“Lēsoni 180—Ko Hono Fakatupulaki ʻo e Moʻui Fakafalala Pē Kiate Kitá ʻi he Founga ʻa e ʻEikí: ʻOku Tāpuekina Fakatuʻasino mo Fakalaumālie Kitautolu ʻi Hono Fakatupulaki ʻo e Moʻui Fakafalala Pē Kiate Kitá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Fakatupulaki ʻo e Moʻui Fakafalala Pē Kiate Kitá ʻi he Founga ʻa e ʻEikí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 180: Ko Hono Fakatupulaki ʻo e Moʻui Fakafalala Pē Kiate Kitá
Ko Hono Fakatupulaki ʻo e Moʻui Fakafalala Pē Kiate Kitá ʻi he Founga ʻa e ʻEikí
ʻOku Tāpuekina Fakatuʻasino mo Fakalaumālie Kitautolu ʻi Hono Fakatupulaki ʻo e Moʻui Fakafalala Pē Kiate Kitá
Kuo fakahā ʻe he Fakamoʻuí, “Ko ʻeku taumuʻá ke tauhi ʻa ʻeku kau māʻoniʻoní. … Ka kuo pau ke fai ia ʻi heʻeku founga pē ʻaʻakú” (Tokāteline mo e Ngaahi Fuakava 104:15–16). ʻOku tokoni ʻa Sīsū Kalaisi ki Hono Kāingalotú ke fakatupulaki ʻa e moʻui fakafalala pē kiate kitá kae lava ke nau tokonaki maʻanautolu mo ako ke faitāpuekina e niʻihi kehé ʻo hangē ko ia ʻokú Ne faí. ʻE lava ke tokoni ʻa e lēsoni ko ʻení ke mahino ki he kau akó ʻa e fiemaʻu ke fakatupulaki ʻa e moʻui fakafalala pē kiate kitá ʻi he founga ʻa e ʻEikí.
Ngaahi ʻEkitivitī Ako ʻOku Ala Fakahokó
Moʻui fakafalala pē kiate kitá
Fakakaukau ke kamata e lēsoní ʻaki hono kumi e meʻa kuo ʻosi mahino ki he kau akó fekauʻaki mo e moʻui fakafalala pē kiate kitá. Te ke lava ʻo hiki ʻa e Moʻui fakafalala pē kiate kitá ʻi he palakipoé pea kole ki he kau akó ke nau fakamatalaʻi ʻa e meʻa mo e ʻuhinga ʻoku mahuʻinga ai ke fāifeinga ki aí.
Te ke lava ʻo tokoni ke nau aleaʻi ʻa e meʻa ʻoku nau ʻilo fekauʻaki mo e moʻui fakafalala pē kiate kitá ʻaki hano fakaʻaliʻali ha ngaahi fakatātā ʻo ha meʻatokoni ika mo ha naunau taumātaʻu. Kole ki he kau akó ke aleaʻi pe ko e fē ʻa e fakatātā ʻoku ʻi ai ʻa e ngaahi meʻa ʻaonga taha ki ha taha ke ne langaki ʻa e moʻui fakafalala pē kiate kitá ʻi hono tokonaki ʻo e meʻakai maʻa honau fāmilí. Mahalo te ke fie fakaʻaliʻali ʻa e ongo fakamatala ʻi laló ko ha konga ʻo e fealēleaʻakí.
