Lēsoni 153: Tokāteline mo e Ngaahi Fuakava 137–138

Tokāteline mo e Ngaahi Fuakava 138, Konga 2

“Teuteu Kinautolu Ke Nau Haʻu ʻi he Taimi Totonu ʻo e ʻEikí”

Naʻe mamata ʻa Palesiteni Siosefa F. Sāmita ki ha tokolahi ʻo e ngaahi laumālie fakaʻeiʻeiki mo maʻongoʻonga ʻa e Tamai Hēvaní, ko ha konga ʻo ʻene meʻa-hā-mai ki he maama tataliʻanga ʻo e ngaahi laumālié. Naʻá ne mamata ki ha kau palōfita ʻo e kuonga muʻá ne nau fakahoko faivelenga e ngāue ʻa e ʻEikí. Naʻá ne mamata foki ki ha niʻihi kehe naʻe fakatatali ʻe he ʻEikí ke fāʻeleʻi ʻi he ngaahi ʻaho kimui ní ke langa ha ngaahi temipale mo fakahoko e ngaahi ouau maʻá e kau pekiá. ʻOku malava ke fakahoko ʻa e ngaahi ouau peheé ʻo fakafou ʻi he ngāue fakatemipalé mo e hisitōlia fakafāmilí. ʻE lava ke tokoni e lēsoni ko ʻení ke ongoʻi ʻe he kau akó ʻoku ueʻi kinautolu ke kau ʻi he ngāue fakatemipalé mo e hisitōlia fakafāmilí.

Ngaahi ʻEkitivitī Ako ʻOku Ala Fakahokó

Ko ʻeku ngāue mahuʻingá

ʻE lava ke tokoni ʻa e ngaahi fakamatala ko ʻení ki he kau akó ke nau fakakaukau ki he ngāue mahuʻinga ʻoku maʻu ʻe he Tamai Hēvaní maʻanautolú. Hili ha taimi ke fakalaulauloto mo tohi ai, ʻe lava ke vahevahe ʻe he kau ako ʻe loto-fiemālié ʻenau ngaahi talí.

• Ko e niʻihi ʻo e ngaahi meʻa mahuʻinga taha kuó u fai ʻi heʻeku moʻuí ko e …

• Ko e niʻihi ʻo e ngaahi meʻa mahuʻinga taha te u ala fai ʻi heʻeku moʻuí ko e …

• Naʻe fekauʻi mai au ʻe he Tamai Hēvaní ki he māmaní ʻi he taimi ko ʻení ke …

Fakaafeʻi e kau akó ke fekumi ki ha fakahā fakataautaha ke ʻiloʻi ha niʻihi ʻo e ngaahi meʻa mahuʻinga ʻoku finangalo ʻa e Tamai Hēvaní mo Sīsū Kalaisi ke nau fakahokó. ʻE lava foki ke ako ʻe he kau akó honau ngaahi tāpuaki fakapēteliaké ʻi ʻapi ke ʻilo lahi ange ki he meʻá ni.

Naʻe fakatatali ʻa e ngaahi laumālie kuo filí ke nau toki haʻu ʻi he kakato ʻo e ngaahi kuongá

Fakaafeʻi e kau akó ke vahevahe e meʻa ʻoku nau manatuʻi fekauʻaki mo e palani ʻa e Tamai Hēvaní mei he mata meʻa-hā-mai ʻa Palesiteni Siosefa F. Samita ki he maama tataliʻanga ʻo e ngaahi laumālié (vakai, Tokāteline mo e Ngaahi Fuakava 138:11–60).

Tokoni ke mahino ki he kau akó naʻe mamata ʻa Palesiteni Siosefa F. Sāmita ʻi he Tokāteline mo e Ngaahi Fuakava 138:38–49, 53, ki ha ngaahi laumālie fakaʻeiʻeiki mo maʻongoʻonga lahi. Te ke lava ʻo fakaafeʻi e kau akó ke nau talaatu ha niʻihi ʻo e kakai naʻe mamata ki ai ʻa Palesiteni Sāmita ʻi heʻene mata meʻa-hā-maí.

Lau ʻa e Tokāteline mo e Ngaahi Fuakava 138:53–56, ʻo kumi e ngāue naʻe teuteuʻi ʻe he Tamai Hēvaní ke fakahoko ʻe he ngaahi laumālie fakaʻeiʻeikí ʻi he ngaahi ʻaho kimui ní.

