Lēsoni 177: Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí

Ko Hono Puleʻi ʻo e Tekinolosiá

Ko e ʻIloʻilo Pau ʻi Heʻetau Ngaahi Fili Fekauʻaki mo e Tekinolosiá

ʻOku tau monūʻia ke moʻui ʻi ha kuonga ʻoku tupulaki ai e tekinolosiá. ʻE lava ke tokoni ʻetau fakaʻaongaʻi ʻa e tekinolosiá ke tau ofi ange ai kia Sīsū Kalaisi mo tokoni ke tupulaki ʻEne ngāué. Ka te ne lava foki ʻo taki kitautolu ke tau mamaʻo meiate Ia. ʻE lava ke tokoni ʻa e lēsoni ko ʻení ke fakaʻaongaʻi ʻe he kau akó ha founga malu ke nau puleʻi ʻenau fakaʻaongaʻi ʻa e tekinolosiá.

Ngaahi ʻEkitivitī Ako ʻOku Ala Fakahokó

Fakaʻaongaʻi ʻo e Tekinolosiá

Fakakaukau ke fakaʻaliʻali ha fakatātā ʻo e ʻū lauʻi peleti koulá. Fakamatalaʻi ange naʻe tuku ʻe he ʻOtuá ʻa e ʻū lauʻi peleti koulá ki he Palōfita ko Siosefa Sāmitá.

Lau ʻa e Siosefa Sāmita—Hisitōlia 1:46, ʻo kumi ʻa e fakatokanga naʻe fai ʻe Molonai kia Siosefa Sāmita fekauʻaki mo e ʻū lauʻi peleti koulá.

Fakakaukau ke hiki ʻa e ʻuluʻi tohi Ko hono fakaʻaongaʻi ki he leleí ʻi he tafaʻaki ʻe taha ʻo e palakipoé pea mo e ʻuluʻi tohi Ko hono fakaʻaongaʻi halá ʻi he tafaʻaki ʻe tahá. Hili iá, te ke lava ʻo hiki e tali ʻa e kau akó ki he ngaahi fehuʻi ko ʻení ʻi lalo ʻi he ʻuluʻi tohi takitaha.

• Naʻe feinga fēfē nai ʻa Sētane ke ngāue hala ʻaki ʻe Siosefa Sāmita ʻa e ʻū lauʻi peleti koulá?

• Naʻe fakaʻaongaʻi fēfē nai ʻe Siosefa Sāmita ʻa e ʻū lauʻi peleti koulá ki he leleí?

Puke hake ha telefoni toʻotoʻo pe fakaʻaliʻali ha fakatātā ʻo ha telefoni, pea talaange ki he kau akó kuo falala ange ʻa e ʻOtuá kiate kinautolu ʻi he tekinolosiá.

• Te tau fakaʻaongaʻi fēfē ʻa e tekinolosiá ki he leleí?

• Ko e hā ha ngaahi founga ʻe ala ongoʻi ai ʻe he toʻu tupú ʻoku ʻahiʻahiʻi kinautolu ke nau ngāue hala ʻaki e tekinolosiá?

Fakaafeʻi e kau akó ke nau fakalaulauloto fakalongolongo ki he fehuʻi ko ʻení.

• ʻOkú ke fakaʻaongaʻi fēfē ʻa e tekinolosiá ʻi he ngaahi founga ʻoku finangalo e ʻEikí ke ke fakaʻaongaʻi ai iá?

Poupouʻi e kau akó ke nau tauʻatāina ki ha ngaahi ongo ʻo e founga te nau lava ai ʻo puleʻi ʻenau fakaʻaongaʻi e tekinolosiá. Fakakaukau ke vahevahe ange hangē pē ko hono tataki ʻe he ʻEikí ʻa Siosefa Sāmita ke ne fakaʻaongaʻi ʻa e ʻū lauʻi peleti koulá ki he leleí, te Ne lava ʻo fakahoko ʻa e meʻa tatau ʻi he tekinolosiá.

