Lesson 152: Doktrina at mga Tipan 137–138

Doktrina at mga Tipan 138, Bahagi 1

Ang Pangitain tungkol sa Pagdalaw ng Tagapagligtas sa Daigdig ng mga Espiritu

Sa pagluluksa sa pagkamatay ng mga minamahal na kapamilya at pagdadalamhati sa pinsalang dulot ng Unang Digmaang Pandaigdig at ng pandaigdigang pandemya ng trangkaso, naghanap ng kapanatagan si Pangulong Joseph F. Smith sa mga banal na kasulatan. Habang pinagninilayan niya ang mga passage mula sa 1 Pedro 3–4, nakatanggap siya ng isang maluwalhating pangitain tungkol sa pagmiministeryo ng Tagapagligtas sa daigdig ng mga espiritu sa pagitan ng Kanyang kamatayan at Pagkabuhay na Mag-uli. Ang pangitain ni Pangulong Smith ay Doktrina at mga Tipan 138 na ngayon. Ang lesson na ito ay makatutulong sa mga estudyante na maunawaan kung paano nagkakaloob ng kaligtasan ang Tagapagligtas sa mga anak ng Ama sa Langit sa daigdig ng mga espiritu.

Mga Posibleng Aktibidad sa Pag-aaral

Saan tayo pupunta kapag namatay tayo?

Anyayahan ang mga estudyante na pagnilayan ang sumusunod na sitwasyon o gumawa ng sitwasyong angkop sa kanilang mga pangangailangan. Ang layunin ng sitwasyon ay tulungan ang mga estudyante na ma-assess ang nalalaman nila tungkol sa daigdig ng mga espiritu. Maaaring ibahagi ng mga estudyante ang nauunawaan nila na nangyayari sa mga taong tumanggap at hindi tumanggap ng ebanghelyo ni Jesucristo.

Matapos ilibing ang kanyang Lola Roberts, sinabi sa iyo ni Julie na pumanaw ang kanyang Lola at Lolo Roberts nang hindi nabinyagan sa Ang Simbahan ni Jesucristo ng mga Banal sa mga Huling Araw. Ang iba pa niyang lolo at lola (Lola at Lolo Jones) ay namatay na matatapat na miyembro ng Simbahan. Tinanong ka ni Julie, “Ano ang mangyayari sa lolo at lola ko na hindi nabinyagan?”

Pagnilayan ang nalalaman ninyo tungkol sa daigdig ng mga espiritu.

• Gaano kalaki ang kumpiyansa ninyo na ibahagi kay Julie ang mga katotohanan tungkol sa daigdig ng mga espiritu?

Ipaalala sa mga estudyante na ang isang tungkulin ng Espiritu Santo ay patotohanan ang katotohanan. Anyayahan sila na maging sensitibo sa patotoo ng Espiritu sa mga katotohanan tungkol sa plano ng kaligtasan ng Ama sa Langit na pag-aaralan nila ngayon.

Ang pangitain tungkol sa pagtubos sa mga patay

Para makapagbigay ng kontekstong pangkasaysayan sa Doktrina at mga Tipan 138, maaari mong ibahagi ang sumusunod na pahayag ni Pangulong Ballard o ibuod ang Mga Banal: Ang Kuwento ng Simbahan ni Jesucristo sa mga Huling Araw, Tomo 3, Magiting, Marangal, at Malaya, 1893–1955 [2018], 241–58.

Ibinahagi ni Pangulong M. Russell Ballard ng Korum ng Labindalawang Apostol, na apo sa tuhod ni Pangulong Joseph F. Smith, ang sumusunod tungkol sa pangitain na ngayon ay Doktrina at mga Tipan 138.

