Lesona 153: Mataupu Faavae ma Feagaiga 137–138

Mataupu Faavae ma Feagaiga 138, Vaega 2

“Saunia e O Mai i le Taimi e Tatau ai a le Alii”

I le avea ai ma se vaega o lana faaaliga vaaia o le lalolagi o agaga, na vaai ai e le Peresitene o Iosefa F. Samita i le toatele o agaga tamalii ma le maoae o le Tama Faalelagi. Sa ia vaai i perofeta anamua o e sa faatinoina ma le faamaoni le galuega a le Alii. Sa ia vaaia foi isi na faapolopoloina e le Alii ina ia fananau mai i aso e gata ai e fausia malumalu ma faatino sauniga mo e ua maliliu. O na sauniga e mafai ona faia e ala i galuega faalemalumalu ma talafaasolopito o aiga. O lenei lesona e mafai ona fesoasoani i tagata aoga ia lagona le naunau e auai i le galuega o le malumalu ma talafaasolopito o aiga.

Gaoioiga E Ono Mafai Ona Aoao Ai

O La’u galuega taua

O uunaiga nei e mafai ona fesoasoani i tagata aoga e mafaufau ai e uiga i le galuega taua a le Tama Faalelagi mo i latou e fai. A uma se taimi e manatunatu ma tusitusi ai, e mafai e tagata aoga naunau ona faasoa mai a latou tali.

• O nisi o mea aupito sili ona taua ua ou faia i lo’u olaga o …

• O nisi o mea aupito sili ona taua ou te ono faia i lo’u olaga e aofia ai …

• Na auina mai au e le Tama Faalelagi i le lalolagi i lenei taimi e …

Valaaulia tagata aoga e saili faaaliga faaletagata lava ia ia iloa ai nisi o mea taua e finagalo le Tama Faalelagi ma Iesu Keriso latou te ausia. E mafai foi e tagata aoga ona suesue a latou faamanuiaga faapeteriaka i le fale e aoao atili ai e uiga i lenei mea.

O agaga filifilia ua faapolopolo e o mai i le atoaga o taimi

Valaaulia tagata aoga e faasoa mai mea latou te manatua e uiga i le fuafuaga a le Tama Faalelagi mai le faaaliga a Peresitene Iosefa F. Samita e uiga i le lalolagi o agaga (tagai Mataupu Faavae ma Feagaiga 138:11–60).

Fesoasoani i tagata aoga ia malamalama o le Mataupu Faavae ma Feagaiga 138:38–49, 53, na vaai ai Peresitene Iosefa F. Samita i le tele o agaga tamalii ma le maoae. E mafai ona e valaaulia tagata aoga e ta’u mai nisi o tagata na vaai i ai Peresitene Samita i lana faaaliga.

Faitau le Mataupu Faavae ma Feagaiga 138:53–56, ma vaavaai mo le galuega na saunia e le Tama Faalelagi ia agaga tamalii e faataunuu i aso e gata ai.

• O a ni fasifuaitau i nei fuaiupu e ono faasino ia te oe?

• O le a se mea ua e aoaoina e uiga i galuega le Tama Faalelagi mo oe?

• E mafai faapefea ona e aoteleina nei fuaiupu i se faamatalaga o le upu moni?

  A o aotele e tagata aoga nei fuaiupu, fesoasoani ia i latou e faailoa mai se upumoni e pei o lenei: Na faapolopoloina e le Tama Faalelagi agaga filifilia e galulue i le tovine o le Alii mo le faaolataga o Ana fanau.

• O a nisi o auala e mafai ona tatou galulue ai i le tovine a le Alii e fesoasoani ai e laveai Ana fanau?

Afai e le aumaia e tagata aoga, e mafai ona e tosina atu o latou mafaufau i le fuaiupu 54. Fesoasoani ia latou iloa e mafai ona tatou galulue i le tovine o le Alii e ala i le auai i sauniga o le malumalu mo e ua maliliu. E mafai ona e faamanatu i tagata aoga o le faatinoina o sauniga o le malumalu mo tagata i le isi itu o le veli o se tasi lea o auala tatou te fesoasoani ai e faapotopoto Isaraelu.

O le faamatalaga lenei e mafai ona fesoasoani i tagata aoga ia iloa o le Mataupu Faavae ma Feagaiga 138:53–56 e faatatau ia i latou. Ina ia faataitai ona fesootai i le Potutusi o le Talalelei, e mafai e tagata aoga ona faia se sootaga i le va o fuaiupu o tusitusiga paia ma faamatalaga.

Ua molimau mai Peresitene Russell M. Nelson:

Mai i tagata uma ua ola ai i le paneta o le lalolagi, o i tatou o tagata ua mafai ona auai i lenei faapotopotoina faaiu, maoae. Se mea ina a ofoofogia!

