“Lēsoni 179—Ko Hono Poupouʻi Hotau Kau Takí: Muimui Kiate Kinautolu ʻoku Ui ʻe he ʻEikí ke Takí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Poupouʻi Hotau Kau Takí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 179: Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí
Ko Hono Poupouʻi Hotau Kau Takí
Muimui Kiate Kinautolu ʻoku Ui ʻe he ʻEikí ke Takí
Te tau lava ʻo hoko ko ha kau taki lelei ʻi ha ngaahi founga lahi. Ko e founga ʻe taha ko e hoko ko ha kau muimui lelei. ʻOku tau fakahaaʻi ʻetau tui kia Sīsū Kalaisí ʻi heʻetau poupouʻi e kau taki kuo uiuiʻi ʻi Heʻene fakahinohinó. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e mahuʻinga hono poupouʻi ʻo kinautolu ʻoku ui ʻe he ʻEikí ke takí.
Ngaahi ʻEkitivitī Ako ʻOku Ala Fakahokó
Loto-vēkeveke ke muimuí
Fakakaukau ke fakaʻaliʻali e tūkunga ko ʻení ke tokoni ke fakakaukau e kau akó ki he mahuʻinga ʻo hono hikinimaʻi, pe poupouʻi, ʻa kinautolu ʻoku ui ʻe he ʻEikí ke takí:
Fakakaukauloto naʻe papitaiso haʻo kaungāmeʻa siʻi hifo ʻi he taʻu ʻe taha kuo hilí pea naʻe toki uiuiʻi pē ia ke ne hoko ko e palesiteni ʻo hoʻo kalasí pe kōlomú. Kuo fuoloa ange hoʻo faivelenga ʻi he ongoongoleleí, peá ke ongoʻi ʻoku ʻikai feʻunga tatau ho kaungāmeʻá mo koe pe niʻihi kehe ke hoko ko ha palesiteni fakakalasi pe fakakōlomu.
-
Te ke liliu fēfē hoʻo fakakaukaú ke ke hoko ko ha mēmipa poupou ʻo e kalasí pe kōlomú?
-
Ko e hā te ke lava ʻo fai ke poupouʻi ai ho kaungāmeʻá ʻi he uiuiʻi ko ʻení?
Mahalo te ke fehuʻi ki he kau akó pe kuo nau maʻu, pe ko ha taha ʻoku nau ʻilo, ha aʻusia tatau mo ʻení. Naʻe fēfē ʻenau talí?
Ko ha sīpinga ʻe taha ʻo e loto-fiemālie ke muimui ʻiate kinautolu kuo ui ʻe he ʻEikí ko Hailame Sāmita. Neongo naʻá ne lahi ʻaki ha taʻu ʻe ono ʻi hono tehina ko Siosefá, ka naʻe poupouʻi ʻe Hailame ʻa Siosefa ʻi hono uiuiʻí.
Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo Hailame Sāmita:
Naʻe tokoni mo ngāue ʻa [Hailame] ki hono tokoua ko Siosefa ko e Palōfitá, ʻi he founga lōloa mo faingataʻa ʻo hono Fakafoki Mai ʻo e Ongoongoleleí. …
Naʻe tuʻu ʻaliʻaliaki ʻa Hailame ʻi he ngaahi meʻa kotoa pē. Naʻá ne ʻosi ʻiloʻi pē ʻa e ikuʻanga ʻo ʻene moʻuí, pea naʻá ne fili pē ke muimui ai. Naʻe hoko ʻa Hailame ko ha hoangāue, maluʻi, tauhi, mo ha taha falalaʻanga kia Siosefa pea iku ʻo fakapoongi fakataha kinaua. Naʻe kāpui kinaua ʻi he kotoa ʻo ʻena moʻuí ʻe he fakatanga taʻetotonú. Neongo naʻe lahi ʻa Hailame, ka naʻá ne ʻiloʻi ʻa e fatongia fakalangi ʻa hono tokouá. Neongo naʻe faleʻi ʻe Hailame ʻa Siosefa he taimi ʻe niʻihi, ka naʻá ne faʻa fakaongoongo maʻu pē ki hono tehiná. (M. Russell Ballard, “Hyrum Smith: ‘Firm as the Pillars of Heaven,’” Ensign, Nov. 1995, 6–7)
-
Ko e hā naʻá ne mei ʻai ke faingataʻa ki ha taha ʻi he tūkunga ʻo Hailamé ke muimui kia Siosefa ko hono taki lakanga fakataulaʻeikí?
