Lesona 152: Mataupu Faavae ma Feagaiga 137–138

Mataupu Faavae ma Feagaiga 138, Vaega 1

O Le Faaaliga o le Asiasiga a le Faaola i le Lalolagi o Agaga

I le faanoanoa ai i le maliliu o tagata pele o le aiga ma faanoanoa i le faatafunaga na mafua ona o le Taua Muamua a le Lalolagi ma le faama’i o le fulū pepesi i le lalolagi atoa, sa sailia ai e Peresitene Iosefa F. Samita le faamafanafanaga i tusitusiga paia. A o ia toe mafaufau i fuaitau mai le 1 Peteru 3–4, sa ia mauaina se faaaliga mamalu o taumafaiga auauna atu a le Faaola i le lalolagi o agaga i le va o Lona maliu ma le Toetu. O le faaaliga vaaia a Peresitene Samita ua avea nei ma Mataupu Faavae ma Feagaiga 138. E mafai ona fesoasoani lenei lesona i tagata aoga ia malamalama i le auala e ofoina atu ai e le Faaola le faaolataga i fanau a le Tama Faalelagi i le lalolagi o agaga.

Gaoioiga E Ono Mafai Ona Aoao Ai

O fea tatou te o i ai pe a tatou feoti?

Valaaulia tagata aoga e mafaufau loloto i le vaaiga lenei pe fatu se vaaiga e fetaui ma o latou manaoga. O le faamoemoega o le vaaiga o le fesoasoani lea i tagata aoga e iloilo mea latou te iloa e uiga i le lalolagi o agaga. E mafai e tagata aoga ona faasoa mai mea ua latou malamalama e tupu ia i latou uma o e ua i ai ma i latou e lei taliaina le talalelei a Iesu Keriso.

Ina ua maea le falelauasiga o lona Tinamatua o Roberts, e ta’u atu e Julie ia te oe na maliliu uma lona Tinamatua ma lona Tamamatua o Roberts e aunoa ma le papatisoina i le O le Ekalesia a Iesu Keriso o le Au Paia o Aso e Gata Ai. O isi ona matua matutua (Tinamatua ma Tamamatua Jones) na maliliu o ni tagata faamaoni, o ni tagata o le Ekalesia i o la olaga atoa. E fesili atu Julie ia te oe, “O le a le mea o le a tupu i o’u matua matutua e lei papatisoina?”

Toe manatunatu i mea ua e iloa e uiga i le lalolagi o agaga.

• O le a le mautinoa o le a e lagonaina i le faasoa atu o upumoni e uiga i le lalolagi o agaga ia Julie?

Faamanatu i tagata aoga o se tasi o matafaioi a le Agaga Paia o le molimau atu lea i le upumoni. Valaaulia i latou ia nofouta i le molimau a le Agaga i upumoni e uiga i le fuafuaga o le faaolataga a le Tama Faalelagi o le a latou suesueina i le asō.

O le faaaliga o le togiolaina o e ua maliliu

Ina ia tuuina atu le talaaga faasolopito i le Mataupu Faavae ma Feagaiga 138, mafaufau e faasoa atu le saunoaga lenei a Peresitene Ballard po o le aoteleina o le Au Paia: O Le Tala i le Ekalesia a Iesu Keriso i Aso e Gata Ai, Vol. 3, Boldly, Nobly and Independent, 1893–1955 [2018], 196–207.

Na faasoa mai e Peresitene M. Russell Ballard o le Korama a Aposetolo e Toasefululua, o se atalii o le atalii o le atalii o Peresitene Iosefa F. Samita, le mea lenei e uiga i le faaaliga vaaia lea ua avea nei ma Mataupu Faavae ma Feagaiga 138.

