Lēsoni 152—Tokāteline mo e Ngaahi Fuakava 138, Konga 1: Ko e Mata Meʻa-Hā-Mai ʻo e ʻAʻahi ʻa e Fakamoʻuí ki he Maama Tataliʻanga ʻo e Ngaahi Laumālié
“Lēsoni 152—Tokāteline mo e Ngaahi Fuakava 138, Konga 1: Ko e Mata Meʻa-Hā-Mai ʻo e ʻAʻahi ʻa e Fakamoʻuí ki he Maama Tataliʻanga ʻo e Ngaahi Laumālié,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 138, Konga 1,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 152: Tokāteline mo e Ngaahi Fuakava 137–138
Ko e Mata Meʻa-Hā-Mai ʻo e ʻAʻahi ʻa e Fakamoʻuí ki he Maama Tataliʻanga ʻo e Ngaahi Laumālié
ʻI he tengihia ʻe Palesiteni Siosefa F. Sāmita ʻa e mate ʻa ha kau mēmipa ʻofeina ʻo hono fāmilí mo mamahi ʻi he fakaʻauha ne fakatupu ʻe he Tau Lahi ʻa Māmani Hono I, pea mo e mahaki fakaʻauha fakamāmani lahí, naʻá ne fekumi ai ki ha fakafiemālie ʻi he folofolá. ʻI heʻene fakakaukau ki he ngaahi potufolofola mei he 1 Pita 3–4, naʻá ne maʻu ha mata meʻa-hā-mai nāunauʻia ki he ngāue fakaetauhi ʻa e Fakamoʻuí ʻi he maama tataliʻanga ʻo e ngaahi laumālié ʻi he vahaʻa ʻo ʻEne pekiá mo e Toetuʻú. ʻOku hoko e mata meʻa-hā-mai ʻa Palesiteni Sāmitá he taimí ni ko e Tokāteline mo e Ngaahi Fuakava 138. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku foaki ai ʻe Sīsū Kalaisi ʻa e fakamoʻuí ki he fānau ʻa e Tamai Hēvaní ʻi he maama tataliʻanga ʻo e ngaahi laumālié.
Ngaahi ʻEkitivitī Ako ʻOku Ala Fakahokó
Te tau ʻalu ki fē ʻi heʻetau maté?
Fakaafeʻi e kau akó ke fakalaulauloto ki he tūkunga ko ʻení pe ke faʻu ha tūkunga ʻoku feʻunga mo ʻenau ngaahi fiemaʻú. Ko e taumuʻa ʻo e tūkungá ke tokoniʻi e kau akó ke vakaiʻi e meʻa ʻoku nau ʻilo fekauʻaki mo e maama tataliʻanga ʻo e ngaahi laumālié. ʻE lava ke vahevahe ʻe he kau akó ʻa e meʻa ʻoku mahino kiate kinautolu ʻoku hoko kiate kinautolu kuo nau tali mo teʻeki tali e ongoongolelei ʻo Sīsū Kalaisí.
Hili e meʻafakaʻeiki ʻo e Kui Fefine ʻa Suli ko Lōpetí, ʻokú ne tala atu naʻe fakatou mālōlō ʻene Kui-fefine mo e Kui-tangata Lōpetí ʻoku teʻeki ke na papitaiso ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe mālōlō ʻene ongo kui ʻe tahá (Kui-fefine mo e Kui-tangata Sōnasí) ko ha ongo mēmipa faivelenga fuoloa ʻi he Siasí. ʻOku fehuʻi atu ʻe Suli, “Ko e hā e meʻa ʻe hoko ki heʻeku ongo kui ne teʻeki ke papitaiso maí?”
Fakakaukau ki he meʻa ʻokú ke ʻilo fekauʻaki mo e maama tataliʻanga ʻo e ngaahi laumālié.
Te ke ongoʻi loto-falala fēfē nai ke vahevahe mo Suli ha ngaahi moʻoni fekauʻaki mo e maama tataliʻanga ʻo e ngaahi laumālié?
Fakamanatu ki he kau akó ko e fatongia ʻe taha ʻo e Laumālie Māʻoniʻoní ke fakamoʻoniʻi ʻa e moʻoní. Fakaafeʻi kinautolu ke nau ongoʻingofua e fakamoʻoni ʻa e Laumālié ki he ngaahi moʻoni fekauʻaki mo e palani ʻo e fakamoʻui ʻa e Tamai Hēvaní te nau ako he ʻaho ní.