• Ko e hā ha ngaahi kupuʻi lea ʻi he ngaahi veesi ko ʻení ʻe ala ʻuhinga kiate koe?

• Ko e hā ʻokú ke ako fekauʻaki mo e ngāue ʻa e Tamai Hēvaní maʻaú?

• Te ke fakamatala fakanounouʻi fēfē ʻa e ngaahi veesi ko ʻení ki ha fakamatala ʻo e moʻoní?

  ʻI hono fakamatalaʻi fakanounou ʻe he kau akó ʻa e ngaahi veesi ko ʻení, tokoni ke nau ʻiloʻi ha moʻoni hangē ko ʻení: Naʻe fakatatali ʻe he Tamai Hēvaní ʻa e ngaahi laumālie kuo filí ke nau ngāue ʻi he ngoue vaine ʻa e ʻEikí ki hono fakamoʻui ʻo ʻEne fānaú.

• Ko e hā ha ngaahi founga te tau lava ai ʻo ngāue ʻi he ngoue vaine ʻa e ʻEikí ke tokoni ke fakahaofi ʻEne fānaú?

Kapau he ʻikai ʻohake ia ʻe he kau akó, te ke lava ʻo tohoakiʻi ʻenau tokangá ki he veesi 54. Tokoniʻi kinautolu ke nau ʻiloʻi te tau lava ʻo ngāue ʻi he ngoue vaine ʻa e ʻEikí ʻaki ʻetau kau ʻi he ngaahi ouau fakatemipale maʻá e kau pekiá. Te ke lava ʻo fakamanatu ki he kau akó ko hono fakahoko ʻo e ngaahi ouau fakatemipalé maʻá e kakai ʻi he tafaʻaki ʻe taha ʻo e veilí, ko e founga ia ʻe taha ʻoku tau tokoni ai ki hono tānaki ʻo ʻIsilelí.

ʻE lava ke tokoni ʻa e fakamatala ko ʻení ke ʻiloʻi ʻe he kau akó ʻoku kaunga ʻa e Tokāteline mo e Ngaahi Fuakava 138:53–56 kiate kinautolu. Ke akoako fakafehokotaki ʻi he Gospel Library, ʻe lava ke faʻu ʻe he kau akó ha fehokotakiʻanga ʻi he ngaahi veesi folofolá mo e fakamatalá.

Naʻe fakamoʻoni ʻa Palesiteni Lāsolo M. Nalesoni ʻo pehē:

Ko e kotoa ʻo e kakai kuo nau moʻui ʻi he funga ʻo e māmaní, ko kitautolu ʻa e niʻihi ʻe kau ʻi he tānaki kāfakafa fakaʻosi ko ʻení. Hono ʻikai ke fakafiefia moʻoni ia!

Kuo fakatatali ʻe heʻetau Tamai Hēvaní ʻa ʻEne ngaahi laumālie fakaʻeiʻeiki tahá—pea mahalo te u pehē ko ʻEne timi lelei tahá—ki he kuonga fakaʻosi ko ení. Ko e ngaahi laumālie fakaʻeiʻeiki ko iá—kau ngāue lelei taha ko iá, kau helo ko iá— ʻa kimoutolu! (Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], ChurchofJesusChrist.org)

ʻE lava ke tokoni ʻa e ngaahi fehuʻi ko ʻení ki he kau akó ke vakaiʻi ʻenau ngaahi ongo lolotonga fekauʻaki mo e kau atu ki he hisitōlia fakafāmilí mo e ngāue fakatemipalé. Hili hono ʻoange ha taimi feʻunga ke nau fakakaukauloto aí, ʻe lava ke vahevahe ʻe he kau akó ʻenau ngaahi fakakaukaú mo e ongó.

• ʻOkú ke ongoʻi fēfē ʻi hoʻo ʻiloʻi naʻe teuteuʻi koe ʻe he ʻEikí ke tokoni ki hono tānaki ʻo ʻIsilelí ʻo fakafou ʻi he hisitōlia fakafāmilí mo e ngāue fakatemipalé?

• ʻOkú ke ongoʻi ʻoku fakaʻaiʻai fēfē koe ke ke kau ʻi he hisitōlia fakafāmilí mo e ngāue fakatemipalé? Ko e hā ʻokú ke ongoʻi pehē aí?

