Lēsoni 160: “Ko e Fāmilí: Ko ha Fanongonongo ki Māmani”

Ko e Fanongonongo ki he Fāmilí, Konga 3

Ko e Fiefia ʻi he Moʻui Fakafāmilí

Ko e ʻuhinga ʻe taha naʻe fekauʻi mai ai kitautolu ʻe he Tamai Hēvaní ki he māmaní ʻi ha ngaahi fāmilí ke tokoni ke tau aʻusia ʻa e fiefiá. Naʻe fakahā ʻe he ʻEikí ʻi he fanongonongo ki he fāmilí, ʻa e founga te tau lava ai ʻo maʻu ʻa e melinó mo e fiefiá ʻi he fakafoʻituituí mo e ngaahi fāmilí. ʻE lava ke tokoni ʻa e lēsoni ko ʻení ki he kau akó ke nau fakaʻaongaʻi ʻa e ngaahi akonaki ʻa Sīsū Kalaisí ʻi honau ngaahi vā fetuʻutaki fakafāmilí.

Ngaahi ʻEkitivitī Ako ʻOku Ala Fakahokó

Tupuʻangá mo e olá

Fakakaukau ke hiki ʻa e ʻū sētesi tupuʻanga-mo e-ola teʻeki kakato ko ʻení ‘i he palakipoé. Fakakakato ʻa e ʻuluaki konga ʻoku ʻataá ʻaki ha kupuʻi lea hangē ko e “Maʻu ha maaka leleí.” Fakaafeʻi leva e kau akó ke nau fakafonu ʻa e konga hono ua ʻoku fakaʻatā atú ʻaki ha kupuʻi lea ʻokú ne fakakakato ʻa e fakamatalá, hangē ko e “ʻoku mau fakahoko ʻemau ngāue fakaako mei ʻapí.” Te ke lava ʻo toutou fakahoko ʻa e founga ko ʻení ʻo fakaʻaongaʻi ha ngaahi kupuʻi lea kehekehe.

“ʻOku ngalingali ke maʻu ʻa e ʻi he taimi .”

Fakaafeʻi e kau akó ke lau e palakalafi 7 ʻo e fanongonongo ki he fāmilí, ʻo kumi ha founga fakalaumālie ke fakakakato ʻaki e kupuʻi lea ʻi he palakipoé. Tokoni ki he kau akó ke nau ʻiloʻi e foʻi moʻoni ko ʻení: ʻOku meimei ke aʻusia ʻa e fiefia ʻi he moʻui fakafāmilí ʻi he taimi ʻoku fakavaʻe ai ʻi he ngaahi akonaki ʻa e ʻEiki ko Sīsū Kalaisí. Ke tokoni ke fakakaukau e kau akó ki he founga ʻe lava ke iku ai hono moʻui ʻaki e ngaahi akonaki ʻa Kalaisí ki he fiefiá ʻi he moʻui fakafāmilí, kole ange ke nau fakalaulauloto ki ha ngaahi fehuʻi hangē ko ʻení:

• ʻOkú ke pehē ko e hā ha ngaahi founga ʻe lava ke fakatupulaki ai ʻe he Tamai Hēvaní mo Sīsū Kalaisi ʻa e fiefia ho fāmilí?

• Kuo tokoni fēfē hoʻo feinga ke moʻui ʻaki ʻEna ngaahi akonakí ki he fiefia ko iá?

Talaange ki he kau akó ʻe fakaafeʻi kinautolu ʻi he fakaʻosinga ʻo e lēsoni ko ʻení ke nau ngāueʻi ha taha ʻo e ngaahi akonaki ʻa e Fakamoʻuí te ne lava ʻo fakatupulaki ʻa e fiefia ʻa honau fāmilí. Fakaafeʻi e kau akó ke fekumi ki he tokoni ʻa e Tamai Hēvaní ʻi he toenga ʻo e lēsoní ke nau ʻiloʻi pe ko e tefitoʻi moʻoni fē ʻoku totonu ke nau tokanga taha ki aí. Poupouʻi e kau akó ke nau tokanga ki he ngaahi fakakaukau pe ongo ʻoku nau maʻu mei he Laumālie Māʻoniʻoní.

