“Lēsoni 174—Fakahinohino Ki Hono Fakamālohia ʻo e Toʻu Tupú: ʻʻE Fakatauʻatāinaʻi Koe ʻe he Moʻoní,ʼ” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Fakahinohino Ki Hono Fakamālohia ʻo e Toʻu Tupú,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 174: Ki Hono Fakamālohia ʻo e Toʻu Tupú
Fakahinohino Ki Hono Fakamālohia ʻo e Toʻu Tupú
“ʻE Fakatauʻatāinaʻi Koe ʻe he Moʻoní”
ʻOku ʻofa mo falala ʻa e Tamai Hēvaní ki he toʻu tangata kei tupu haké. Kuó Ne ʻomi ha fakahinohino fakaepalōfita ke tokoni ki he toʻu tupu ʻo e ʻaho ní ke fakatupulaki ʻenau tui kia Sīsū Kalaisí mo nofo maʻu ʻi he hala ʻo e fuakavá. ʻE lava ke tokoni ʻa e lēsoni ko ʻení ke fekumi ʻa e kau akó kia Sīsū Kalaisi ʻi he taimi ʻoku nau fakahoko ai ha ngaahi filí ʻaki hono fakaʻaongaʻi ʻo e “Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí.”
Ngaahi ʻEkitivitī Ako ʻOku Ala Fakahokó
ʻOku fakataumuʻa ʻa e ongo ʻuluaki konga ʻo e lēsoni ko ʻení ke tokoniʻi ʻa e kau akó ke nau ako lahi ange fekauʻaki mo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022) koeʻuhí ke nau lava ʻo falala lelei ange kia Sīsū Kalaisi. ʻOku ʻomi ʻe he konga fakaʻosí ha ʻekitivitī ako ʻoku fakatefito ʻi he konga ʻi he kiʻi tohitufá ʻoku ui ko e “ʻE Fakatauʻatāinaʻi Koe ʻe he Moʻoní” ʻi he peesi 30–33. ʻOku ʻi ai ha ngaahi fakakaukau ke ako ha toe ngaahi tefito mei he tohi fakahinohinó ʻi he ngaahi tohi lēsoni kehe ʻa e faiako seminelí. Fakakaukauʻi pe ko e fē ʻa e ngaahi konga mei he lēsoni ko ʻení pea ko e fē ʻa e ngaahi tefito mei he Ki Hono Fakamālohia ʻo e Toʻu Tupú te ne feau lelei taha ʻa e ngaahi fiemaʻu hoʻo kau akó.
Ko Sīsū Kalaisi ʻa e mālohinga ʻo e toʻu tupú
Fakakaukau ke hiki ʻa e foʻi lea ko e mālohi ʻi he palakipoé pea fakaafeʻi ʻa e kau akó ke vahevahe pe ko hai pea ko e hā ʻa e meʻa ʻoku nau fakakaukau ki ai ʻi heʻenau vakai ki he foʻi lea ko ʻení. Fakaʻaliʻali ha ʻīmisi ʻo Sīsū Kalaisi, pea aleaʻi ʻa e ngaahi fehuʻi ko ʻení.
-
Ko e hā ʻoku hoko ai ʻa Sīsū Kalaisi ko ha sīpinga lelei ʻo e mālohí? Naʻá Ne fakahaaʻi fēfē ʻa e mālohí ʻi he ngaahi tafaʻaki kotoa pē ʻo ʻEne moʻuí?
-
Ko e hā ha ngaahi tūkunga ʻe niʻihi ʻoku fehangahangai mo e toʻu tupú ʻa ia ʻe lava ke tokoniʻi ai kinautolu ʻe he mālohi ʻo e Fakamoʻuí?
Lau ʻa e “Pōpoaki mei he Kau Palesitenisī ʻUluakí” ʻi he peesi 2 ʻi he Ki Hono Fakamālohia ʻo e Toʻu Tupú, ʻo kumi ki he founga ʻe lava ke ke maʻu ai ha mālohí.
-
ʻOkú ke pehē ʻoku ʻuhinga ki he hā ʻa e hoko ʻa Sīsū Kalaisi ko e “mālohinga ʻo e toʻu tupú”?
-
Kuó ke maʻu fēfē ha tokoni mo ha mālohi meiate Ia?