Noong Oktubre 3, 1918, matapos dumanas ng matinding kalungkutan sa milyun-milyong nangamatay sa mundo dahil sa digmaan at sakit pati na sa pagkamatay ng sarili niyang mga kapamilya, natanggap ni Pangulong Smith ang paghahayag ng langit na kilala bilang “pangitain [tungkol sa] pagtubos sa mga patay.” …

Ang paghahayag na natanggap niya noong Oktubre 3 ay umaliw sa kanyang puso at sumagot sa marami sa kanyang mga tanong. Tayo rin ay maaaliw at matututo pa tungkol sa sarili nating kahihinatnan kapag namatay tayo at nagpunta sa daigdig ng mga espiritu sa pag-aaral sa paghahayag na ito at pagninilay tungkol sa kahalagahan nito sa paraan ng ating pamumuhay bawat araw. (M. Russell Ballard, “Ang Pangitain ng Pagtubos sa mga Patay,” Liahona, Nob. 2018, 72–73)

Basahin ang Doktrina at mga Tipan 138:1–4, at alamin ang mga katotohanang pinagninilayan ni Pangulong Smith nang matanggap niya ang pangitaing ito.

• Ano ang pinakamahalaga para sa inyo tungkol sa kung ano ang pinagninilayan ni Pangulong Smith habang nag-aaral siya?

• Ano ang alam ni Pangulong Smith tungkol kay Jesucristo at sa Kanyang nagbabayad-salang sakripisyo?

  Tulungan ang mga estudyante na tumukoy ng katotohanang tulad ng sumusunod: Sa pamamagitan ng Pagbabayad-sala ni Jesucristo at sa pagsunod sa mga alituntunin ng Kanyang ebanghelyo, ang bawat anak ng Ama sa Langit ay maaaring maligtas.

  Maaari mong ibuod ang Doktrina at mga Tipan 138:5–10 sa pagsasabing binasa ni Pangulong Smith ang 1 Pedro 3–4 habang pinagninilayan niya ang pagtubos sa mga patay na ipinangako ng nagbabayad-salang sakripisyo ng Tagapagligtas. Maaari mong sabihin na ang 1 Pedro 4:6 ay isang doctrinal mastery passage.

• Ano ang nalalaman ninyo tungkol sa kung paano ibinibigay ni Jesucristo ang kaligtasan sa lahat ng anak ng Ama sa Langit?

Ang pagdalaw ng Tagapagligtas sa daigdig ng mga espiritu

Habang pinag-aaralan ng mga estudyante ang pangitain, maaaring makatulong na banggitin na nakita ni Pangulong Smith na dumalaw ang Tagapagligtas sa daigdig ng mga espiritu sa pagitan ng panahon ng Kanyang kamatayan at ng Kanyang Pagkabuhay na Mag-uli.

Ipaalala sa mga estudyante na ang daigdig ng mga espiritu ay nahahati sa paraiso at bilangguan. Kung kinakailangan, maaari mong ipaliwanag na ang bilangguan sa kontekstong ito ay tumutukoy sa pansamantalang lugar sa daigdig ng mga espiritu para sa mga namatay nang walang kaalaman sa katotohanan (sa halip na piitan o selda). Ang mga espiritu sa bilangguang ito ay ang mga tao ring suwail sa mortalidad (tingnan sa Topics and Questions, “Hell,” topics.ChurchofJesusChrist.org).

Basahin ang sumusunod na pahayag ni Pangulong Dallin H. Oaks ng Unang Panguluhan tungkol sa gawain ng kaligtasan para sa lahat ng anak ng Ama sa Langit sa daigdig ng mga espiritu.

Ang gawain ng kaligtasan sa daigdig ng mga espiritu ay kinapapalooban ng pagpapalaya ng mga espiritu mula sa madalas ilarawan ng mga banal na kasulatan na “pagkagapos.” Lahat ng nasa daigdig ng mga espiritu ay nasa ilalim ng pagkagapos. (Dallin H. Oaks, “Magtiwala sa Panginoon,” Liahona, Nob. 2019, 26)

Habang pinag-aaralan ninyo ang pangitaing nakatala sa Doktrina at mga Tipan 138, alamin kung paanong nasa pagkagapos ang mga espiritung anak ng Ama sa Langit at kung paano sila pinalaya ng Tagapagligtas at ng Kanyang nagbabayad-salang sakripisyo.