Ko e mata meʻa-hā-mai ʻo hono huhuʻi ʻo e pekiá
Ke maʻu ha puipuituʻa fakahisitōlia ki he Tokāteline mo e Ngaahi Fuakava 138, fakakaukau ke vahevahe ʻa e fakamatala ko ʻeni ʻa Palesiteni Pālatí pe fakamatalaʻi fakanounou ʻa e Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, Vōliume 3, Loto-toʻa, Fakaʻeiʻeiki mo e Tauʻatāina, 1893–1955 [2018], 239.
Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, ko ha mokopuna ua ʻo Palesiteni Siosefa F. Sāmita, ʻa e meʻá ni fekauʻaki mo e mata meʻa-hā-mai ʻoku maʻu he taimí ni ko e Tokāteline mo e Ngaahi Fuakava 138.
2:3
ʻI he ʻaho 3 ʻo ʻOkatopa 1918, ne maʻu ʻe Palesiteni Sāmita ʻi he hili ʻene foua e mamahi lahi ʻi he lauimiliona kuo pekia ʻi māmani ʻi he taú mo e mahakí, pea pehē ki he kau pekia ʻi hono fāmilí, ha fakahā fakalangi ʻoku ʻiloa ko e “mata meʻa-hā-mai ʻo e huhuʻi e kau pekiá.” …
Naʻe fakanonga ʻe he fakahā naʻá ne maʻu ʻi he ʻaho 3 ʻo ʻOkatopá ʻa hono lotó mo ʻomi e tali ki ha lahi ʻo ʻene ngaahi fehuʻí. ʻE lava ke fakanonga mo kitautolu foki mo tau ʻilo lahi ange ki hotau kahaʻú ʻi he taimi te tau mālōlō ai mo hotau ngaahi ʻofaʻangá mo ō ki he maama tataliʻangá, ʻaki haʻatau ako e fakahā ko ʻení mo fakalaulauloto ki hono mahuʻinga ʻi he anga ʻo ʻetau moʻuí he ʻaho takitaha. (M. Russell Ballard, “Ko e [Mata] Meʻa-Hā-Mai ʻo e Huhuʻi ʻo e Kau Pekiá,” Liahona, Nōvema 2018, 72–73)
Lau ʻa e Tokāteline mo e Ngaahi Fuakava 138:1–4, ʻo kumi e ngaahi moʻoni naʻe fakalaulauloto ki ai ʻa Palesiteni Sāmita ʻi heʻene maʻu ʻa e mata meʻa-hā-mai ko ʻení.
Ko e hā ha meʻa ʻoku makehe kiate koe fekauʻaki mo e meʻa naʻe fakakaukau ki ai ʻa Palesiteni Sāmita ʻi heʻene akó?
Ko e hā e meʻa naʻe ʻilo ʻe Palesiteni Sāmita fekauʻaki mo Sīsū Kalaisi mo ʻEne feilaulau fakaleleí?
Tokoni ke ʻiloʻi ʻe he kau akó ha foʻi moʻoni hangē ko ʻení: ʻE lava ke fakahaofi ʻa e fānau takitaha ʻa e Tamai Hēvaní ʻo fakafou ʻi he Fakalelei ʻa Sīsū Kalaisí pea ʻi he talangofua ki he ngaahi tefitoʻi moʻoni ʻo ʻEne ongoongoleleí.
Te ke lava ʻo fakamatalaʻi fakanounou ʻa e Tokāteline mo e Ngaahi Fuakava 138:5–10 ʻaki hano vahevahe ange naʻe ʻalu ʻa Palesiteni Sāmita ki he 1 Pita 3–4 ʻi heʻene fakakaukau ki hono huhuʻi ʻo e kau pekiá ʻa ia ne talaʻofa mai ʻe he feilaulau fakalelei ʻa e Fakamoʻuí. Te ke lava ʻo fakamahinoʻi ange ko e 1 Pita 4:6 ko ha potufolofola fakataukei fakatokāteline ia.
Ko e hā e meʻa ʻokú ke ʻilo fekauʻaki mo e founga ʻoku fakaʻatā ai ʻe Sīsū Kalaisi ʻa e fakamoʻuí ki he fānau kotoa ʻa e Tamai Hēvaní?
Ko e hā ʻa e Fakamoʻuí ʻi he maama ʻo e ngaahi laumālié
ʻI hono ako ʻe he kau akó ʻa e mata meʻa-hā-maí, ʻe ala tokoni ke fakamahinoʻi ange naʻe mamata ʻa Palesiteni Sāmita ki he ʻaʻahi ʻa e Fakamoʻuí ki he maama tataliʻanga ʻo e ngaahi laumālié ʻi he vahaʻataimi ʻo ʻEne pekiá mo ʻEne Toetuʻú.
