Lēsoni 158: Ko e Fāmilí: Ko ha Fanongonongo ki Māmani

Ko e Fanongonongo ki he Fāmilí, Konga 1

“Ko e Fāmilí Ko e Uho Ia ʻo e Palani ʻa e Fakamoʻuí”

“Ko e Fāmilí: Ko ha Fanongonongo ki Māmaní” ko ha fakamatala fakaepalōfita ia naʻe tohi ke tokoni ke mahino kiate kitautolu e ngaahi akonaki ʻa e Tamai Hēvaní mo Sīsū Kalaisi kau ki he nofo-malí mo e fāmilí. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e fatongia mahuʻinga ʻo e ngaahi fāmilí ʻi he palani ʻa e Tamai Hēvaní.

Ngaahi ʻEkitivitī Ako ʻOku Ala Fakahokó

Kimuʻa pea kamata e kalasí, fakapapauʻi ʻe lava ke maʻu ʻe he kau akó takitaha ʻa e “Ko e Fāmilí: Ko ha Fanongonongo ki Māmani” ʻi he fakaʻilekitulōniká pe ko ha tatau kuo paaki. Mahalo ʻe ʻi ai ha tatau ʻoku fakakau ʻi he tohinoa ako ʻa e kau akó.

“Ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú”

Fakakaukau ke fakaʻaliʻali ʻa e ngaahi foʻi lea mei he ʻuluʻi tohi ʻi muʻá ʻi he palakipoé ʻi ha faʻahinga hokohoko pē. ʻOange ha miniti ʻe taha ki he kau akó ke nau feinga ke fokotuʻutuʻu kinautolu ʻi honau ʻatamaí. Fakaafeʻi leva kinautolu ke kumi mo fakaʻilongaʻi e ngaahi foʻi lea ko ʻení ʻi he fakaʻosinga ʻo e palakalafi ʻuluaki ʻo e “Ko e Fāmilí: Ko ha Fanongonongo ki Māmani.”

Fakaafeʻi leva ha fealēleaʻaki ʻo fakaʻaongaʻi ha ngaahi fehuʻi hangē ko ʻení:

• Ko e hā e ʻuhinga ʻoku hoko ai ʻa e fāmilí ko e uho ʻo e palani ʻa e ʻOtuá ki he ikuʻanga taʻengata ʻo ʻEne fānaú?

• ʻI hono ʻiloʻi ʻoku fehangahangai ʻa e fāmili kotoa pē mo ha ngaahi ʻahiʻahi pea ʻoku ʻikai ke tau haohaoa kotoá, ko e hā ha meʻa te ke vahevahe fekauʻaki mo e Tamai Hēvaní, Fakalelei ʻa Sīsū Kalaisí, pea mo e palani ʻo e fakamoʻuí ʻe lava ʻo tokoni ki he toʻu tupu ʻoku hohaʻa fekauʻaki mo honau ngaahi tūkunga fakafāmilí?

Fakakaukau ke hiki e ngaahi lea mo e kupuʻi lea ko ʻení ʻi he palakipoé kimuʻa he kalasí. Fakaafeʻi e kau akó ke lau e lisí.

• Ko e mahuʻinga ʻo e malí

• Vete Mali

• Ngaohikoviá

• Tuʻunga tangata pe fefiné

• Mali ʻa e tangata mo e tangatá pe fefine mo e fefiné

• Maʻu fānaú

• Ngaahi fetuʻutaki fakasekisuale ʻi tuʻa ʻi he nofo-malí

• Fakatōtamá

• Fiefia ʻi he ngaahi fāmilí

Fakatokangaʻi ange: ʻI hoʻo akoʻi e lēsoni ʻo e ʻaho ní, tokanga ki he natula pelepelengesi ʻo e ngaahi tefito ʻe aleaʻí. Mahalo te ke fie fakamanatu ki he kau akó ke nau feinga ke maʻu ha ʻofa faka-Kalaisi, ongoʻingofua, mo ha mahino ʻi heʻenau aleaʻi e ngaahi tefito ko ʻení.

• Ko e fē ʻi he ngaahi tefito ko ʻení ʻoku fehuʻia pe hohaʻa ki ai e kakaí he ʻaho ní?

• ʻOkú ke pehē ko e fē feituʻu ʻoku faʻa ʻalu ki ai ʻa e kakaí ke maʻu ha ngaahi tali fekauʻaki mo e ngaahi palopalema ko ʻení?

  Fakakaukau ke ʻoange ha taimi ki he kau akó ke nau fakalaulauloto ai ki he mahino ʻoku nau maʻu ki he ngaahi palopalema ko ʻení pea mo e ngaahi fehuʻi te nau ala maʻú.