Ko hono fakahoko ha ngaahi fili ʻoku ueʻi fakalangí
Fakaafeʻi ʻa e kau akó ke nau fakakakato ʻa e ʻekitivitī ko ʻení ʻi heʻenau tohinoa akó.
Hiki ha niʻihi ʻo e ngaahi fili mahuʻinga pe ngaahi fili ʻe fiemaʻu ke ke fai ʻi he taʻu ʻe 10 ka hokó. Fakapapauʻi pe ko e fē ʻi he ngaahi fili ko ʻení ʻe ʻaonga taha ki he toenga hoʻo moʻuí.
ʻE lava ke fakamamafaʻi ʻe he kau akó ʻa e ngaahi fili ʻoku nau ongoʻi ʻe ʻaonga taha ki heʻenau moʻuí ʻaki hono laineʻi kinautolú. ʻI he fehuʻi hokó, te nau lava ʻo tali fakalongolongo pē ʻaki haʻanau tā ha fofonga malimali, fofonga ʻikai malimali pe fakafulofula, pe fofonga fakafulofula ʻi heʻenau tohinoá ke fakahaaʻi ʻenau loto-falala fekauʻaki mo hono fai ʻo e fili takitaha.
-
Ko e hā hoʻo ongoʻi loto-falala fekauʻaki mo hono fai ʻo e ngaahi fili ko ʻení?
-
Ko e hā ha ngaahi maʻuʻanga tokoni kuo ʻomi ʻe he Tamai Hēvaní ke tokoniʻi koe ke ke fai ha ngaahi fili fakalaumālie?
ʻE lava ke vahevahe ʻe he kau akó ʻa e founga kuo tokoniʻi ai kinautolu ʻe he Ki Hono Fakamālohia ʻo e Toʻu Tupú ke nau fai ha ngaahi fili fakalaumālié.
Lau ʻa e konga “Fai ha Ngaahi Fili ʻoku Ueʻi Fakalangí” ʻi he peesi 4–5 ʻi he Ki Hono Fakamālohia ʻo e Toʻu Tupú, ʻo kumi ʻa e meʻa ʻe lava ʻo tokoni atu ki he ngaahi fili ʻokú ke maʻu ʻi he taimi ní pea te ke maʻu ʻi he kahaʻú.
Fakakaukau ke ʻai ʻa e kau akó ke nau tauhoa ke ako ʻa e konga ko ʻení. Vahe ki ha tokotaha ako ʻi he hoa takitaha ke ne ako ʻa e ʻuluaki palakalafi ʻe tolú pea ako ʻe he tahá ʻa e palakalafi ʻe tolu fakamuimuitahá. Fakaafeʻi kinautolu ke fakaʻilongaʻi ʻa e ngaahi foʻi lea mo e ngaahi kupuʻi lea mahuʻingamālié pea vahevahe ʻa e meʻa ne nau akó mo honau hoá.
Hili hono aleaʻi tauhoa ʻe he kau akó, fakakaukau ke tokoniʻi ha fealēleaʻaki fakakalasi ʻaki hano ʻeke ʻa e ngaahi fehuʻi ko ʻení.
-
Ko e hā ha meʻa naʻá ke maʻu ʻe ala tokoni kiate koe ʻi hoʻo fai ha ngaahi fili ʻoku ueʻi fakalangí?
-
ʻOku liliu fēfē nai ʻe he meʻa naʻá ke ʻiló hoʻo ngaahi ongo fekauʻaki mo e Tamai Hēvaní mo Sīsū Kalaisí?
Poupouʻi ʻa e kau akó ke nau fakaʻaongaʻi maʻu pē ʻa e ngaahi akonaki mo e ngaahi tefitoʻi moʻoni ʻi he Ki Hono Fakamālohia ʻo e Toʻu Tupú ʻi heʻenau fai ʻa e ngaahi filí pea feinga ke muimui ki he Fakamoʻuí. ʻAi ke nau sio ki he fakatātā ʻi he fakaʻosinga ʻo e konga “Fakahoko ha Ngaahi Fili ʻoku Ueʻi Fakalangí” ʻi he peesi 5, pe fakaʻaliʻali ʻa e fakamatala ko ʻení ke tokoni ke nau ʻilo ʻa e founga ʻoku fokotuʻutuʻu ai ʻa e Ki Hono Fakamālohia ʻo e Toʻu Tupú.