Ko e ngaahi akonaki ʻa Sīsū Kalaisí

Fakakaukau ke fakaʻaliʻali ha fakatātā ʻo Sīsū Kalaisi ʻi he palakipoé. Kole ki he kau akó ke toe lau ʻa e palakalafi 7, pea fakaʻilongaʻi ʻi he taimi ko ʻení ʻa e akonaki takitaha ʻe lava ke fakatupulaki ai e fiefia ʻa e fāmilí. Fakaafeʻi e kau akó ke hiki takatakai e meʻa ne nau maʻú ʻi he palakipoé ʻi he fakatātā ʻo Sīsū Kalaisí. Hili iá pea tuku ke faʻu ʻe he kau akó ha fanga kiʻi kulupu iiki pe ngaahi hoa ke fakakakato ʻa e ʻekitivitī ko ʻení:

1. Fili ha akonaki ʻa Sīsū Kalaisi naʻá ke maʻu ʻi he palakalafi 7.

2. Kumi ha potufolofola pe fakamatala ʻa ha taki ʻo e Siasí ʻoku tokoni ke mahino lelei ange kiate kitautolu ʻa e akonaki ko iá.

3. Fakamatalaʻi ʻa e founga ʻe lava ke fakatupulaki ai ʻe he muimui ki he akonaki ko iá ʻa e fiefia ʻi he ngaahi fāmilí.

   Kapau ʻoku fiemaʻu tokoni ʻa e kau akó, te ke lava ʻo fakaafeʻi kinautolu ke fakaʻaongaʻi ʻa e Fakahinohino ki he Ngaahi Folofolá pe fekumi ʻi he Gospel Library app. Ko ha ngaahi potufolofola ʻeni ʻe ala maʻu ʻe he kau akó ʻoku fekauʻaki mo e ngaahi akonaki mei he palakalafi 7: 3 Nīfai 18:15–16, 21 (lotu); Molonai 7:45–48 (ʻofá); Tokāteline mo e Ngaahi Fuakava 58:42–43 (fakatomalá); Tokāteline mo e Ngaahi Fuakava 64:9–11 (faʻa fakamolemolé).

   Kapau ʻe lava, fakaafeʻi e kau akó ke nau fekumi ʻi he “Ko e Fiefia ʻi he Moʻui Fakafāmilí,” ʻoku maʻu ʻi he ChurchofJesusChrist.org, ke kumi ha ngaahi akonaki mei he kau taki ʻo e Siasí fekauʻaki mo e ngaahi tefitoʻi moʻoni ʻi he palakalafi 7.

   Hili ha taimi feʻunga, fakaafeʻi e ngaahi kulupú ke vahevahe mo e kalasí ʻa e meʻa naʻa nau maʻú. ʻI he vahevahe ʻa e ngaahi kulupú, kole ange ke nau hiki ʻi he palakipoé ʻa e potufolofola pe konga ʻo e lea ʻa e taki ʻo e Siasí naʻe tokoni ke mahino kiate kinautolu ʻa e akonaki ʻa Sīsū Kalaisí.

   Hili iá, te ke lava ʻo fakaʻaongaʻi e ngaahi fehuʻi hangē ko ʻení ke tokoni ki he kau akó ke nau fakalaulauloto mo aleaʻi e founga ʻe lava ke tokoniʻi ai ʻe he ngaahi akonaki ʻa Sīsū Kalaisí ʻa e ngaahi fāmilí.

   • Ko e fē ʻi he ngaahi akonaki ʻa Kalaisi ʻi he palakipoé kuó ne maʻu ha mālohi ki he fiefia ʻokú ke ongoʻi ʻi ho fāmilí?

