Ko Hono Tanumaki ʻo e Moʻui Fakafalala Pē Kiate Kitá

Ko Hono Tanumaki ʻo e Moʻui Fakafalala Pē Kiate Kitá

Vakai Fakalūkufuá

Naʻe fakahā ʻe he Fakamoʻuí “ko ʻeku taumuʻá ke tauhi ʻa ʻeku kau māʻoniʻoní. … Ka kuo pau ke fai ia ʻi heʻeku founga pē ʻaʻakú” (Tokāteline mo e Ngaahi Fuakava 104:15–16). ʻI he taimi ʻoku tau tui ai kia Sīsū Kalaisí, ʻoku tau fakaafeʻi Ia ke tokoni ke tau moʻui fakafalala ange kiate kitautolu ʻi he tapa kotoa pē ʻo ʻetau moʻuí. ʻOku tokoni ʻa Sīsū Kalaisi ki Hono Kāingalotú ke nau tanumaki ʻa e moʻui fakafalala pē kiate kitá koeʻuhí ke nau lava ʻo tokonaki maʻanautolu mo ako ke faitāpuekina ʻa e niʻihi kehé ʻo hangē ko ia ʻokú Ne faí.

Fokotuʻu ki he vave hono akoʻí: Mahalo naʻa lelei taha ke akoʻi ʻa e ngaahi lēsoni ko ʻení ʻo fakatatau mo ʻenau fakahokohoko ʻi he fakamatalá ni. ʻOku fakafeʻiloaki ʻe he ongo ʻuluaki lēsoní ʻa e kau akó ki he ngaahi tefitoʻi moʻoni ʻo e moʻui fakafalala pē kiate kitá pea ʻe tokoni ke mahino lelei ange kiate kinautolu ʻa e ongo lēsoni fakaʻosí. ʻE lava foki ke tokoni ʻa hono akoʻi ʻo e ongo ʻuluaki lēsoni “Ko Hono Tanumaki ʻo e Moʻui Fakafalala Pē Kiate Kitá” ʻi he kamataʻanga ʻo e taʻú ke teuteuʻi ʻa e kau akó ke mahino kiate kinautolu ʻa e ngaahi tefitoʻi moʻoni te nau ako ʻi he ngaahi lēsoni “Akó mo e Ngāue Maʻuʻanga Moʻuí” mo e ngaahi lēsoni “Moʻui Lelei Fakatuʻasinó mo e Fakaelotó.”

Teuteu ke Akoʻí

ʻOku ʻoatu ʻe he fakamatala ko ʻení ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Ko Hono Tanumaki ʻo e Moʻui Fakafalala Pē Kiate Kitá ʻi he Founga ʻa e ʻEikí

Taumuʻa ʻo e lēsoní: Ke tokoni ke mahino ki he kau akó ʻa e fiemaʻu ke tanumaki ʻa e moʻui fakafalala pē kiate kitá ʻi he founga ʻa e ʻEikí.

• Teuteu ʻa e tokotaha akó: Fakaafeʻi ʻa e kau akó ke nau fakakaukau ki he founga te nau ala fakaʻuhingaʻi ai ʻa e kupuʻi lea ko e moʻui fakafalala pē kiate kitá pea fakakaukau ki he ngaahi founga ʻe lava ke tokoniʻi ai kinautolu ʻe he ʻEikí ke tanumaki ʻa e moʻui fakafalala pē kiate kitá ʻi heʻenau moʻuí.

• Ngaahi ʻīmisi ke fakaʻaliʻalí: Ko ha meʻatokoni ʻo e ika; ko ha ngaahi naunau taumātaʻu; ko e ngāue ʻa Sīsū ʻi Heʻene kei talavoú

• Laʻipepa tufá: “Ko Hono Tanumaki ʻo e Moʻui Fakafalala Pē Kiate Kitá ʻi he Founga ʻa e ʻEikí”

Tui kia Sīsū Kalaisi ke Tanumaki ʻa e Moʻui Fakafalala pē Kiate Kitá

Taumuʻa ʻo e lēsoní: Ke tokoni ki he kau akó ke nau fakaʻaongaʻi ʻa e tui kia Sīsū Kalaisí ke tanumaki ʻa e moʻui fakafalala pē kiate kitá.