Tataki fakalaumālie

ʻE lava ke tokoni ʻa e ʻekitivitī ko ʻení ki he kau akó ke nau ako mei he fakahinohino fakalaumālie ʻa e ʻEikí fekauʻaki mo hono puleʻi ʻo e tekinolosiá.

Ko e founga ʻe taha te ke lava ai ʻo ako ʻa e ngaahi konga ko ʻení ko hano vahevahe hoʻo kalasí ki ha kulupu ʻe ua. Tufa ha konga ʻe taha ki he kulupu takitaha. Fakaafeʻi e kau akó ke ako fakafoʻituitui ʻenau kongá, hiki ʻi heʻenau tohinoa akó ʻenau tali ki he ngaahi fehuʻí, pea mateuteu ke akoʻi e meʻa ʻoku nau akó.

Pe ko hoʻo fakaafeʻi e kau akó ke ako ʻa e konga pē ʻoku nau mahuʻingaʻia ange aí.

Ko Hono Puleʻi ʻo e Tekinolosiá

Konga 1. Ko hono fakaʻaongaʻi fakapotopoto e taimí ʻi he tekinolosiá

ʻOku fakaʻaongaʻi ʻe he ʻEikí ʻi he Tokāteline mo e Ngaahi Fuakavá, ʻa e ongo foʻi lea “femoʻuekina” mo e “nofo noa.”

• ʻOkú ke pehē ʻoku ʻuhinga ki he hā e ongo foʻi lea ko ʻení?

Lau ʻa e ngaahi potufolofola ko ʻení pea fakalaulauloto ki he meʻa ʻoku akoʻi ʻe he ʻEikí fekauʻaki mo e femoʻuekina ʻi he holi lahí pea mo e nofo noá: Tokāteline mo e Ngaahi Fuakava 58:27–28; 60:13; 68:31; 75:3.

• Te ke fakamatalaʻi fakanounou fēfē ʻa e meʻa ʻoku akoʻi ʻe he ʻEikí?

(Te ke lava ʻo ʻiloʻi ʻi he ngaahi moʻoni lahi ha meʻa hangē ko ʻení: ʻOku finangalo ʻa e ʻEikí ke tau femoʻuekina ʻi he fai leleí kae ʻikai fakamoleki noa hotau taimí.)

• Te tau ʻiloʻi fēfē ʻoku tau fakamoleki noa hotau taimí ʻi he tekinolosiá?

Ako ʻa e fakamatala ko ʻení, ʻo kumi ha ngaahi fakakaukau fekauʻaki mo hono fakaʻaongaʻi fakapotopoto ʻo e tekinolosiá.

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE fakamoleki ʻe ha [taha] ʻoku ʻikai matuʻotuʻa pe taki halaʻi ha fuʻu taimi lahi ʻi he vaʻinga vitioó, ʻi he talanoa he ʻinitanetí, pe ha ngaahi founga kehe pē ʻo puleʻi ai ʻe he nāunau fakaʻilekitulōniká e ngaahi meʻá ʻi honau angamoʻoní. ʻI he kamataʻangá he ʻikai ngali fakatuʻutāmaki hono fakaʻaongaʻi ʻo e taimí, ʻaki e kumi ʻuhinga ko ha ngaahi miniti siʻi pē ʻoku fie maʻu ke fakamālōlō ki ai mei he taimi femoʻuekina ʻo e ʻahó. Ka ʻoku mole ai ha ngaahi faingamālie mahuʻinga ke fakatupulaki mo fakaleleiʻi e ngaahi taukei fakafetuʻutakí. … ʻI heʻene fakaʻau ke lahi hono ngāueʻaki e fakafiefia ʻoku ngali fainoa peé, ʻe lava ke hoko ia ko ha faʻahinga meʻa fakapōpula ʻoku fakatupu ʻauha. (David A. Bednar, “Ko e Ngaahi Meʻá ʻo Hangē ko Honau Anga moʻoní,” Liahona, Sune 2010, 21)

• Ko e hā ha ngaahi ʻuhinga ʻoku fakaʻaongaʻi ʻe he kakaí ke fakatonuhiaʻi ʻaki hono maumauʻi ʻo e taimí ʻi he tekinolosiá?

