Lēsoni 183: Ko Hono Fakatupulaki ʻo e Moʻui Fakafalala Pē Kiate Kitá

ʻOku Fakaʻatā Kitautolu ʻe he Moʻui Fakafalala Pē Kiate Kitá ke Tokangaʻi Lelei Ange e Niʻihi Kehé

Ko e Teuteu ke Ngāue ʻo Hangē ko e Fakamoʻuí

Naʻe akoʻi ʻe he Fakamoʻuí ʻEne kau ākongá ke nau “tokoniʻi ʻa e vaivaí … fakamālohi ʻa e ngaahi tui ʻoku vaivaí” (Tokāteline mo e Ngaahi Fuakava 81:5). ʻOku tau lava lelei ange ʻo muimui ki he fakahinohino ko ʻení ʻi he taimi ʻoku tau moʻui fakafalala lahi ange ai kiate kitautolú. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku lava ai ʻe he moʻui fakafalala pē kiate kitá ʻo ʻai ke nau lava ʻo muimui lelei ange ki he sīpinga ʻa e Fakamoʻuí ʻi hono tokoniʻi e niʻihi kehé.

Ngaahi ʻEkitivitī Ako ʻOku Ala Fakahokó

Ko e malava ke tokoniʻi e niʻihi kehé

Ke tokoni ke mahino ki he kau akó ʻoku tokoniʻi ʻe hono maʻu ʻo e moʻui fakafalala pē kiate kitá ʻetau malava ke tokoniʻi e niʻihi kehé, fakakaukau ke fakaafeʻi ha kau ako ʻe toko tolu ke nau takitaha lau ha taha ʻo e ngaahi tūkunga ko ʻení. Kiʻi taʻofi siʻi hili hono lau e tūkunga takitaha pea kole ki he kalasí ke vahevahe ha ngaahi moʻoniʻi meʻa kehekehe te ne lava ʻo fakapapauʻi e lahi ʻo e tokoni ʻe lava ke fai ʻe Minitī, Nētane pe Seitá. (Kapau ʻe fiemaʻu, te ke lava ʻo faʻu ha ngaahi tūkunga kehe ʻe felāveʻi ange mo hoʻo kau akó.)

1. ʻOku faingataʻa ke mahino ki he kaungāmeʻa ʻo Minitií ʻene ngāue fakafiká pea kole tokoni kia Minitī.

2. ʻI he hoko ʻa Nētane ko ha faifekau foʻoú, ʻokú ne fetaulaki mo ha taha ʻoku lahi haʻane ngaahi fehuʻi fekauʻaki mo hono Fakafoki Mai ʻo e Siasi ʻo e Fakamoʻuí.

3. ʻOku ʻilo ʻe Seita ʻoku ʻikai lava ʻe ha fāmili ʻi hono uōtí ʻo maʻu ha vala māfana maʻa ʻenau fānaú.

Fakakaukau ke fakaʻaliʻali pe ʻoange ki he kau akó ha tatau ʻo e fakamatala ko ʻeni meia ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi kinautolu ke kumi mo aleaʻi ʻi ha ngaahi kulupu iiki ha kupuʻi lea ʻe taha mei he palakalafi takitaha ʻe lava ke fakaʻaongaʻi ki he ngaahi tūkunga ʻi ʻolungá. (Kapau ʻe fiemaʻu, tokoni ke mahino ki he kau akó ʻe lava ke kau ʻi he foʻi lea fakatuʻasinó ʻo hangē ko hono fakaʻaongaʻi ʻi he fakamatalá ha ngaahi tafaʻaki fakauelofea lahi, hangē ko e meʻa fakapaʻangá, akó, fakaelotó, mo e fakatuʻasinó.)

Ko e moʻui fakafalala pē kiate kitá ʻa ʻetau fatongia ʻaki ʻetau fakapapauʻi ʻetau lelei fakalaumālie mo fakatuʻasinó pea pehē kiate kinautolu kuo fakafalala mai ʻe he Tamai Hēvaní ke tau tokangaʻí. ʻE toki lava moʻoni ke tau faʻifaʻitaki ki he Fakamoʻuí ʻi hono tokoniʻi mo faitāpuekina ʻo e niʻihi kehé ʻi he taimi te tau moʻui fakafalala ai pē kiate kitautolú.