ʻOku konga tolu ʻa e tefito takitaha ʻi he Ki Hono Fakamālohia ʻo e Toʻu Tupú:
-
Ngaahi moʻoni taʻengatá, pe tokāteline ʻo e ongoongolelei ʻo Sīsū Kalaisi kuo fakafoki maí
-
Ngaahi fakaafe ke ngāueʻi ʻa e ngaahi moʻoni ko iá
-
Ngaahi tāpuaki kuo talaʻofa mai ʻoku foaki ʻe he ʻEikí kiate kinautolu ʻoku moʻui ʻaki ʻEne ngaahi akonakí
Fakaafeʻi ʻa e kau akó ke nau fakalaulauloto ki ha faʻahinga fehuʻi pe faingataʻa lolotonga te nau ala fiemaʻu tokoni ai, tautautefito ki heʻenau fakakaukau ki he ngaahi fili mahuʻinga te nau fai ʻi he ngaahi taʻu siʻi ka hokó. ʻOange ha taimi ke nau ako ai ʻa e Ki Hono Fakamālohia ʻo e Toʻu Tupú, ʻo kumi ki he ngaahi moʻoni taʻengatá, ngaahi fakaafe, mo e ngaahi tāpuaki kuo talaʻofa maí ʻa ia ʻe lava ʻo tokoni ki heʻenau ngaahi hohaʻa paú. Poupouʻi ʻa e kau akó ke hiki ʻa e ngaahi fakakaukaú mo e ongó ʻi heʻenau akó. ʻI heʻenau ʻosí, fakaafeʻi ha niʻihi tokosiʻi ke vahevahe ʻa e meʻa ne nau maʻú, kae fakamanatu ange ke ʻoua naʻa nau vahevahe ha meʻa ʻoku fuʻu fakataautaha. ʻE lava ke tokoni atu ʻa e ngaahi fehuʻi ko ʻení.
-
Ko e hā naʻá ke ʻilo pe ʻilo ʻoku ʻaonga ʻi hoʻo akó?
-
ʻE tokoniʻi fēfē koe ʻe he sīpinga ʻo hono ako ʻa e moʻoni taʻengatá, ngāueʻi ʻa e ngaahi fakaafe fakalaumālié, mo hono manatuʻi ʻo e ngaahi tāpuaki kuo talaʻofa maí ke ke maʻu ai ha mālohi meia Sīsū Kalaisi ke fai ha ngaahi fili fakalaumālié?
“ʻE fakatauʻatāinaʻi koe ʻe he moʻoní”
ʻOku nofotaha ʻa e konga ko ʻeni ʻo e lēsoní ʻi he konga “ʻE Fakatauʻatāinaʻi Koe ʻe he Moʻoní” ʻi he peesi 30–33 ʻi he Ki Hono Fakamālohia ʻo e Toʻu Tupú. Te ke lava ʻo akoʻi fakataha ia mo e ngaahi konga kehé pe ʻiate ia pē.
Hiki ʻa e ngaahi lelei mo e ngaahi palopalema ʻi he palakipoé. Fakakaukau ke fakaʻaliʻali ha telefoni toʻotoʻo, komipiuta toʻotoʻo, pe meʻangāue kehe ʻoku maʻu ai ʻa e ʻinitanetí mo e mītia fakasōsialé. Kole ki he kau akó ke nau fakamatalaʻi ʻa e ngaahi lelei mo e ngaahi palopalema ʻo hono fakaʻaongaʻi ʻo e ʻinitanetí mo e mītia fakasōsialé ʻi he taimi ʻoku fekumi ai ki he ʻiló. Fakaafeʻi kinautolu ke nau lisi ʻi he palakipoé ha ngaahi maʻuʻanga tokoni falalaʻanga ʻoku nau ʻiloʻi pea vahevahe ʻa e ʻuhinga ʻoku mahuʻinga ai ke fakaʻaongaʻi ʻa e ngaahi maʻuʻanga tokoni ko ʻení ʻi he taimi ʻoku fekumi ai ki he moʻoní.
Lau ʻa e Sione 8:31–32, ʻo kumi ki he meʻa naʻe akoʻi ʻe Sīsū fekauʻaki mo e moʻoní.
-
Ko e hā naʻá ke akó?
-
‘Oku tokoniʻi fēfē ʻe he moʻoní ke tau tauʻatāiná?
