“Lēsoni 181—Tui kia Sīsū Kalaisi ke Tanumaki ʻa e Moʻui Fakafalala Pē Kiate Kitá: Ko Hono Ikunaʻi ʻa e Ngaahi Faingataʻá ʻo fakafou ʻi he ʻEikí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tui kia Sīsū Kalaisi ke Tanumaki ʻa e Moʻui Fakafalala Pē Kiate Kitá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 181: Ko Hono Tanumaki ʻa e Moʻui Fakafalala Pē Kiate Kitá
Tui kia Sīsū Kalaisi ke Tanumaki ʻa e Moʻui Fakafalala pē Kiate Kitá
Ko Hono Ikunaʻi ʻa e Ngaahi Faingataʻá ʻo fakafou ʻi he ʻEikí
Makehe mei hono tāpuekina ʻaki kitautolu ʻa e fakamolemolé mo e fakamoʻui mei he angahalá, ʻe lava ke tāpuekina kitautolu ʻe he Fakamoʻuí ʻi he ngaahi tūkunga hangē ko e akó, ngāué, mo e ngaahi vā fetuʻutakí. ʻI he taimi ʻoku tau tui ai kia Sīsū Kalaisí, ʻoku tau fakaafeʻi Ia ke tokoni ke tau moʻui fakafalala ange kiate kitautolu ʻi he tapa kotoa pē ʻo ʻetau moʻuí. ʻOku fakataumuʻa ʻa e lēsoni ko ʻení ke tokoniʻi ʻa e kau akó ke nau ngāue ʻaki ʻa e tui kia Sīsū Kalaisí ke tanumaki ʻa e moʻui fakafalala pē kiate kitá.
Ngaahi ʻEkitivitī Ako ʻOku Ala Fakahokó
Hiki ʻo e ʻotu moʻungá
Fakakaukau ke tā ha moʻunga ʻi he palakipoé pea fakaafeʻi ʻa e kau akó ke tā ha moʻunga tatau ʻi heʻenau tohinoa akó, ʻo meimei ʻufiʻufi ʻa e konga ki ʻolunga ʻo e peesi ʻe tahá. Talaange ki he kau akó ke nau fakakaukauloto ʻoku tuʻu ʻa e moʻungá ʻi honau vahaʻá mo hono tanumaki ʻo e moʻui fakafalala fakalaumālie mo fakatuʻasino pē kiate kitá. (Kapau ʻoku fiemaʻu ʻe he kau akó ha tokoni ke mahino ʻa e ʻuhinga ʻo e moʻui fakafalala pē kiate kitá, vahevahe ange ʻoku kau ai ʻa e ngaahi meʻa hangē ko hono maʻu honau mālohinga fakalaumālié, maʻu ha ako, mo e maʻu ha paʻanga feʻunga ke feau ʻaki ʻenau ngaahi fiemaʻú.)
Kole ange ke nau hiki ʻi he loto moʻungá ha niʻihi ʻo e ngaahi faingataʻa ʻoku nau fehangahangai mo iá ʻa ia ʻoku faingataʻa ai ke nau tanumaki ʻa e moʻui fakafalala pē kiate kitá ʻi he ngaahi tafaʻaki kehekehe ʻo ʻenau moʻuí. (Mahalo ʻe kau ʻi he ngaahi sīpingá ʻa e siʻisiʻi ʻa e ngāue maʻuʻanga moʻuí, ngaahi faingamālie fakaakó, moʻui leleí, pe poupou ʻoku fiemaʻu mei he niʻihi ʻoku nau ʻofa aí.) Fakaafeʻi ha kau ako ʻoku nau loto ke hiki ha niʻihi ʻo e ngaahi faingataʻa ʻoku nau fehangahangai mo iá ʻi he moʻunga naʻá ke tā ʻi he palakipoé.