ʻOku mahuʻinga ke mahino ko e moʻui fakafalala pē kiate kitautolú ko ha founga ia te tau aʻusia ai ʻetau taumuʻá. Ko ʻetau taumuʻa ʻuluakí ke hoko ʻo tatau mo e Fakamoʻuí, pea ʻoku aʻusia e taumuʻa ko iá ʻi heʻetau tokoni taʻesiokita ki he niʻihi kehé. ʻOku hanga ʻe he tuʻunga ʻo ʻetau moʻui fakafalala kiate kitá ʻo fakatupulekina pe holoki ʻetau malava ke tokoní.

Hangē ko e lea naʻe fai ʻe Palesiteni Melioni G. Lomenī: “He ʻikai ke lava ʻo ʻomi ha meʻakai maʻanautolu ʻoku fiekaiá mei ha ngaahi kōpate ʻoku hala ha meʻakai ai. He ʻikai ke lava ʻo maʻu ha paʻanga ke tokoniʻi ʻaki e masivá mei ha peesi ʻoku ngeʻesi. He ʻikai ke lava ʻo maʻu ha tokoni mo ha loto mahino meiate kinautolu fiekaia fakaelotó. He ʻikai ke lava ʻo maʻu ha fakahinohino meiate kinautolu ʻoku ʻikai akó. Pea ko e mahuʻinga tahá, he ʻikai ke lava ʻo maʻu ha fakahinohino fakalaumālie mei he taha ʻoku vaivai fakalaumālié” (ʻi he Conference Report, Oct. 1982, 135; pe Ensign, Nov. 1982, 93). (Robert D. Hales, “A Gospel Vision of Welfare: Faith in Action,” ʻi he Basic Principles of Welfare and Self-Reliance [fakataha ako fakatakimuʻa fakaemāmani lahi, 2009], 1–2; vakai foki, ChurchofJesusChrist.org)

• Ko e hā ha ngaahi moʻoni naʻá ke ako meia ʻEletā Heili?

  ʻI hono tali ʻe he kau akó ʻa e fehuʻi kimuʻá, fakapapauʻi ʻoku mahino kiate kinautolu ko e taimi ʻoku tau fakatupulaki ai ʻa e moʻui fakafalala pē kiate kitá, ʻoku tau hoko lahi ange ai ʻo hangē ko e Fakamoʻuí pea lava ke tau tokoniʻi lelei ange ai ʻa e niʻihi kehé.

  Te ke lava ʻo tokoniʻi e kau akó ke nau vakai ki he mahuʻinga fakataautaha kiate kinautolu ʻa e lēsoní ʻaki hano kole ange ke nau lekooti ʻenau ngaahi fakakaukau mo e tali ki he ngaahi fehuʻi hangē ko ʻení:

• Kuó ke lava fēfē ʻo tokoniʻi e niʻihi kehé ʻo fakafou ʻi he ngaahi meʻa ʻokú ke malavá pe ngaahi founga kuo tokoni ʻa e ʻOtuá ke ke fakatupulakí?

• Ko e hā ha ngaahi tafaʻaki ʻo e moʻui fakafalala pē kiate kitá ʻoku ʻai ʻe he Tamai Hēvaní ke ke ngāue ki ai he taimí ni ke ke lava ʻo tokangaʻi lelei ange ai koe mo e niʻihi kehé ʻi he kahaʻú?

Hoko ʻo hangē ange ko e Fakamoʻuí

Fakakaukau ke fakaʻaliʻali ʻa e ngaahi fakahinohino mo e fehuʻi ko ʻení. Fakaafeʻi e kau akó ke fakakakato ʻa e ʻekitivitií mo aleaʻi e fehuʻí mo ha hoa.

Lau ʻa e Luke 2:40, 52 pea fakaʻilongaʻi ʻa e ngaahi tafaʻaki kehekehe ʻo e fakalakalaká naʻe fakahoko ʻe Sīsū ʻi Heʻene kei talavoú.

• Naʻe tanumaki fēfē e malava ko ia ʻa e Fakamoʻuí ke tokoniʻi e niʻihi kehé ʻi Heʻene tupulaki mo fakalakalaka lolotonga ʻEne ʻi he kei talavoú?

  Hili e fevahevaheʻaki ʻa e ngaahi hoá, fakaafeʻi e kalasí ke vahevahe ha ngaahi founga ʻe lava ke fakatupulaki ai ʻe ha taha taʻu hongofulu tupu he ʻahó ni ʻa e moʻui fakafalala pē kiate kitá ʻi he tafaʻaki takitaha ʻoku lau ki ai ʻi he Luke 2:40, 52.