   • Ko e fē ʻi he ngaahi akonaki ko ʻení te ke fie tokanga lahi ange ki ai ʻi ho fāmilí? Ko e hā hono ʻuhingá? Te ke lava fēfē ʻo ikunaʻi ʻeni ʻi ho fāmilí?

   • Ko e fē ʻiate kinautolu te ke fie tokanga taha ki ai ʻi ho fāmili ʻi he kahaʻú? Ko e hā hono ʻuhingá?

   • Ko e fē ʻi he ngaahi akonaki ʻa e Fakamoʻuí ʻe lava ʻo tokoni ki ha fāmili ʻoku fefaʻuhi mo e fetaʻemahinoʻakí, fakakikihí, pe ngaahi vā fetuʻutaki faingataʻá?

ʻI hono aleaʻi ʻe he kau akó ʻa e fehuʻi kimuʻá, te ke lava ʻo fakahinohino kinautolu ki he ngaahi tefitoʻi moʻoni ʻo e “tuí, lotú, fakatomalá, faʻa fakamolemolé, fakaʻapaʻapá, ʻofá, [mo e] manavaʻofá” ʻi he palakalafi ne nau akó. Fakamoʻoni ki he finangalo ʻo e Fakamoʻuí ke fakamolemoleʻi, fakamoʻui, mo fakaleleiʻi ʻa e fakafoʻituituí mo e ngaahi vā fetuʻutaki fakafāmilí. ʻE lava ke fakaafeʻi ʻe heʻetau ngaahi feinga mo e holi ke fakatomala mo fakamolemoleʻi e niʻihi kehé ʻa Hono ivi tākiekina faifakamoʻuí ki heʻetau moʻuí mo e ngaahi vā fetuʻutakí.

Fakatupulaki ʻo e fiefiá

Kimuʻa pea fakaafeʻi e kau akó ke fakaʻaongaʻi ha taha ʻo e ngaahi akonaki ʻa e Fakamoʻuí ki honau fāmilí, tokoni ke nau fakakaukau ki ha ngaahi founga ʻe lava ke fakaʻaongaʻi ai ʻEne ngaahi akonakí ʻi ha ngaahi tūkunga fakafāmili kehekehe. Fakakaukau ke hiki ha ngaahi tūkunga fakafāmili kehekehe ʻi he palakipoé ʻe ala fakafekauʻaki ki ai ha kau ako ʻi hoʻo kalasí. ʻE lava ke kau ʻi he ngaahi sīpingá ʻa e ngaahi meʻá ni:

1. Fāmili kakato ʻoku nau mālohi ʻi he Siasí.

2. Fāmili ko ha niʻihi pē ʻoku mēmipa ʻi he Siasí.

3. Mātuʻa kuo vete mali.

4. Fāmili ʻoku mātuʻa pē ʻe taha.

Fakakaukau ke kole ki he kau akó ke vahevahe ha ngaahi tali ki he ngaahi fehuʻi ko ʻeni ki he tūkunga fāmili takitaha ʻi he palakipoé:

• Ko e ngaahi tefitoʻi moʻoni pau fē mei he palakalafi 7 ʻo e fanongonongo ki he fāmilí te ke fokotuʻu ki ha taha taʻu hongofulu tupu ʻi he tūkunga ko ʻení?

• ʻE fakaʻaongaʻi fēfē ʻe ha taha taʻu hongofulu tupu ʻi he tūkunga fakafāmili ko ʻení ʻa e ngaahi tefitoʻi moʻoni naʻá ke filí?

