“Lēsoni 176—Ko Hotau Tuʻunga mo e Taumuʻa Fakalangí: ʻOku Tau Maʻu ha Natula mo ha Ikuʻanga Fakalangi,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hotau Tuʻunga mo e Taumuʻa Fakalangí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 176: Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí
Ko Hotau Tuʻunga mo e Taumuʻa Fakalangí
ʻOku Tau Maʻu ha Natula mo ha Ikuʻanga Fakalangi
ʻI heʻetau hoko ko e fānau ʻa ha mātuʻa fakalangí, te tau lava ʻo aʻusia ʻa e tuʻunga ʻokú Na ʻi aí pea maʻu ʻa e meʻa ʻokú Na maʻú. ʻOku ʻatā ʻa e ngaahi tāpuaki ko ʻení maʻatautolu takitaha koeʻuhí ko Sīsū Kalaisi mo ʻEne Fakaleleí. ʻE lava ke tokoni e lēsoni ko ʻení ke ongoʻi ʻe he kau akó ʻoku ʻi ai honau natula mo ha taumuʻa fakalangi ʻi heʻenau hoko ko e fānau ʻa e ʻOtuá.
Ngaahi ʻEkitivitī Ako ʻOku Ala Fakahokó
Ko hai au pea ko e hā ʻeku taumuʻá?
Kamata e lēsoní ʻaki hono tokoniʻi e kau akó ke nau fakakaukau ki he faingofua ke ngalo hotau tuʻunga fakalangí mo hotau mahuʻingá. Te ke lava ʻo fai ʻeni ʻaki haʻo vahevahe ʻa e vitiō “Our True Identity” (3:39) mei he taimi 0:00 ki he 1:14. Fakaafeʻi e kau akó ke fakakaukau ki he founga te tau lava ai ʻo vakai kiate kitautolu ko ha taha feifeiʻavale. Hili iá, te ke lava leva ʻo ʻai ke faʻu ʻe he kau akó ha tūkunga hangē ko ʻení, ʻa ia ʻe ala ongoʻi ai ʻe ha taha ʻokú ne feifeiʻavale ʻi he taimi ʻoku ngalo ai ʻiate ia hono tuʻunga fakalangi ko ha fānau ʻa e ʻOtuá.
Pe ko hoʻo kamata ʻaki hano vahevahe ha tūkunga hangē ko ʻení, ʻo liliu ha niʻihi ʻo e ngaahi fakaikiikí ke fakahaaʻi ha ngaahi hohaʻa ʻe ala maʻu ʻe hoʻo kau akó.
ʻOku taʻu 15 ʻa ʻAmelia. ʻOkú ne faʻa ongoʻi tuenoa mo ʻikai fakatokangaʻi ia ʻe he niʻihi kehé. ʻOkú ne fakaʻamu naʻe tokolahi hono ngaahi kaungāmeʻá pea naʻe kehe hono fōtungá. ʻOku sio ʻa ʻAmelia ki hono fai ʻe he niʻihi kehé ha ngaahi meʻa mahuʻinga ka ʻoku ʻikai ke ne fakakaukau ʻoku lelei feʻunga ke ne fai ha faʻahinga meʻa pē ʻoku mahuʻinga. ʻOkú ne veiveiua ʻi hono mahuʻinga fakatāutahá.
-
Ko e hā te ne lava ʻo ʻai ke faingataʻa hono manatuʻi hotau tuʻunga ko e fānau ʻa e ʻOtuá?
Fakamatalaʻi ange ʻe ako ʻe he kau akó lolotonga e lēsoni ko ʻení fekauʻaki mo honau tuʻunga fakalangi ko e ngaahi ʻofefine mo e ngaahi foha ʻo e ʻOtuá. Fakaafeʻi kinautolu ke fakakaukau ki ha niʻihi ʻo e ngaahi founga ʻoku tokoniʻi ai ʻenau moʻuí ʻi heʻenau ʻiloʻi ko e fānau kinautolu ʻa e ʻOtuá. ʻE lava ke nau tohi ʻenau ngaahi fakakaukaú ʻi heʻenau tohinoa akó. Fakaafeʻi e kau akó ke fakafanongo ki hono akoʻi kinautolu ʻe he Laumālie Māʻoniʻoní fekauʻaki mo honau tuʻunga mo e taumuʻa fakalangí.