I le aso 3 o Oketopa, 1918, i le lagonaina ai o le faanoanoa tele i le faitau miliona na maliliu i le lalolagi e ala i taua ma faama’i faapea ai foi ma le maliliu o tagata o lona lava aiga, sa maua ai e Peresitene Samita le faaaliga faalelagi ua lauiloa “o le faaaliga o le togiolaina o ē ua maliliu.” …

O le faaaliga na ia maua i le aso 3 o Oketopa na faamafanafanaina ai lona loto ma maua ai tali i le tele o ana fesili. E mafai foi ona faamafanafanaina i tatou ma aoao atili e uiga i o tatou lava lumanai pe a tatou feoti ma e pele ia i tatou ma o atu i le lalolagi o agaga e ala i le suesueina o lenei faaaliga ma mafaufau loloto i lona taua i le auala o loo tatou ola ai i o tatou olaga i aso taitasi. (M. Russell Ballard, “O Le Faaaliga o le Togiolaina o Ē ua Maliliu,” Liahona, Nov. 2018, 72–73)

Faitau le Mataupu Faavae ma Feagaiga 138:1–4, ma vaavaai mo upumoni sa mafaufau loloto i ai Peresitene Samita ina ua ia mauaina lenei faaaliga vaaia.

• O le a se mea e tulaga ese ia te oe e uiga i mea sa mafaufau i ai Peresitene Samita a o ia suesue?

• O le a le mea na iloa e Peresitene Samita e uiga ia Iesu Keriso ma Lana taulaga togiola?

  Fesoasoani i tagata aoga e faailoa mai se upumoni e pei o lenei: E ala i le Togiola a Iesu Keriso ma le usiusitai i mataupu faavae o Lana talalelei, e mafai ai ona faaolaina fanau taitasi a le Tama Faalelagi.

  E mafai ona e aoteleina le Mataupu Faavae ma Feagaiga 138:5–10 i le faasoa atu na liliu atu Peresitene Samita i le 1 Peteru 3–4 a o ia toe mafaufau i le togiolaina o e ua maliliu na folafola mai e ala i le taulaga togiola a le Faaola. Atonu e te faasino atu o le 1 Peteru 4:6 o se fuaitau o le atamai i aoaoga faavae.

• O le a se mea ua e iloa e uiga i le auala ua faaavanoa ai e Iesu Keriso le faaolataga mo fanau uma a le Tama Faalelagi?

Ua faaali mai le Faaola i le lalolagi o agaga

A o suesue e tagata aoga le faaaliga vaaia, atonu e fesoasoani le faasino atu na vaai Peresitene Samita i le asiasiga a le Faaola i le lalolagi o agaga i le va o le taimi o Lona maliu ma Lona Toetu.

Faamanatu i tagata aoga ua vaevaeina le lalolagi o agaga i le parataiso ma le falepuipui. Afai e manaomia, e mafai ona e faamalamalama atu o le falepuipui i lenei talaaga e faatatau i se nofoaga le tumau i le lalolagi o agaga mo i latou o e na maliliu e aunoa ma se malamalama i le upumoni (nai lo se falepuipui po o se sela). O agaga i lenei falepuipui o i latou foi ia o e na le usiusitai i le olaga nei (tagai i le Autu ma Fesili, “Seoli,” topics.ChurchofJesusChrist.org).

Faitau le saunoaga lenei a Peresitene Dallin H. Oaks o le Au Peresitene Sili e uiga i le galuega o le faaolataga mo fanau uma a le Tama Faalelagi i le lalolagi o agaga.

O le galuega o le faaolataga i le lalolagi o agaga e aofia ai le faasaolotoina o agaga mai le mea ua faamatalaina soo e tusitusiga paia o le “pologa.” O tagata uma i le lalolagi o agaga o loo i lalo o se ituaiga o pologa. (Dallin H. Oaks, “Faalagolago i le Alii,” Liahona, Nov. 2019, 26)

A o e suesueina le faaaliga vaaia o loo faamaumauina i le Mataupu Faavae ma Feagaiga 138, vaavaai pe faapefea ona nofo pologa fanau agaga a le Tama Faalelagi ma pe faapefea ona faasaolotoina i latou e le Faaola ma Lana taulaga togiola.