• Teuteu ʻa e tokotaha akó: Fakaafeʻi ʻa e kau akó ke fai ha lotu fakataautaha ʻo kole ki he Tamai Hēvaní ke tokoniʻi kinautolu ke nau ʻiloʻi ha tafaʻaki ʻo ʻenau moʻuí te nau lava ai ʻo moʻui fakafalala lahi ange kiate kinautolu pē.

• Vitiō: “Kuo Toetuʻu ʻa Kalaisi; ʻE Hiki e Ngaahi Moʻungá ʻi he Tui Kiate Iá” (16:22; mamata mei he taimi 5:24 ki he 6:08)

• Naunau ke fakaʻaliʻalí: Fakamatala meia Pīsope W. Kulisitofā Uātela

Fakapotopoto ʻi Hono Tokangaʻi ʻo e Ngaahi Maʻuʻanga Tokoni Fakapaʻangá

Taumuʻa ʻo e lēsoní: Ke tokoni ke mahino ki he kau akó ʻa e founga ke ngāue ʻaki ai ʻa e tui ki he ʻOtuá ʻi heʻenau tanumaki ʻa e moʻui fakafalala fakapaʻanga pē kiate kitá.

• Teuteu ʻa e tokotaha akó: Fakaafeʻi ʻa e kau akó ke nau hiki ʻa e ngaahi meʻa mahuʻinga ʻoku nau ʻamanaki ke fakahoko ʻi honau kahaʻú ʻe fiemaʻu ki ai ha ngaahi maʻuʻanga tokoni fakapaʻanga. Fakaafeʻi kinautolu ke nau fakakaukau ki heʻenau palani ke nau mateuteu fakapaʻanga ki he ngaahi meʻá ni pe ki ha ngaahi fehuʻi te nau ala maʻu fekauʻaki mo ʻenau teuteu fakapaʻangá.

• Fakamatala maʻá e kau akó: Ngaahi fakamole angamaheni ke ngāue fakafaifekau mo maʻu ha ako māʻolunga ange hili ʻa e ako māʻolungá, pea pehē ki he ngaahi tefitoʻi fakamole ki he nofó ʻi homou feituʻú

• Ngaahi naunaú: Ngaahi tatau ʻo e fakatātā ʻoku hā ai ʻa e ngaahi tefitoʻi moʻoni ʻo e fakahokohoko ʻi he meʻa fakapaʻangá

• Ngaahi vitioó: “Ko e Lea Fakafonua ʻo e Ongoongoleleí” (12:27; mamata mei he taimi 6:10 ki he 7:40); “Sedrick’s Journey” (2:32)

ʻOku Fakaʻatā Kitautolu ʻe he Moʻui Fakafalala Pē Kiate Kitá ke Tau Tokangaʻi Lelei Ange ʻa e Niʻihi Kehé

Taumuʻa ʻo e lēsoní: Ke tokoni ke mahino ki he kau akó ʻa e founga ʻoku hanga ai ʻe he moʻui fakafalala pē kiate kitá ʻo ʻai ke nau lava ʻo muimui lelei ange ki he sīpinga ʻa e Fakamoʻuí ʻi hono tokoniʻi ʻo e niʻihi kehé.

• Teuteu ʻa e tokotaha akó: Fakaafeʻi ʻa e kau akó ke nau fakakaukau ki ha ngaahi founga ʻe lava ke moʻoni fakatuʻasino mo fakalaumālie fakatouʻosi ai ʻa e fakamatala ko ʻení: “He ʻikai te ke lava ʻo hiki hake ha tokotaha kehe kae ʻoua kuó ke tuʻu ʻi ha potu māʻolunga ange ʻi he tuʻunga ʻokú ne ʻi aí” (Harold B. Lee, “Stand Ye in Holy Places,” Ensign, July 1973, 123).

• Ngaahi naunaú: Ngaahi tatau ʻo e lea ʻa ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ki ha fanga kiʻi kulupu iiki ke aleaʻi

• Laʻipepa tufá: “Ngaahi Sīpinga ʻo e Moʻui Fakafalala Pē Kiate Kitá mei he Hisitōlia ʻo e Siasí”

• Ngaahi vitioó: “Strengthen Thy Brethren” (3:50); “On the Lord’s Errand: The Life of Thomas S. Monson” (1:00:10; mamata mei he taimi 19:54 ki he 24:18)