Ang isang paraan para ayusin ang klase ay hatiin ang mga estudyante sa mga grupong may tigtatatlong miyembro. Anyayahan ang mga estudyante na pag-aralan ang isa sa sumusunod na tatlong bahagi. Pagkatapos maglaan ng oras para talakayin ang mga tanong na ibinigay, maaaring ibahagi ng mga estudyante ang natutuhan nila sa iba nilang kagrupo na ibang bahagi ang pinag-aralan.

Hikayatin ang mga mag-aaral na ibahagi ang mga katotohanang natututuhan nila. Para sa karagdagang training sa kung paano ito gawin, tingnan ang training na may pamagat na “Hikayatin ang mga mag-aaral na ibahagi ang mga katotohanang natututuhan nila,” na matatagpuan sa Mga Kasanayan para sa Pag-unlad ng Guro: Maghikayat ng Masigasig na Pag-aaral. Isiping praktisin ang kasanayang “Anyayahan ang mga estudyante na ibahagi sa isa’t isa ang natutuhan nila.”

• Ano ang natuklasan ninyo?

• Paano tumugon ang mga espiritu sa ebanghelyo ng Tagapagligtas sa mortalidad?

• Paanong nasa pagkagapos ang mga espiritung ito? Paano sila pinalaya ng Tagapagligtas?

• Anong mga pagkakataon ang ibinibigay ng Tagapagligtas sa mga espiritu sa paraiso? Sa bilangguan?

• Ano ang magagawa natin upang makatulong sa Tagapagligtas sa Kanyang gawain?

1. Pinalalaya ng Tagapagligtas ang mga espiritu sa paraiso.

Basahin ang Doktrina at mga Tipan 138:11–19, 23–24, 50–52, at alamin kung paano pinalaya ng Tagapagligtas ang mga nasa paraiso ng mga espiritu.

2. Pinalalaya ng Tagapagligtas ang mga espiritu na nasa bilangguan.

Basahin ang Doktrina at mga Tipan 138:20–22, 29–37, 57–59, at alamin kung paano pinalaya ng Tagapagligtas ang mga nasa bilangguan ng mga espiritu.

3. Inorganisa ng Tagapagligtas ang pangangaral ng ebanghelyo sa daigdig ng mga espiritu.

Basahin ang Doktrina at mga Tipan 138:30–37, 57–59, at alamin kung paano inorganisa ng Tagapagligtas ang pangangaral ng ebanghelyo sa mga nasa bilangguan ng mga espiritu.

Ipakita ang pag-unawa

Upang matulungan ang mga estudyante na maipakita ang kanilang pag-unawa sa Doktrina at mga Tipan 138, maaaring isadula ng mga estudyante ang sitwasyon mula sa simula ng klase. Maaaring maghalinhinan ang mga estudyante sa pagganap sa karakter ni Julie at magpraktis kung paano sasagutin ang kanyang tanong para sa kanyang mga lolo at lola. Kapag natapos na ang oras na nagpraktis ang mga estudyante, maaari nilang ibahagi sa klase ang nadama nila at kung paano naaangkop sa kanila ang mga turong ito.

Maaari mong ibahagi ang iyong patotoo tungkol sa Ama sa Langit, kay Jesucristo, at sa kaligtasang ipinagkakaloob Nila sa mga buhay at patay.

Karagdagang Resources

Saan ko matututuhan pa ang tungkol sa pangitain tungkol sa daigdig ng mga espiritu at kaligtasan para sa mga patay?

• Mga Banal, 3:238–58

• Mga Paksa at Mga Tanong, “Daigdig ng mga Espiritu,” topics.ChurchofJesusChrist.org

• Lisa Olsen Tait, “Susa Young Gates and the Vision of the Redemption of the Dead,” sa Revelations in Context [2016], 315

Paano ko dapat sagutin ang mga tanong ko tungkol sa daigdig ng mga espiritu?