O se tasi o auala e faatulaga ai le vasega o le faatulaga lea o tagata aoga i ni vaega e toatolu. Valaaulia tagata aoga e suesue se tasi o vaega nei e tolu. A uma se taimi e talanoaina ai fesili ua saunia, e mafai e tagata aoga ona faasoa atu mea na latou aoaoina i isi o le latou kulupu o e na suesueina se isi vaega.

Uunaia tagata aoao e faasoa atu upumoni o latou aoaoina. Mo aoaoga i le auala e faia ai lenei mea, tagai i le aoaoga ua faaautūina “Uunaia tagata aoao e faasoa mai upumoni o loo latou aoaoina” o loo maua i Tomai o le Atinaega o Faiaoga: Valaaulia A’oa’oga Filiga. Mafaufau e faataitai le tomai “Valaaulia tagata aoga e fefaasoaai ma isi ia mea ua latou aoaoina.”

• O le a se mea na e mauaina?

• Na faapefea ona tali atu agaga i le talalelei a le Faaola i le olaga nei?

• Na faapefea ona nofo pologa nei agaga? Na faapefea ona faasaoloto e le Faaola ia i latou?

• O a avanoa ua tuuina mai e le Faaola i agaga i le parataiso? I le falepuipui?

• O le a se mea e mafai ona tatou faia e fesoasoani ai i le Faaola i Lana galuega?

1. E faasaolotoina e le Faaola agaga i le parataiso.

Faitau le Mataupu Faavae ma Feagaiga 138:11–19, 23–24, 50–52, ma vaavaai pe o a auala e tuuina atu ai e le Faaola ia aoaoga i le parataiso o agaga.

2. E faasaolotoina e le Faaola agaga i le falepuipui.

Faitau le Mataupu Faavae ma Feagaiga 138:20–22, 29–37, 57–59, ma vaavaai pe o a auala e tuuina atu ai e le Faaola ia aoaoga i le falepuipui o agaga.

3. Ua faatulagaina e le Faaola le talaiga o le talalelei i le lalolagi o agaga.

Faitau le Mataupu Faavae ma Feagaiga 138:30–37, 57–59, ma vaavaai pe na faapefea e le Faaola ona faatulagaina le folafolaina atu o le talalelei ia i latou i le falepuipui o agaga.

Faataitai le malamalamaaga

Ina ia fesoasoani i tagata aoga e faaalia lo latou malamalama i le Mataupu Faavae ma Feagaiga 138, e mafai e tagata aoga ona faatino le vaaiga mai le amataga o le vasega. E mafai e tagata aoga ona faataamilo le matafaioi a Julie ma faataitai le auala e tali ai lana fesili mo seti taitasi o ona matua matutua. A uma ona maua se taimi e faataitai ai tagata aoga, e mafai ona latou faasoa atu i le vasega o latou lagona ma pe faapefea ona faaaoga nei aoaoga ia i latou.

E mafai ona e faasoa atu lau molimau i le Tama Faalelagi, Iesu Keriso, ma le faaolataga ua La ofoina atu i e o ola ma e ua maliliu.

Punaoa Faaopoopo

O fea e mafai ona ou aoao atili ai e uiga i le faaaliga vaaia o le lalolagi o agaga ma le faaolataga mo e ua maliliu?

• Au Paia, 3:193–209

• Autu ma Fesili, “Lalolagi o Agaga,” topics.ChurchofJesusChrist.org

• Lisa Olsen Tait, “Susa Young Gates ma le Faaaliga o le Togiolaina o Ē ua Maliliu,” Faaaliga i Tulaga Sa’o [2016], 315

E faapefea ona ou taulimaina au fesili e uiga i le lalolagi o agaga?

