Lesson 151: Doktrina at mga Tipan 137–138

Doktrina at mga Tipan 137

Ang mga Magmamana ng Kahariang Selestiyal

Noong Enero 1836, habang naroon sa hindi pa tapos na Kirtland Temple, nakakita si Propetang Joseph Smith ng isang pangitain tungkol sa kahariang selestiyal. Sa pangitaing ito, na ngayon ay Doktrina at mga Tipan 137, inihayag ng Tagapagligtas ang mga katotohanan tungkol sa plano ng Ama sa Langit. Ang lesson na ito ay makatutulong sa mga estudyante na madagdagan ang kanilang pagpapahalaga sa plano ng kaligtasan ng Ama sa Langit.

Mga Posibleng Aktibidad sa Pag-aaral

Ang plano ng Ama sa Langit para sa lahat ng Kanyang anak

Ang mga kuwento ay isang paraan upang makilahok ang mga estudyante sa karanasan sa pagkatuto. Maaari ninyong basahin o ibuod ang sumusunod na talata. Maaari din ninyong panoorin ang video na “Joseph Smith: The Prophet of the Restoration,” na makikita sa ChurchofJesusChrist.org, mula sa time code na 2:05 hanggang 4:21 o 11:57 hanggang 15:22, o pareho.

Noong 1823, ang biglaang pagpanaw ni Alvin, ang panganay na anak, ay nagdulot ng matinding pighati sa pamilya Smith. Hiniling ng pamilya sa isang lokal na pastor na pangasiwaan ang libing ni Alvin. Dahil hindi nabinyagang miyembro ng kongregasyon ng pastor si Alvin, sinabi nito na hindi maliligtas si Alvin. Nagunita ng kapatid ni Joseph na si William Smith, “Ipinagdiinan … [ng pastor] na napunta sa impiyerno [si Alvin], dahil hindi siya miyembro ng simbahan” (sa Mga Turo ng mga Pangulo ng Simbahan: Joseph Smith [2007], 471–3). Sa buong buhay ni Joseph, lalo pa siyang nakaranas ng pangungulila kasama ng kanyang asawa na si Emma nang ilibing nila ang apat sa kanilang anim na anak na sanggol.

• Ano kaya ang mga itinanong ni Joseph Smith at ng kanyang pamilya tungkol sa pagkamatay ng kanilang mga mahal sa buhay?

Isang pangitain tungkol sa kahariang selestiyal

Noong Enero 1836, nakipagpulong si Joseph sa iba pang mga lider ng Simbahan sa isang silid ng hindi pa tapos na Kirtland Temple. Doon natanggap ni Joseph ang pangitain tungkol sa kahariang selestiyal sa hinaharap. Sa pangitaing ito, na ngayon ay Doktrina at mga Tipan 137, itinuro kay Joseph ang mga walang-hanggang katotohanan tungkol sa kaligtasan ng mga anak ng Ama sa Langit, kabilang ang mga sanggol at ang kanyang kapatid na si Alvin.

Habang binabasa ng mga estudyante ang bahaging ito, maaari kayong tumigil sandali pagkatapos pag-aralan ang talata 1–6. Anyayahan silang ibahagi ang pinakamahalaga para sa kanila sa paglalarawan ni Joseph ng kahariang selestiyal.

Basahin ang Doktrina at mga Tipan 137:1–10, at alamin ang mga katotohanang itinuro ng Tagapagligtas tungkol sa plano ng kaligayahan ng Ama sa Langit.

• Ano ang itinuturo ng Tagapagligtas sa mga talatang ito na maaaring nakapagpapanatag kay Joseph Smith at sa kanyang pamilya? Bakit maaaring nakapapanatag ito?

  Ang talata 7–10 ay nagbibigay ng magandang pagkakataon para magsanay ang mga estudyante sa pagtukoy ng mga katotohanan ng ebanghelyo, at sabihin ang mga ito gamit ang sarili nilang mga salita. Tulungan ang mga estudyante na tukuyin at ibahagi ang mga pahayag ng katotohanan na matatagpuan sa mga talatang ito, kabilang ang sumusunod:

  • Ang lahat ng tumanggap ng ebanghelyo, kung nagkaroon sila ng pagkakataong gawin ito, ay papasok sa kahariang selestiyal (tingnan sa talata 7–8).