Matapos ibahagi na marami tayong hindi nalalaman tungkol sa daigdig ng mga espiritu, ipinaliwanag ni Pangulong Dallin H. Oaks ng Unang Panguluhan kung paano sasagutin ang ating mga tanong:

Para sa lahat ng tanong tungkol sa daigdig ng mga espiritu, may dalawang sagot ako. Una, tandaan na mahal ng Diyos ang Kanyang mga anak at tiyak na gagawin ang pinakamainam para sa bawat isa sa atin. Ikalawa, tandaan ang pamilyar na turong ito mula sa Biblia, na lubos na nakatutulong sa akin sa maraming tanong na hindi nasagot:

“Tumiwala ka sa Panginoon ng buong puso mo; at huwag kang manalig sa iyong sariling kaunawaan.

“Kilalanin mo siya sa lahat ng iyong mga lakad, at kaniyang ituturo ang iyong mga landas” (Mga Kawikaan 3:5–6). …

Maaaring pag-isipan nating lahat nang sarilinan ang tungkol sa kalagayan sa daigdig ng mga espiritu, o kaya ay talakayin ang mga ito o ang iba pang mga tanong na hindi nasagot sa pamilya o sa mga taong malapit sa atin. Ngunit huwag nating ituro o gamitin bilang opisyal na doktrina ang hindi akma sa mga pamantayan ng isang opisyal na doktrina. Ang paggawa nito ay hindi makapagsusulong sa gawain ng Panginoon at maaaring ikawala pa ng paghahangad ng mga tao ng kapanatagan o lakas sa pamamagitan ng personal na paghahayag na ibinigay ng plano ng Panginoon para sa bawat isa sa atin. (Dallin H. Oaks, “Magtiwala sa Panginoon,” Liahona, Nob. 2019, 28)

Paano pinalalaya ng Tagapagligtas ang mga nasa daigdig ng mga espiritu mula sa pagkagapos?

Itinuro ni Pangulong Dallin H. Oaks ng Unang Panguluhan:

Ang napakagandang paghahayag na natanggap ni Pangulong Joseph F. Smith, na itinuring nang banal na kasulatan sa bahagi 138 ng Doktrina at mga Tipan, ay naglalahad na ang mabubuting namatay, na nasa kalagayan ng “kapayapaan” (Doktrina at mga Tipan 138:22) habang naghihintay sa Pagkabuhay na Mag-uli (tingnan sa Doktrina at mga Tipan 138:16), “ay tumingin sa matagal na pagkawala ng kanilang mga espiritu mula sa kanilang mga katawan bilang isang pagkagapos” (Doktrina at mga Tipan 138:50).

Ang masasama ay dumaranas din ng karagdagang pagkagapos. Dahil sa mga kasalanan na hindi pinagsisihan, sila ay nasa kalagayan na tinawag ni Apostol Pedro na “bilangguan” ng espiritu (1 Pedro 3:19; tingnan din sa Doktrina at mga Tipan 138:42). Ang mga espiritung ito ay inilarawan bilang “nakagapos” o bilang “mga bilanggo” (Doktrina at mga Tipan 138:31, 42) o “itatapon sa labas na kadiliman” na may “pagtangis, at panaghoy, at pagngangalit ng mga ngipin” habang hinihintay nila ang pagkabuhay na mag-uli at paghuhukom (Alma 40:13–14).

Ang pagkabuhay na mag-uli ng mga nasa daigdig ng mga espiritu ay natiyak dahil sa Pagkabuhay na Mag-uli ni Jesucristo (tingnan sa 1 Corinto 15:22), bagama’t nangyayari ito sa iba’t ibang panahon para sa iba’t ibang grupo. Hanggang sa itinalagang panahong iyon, ang sinasabi sa atin ng mga banal na kasulatan tungkol sa gawain sa daigdig ng mga espiritu ay pangunahing nakatuon sa gawain ng kaligtasan. Wala nang iba pang inihayag. Ipinangaral ang ebanghelyo sa mga mangmang, hindi nagsipagsisi at sa mga mapanghimagsik para sila ay mapalaya mula sa pagkaalipin at patuloy na kamtin ang mga pagpapalang inilaan ng isang mapagmahal na Ama sa Langit para sa kanila.