Ina ua uma ona faasoa mai e tele mea tatou te le iloa e uiga i le lalolagi o agaga, sa faamalamalama mai e Peresitene Dallin H. Oaks o le Au Peresitene Sili le auala e taulima ai a tatou fesili:

Mo fesili uma e uiga i le lalolagi o agaga, ou te fautua atu ni tali se lua. Muamua, manatua e alofa le Atua i Lana fanau ma o le a mautinoa e faia mea silisili mo i tatou taitoatasi. Lua, manatua le aoaoga masani lenei o le Tusi Paia, lea na sili ona aoga ia te a’u i le taulimaina o fesili e leai ni tali:

“Ia e faatuatua i le Alii ma lou loto atoa; a e aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6). …

E mafai ona tatou tomanatu faalilolilo uma e uiga i tulaga i le lalolagi o agaga pe talanoaina foi nei fesili po o isi fesili e leai ni tali i faatulagaga faaleaiga po o isi faatulagaga vavalalata. Ae aua ne’i o tatou aoao atua pe faaaoga e fai ma aoaoga faavae aloaia mea e le tutusa ma tulaga faatonuina o aoaoga faavae aloaia. O le faia o lena mea e le faalauteleina ai le galuega a le Alii ma e ono faalotovaivaia ai tagata mai le saili atu i lo latou lava mafanafana po o le faagaeetiaina e ala i faaaliga faaletagata lava ia ua sauniaina e le fuafuaga a le Alii mo i tatou taitoatasi. (Dallin H. Oaks, “Faalagolago i le Alii,” Liahona, Nov. 2019, 28)

E faapefea ona laveai e le Faaola i latou o i le lalolagi o agaga mai le pologa?

Sa aoao mai Peresitene Dallin H. Oaks o le Au Peresitene Sili:

O le faaaliga maoae a Peresitene Iosefa F. Samita, ua avea ma tusitusiga paia i le vaega 138 o le Mataupu Faavae ma Feagaiga o loo ta’ua ai o ē maliliu amiotonu, o ē sa i ai i se setete o le “filemu” (Mataupu Faavae ma Feagaiga 138:22) a o latou tulimata’i atu i le Toetutu (tagai i le Mataupu Faavae ma Feagaiga 138:16), “sa vaai e ua maliliu i le umi o le tuuesea o o latou agaga mai i o latou tino, o se pologa” (Mataupu Faavae ma Feagaiga 138:50).

E mafatia foi ē amioleaga i se pologa faaopoopo. Ona o agasala e le’i salamoina, ua latou i ai i le mea na faasino i ai le Aposetolo o Peteru o le “falepuipui” o agaga (1 Peteru 3:19; tagai foi i le Mataupu Faavae ma Feagaiga 138:42). O nei agaga ua faamatalaina o e ua “noanoatia” pe ua “faatagataotauaina” (Mataupu Faavae ma Feagaiga 138:31, 42) pe o ē e “tutuli ese i fafo i le pouliuli i fafo” ma le “taufaitagi, ma le tagiaue”, ma le lilivau o nifo” a o latou faatalitali ai le toetutu ma le faamasinoga (Alema 40:13–14).

O le toetutu mo tagata uma i le lalolagi o agaga ua faamautinoa e le Toetu o Iesu Keriso (tagai i le 1 Korinito 15:22), e ui e tupu i taimi eseese mo vaega eseese. Seia oo i lena taimi atofaina, o mea ua ta’u mai e tusitusiga paia ia i tatou e uiga i gaoioiga i le lalolagi o agaga e faatatau atoa i le galuega o le faaolataga. Isi mea iti ua faaali mai. E tala’i atu le talalelei i ē lē iloa se mea, o ē lē salamo, ma ē fouvale ina ia mafai ona faasaolotoina i latou mai lo latou pologa ma agai i luma i faamanuiaga ua faapolopolo e se Tama Faalelagi alofa mo i latou.