Fakamanatu ki he kau akó ʻoku vahevahe ʻa e maama tataliʻanga ʻo e ngaahi laumālié ki palataisi mo e fale fakapōpulá. Kapau ʻe fiemaʻu, te ke lava ʻo fakamatalaʻi ange ʻoku ʻuhinga ʻa e fale fakapōpulá ʻi he tuʻunga ko ʻení ki ha feituʻu fakataimi ʻi he maama tataliʻanga ʻo e ngaahi laumālié maʻanautolu naʻe pekia taʻe ʻi ai ha ʻilo ki he moʻoní (kae ʻikai ko ha fale fakapōpula pe pilisone). Ko e ngaahi laumālie ʻi he fale fakapōpula ko ʻení ko kinautolu foki ia naʻe talangataʻa ʻi he matelié (vakai, Ngaahi Tefitó mo e Ngaahi Fehuʻí, “Hell,” topics.ChurchofJesusChrist.org).
Lau ʻa e lea ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí fekauʻaki mo e ngāue ʻo e fakamoʻuí maʻá e fānau kotoa ʻa e Tamai Hēvaní ʻi he maama tataliʻanga ʻo e ngaahi laumālié.
ʻOku kau ʻi he ngāue ʻo e fakamoʻui ʻi he maama tataliʻanga ʻo e ngaahi laumālié hono fakatauʻatāinaʻi ʻo e ngaahi laumālié mei he meʻa ʻoku faʻa fakamatalaʻi ʻe he folofolá ko e “nofo pōpula.” Ko kinautolu kotoa ʻi he maama tataliʻanga ʻo e ngaahi laumālié ʻoku nau ʻi ha faʻahinga tuʻunga nofo pōpula. (Dallin H. Oaks, “Falala ki he ʻEikí,” Liahona, Nōvema 2019, 26)
ʻI hoʻo ako ʻa e mata meʻa-hā-mai ʻoku lekooti ʻi he Tokāteline mo e Ngaahi Fuakava 138, kumi e founga ʻoku nofo pōpula ai e fānau fakalaumālie ʻa e Tamai Hēvaní mo e founga ʻoku fakatauʻatāinaʻi ai kinautolu ʻe he Fakamoʻuí mo ʻEne feilaulau fakaleleí.
Ko e founga ʻe taha ke fokotuʻutuʻu ai e kalasí ko hono fokotuʻutuʻu e kau akó ki ha ngaahi kulupu tautau toko tolu. Fakaafeʻi e kau akó ke nau ako ha taha ʻo e ngaahi vahe ʻe tolu ko ʻení. Hili ha taimi ke aleaʻi ai e ngaahi fehuʻi ʻoku ʻomaí, ʻe lava ke vahevahe ʻe he kau akó ʻa e meʻa ne nau akó mo e niʻihi kehe ʻi heʻenau kulupú ʻa ia ne nau ako ha konga kehe.
ʻOku fokotuʻutuʻu ʻe he Fakamoʻuí ʻa hono malanga ʻaki ʻo e ongoongoleleí ʻi he maama tataliʻanga ʻo e ngaahi laumālié.
Lau ʻa e Tokāteline mo e Ngaahi Fuakava 138:30–37, 57–59, ʻo kumi e founga naʻe fokotuʻutuʻu ʻe he Fakamoʻuí ki hono malanga ʻaki ʻo e ongoongoleleí kiate kinautolu ʻi he fale fakapōpula ʻo e ngaahi laumālié.
Fakahaaʻi ʻa e mahinó
Ke tokoni ke fakahaaʻi ʻe he kau akó ʻenau mahino ki he Tokāteline mo e Ngaahi Fuakava 138, ʻe lava ke fakatātaaʻi ʻe he kau akó ʻa e tūkunga mei he kamataʻanga ʻo e kalasí. ʻE lava ke fetongitongi e kau akó ʻi hono fakatātaaʻi ʻo Sulí pea akoako e founga ke tali ʻaki ʻene fehuʻi ki heʻene ngaahi kuí. Hili hono maʻu ʻe he kau akó ha taimi ke akoako ai, te nau lava ʻo vahevahe mo e kalasí ʻa e meʻa ne nau ongoʻí pea mo e founga ʻoku kaunga ai e ngaahi akonaki ko ʻení kiate kinautolú.
Te ke lava ʻo vahevahe hoʻo fakamoʻoni ki he Tamai Hēvaní, Sīsū Kalaisi, pea mo e fakamoʻui ʻokú Na foaki ki he kakai moʻuí mo e kau pekiá.