• Ko e hā e ʻuhinga ʻoku mahuʻinga ai ke ʻiloʻi e meʻa kuo akoʻi ʻe he ʻOtuá fekauʻaki mo e ngaahi tefito ko ʻení?

ʻE lava ke tokoni ʻa e lēsoni ko ʻení ke maʻu ʻe he kau akó ha ngaahi tali ki ha niʻihi ʻo ʻenau ngaahi fehuʻí mo e ngaahi meʻa ʻoku nau hohaʻa ki aí. Fakaafeʻi kinautolu ke fekumi ki ha fakahā mei he Laumālie Māʻoniʻoní ke tataki kinautolu ʻi heʻenau ako ʻa e “Ko e Fāmilí:Ko ha Fanongonongo ki Māmani” he ʻahó ni pea ʻi he lolotonga ʻo e uiké.

Ko e fanongonongo ki he fāmilí

Ke tokoni ke mahino ki he kau akó ha niʻihi ʻo e ngaahi ʻuhinga ki hono ueʻi fakalaumālie ʻe he ʻEikí ʻa e tohi fanongonongo ʻo e fāmilí, fakakaukau ke vahevahe ʻa e lea ko ʻeni naʻe fai ʻi he taimi naʻe fakafeʻiloaki ai ʻa e fanongonongó.

Naʻe pehē ʻe Palesiteni Kōtoni B. Hingikelī (1910–2008):

Kuo mau ongoʻi ʻoku totonu ke mau fakatokanga mo sinaki atu fekauʻaki mo e ngaahi poto kākā fakaemāmani ko ia ʻoku lau ko e moʻoní, pea mo e lahi ʻa e kākaá fekauʻaki mo e ngaahi tuʻunga ʻulungaanga mahuʻingá pea mo e lahi ʻo e fakatauele mo e ʻahiʻahi ʻoku nau ʻuliʻi māmālie ʻa e māmaní. Ko e tahá foki, ko kimautolu ko e Kau Palesitenisī ʻUluakí mo e Fakataha Alēlea ʻo e Kau ʻAposetolo ʻe Hongofulu Mā Uá ke fai ha fanongonongo fakamafaiʻi ki he Siasí pea mo e māmaní kotoa ʻo fakahā pea toe fakapapauʻi atu ai ʻa e ngaahi tuʻutuʻuni, ngaahi tokāteline mo e ngaahi ngāue ʻoku fekauʻaki mo e fāmilí ʻa ia kuo toutou fakahā atu ʻe he kau palōfitá, kau tangata kikite mo e kau tangata maʻu fakahā ʻo e Siasí ni ʻi hono hisitōliá. (Gordon B. Hinckley, “Stand Strong against the Wiles of the World,” Ensign, Nōvema 1995, 100)

• Ko e hā e meʻa ʻoku makehe kiate koe fekauʻaki mo e ʻuhinga naʻe ʻomi ai ʻa e fanongonongo ki he fāmilí?

Lau ʻa e palakalafi 1–3 ʻo e fanongonongo ki he fāmilí, ʻo kumi e meʻa naʻe akoʻi ʻe he ʻOtuá fekauʻaki mo ha niʻihi ʻo e ngaahi tefito ʻi he palakipoé.

Tokanga taha ki he ngaahi moʻoni ʻoku iku ki he uluí mo langaki ʻa e tui kia Sīsū Kalaisí: ʻOku fokotuʻu mai ʻe he ʻekitivitī ʻi laló ha founga ʻe taha ke fakahaaʻi ai ʻe he kau akó ʻa e ngaahi tefitoʻi moʻoni ʻo e uluí ʻa ia ʻoku nau ʻiloʻí. Ki ha tokoni ʻi hono akoʻi ʻení, vakai ki he ako “Tukutaha e tokangá ki he ngaahi moʻoni ʻoku nau tataki ki he uluí mo langaki ʻa e tui kia Sīsū Kalaisí” ʻi he Fakatupulaki ʻa e Ngaahi Taukei ʻa e Faiakó: Akoʻi ʻa e Tokāteliné. Fakakaukau ke akoako ʻa e taukeí “ʻEke ha ngaahi fehuʻi ʻe tokoni ki he kau akó ke nau ʻiloʻi mo fakamatalaʻi ʻa e ngaahi tefitoʻi moʻoni fakauluí.”