Naʻe fakamatalaʻi ʻe Palesiteni Kōtoni B. Hingikelī (1910–2008) ʻa e mahuʻinga ʻo e ako ke tokonaki maʻatautolú:
ʻOku ʻi ai ha lea motuʻa ʻoku pehē, kapau te ke ʻoange ki ha taha ha mataʻi ika, ʻe maʻu ha meʻa ke ne kai ʻi he ʻaho ko iá. Ka, ʻo kapau te ke akoʻi ia ke toutai, te ne kai ia ʻi he toenga ʻo ʻene moʻuí. (Gordon B. Hinckley, “The Perpetual Education Fund,” Ensign, May 2001, 52)
Naʻe akoʻi ʻe he Kau Palesitenisī ʻUluakí ʻa e meʻá ni fekauʻaki mo e moʻui fakafalala pē kiate kitá:
Kuo fakahā ʻe he ʻEikí, “Ko ʻeku taumuʻá ke tauhi ʻa ʻeku kau māʻoniʻoní” [Tokāteline mo e Ngaahi Fuakava 104:15]. Ko e fakahā ko ʻení ko ha talaʻofa mei he ʻEikí te Ne ʻomi ha ngaahi tāpuaki fakatuʻasino pea fakaava ʻa e matapā ʻo e moʻui fakafalala pē kiate kitá, ʻa ia ko e malava ke tau maʻu ʻa e ngaahi fiemaʻu ʻo e moʻuí maʻatautolu mo e kau mēmipa hotau fāmilí. …
Kātaki ʻo ʻiloʻi fakapapau ko e fānau koe ʻa ʻetau Tamai ʻi Hēvaní. ʻOkú Ne ʻofa ʻiate koe pea he ʻikai teitei liʻaki koe. ʻOkú Ne ʻafioʻi koe pea mo mateuteu ke ʻoatu e ngaahi tāpuaki fakalaumālie mo fakatuʻasino ʻo e moʻui fakafalala pē kiate kitá. (The First Presidency, ʻi he My Foundation for Self-Reliance [2016], 3)
-
Ko e hā ʻokú ke ako mei he ngaahi fakamatala ko ʻení fekauʻaki mo e moʻui fakafalala pē kiate kitá?
Hili hono aleaʻi ʻe he kalasí e ngaahi fakamatala kimuʻá, fakakaukau ke fakaafeʻi e kau akó ke fakamatalaʻi fakanounou ki ha hoa ʻenau mahino ki he moʻui fakafalala pē kiate kitá. Mahalo ʻe tokoni ke hokohoko atu hono fakaʻaliʻali e fakamatala kimuʻa ʻa e Kau Palesitenisī ʻUluakí ke maʻu mei ai ha fakamoʻoni fakafolofola. Hili iá pea fakaafeʻi ha niʻihi ʻe loto-fiemālie ke vahevahe ʻenau fakamatala fakanounoú mo e kalasí.
Fakapapauʻi ʻoku mahino ki he kau akó te tau lava ʻo fakatupulaki ʻa e moʻui fakafalala pē kiate kitá ʻi he tokoni ʻa e ʻEikí, ke tokonaki maʻatautolu mo hotau fāmilí ʻa e ngaahi fiemaʻu ʻo e moʻuí.
-
ʻOkú ke pehē ko e hā ʻoku mahuʻinga ai ke mahino hono fakatupulaki ʻo e moʻui fakafalala pē kiate kitá lolotonga hoʻo kei siʻí?
-
Kapau ʻoku ongoʻi lōmekina ha taha ʻi he fakakaukau ke moʻui fakafalala pē kiate kitá, ko e hā te ke lava ʻo fakamanatu kiate kinautolu fekauʻaki mo e Tamai Hēvaní mo Sīsū Kalaisi te ne lava ʻo ʻoange ha ʻamanaki lelei kiate kinautolú?
Ke tokoniʻi e kau akó ke vakai ki ha ngaahi founga ʻoku ʻaonga ai kiate kinautolu ʻa e ngaahi tefitoʻi moʻoni ʻo e moʻui fakafalala pē kiate kitá, fakakaukau ke hiki ʻa e ngaahi tefito ko ʻení ʻi he palakipoé: akó, moʻui leleí, ngāue maʻuʻanga moʻuí, ngaahi meʻa fakapaʻangá, mālohi fakalaumālié. Vahevahe ʻa e kau akó ki ha ngaahi kulupu pea vahe ha tefito ʻe taha ki he kulupu takitaha. Fakaafeʻi e kau akó ke aleaʻi ʻeni ʻi heʻenau ngaahi kulupú pea vahevahe mo e kalasí e meʻa ne nau aleaʻí.