Naʻe poupouʻi ʻa e kau akó ʻi he lēsoni “Tokāteline mo e Ngaahi Fuakava 127–128, Konga 2,” ke nau kau ʻi he ngāue fakatemipalé mo e hisitōlia fakafāmilí. Te ke lava ʻo fakaafeʻi e kau akó ke vahevahe ʻa e meʻa kuo nau faí mo e founga kuo tāpuekina ai kinautolu ʻe he ʻEikí.

Fakatatali ke tokoni ki hono tānaki ʻo ʻIsilelí ʻo fakafou ʻi he ngāue fakatemipalé mo e hisitōlia fakafāmilí

Ko e founga ʻeni ʻe taha ke tokoniʻi ai e kau akó ke nau fatongia ʻaki ʻenau akó.

Fakaafeʻi kinautolu ke faʻu ha pōpoaki te nau lava ʻo vahevahe ke fakaʻaiʻai e kakaí ke nau kau ʻi he ngāue fakatemipalé mo e hisitōlia fakafāmilí. ʻE lava pē ke hoko ia ko ha laʻipepa fakaafe, tohi ʻi he mītia fakasōsialé, pōpoaki vitiō, pe ko ha founga fakaafe kehe. Tuku ke fili ʻe he kau akó ʻa e faʻahinga pōpoaki ke nau faʻú.

ʻE lava ke ʻoange ʻe he fakamatala ʻi he laʻipepa tufa “Fakatatali ke Tokoni ki hono Tānaki ʻo ʻIsilelí ʻo fakafou ʻi he Ngāue Fakatemipalé mo e Hisitōlia Fakafāmilí” ha ngaahi fakakaukau ki he kau akó ʻo e meʻa ke fakakau ʻi heʻenau pōpoakí. Fakaafeʻi e kau akó ke ako ʻa e fakamatala ko ʻení kimuʻa pea toki faʻu ʻenau pōpoakí. ʻE lava ke fili ʻa e kau akó ke nau ako fakafoʻituitui pe fakakulupu iiki.

Fakatatali ke Tokoni ki hono Tānaki ʻo ʻIsilelí ʻo fakafou ʻi he Ngāue Fakatemipalé mo e Hisitōlia Fakafāmilí

1. Lau ʻa e Tokāteline mo e Ngaahi Fuakava 138:57–59, ʻo kumi e founga ʻoku huhuʻi ai ʻa kinautolu ʻi he maama tataliʻanga ʻo e ngaahi laumālié.

2. Lau ʻa e lea ko ʻeni ʻa Palesiteni Henelī B. ʻAealingi ʻo e Kau Palesitenisī ʻUluakí. Fekumi ki he ongo ʻoku maʻu ʻe he Fakamoʻuí kiate kinautolu ʻoku kau ʻi he ngāue fakatemipalé mo e hisitōlia fakafāmilí.

Fakakaukau ki he Fakamoʻuí ʻi hoʻo feʻiloaki mo Iá. Te ke maʻu ʻa e ʻinitaviu ko iá. Naʻá Ne totongi huhuʻi e ngaahi angahala ʻa koe mo e kotoa e fānau fakalaumālie ʻa e Tamai Hēvaní. Ko Sihova Ia. Naʻá Ne fekauʻi mai ʻa ʻIlaisiā. Naʻá Ne foaki ʻa e ngaahi mālohi ʻo e lakanga fakataulaʻeikí ke silaʻi mo tāpuaki ʻi he ʻofa haohaoa. Pea kuó Ne falala atu ʻaki ʻEne tuku ke ke fanongo ki he ongoongoleleí ʻi hoʻo moʻuí, ʻo ʻoatu ai e faingamālie ke ke tali ʻa e fatongia ke ʻoatu ia ki hoʻo ngaahi kui naʻe ʻikai ke nau maʻu ho faingamālie mahuʻinga faú. Fakakaukau angé ki he loto-houngaʻia ʻokú Ne maʻu kiate kinautolu ʻoku nau ngāue mo tui ke maʻu e hingoa ʻo ʻenau ngaahi kuí pea feʻunga ʻenau ʻofa ʻiate kinautolú pea mo Iá ke foaki kiate kinautolu ʻa e moʻui taʻengatá ʻi he ngaahi fāmilí, ʻa e meʻaʻofa maʻongoʻonga taha ʻi he ngaahi meʻaʻofa kotoa ʻa e ʻOtuá. Naʻá Ne foaki kiate kinautolu ha feilaulau taʻe-fakangatangata. Te Ne ʻofa mo fakahoungaʻi ʻa kinautolu naʻa nau fai ha meʻa pē ne nau lava ke fakaʻatā ʻenau ngaahi kuí ke nau fili ʻEne foaki ʻo e moʻui taʻengatá. (Henry B. Eyring, “Hearts Bound Together,” Liahona, Mē 2005, 78–79)