Fakakaukau ke fakaʻaliʻali ʻa e fakamatala ko ʻení:

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou fakamoʻoni mo palōmesi kiate kimoutolu, neongo e ngaahi kovi ʻe hoko ʻi homou fāmilí, ʻoku maʻu ʻi he ʻEiki ko Sīsū Kalaisí ʻa e faifakamoʻuí, fakafoʻoú, mo toe fakafoki mai ʻa ia ʻokú ke fiemaʻú. …

ʻI he tokoni ʻa e ʻEikí, te ke lava ʻo faʻu ha fāmili taʻengata neongo ne ʻikai ke ke haʻu mei ha fāmili Siasi ʻo hangē ko ia ʻoku faʻa ʻasi mai he taimi ʻe niʻihi ʻi he takafi ʻo e ngaahi makasini Liahona pe Ensign ʻa e Siasí. Kātaki ʻo manatu maʻu pē: ʻoku kamata ʻiate koe! (David A. Bednar, “Ko ha Fehokotakiʻanga Mālohi” [fakataha lotu fakaemāmani lahi maʻá e kakai lalahi kei talavoú, 10 Sepitema, 2017], broadcasts.ChurchofJesusChrist.org)

• Ko e hā naʻe makehe kiate koe mei he fakamatala ʻa ʻEletā Petinaá? Ko e hā hono ʻuhingá?

Fakaafeʻi e kau akó ke fili ha taha ʻo e ngaahi akonaki ʻa Sīsū mei he fanongonongo ki he fāmilí ʻa ia ʻoku nau ongoʻi ʻoku ueʻi kinautolu ke fakaʻaongaʻi ke fakatupulaki ʻa e fiefiá ʻi honau fāmilí. ʻOange ha taimi ke nau fakalaulauloto mo tohi ai ʻi heʻenau tohinoa akó ha palani ke kamata, hoko atu, pe fakatupulaki hono moʻui ʻaki ʻo e akonaki ko iá. Kapau ʻoku toe lahi e taimí, fakaafeʻi ha niʻihi ʻo e kau akó ke vahevahe ʻa e meʻa naʻa nau ongoʻi naʻe ueʻi kinautolu ke nau faí.

Fakakaukau ke vahevahe hoʻo fakamoʻoni ki he mālohi ʻo Sīsū Kalaisí ke fakatupulaki ʻa e fiefiá ʻi he ngaahi fāmili ʻo kinautolu ʻoku feinga ke moʻui ʻaki ʻEne ngaahi akonakí.

Ngaahi Maʻuʻanga Tokoni Kehé

Te u tokoni fēfē ke fakamālohia hoku fāmilí?

Naʻe vahevahe ʻe ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE lava ʻo mahino mo ikunaʻi ʻa e ngaahi nunuʻa kovi mo fakamamahi ʻo e ngaahi faingataʻa ʻe fetaulaki mo ha fāmili, ʻo ka tokoni ʻa e ʻEikí mo ʻEne tokāteliné. Ko e hā pē ha ngaahi fiemaʻu ʻa e kau mēmipa ʻo e fāmilí, te tau lava ʻo fakamālohia hotau ngaahi fāmilí ʻi heʻetau muimui he faleʻi ʻa e kau palōfitá.

Ko e kī ki hono fakamālohia ʻo hotau ngaahi fāmilí ke maʻu ʻa e Laumālie ʻo e ʻEikí ʻi hotau ngaahi ʻapí. Ko e taumuʻa hotau ngaahi fāmilí ke tau ʻi he hala fāsiʻi mo lausiʻí. …

… ʻOku fakamālohia ʻa e fāmilí ʻi heʻetau ʻunu ʻo ofi ki he ʻEikí, pea ʻoku fakamālohia ʻa e mēmipa takitaha ʻo e fāmilí ʻi heʻetau felangahakeʻaki, fakamālohia, ʻofa mo fetauhiʻakí. (Robert D. Hales, “Strengthening Families: Our Sacred Duty,” Ensign, Mē 1999, 33–34)

Fēfē kapau ʻoku ʻikai ke u maʻu ha “fāmili”?