-
ʻOku lava fēfē ke hangē ʻa e ngaahi faingataʻa ʻi he moʻuí ʻi he taimi ʻe niʻihi ko ha ʻotu moʻungá?
-
Ko e hā ha ngaahi founga ʻoku tali ʻaki ʻe he kakaí ʻa e faʻahinga faingataʻa ko ʻení?
Te ke lava ʻo fakaafeʻi e kau akó ke fakalaulauloto ki he founga ʻoku nau palani ke fehangahangai ai mo e ngaahi fakafeʻātungia ki hono maʻu ʻo e moʻui fakafalala pē kiate kitá. Fakaafeʻi kinautolu ʻi he lolotonga ʻo e lēsoní ke nau fekumi ʻi he faʻa lotu ki he founga ke maʻu ai ha mālohi mei he Fakamoʻuí ke ikunaʻi ʻaki ʻa e ngaahi faingataʻa ʻoku nau fehangahangai mo iá.
Ko hono fakaafeʻi ʻa e mālohi ʻo e Fakamoʻuí ki heʻetau moʻuí
Naʻe ʻomi ʻe Palesiteni Lāsolo M. Nalesoni ʻa e faleʻi ko ʻení kiate kinautolu ʻoku nau fehangahangai mo ha ngaahi pole faingataʻa ʻi heʻenau moʻuí.
Siʻoku kāinga ʻofeina, ʻoku ou kole kiate kimoutolu … ke mou kamata ʻi he ʻahó ni ke fakatupulaki hoʻomou tuí. ʻE fakatupulaki ʻe Sīsū Kalaisi hoʻo malava ke ikunaʻi ʻa e ngaahi faingataʻa ʻi hoʻo moʻuí makatuʻunga ʻi hoʻo tuí, neongo ʻe ngali fuʻu lahi hoʻo ngaahi faingataʻa fakatāutahá ʻo hangē ko e Moʻunga ko ʻEvalesí. …
ʻE kehekehe pē hoʻo ngaahi palopalemá, ka ko e tali ki hoʻo ngaahi faingataʻaʻia takitaha ko hono fakatupulaki pē hoʻo tuí. (Russell M. Nelson, “Kuo Toetuʻu ʻa Kalaisi; ʻE Hiki e Ngaahi Moʻungá ʻi he Tui Kiate Iá,” Liahona, Mē 2021, 102–3)
-
Te ke fakamatalaʻi fakanounou fēfē ʻa e meʻa ʻoku akoʻi ʻe Palesiteni Nalesoní?
ʻE lava ke ʻomai ʻe he kau akó ha ngaahi fakamatala fakanounou kehekehe. Ko e moʻoni mahuʻinga ʻe taha ko e taimi ʻoku tau fakatupulaki ai ʻetau tui kia Sīsū Kalaisí, te Ne fakatupulaki ʻetau malava ke ikunaʻi ʻa e ngaahi faingataʻá.
-
ʻE lava fēfē ke fakaʻaongaʻi ʻa e ngaahi akonaki ko ʻeni meia Palesiteni Nalesoní ʻi heʻetau feinga ke maʻu ʻa e moʻui fakafalala pē kiate kitá ʻi heʻetau moʻuí?
Fakakaukauloto ʻoku ʻi ai haʻo kaungāmeʻa ʻokú ne fiemaʻu ha kiʻi tokoni ke tui ʻe tokoniʻi moʻoni kinautolu ʻe Sīsū Kalaisi ʻi he ngaahi faingataʻa ʻi heʻenau moʻuí. Kumi ha potufolofola fakataukei fakatokāteline mei ha faʻahinga tohi folofola pē te ne lava ʻo tokoniʻi kinautolu ke nau ongoʻi ʻa e holi mo e mālohi ʻo Sīsū ke tokoní.