3. ʻOkú ke pehē ʻe tokoni fēfē hoʻo kau atu ki he hisitōlia fakafāmilí mo e ngāue fakatemipalé ke ke muimui ki he sīpinga ʻa Sīsū Kalaisí?

4. ʻOku ʻi ai nai ha aʻusia, potufolofola, pe fakamatala fakataautaha ʻa ha taki ʻo e Siasí te ke fie vahevahe?

Kapau ʻe ʻaonga ki he kau akó ʻenau mamata ʻi he vitiō ʻo e lea ʻa Palesiteni ʻAealingí, te ke lava ʻo huluʻi e vitiō “Hearts Bound Together” mei he taimi 10:21 ki he 11:29 ʻi he ChurchofJesusChrist.org.

Kapau ʻokú ke ongoʻi ʻe fakaʻaiʻai hoʻo kau akó ʻe he ngaahi tāpuaki kuo talaʻofa mai ʻi he kau atu ki he hisitōlia fakafāmilí mo e ngāue fakatemipalé, te ke lava ʻo huluʻi ange ha taha pe fakatouʻosi ʻo e ongo foʻi vitiō ko ʻení: “The Promised Blessings of Temple and Family History Work” (3:26) mo e “The Promised Blessings of Temple and Family History Work 2” (4:04).

Te mou lava foki ʻo aleaʻi ʻa e founga ʻoku fakalahi ai ʻe he ʻEikí ʻetau malava ke hū ki he ngaahi temipalé mo e tekinolosiá ke tokoni ʻi he ngāue hisitōlia fakafāmilí. ʻOku ʻi ai ha ngaahi fakamatala ʻi he “Ngaahi Maʻuʻanga Tokoni Kehé” ʻokú ne akoʻi ʻení.

• “Hearts Bound Together”

• “The Promised Blessings of Temple and Family History Work”

• “The Promised Blessings of Temple and Family History Work 2”

Fakaʻaiʻai ke kau ʻi he ngāue fakatemipalé mo e hisitōlia fakafāmilí

ʻOange ha taimi ki he kau akó ke nau faʻu mo vahevahe ha pōpoaki ke tokoni ki hono fakaʻaiʻai ʻo e kakaí ke nau kau ʻi he ngāue fakatemipalé mo e hisitōlia fakafāmilí. Poupouʻi e kau akó ke vahevahe ʻenau ngaahi pōpoakí ʻi ʻapi.

ʻE lava ke tokoni ʻa e ngaahi fehuʻi ko ʻení ki he kau akó ke nau fakakaukau ki heʻenau loto-vēkeveke ke kau ʻi he ngāue fakatemipalé mo e hisitōlia fakafāmilí. Ko hono tali e ngaahi fehuʻi ʻi heʻenau tohinoá ko ha founga ia ʻe taha ke fakaafeʻi ai ʻe he kau akó ʻa e Laumālie Māʻoniʻoní ke ne akoʻi kinautolu. Fakaafeʻi ha kau ako te nau loto-fiemālie ke vahevahe ʻenau ngaahi talí mo e kalasí.

• Kuo tākiekina fēfē ʻe he meʻa naʻá ke ako pe ongoʻi ʻi hoʻo ako e Tokāteline mo e Ngaahi Fuakava 138 hoʻo loto-vēkeveke ke kau ʻi he ngāue fakatemipalé mo e hisitōlia fakafāmilí?

• Ko e hā ʻoku hoko ai e kau atu ki he ngāue fakatemipalé mo e hisitōlia fakafāmilí ko ha niʻihi ʻo e ngaahi ngāue mahuʻinga taha kuó ke faí?

Ngaahi Maʻuʻanga Tokoni Kehé

Ko e hā kuo ʻomi ʻe he ʻEikí ke tokoni ke tau fakahoko e hisitōlia fakafāmilí mo e ngāue fakatemipalé?