ʻOku ʻomi ʻe he Fakahinohino ki he Ngaahi Folofolá ʻa e fakaʻuhinga ko ʻeni ʻo e fāmilí:

Hangē ko ia ʻoku fakaʻaongaʻi ʻi he folofolá, ʻoku kau ki he fāmilí ha husepāniti mo ha uaifi, fānau, pea ʻi he taimi ʻe niʻihi ʻoku kau ai mo e kāinga kehe ʻoku nau nofo ʻi he fale tatau pe ʻi he malumalu ʻo ha ʻulu pē ʻe taha ʻo e fāmilí. ʻOku toe lava foki ke hoko ko ha fāmili ha mātuʻa pē ʻe toko taha mo ha fānau, pe ko ha husepāniti mo e uaifi taʻe ʻi ai ha fānau, pe ko ha tokotaha pē ʻa ia ʻoku nofo toko taha. (Fakahinohino ki he Ngaahi Folofolá, “Fāmilí,” scriptures.ChurchofJesusChrist.org)

Ko e hā ha ʻamanaki lelei ki ha fāmili mo ha kuohili faingataʻa?

Naʻe pehē ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI he hoko ʻa Sīsū Kalaisi ko e ʻEiki Faifakamoʻuí, ʻoku malava maʻu pē ke ʻi ai ha kamataʻanga foʻou; ʻoku ʻi ai maʻu pē ha ʻamanakiʻanga.

Ko Sīsū Kalaisi ʻa e mālohinga ʻo e ngaahi fāmilí.

Ko Sīsū Kalaisi ʻa e mālohinga ʻo e toʻu tupú.

Ko Sīsū Kalaisi ʻa e mālohinga ʻo e ngaahi mātuʻá. (Dieter F. Uchtdorf, “Ko Sīsū Kalaisi ʻa e Mālohinga ʻo e Toʻu Tupú,” Liahona, Mē 2023, 59)

ʻOku ʻuhinga ki he hā ʻa e “fakafiefia ʻoku fakatupulakí”?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e kaumeʻa mo e takaua ʻo e ngāué ʻa e fakafiefia ʻoku leleí. ʻE lava kotoa ʻe he mūsiká, faʻu tohí, ʻātí, faivá, sipotí—ke ʻomi ha fiefia ʻo koloaʻia ai e moʻuí pea hokohoko atu hono fakatapuí. … Ka ko e lahi taha e ngaahi fakafiefia he ʻaho ní ʻoku fakamātatuʻa, holoki moʻui, fakamamahi, fakatupu hēhēʻia ki he ʻatamaí, mo fakamole taimi. Ko e fiefia moʻoní ʻe toki maʻu pē ia he ngāue mālohí. ʻI he taimi ʻoku liliu ai e meʻa fakafiefiá mei he leleí ki he koví ʻe ʻauha ai e moʻui fakatapuí. (D. Todd Christofferson, “Fakakaukauloto ki ha Moʻui Kuo Fakatapui,” Liahona, Nōvema 2010, 17)

Ngaahi ʻEkitivitī Fakalahi ki he Akó

Ngaahi hoa ngāue tuʻunga tataú

Ke tokoni ke mahino lelei ange ki he kau akó ʻoku tuʻunga tatau ʻa e houʻeiki tangatá mo fafiné ʻi he ʻao ʻo e ʻOtuá, te ke lava ʻo fakaafeʻi kinautolu ke lau ʻa e konga hono ua ʻo e palakalafi 7 (kamata ʻi he “Tuʻunga ʻi ha palani fakalangi”), ʻo kumi e ngaahi fatongia ʻo e tamaí mo e faʻeé. ʻE lava ke hiki ʻe he kau akó ʻi he palakipoé ʻa e meʻa ne nau maʻú. Te nau lava ʻo vahevahe ha niʻihi ʻo e ngaahi meʻa mahuʻinga mo makehe kuo akoʻi ange ʻe heʻenau ngaahi faʻeé mo e tamaí. Tokoni leva ke mahino ki he kau akó ʻa e moʻoni ko ʻení: ʻOku haʻisia ʻa e ngaahi tamaí mo e ngaahi faʻeé ke nau fetokoniʻaki ko ha kaungā-ngāue tuʻunga tatau. Ke tokoni ke fakaloloto e mahino ʻa e kau akó ki he moʻoni ko ʻení, fakakaukau ke vaeua ʻa e kalasí pea ʻai ke ako ʻe he vaeua takitaha ha taha ʻo e ongo lea ko ʻeni ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ʻofa tatau, haohaoa, mo taʻefakangatangata ʻa ʻetau Tamai ʻi Hēvaní ki Heʻene fānaú kotoa. ʻOku tatau pē ʻEne ʻofa ki Hono ngaahi ʻofefiné mo Hono ngaahi fohá. ʻOku ʻofa tatau pē foki hotau Fakamoʻuí, ʻa e ʻEiki ko Sīsū Kalaisí, ki he tangatá mo e fefiné. ʻOku maʻá e fānau kotoa ʻa e ʻOtuá ʻa ʻEne fakaleleí mo ʻEne ongoongoleleí. …