  Fakakaukau ke ʻoange ha taimi ki he kau akó ke fakalaulauloto fakalongolongo ai ki ha ngaahi fehuʻi hangē ko ʻení:

• Ko hai te ke lava ʻo tokoni ki ai ʻi he kahaʻú kapau te ke moʻui fakafalala lahi ange kiate koe ʻi ha taha ʻo e ngaahi tafaʻaki ko ʻení? Te ke lava fēfē ke tokoní?

• ʻE tokoni fēfē ʻa e ngāue ke moʻui fakafalala pē kiate kitá ke tau hoko ʻo hangē ange ko e Fakamoʻuí?

Ngaahi sīpinga ʻo e ngāue tokoni faka-Kalaisi ʻo fakafou ʻi he moʻui fakafalala pē kiate kitá

Vahevahe ha ngaahi sīpinga ʻo ha kakai ʻi he hisitōlia ʻo e Siasí ne nau lava ʻo tauhi ki he ʻOtuá mo e niʻihi kehé. Te ke lava ʻo fai ʻeni ʻaki hano fokotuʻutuʻu e kalasí ki ha ngaahi kulupu ako pea ʻoange ki he kulupu takitaha ha taha ʻo e ngaahi sīpinga mei he laʻipepa tufa “Ngaahi Sīpinga ʻo e Moʻui Fakafalala Pē Kiate Kitá mei he Hisitōlia ʻo e Siasí.” Fakaafeʻi e ngaahi kulupú ke nau lau ʻa e ngaahi veesi naʻe fokotuʻu angé pea aleaʻi e fehuʻi ʻi he fakaʻosinga ʻo e palakalafí.

Ngaahi Sīpinga ʻo e Moʻui Fakafalala Pē Kiate Kitá mei he Hisitōlia ʻo e Siasí

Māteni Hālisi: ʻI he 1827, naʻe fehangahangai ʻa Siosefa Sāmita mo e fakatangá mo e masivá ʻi heʻene feinga ke liliu e Tohi ʻa Molomoná mei he ʻū lauʻi peleti koulá. Naʻe ʻiloʻi ʻe Māteni Hālisi, ko ha tangata faama lavameʻa, ʻa e tūkunga naʻe ʻi ai ʻa Siosefá. Lau ʻa e Siosefa Sāmita—Hisitōlia 1:61–62, ʻo kumi e founga naʻe lava ai ʻa Māteni ʻo tokoni kia Siosefa Sāmitá. Lau ʻa e Tokāteline mo e Ngaahi Fuakava 19:26, 34–35; 104:26 ke ʻiloʻi ha ngaahi founga kehe naʻe lava ai ʻa Māteni Hālisi ʻo tokoni ki he ʻEikí mo faitāpuekina e niʻihi kehé. Naʻe fakatupulaki ʻe Māteni ʻa e moʻui fakafalala fakapaʻanga pē kiate kita naʻe fiemaʻu ke tokoni ai ki he ʻEikí mo e niʻihi kehé ʻi ha ngaahi founga mahuʻingamālie. Ko e hā ʻe lava ke fai ʻe he toʻu tupú he taimí ni ke fakatupulaki ai e ngaahi pōtoʻi ngāué, akó, mo e ngaahi meʻa ʻoku nau maʻú ke tokoniʻi kinautolu ke nau tokoni ki he ʻEikí mo e niʻihi kehé ʻi he kahaʻú?

ʻEma Heili Sāmita: ʻI he fetaulaki ʻa ʻEma mo Siosefa Sāmitá, naʻá ne hoko ko ha tokotaha laukonga, faʻu tohi, faiako, mo ha tokotaha hiva tuʻukimuʻa. Lau ʻa e Tokāteline mo e Ngaahi Fuakava 25:5–7, 11, ʻo kumi e ngaahi fatongia naʻe fakafalala ʻe he ʻEikí kia ʻEmá. Naʻe fakatupulaki ʻe ʻEma ʻa e ngaahi pōtoʻi ngāue mo e ako naʻá ne tokoniʻi ia ke tokoni ki he ʻEikí mo e niʻihi kehé ʻi ha ngaahi founga mahuʻingamālié. Ko e hā ʻe lava ke fai ʻe he toʻu tupú he taimí ni ke fakatupulaki ai e ngaahi pōtoʻi ngāué, akó, mo e ngaahi meʻa ʻoku nau maʻú ke tokoniʻi kinautolu ke nau tokoni ki he ʻEikí mo e niʻihi kehé ʻi he kahaʻú?