ʻE ala kau ʻi he ngaahi potufolofola fakataukei fakatokāteline ʻe ala maʻu ʻe he kau akó ʻa e:
-
Lea Fakatātā 3:5–6: “Falala [ki he ʻEikí] ʻaki ho lotó kotoa … pea ʻe fakatonutonu ʻe Ia ho ngaahi ʻalungá.”
-
Mātiu 11:28–30: “Haʻu kiate au ʻakimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.”
-
Sēmisi 1:5–6: “Ka ai hamou taha ʻoku masiva ʻi he potó, ke kole ʻe ia ki he ʻOtuá.”
-
1 Nīfai 3:7: “Te u ʻalu ʻo fai ʻa e ngaahi meʻa kuo fekau ʻe he ʻEikí.”
-
2 Nīfai 28:30ʻE “foaki [ʻe he ʻOtuá] ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
-
ʻEta 12:27: Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”
-
Tokāteline mo e Ngaahi Fuakava 6:36: “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.”
-
Ko e hā ʻa e ngaahi kupuʻi lea naʻá ke filí? ʻE tokoni fēfē ʻa e potufolofola ko iá ke mahino ki ho kaungāmeʻá ʻa e finangalo mo e mālohi ʻo e Fakamoʻuí ke tokoniʻi kinautolú?
-
Ko e hā ha aʻusia fakataautaha te ke lava ʻo vahevahe ke tokoniʻi ho kaungāmeʻá ke ne ʻiloʻi ʻoku finangalo lelei mo malava ʻa Sīsū ke tokoniʻi kitautolu?
Fakakaukau ke fakaafeʻi ʻa e kau akó ke nau faʻu ha kōlomu ʻe ua ʻi lalo ʻi he moʻunga ʻi heʻenau peesi tohinoá. ʻI ʻolunga ʻi ha kōlomu ʻe taha, te nau lava ʻo tohiʻi ai “Ko hoku fatongia ʻi hono tanumaki ʻa e moʻui fakafalala pē kiate kitá.” ʻI ʻolunga ʻi he kōlomu ʻe tahá, te nau lava ʻo tohiʻi ai ʻa e “Founga ʻe lava ke tāpuekina ai au ʻe he Fakamoʻuí.”
ʻE lava ke ke fakaʻaliʻali pe tufaki ha ngaahi tatau ʻo e fakamatala ko ʻení. Fakaafeʻi ʻa e kau akó ke nau lau ia, ʻo kumi ʻa e meʻa te nau lava ʻo tānaki ki he ongo kōlomú fakatouʻosi. ʻE lava ke ngāue fakafoʻituitui, tauhoa, pe fakakulupu iiki ʻa e kau akó.
Naʻe fakamatalaʻi ʻe Pīsope W. Kulisitofā Uātela ʻo e Kau Pīsopeliki Pulé ʻa e founga ʻoku ngāue fakataha ai ʻetau ngaahi ngāué mo e tui ki he ʻEikí.