  • Hahatulan ng Panginoon ang bawat isa sa atin alinsunod sa ating mga gawa at naisin ng ating puso (tingnan sa talata 9).

  • Ang lahat ng batang namatay bago sila sumapit sa gulang ng pananagutan ay maliligtas sa kahariang selestiyal (tingnan sa talata 10).

  Maaari mong ilista sa pisara ang mga alituntuning ito.

• Ano kaya ang nadama ng pamilya Smith tungkol sa mga katotohanang itinuro ng Tagapagligtas sa mga talatang ito?

• Ano ang nadarama ninyo tungkol sa mga katotohanang ito? Paano naaapektuhan ng mga katotohanang ito ang inyong pagpapahalaga sa Ama sa Langit at kay Jesucristo?

Matapos ang angkop na oras para sa pagninilay, anyayahan ang mga estudyante na piliin ang mga katotohanang gusto nilang mas pag-aralan pa. Maaari silang mag-aral bilang isang klase, nang mag-isa, o sa maliliit na grupo. Maaaring isadula ng mga estudyante ang mga sitwasyon.

Ang lahat ng tatanggap ng ebanghelyo ng Tagapagligtas ay karapat-dapat sa kahariang selestiyal (tingnan sa talata 7–8)

Anyayahan ang mga estudyante na isipin ang sumusunod na sitwasyon o katulad na sitwasyon na nauugnay sa mga tanong nila tungkol sa mga namatay nang hindi natatanggap ang mga nakapagliligtas na ordenansa ng Ama sa Langit.

Sitwasyon: Isipin na kunwari ay nakikipag-usap ka sa isang pamilya na nasa sitwasyong katulad ng sa pamilya Smith noong namatay si Alvin.

Resources sa pag-aaral: Basahin ang Doktrina at mga Tipan 137:7–8; 1 Pedro 4:6; Mosias 15:24; at ang sumusunod na pahayag ni Pangulong Russell M. Nelson:

Dahil sa habag, ang dakilang plano ng kaligayahan ng Diyos at ang walang hanggang mga pagpapala nito ay maibibigay sa mga taong hindi nagkaroon ng pagkakataong marinig ang ebanghelyo sa mortalidad. Ang mga ordenansa sa templo ay maaaring gawin para sa kanila. (Russell M. Nelson, “Selestiyal na Kasal,” Liahona, Nob. 2008, 94)

Mga tanong na tatalakayin:

• Paano kaya matutulungan ng mga banal na kasulatan na ito at ng mga turo ni Pangulong Nelson ang pamilya na maunawaan ang plano ng Ama sa Langit para sa Kanyang mga anak?

• Sa anong mga paraan naaapektuhan ng katotohanang ito ang inyong nadarama sa Ama sa Langit, kay Jesucristo, at sa plano ng kaligtasan?

Hahatulan alinsunod sa ating mga gawa at naisin ng ating puso (tingnan sa talata 9)

Ibinigay ang dalawang sitwasyon upang matulungan ang mga estudyante na madama ang kahalagahan ng katotohanang ito. Maaaring pumili ang mga mag-aaral ng isang sitwasyon na tatalakayin o maaari silang gumawa ng sarili nilang sitwasyon na nauugnay sa mga tanong nila. Magtutuon ang aktibidad na ito sa mga hindi natupad na matwid na hangarin. Kung sa palagay mo ay makikinabang ang mga estudyante sa pag-aaral sa kung paano tayo hahatulan ng Panginoon, anyayahan silang basahin ang Alma 41:3–7.

Mga Sitwasyon:

• Nag-aalala si Lorenzo na maaaring hindi siya kailanman magkakaroon ng pagkakataong makahanap ng makakasama sa kawalang-hanggan at maikasal sa templo.

• Si Amy lamang ang miyembro ng Simbahan sa kanyang pamilya. Nag-aalala siya na hindi siya maibubuklod sa kanyang mga magulang.