ʻE lava ʻe he ongoongolelei ʻo Sīsū Kalaisí ʻo fakamāʻoniʻoniʻi ʻa e tangatá mo e fefiné fakatouʻosi ʻi he founga tatau pea ʻi he ngaahi tefitoʻi moʻoni tatau. Hangē ko ʻení, ʻoku fiemaʻu kotoa ʻa e tuí, fakatomalá, papitaisó, mo e meʻafoaki ʻo e Laumālie Māʻoniʻoní ki he fānau kotoa ʻa e ʻOtuá, ʻo tatau ai pē pe ko e tangata pe fefine. … ʻOku ʻofa tatau pē [ʻa e Tamai Hēvaní] ʻiate kitautolu kotoa, pea ʻoku ʻatā ki he taha kotoa ʻa ʻEne meʻaʻofa maʻongoʻonga tahá, ʻa e meʻaʻofa ʻo e moʻui taʻengatá. (M. Russell Ballard, “Equality through Diversity,” Ensign, Nōvema 1993, 89)

Neongo ʻoku tuʻunga tatau ʻa e houʻeiki tangatá mo fafiné ʻi he ʻao ʻo e ʻOtuá ʻi honau ngaahi faingamālie taʻengatá, ka ʻoku nau maʻu ha ngaahi fatongia kehekehe kae mahuʻinga tatau pē ʻi Heʻene palani taʻengatá. … ʻE lava ke ʻiloʻi mo poupouʻi ʻe he [ʻOtuá] hotau ngaahi faikehekehé kae ʻomi ha faingamālie tatau ki he tupulakí mo e fakalakalaká. …

… Ko e lahi taha ʻo e ngaahi fiemaʻu [ki ha moʻui fakafāmili hakeakiʻí] ʻoku tatau tofu pē ia ki he kakai tangatá mo e kakai fefiné. Hangē ko ʻení, ʻoku totonu ke tatau pē ki he houʻeiki tangatá mo e fafiné ʻa e talangofua ki he ngaahi fono ʻa e ʻOtuá. ʻOku totonu ke lotu ʻa e houʻeiki tangatá mo fafiné ʻi he founga tatau. ʻOkú na fakatou maʻu ʻa e faingamālie tatau ke maʻu ha tali ki heʻena ngaahi lotú pea maʻu ai ha fakahā fakataautaha ki heʻena fakalakalaka fakalaumālié. (M. Russell Ballard, “Equality through Diversity,” Ensign, Nōvema 1993, 89–90)

Ke tokoni ke aleaʻi ʻe he kau akó ʻa e meʻa kuo nau akó, fai ha ngaahi fehuʻi hangē ko ʻení:

• Ko e hā e meʻa naʻá ke ako fekauʻaki mo e founga ʻoku ʻafio mai ai ʻa e ʻOtuá ki he houʻeiki tangatá mo fafiné?

• ʻOkú ke pehē ʻoku ʻuhinga ki he hā ʻa e “hoa ngāue tuʻunga tatau”?