Fakakaukau ke fakaafeʻi e kau akó ke hiki e ngaahi moʻoni ʻoku nau maʻú ʻi he tafaʻaki ʻo e tefito ʻoku fekauʻaki mo iá ʻi he palakipoé. Te nau lava foki ʻo vahevahe ʻa e founga ʻe lava ke tokoni ai ʻa e moʻoni naʻa nau tohí ke fakamatalaʻi ʻa e tefito fekauʻaki mo iá.

Ko ha niʻihi ʻeni ʻo e ngaahi moʻoni ʻe malava ke talaatu ʻe he kau akó:

• Ko e fāmilí ko e uho ia ʻo e palani ʻa e Tamai Hēvaní maʻa ʻEne fānaú.

• Ko e tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí.

• ʻOku fakaʻatā ʻe he palani ʻa e ʻOtuá ke hokohoko atu ʻa e ngaahi vā fetuʻutaki fakafāmilí hili ʻa e maté.

ʻE lava ke hoko ʻeni ko ha faingamālie lelei ke vahevahe ai ʻe he kau akó ha ngaahi fakakaukau pe ʻeke ha ngaahi fehuʻi ʻoku nau ala maʻu.

ʻOku lave e konga ʻe tolu ko ʻeni ʻo e lēsoní ki he ngaahi moʻoni takitaha ʻi ʻolungá. Makatuʻunga ʻi he taimi ʻoku toé mo e ngaahi fiemaʻu hoʻo kau akó, fili ha moʻoni ʻe taha pe lahi ange mei heni ke mou tokanga taha ki ai. Pe ko hoʻomou ako ha ngaahi moʻoni kehe ʻokú ne tali lelei ange ʻa e ngaahi fehuʻi mo e ngaahi fiemaʻu ʻa e kau akó.

1. Ko e fāmilí ko e uho ia ʻo e palani ʻa e Tamai Hēvaní maʻa ʻEne fānaú.

Fakakaukau ke vahevahe ʻa e kau akó ke tautau toko ua. Fakaafeʻi e ngaahi hoá ke taufetongi ʻi hono vahevahe ʻa e meʻa kotoa pē te nau lavá fekauʻaki mo e palani ʻo e fakamoʻui ʻa e Tamai Hēvaní ʻi ha miniti pē ʻe taha. Poupouʻi e kau akó ke fakakaukau ki he ngaahi konga ʻo e palaní ʻi he maama fakalaumālié, fakamatelié, mo e hili ʻa e moʻui fakamatelié.

• ʻOku hoko fēfē ʻa e fāmilí ko e uho ʻo e palani ʻa e Tamai Hēvaní ʻi he maama fakalaumālié? ʻI he moʻui fakamatelié? ʻI heʻetau moʻui hili ʻa e moʻui fakamatelié?

• Kapau ʻoku ʻiloʻi ʻeni ʻe Sētane fekauʻaki mo e fāmilí, ʻokú ke pehē te ne tali fēfē nai ʻa e ngaahi moʻoni fekauʻaki mo e fāmilí?

Ke tokoni ke mahino lahi ange ki he kau akó ʻa e ʻuhinga ʻoku hoko ai ʻa e fāmilí ko e uho ʻo e palani ʻa e ʻOtuá, fakakaukau ke fakaafeʻi kinautolu ke fekumi ki he ngaahi potufolofola ʻi he “Fāmilí” ʻi he Fakahinohino ki he Ngaahi Folofolá. ʻIkai ngata aí, te ke lava ʻo tufaki ʻa e fakamatala ko ʻení ke lau fakafoʻituitui ʻe he kau akó. Fakakaukau ke poupouʻi e kau akó ke fakaʻilongaʻi e ngaahi konga ʻo e fakamatalá ʻoku makehe kiate kinautolú.

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI hono ʻiloʻi e ʻuhinga naʻa tau mavahe ai mei he ʻao ʻo ʻetau Tamai Hēvaní mo e meʻa ke fai ki haʻatau foki ʻo hakeakiʻi mo Iá, ʻoku matuʻaki mahino ʻoku ʻikai ha meʻa ʻe fekauʻaki mo hotau taimi ʻi he māmaní ʻe toe mahuʻinga ange he mate fakasinó mo e toe fanauʻi fakalaumālié, he ko e ongo meʻa pau ia ki he moʻui taʻengatá. …

ʻOku ʻomi ʻe ha fāmili naʻe langa ʻi he mali ʻa ha tangata mo ha fefiné, ʻa e tuʻunga lelei taha ke tupulaki ai e palani ʻa e ʻOtuá—ʻa e tuʻunga ki hono fāʻeleʻi mai e fānaú, ʻoku maʻa mo haohaoa mei he ʻOtuá pea mo e ʻātakai ki he ako mo e teuteu te nau fie maʻu ki ha moʻui fakamatelie lavameʻá mo e moʻui taʻengata he moʻui ka hokó. (D. Todd Christofferson, “ʻUhinga ʻo e Malí, ʻUhinga ʻo e Fāmilí,” Liahona, Mē 2015, 51–52)

Hili ʻenau maʻu ha taimi ke fekumi ai e kau akó ʻi he folofolá mo e fakamatalá, ʻe lava ke nau aleaʻi tautau toko ua pe fakakulupu iiki ʻa e ngaahi fehuʻi ko ʻení.