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku hanga ʻe hono fakatahaʻi ʻo e lahi ange e ngaahi temipalé mo e fakalakalaka ʻo e tekinolosiá ʻo fakahoko hotau ngaahi fatongia toputapu he hisitōlia fakafāmilí ki heʻetau ngaahi kuí, pea hoko ai e kuongá ni ko e kuonga monūʻia taha ia ʻi he kotoa ʻo e hisitōliá. ʻOku ou fiefia ʻi he faivelenga kāfakafa ʻa hotau toʻu tupú ʻi he fakahokohoko fakamotuʻaleá mo e kumi ʻenau ngaahi kuí pea fakahoko ʻa e papitaiso mo e hilifakinima ʻi he temipalé. ʻOkú ke kau moʻoni ʻi he kau faifakamoʻui naʻe kikiteʻi ki he Moʻunga ko Saioné. (Quentin L. Cook, “Sio Kiate Koe ʻi he Loto Temipalé,” Liahona, Mē 2016, 98)

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Kuo foaki ʻe he ʻEikí ki homou toʻu tangatá ke faingofua ange hoʻomou aʻu ki Heʻene temipale māʻoniʻoní ʻo laka ange ʻi ha toe toʻu tangata ʻi he hisitōlia ʻo e māmaní.

Kuó ke tuʻu nai ʻi ha loto temipale, teunga hina, ʻo tatali ke fakahoko e papitaisó? Naʻá ke ongoʻi fēfē? ʻOku ʻi ai ha ongoʻi mahino ʻo e māʻoniʻoní ʻi he loto temipalé. ʻOku lolomi ʻe he melino ʻa e Fakamoʻuí ʻa e ngaahi langalanga matangi fakatuʻutāmaki ʻo e māmaní.

ʻOku hoko ʻa e meʻa ʻokú ke ongoʻi ʻi he temipalé ko e sīpinga ʻo e meʻa ʻokú ke fiemaʻu ke ongoʻi ʻi hoʻo moʻuí.

Kumi hoʻomou ngaahi kui tangatá mo e ngaahi kui fefiné pea mo e niʻihi ʻoku mou tokoua ʻaki kuo nau muʻomuʻa atú. ʻAve honau hingoá ki he temipalé. (Neil L. Andersen, “Ngaahi Faingataʻa Fakalaumālié,” Liahona, Mē 2014, 20–21)

Ko e hā e ongo ʻetau ngaahi kuí fekauʻaki mo e ngāue fakatemipalé mo e hisitōlia fakafāmilí?

Naʻe akonaki ʻa Palesiteni Pilikihami ʻIongi (1801–77) ʻo pehē:

ʻOku mou pehē ko e hā ha lau ʻa e ngaahi tamaí kapau ne nau lava ʻo lea mai mei he maté? ʻIkai te nau pehē, “Kuo mau tākoto ʻi ha taʻu ʻe lauiafe, ʻi he fale fakapōpulá ni, ʻo tatali ki he toʻu tangatá ni ke nau ō mai?” … Ko e hā te nau fanafana ʻi hotau telingá? He ko e hā, kapau ne nau maʻu ha mālohi te tau ongona e ʻuʻulu ʻa e ngaahi mana ʻo e langí, kapau ne tau ʻiloʻi hono mahuʻinga ʻo e ngāue ʻoku tau kau aí. ʻOku fofonga mai e kau ʻāngelo kotoa ʻi he langí ki he kiʻi falukunga kakaí ni, pea mo fakaʻaiʻai kinautolu ki he fakamoʻui ʻo e fāmili ʻo e tangatá. (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 309)

Ngaahi ʻEkitivitī Fakalahi ki he Akó

ʻI he foʻi vitiō “Leadership Session at RootsTech 2017: Elder M. Russell Ballard,” mei he taimi 0:00 ki he 5:58, ʻoku vahevahe ai ʻe Palesiteni Pālati ha aʻusia ʻa ʻene ngaahi kuí ʻokú ne fakahaaʻi e founga ʻe lava ke tokoniʻi ai ʻe he ʻEikí ʻa kinautolu ʻoku kau ʻi he ngāue fakatemipalé mo e hisitōlia fakafāmilí.