Sa faapolopolo e lo tatou Tama Faalelagi Ana agaga aupito sili ona tamalii—atonu e mafai ona ou fai atu, o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou! (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org)

O fesili nei e mafai ona fesoasoani i tagata aoga e iloilo ai o latou lagona o i ai nei e uiga i le auai i galuega o talafaasolopito o aiga ma le malumalu. A uma ua lava se taimi e manatunatu ai, e mafai e tagata aoga o loo naunau ona faasoa mai o latou manatu ma lagona.

• O le a sou lagona i le iloaina na saunia oe e le Alii e fesoasoani e faapotopoto Isaraelu e ala i talafaasolopito o aiga ma galuega faalemalumalu?

• O le a le faaosofiaga o e lagonaina e auai ai i galuega o talafaasolopito o aiga ma le malumalu? Aisea e te manatu ai faapena?

I le lesona “Mataupu Faavae ma Feagaiga 127–128, Vaega 2,” sa uunaia ai tagata aoga e auai i galuega o le malumalu ma talafaasolopito o aiga. E mafai ona e valaaulia tagata aoga e faasoa mai mea na latou faia ma pe na faapefea ona faamanuiaina i latou e le Alii.

Na faapolopolo e fesoasoani e faapotopoto Isaraelu e ala i galuega o malumalu ma talafaasolopito o aiga

O se tasi lenei o auala e fesoasoani ai i tagata aoga e tauave le matafaioi mo lo latou aoaoina.

Valaaulia i latou e fatu se feau e mafai ona latou faasoa atu e faaosofia ai tagata e auai i le galuega o le malumalu ma talafaasolopito o aiga. E mafai ona avea o se tamaitusi, se faasalalauga faaagafesootai, se feau faavitio, po o se isi ituaiga o valaaulia. Faataga tagata aoga e filifili le ituaiga o feau e fatuina.

O anomea o loo i le pepa e tufa atu “Ua Faapolopoloina e Fesoasoani e Faapotopoto Isaraelu e ala i le Galuega o le Malumalu ma Talafaasolopito o Aiga” e mafai ona tuuina atu ai i tagata aoga ni manatu i mea e faaaofia ai i la latou feau. Valaaulia tagata aoga e suesue i lenei anomea a o lei fatuina la latou feau. E mafai e tagata a’oga ona filifili e su’esu’e taitoatasi po o i ni vaega toalaiti.

Faapolopolo e Fesoasoani e Faapotopoto Isaraelu e ala i le Galuega o le Malumalu ma Talafaasolopito o Aiga

1. Faitau le Mataupu Faavae ma Feagaiga 138:57–59, ma vaavaai pe faapefea ona togiolaina i latou o i le lalolagi o agaga.

2. Faitau le saunoaga lenei a Peresitene Henry B. Eyring o le Au Peresitene Sili. Vaavaai pe o a lagona o le Faaola e uiga ia i latou o e auai i le galuega o le malumalu ma talafaasolopito o aiga.

Mafaufau i le Faaola pe a e feiloai ia te Ia. O le a e maua lena faatalanoaga. Sa Ia totogia le tau o agasala a oe ma fanau agaga uma a le Tama Faalelagi. O ia o Ieova. Na ia auina atu Elia. Sa ia faaee atu mana o le perisitua e faamau ai ma faamanuia ai mai le alofa atoatoa. Ma ua Ia faatuatuaina oe e ala i le tuu atu ia te oe e faalogo i le talalelei i lou olaga atoa, ma tuu atu ia te oe le avanoa e talia ai le matafaioi e ofoina atu ia i latou o ou tuaa o e sa lei maua lou avanoa taua. Mafaufau i le lotofaafetai ua ia te Ia mo i latou o e totogi le tau i le galuega ma le faatuatua e sue ai igoa o o latou tuaa ma e lava le alofa ia i latou ma Ia e ofoina atu ai ia i latou le ola e faavavau i aiga, o le meaalofa silisili lea o meaalofa uma a le Atua. Sa Ia ofoina atu ia i latou se taulaga faifaipea. O le a Ia alofa ma talisapaia i latou o e totogi soo se tau latou te mafaia e faataga ai o latou tuaa e filifili Lana ofo o le ola e faavavau. (Henry B. Eyring, “O Loto Ua Fusia Faatasi,” Liahona, Me 2005, 78–79)

3. O le a sou manatu e mafai faapefea e le auai i talafaasolopito o aiga ma galuega faalemalumalu ona fesoasoani ia te oe e mulimuli i le faataitaiga a Iesu Keriso?

4. Pe o i ai se aafiaga patino, tusitusiga paia, po o se faamatalaga mai se taitai o le Ekalesia atonu e te manao e faasoa atu?