Resources sa pag-aaral: Balikan ang Doktrina at mga Tipan 137:9 at ang pahayag na ito ni Pangulong Russell M. Nelson:

Paano na yaong mga hindi nakapag-asawa sa buhay na ito o hindi maaaring ibuklod sa kanilang mga magulang sa buhay na ito? Alam natin na hahatulan ng Panginoon ang bawat isa sa atin alinsunod sa mga hangarin ng ating puso, gayundin sa ating mga gawa, at ang mga pagpapala ng kadakilaan ay ibibigay sa lahat ng karapat-dapat. (Russell M. Nelson, “Kaligtasan at Kadakilaan,” Liahona, Mayo 2008, 10)

Mga tanong na tatalakayin:

• Para sa inyo, ano ang ibig sabihin ng hahatulan tayo ng Panginoon alinsunod sa ating mga gawa at naisin o hangarin ng ating puso?

• Paano kaya makatutulong ang katotohanang itinuro sa talata 9 kay Lorenzo o kay Amy na mas maunawaan ang plano ng Ama sa Langit para sa bawat isa sa Kanyang mga anak?

• Sa anong mga paraan naaapektuhan ng katotohanang ito ang nadarama ninyo tungkol sa pagmamahal ng Ama sa Langit at sa Kanyang plano ng kaligtasan?

Ang maliliit na bata ay ligtas sa kahariang selestiyal (tingnan sa talata 10)

Ibahagi ang sumusunod na sitwasyon, o ipakita ang kuwentong isinalaysay ni Pangulong Boyd K. Packer (1924–2015) ng Korum ng Labindalawang Apostol sa “And a Little Child Shall Lead Them.” Ang video ay makikita sa ChurchofJesusChrist.org, at ang kuwento ay mula sa time code na 4:40 hanggang 6:00. Anyayahan ang mga estudyante na isipin kunwari na sila ang mga missionary na nakakita ng pangyayaring inilarawan.

Sitwasyon: Bilang missionary, nakilala mo ang mga nagdadalamhating magulang ng isang dalawang taong gulang na batang lalaki na nalunod. Nag-aalala ang mga magulang na hindi makakapunta sa langit ang kanilang anak dahil hindi pa siya kailanman nabinyagan.

Resources sa pag-aaral: Basahin ang Moroni 8:8, 11–12; Doktrina at mga Tipan 29:46; 137:10.

Mga tanong na tatalakayin:

• Anong mga aspeto ng plano ng kaligtasan ng Ama sa Langit ang ibabahagi ninyo sa mga magulang na ito?

• Ano pang karagdagang kapanatagan ang maaari ninyong ibigay sa mga magulang sa sitwasyon?

• Paano nakakaapekto ang katotohanang ito sa inyong pagpapahalaga sa Ama sa Langit, kay Jesucristo, at sa plano ng kaligtasan?

Ibahagi ang inyong nadarama

Maaari mong bigyan ng pagkakataon ang mga estudyante na ibahagi ang kanilang nadarama at patotoo tungkol sa Ama sa Langit, kay Jesucristo, at sa mga katotohanang pinag-aralan nila ngayon. Upang tulungan ang mga estudyante na ipahayag ang kanilang personal na patotoo, maaari mo silang anyayahan na ibahagi ang kanilang mga sagot sa mga sumusunod na tanong.

• Paano maiaangkop ang mga katotohanang natutuhan ninyo ngayon sa inyong mga kasalukuyang kalagayan o alalahanin?

• Paano nakaapekto ang natutuhan o nadama ninyo sa inyong pagpapahalaga sa Ama sa Langit, kay Jesucristo, at sa plano ng kaligayahan?

Karagdagang Resources

Ano ang mangyayari sa mga hindi makatatamo ng mga pagpapala ng ebanghelyo sa buhay na ito?