Ang pagkagapos sa daigdig ng mga espiritu para sa mabubuting kaluluwang nagbalik-loob ay ang pangangailangan nilang maghintay—at marahil ay mapahintulutan pa na gabayan—ang pagsasagawa sa mundo ng mga ordenansa para sa kanila nang sa gayon ay maaari na silang mabinyagan at matamasa ang mga pagpapala ng Espiritu Santo (tingnan sa Doktrina at mga Tipan 138:30–37, 57–58). Ang mga ordenansang ito na isinasagawa sa mundo [para sa mga pumanaw] ay nagbibigay din sa kanila ng kapangyarihan na sumulong sa ilalim ng awtoridad ng priesthood upang paramihin ang mga hukbo ng mabubuti na maaaring mangaral ng ebanghelyo sa mga espiritung nasa bilangguan. (Dallin H. Oaks, “Magtiwala sa Panginoon,” Liahona, Nob. 2019, 26–27)

Ano ang hinihingi sa mga nasa bilangguan ng mga espiritu?

Habang pinangungunahan ang video tour sa Rome Italy Temple bago ito inilaan, itinuro nina Elder David A. Bednar at Ronald A. Rasband ng Korum ng Labindalawang Apostol:

Sinabi ng Tagapagligtas, “Malibang ang isang tao’y ipanganak ng tubig at ng Espiritu, hindi siya makakapasok sa kaharian ng [langit].” Ang binyag sa pamamagitan ng paglulubog para sa kapatawaran ng mga kasalanan ay isang mahalaga at kinakailangang ordenansa sa ebanghelyo ni Jesucristo. At dito sa templo, ginagawa natin ang mga pagbibinyag para sa mga patay. Dalawang miyembro ng ating Simbahan ang papasok sa bautismuhan na nakasuot ng puti, at doon sila mabibinyagan para sa kanilang mga yumaong ninuno. Ang binyag para sa mga patay ay itinuro ni Apostol Pablo sa Bagong Tipan, at may pribilehiyo tayong ipagpatuloy ang ordenansang iyon sa Simbahan ngayon sa lahat ng templo sa iba’t ibang panig ng mundo.

Isa sa mahahalagang tanong sa Kristiyanismo ay kung ano ang mangyayari sa mga taong hindi kailanman narinig ang tungkol kay Jesucristo. Tanging ang Kanyang pangalan lamang sa ilalim ng langit ang makapagliligtas sa isang lalaki o babae. Subalit sa lahat ng nabuhay, iilan lamang ang nakarinig ng tungkol sa Kanya, nagkaroon ng pagkakataong matutuhan ang Kanyang doktrina, at matanggap ang nakapagliligtas na ordenansa ng binyag sa pamamagitan ng paglulubog sa tubig. Nagagawa iyan sa pamamagitan pagbibinyag para sa mga patay. May ilang tao na magtatanong kung pinipilit o pinupuwersa natin ang ating mga ninuno na maging miyembro ng Ang Simbahan ni Jesucristo ng mga Banal sa mga Huling Araw. At ang sagot ay hindi. Ito ay isang handog na may pagmamahal. At pagkatapos ay may pagkakataon silang tanggapin o tanggihan ang ordenansang iyon. (David A. Bednar at Ronald A. Rasband, sa “Two Apostles Lead a Virtual Tour of the Rome Italy Temple” [video], ChurchofJesusChrist.org)

Mga Karagdagang Aktibidad sa Pag-aaral

Isadula ang pangitain na nasa bahagi 138

Maaari mong tulungan ang mga estudyante na mapitagang isadula kung paano maaaring ipinapangaral ang ebanghelyo sa daigdig ng mga espiritu. Maaari mong isadula ang sitwasyon ni Julie mula sa lesson. Maaari kang magtawag ng dalawang estudyante na gaganap bilang kanyang Lola at Lolo Roberts, na mapupunta sa bilangguan ng mga espiritu. Ang isa pang pares ng mga estudyante ay maaaring gumanap bilang Lola at Lolo Jones, na mapupunta sa paraiso ng mga espiritu. Anyayahan ang mga estudyante na gaganap bilang ang mga Jones na bisitahin ang mga Roberts upang ituro sa kanila ang ebanghelyo. Anyayahan ang iba pang mga estudyante na gumanap bilang si Julie at ang kanyang kapatid na lalaki, na bibinyagan sa templo para sa kanilang lolo at lola, ang mga Roberts. Pagkatapos ay maaari nang umalis ang mga Roberts sa bilangguan ng mga espiritu at pumasok sa paraiso ng mga espiritu.