Uiliami W. Felipisi: Naʻe fakahinohinoʻi ʻe he ʻEikí ʻa Uiliami W. Felipisi, ko ha papi ului foʻou ki he Siasí, ke hiki ki Mīsuli. Lau ʻa e Tokāteline mo e Ngaahi Fuakava 55:4 mo e 57:11–13, ʻo kumi e ngaahi ngāue makehe naʻe ʻoange ʻe he ʻEikí kia Uiliami ke tokoni ai ʻi Hono Siasí. Fakaʻaongaʻi ʻa e fakahokohoko ʻo e “Authors and Composers” ʻi he tohi himí ke kumi ʻa e ngaahi foʻi himi naʻe faʻu ʻe Uiliami W. Felipisi ʻoku nau hokohoko atu ke faitāpuekina ʻa e Siasí he ʻaho ní. Naʻe fakatupulaki ʻe Uiliami ʻa e ngaahi pōtoʻi ngāue mo e ako fakaʻatamai naʻá ne tokoniʻi ia ke ne ngāue maʻá e ʻEikí mo e niʻihi kehé ʻi ha ngaahi founga mahuʻingamālie. Ko e hā ʻe lava ke fai ʻe he toʻu tupú he taimí ni ke fakatupulaki ai e ngaahi pōtoʻi ngāué, akó, mo e ngaahi meʻa ʻoku nau maʻú ke tokoniʻi kinautolu ke nau tokoni ki he ʻEikí mo e niʻihi kehé ʻi he kahaʻú?

Fakakaukau ke fakaafeʻi ʻa e kulupu takitaha ke vahevahe mo e kalasí ʻa e meʻa ne nau akó.

Te ke lava ʻo tokoni ki he kau akó ke fakakaukau ki ha ngaahi sīpinga fakaonopooni ʻo ha kakai naʻa nau fakatupulaki ʻa e moʻui fakafalala pē kiate kitá pea nau lava ai ʻo tokoni ki he niʻihi kehé ʻi ha founga faka-Kalaisi. Te ke lava ʻo huluʻi e foʻi vitiō “Strengthen Thy Brethren” (3:50) pe “On the Lord’s Errand: The Life of Thomas S. Monson” mei he taimi 19:54 ki he 24:18, ʻoku maʻu fakatouʻosi ʻi he ChurchofJesusChrist.org.

Fakakaukau ke vahevahe ʻa e founga kuó ke tokoniʻi ai e niʻihi kehé pe ko e founga kuo tokoniʻi ai koe ʻe he niʻihi kehé ʻo fakafou ʻi he ngaahi pōtoʻi ngāué, ngaahi meʻa ʻokú ke maʻú, mo e ʻulungaanga naʻá ke fakatupulaki pe ko e niʻihi kehé ʻi he kotoa ʻo hoʻomou moʻuí.

Ke fakaʻosi e lēsoní, mahalo te ke fie ʻoange ha taimi ki he kau akó ke fakalaulauloto ʻi he faʻa lotu pe tohi ʻa e meʻa ʻoku nau pehē ʻe finangalo e Tamai Hēvaní ke nau fai ʻaki e meʻa ne nau ako mo ongoʻi he ʻaho ní. ʻE lava ke vahevahe ʻe ha niʻihi ʻe loto-fiemālié ʻenau ngaahi fakakaukaú mo e kalasí.

Ngaahi Maʻuʻanga Tokoni Kehé

ʻOku taau nai ke tokangaʻi ʻeku ngaahi fiemaʻú kimuʻa peá u toki tokoniʻi e niʻihi kehé?