• Ko e hā e meʻa naʻá ke ako fekauʻaki mo e ʻuhinga ʻoku hoko ai ʻa e fāmilí ko e uho ʻo e palani ʻa e Tamai Hēvaní?

• Kuó ke mamata fēfē ki hono tokoniʻi ʻe he ngaahi fāmilí ʻa e fakafoʻituituí ke nau teuteu “ki ha moʻui fakamatelie lavameʻa mo ha moʻui taʻengata he moʻui ka hokó”?

• ʻE tokoniʻi fēfē koe ʻe he ngaahi akonaki ko ʻení ke tali e ngaahi fehuʻi mo e hohaʻa fekauʻaki mo e nofo-malí mo e fāmilí?

2. Ko e tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí.

Fakakaukau ke ʻoange ha taimi ki he kau akó ke nau ako fakafoʻituitui ai ha niʻihi ʻo e ngaahi maʻuʻanga tokoni ʻi laló. ʻE lava ke tataki kinautolu ʻe he ngaahi fehuʻi ko ʻení ʻi heʻenau akó:

• Ko e hā e ʻuhinga ʻoku hoko ai ʻa e tuʻunga tangata pe fefiné ko ha meʻa mahuʻinga ʻo e tuʻunga mo e taumuʻa fakafoʻituituí?

• Te tau akoʻi fēfē ʻa e ngaahi moʻoni fekauʻaki mo e tuʻunga tangata pe fefiné ʻi he loto fakapapau lolotonga ʻetau fakaʻehiʻehi mei he taʻetokanga pe taʻefakaʻapaʻapa ki he niʻihi kehé?

“Ko e Natula mo e Taumuʻa Taʻengata ʻo e Tuʻunga Tangata pe Fefiné” (Ko e Fāmili Taʻengatá - Naunau Teuteu ki he Kalasí [2022], 29–33) Fakatokangaʻi ange ʻa e konga ʻe tolu ʻo e maʻuʻanga fakamtala ko ʻení ʻoku kamata ʻaki ha ngaahi fehuʻi.)

“Liliu Tangata pe Fefiné: Maʻu ha Mahino Fekauʻaki mo Koé” ʻi he konga “Tokoni ʻo e Moʻuí” ʻi he Gospel Library

“Liliu Tangata pe Fefiné: Ko Hono Poupouʻi ʻo e Niʻihi Kehé” ʻi he konga “Tokoni ʻo e Moʻuí” ʻi he Gospel Library

Kapau ʻoku ʻikai maʻu ʻe he kau akó ʻa e ngaahi maʻuʻanga tokoni ko ʻení, fakakaukau ke ʻai ha ngaahi tatau ʻo e lēsoni 7 ʻo e tohi lēsoni ʻinisititiuti Ko e Natula mo e Taumuʻa Taʻengata ʻo e Tuʻunga Tangata pe Fefiné maʻá e kau akó ke nau ako ʻi he kalasí.

Hili hono maʻu ʻe he kau akó ha taimi feʻunga ke ako, ʻe lava ke vahevahe ʻe ha niʻihi ʻe fie vahevahe ha ngaahi fakakaukau naʻa nau maʻu.

Fakakaukau ke vahevahe e lea ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé” ko ha konga ʻo e fealēleaʻaki ko ʻení pea fakaafeʻi ʻa e kau akó ke vahevahe hono ʻuhinga kiate kinautolú.

Fakakaukau ke vahevahe ʻa e founga kuo tāpuekina ai hoʻo moʻuí ʻi hoʻo maʻu ha fakakaukau taʻengata fekauʻaki mo ho tuʻungá mo e taumuʻá.

3. ʻOku fakaʻatā ʻe he palani ʻa e ʻOtuá ke hokohoko atu ʻa e ngaahi vā fetuʻutaki fakafāmilí hili ʻa e maté.