Tali e ngaahi fehuʻi ko ʻení ʻo fakatefito ʻi ha taha ʻo e ngaahi tefito ko ʻení: akó, moʻui lelei, ngāue maʻuʻanga moʻui, ngaahi meʻa fakapaʻangá, pe mālohinga fakalaumālié:
-
Te ke fakamatalaʻi fēfē ha taha ʻoku moʻui fakafalala pē kiate ia ʻi he tafaʻaki ko iá?
-
ʻE lava fēfē ke kamata fakatupulaki ʻe ha taha taʻu hongofulu tupu ʻa e moʻui fakafalala pē kiate kitá ʻi he tafaʻaki ko iá? Te nau lava fēfē ʻo fakaafeʻi ʻa e ʻEikí ke tokoniʻi kinautolú?
-
Ko e hā ha ngaahi lelei ʻo e ako ke fai ha meʻa lahi ange maʻatautolu ʻi he tafaʻaki ko ʻení?
Poupouʻi e kau akó ke tokanga ki he ngaahi ueʻi mei he Laumālie Māʻoniʻoní fekauʻaki mo e founga te nau lava ai ʻo tokonaki maʻanautolú. Tokoni ke mahino ki he kau akó naʻa mo e taimi te nau lava ai ʻo fai ha ngaahi meʻa ʻiate kinautolu peé, ʻoku kei fiemaʻu pē ke nau falala ki he ʻEikí. ʻE lava foki ke taau ke kole tokoni mei he niʻihi kehé he taimi ʻe niʻihi.
Moʻui fakalalala pē kiate kita ʻi he founga ʻa e ʻEikí
Ke tokoni ke mahino ki he kau akó e ngaahi tefitoʻi moʻoni fekauʻaki mo e moʻui fakafalala pē kiate kitá te tau lava ʻo ako mei he ʻEikí mo ʻEne kau tamaioʻeikí, fakakaukau ki ha taha ʻo e ngaahi meʻa ko ʻení:
-
Vahevahe ʻa e kau akó ki ha fanga kiʻi kulupu iiki, pea tufaki ʻa e laʻipepa tufa “Ko Hono Fakatupulaki ʻo e Moʻui Fakafalala Pē Kiate Kitá ʻi he Founga ʻa e ʻEikí.” ʻE lava ke vahevahe ʻe he kulupu takitaha ʻa e ngaahi potufolofolá mo e ngaahi fakamatalá ki he kau mēmipa ʻo e kulupú ke nau ako. Hili iá ʻe lava ke nau fevahevaheʻaki ʻa e meʻa ne nau akó mo tali fakataha ʻa e ngaahi fehuʻí.
-
Kapau ʻoku maʻu ʻe he kau akó ʻa e ngaahi maʻuʻanga tokoni mo e taukei ke kumi ʻiate kinautolu pē ʻa e ngaahi fakamoʻoni fakafolofola mo e fakamatala ʻa e kau taki ʻo e Siasí, fakaʻaliʻali ʻi he palakipoé ʻa e ngaahi fehuʻi mei he laʻipepa tufá. Fakaafeʻi e kau akó ke fekumi ʻi he folofolá mo e ngaahi lea ʻa e kau palōfitá ki ha tali ki he fehuʻi takitaha. Ko e maʻuʻanga tokoni ʻe taha ʻe lava ke ako ʻe he kau akó ko e konga ʻo e Ngaahi Tefitó mo e Ngaahi Fehuʻí ʻoku ui ko e “Moʻui Fakafalala pē Kiate Kitá.” ʻOku maʻu ʻeni ʻi he Gospel Library App pea mo e ChurchofJesusChrist.org.
