Presidente Smith ug sa mga misyonaryo nga nagsangyaw sa ebanghelyo ngadto sa atong mga katigulangan. Kon imong ipakita ang bahin sa bidyo panahon sa leksiyon, pwede nimong iapil ang time code nga 7:11 hangtod 11:29.

Doktrina ug mga Pakigsaad 138:53–56. Paggamit sa mga cross-reference aron masabtan ang mahinungdanon nga hugpong sa mga pulong

Kini nga ideya makatabang sa mga estudyante nga magbansay sa paggamit sa mga footnote ug mga cross-reference aron masabtan ang mga kasulatan. Diha sa pisara, pwede nimong isulat ang mosunod nga mga hugpong sa mga pulong gikan sa Doktrina ug mga Pakigsaad 138:53–56 uban ang mga cross-reference niini. Dapita ang mga estudyante nga ipakigbahin kon sa unsang paagi ang doktrina nga gitudlo sa cross-reference nakadugang og kahulogan sa hugpong sa mga pulong sa kasulatan. Pwedeng idugang sa mga estudyante kini nga mga kasulatan isip mga cross-reference o mga link sa ilang mga kasulatan. Pwede usab nimong dapiton ang mga estudyante nga tan-awon kon anaa ba sa mga footnote kini nga mga bersikulo. Pwede usab nilang tan-awon ang ubang mga bersikulo nga nalista sa mga footnote.

• “Kahingpitan sa mga panahon” (Doktrina ug mga Pakigsaad 138:53)—Mga Taga-Efeso 1:10; Doktrina ug mga Pakigsaad 128:18

• “Pagpahiluna sa mga sukaranan sa dako nga buluhaton sa ulahing adlaw” (Doktrina ug mga Pakigsaad 138:53)—Doktrina ug mga Pakigsaad 64:33

• “Ang mga hamili ug halangdon kinsa gipili sa sinugdanan” (Doktrina ug mga Pakigsaad 138:55)—Abraham 3:22–23

• “Naandam sa pag-anhi sa tukma nga panahon sa Ginoo” (Doktrina ug mga Pakigsaad 138:56)—Mga Buhat 17:26

Doktrina ug mga Pakigsaad 138:56. “Naandam sa pag-anhi sa tukma nga panahon sa Ginoo”

Pwede nimong tabangan ang mga estudyante nga mopunting ngadto sa Manluluwas pinaagi sa pagdiskobre sa mga paagi nga sila Iyang “naandam sa pag-anhi sa tukma nga panahon sa Ginoo” (Doktrina ug mga Pakigsaad 138:56). Pwede nimong hisgotan kon sa unsang paagi sila gitudloan ug giandam “sa wala pa sila matawo.” Pwede usab nimong dapiton ang mga estudyante nga ilista ang unsay gihatag sa Ginoo aron motabang kanato nga matuman ang atong balaanong misyon sa pagpangita sa atong mga katigulangan ug pagpahigayon sa mga ordinansa sa templo para nila. Pwede nimong gamiton ang mga pamahayag ni Elder Quentin L. Cook ug Elder Neil L. Andersen diha sa “Dugang nga mga Kapanguhaan” aron tabangan ang mga estudyante sa ilang listahan. Hisgoti kon sa unsang paagi ang pag-apil sa buhat sa templo ug family history makaimpluwensiya sa ilang relasyon sa Langitnong Amahan ug kang Jesukristo.