Natula mo e taumuʻa faka-ʻOtuá
Ki he ʻekitivitī ko ʻení, te ke lava ʻo vahevahe ʻa e kalasí ki ha fanga kiʻi kulupu iiki. Fakaafeʻi e kau akó ke fakaʻaongaʻi e laʻipepa tufa “Ko Hoku Tuʻunga mo e Taumuʻa Fakalangí” ke teuteuʻi ha tali kia ʻAmelia. Vahe ki ha taki fakakulupu ʻe lava ʻo tokoni ki heʻenau kulupú ke fakahoko ha ngaahi fatongia kehekehe. Hangē ko ʻení, ʻe lava ha tokotaha ako ʻe taha ʻo laukonga, ʻe lava ha tokotaha kehe ʻo hiki ha tali, pea fakamatala leva ha taha ki he kalasí.
ʻE lava ke kumi ʻe he kau akó ha toe ngaahi potufolofola pe fakamatala ʻaki haʻanau fekumi ʻi he “natula faka-ʻOtuá” pe “ikuʻanga fakalangí” ʻi he Gospel Library.
Lau ʻa e ngaahi potufolofola mo e ngaahi fakamatala ʻi he laʻipepa tufá. Kumi ha ngaahi kupuʻi lea ʻokú ke pehē ʻe ala tokoni kia ʻAmelia, pea fakakaukau ki he ʻuhinga te nau ala tokoni aí.
Ko Hoku Tuʻunga mo e Taumuʻa Fakalangí
1. Lau ʻa e lea ko ʻeni naʻe fai ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi ki he finangalo ʻa e Fakamoʻuí maʻaú:
ʻOku ou tui ʻe finangalo e Fakamoʻuí ke ke sio, ongoʻi, mo ʻiloʻi ko Ia hoʻo mālohingá. Pea ʻi Heʻene tokoní, he ʻikai ha fakangatangata ki he meʻa te ke malavá. ʻOku taʻe fakangatangata e meʻa te ke malavá. Te Ne finangalo ke ke vakai kiate koe ʻo hangē ko ʻEne ʻafio mai kiate koé. Pea ʻoku kehe ʻaupito ia mei he anga ʻa e vakai atu ʻa e māmaní kiate koé.
ʻE fakahā atu ʻe he Fakamoʻuí ʻi ha lea mātuʻaki mahino, ko ha ʻofefine pe foha koe ʻo ha ʻOtua Māfimafi. Ko hoʻo Tamai Hēvaní ʻa e tokotaha nāunauʻia taha ʻi he ʻunivēsí, ʻoku mohu ʻi he ʻofa, fiefia, haohaoa, māʻoniʻoni, maama, ʻaloʻofa, mo e moʻoni. Pea ʻe ʻi ai e ʻaho te Ne finangalo ke ke maʻu ʻEne meʻa kotoa pē. (Dieter F. Uchtdorf, “Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 9–10)
Lau ʻa e Tokāteline mo e Ngaahi Fuakava 14:7, ʻo kumi ʻa e meʻa ʻoku finangalo ʻa e Tamai Hēvaní ke ʻoatu maʻaú.
2. Lau ʻa e lea ko ʻeni ʻa Sisitā Mīseli D. Keleki, ʻo e Kau Palesitenisī Lahi mālōlō ʻo e Kau Finemuí, ʻo kumi ʻene faleʻi ki ha taha pē ʻokú ne fehuʻia hono mahuʻinga fakalangí:
Mahalo ko e meʻa mahuʻinga taha ke tau ʻiloʻi leleí pe ko hai ʻa e ʻOtuá pea ko hai moʻoni kitautolu—ko e ngaahi foha mo e ngaahi ʻofefine ʻo ha ongomātuʻa fakalangi, ʻoku ʻi ai ha “natula faka-ʻOtua mo ha ikuʻanga taʻengata” [kaveinga ʻa e kau Finemuí, ChurchofJesusChrist.org]. Kole ki he ʻOtuá ke fakahaaʻi atu ʻa e ngaahi moʻoni ko ʻení kiate koe, fakataha mo e anga ʻEne ongo kiate koé. (Michelle D. Craig, “Mata ke Mamata,” Liahona, Nōvema 2020, 15–16)
Lau ʻa e Tokāteline mo e Ngaahi Fuakava 18:10–13, ʻo kumi e ongo ʻoku maʻu ʻe he Tamai Hēvaní kiate koé.