• Ko e hā ʻoku tokoni ke ke fakaʻehiʻehi mei hono fakamoleki noa ho taimí ʻi he tekinolosiá?

• Te ke fakakau fēfē ʻa e ʻEikí ʻi hoʻo feinga ke fakaʻaongaʻi fakapotopoto ʻa e tekinolosiá?

Konga 2. Ko hono fili ʻo e mītia leleí

• Ko e hā ha ngaahi fili ʻokú ke fakahoko maʻu pē ki hono fakaʻaongaʻi ʻo e mītiá?

• Ko e hā kuo akoʻi atu ʻe hoʻo ngaahi aʻusiá ʻe lava ʻo tokoni atu ke ke ofi ange ai ki he Tamai Hēvaní mo Sīsū Kalaisi ʻi hoʻo fai ha ngaahi fili fekauʻaki mo e mītiá?

Lau ʻa e Tokāteline mo e Ngaahi Fuakava 50:23–24; Ngaahi Tefito ʻo e Tuí 1:13; mo e Molonai 7:12–17, ʻo kumi e ngaahi moʻoni ʻe lava ʻo tokoni ke tau ʻilo ʻa e meʻa ʻoku leleí mo ia ʻoku koví.

• Ko e hā ha ngaahi moʻoni ʻokú ke ʻiloʻi ʻi he ngaahi veesi ko ʻení?

(ʻI ha ngaahi moʻoni lahi, mahalo te ke ʻiloʻi ha meʻa hangē ko ʻení: ʻOku tupu mei he ʻOtuá ʻa e meʻa ʻokú ne fakatupulaki mo fakalotoa ʻa e fai leleí.)

• ʻE founga fēfē haʻo maʻu ha lelei mei hono fakaʻaongaʻi ʻo e moʻoni ko ʻení ʻi he taimi ʻokú ke fili ai ʻa e mītia ke fakaʻaongaʻí?

Naʻe fakaafeʻi kitautolu ʻe ʻEletā Tēvita A. Petinā ke fehuʻi loto ʻa e fehuʻi ko ʻeni fekauʻaki mo e mītia ʻoku tau fakaʻaongaʻí:

ʻOku fakaafeʻi mai nai pe ʻoku taʻofi ʻe he fakaʻaongaʻi ʻo e ngaahi tekinolosia mo e mītia kehekehé ʻa e takaua ʻa e Laumālie Māʻoniʻoní ʻi hoʻo moʻuí? (David A. Bednar, “Ko e Ngaahi Meʻá ʻo Hangē ko Honau Anga moʻoní,” Liahona, Sune 2010, 23)

• Te ke lava fēfē ʻo fakaafeʻi e Laumālie Māʻoniʻoní ʻi hoʻo fai e ngaahi fili ki hono fakaʻaongaʻi ʻo e mītiá?

• Ko e hā ʻokú ne tokoniʻi koe ke ke fakaʻehiʻehi mei he faʻahinga mītia te ne lava ʻo taki koe mei he Fakamoʻuí?

ʻI he ʻosi e ako ʻa e kau akó, fakaafeʻi kinautolu ke vahevahe ʻa e meʻa naʻa nau akó. ʻE lava ke fai ʻeni ko ha kalasi pe tauhoa ʻa e kau akó mo ha taha naʻá ne ako ha konga kehe. Hili e feakoʻiʻaki ʻa e kau akó, fakakaukau ke fakaafeʻi kinautolu ke akoako fakahoko ha taha ʻo e ongo taukei ko ʻení pe fakahoko fakatouʻosi ke tokoniʻi kinautolu ke fakaʻaongaʻi malu ʻa e tekinolosiá. Ki ha tokoni lahi ange, mahalo te ke fie fakahinohinoʻi e kau akó ki he maʻuʻanga tokoni “Takinga Charge of Technology,” ʻoku maʻu ʻi he ChurchofJesusChrist.org.