-
Ko e hā ha ngaahi ʻulungaanga faka-Kalaisi naʻá ne tokoniʻi ʻa Hailame ke loto-fiemālie ke muimui kia Siosefa? (vakai, Tokāteline mo e Ngaahi Fuakava 124:15).
Lau ʻa e Tokāteline mo e Ngaahi Fuakava 124:94–96, ʻo kumi e founga naʻe tāpuekina ai ʻa Hailame ʻi heʻene loto-fiemālie ke muimui ki hono tehiná. (Fakatokangaʻi ange ʻoku ʻuhinga ʻa e veesi 94 kia Hailame, kae ʻikai ko Siosefa.)
-
Ko e hā ha ngaahi tāpuaki naʻá ke ʻiloʻi ʻi he ngaahi veesi ko ʻení?
Ko hono poupouʻi ʻa e kau takí
Fakamatalaʻi ange ko e founga ʻe taha te tau lava ai ʻo fakahaaʻi ʻetau loto-fiemālie ke muimui ki hotau kau takí ko hono poupouʻi kinautolu. ʻE ala tokoni ke vakaiʻi e tuʻunga mahino ʻa e kau akó ki he ʻuhinga ke poupouʻí. Ko e founga ʻe taha te ke lava ʻo fai ai ʻení ko hono ʻai ke hiki ʻe he kau akó ʻenau fakaʻuhinga pē ʻanautolu ki he ʻuhinga ʻo e poupouʻí. Fakaafeʻi leva kinautolu ke fakafehoanaki e meʻa ne nau hikí mo e fakaʻuhinga mei he Fakahinohino ki he Ngaahi Folofolá: “Ke fakahā ʻa e poupou kiate kinautolu ʻoku nau ngāue ʻi he ngaahi lakanga fakatakimuʻa [māʻolunga] mo [fakalotofonua] ʻo e Siasí” (Fakahinohino ki he Ngaahi Folofolá, “Poupouʻi ʻo e Kau Taki ʻo e Siasí,” Gospel Library).
Naʻe fai Palesiteni Henelī B. ʻAealingi ʻo e Kau Palesitenisī ʻUluakí ʻa e fakamatala ko ʻení fekauʻaki mo hono poupouʻi ʻo kinautolu ʻoku ui ʻe he ʻEikí ke takí.
ʻI he hiki ho nimá ke poupoú, ʻokú ke fai ai ha palōmesi. ʻOkú ke palōmesi ki he ʻOtuá, ʻa ia ko ʻEne kau tamaioʻeikí ʻení, te ke poupouʻi kinautolu.
Ko ha kakai ʻeni ʻoku ʻikai haohaoa, tatau pē mo koe. ʻE hanga ʻe hono tauhi hoʻo ngaahi palōmesí ʻo fokotuʻu ha tui taʻe-ueʻia naʻe ui kinautolu ʻe he ʻEikí. ʻE lava foki ʻe he tauhi e ngaahi palōmesi ko iá ʻo ʻomai ʻa e fiefia taʻengatá. (Henry B. Eyring, “Ko e Mālohi ʻo e Poupou ʻi he Tuí,” Liahona, Mē 2019, 58–59)
-
Te ke fakamatalaʻi fakanounou fēfē ʻa e ngaahi akonaki ʻa Palesiteni ʻAealingí?