Ko Hono Fakatupulaki ʻo e Moʻui Fakafalala Pē Kiate Kitá ʻi he Founga ʻa e ʻEikí
Ako ʻa e ngaahi fakamoʻoni fakafolofola mo e ngaahi fakamatala ʻi laló, ʻo kumi ha tali ki he ongo fehuʻi ko ʻení:
-
Ko e hā kuo akoʻi ʻe he ʻEikí ʻi he folofolá pea fakafou ʻi Heʻene kau palōfitá ʻe lava ʻo tokoni ke tau fakatupulaki ʻa e moʻui fakafalala pē kiate kitá?
-
Ko e hā ha ngaahi faingataʻa ʻe ala fehangahangai mo ha taha te ne fiemaʻu ai e tokoni ʻa e Tamai Hēvaní ke ikunaʻí?
Naʻe akonaki ʻa Palesiteni ʻEselā Tafu Penisoni (1899–1994) ʻo pehē:
ʻOku ngāue ʻa e ʻEikí mei loto ki tuʻa. ʻOku ngāue ʻa māmani mei tuʻa ki loto. ʻOku toʻo ʻe he māmaní ʻa e kakaí mei he masivá. ʻOku toʻo ʻe Kalaisi ʻa e masivá mei he kakaí pea nau toki toʻo leva kinautolu mei heʻenau fakaʻofá. ʻE fakafōtunga ʻe māmani ʻa e tangatá ʻaki hono liliu honau ʻātakaí. ʻOku liliu ʻe Kalaisi ʻa e tangatá pea toki liliu ʻe he tangatá honau ʻātakaí. ʻOku fakafōtungaʻi ʻe māmani ʻa e ʻulungaanga ʻo e tangatá, ka ʻe lava ʻe Kalaisi ke liliu e ʻulungaanga ʻo e faʻahinga ʻo e tangatá. (Ezra Taft Benson, “Born of God,” Ensign, Nov. 1985, 6)
Naʻe fakamatala ʻa Palesiteni Tieta F. ʻUkitofa, naʻe hoko kimuʻa ko ha mēmipa ʻo e Kau Palesitenisī ʻUluakí, ʻo pehē:
ʻOku ʻikai ko e founga ʻa e ʻEikí ke tau tangutu pē ʻi he veʻe vaitafé ʻo tatali ke tafe atu ʻa e vaí ʻo ʻosi pea tau toki kolosi. Ka ko ʻetau fakataha mai, pelu hake e nima hotau soté, ngāue, pea langa ha halafakakavakava pe foʻu ha vaka ke tau kolosi ai ʻi he ngaahi vai ʻa ia ko hotau ngaahi poletakí. (Dieter F. Uchtdorf, “Tokoniʻi ʻi he Founga ʻa e ʻEikí,” Liahona, Nōvema 2011, 54)
ʻOange ha faingamālie ki he ngaahi kulupú ke vahevahe mo e kalasí e ngaahi tali mo e fakakaukau ne nau maʻu lolotonga ʻenau akó. Te nau lava foki ʻo vahevahe ha ngaahi sīpinga ʻo e founga kuo tāpuekina ai kinautolu ʻe he ʻEikí ʻi heʻenau feinga ke moʻui ʻaki e ngaahi tefitoʻi moʻoni ʻo e moʻui fakafalala pē kiate kitá.
Naʻe tupulaki ʻa e Fakamoʻuí ʻi he ʻaloʻofa ki he ʻaloʻofa
Mahalo ʻe ʻiloʻi ʻe he kau akó ʻe lava ke fakatupu lōmekina ʻa e feinga ke fakatupulaki fakaʻangataha ʻa e moʻui fakafalala pē kiate kitá ʻi ha ngaahi tafaʻaki kehekehe. Fakamatalaʻi ange te tau lava ʻo ako mei he sīpinga ʻa e Fakamoʻuí ʻoku fiemaʻu ha taimi lahi ki hono fakatupulaki ʻo e moʻui fakafalala pē kiate kitá. Fakakaukau ke fakaʻaliʻali ʻa e fakatātā ko ʻení lolotonga hono lau ʻe he kau akó ʻa e potufolofola ko ʻení.