ʻE lava ke tokoni ʻa e tomuʻa palaní ke tau puleʻi e tekinolosiá

Ke tokoni ke fakaʻaongaʻi ʻe he kau akó ʻa e meʻa ʻoku nau akó, tokoniʻi kinautolu ke nau akoako fakahoko ʻa e taukei ko ʻení:

Fakaʻuhingá: ʻE lava ke tokoni hono faʻu ha palani ki he founga te tau fakaʻaongaʻi ai ʻa e tekinolosiá ke tau femoʻuekina ʻi he fai leleí kae ʻikai ko e fakamoleki noa hotau taimí. Fekumi ki he tokoni ʻa e Tamai Hēvaní ʻi hoʻo faʻu ha palaní.

Sīpingá: ʻOange ha sīpinga maʻá e kau akó ʻaki hono fakaafeʻi kinautolu ke nau fakakaukau ki ha ngaahi founga te nau lava ai ʻo fakaʻaongaʻi lelei ʻa e tekinolosiá. Te ke lava ʻo fai ʻeni ʻaki haʻo fehuʻi ange:

• Ko e hā ha ngaahi founga te ke lava ai ʻo palani kimuʻa ke puleʻi hoʻo fakaʻaongaʻi e tekinolosiá?

  ʻE lava ke kau ʻi he ngaahi talí ʻa e:

  • Fakakaukau ki he founga ʻoku finangalo ai e Tamai Hēvaní ke ke fakaʻaongaʻi e tekinolosiá.

  • Fokotuʻu ha taumuʻa kimuʻa peá ke fakaʻaongaʻi e tekinolosiá (hangē ko ʻení, fetuʻutaki ki ha kaungāmeʻa ʻi hoʻo telefoní).

  • Fokotuʻu ha taimi fakangatangata fakaʻaho ki hono fakaʻaongaʻi ʻo e tekinolosiá.

  • Fokotuʻu ha ngaahi feituʻu he ʻikai fakaʻaongaʻi ai ʻa e meʻangāue fakaʻilekitulōniká, ʻo hangē ko ho loki mohé mo e falekaukaú.

  • Fakafonu hoʻo telefoní ʻi ha feituʻu fakafonu telefoni ʻa e fāmilí ʻi he poʻulí, ʻoku mamaʻo mei ho mohengá.

  • Fakaʻaongaʻi ha meʻasivi ʻokú ne taʻofi ʻa e ngaahi meʻa ʻoku taʻefeʻunga pe ʻikai ke malú.

• ʻOkú ke pehē ko e hā ʻe lava ke hoko ai ha meʻa makehe ʻi he ʻi ai ha palaní?

Akoako Fakahoko: Fakaafeʻi e kau akó ke nau fekumi ki he tokoni ʻa e Tamai Hēvaní ke faʻu ha palani ki he founga te nau puleʻi ʻaki ʻenau fakaʻaongaʻi e tekinolosiá.

Fakakaukau ke ʻeke ange pe ʻe fie vahevahe ʻe ha kau ako ʻenau palaní mo e kalasí.

ʻE lava ke tokoni haʻatau kiʻi taʻofi siʻi ke tau puleʻi ʻa e tekinolosiá

Ke tokoni ke mahino ki he kau akó ʻa e meʻa ke fai ʻi he taimi ʻoku nau fehangahangai ai mo e mītia taʻefeʻungá, mahalo ʻe ʻaonga ʻa e ngaahi taukei ko ʻení:

Fakaʻuhingá: ʻI he taimi ʻoku tau fehangahangai ai mo e mītia taʻefeʻungá, ʻe lava ke tau kiʻi taʻofi ʻo mālōlō mei hono fakaʻaongaʻi ʻo e tekinolosiá.

