Lesona 151: Mataupu Faavae ma Feagaiga 137–138

Mataupu Faavae ma Feagaiga 137

O I Latou o E o le a Mautofi i le Malo Selesitila

Ia Ianuari 1836, a o i ai i le Malumalu e lei mae’a o Katelani, sa vaaia ai e le Perofeta o Iosefa Samita se faaaliga vaaia o le malo selesitila. I lenei faaaliga vaaia, lea ua avea nei ma Mataupu Faavae ma Feagaiga 137, na faaali mai ai e le Faaola upumoni e uiga i le fuafuaga a le Tama Faalelagi. E mafai ona fesoasoani lenei lesona i tagata aoga e faateleina ai lo latou talisapaia o le fuafuaga o le faaolataga a le Tama Faalelagi.

Gaoioiga E Ono Mafai Ona Aoao Ai

O le fuafuaga a le Tama Faalelagi mo Ana Fanau uma

O tala o se tasi lea o auala e faaauai ai tagata aoga i le feagai ai ma le aoaoina. Mafaufau e faitau pe aotele le parakalafa lenei. E mafai foi ona e matamata i le vitio “Iosefa Samita: O Le Perofeta o le Toefuataiga,” o loo maua i ChurchofJesusChrist.org, mai le faailo taimi 2:05 i le 4:21 po o le 11:57 i le 15:22, po o mea uma e lua.

I le 1823, o le maliu faafuasei o Alavini, le atalii matua, na mafatia tigaina ai le aiga o Samita. Sa talosagaina e le aiga se faifeau i le lotoifale e faatautaia le falelauasiga o Alavini. Talu ai o Alavini e le o se tagata na papatiso i le aulotu a le faifeau, na ta’u mai ai e le faifeau o Alavini e le mafai ona faaolaina. Na toe faapea mai Viliamu le uso Iosefa, “Na matua ta’u mai ma le malosi e [le faifeau] … o [Alavini] ua alu i seoli, aua o Alavini e le o se tagata o se ekalesia” (i le Aoaoga a Peresitene o le Ekalesia: Iosefa Samita [2007], 401–3). I lona soifuaga atoa, sa sili atu ona lagona e Iosefa ma lona faletua o Ema le faanoanoa, a o la tanuina le toafa o le la fanau pepe e toaono.

• O a ni fesili atonu na i ai ia Iosefa Samita ma lona aiga e uiga i le maliliu o e pele ia i latou?

O se faaaliga o le malo selesitila

Ia Ianuari 1836, sa faia ai e Iosefa se fonotaga ma isi taitai o le Ekalesia i se potu o le Malumalu o Katelani e lei maea ona fausia. Na maua ai iina e Iosefa Samita se faaaliga vaaia i le malo selesitila. I lenei faaaliga vaaia, ua avea nei ma Mataupu Faavae ma Feagaiga 137, na aoaoina ai Iosefa i upumoni e faavavau e uiga i le faaolataga o fanau a le Tama Faalelagi, e aofia ai tamaiti pepe ma lona uso o Alavini.

A o faitau e tagata aoga lenei vaega, e mafai ona e taofi pe a uma ona suesue fuaiupu 1–6. Valaaulia i latou e faasoa mai mea e tulaga ese ia i latou mai le faamatalaga a Iosefa e uiga i le malo selesitila.

Faitau le Mataupu Faavae ma Feagaiga 137:1–10, ma vaavaai mo upumoni na a’oa’o atu e le Faaola e uiga i le fuafuaga o le fiafia a le Tama Faalelagi.

• O le a le mea ua aoao mai e le Faaola i nei fuaiupu atonu na faamafanafanaina ai Iosefa Samita ma lona aiga? Aiseā atonu na faamafanafanaina ai?

  Ofuaiupu 7–10 ua tuuina mai ai se avanoa lelei mo tagata aoga e faataitai ai le faailoaina o upumoni o le talalelei, ma tau mai i a latou lava upu. Fesoasoani i tagata aoga e faailoa ma faasoa mai faamatalaga o upumoni o loo maua i nei fuaiupu, e aofia ai mea nei:

  • O i latou uma o e semanu e mauaina le talalelei pe ana latou maua le avanoa o le a ulufale atu i le malo selesitila (tagai i le fuaiupu 7–8).