Afai o le a manuia tagata aoga mai le vaai i le vitio o le saunoaga a Peresitene Eyring, e mafai ona e faaali atu le vitio “Loto e Fusia Faatasi” mai le faailo taimi 10:21 i le 11:29 i le ChurchofJesusChrist.org.

Afai e te lagona o le a faaosofia au tagata aoga mai faamanuiaga na folafolaina mo le auai i galuega o talafaasolopito o aiga ma le malumalu, e mafai ona e faaali atu se tasi po o vitio uma nei: “The Promised Blessings of Temple and Family History Work” (3:26) ma le “O Faamanuiaga Folafolaina o le Galuega o le Malumalu ma Talafaasolopito o Aiga 2” (4:04).

E mafai foi ona outou talanoaina le auala ua faateleina ai e le Alii lo tatou mauaina o malumalu ma tekinolosi e fesoasoani ai i le galuega o talafaasolopito o aiga. O loo i ai faamatalaga i le “Punaoa Faaopoopo” o loo aoao mai ai lenei mea.

• “Loto e Fusia Faatasi”

• “O Faamanuiaga Folafolaina o le Galuega o Malumalu ma Talafaasolopito o Aiga”

• “O Faamanuiaga Folafolaina o le Galuega o Malumalu ma Talafaasolopito o Aiga 2”

Faaosofia e auai i galuega o le malumalu ma talafaasolopito o aiga

Tuu atu i tagata aoga se taimi e fatu ai ma faasoa mai se savali e fesoasoani e faaosofia ai tagata e auai i le galuega o le malumalu ma talafaasolopito o aiga. Uunaia tagata aoga e faasoa a latou savali i le aiga.

O fesili nei e mafai ona fesoasoani i tagata aoga e tomanatu ai i o latou lava uunaiga e auai i le galuega o le malumalu ma talafaasolopito o aiga. O le taliina o fesili i a latou api talaaga o se tasi lea o auala mo tagata aoga e valaaulia ai le Agaga Paia e aoao i latou. Valaaulia ni tagata aoga naunau e faasoa mai a latou tali i le vasega.

• Na faapefea e mea ua e aoaoina pe lagonaina i lau suesuega o le Mataupu Faavae ma Feagaiga 138 ona uunaia ai le faaosofiaina o oe e auai i galuega o le malumalu ma talafaasolopito o aiga?

• Aisea e ono avea ai le auai i galuega o le malumalu ma talafaasolopito o aiga ma nisi o galuega e sili ona taua ua e faia?

Punaoa Faaopoopo

O le a se mea ua saunia e le Alii e fesoasoani ia i tatou e faatino ai galuega o talafaasolopito o aiga ma le malumalu?

Na aoao mai Elder Quentin L. Cook o le Korama a Aposetolo e Toasefululua:

O le tuufaatasiga o le faateleina o fuainumera o malumalu ma tekinolosi fou e faataunuu ai o tatou tiutetauave paia o talafaasolopito o aiga mo o tatou tuaa, ua avea ai lenei mea ma taimi sili ona faamanuiaina i le talafaasolopito atoa. Ou te olioli i le tulagaese o le faamaoni o a tatou talavou i le faavasegaina o igoa ma le sailia o o latou tuaa ma faia galuega o le papatisoga ma le faamauga i le malumalu. O outou moni lava o faaola na valoia i le Mauga o Siona. (Quentin L. Cook, “Vaai ia Oe Lava ia i totonu o le Malumalu,” Liahona, Me 2016, 98)

Ua aoao mai Elder Neil L. Andersen o le Korama a Aposetolo e Toasefululua:

Ua tuuina mai e le Alii i la outou tupulaga ia maua se avanoa tele atu e ulu atu ai i Ona malumalu paia nai lo se isi lava tupulaga i le talafaasolopito o le lalolagi.

Pe ua e tu ea i totonu o le malumalu, ua laei i laei papae, ma faatalitali e faia ni papatisoga? O a ni ou lagona? O loo i ai se lagona mamana o le paia i totonu o le malumalu. E faatoilalo e le filemu o le Faaola ia taaviliga o asiosio o le lalolagi.

O ou lagona i totonu o le malumalu o se mamanu lea mo le auala e te manao ia lagonaina i lou olaga.

Saili ou tamamatutua ma tinamatutua ma ou tausoga e vavā mamao le sootaga ua maliliu. Ia e alu i le malumalu ma ave o latou igoa. (Neil L. Andersen, “O Asiosio Faaleagaga,” Liahona, Me 2014, 20–21)

O a ni lagona o o tatou tuaa e uiga i galuega faalemalumalu ma talafaasolopito o aiga?