• ʻE tokoniʻi fēfē koe ʻe he mahino ki he moʻoni ko ʻení ke fakatupulaki hoʻo fiefiá ʻi ho fāmili lolotongá mo e kahaʻú?

Ko hono maʻu ha mahino ki he tokāteline ʻo e fāmilí

ʻE fehangahangai ha kau ako tokolahi mo ha ngaahi tūkunga ʻe fiemaʻu ai ʻa e loto-toʻá mo e tui kia Sīsū Kalaisí ke maluʻi ʻa e meʻa naʻá Ne fakahā ʻi he fanongonongo ki he fāmilí. Fakakaukau ke huluʻi ʻa e foʻi vitiō “Defenders of the Faith” (6:56), ʻa ia ʻoku fakamatala ki he talanoa moʻoni ʻo hono taukapoʻi ʻe Malia Mateline Kātoni ʻa e meʻa naʻá ne ʻilo ʻoku moʻoní. ʻOku fakatatau ʻeni ʻe he vitioó ki hono taukapoʻi ʻe he toʻu tupu ʻo onopōní ʻa e tokāteline ʻa e ʻEikí ki he fāmilí, neongo e kehekehe ʻa e ngaahi tui mo e ngaahi tūkunga ʻokú ne ʻākilotoa kinautolú.

Te ke lava foki ʻo fakakaukau ke fakaʻaliʻali ʻa e lea ko ʻeni ʻa Sisitā Poni L. ʻOsikasoni, ko e Palesiteni Lahi mālōlō ʻo e Kau Finemuí:

ʻOku fiemaʻu ke tau taukapoʻi lototoʻa ʻa e [tokāteline] kuo fakahā mai ʻe he ʻEikí ʻo fakamatalaʻi e nofo malí, fāmilí, mo e fatongia fakalangi ʻo e houʻeiki tangatá mo e fafiné, mo e mahuʻinga ʻo e ʻapí ʻi heʻene hoko ko ha ngaahi feituʻu toputapú—ʻo aʻu pē ki he taimi ʻoku ongo leʻolahi mai ai ʻa e māmaní kuo ʻolokuonga, fakangatangata pe ʻikai toe ʻaonga e ngaahi tefitoʻi moʻoní. ʻE lava ʻe he tokotaha kotoa pē neongo pe ko e hā hono tūkunga nofomalí pe tokolahi ʻo e fānaú, ke nau taukapoʻi e palani ʻa e ʻEikí ʻoku fakamatalaʻi ʻi he fanongonongo ki he fāmilí. Kapau ko e palani ʻeni ʻa e ʻEikí, ʻoku totonu ke hoko ia ko ʻetau palani! (Bonnie L. Oscarson, “Kau Taukapo ʻo e Fanongonongo ki he Fāmilí,” Liahona, Mē 2015, 15–16)

Hili iá pea aleaʻi ʻe he kau akó ha ngaahi fehuʻi hangē ko ʻení:

• Ko e fē ha ngaahi moʻoni kuo fakahā ʻe he ʻEikí fekauʻaki mo e fāmilí ʻoku teʻeki mahino ki ha tokolahi ʻi he māmaní?

• Ko e hā e ʻuhinga ʻoku mahuʻinga ai ke tau maluʻi e tokāteline ʻa e ʻEikí ʻi he fāmilí ʻo tatau ai pē pe ko e hā hotau ngaahi tūkunga fakafāmili lolotongá?

• Te tau lava fēfē ʻo tuʻu maʻu ʻi he meʻa kuo akoʻi ʻe he ʻEikí ʻi ha founga te ne ohi mai ʻa e melinó kae ʻikai ko e fakakikihí?

• ʻE teuteuʻi fēfē koe he taimí ni ʻe he mahino ʻo e tokāteline ʻa e ʻEikí kau ki he fāmilí, ke ohi hake ha fāmili ʻi he kahaʻú?