-
Ko e hā naʻá ne akoʻi fekauʻaki mo hono fakaʻaongaʻi ʻo e tui kia Sīsū Kalaisí?
Tokoni ke ʻiloʻi ʻe he kau akó ʻa e moʻoni ko ʻení: ʻOku tau ngāue ʻaki ʻa e tui kia Sīsū Kalaisí ʻi he taimi ʻoku tau poupouʻi ai ʻa kinautolu ʻokú Ne ui ke takí.
-
ʻOkú ke pehē ko e hā ʻoku fiemaʻu ai e tui kia Sīsū Kalaisí ke poupouʻi e kau takí?
-
Ko e fē ha taimi kuó ke ongoʻi tāpuekina ai ʻi hoʻo fili ke poupouʻi ha taha kuo ui ʻe he ʻOtuá ke ne tataki koé?
Kapau ʻe faingataʻa ki he kau akó ke fakakaukau ki ha sīpinga, ʻe lava ke ke vahevahe haʻo aʻusia pe fakamoʻoni fekauʻaki mo hono poupouʻi ha taha kuo ui ʻe he ʻOtuá ke ne tataki koé.
Ko e falala kia Kalaisi ke poupouʻi ʻa kinautolu kuo uiuiʻi ke takí
Tokoni ke mahino lelei ange ki he kau akó ʻa e founga ʻoku fakaʻaongaʻi ai ki heʻenau moʻuí ʻa e tefitoʻi moʻoni ʻo e falala kia Kalaisi ʻi heʻenau poupouʻi ʻa kinautolu ʻokú Ne uí. Ko e founga ʻe taha ke fai ai ʻení ko hono fakaʻaliʻali e ngaahi tūkunga ko ʻení pe faʻu ha tūkunga kehe ʻe kaunga ange ki hoʻo kau akó. Fakakaukau ke fakaafeʻi e kau akó ke fili ha tūkunga ke fakakaukau ki ai ʻi heʻenau ako ha konga ʻe taha pe lahi ange ʻo e laʻipepa tufá. ʻE lava foki ke fakaʻaongaʻi ʻe he kau akó ʻa e tūkunga mei he kamataʻanga ʻo e kalasí.
Naʻe toki fokotuʻutuʻu foʻou e kau palesitenisī ʻo e kalasi ʻa ʻAmanitā ʻi he Kau Finemuí. Ko e taʻahine naʻe ui ke hoko ko e palesitení ko ha taha ia naʻe angakovi kia ʻAmanitā ʻi he kuohilí.
Ko ha faifekau ngāue mālohi ʻa Siua. Naʻe toki fanongonongo kimuí ni ʻe heʻene palesiteni fakamisioná ha lao fakamisiona ʻoku ʻikai saiʻia ai ʻa Siua.
Naʻe toki ui e kaungāmeʻa lelei ʻo Siosí ke hoko ko ʻenau palesiteni fakakalasí. Naʻe ʻamanaki ʻa Siosi ʻe kole ange hono kaungāmeʻá ke kau ʻi he kau palesitenisií, ka naʻe ʻikai.
Naʻe kole kia Keti ke hoko ko e palesiteni ʻo ʻene kōlomú. ʻOkú ne mā pea ʻoku ʻikai ke ne saiʻia ke fai ha ngaahi tuʻutuʻuni. ʻOkú ne hohaʻa pe ʻe ola lelei fēfē ʻene tataki ʻene kōlomú mo e kau palesitenisií.
ʻE lava ke tokoni ʻa e laʻipepa tufa “Ngaahi Akonaki fekauʻaki mo Hono Poupouʻi ʻo Kinautolu Kuo Uiuiʻi ke Takí” ke mahino ki he kau akó ʻa e founga ʻe lava ke fakaʻaongaʻi ai ʻa e moʻoni ne nau ʻiló ki he tūkunga ne nau filí pea ki heʻenau moʻuí.