Talu mei he kamataʻanga ʻo e taimí, mo hono ʻomi maʻu pē ʻe he ʻEikí ha fakahinohino ki Hono kakaí ke nau mateuteu fakalaumālie mo fakatuʻasino ki he ngaahi fakatuʻutāmaki mo e ʻahiʻahi ʻokú Ne ʻafioʻi ʻe hoko mai ko ha konga ʻo e aʻusia ʻo e moʻui fakamatelié ni. Ko e ngaahi fakatuʻutāmaki ko ʻení ʻe lava pē ko ha ngaahi meʻa fakataautaha pe fakalūkufua hono natulá, ka ʻe ʻomi ʻe he fakahinohino ʻa e ʻEikí ha maluʻi mo ha poupou ʻo fakatatau ki he meʻa ʻoku tau tokanga ki aí pea fakahoko ʻEne faleʻí. …
ʻOku ʻikai ʻamanaki mai ʻa e ʻEikí ke tau fakahoko ha meʻa ʻo lahi ange ʻi he meʻa te tau malavá, ka ʻokú Ne ʻamanaki mai ke tau fakahoko ʻa e meʻa te tau malavá, ʻi he taimi te tau lava aí. …
ʻOku ʻuhinga ʻa e mateuteu fakatuʻasino mo e moʻui fakafalala pē kiate kitá ki he “tui te tau lava ʻo maʻu ʻa e ngaahi fiemaʻu fakalaumālie mo fakatuʻasino kotoa pē ʻo e moʻuí ʻoku tau fiemaʻu maʻatautolu mo hotau fāmilí, ʻo fakafou ʻi he ʻaloʻofa, pe mālohi fakaivia ʻo Sīsū Kalaisí mo ʻetau ngaahi ngāué.” (W. Christopher Waddell, “Naʻe ʻi ai ʻa e Mā,” Liahona, Nōvema 2020, 42–43, 44)
Vahevahe ʻa e kau akó ki ha ngaahi kulupu tautau toko ua pe toko tolu pea fakakakato ʻa e ʻekitivitī mo e fealēleaʻaki ko ʻení. ʻE lava ke kau ʻi he ngaahi sīpinga ʻe niʻihi ʻoku ʻiloʻi ʻe he kau akó ʻa e fiemaʻu ʻe Siosefa Sāmita ha ngaahi tali ke maʻu ha mālohi fakalaumālie lahi angé (vakai, Siosefa Sāmita—Hisitōlia 1:8–20) mo e tokoua ʻo Sēletí ʻi heʻene fiemaʻu ke ne feau ʻa e ngaahi fiemaʻu fakatuʻasino hono fāmilí lolotonga ʻenau fononga ki he fonua ʻo e talaʻofá (vakai, ʻEta 2:18–3:6).
Kumi ha fakamatala mei he folofolá pe hisitōlia ʻo e Siasí ʻo ha taha naʻá ne fakaʻaongaʻi fakatouʻosi ʻene ngaahi ngāué mo e tui kia Sīsū Kalaisí ke ikunaʻi ʻa e ngaahi meʻa ʻokú ne fakafeʻātungiaʻi ʻenau fakalakalaká.
-
Ko e hā ʻa e faingataʻa naʻa nau fehangahangai mo iá?
-
Ko e hā ha ngaahi ngāue fakataautaha naʻa nau fai ke ikunaʻi ʻaki ʻa e faingataʻá?
-
Naʻe tokoniʻi fēfē kinautolu ʻe he ʻEikí koeʻuhí ko ʻenau tuí?
ʻI he ʻosi ʻa e fealēleaʻaki fakakulupú, fakaafeʻi ha mēmipa ʻo e kulupu takitaha ke ne hiki ʻi he palakipoé ʻa e hingoa ʻo e tokotaha mei he folofolá pe hisitōlia ʻo e Siasí naʻa nau fakakaukau ki aí ʻi he tumutumu ʻo e moʻungá.
Aleaʻi fakakalasi ʻa e fehuʻi ko ʻení.
-
Ko e hā naʻá ke ako mei he kakai ko ʻení te ke lava ʻo fakaʻaongaʻi ki hoʻo ngaahi feinga ke fakatupulaki ʻa e moʻui fakafalala pē kiate kitá ʻi he tokoni ʻa e Fakamoʻuí?
ʻE founga fēfē nai ha hoko ʻeni ʻi he moʻui fakaʻahó?
Tokoni ke mahino ki he kau akó ʻa e founga te nau ala fakahoko ai ha ngāue fakapotopoto lolotonga ʻenau tui ki he Tamai Hēvaní mo e Fakamoʻuí ke tāpuekina ʻenau ngaahi ngāué. Te ke lava ʻo fakaafeʻi ʻa e kau akó ke nau fili ha taha ʻo e ngaahi tūkunga ko ʻení pea fakakaukau ki he founga ʻe lava ke fakaʻaongaʻi ai ʻe he tokotaha fakafoʻituituí ʻa e tui kia Sīsū Kalaisí ʻi heʻenau ngāue ke moʻui fakafalala lahi ange kiate kinautolú.