Fakakaukau ke vahevahe ʻa e kau akó ki ha ngaahi kulupu iiki. Tufa ha laʻipepa ki he kulupu takitaha. Fakaafeʻi kinautolu ke nau fakakaukau ki ha tūkunga mahino ʻoku kau ai ha toʻu tupu ʻoku fekauʻaki mo e ngaahi kaveinga ʻi he konga “ʻE Fakatauʻatāinaʻi Koe ʻe he Moʻoní” ʻi he peesi 30–33. Hangē ko ʻení, ʻe lava ke fakamatalaʻi ʻe he tūkungá ha taha ʻoku ʻikai ke mahino kiate ia ʻa e mahuʻinga ʻo hono ako ʻo e moʻoní, ko ha taha ʻoku fāinga ke moʻui angatonu, pe ko ha taha ʻoku ilifia ke aleaʻi ʻenau tuí mo e niʻihi kehé. Hili hono hiki ʻe he ngaahi kulupú ʻenau tūkungá, fakaafeʻi kinautolu ke fakafetongi pepa mo ha kulupu ʻe taha.
Fakaafeʻi ʻa e kau akó ke nau lau ʻa e palakalafi 1–4 ʻo e konga “ʻE Fakatauʻatāinaʻi Koe ʻe he Moʻoní” ʻi he peesi 31 pea feinga ke ʻiloʻi ha tefitoʻi moʻoni. Te nau lava ʻo ʻiloʻi ha tefitoʻi moʻoni hangē ko ʻení: ʻOku tokoniʻi kitautolu ʻe hono ako mo moʻui ʻaki ʻa e ngaahi moʻoni taʻengatá ke tau hoko ʻo hangē ange ko e Tamai Hēvaní mo maʻu ʻa e melinó mo e fiefiá ʻi he moʻuí ni.
-
ʻE tokoniʻi fēfē kitautolu ʻe hono ako mo moʻui ʻaki ʻo e ngaahi moʻoni taʻengatá ke tau hoko ʻo hangē ange ko e Tamai Hēvaní? ʻE tokoniʻi fēfē koe ʻe Sīsū Kalaisi ʻi he foungá ni?
-
Ko e fē ha taimi kuó ke aʻusia ai pe ko ha taha ʻokú ke ʻiloʻi ha nonga mo ha fiefia mei hono moʻui ʻaki ʻo e ngaahi moʻoni taʻengata ʻo e ongoongolelei ʻa e Fakamoʻuí?
Kole ki he kau akó ke nau hiki ha tali ki he tokotaha ʻi he tūkungá ʻo fakaʻaongaʻi ʻa e ngaahi moʻoni taʻengatá, ngaahi fakaafé, mo e ngaahi tāpuaki kuo talaʻofa mai ʻoku akoʻi ʻi he konga “ʻE Fakatauʻatāinaʻi Koe ʻe he Moʻoní” ʻi he peesi 30–33. Fakaafeʻi ha ngaahi kulupu ʻe niʻihi ke vahevahe ʻa e tūkunga ne nau maʻú mo e founga ne nau fakaʻaongaʻi ai ʻa e fakamatala ʻi he Ki Hono Fakamālohia ʻo e Toʻu Tupú ke tokoní.
Ke fakaʻosí, fakakaukau ke fakaafeʻi ʻa e kau akó ke nau tali ʻa e fehuʻi ko ʻení ʻi heʻenau tohinoa akó.
-
Ko e hā ha ngaahi liliu te ke lava ʻo fai ʻi hoʻo moʻuí koeʻuhí ko e meʻa kuó ke ako mo ongoʻi ʻi he ʻaho ní?
ʻI hono ako ʻe he kau akó ʻa e “ʻE Fakatauʻatāinaʻi Koe ʻe he Moʻoní” ʻi he peesi 30–33 pe ngaahi konga kehe ʻi he Ki Hono Fakamālohia ʻo e Toʻu Tupú, mahalo naʻa nau ongoʻi ʻa e fiemaʻu ke fai ha ngaahi liliu ʻi heʻenau moʻuí. Fakaafeʻi ʻa e kau akó ke nau fekumi ʻi he konga “ʻE Tokoniʻi Koe ʻe Sīsū Kalaisi” ʻi he peesi 6–9, ʻo kumi ʻa e founga te nau lava ai ʻo maʻu ha mālohi meia Sīsū Kalaisi ke liliú.