Ko e founga ʻe taha ke toe vakaiʻi ai e laʻipepa tufá ko hono fokotuʻutuʻu ha ngaahi kulupu takatakai ʻi he lokí. ʻE lava ke vilo ʻa e kau akó ʻi he ngaahi kulupú pea ako fakalongolongo ʻa e konga takitaha ʻo e laʻipepa tufá, ʻo kumi mo lekooti e ngaahi fakakaukau ʻoku fekauʻaki mo honau tūkungá. Hili iá ʻe lava ke vahevahe ʻe he kau akó ki ha ngaahi kulupu pe hoa pea vahevahe ʻa e meʻa naʻa nau akó.
Ko e founga ʻe taha ke toe vakaiʻi ai e laʻipepa tufá ko hono vahe e kau akó ki ha ngaahi kulupu tautau toko fā pea vahe ki he mēmipa takitaha ʻo e kulupú ha konga mei he laʻipepa tufá. ʻE lava ke ako ʻe he kau akó ʻenau kongá, ʻo kumi e founga ʻoku fekauʻaki ai mo ʻenau tūkungá. Pea ʻe lava leva ke akoʻi ʻe he tokotaha ako takitaha ki heʻenau kulupú ʻa e meʻa naʻá ne akó.
Ngaahi Akonaki fekauʻaki mo Hono Poupouʻi ʻo Kinautolu Kuo Uiuiʻi ke Takí
Konga 1
Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:
Mahalo ʻe hā ngali vaivai pe kei tangata pē homou taki ʻi he Siasi ʻo e ʻEikí, pe te ne hā ngali mālohi mo tataki fakalaumālie. Ko hono moʻoní, ʻoku fio he taki kotoa pē ʻa e ngaahi ʻulungaanga ko iá pea toe ope atu ai. ʻOku tokoni lahi ki he kau tamaioʻeiki ʻa e ʻEikí ne ui ke tataki kitautolú, ʻetau vakai ko ia kiate kinautolu ʻo hangē ko ia ne fai ʻe he ʻEikí he taimi naʻá Ne ui ai kinautolú.
ʻOku ʻafioʻi lelei ʻe he ʻEikí ʻEne kau tamaioʻeikí. ʻOkú Ne ʻafioʻi e meʻa te nau lavá mo honau kahaʻú. ʻOkú Ne ʻafioʻi lelei e founga ʻe lava ke liliu ai honau natulá. ʻOkú Ne toe ʻafioʻi ʻa e founga te nau liliu ai tupu mei he meʻa te nau aʻusia mei he kakai te nau tatakí. …
… Kapau ʻokú ke tui ʻoku tataki ʻe he ʻEikí Hono Siasí ʻi he fakahā ʻoku ʻoange ki he kau tamaioʻeiki taʻe haohaoa ʻokú Ne uí, ʻe fakaava ʻe he ʻEikí e ngaahi matapā ʻo e langí kiate kinautolu, pea te Ne ne fai ia kiate koe. (Henry B. Eyring, “ʻOku Tataki ʻe he ʻEikí Hono Siasí,” Liahona, Nōvema 2017, 83)
Konga 2
Naʻe pehē ʻe Brother Sitīveni W. ʻOueni, ko e palesiteni lahi mālōlō ʻo e Kau Talavoú:
ʻE ʻi ai ha taimi ʻi hoʻo moʻuí ʻe ui ai koe ke ke taki. ʻE ʻi ai ha ngaahi taimi ʻe fie maʻu ai ke ke muimui. Ko ʻeku pōpoaki he ʻahó ni kiate kimoutolú neongo pe ko e hā ho uiuiʻí, te ke hoko maʻu pē ko ha taki mo ha tokotaha muimui. Ko e tuʻunga fakatakimuʻá ko hano fakahaaʻi ia ʻo e tuʻunga fakaākongá—ko hano tokoniʻi pē ʻo e niʻihi kehé ke nau haʻu kia Kalaisi, ʻa ia ko e meʻa ia ʻoku fai ʻe he kau ākonga moʻoní. Kapau ʻokú ke feinga ke muimui kia Kalaisi, te ke lava ʻo tokoniʻi e niʻihi kehé ke nau muimui kiate Ia, pea lava ke ke hoko ai ko ha taki.