O le pologa i le lalolagi o agaga lea e faatatau i agaga amiotonu ua liuaina, o le manaomia lea ona latou faatalitali—ma e masalo e faatagaina foi i latou e uunaia isi e faanatinati—le faatinoga o o latou sauniga sui i le lalolagi ina ia mafai ai ona papatisoina i latou ma olioli ai i faamanuiaga a le Agaga Paia (tagai i le Mataupu Faavae ma Feagaiga 138:30–37, 57–58). O nei sauniga sui i la le tino e faamalosia ai foi i latou ia agai i luma i lalo o le pule o le perisitua e faatoatele vaega o ē amiotonu e mafai ona tala’i atua le talalelei i agaga i le falepuipui. (Dallin H. Oaks, “Faalagolago i le Alii,” Liahona, Nov. 2019, 26–27)

O le ā le mea e mana’omia mai iā i latou o loo i le falepuipui o agaga?

A o taitaia se maimoaga taamilo faavitio i le Malumalu o Roma Italia a o lei faia lona faapaiaga, sa aoao mai ai Elder David A. Bednar ma Ronald A. Rasband o le Korama a Aposetolo e Toasefululua:

Na fetalai le Faaola, “Afai e le fanau se tasi i le vai ma le Agaga, e le mafai ona sao o ia i le malo o le [lagi].” O le papatisoga e ala i le faatofuina mo le faamagaloga o agasala o se sauniga faaola taua lea i le talalelei a Iesu Keriso. Ma o iinei i le malumalu, tatou te faia ai papatisoga mo e ua maliliu. O le a o mai ni tagata se toalua o la tatou Ekalesia i le faatanoa papatisoga o loo ofu papa’e, ma o iina o le a papatisoina ai i laua mo o laua tuaa ua maliliu. O le papatisoga mo e ua maliliu na aoaoina e le Aposetolo o Paulo i le Feagaiga Fou, ma ua tatou maua le avanoa e faaauau ai lena sauniga i le Ekalesia i aso nei i malumalu uma i le lalolagi atoa.

O se tasi o fesili sili i le faa-Kerisiano o le mea lea e tupu ia i latou e lei faalogo lava ia Iesu Keriso. Ua na o Ia lava le suafa i lalo o le lagi e mafai ai ona faaolaina se alii po o se tamaitai. Ae peitai, i totonu o i latou uma o e na soifua, e na o ni nai tagata o le aiga ua faalogo ia te Ia, ua maua le avanoa e aoao ai Lana aoaoga faavae, ma maua ai le sauniga faaola o le papatisoga e ala i le faatofuina. E mafai ona faia lena mea e ala i le papatisoga sui mo e ua maliliu. E i ai nisi tagata o le a fesili mai pe o tatou faatauanau pe faamalosia o tatou tuaa ia avea ma tagata O le Ekalesia a Iesu Keriso o le Au Paia o Aso e Gata Ai. Ma o le tali e leai. O se taulaga alofa. Ona latou maua lea o le avanoa e talia ai pe teena ai lena sauniga. (David A. Bednar ma Ronald A. Rasband, i le “Two Apostles Lead a Virtual Tour of the Rome Italy Temple” [vitio], ChurchofJesusChrist.org)

Gaoioiga Faaopoopo e Aoao Ai

Faatino faata’ita’i le vaaiga mamao o le vaega 138

Mafaufau e fesoasoani i tagata aoga e faatino ma le migao pe faapeī le talaiga o le talalelei i le lalolagi o agaga. E mafai ona e faatinoina le vaaiga faataitai a Julie mai le lesona. E mafai ona e faia ni tagata aoga se toalua e fai ma sui o lona Tinamatua ma Tamamatua Roberts, o e o i le falepuipui o agaga. O le isi seti o tamaiti aoga e mafai ona faatusa ia Tinamatua ma Tamamatua Jones, o e o i le parataiso o agaga. Valaaulia tagata aoga o e na fai ma sui o le au Jones e asiasi i le au Roberts e aoao atu i laua i le talalelei. Valaaulia se isi tagata aoga e fai ma sui o Julie ma lona tuagane, o e na papatisoina i le malumalu mo o la matua matutua o le au Roberts. Ona mafai lea e le au Roberts ona tuua le falepuipui o agaga ma ulu atu i le parataiso o agaga.