Kimuʻa pea lau ʻe he kau akó e ngaahi potufolofola ko ʻení, te ke lava ʻo talaange kiate kinautolu fekauʻaki mo ha taha ʻokú ke ʻiloʻi naʻe faingataʻaʻia ʻi he mate ʻa ha mēmipa ʻo e fāmilí. Pe ko haʻo fakaafeʻi e kau akó ke nau fakakaukau ki ha taha ʻoku nau ʻilo kuó ne kātekina e mate ʻa ha mēmipa ʻo e fāmilí.

Lau ʻa e 1 Kolinitō 15:22 mo e Tokāteline mo e Ngaahi Fuakava 130:2, ʻo kumi pe ko e hā ʻa e ʻamanaki lelei ʻe lava ke maʻu ʻia Sīsū Kalaisi ʻi he taimi ʻoku mate ai ha taha ʻoku tau ʻofa ai.

• ʻE ʻomi fēfē ʻe he ngaahi moʻoni ʻo e palani ʻa e ʻOtuá ʻi he ngaahi veesi ko ʻení ha mālohi ki ha taha ʻoku faingataʻaʻia ʻi ha mole pehē?

• ʻE liliu fēfē ʻe he ngaahi akonaki ʻi he palakalafi hono tolu ʻo e fanongonongo ki he fāmilí ha taha ʻoku faingataʻaʻia ʻi he mole ha taha ʻokú ne ʻofa ai?

Ke tokoni ke mahino lelei ange ki he kau akó ʻa e natula taʻengata ʻo e ngaahi fāmilí ʻi he palani ʻa e ʻOtuá, te ke lava ʻo huluʻi ʻa e foʻi vitiō “Plan of Salvation—Weʻre Still a Family” (4:47), ʻoku maʻu ʻi he ChurchofJesusChrist.org. Fakakaukau ke fakaafeʻi e kau akó ke fakakaukau ki he founga naʻe liliu ai ʻe he ngaahi akonaki ʻa e Fakamoʻuí fekauʻaki mo e fāmilí ʻa e talavou ko ʻení.

Fakaʻosí

Ke fakaʻosi e lēsoní, te ke lava ʻo fakaafeʻi e kau akó ke nau fakakaukau fakalongolongo pea lekooti ʻenau tali ki he ngaahi fehuʻi ko ʻení. ʻE lava ke vahevahe ʻe he kau tokoní ʻa e meʻa ne nau tohí.

• Ko e hā ha meʻa kuó ke ako ʻi he ʻahó ni kuo tokoni ke ke ongoʻi ofi ange ai ki he Tamai Hēvaní mo Sīsū Kalaisí?

• Ko e hā ha meʻa kuó ke ako fekauʻaki mo e mahuʻinga ʻo e fāmilí ʻi he palani ʻa e Tamai Hēvaní?

Ngaahi Maʻuʻanga Tokoni Kehé

Ko e fē ha feituʻu te u lava ʻo ako ai ʻa e founga ke akoʻi e ngaahi moʻoni fekauʻaki mo e ngaahi kaveinga pelepelengesí ʻi he loto-fakapapau lolotonga iá ʻoku ou fakaʻehiʻehi mei he taʻetokanga pe taʻe fakaʻapaʻapa ki he niʻihi kehé?

Vakai ki he ngaahi konga ʻi he “President Oaks on LGBTQ Issues” mo e “Elder Gilbert on LGBTQ Issues” ʻi he Dallin H. Oaks mo Clark C. Gilbert, “Stand Fast with Love in Proclaiming Truth” (Ensign College devotional, May 17, 2022), ensign.edu.

Mamata kia Tāleni H. ʻOakesi mo Kilisiteni M. ʻOakesi, “Taukaveʻi ʻa e Moʻoní” (fakataha lotu fakaemāmāni lahi maʻá e kakai lalahi kei talavoú, 21 Mē, 2023), ChurchofJesusChrist.org, mei he taimi 36:02 ki he 38:34.

Fēfē kapau ʻe ongoʻi ʻe he kakaí ʻoku ʻikai fakakau kinautolu ʻi he ngaahi akonaki ʻo e fanongonongo ki he fāmilí?