Sīpingá: ʻOange ha sīpinga maʻá e kau akó ʻaki hono vahevahe e ngaahi sitepu ʻe tolu ko ʻeni ʻe lava ʻo tokoni ke nau kiʻi mālōlō hifo mei he tekinolosiá ʻi he taimi ʻoku nau fehangahangai ai mo ha mītia taʻefeʻungá. Te ke lava foki ʻo fakahinohinoʻi e kau akó ki he maʻuʻanga tokoni “Takinga Charge of Technology” ki ha tokoni lahi ange ʻi he meʻá ni.

1. Lea ʻaki hoʻo fakakaukaú: ʻI hoʻo sio ki ha meʻa ʻoku taʻefeʻunga pe ʻokú ne ʻai ke ke ongoʻi koviʻia pe taʻe-fiemālié, te ke lava ʻo pehē, “ʻOku ʻikai ongo tonu ʻeni.” ʻE lava ke hoko e ngaahi ongo ko ʻení ko ha ueʻi mei he Laumālie Māʻoniʻoní.

2. Fai ha fili lelei ange: Te ke lava ʻo tāmateʻi e meʻangāué pe ʻai ke fakalongolongo ʻa e fanongonongó (notifications). Te ke lava ʻo hū ki tuʻa pe hiki ki ha loki ʻe taha, ʻo ʻikai ʻalu mo ha meʻangāue toʻotoʻo. Te ke lava ʻo fakakaukau kia Sīsū Kalaisi pe fakamanatu ha potufolofola manako ke fakaafeʻi ʻa e Laumālie Māʻoniʻoní ke ʻiate koe.

3. Fakafehokotaki mo ha taha: Te ke lava ʻo talanoa ki ha kaungāmeʻa pe mēmipa ʻo e fāmilí fekauʻaki mo e ongo ʻokú ke maʻú. Te ke lava ʻo lotu ki he Tamai Hēvaní.

Akoako Fakahoko: Fakaafeʻi e kau akó ke fakakaukau ki ha ngaahi founga ʻe lava ke nau kiʻi taimi ai ʻo kiʻi mālōlō ʻi he taimi ʻoku nau fehangahangai ai mo ha mītia taʻefeʻungá.

Kapau ʻe loto ki ai e kau akó, te nau lava ʻo vahevahe ʻenau ngaahi fakakaukaú mo e kalasí.

Vahevahe ʻa e meʻa naʻá ke akó

• Ko e hā ha meʻa naʻá ke ako mei he lēsoni ko ʻení ʻoku ʻikai ke ke loto ke ngalo?

Fakaʻosi ʻaki haʻo fakamoʻoni ʻe lava ke tokoniʻi kitautolu ʻe he ʻEikí ke tau fakaʻaongaʻi malu mo fakapotopoto ʻa e tekinolosiá.

Ngaahi Maʻuʻanga Tokoni Kehé

ʻE tāpuekina fēfē nai au ʻe he tekinolosiá?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku [tau] moʻui ʻi ha māmani ʻoku vave fau ai e fakalakalaka fakatekinolosiá. … He ko hai naʻá ne lavelaveʻiloa he ngaahi taʻu kuohilí ʻe hao pē ʻa e ngaahi tohi folofolá mo e ngaahi pōpoaki konifelenisi lahi he ngaahi taʻú, ʻi ha kiʻi meʻangāue ʻe faʻo ho kató? He ʻikai maluʻi koe ʻe hono faʻo pē ʻi ho kató, ka ʻe hanga ʻe hono ako, fakalaulauloto mo fakafanongo ki ai he ngaahi momeniti longonoa ʻo e ʻaho takitaha, ʻo fakatupulaki hoʻo fetuʻutakí ʻi he Laumālié. (Richard G. Scott, “Ke Melino ‘a ‘Api,” Liahona, Mē 2013, 30)

Vakai foki ki he foʻi vitiō “Texting Truth” (2:22), ʻi he ChurchofJesusChrist.org.