Tandaan: Ang layunin ay hindi ipakita kung sino ang nagtuturo ng ebanghelyo sa kung sino sa daigdig ng mga espiritu; sa halip, ito ay para ipakita kung paano umaalis ang mga espiritu sa bilangguan ng mga espiritu matapos nilang tanggapin ang ordenansa ng pagbibinyag na isinagawa sa templo (tingnan sa Doktrina at mga Tipan 138:31).

Pagdalaw mula sa daigdig ng mga espiritu sa lolo ni Pangulong Nelson

Para kumpirmahin ang mga katotohanang natuklasan ng mga estudyante habang pinag-aaralan ang bahagi 138, maaari mong ibahagi sa kanila ang isang kuwento na ibinahagi ni Pangulong Nelson tungkol sa kanyang lolo. Maaari mong ipanood ang video na “A Visit from Father” (3:20). Pagkatapos ng kuwento, maaari kang magbigay sa mga estudyante ng mga tanong na tatalakayin tulad ng:

• Ano ang natutuhan ninyo mula sa kuwento ni Pangulong Nelson?

• Ano ang itinuturo sa inyo ng salaysay na ito tungkol sa plano ng Ama sa Langit?

Pagninilay at pag-iisip tungkol sa mga banal na kasulatan

Kung makikinabang ang mga estudyante sa talakayan kung paano nag-aanyaya ng paghahayag ang pagninilay o pag-iisip tungkol sa mga banal na kasulatan, anyayahan sila na basahin ang Doktrina at mga Tipan 138:1–4, 11, 29. Ipahanap sa kanila ang mga salitang ginamit ni Pangulong Smith para ilarawan kung paano niya isinagawa ang pag-aaral ng mga banal na kasulatan na ito. Maaaring makatukoy ang mga estudyante ng katotohanang tulad ng sumusunod: ang pagninilay sa mga banal na kasulatan at pag-iisip sa nagbabayad-salang sakripisyo ng Tagapagligtas ay makapaghahanda sa atin na tanggapin ang paghahayag mula sa Diyos.

Anyayahan ang mga estudyante na ibahagi, kung hindi ito masyadong personal, ang mga naging karanasan nila sa pagtanggap ng paghahayag kapag pinagninilayan o pinag-iisipan ang mga banal na kasulatan. Maaari mong itanong ang tulad ng sumusunod:

• Sa inyong palagay, bakit humahantong sa paghahayag ang pagninilay sa mga banal na kasulatan?

Mga opsiyon sa video

Kung makikinabang ang mga estudyante sa pag-aaral pa ng tungkol sa karanasang humantong sa pangitain ni Pangulong Joseph F. Smith, maaari ninyong panoorin ang “Ministry of Joseph F. Smith: A Vision of the Redemption of the Dead” (3:06).

Upang matulungan ang mga estudyante na mailarawan sa isipan ang mga pangyayaring inilarawan sa bahagi 138, maaari mong ipanood ang video na “To This End Was I Born” mula sa time code na 21:20 hanggang 24:23. Mapapanood rito ang paglalarawan ng pagpasok ng Tagapagligtas sa daigdig ng mga espiritu matapos Siyang Ipako sa Krus.

Upang matulungan ang mga estudyante na mas maunawaan ang nangyayari sa ating espiritu pagkatapos ng kamatayan, maaari mong ipanood ang “What Happens to Our Bodies and Spirits after We Die?” (4:19).

Upang matulungan ang mga estudyante na maunawaan ang pagpapalaya ng Tagapagligtas sa mga anak ng Ama sa Langit mula sa pagkagapos, maaari mong ipanood ang “Handel’s Messiah: Debtor’s Prison” (3:35).