Naʻe vahevahe ‘e Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Mahalo ʻoku ʻi ai ha niʻihi ʻoku fanongo mai ki he pōpoaki ko ʻení mo pehē, “Kae fēfē au?” ʻOku tau ʻiloʻi ʻoku tokolahi ha Kāingalotu moʻui taau mo lelei ʻo e Ngaahi ʻAho Kimui Ní ʻoku ʻikai ke nau maʻu ʻa e ngaahi faingamālie pea mo e ngaahi fiemaʻu ʻaonga ki heʻenau fakalakalaká. ʻOku uesia ʻe he taʻe-malí, hala fānaú, maté pea mo e vete malí ʻa e ngaahi meʻa ʻoku fiemaʻú mo fakatoloi hono fakahoko ʻo e ngaahi tāpuaki kuo talaʻofá. … Ka ko e ngaahi uesia ko ʻení ʻoku fakataimi pē. Kuo ʻosi talaʻofa ʻe he ʻEikí he ʻikai taʻofi ha ngaahi tāpuaki mei hono ngaahi foha mo e ngaahi ʻofefine ʻoku tauhi e ngaahi fekaú mo faipau ki heʻenau ngaahi fuakavá, mo fakaʻamua e meʻa ʻoku totonú. (Dallin H. Oaks, “The Great Plan of Happiness,” Ensign, Nov. 1993, 75)

Ko e hā e ʻuhinga ʻoku mahuʻinga ai ʻa e malí ʻi he palani ʻa e ʻOtuá?

Naʻe vahevahe ʻe ʻEletā Lopeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tofa mai kiate kitautolu ʻa e halá ʻe he palani ʻa e Tamaí ke tau maʻu ai ʻa e moʻui taʻengatá, ʻa e moʻui ʻoku maʻu ʻe heʻetau mātuʻa fakalangí. ʻI he palaní, “ʻoku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí” [1 Kolinitō 11:11]. ʻOku kau ʻi he ʻelito ʻo e moʻui taʻengatá ʻa e mali taʻengata ha tangata mo ha fefine, ʻa ia ko ha konga mahuʻinga ʻo ʻetau hoko ʻo hangē ko ʻetau mātuʻa fakalangí. (Robert D. Hales, “Ko e Palani ʻo e Fakamoʻuí: Ko ha Mataʻikoloa Toputapu ʻo e ʻIló ke Tataki Kitautolu,” Ensign, ʻOkatopa 2015, 29)

Ko e hā e ʻuhinga ʻoku fuʻu lahi ai hono fakafepakiʻi e fāmilí?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku fakataumuʻa e fakafepaki fefeka taha ʻa Sētané ki he meʻa pē ʻoku mahuʻinga taha ki he palani ʻa e ʻOtuá. Ko ia ai, ʻokú ne feinga ke fakafepakiʻi ʻa e fakalakalaka ki he hakeakiʻí ʻaki ʻene fakamoveteveteʻi ʻa e nofo malí, fakatupu loto-siʻi ki he maʻu fānaú, pe fakafihiʻi ʻa e tuʻunga tangata pe fefiné. Ka neongo ia, ʻoku tau ʻilo ʻi he fononga lōloá, he ʻikai liliu ʻa e taumuʻa fakalangi mo e palani ʻa ʻetau Tamai Hēvani ʻofá. ʻE malava ke liliu ʻa e ngaahi tūkunga fakatāutahá, pea ʻoku fakapapauʻi ʻe he palani ʻa e ʻOtuá ʻi he lele lōloá, ʻe maʻu ʻe he kau faivelenga ʻoku tauhi ʻenau ngaahi fuakavá ʻa e faingamālie ke nau taau mo e tāpuaki kotoa pē kuo talaʻofa angé. (Dallin H. Oaks, “ʻOfa Fakalangi ʻi he Palani ʻa e Tamaí,” Liahona, Mē 2022, 103)

Naʻe vahevahe ʻe ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻohofi ʻa e nofo-malí mo e fāmilí koeʻuhí ʻoku ʻilo ʻe Sētane ʻoku nau mahuʻinga ki hono maʻu ʻo e moʻui taʻengatá—ʻo mahuʻinga tatau mo e Fakatupú, Hingá, ko e Fakalelei mo e Toetuʻu ʻa Sīsū Kalaisí. Koeʻuhí ko e ʻikai ko ia ke ne lava ʻo fakaʻauha ha taha ʻo e ngaahi konga mahuʻinga ʻo e palaní, ʻoku feinga leva ʻa Sētane ke fakaʻauha ʻetau mahinó mo hono fakahoko ko ia ʻo e nofo-malí mo e fāmilí. (Robert D. Hales, “Ko e Palani ʻo e Fakamoʻuí: Ko ha Mataʻikoloa Toputapu ʻo e ʻIló ke Tataki Kitautolu,” Ensign, ʻOkatopa 2015, 29)

Ko e fē ha feituʻu te u lava ʻo ako lahi ange ai fekauʻaki mo e ngaahi akonaki ʻa e Siasí fekauʻaki mo e liliu tangata pe fefiné?

Vakai, Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6, 23, ChurchofJesusChrist.org.