Naʻe fakamanatu mai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko kimoutolu ko ia ʻoku fekumi fakamātoato ke fefuaʻaki hoʻomou ngaahi kavengá, ʻoku mahuʻinga ke ke fakamālohia koe pea faʻu haʻo fokotuʻutuʻu ki he taimi ʻe fakafalala lahi ai ha niʻihi kehe kiate koe pea iku ʻo lahi ʻaupito e ngāue ʻokú ke faí. ʻOku ʻikai ha taha ʻoku fuʻu mālohi fau te ne taʻe ongoʻi ongosia pe loto mamahi pe ʻiloʻi e fie maʻu ke tokangaʻi ai iá. Naʻe aʻusia ʻe Sīsū ʻa e ongosia ko iá, mo ongoʻi e mole atu ʻa Hono mālohí. Naʻá Ne foaki lahi ʻaupito, ka naʻe ʻi ai ha totongi naʻe muimui atu ai, pea naʻá Ne ongoʻi ʻa e ngaahi nunuʻa ʻo e falala ʻa ha tokolahi kiate Iá. ʻI he taimi naʻe ala ai kiate Ia e fefine naʻe ʻau totó ʻi he fuʻu kakaí, naʻá Ne fakamoʻui ia, ka naʻá Ne ʻafioʻi foki “kuo ʻalu ʻiate ia ʻa e mālohí” (vakai, Maʻake 5:25–34).

Kuó u fakatumutumu maʻu pē ʻi Heʻene malava ʻo mohe ʻi ha matangi ʻi he Tahi Kālelí ʻa ia naʻe mālohi mo lahi fau ʻo pehē ai ʻe Heʻene kau ākongá, ko ha kau toutai taukei, ʻe ngoto e vaká. Hono ʻikai ko ha ngāue lahi? Ko ha malanga nai ʻe fiha te ke lava ʻo fai mo ha ngaahi tāpuaki te ke lava ʻo fakahoko taʻe te ke ongosia lahi? ʻOku fiemaʻu foki ke tokangaʻi mo e kau tauhí. Kuo pau ke ke maʻu ha lolo ʻi he tangikeé kimuʻa pea ke toki lava ke foaki ia ki he niʻihi kehé. (Jeffrey R. Holland, “Fefuaʻaki ʻEnau Ngaahi Kavengá,” Liahona, Sune 2018, 29–30)

ʻE lava fēfē ke tau tokangaʻi e niʻihi kehé ʻi he founga ʻa e Fakamoʻuí?

Naʻe fakamatala ʻa Palesiteni Tieta F. ʻUkitofa, naʻe hoko kimuʻa ko ha mēmipa ʻo e Kau Palesitenisī ʻUluakí, ʻo pehē:

ʻOku tokolahi ha kakai pea lahi mo e ngaahi kautaha lelei ʻi he māmaní ʻoku nau feinga ke feau e ngaahi fie maʻu vivili ʻa e kakai masiva mo faingataʻaʻiá ʻi he feituʻu kotoa pē. ʻOku tau fakamālō ai, ka ʻoku kehe ʻa e founga ia ʻa e ʻEikí ki hono tokangaʻi ʻo e faingataʻaʻiá mei he founga ʻa māmaní. Kuo folofola ʻa e ʻEikí ʻo pehē, “Kuo pau ke fai ia ʻi heʻeku founga pē ʻaʻakú” [Tokāteline mo e Ngaahi Fuakava 104:16; vakai foki, veesi 15]. ʻOku ʻikai ngata pē ʻi Heʻene tokanga ki heʻetau ngaahi fiemaʻu fakavavevave tahá; ka ʻokú Ne tokanga ki heʻetau fakalakalaka taʻengatá. Ko hono ʻuhinga ʻeni kuo kau maʻu ai pē ʻi he founga ʻa e ʻEikí ʻa e moʻui fakafalala pē kiate kitá mo e tokoni ki hotau kaungāʻapí ʻo tānaki atu ki hono tokangaʻi ʻo e masivá. (Dieter F. Uchtdorf, “Tokoniʻi ʻi he Founga ʻa e ʻEikí,” Liahona, Nōvema 2011, 54)

Naʻe akonaki ʻa ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku fāifeinga e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo hono kāingalotú ke faʻifaʻitaki ki Heʻene sīpingá ʻi heʻetau feinga ke fakafiemālieʻi ʻa e faingataʻaʻiá mo ohi mai ʻa e moʻui fakafalala pē kiate kitá. …