  • O le a faamasinoina i tatou taitoatasi e le Alii i a tatou galuega ma manaoga o o tatou loto (tagai i le fuaiupu 9).

  • O tamaiti uma e maliliu a’o le’i oo i le matua e mafai ona tali atu ai mo i latou lava, o le a faasaoina i le malo selesitila (tagai i le fuaiupu 10).

  Mafaufau e lisi nei mataupu faavae i luga o le laupapa.

• O a ni lagona o le aiga o Samita e uiga i upumoni na aoao mai e le Faaola i nei fuaiupu?

• O le a sou lagona e uiga i nei upumoni? E mafai faapefea e nei upumoni ona aafia ai lou talisapaia mo le Tama Faalelagi ma Iesu Keriso?

A maea se taimi talafeagai mo le mafaufau loloto, valaaulia tagata aoga e filifili upumoni latou te mananao e suesue loloto atili i ai. E mafai ona latou suesue o se vasega, ta’ito’atasi, pe i ni vaega toalaiti. E mafai e tagata aoga ona faatino faata’ita’i ia tulaga.

O i latou uma o e taliaina le talalelei a le Faaola e agavaa mo le malo selesitila (tagai i fuaiupu 7–8)

Valaaulia tagata aoga e mafaufau i le tulaga lenei po o se mea faapena e atagia mai ai a latou fesili e uiga ia i latou o e maliliu e aunoa ma le mauaina o sauniga faaola a le Tama Faalelagi.

Tulaga: Vaai faalemafaufau o loo e talanoa ma se aiga i se tulaga e pei o le aiga o Samita i le taimi na maliu ai Alavini.

Punaoa mo suesuega: Faitau le Mataupu Faavae ma Feagaiga 137:7–8; 1 Peteru 4:6; Mosaea 15:24; ma le saunoaga lenei a Peresitene Russell M. Nelson:

O le alofa mutimutivale, o le fuafuaga sili o le fiafia a le Atua ma ona faamanuiaga e faavavau e mafai ona tuuina atu ia i latou o e sa lei maua le avanoa e faalogo ai i le talalelei i le olaga nei. E mafai ona faia sauniga o le malumalu e sui ai mo i latou. (Russell M. Nelson, “Faaipoipoga Faaselesitila,” Liahona, Nov. 2008, 94)

Fesili e talanoaina:

• E mafai faapefea e nei mau ma aoaoga a Peresitene Nelson ona fesoasoani i le aiga ia malamalama i le fuafuaga a le Tama Faalelagi mo Ana fanau?

• O a ni auala e aafia ai ou lagona e uiga i le Tama Faalelagi, Iesu Keriso, ma le ata o le faaolataga?

E faamasinoina e tusa ai ma a tatou galuega ma manaoga o o tatou loto (tagai i le fuaiupu e 9)

E lua tulaga ua saunia e fesoasoani ai i tagata aoga ia lagona le taua o lenei upumoni. E mafai e tagata aoga ona filifili se tulaga e talanoaina pe fatu ai a latou lava tulaga e atagia mai ai a latou fesili. O le taula’iga o lenei gaoioiga o manaoga amiotonu e le’i faataunuuina. Afai e te manatu o le a manuia tagata aoga mai le suesueina o le auala o le a faamasinoina ai i tatou e le Alii, valaaulia i latou e faitau le Alema 41:3–7.

Ata Faataitai:

• Ua popole Lorenzo atonu na te le toe maua se avanoa e maua ai se soa e faavavau ma faaipoipo ai i le malumalu.

• Ua nao Amy le sui o lona aiga e auai i le Ekalesia. E popole o ia i le le faamauina i ona matua.