ʻE tāpuekina fēfē au ʻi heʻeku tokanga taha ki hoku vā fetuʻutaki mo e ongomātuʻa fakalangí?

Naʻe fakamatalaʻi ʻe Palesiteni Lāsolo M. Nalesoni ʻo pehē:

Ko hai koe?

ʻUluaki mo mahuʻinga tahá, ko ha fānau koe ʻa e ʻOtuá.

Uá, ʻi hoʻo hoko ko e mēmipa ʻo e Siasí, ko e fānau koe ʻo e fuakavá. Pea tolú, ko ha ākonga koe ʻo Sīsū Kalaisi.

ʻOku ou kole atu he pooni kiate kimoutolu ke ʻoua naʻa mou fetongi e meʻa mahuʻinga mo taʻefeliliuaki ʻe tolu ko ʻení ʻaki ha toe meʻa kehe, koeʻuhí he ʻe hoko ʻa hoʻomou fai iá ke fakafeʻātungiaʻi ai hoʻomou fakalakalaká pe fokotuʻu taʻetotonu ai kimoutolu ʻi ha faʻahinga fakakalakalasi te ne taʻofi hoʻomou fakalakalaka taʻengatá. …

Ko e moʻoni ʻoku ʻi ai ha ngaahi hingoa kehekehe ʻoku matuʻaki mahuʻinga kiate koe. ʻOua muʻa naʻa mou maʻuhala ʻeku ʻuhingá. ʻOku ʻikai ko ʻeku ʻuhingá ʻoku ʻikai mahuʻinga e ngaahi tuʻunga mo e ngaahi meʻa kehe ʻoku ʻiloʻi ʻaki kimoutolú. Ko ʻeku ʻuhingá ʻoku ʻikai totonu ke hanga ʻe ha faʻahinga meʻa ʻoku ʻiloʻi ʻaki kimoutolu ʻo toʻo, fetongi, pe muʻomuʻa ia ʻi he tuʻunga tuʻuloa ʻe tolu ko ʻení: “fānau ʻa e ʻOtuá,” “fānau ʻo e fuakavá,” mo ha “ākonga ʻo Sīsū Kalaisi.” (Russell M. Nelson, “Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)

Naʻe akoʻi ʻe Sisitā Soi D. Sōnasi, Palesiteni Lahi mālōlō ʻo e Palaimelí:

ʻE fakapapauʻi mai ʻe he Laumālié kiate kitautolu fakafoʻituitui ʻa hotau mahuʻinga fakalangí. ʻE faitokonia ʻa e tapa kotoa hoʻo moʻuí ʻi hoʻo ʻiloʻi moʻoni ko e [fānau] koe ʻa e ʻOtuá, pea ʻe tataki koe ʻi he ngāue ʻokú ke fakahoko ʻi he ʻaho kotoa pē. Naʻe fakamatalaʻi ʻe Palesiteni Sipenisā W. Kimipolo (1895–1985) ʻi he ngaahi lea nāunauʻiá ni ʻo pehē:

“Ko e ʻOtuá ʻa hoʻo Tamaí. ʻOkú Ne ʻofa ʻiate koe. ʻOku taʻe-hano-tatau ʻEne mahuʻingaʻia mo hoʻo faʻē fakalangí ʻiate koé. … ʻOkú ke makehe. ʻOku mahulu hake ʻa e poto taʻengata ʻokú ke maʻú, ʻa ia ʻoku malava ai ke ke maʻu ʻa e moʻui taʻengatá.

“ʻOua naʻá ke teitei fehuʻia ho mahuʻinga fakafoʻituituí. Ko e taumuʻa kakato ʻo e palani ʻo e ongoongoleleí ko hono ʻomi ha faingamālie maʻamoutolu kotoa ke mou aʻusia ai ʻa e lelei taha te mou malavá, ʻa ia ko e fakalakalaka taʻengatá mo e tuʻunga faka-ʻOtuá” [“Privileges and Responsibilities of Sisters,” Ensign, Nov. 1978, 105]. …

… ʻI he hiki hake kitautolu ʻe he Fakamoʻuí ki ha tuʻunga māʻolunga angé, ʻe lava ke toe lelei ange ʻetau vakaí, ʻo ʻikai ngata pē ki hotau tuʻungá, ka ʻoku tau toe ofi ange kiate Ia ʻi he meʻa ʻoku tau lava ʻo fakakaukauá. (Joy D. Jones, “Mahuʻinga Taʻe-Hano-Tatau,”Liahona, Nōvema 2017, 14, 15)