Ipinaliwanag ni Pangulong Henry B. Eyring ng Unang Panguluhan:

Kakaunti lamang sa mga anak ng Diyos ang nagtatamo sa buhay na ito ng lubos na pang-unawa sa plano ng Diyos, kabilang na ang pagkakataong makinabang sa mga ordenansa at tipan ng priesthood na ginagawang lubos na epektibo ang kapangyarihan ng pagbabayad-sala ng Tagapagligtas sa ating buhay. …

… Nasasabik ang ating Ama sa Langit na tipunin at pagpalain ang Kanyang buong pamilya. Kahit alam Niya na hindi lahat sa kanila ay pipiliing matipon, binibigyan ng Kanyang plano ang bawat anak Niya ng pagkakataong tanggapin o tanggihan ang Kanyang paanyaya. At ang mga pamilya ang pinakamahalaga sa planong ito. (Henry B. Eyring, “Pagtitipon sa Pamilya ng Diyos,” Liahona, Mayo 2017, 20–21)

Igagalang ba ng Ama sa Langit ang mga hangarin ng ating puso?

Itinuro ni Pangulong Dieter F. Uchtdorf, na noon ay kabilang sa Unang Panguluhan:

Hayaan ninyong sabihin ko sa inyo na naririnig ang inyong mga panalangin. Alam ng inyong Ama sa Langit ang mga hangarin ng inyong puso. Hindi ko masasabi sa inyo kung bakit nasasagot ang panalangin ng isang tao sa isang paraan samantalang nasasagot naman ang panalangin ng ibang tao sa ibang paraan. Ngunit ito ang masasabi ko sa inyo: ang mga matwid na hangarin ng inyong puso ay matutupad.

Kung minsan, ang landas lang na nasa mismong harapan natin ang nakikita natin. Naiinip tayo at ayaw nating hintayin ang katuparan ng ating mga pinakadakilang hangarin sa hinaharap. Gayunpaman, ang maikling panahon ng buhay na ito ay hindi maikukumpara sa kawalang-hanggan. At kung maaari lamang tayong umasa at manampalataya at masayang magtiis hanggang sa wakas—at sinasabi kong masayang magtiis hanggang sa wakas—doon, sa dakilang makalangit na hinaharap na iyon, makakamtan natin ang katuparan ng mga matwid na hangarin ng ating puso at higit pa na halos hindi natin maunawaan sa ngayon. (Dieter F. Uchtdorf, “The Reflection in the Water” [Church Educational System fireside para sa mga young adult, Nob. 1, 2009], broadcasts.ChurchofJesusChrist.org)

Anong mga maling tradisyon ang itinutuwid ng Doktrina at mga Tipan 137?

Itinuro ni Elder Quentin L. Cook ng Korum ng Labindalawang Apostol:

Noong matanggap ni Joseph Smith ang mga paghahayag at inorganisa ang Simbahan, itinuro ng maraming simbahan na ang Pagbabayad-sala ng Tagapagligtas ay hindi magdudulot ng kaligtasan sa maraming tao. Ang [karaniwang] paniniwala ay kaunti lang ang maliligtas at marami ang [mapupunta] sa walang katapusang pagdurusa na lubhang kakila-kilabot at hindi mailarawan. Ang kamangha-manghang doktrinang inihayag kay Propetang Joseph ang naglantad sa atin ng plano ng kaligtasan para sa buong sangkatauhan, kabilang ang mga hindi nakarinig ng tungkol kay Cristo sa buhay na ito, ang mga batang namatay bago sumapit sa edad ng pananagutan, at mga taong walang kakayahang makaunawa [tingnan sa Doktrina at mga Tipan 29:46–50; 137:7–10]. (Quentin L. Cook, “Plano ng Ating Ama—Sapat para sa Lahat ng Kanyang mga Anak,” Liahona, Mayo 2009, 36–37)

Mga Karagdagang Aktibidad sa Pag-aaral

Karagdagang media

Kung makikinabang ang mga estudyante para lalong maunawaan ang pangitain sa Doktrina at mga Tipan 137 at ang mga alalahanin ni Joseph tungkol sa kanyang kapatid na si Alvin, maaari ninyong panoorin ang “Ministry of Joseph Smith: Temples” (2:19).

Ang mga sumusunod na video ay makatutulong sa mga estudyante na maunawaan kung paano maiibsan ng mga alituntunin ng plano ng kaligtasan ang takot sa kamatayan at ang sakit ng pagkawala ng mahal sa buhay: “If We Are Well Prepared, Death Brings No Terror” (1:10) at “Rise” (1:42).