Na aoao mai e Peresitene Polika Iaga (1801–77):

O le a sou manatu o le a se tala a tuaa pe ana mafai ona tautatala mai tuugamau? Pe latou te le fai mai ea, “Ua fia afe tausaga o matou ta’o’oto ai iinei, iinei i lenei fale puipui, ma faatalitali mo lenei tisipenisione e oo mai?” … O le a se mea o le a latou musumusu mai i o tatou taliga? Aisea, ana fai na ia i latou le mana, semanu e lagona e o tatou taliga faititili o le lagi, pe ana tatou iloaina le taua o le galuega ua tatou punouai ai. O agelu uma i le lagi o loo vaavaai mai i nei tama’i tagata to’alaiti, ma faaosofia i latou i le faaolataga o le aiga o le tagata. (Aoaoga a Peresitene o le Ekalesia: Polika Iaga [1997], 309)

Gaoioiga Faaopoopo e Aoao Ai

I le vitio “Leadership Session at RootsTech 2017: Elder M. Russell Ballard,” mai le faailo taimi 0:00 i le 5:58, ua faasoa mai ai e Peresitene Ballard se aafiaga o ona tuaa o loo faaalia ai le ala e mafai ai e le Alii ona fesoasoani ia i latou o loo punouai i galuega o le malumalu ma talafaasolopito o aiga.

Vitio

I lana saunoaga “Ua Fusia Faatasi Loto,” na saunoa ai Peresitene Henry B. Eyring e uiga i le faaaliga a Peresitene Samita ma faifeautalai o e talai atu le talalelei i o tatou tuaa. Afai e te faaalia se vaega o le vitio i le taimi o le lesona, e mafai ona e faaaofia ai le faailo taimi 7:11 i le 11:29.

Mataupu Faavae ma Feagaiga 138:53–56. Faaaogaina o mau fefaasinoa’i e malamalama ai i fasifuaitau autu

O lenei manatu e mafai ona fesoasoani i tagata aoga e faataitai ai le faaaogaina o vaefaamatalaga ma mau fefaasinoa’i ia malamalama ai i tusitusiga paia. I luga o le laupapa, e mafai ona e tusia ai fasifuaitau nei mai le Mataupu Faavae ma Feagaiga 138:53–56 ma mau fefaasinoa’i o loo avatu faatasi ai. Valaaulia tagata aoga e faasoa mai pe faapefea e le aoaoga faavae o loo aoao mai i le mau fefaasinoa’i ona faaopoopo le uiga i le fasifuaitau o le mau. Atonu e mananao tagata aoga e faaopoopo nei mau o ni mau fefaasinoa’i po o sootaga i a latou tusitusiga paia. E mafai foi ona e valaaulia tagata aoga e vaai pe o aofia ai nisi o nei fuaiupu i vaefaamatalaga. E mafai foi ona latou sueina isi fuaiupu o loo lisiina i vaefaamatalaga.

• “O le atoaga o taimi” (Mataupu Faavae ma Feagaiga 138:53)—Efeso 1:10; Mataupu Faavae ma Feagaiga 128:18

• “Faataatiaina o faavae o le galuega tele o aso e gata ai” (Mataupu Faavae ma Feagaiga 138:53)—Mataupu Faavae ma Feagaiga 64:33

• “O e tamalii ma ta’uta’ua o e na filifilia i le amataga” (Mataupu Faavae ma Feagaiga 138:55)—Aperaamo 3:22–23

• “Saunia e o mai i le taimi e tatau ai a le Alii” (Mataupu Faavae ma Feagaiga 138:56)—Galuega 17:26

Mataupu Faavae ma Feagaiga 138:56. “Saunia e o mai i le taimi e tatau ai a le Alii”

E mafai ona e fesoasoani i tagata aoga e taulai atu i le Faaola e ala i le iloaina o auala ua Ia “saunia ai [i latou] e o mai i le taimi tatau ai a le Alii” (Mataupu Faavae ma Feagaiga 138:56). E mafai ona outou talanoaina pe na faapefea ona aoaoina i latou ma saunia “ae latou te lei fananau mai.” E mafai foi ona e valaaulia tagata aoga e lisi mea ua saunia e le Alii e fesoasoani ai ia i tatou e faataunuu la tatou misiona paia e saili o tatou tuaa ma faatino sauniga o le malumalu mo i latou. E mafai ona e faaaogaina saunoaga a Elder Quentin L. Cook ma Elder Neil L. Andersen i le “Punaoa Faaopoopo” e fesoasoani ai i tagata aoga i a latou lisi. Talanoaina pe mafai faapefea e le auai i galuega o malumalu ma talafaasolopito o aiga ona faatosinaina a latou sootaga ma le Tama Faalelagi ma Iesu Keriso.