Lau ʻa e Tokāteline mo e Ngaahi Fuakava 93:11–13, ʻo kumi e meʻa naʻe akoʻi ʻe Sione Papitaiso fekauʻaki mo e tupulaki ʻa e Fakamoʻuí. (Naʻe fakahā ha konga ʻo e ngaahi tohi ʻa Sione Papitaisó kia Siosefa Sāmita pea lekooti ʻi he vahe 93.)
Kapau ʻoku fiemaʻu tokoni ʻa e kau akó ʻi hono tali e ongo fehuʻi ko ʻení, mahalo te ke fie fakamatalaʻi ange ʻoku ʻuhinga ʻa e hokohoko atu ʻi he ʻaloʻofa ki he ʻaloʻofá ke fakalakalaka māmālie ʻi he tokoni fakalangi. Te ke lava ʻo ʻai ke lau ʻe he kau akó ʻa e 2 Nīfai 28:30 ke tokoniʻi kinautolu ke nau ʻilo ʻa e founga ʻoku fiemaʻu ai ke tau fakalakalaka ʻi he “ʻotu lea ki he ʻotu leá.”
-
ʻOkú ke pehē ʻoku ʻuhinga ki he hā ʻa e fai atu ʻa e Fakamoʻuí “mei he ʻaloʻofa ki he ʻaloʻofa”? (veesi 13).
-
ʻE lava fēfē ʻe he sīpinga ʻa e Fakamoʻuí ʻo e fai atu mei he ʻaloʻofa ki he ʻaloʻofá ʻo tokoniʻi koe ʻi hoʻo feinga ke fakatupulaki ʻa e moʻui fakafalala fakalaumālie mo fakatuʻasino pē kiate kitá?
Ko hono langaki ʻo e moʻui fakafalala pē kiate kitá
Fakaafeʻi e kau akó ke fakakaukau ki he meʻa naʻe akoʻi ange ʻe he Laumālie Māʻoniʻoní fekauʻaki mo hono fakatupulaki ʻo e moʻui fakafalala pē kiate kitá. Ke tokoni ke nau fakakaukau ki aí, te ke lava ʻo fakaʻaliʻali ʻa e ngaahi fehuʻi ko ʻení. Fakaafeʻi e kau akó ke vakaiʻi honau tuʻunga lolotonga ʻo e moʻui fakafalala pē kiate kitá ʻaki ʻenau fakalaulauloto pe tali e ngaahi fehuʻi ko ʻení ʻi heʻenau tohinoa akó.
-
Ko e hā ʻeku tuʻunga loto-falala ki hono fakatupulaki ʻo e moʻui fakafalala pē kiate kitá ʻi he ngaahi tafaʻaki kehekehe ʻo ʻeku moʻuí?
-
Ko e hā ʻoku ʻaonga ai ke kamata fakatupulaki ʻa e malava ke tokonaki maʻaku ʻi he ngaahi tafaʻaki ko ʻení?
-
Te u fakakau fēfē ʻa e ʻEikí ʻi hono fakatupulaki ha moʻui fakafalala lahi ange kiate au ʻi heʻeku moʻuí?
Fakaafeʻi e kau akó ke fakakaukau ki ha ngaahi founga pau ʻe lava ke nau kamata fakatupulaki ai ʻa e moʻui fakafalala pē kiate kitá ʻi heʻenau moʻuí. Te ke lava foki ʻo vahevahe hoʻo ngaahi fakakaukau mo e fakamoʻoni fekauʻaki mo e mālohi ʻo e moʻui fakafalala pē kiate kitá mo e founga kuó ne tāpuekina ai hoʻo moʻuí.