Te u fakaleleiʻi fēfē ʻeku fakaʻaongaʻi e tekinolosiá?

Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ʻikai lelei pe kovi ʻa e tekinolosiá ʻiate ia pē. Ka, ko e ngaahi taumuʻa kuo aʻusia ʻo fakafou ʻi he tekinolosiá ko e ngaahi fakaʻilonga taupotu taha ia ʻo e leleí pe koví. (David A. Bednar, “To Sweep the Earth as with a Flood” [Brigham Young University Education Week devotional, Aug. 19, 2014], 5)

Naʻe akonaki ʻa Sisitā Linitā S. Liivi, ko ha mēmipa mālōlō ʻo e Kau Palesitenisī Lahi ʻo e Fineʻofá, ‘o pehē:

Ko ha meʻangāue ʻaonga ʻa e meʻa sivi ʻo e ʻinitanetí, ka ko e meʻa sivi lelei taha he māmaní, pea ko e meʻa pē ia ʻe taha ʻe ngāué, ko e meʻa sivi fakatāutaha ʻoku maʻu mei ha fakamoʻoni loloto mo tuʻuloa ki he ʻofa ʻa ʻetau Tamai Hēvaní mo e feilaulau huhuʻi ʻa hotau Fakamoʻuí maʻatautolú. (Linda S. Reeves, “Maluʻi mei he Ponokalafí—ko ha ʻApi ʻOku Fakatefito ʻia Kalaisi,” Liahona, Mē 2014, 16)

ʻI hoʻo fakahoko ha ngaahi fili fekauʻaki mo e meʻa ke mamata ai, lau, fanongo ki ai, pe kau atu ki aí, fakakaukau ki he ongo ʻokú ne ʻoatu kiate koé. ʻOkú ne fakaafeʻi nai ha ngaahi fakakaukau lelei? Fakamamaʻo mei ha faʻahinga meʻa pē ʻokú ne manukiʻi ʻa e ngaahi meʻa toputapú pe meʻa ʻoku angaʻulí. ʻOua naʻá ke kau ʻi ha faʻahinga meʻa te ne taʻofi hoʻo fakakaukau leleí pe ongoʻingofua ʻa e Laumālié, hangē ko e fakamamahí, kava mālohí mo e faitoʻo konatapu fakatuʻutāmakí. Loto-toʻa ke tamateʻi ha vitiō pe keimi, hū ki tuʻa mei ha faiva pe hulohula, liliu hoʻo mūsiká, pe tafoki mei ha faʻahinga meʻa ʻoku ʻikai fenāpasi mo e Laumālié. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 18)

Naʻe fakamatala ʻa Brother Laniteli L. Liti, ne hoko ko e tokoni ua ʻi he Kau Palesitenisī Lahi mālōlō ʻo e Kau Talavoú ʻo pehē:

ʻOku mou tutupu hake mo e taha ʻo e ngaahi meʻa-ngāue lelei taha ki he leleí ʻi he hisitōlia ʻo e tangatá: ʻa e ʻInitanetí. ʻOku haʻu fakataha mo ia ha ngaahi fili kehekehe. Neongo ia, ʻoku ʻalu fakataha mo e ngaahi fili lahi ko ʻení ha fatongia lahi tatau ʻo e ʻekea meiate kita e meʻa ʻokú te fai pe taʻe faí. ʻOkú ne fakaʻatā ke ke lava ʻo maʻu ʻa e lelei tahá pea mo e kovi tahá fakatouʻosi ʻoku maʻu ʻe he māmaní ke ʻoatú. Te ke lava ʻo fakahoko ha ngaahi meʻa lelei ʻaki ia ʻi ha kiʻi taimi nounou, pe tohoakiʻi koe ʻe he ngaahi meʻa muna te ne maumauʻi ho taimí mo holoki ho ivi ke faileleí. Te ke lava ʻi hano kamosi pē ha meʻa, ke hū vave mo lelei ki ha meʻa pē ʻoku fakaʻamu ki ai ho lotó. Ko e meʻa mahuʻingá ia—ko e hā ʻokú ke fakaʻamu ki aí? Ko e hā ʻokú ke holi ki aí? ʻE taki koe ʻe hoʻo ngaahi fakaʻamú ki fē? (Randall L. Ridd, “Ko e Toʻu Tangata Filí,” Liahona, Mē 2014, 56)