3. Lau ʻa e lea ko ʻeni ʻa Palesiteni Sūsana H. Pota, Palesiteni Lahi ʻo e Palaimelí, ʻo kumi e ʻuhinga ʻoku tau takitaha fiemaʻu ai ke ʻiloʻi e ongo ʻoku maʻu ʻe he Tamai Hēvaní kiate kitautolú:
ʻI hoʻomou ʻiloʻi pea mahino hono ʻofeina taʻe-hano-tatau kimoutolu ko ha fānau ʻo e ʻOtuá, ʻokú ne liliu e meʻa kotoa pē. ʻOkú ne liliu hoʻo ongo kiate koe ʻi he taimi ʻokú ke fakahoko ai ha fehalākí. ʻOkú ne liliu hoʻo ongó he taimi ʻoku hoko ai e ngaahi faingataʻá. ‘Okú ne liliu hoʻo vakai ki he ngaahi fekau ʻa e ʻOtuá. ʻOkú ne liliu e anga hoʻo vakai ki he niʻihi kehé, mo hoʻo malava ke fakahoko ha meʻa makehé. (Susan H. Porter, “ʻOfa ʻa e ʻOtua: Ko e Fakafiefia Taha ia ki he Laumalié,” Liahona, Nōvema 2021, 33)
4. Lau ʻa e lea ko ʻeni ʻa Palesiteni Lāsolo M. Nalesoní, ʻo kumi e meʻa naʻá ne akoʻi fekauʻaki mo e ʻamanaki ʻa ʻetau Tamai Hēvaní maʻatautolu takitahá:
ʻOku fakaʻatā kitautolu ʻe he palani ʻa e Tamai Hēvaní maʻa ʻEne fānaú ke tau nofo ʻi he feituʻu mo e founga ʻokú Ne moʻui aí pea iku ʻo hoko ʻo hangē ko Iá. ʻOku ʻomi ʻe [Heʻene] palaní ʻa e ngaahi tāpuaki maʻongoʻonga taha ʻo e taʻengatá kiate kitautolu, kau ai ʻa e malava ke tau hoko ko e “kaungā ʻea-hoko fakataha mo Kalaisí” [Loma 8:17]. (Russell M. Nelson, “Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)
Kapau ʻe ʻaonga ki he kau akó, te ke lava ʻo huluʻi e toenga ʻo e foʻi vitiō “Our True Identity” (3:39) mei he taimi 1:15 ki he 3:39. ʻE lava ke taʻofi fakataimi ʻe he kau akó ʻenau fealēleaʻaki fakakulupú ke mamata ʻi he vitioó. Fakaafeʻi leva e kau akó ke nau tānaki ki he meʻa te nau lava ʻo vahevahe mo ʻAmeliá.
ʻI he fakaʻosi ʻe he kau akó ʻenau fealēleaʻaki fakakulupú, fakaafeʻi kinautolu ke lipooti e meʻa ne nau akó ki he kalasí. Ke poupouʻi e fealēleaʻaki fakakalasí, te ke lava ʻo fakaafeʻi e kau akó ke vahevahe ʻa e meʻa ne nau pehē ʻoku ʻuhingamālie ki he ngaahi fakamatala ʻa e niʻihi kehé.
Ko e mahuʻinga ʻo e tuʻunga ʻoku ou ʻi aí pea mo e tuʻunga te u lava ʻo aʻusiá
ʻE lava ke tokoni ʻa e hiki tohinoá ke fakaloloto e mahino ʻa e kau akó mo tokanga ange ki heʻenau ngaahi ongó. ʻE toe lava foki ke tokoni ki he kau akó ke fakaafeʻi ʻa e Laumālie Māʻoniʻoní ke akoʻi kinautolu. Fakaafeʻi ʻa e kau akó ke nau tali ʻa e ongo fehuʻi ko ʻení ʻi heʻenau tohinoa akó.
-
Ko e hā ha ngaahi fakakaukau pe ongo naʻá ke maʻu ʻi hoʻo ako fekauʻaki mo ho tuʻunga fakalangi mo e taumuʻa ʻi hoʻo hoko ko e fānau ʻa e ʻOtuá?
-
ʻOkú ke pehē ʻe liliu fēfē ʻe he ʻilo ko ʻení ʻa e ngaahi fili ʻokú ke faí pe ko e anga hoʻo feohi mo e niʻihi kehé?
-
Ko e hā ha ngaahi meʻa kuó ke aʻusia kuó ne tokoniʻi koe ke ke ongoʻi ko e fānau koe ʻa e ʻOtuá ʻoku ʻi ai haʻo ikuʻanga fakalangi?
Fakaafeʻi e kau ako te nau loto-fiemālie ke vahevahe ʻenau ngaahi ongo mo e aʻusia fekauʻaki mo e mahuʻinga ʻo honau natula mo e ikuʻanga fakalangí.
Fakakaukau ke fai hoʻo fakamoʻoni fekauʻaki mo e tuʻunga fakalangi mo e taumuʻa ʻo e fānau takitaha ʻa e ʻOtuá.