Manatua: O le faamoemoega e le o le faailoa atu po o ai e aoao atu le talalelei i ai i le lalolagi o agaga; ae, o le faaali atu lea o le auala e tuua ai e agaga le falepuipui o agaga pe a uma ona latou taliaina le sauniga o le papatisoga e pei ona faia i le malumalu (tagai i le Mataupu Faavae ma Feagaiga 138:31).

O se asiasiga mai le lalolagi o agaga i le tamamatua o Peresitene Nelson

Ina ia faamautu upumoni na maua e tagata aoga a o suesueina le vaega 138, atonu e te manao e faasoa atu ia i latou se tala na faasoa mai e Peresitene Nelson e uiga i lona tamamatua. E mafai ona e faaali atu le vitio “A Visit from Father” (3:20). I le mulimuli atu ai i le tala, e mafai ona e fai i tagata aoga fesili o talanoaga e pei o nei:

• O le a se mea na e aoaoina mai le tala a Peresitene Nelson?

• O le a se mea ua aoao mai e lenei tala ia te oe e uiga i le fuafuaga a le Tama Faalelagi?

Mafaufau loloto ma manatunatu i tusitusiga paia

Afai e manuia tagata aoga mai se talanoaga i le auala e valaaulia ai faaaliga e le mafaufau loloto po o le manatunatu i tusitusiga paia, valaaulia i latou e faitau le Mataupu Faavae ma Feagaiga 138:1–4, 11, 29. Fai atu ia i latou e vaavaai mo upu na faaaoga e Peresitene Samita e faamatala ai le auala na ia taulimaina ai lenei suesuega o tusitusiga paia. Atonu e faailoa mai e tagata aoga se upumoni e pei o lenei: o le mafaufau loloto i tusitusiga paia ma le manatunatu i le taulaga togiola a le Faaola e mafai ona saunia ai i tatou e maua faaaliga mai le Atua.

Valaaulia tagata aoga e faasoa mai, pe afai e le patino tele, ni aafiaga na latou mauaina i le mauaina o faaaliga pe a mafaufau loloto pe manatunatu i tusitusiga paia. Atonu e te fai atu se fesili e pei o lenei:

• Aisea e te manatu ai o le mafaufau loloto i tusitusiga paia e mafai ona taitai atu ai i faaaliga?

Filifiliga o le vitiō

Afai o le a faamanuiaina tagata aoga mai le aoao atili e uiga i le aafiaga na taitai atu ai i le faaaliga vaaia a Peresitene Iosefa F. Samita, e mafai ona e matamata i “Galuega a Iosefa F. Samita: O Se Faaaliga o le Togiolaina o e ua Maliliu” (3:06).

Ina ia fesoasoani i tagata aoga e vaai faalemafaufau i mea na tutupu o loo faamatalaina i le vaega 138, mafaufau e faaali atu le vitio “To This End Was I Born” mai le faailo taimi 21:20 i le 24:23. O loo faaalia ai i lenei mea se ata o le ulufale atu o le Faaola i le lalolagi o agaga ina ua mavae Lona Faasatauroga.

Ina ia fesoasoani i tagata aoga ia malamalama atili e uiga i le mea e tupu i o tatou agaga pe a mavae le oti, mafaufau e faaali atu le “O le a le Mea e Tupu i o Tatou Tino ma Agaga pe a Tatou Oti?” (4:19).

Ina ia fesoasoani i tagata aoga ia malamalama i le faasaolotoina e le Faaola o fanau a le Tama Faalelagi mai le pologa, e mafai ona e faaali atu le “Messiah a Handel: Debtor’s Prison” (3:35).