ʻOku ʻikai maʻu ʻete lava ʻo hoko ko e takí mei ha anga fakafeohi ngofua, pōtoʻi he fakalotoá, pe naʻa mo ha talēniti lea he kakaí. Ka ʻoku maʻu ia mei hoʻo tukupā ke muimui kia Sīsū Kalaisí. (Stephen W. Owen, “Ko e Kau Taki Lelei Tahá ʻa e Kau Muimui Lelei Tahá,” Liahona, Mē 2016, 75)
Konga 3
Lau ‘a e ngaahi veesi ko ʻení:
Tokāteline mo e Ngaahi Fuakava 107:22 (Fakatokangaʻi e ngaahi founga ʻoku akoʻi ai kitautolu ʻe he veesi ko ʻení ke tau poupouʻi e Kau Palesitenisī ʻUluakí. Fakakaukau ki he founga ʻe lava ke fakaʻaongaʻi ai ʻa e ngaahi founga poupou ko ʻení ki he ngaahi uiuiʻi kehé.)
ʻEkesōtosi 17:9–12 (Fakatokangaʻi e founga naʻe poupouʻi ai ʻa Mōsese ʻi he tau ʻa ʻIsileli mo e kakai ʻo ʻAmalekí.)
Konga 4
Naʻe akonaki ʻa Brother Sitīveni W. ʻOueni, ko e Palesiteni Lahi mālōlō ʻo e Kau Talavoú ʻo pehē:
Ko [Sīsū Kalaisi] ʻa e takimuʻa lelei tahá koeʻuhí he ko Ia ʻa e tokotaha muimui lelei tahá—ʻokú Ne muimui kakato ki Heʻene Tamaí, ʻi he meʻa kotoa pē. (Stephen W. Owen, “Ko e Kau Taki Lelei Tahá ʻa e Kau Muimui Lelei Tahá,” Liahona, Mē 2016, 75)
ʻI hoʻo lau e ngaahi veesi ko ʻení, fakatokangaʻi e ngaahi founga naʻe muimui ai ʻa Sīsū ki Heʻene Tamaí mo e ngaahi founga naʻe fakamālohia ai ʻa Sīsū ʻi Heʻene fai iá.
Fakakaukauloto ki he meʻa kuó ke akó
Fakakaukau ke fakaafeʻi e kau akó ke vahevahe mo ha hoa pe kulupu ʻa e meʻa ʻoku nau pehē ʻoku mahuʻinga ki he toʻu tupu ʻi he Siasí ke nau ʻilo mei he lēsoni ʻo e ʻaho ní pea mo hono ʻuhingá.
Hili hono maʻu ʻe he kau akó ha taimi feʻunga ke vahevahé, fakaafeʻi kinautolu ke nau fakakaukau fakalongolongo ki he ngaahi fehuʻi ko ʻení pea tali ha ngaahi ueʻi te nau ala maʻu mei he Laumālie Māʻoniʻoní:
-
ʻOku lelei fēfē hoʻo poupouʻi ʻa kinautolu kuo kole atu ʻe he ʻEikí ke ke muimui ki aí?
-
Te ke fakaʻaongaʻi fēfē ʻa e tui ki he Fakamoʻuí ke poupouʻi lelei ange ʻa kinautolu ʻoku ui ke takí?
Te ke lava ʻo fakaʻosi e lēsoní ʻaki hono vahevahe e founga kuo tāpuekina ai koe ʻi hono ngāue ʻaki e tui kia Sīsū Kalaisí ʻi hoʻo poupouʻi e kau taki ʻo e Siasí.