Lau ʻa e kiʻi tohi Maluʻi ki hono Fakaʻaongaʻi ʻo e Tekinolosiá maʻá e kau faifekaú, ʻoku maʻu ʻi he ChurchofJesusChrist.org.

Ngaahi ʻEkitivitī Fakalahi ki he Akó

ʻE founga fēfē haʻaku tali ʻa e fakatauele ʻoku fekauʻaki mo e tekinolosiá?

Ko ha ngaahi fakakaukau ʻeni ʻe tolu ʻo e meʻa te tau lava ʻo fai ʻi he taimi ʻoku ʻahiʻahiʻi ai kitautolu ke fakaʻaongaʻi e mītiá pe tekinolosiá ʻi ha ngaahi founga ʻoku ʻikai leleí:

1. “Ui ia ʻaki hono hingoa totonú. Fakahaaʻi e meʻa ʻoku ʻahiʻahiʻi koe ke ke fakahokó. …

2. Fetongi e meʻa ʻokú ke fakahokó ʻaki ha fili ʻoku lelei angé. …

3. “Fakafehokotaki mo ha taha pe ko ha meʻa ʻokú ke ʻofa ai mo fakaʻapaʻapaʻi (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí,  21).”

Fakaafeʻi e kau akó ke teuteu ke fakaʻaongaʻi ʻa e taukei ko ʻení ʻaki ʻenau fakahoko e ngaahi founga takitaha ko ʻení ʻi heʻenau fakakaukaú.

Mūsiká

Fakakaukau ke hivaʻi ʻa e “If the Savior Stood beside Me” (Sally DeFord, New Era, Aug. 2007 8–10) ko ha kalasi. Pe, te ke lava ʻo tā ʻa e hivá pea fakaafeʻi ʻa e kau akó ke nau muimui ki ai mo hono fakaleá. Fakaafeʻi ʻa e kau akó ke nau fakakaukau ki heʻenau fakaʻaongaʻi ʻo e tekinolosiá lolotonga ʻenau hiva, fanongo, pe lau ʻa e fakaleá. ʻE lava ke fakakaukau ʻa e kau akó ki he founga te nau tali ʻaki ʻa e ngaahi fehuʻi naʻe ʻoatu ʻi he hivá, ʻi heʻene fekauʻaki mo ʻenau fakaʻaongaʻi ʻo e tekinolosiá.

ʻAukai mei he tekinolosiá

Fakakaukau ke huluʻi ha taha pe fakatouʻosi ʻo e ongo foʻi vitiō ko ʻení mei he “ʻAmanakiʻanga ʻo ʻIsilelí” (Russell M. Nelson mo Wendy W. Nelson [fakataha lotu fakamāmani lahi ʻa e toʻu tupú, 3 Sune 2018], broadcasts.ChurchofJesusChrist.org). ʻI he mamata ʻa e kau akó, te ke lava ʻo kumi ha ngaahi ʻuhinga naʻe fakaafeʻi ai kinautolu ʻe Palesiteni Lāsolo M. Nalesoni ke nau kiʻi mālōlō mei he mītia fakasōsialé. Fakaafeʻi e kau akó ke nau fakalaulauloto ki he founga ʻe lava ke tāpuekina ai kinautolu ʻi hono fakahoko maʻu pē ha ʻaukai mei he mītia fakasōsialé mo e ngaahi faʻahinga kehe ʻo e tekinolosiá.