Punaoa mo suesuega: Toe faamanatu le Mataupu Faavae ma Feagaiga 137:9 ma le saunoaga lenei a Peresitene Russell M. Nelson:

Ae faapefea i latou o e e le mafai ona faaipoipo i lenei olaga po o i latou e le mafai ona faamauina i o latou matua i lenei olaga? Tatou te iloa o le a faamasinoina e le Alii i tatou taitoatasi e tusa ma manaoga o o tatou loto, faapea ai ma a tatou galuega, ma o faamanuiaga o le faaeaga o le a tuuina atu ia i latou uma o e agavaa. (Russell M. Nelson, “Faaolataga ma le Faaeaga,” Liahona, Me 2008, 10)

Fesili e talanoaina:

• O le a le uiga ia te oe o le a faamasinoina i tatou e le Alii i a tatou galuega ma manaoga o o tatou loto?

• E mafai faapefea e le upumoni o loo aoaoina i le fuaiupu e 9 ona fesoasoani ia Lorenzo po o Amy ia malamalama lelei ai i le fuafuaga a le Tama Faalelagi mo Ana fanau taitoatasi?

• O a ni auala e aafia ai ou lagona e uiga i le alofa o le Tama Faalelagi ma Lana fuafuaga o le faaolataga?

E faaolaina tamaiti laiti i le malo selesitila (tagai i le fuaiupu 10)

Faasoa atu le vaaiga lenei, pe faaali atu le tala na faamatalaina e Peresitene Boyd K. Packer (1924–2015) o le Korama a Aposetolo e Toasefululua i le “Ma o le A Taitaiina i Latou e se Tamaitiiti Laitiiti.” O loo maua le vitio i le ChurchofJesusChrist.org, ma o le tala e mai le faailo taimi 4:40 i le 6:00. Valaaulia tagata aoga e vaai faalemafaufau o i latou o faifeautalai na tau atu i le vaaiga na faamatalaina.

Tulaga: I le avea ai ma se faifeautalai, e te feiloai i matua faavauvau o se tamaitiiti e lua tausaga le matua o lē na malemo. Ua popole matua ona e le mafai ona alu le tamaitiiti i le lagi ona e lei papatisoina lava o ia.

Punaoa Su’esu’e: Faitau le Moronae 8:8, 11–12; Mataupu Faavae ma Feagaiga 29:46; 137:10.

Fesili e talanoaina:

• O a vaega o le ata o le faaolataga a le Tama Faalelagi o le a e faasoa atu i nei matua?

• O le a se isi faamafanafanaga e mafai ona e ofoina atu i matua i le vaaiga faataitai?

• E faapefea e lenei upumoni ona aafia ai lou talisapaia o le Tama Faalelagi, Iesu Keriso, ma le ata o le faaolataga?

Faasoa ou lagona

Mafaufau e tuu atu i tagata aoga se avanoa e faasoa mai ai o latou lagona ma le molimau i le Tama Faalelagi, o Iesu Keriso, ma upumoni na latou suesueina i le asō. Ina ia fesoasoani i tagata aoga e faailoa atu a latou molimau patino, e mafai ona e valaaulia i latou e faasoa mai a latou tali i fesili nei.

• E mafai faapefea e upumoni na e aoaoina i le asō ona faatatau i ou tulaga po o popolega o i ai nei?

• Na faapefea e mea ua e aoaoina pe lagonaina ona aafia ai lou talisapaia o le Tama Faalelagi, Iesu Keriso, ma le fuafuaga o le fiafia?

Punaoa Faaopoopo

O le a le mea o le a tupu ia i latou o e e le mafai ona maua faamanuiaga o le talalelei i lenei olaga?

Na faamalamalama mai e Peresitene Henry B. Eyring o le Au Peresitene Sili:

Ua na o sina vaega toalaiti lava o fanau a le Atua e mauaina i lenei olaga se malamalamaaga atoatoa e uiga i le fuafuaga a le Atua, faatasi ai ma le mauaina o sauniga ma feagaiga o le perisitua lea e faagaoioia atoatoa ai le mana togiola o le Faaola i o tatou olaga. …

… O loo naunau lo tatou Tama Faalelagi ia faapotopoto ma faamanuia Lona aiga atoa. E ui Na te silafia e le o i latou uma o le a filifili ina ia potopoto, ae ua tuu atu e Lana fuafuaga i Ana fanau taitoatasi le avanoa e talia ai pe teena ai Lana valaaulia. Ma o aiga o loo i ai i le fatu o lenei fuafuaga. (Henry B. Eyring, “Faapotopotoina o le Aiga o le Atua,” Liahona, Me 2017, 20-21)

Pe o le a faamamaluina ea e le Tama Faalelagi manaoga o o tatou loto?