Ngaahi ʻEkitivitī Fakalahi ki he Akó

Founga ʻe taha ke kamata ʻakí

Fakakaukau ke kamata ʻa e kalasí ʻaki hono vahevahe e tūkunga ko ʻení:

Lolotonga e fekumi ʻa Litia ʻi he ʻinitanetí ki haʻane ngāue fakakalasi, naʻá ne maʻu ha ngaahi fakamatala naʻe fakakikihi ai ʻoku ʻikai toe fiemaʻu ʻa e tukufakaholo nofo fakafāmilí (ko ha tangata mo ha fefine mali mo ʻena fānau) ʻi he sōsaietí. Lolotonga e kalasí hili ha ngaahi ʻaho siʻi mei ai, naʻe fakatokangaʻi ʻe Litia ʻokú ne toko taha pē ʻi heʻene feinga ke taukaveʻi e mahuʻinga ʻo e tukufakaholo nofo fakafāmilí. Ko e tokolahi ʻo hono kaungā akó naʻe ʻikai ke nau fakamuʻomuʻa e malí pe maʻu ha fānaú. Kiate kinautolu, naʻe fakafaingataʻaʻiaʻi ʻe he malí mo e fānaú ʻa e lavameʻa fakafoʻituitui ʻa ha taha. Naʻe hanga ai ʻe he aʻusiá ni ʻo fakatupu ha ngaahi fehuʻi mo ha ngaahi ongo taʻefiemālie kia Litia.

Te ke lava ʻo fakaafeʻi e kau akó ke nau vakavakaiʻi e tūkungá ʻo fakaʻaongaʻi ha ngaahi fehuʻi hangē ko ʻení:

• Ko e hā ha faʻahinga fehuʻi pe ongo ʻe ala maʻu ʻe Litia?

• Ko e hā e meʻa ʻokú ke ʻilo fekauʻaki mo e palani ʻa e Tamai Hēvaní ʻe lava ʻo tokoni kia Litiá?

ʻE lava ke kumi ʻe he kau akó ha ngaahi moʻoni fekauʻaki mo e ngaahi tefito ko ʻení ʻi heʻenau ako ʻa e “Ko e Fāmilí: Ko ha Fanongonongo ki Māmani” ʻi he lolotonga ʻo e uiké.

“Ko e tokotaha fakafoʻituitui kotoa pē ko ha laumālie ia ʻo ha foha pe ʻofefine ʻofeina ʻo ha mātuʻa fakalangi.”

Ke aleaʻi lahi ange ʻa e fakakaukau ko ʻeni mei he fanongonongo ki he fāmilí, te ke lava ʻo fakaafeʻi e kau akó ke vakaiʻi ʻenau ongo fekauʻaki mo honau tuʻunga ko e fānau ʻa ha ongomātuʻa fakalangi. Fakakaukau ke vahevahe e lea ʻa Palesiteni Lāsolo M. Nalesoni mo Sisitā Soi D. Sōnasi mei he konga “Ngaahi Maʻuʻanga Tokoni Kehé”. Te ke lava ʻo ʻeke ha ngaahi fehuʻi hangē ko ʻení ki he kau akó:

• Ko e hā e meʻa ʻoku makehe kiate koe mei he ngaahi fakamatala ko ʻení?

• Ko e hā ha meʻa kuó ne tokoniʻi koe ke ke houngaʻia ʻi ho tuʻunga ko ha foha pe ʻofefine ʻo ha mātuʻa fakalangí?

• ʻE tokoni fēfē ʻa e tokanga taha ki hotau tuʻunga ʻi he fāmili ʻo e ʻOtuá ki ha taha ʻoku fefaʻuhi mo ha ngaahi tūkunga fakafāmili faingataʻa ʻi he māmaní?

Te ke lava ʻo vakai ki he lēsoni 176, “Ko Hotau Tuʻunga Fakalangí mo e Taumuʻá,” ko ha maʻuʻanga tokoni makehe.

Ko hono maʻu ʻo e ʻilo fakalaumālié

Ke fakatupulaki ha taha ʻo e ngaahi konga ʻi he lēsoni ko ʻení, te ke lava ʻo fakaafeʻi e kau akó ke nau vahevahe fakakulupu tautau toko tolu. ʻE lava ke lau ʻe he tokotaha ako takitaha ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié (palakalafi 5–12 ʻi he Fakamatala ki he ʻElito ʻo e Fakataukei Fakatokāteliné [2023]). ʻE lava ke kumi ʻe he kau akó ha ngaahi fakakaukau ʻe tokoni ke mahino lelei ange kiate kinautolu ha taha ʻo e ngaahi konga ʻi he lēsoni ʻo e ʻaho ní.