Naʻe fakahā ʻe he ʻEikí ʻi ha fakahā ki he Palōfita ko Siosefa Sāmitá: “Ko ʻeku taumuʻá ke tauhi ʻa ʻeku kau māʻoniʻoní. … Ka kuo pau ke fai ia ʻi heʻeku founga pē ʻaʻakú; pea vakai ko e founga ʻeni kuo tuʻutuʻuni ʻe au, ko e ʻEikí, ke tauhi ai ʻa ʻeku kau māʻoniʻoní, ke hākeakiʻi ʻa e kakai masivá, ʻi hono fakatōkilaloʻi ʻo e kakai koloaʻiá” [T&F 104:15–16]. Ko e founga ʻa e ʻEikí ʻoku kau ai hono tokoniʻi ʻo e kakaí ke nau tokoniʻi pē kinautolú. ʻOku hakeakiʻi e masivá koeʻuhí he ʻoku nau ngāue ki he tokoni fakataimi ʻoku nau maʻú, ʻoku akoʻi kiate kinautolu ʻa e ngaahi tefitoʻi moʻoni totonú, pea ʻoku nau lava ʻo hiki hake mei he masivá ki he fakafalala pē kiate kitá. ʻOku fakatōkilaloʻi ʻa e koloaʻiá koeʻuhí he ʻoku nau fakavaivaiʻi ʻa kinautolu ke foaki lahi mei he meʻa ʻoku nau maʻú kiate kinautolu ʻoku faingataʻaʻiá. (Joseph B. Wirthlin, “Inspired Church Welfare,” Ensign, May 1999, 76–77)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fakakaukau ke kole ki he taha ʻe loto-fiemālie ke kau ʻi ha lēsoni fakataumuʻa. Kole ki he tokotahá ke ne ʻoatu ha meʻa ʻoku ʻikai ke nau maʻu pe ʻikai mateuteu ke foaki. Hangē ko ʻení, te ke lava ʻo kole ange ke ne ʻoange ki he tokotaha ako takitaha ha peni lanu mata, meʻakai, pe ko ha paʻanga. ʻI he taimi ʻoku ʻikai ke nau lava ai ʻo fai iá, fehuʻi ange pe ko e hā naʻe ʻikai ke nau tokoni aí. (Hili iá peá ke fakapapauʻi ange ʻoku sai pē ia, pea fakamālō ange ʻi heʻenau kau atu ki he lēsoni fakataumuʻá.)

Ke tokoni ke mahino ki he kau akó ʻoku tanumaki ʻetau malava ko ia ke tokoniʻi e niʻihi kehé ʻe heʻetau teuteu mo moʻui fakafalala pē kiate kitá, hokohoko atu ʻi he naunau ʻi he lēsoní ʻo kamata ʻaki e lea ʻa ʻEletā Lōpeti D. Heilí.

ʻOku teuteuʻi kitautolu ʻe he tokangaekina kitá ke tau tokoniʻi e niʻihi kehé

Ke tokoni ke mahino ki he kau akó ʻa e founga ʻoku malava ai ʻe he tokangaekina kitá ke tau tokoni lelei ange ki he niʻihi kehé, fakakaukau ke fakaʻaliʻali ha fakatātā ʻo ha tānakiʻanga vai (pe fakamanatu ange kiate kinautolu ʻa e maʻuʻanga vai ʻi homou feituʻú). Fehuʻi ki he kau akó pe ko e hā ʻe hoko kiate kinautolu ʻoku fakafalala ki he tānakiʻanga vaí kapau ʻe maha.

Fakaafeʻi e kau akó ke nau sio ʻi he foʻi vitiō “Self-Care Made Simple” (3:40), ʻo kumi e founga ʻe lava ke fakafehoanaki ai ʻetau feinga ke tauhi kitautolú ki hono fakafonu ha tānakiʻanga vai ʻe lava ke fakaʻaongaʻi ke tokoniʻi e niʻihi kehé.

Hili e mamata ʻa e kau akó ʻi he vitioó, te ke lava ʻo kole ange ke nau ako ʻa e ngaahi potufolofola ko ʻení pea aleaʻi ʻa e meʻa ʻoku nau ako fekauʻaki mo hono tokoniʻi ʻo e niʻihi kehé.

• Mōsaia 4:26–27 (Ngaahi akonaki ʻa e Tuʻi ko Penisimaní fekauʻaki mo hono tokoniʻi ʻo e masivá mo e faingataʻaʻiá)

• Luke 22:31–32 (Ko e faleʻi ʻa Sīsū Kalaisi kia Pita fekauʻaki mo hono teuteuʻi ia ke tokoniʻi ʻa kinautolu ʻoku nau feohí)