Sa aoao mai Peresitene Dieter F. Uchtdorf, a o avea ma uso o le Au Peresitene Sili:

Ou te fia ta’u atu o loo faafofogaina a outou tatalo. E silafia e le Tama i le Lagi mana’oga o lou loto. E le mafai ona ou ta’uina atu pe aisea ua ese ai le ala ua taliina ai tatalo a le isi tagata ae ese le isi. Ae e mafai ona ou ta’u atu le mea lenei: o le a faataunuuina lava manaoga amiotonu o lou loto.

O nisi taimi, e faigata ai ona iloa atu se mea i tua atu o le ala o i ou luma. Tatou te le to’a ma lē mananao e faatali mo se faataunuuga i le lumanai o o tatou faanaunauga silisili. E ui i lea, o le taamilosaga puupuu o lenei olaga e le mafaatusalia i le faavavau. Ma afai e na o lou faamoemoe lava ma faaaoga le faatuatua, ma tumau ma le fiafia i le iuga—ou te faapea atu tumau ma le fiafia e oo i le iuga—o iina, i lena lumanai maoae i le lagi, o le a tatou maua ai le faataunuuga o manaoga amiotonu o o tatou loto, ma le tele o isi mea e le mafai ona tatou malamalama i ai i le taimi nei. (Dieter F. Uchtdorf, “The Reflection in the Water” [Church Educational System fireside for young adults, Nov. 1, 2009], broadcasts.ChurchofJesusChrist.org)

O a tu ma aga masani sese ua faasa’oina e le Mataupu Faavae ma Feagaiga 137 ?

Na aoao mai Elder Quentin L. Cook o le Korama a Aposetolo e Toasefululua:

“I le taimi na maua ai e Iosefa Samita ia faaaliga ma faatulagaina le Ekalesia, sa aoao atu e le toatele o ekalesia faapea o le Togiola a le Faaola o le a le faataunuuina le faaolataga o le toatele o tagata. O le mataupu masani e faapea e na o ni nai tagata toaitiiti o le a faasaoina ae o le toatele lava o le a malaia i faasalaga e le uma e le mafaamatalaina le ogaoga. O le aoaoga faavae ofoofogia sa faaalia i le Perofeta o Iosefa na tatala mai ai ia i tatou se fuafuaga o le faaolataga lea e faatatau i tagata uma, e aofia ai i latou o e e lei faalogo ia Keriso i lenei olaga, o fanau o e maliliu a o lei aulia le tausaga e faamasinoina ai, ma i latou e leai se malamalama [tagai i le Mataupu Faavae ma Feagaiga 29:46–50; 137:7–10]. (Quentin L. Cook, “O Le Fuafuaga a lo Tatou Tama—Ua Lava ma Totoe mo Ana Fanau Uma,” Liahona, Me 2009, 36–37)

Gaoioiga Faaopoopo e Aoao Ai

Ala faaopoopo o faasalalauga

Afai o le a manuia tagata aoga mai se malamalamaaga sili atu i le faaaliga vaaia i le Mataupu Faavae ma Feagaiga 137 ma popolega o Iosefa e uiga i lona uso o Alavini, e mafai ona e matamata i le vitio “Ministry of Joseph Smith: Temples” (2:19).

O vitio nei e mafai ona fesoasoani i tagata aoga ia malamalama pe faapefea e mataupu faavae o le ata o le faaolataga ona faamama le fefe i le oti ma le tiga o le maliu o se tasi e pele ia i tatou: “Afai ua Tatou Saunia Lelei, E Le Aumaia e le Oti le Fefe” (1:10) ma le “Tulai” (1:42).