Ngaahi Vitiō

ʻI heʻene lea “Hearts Bound Together,” naʻe lea ai ʻa Palesiteni Henelī B. ʻAealingi fekauʻaki mo e mata meʻa-hā-mai ʻa Palesiteni Sāmitá mo e kau faifekau ʻoku nau malanga ʻaki e ongoongoleleí ki heʻetau ngaahi kuí. Kapau te ke huluʻi ha konga ʻo e foʻi vitioó lolotonga e lēsoní, ʻe lava ke ke fakakau ai ʻa e taimi 7:11 ki he 11:29.

Tokāteline mo e Ngaahi Fuakava 138:53–56. Ko hono fakaʻaongaʻi ʻo e ngaahi potufolofola fakafekauʻakí ke mahino e ngaahi kupuʻi lea mahuʻingá

ʻE lava ke tokoni ʻa e fakakaukau ko ʻení ki he kau akó ke nau akoako fakaʻaongaʻi ʻa e futinoutí mo e ngaahi potufolofola fakafekauʻakí ke mahino kiate kinautolu ʻa e folofolá. Te ke lava ʻo hiki ʻi he palakipoé ʻa e ngaahi kupuʻi lea ko ʻení mei he Tokāteline mo e Ngaahi Fuakava 138:53–56 mo e ngaahi fakamoʻoni fakafolofola fakafekauʻakí. Fakaafeʻi e kau akó ke vahevahe ʻa e founga ʻoku tānaki mai ai ʻe he tokāteline ʻoku akoʻi ʻi he potufolofola fakafekauʻakí ha ʻuhinga ki he kupuʻi lea folofolá. Mahalo ʻe fie tānaki ʻe he kau akó e ngaahi potufolofola ko ʻení ko ha ngaahi potufolofola fakafekauʻaki pe fehokotaki ʻi heʻenau folofolá.

• “Kakato ʻo e ngaahi kuongá” (Tokāteline mo e Ngaahi Fuakava 138:53)—ʻEfesō 1:10; Tokāteline mo e Ngaahi Fuakava 128:18

• “Fokotuʻu ʻo e ngaahi makatuʻunga ʻo e fuʻu ngāue lahi” (Tokāteline mo e Ngaahi Fuakava 138:53)—Tokāteline mo e Ngaahi Fuakava 64:33

• “Kakai ʻeiki mo tuʻu-ki-muʻa ʻa ia naʻe fili ʻi he kamataʻangá” (Tokāteline mo e Ngaahi Fuakava 138:55)—ʻĒpalahame 3:22–23

• “Teuteuʻi kinautolu ke nau haʻu ʻi he taimi totonu ʻo e ʻEikí” (Tokāteline mo e Ngaahi Fuakava 138:56)—Ngāue 17:26

Tokāteline mo e Ngaahi Fuakava 138:56. “Teuteuʻi [ke haʻu] ʻi he taimi totonu ʻo e ʻEikí”

Te ke lava ʻo tokoni ki he kau akó ke nau tokanga taha ki he Fakamoʻuí ʻaki hono ʻiloʻi e ngaahi founga kuó Ne “teuteuʻi [ai] kinautolu ke nau haʻu ʻi he taimi totonu ʻo e ʻEikí” (Tokāteline mo e Ngaahi Fuakava 138:56). Te mou lava ʻo aleaʻi e founga naʻe akoʻi mo teuteuʻi ai kinautolu “kimuʻa ʻi hono fanauʻi mai ʻo kinautolú.” Te ke lava foki ʻo fakaafeʻi e kau akó ke nau hiki e meʻa kuo ʻomi ʻe he ʻEikí ke tokoniʻi kitautolu ke fakahoko hotau misiona fakalangi ke kumi ʻetau ngaahi kuí mo fakahoko e ngaahi ouau fakatemipalé maʻanautolu. Te ke lava ʻo fakaʻaongaʻi ʻa e lea ʻa ʻEletā Kuenitini L. Kuki mo ʻEletā Niila L. ʻEnitaseni ʻi he “Ngaahi Maʻuʻanga Tokoni Kehé” ke tokoni ki he kau akó ʻi heʻenau lisí. Aleaʻi ʻa e founga ʻe lava ai ʻe he kau atu ki he ngāue fakatemipalé mo e hisitōlia fakafāmilí ʻo tākiekina honau vā fetuʻutaki mo e Tamai Hēvaní mo Sīsū Kalaisí.