• Ko e fakaafe ʻa Palesiteni Nalesoni ke ʻaukai ʻi ha ʻaho ʻe fitu mei he mītia fakasōsialé

• Talanoa ʻo ha talavou ʻoku mavahe fakataimi mei he mītia fakasōsialé

• Ko e hā ha ngaahi lelei ʻe ala maʻu mei ha ʻaukai mei he mītia fakasōsialé?

Tekinolosiá mo e ngaahi akonaki fakaepalōfitá

Fakakaukau ke fakaʻaongaʻi ʻe he kau akó ha miniti ʻe taha nai ke nau tohi ki he lahi tahá ʻa e ngaahi akonaki lolotonga ʻa e palōfitá te nau lava ʻo fakakaukau ki aí. ʻE lava ke fili ʻe he kau akó ha taha ʻo e ngaahi akonaki ko iá pea lisi ha ngaahi founga ʻoku tokoniʻi ai kitautolu ʻe he tekinolosiá ke tau ako iá. Hili iá, ʻe lava ke vahevahe ʻe he kau akó ki he niʻihi kehé ʻa ʻenau lisi ʻo e ngaahi akonaki ʻa e palōfitá. Te ke lava ʻo fakaafeʻi e kau akó ke fili ha akonaki te nau fie ako lahi ange ki ai pea fili ha founga te nau lava ai ʻo fakaʻaongaʻi ʻa e tekinolosiá ke tokoni ki heʻenau feingá.

Ko hono fakaʻaongaʻi ʻo e tekinolosiá ki he leleí

Ke tokoni ke fakakaukau ʻa e kau akó ki ha ngaahi founga te nau lava ai ʻo fakaʻaongaʻi ʻa e tekinolosiá ki he leleí, fakakaukau ke fakaafeʻi kinautolu ke lau ʻa e lea ko ʻeni meia ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻOku ou naʻinaʻi kiate kimoutolu ke fakafonu ʻa māmani ʻaki e ngaahi pōpoaki ʻoku fonu ʻi he māʻoniʻoní mo e moʻoní—ko e ngaahi pōpoaki ʻoku moʻoni, langaki moʻui, mo taau mo hono vikivikiʻí—pea ke tafiʻi ʻa māmani ʻo hangē ko ha lōmaki (vakai, Mōsese 7:59–62). …

“Fakakaukau angé ki he ola ʻe lava ke tau maʻu ʻi he tokoni ʻa e lau kilu mo laui miliona ʻo e kāingalotu ʻo e Siasi ʻo e ʻEikí kuo fakafoki maí ʻi ha fanga kiʻi founga iiki ki hono fakalahi ki he lōmakí.” (David A. Bednar, “Lōmakiʻi ʻa Māmani Fakafou ʻi he Mītia Fakasōsialé,” Liahona, ʻAokosi 2015, 53)

Te ke lava ʻo fakaafeʻi e kau akó ke nau lau ʻa e Tokāteline mo e Ngaahi Fuakava 64:33, ʻo kumi e meʻa ʻoku akoʻi ʻe he ʻEikí mo e founga ʻe ala fekauʻaki ai mo e mītia fakasōsialé.

Fakakaukau ke ʻeke ange ʻa e ongo fehuʻi ko ʻení:

• Ko e hā ha ngaahi akonaki angamaheni ʻokú ke vakai ki ai ʻi he fakamatala ʻa ʻEletā Petinaá mo e potufolofola ko ʻení?

• ʻE founga fēfē haʻo kau lelei ange ʻi hono lōmakiʻi ʻo e māmaní ʻaki ʻa e māʻoniʻoní mo e moʻoní?

• Ko e hā ha ngaahi founga kehe ʻe lava ke tau fakaʻaongaʻi ai e tekinolosiá ki heʻetau tupulaki mo e fakalakalaka fakatāutahá?