-
ʻOku loto ha talavou ke ngāue fakafaifekau mo ako ka ʻoku ʻikai ke ne maʻu ha paʻanga feʻunga ke fai ʻaki ha taha ʻo kinaua.
-
ʻOku ʻi ai ha finemui ʻoku ʻi ai haʻane ngaahi palopalema fakaemoʻui lelei ʻa ia ʻokú ne taʻofi ia mei he ngaahi ngāue lahi ʻoku lava ke maʻu ʻe he niʻihi kehé.
-
ʻOku fehangahangai ha talavou mo ha loto-hohaʻa mātuʻaki tōtuʻa. ʻOku faingataʻa ʻaupito kiate ia ʻa e ngaahi tūkunga fakasōsialé, kau ai ʻa e akó mo ʻene ngāue maʻuʻanga moʻuí.
-
ʻOku fiemaʻu ʻe ha finemui ke lavameʻa ʻi he akó ka ʻoku ʻikai lava ke ne ako lelei ʻo hangē ko e tokolahi hono kaungā akó. Ko hono olá, naʻá ne hohaʻa naʻa ʻikai tali ia ki he ʻunivēsiti ʻokú ne ʻamanaki ke ako aí.
Fakakaukau ke ke fakaʻaongaʻi ha ngaahi fehuʻi hangē ko ʻení ke tokoni ke aleaʻi ʻe he kau akó ʻa e ngaahi tūkunga ko ʻení:
-
Ko e hā ha ngaahi ngāue ʻe ala fai ʻe he tokotaha ko ʻení ke tali ʻaki ʻenau palopalemá ʻi ha founga ʻoku fakaʻatā ai ʻa e ʻEikí ke tokoniʻi kinautolú?
-
Ko e hā ha meʻa te nau ala fakahoko ke ngāue ʻaki ai ʻa e tui kia Sīsū Kalaisí?
-
Ko hai te nau lava ʻo fealēleaʻaki mo iá? ʻE lava fēfē ʻe hono fai ʻení ʻo fakaafeʻi mai ʻa e tokoni ʻa e ʻEikí?
Kapau ʻoku fiemaʻu tokoni ʻa e kau akó ki hono tali ʻa e fehuʻi fakaʻosí, fakakaukau ke fokotuʻu ange ʻe lava ke fealēleaʻaki ʻa kinautolu ʻi he ngaahi tūkungá mo e mātuʻá, kau takí, mo e kau mataotaó. ʻIkai ngata aí, te nau lava ʻo fealēleaʻaki mo e Tamai Hēvaní ʻo fakafou ʻi he lotú ki he founga lelei taha ke tali ʻaki honau tūkungá.
Fakaʻaongaʻi ki hoʻo moʻuí
Te ke lava ʻo fakaafeʻi ʻa e kau akó ke nau fakakaukauloto ki he founga ʻe lava ke tākiekina honau ngaahi tūkunga lolotongá mo e kahaʻú fakatouʻosi ʻe he fili ke fakaʻaongaʻi ʻa e tui kia Sīsū Kalaisí. Fakaafeʻi leva kinautolu ke nau fakakaukau pea tali ʻa e ngaahi fehuʻi ko ʻení ʻi heʻenau tohinoá:
-
Ko e hā ha tafaʻaki ʻi hoʻo moʻuí ʻokú ke fie moʻui fakafalala lahi ange ai kiate koe?
-
Ko e hā te ke lava ʻo fai ke ikunaʻi ʻa e ngaahi faingataʻa te ke ala fehangahangai mo iá?
-
Te ke lava fēfē ʻo ngāue ʻi he tui kia Sīsū Kalaisi ʻi hoʻo fekumi ki ha tokoni ʻokú ke fiemaʻú?