“Lēsoni 182—Ko Hono Tokangaʻi Fakapotopoto ʻo e Ngaahi Maʻuʻanga Tokoni Fakapaʻangá: Ko e Feinga ke Tanumaki ʻa e Moʻui Fakafalala Fakapaʻanga pē Kiate Kitá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Tokangaʻi Fakapotopoto ʻo e Ngaahi Maʻuʻanga Tokoni Fakapaʻangá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 182: Ko Hono Tanumaki ʻo e Moʻui Fakafalala pē Kiate Kitá
Ko Hono Tokangaʻi Fakapotopoto ʻo e Ngaahi Maʻuʻanga Tokoni Fakapaʻangá
Ko e Feinga ke Tanumaki ʻa e Moʻui Fakafalala Fakapaʻanga pē Kiate Kitá
ʻOku maʻu ʻe he toʻu tupú ha ngaahi faingamālie lahi ʻi he kahaʻú ʻoku haʻu mo ha ngaahi fatongia fakapaʻanga, hangē ko e ngāue fakafaifekaú, akó, pe kamata ha fāmilí. ʻI he falala ʻa e toʻu tupú kia Sīsū Kalaisi, pea muimui ki he ngaahi tefitoʻi moʻoni fakapaʻanga fakapotopotó, ʻoku nau fakaafeʻi ai ʻa e tāpuaki ʻa e ʻOtuá ke feau ʻenau ngaahi fiemaʻú (vakai, Tokāteline mo e Ngaahi Fuakava 104:15). ʻE lava ke tokoni ʻa e lēsoni ko ʻení ke mahino ki he kau akó ʻa e founga ke fakaʻaongaʻi ai ʻa e tui ki he ʻOtuá ʻi heʻenau tanumaki ʻa e moʻui fakafalala fakapaʻanga pē kiate kitá.
Ngaahi ʻEkitivitī Ako ʻOku Ala Fakahokó
Ko e fakakaukau atu ki he kahaʻú
Fakaafeʻi e kau akó ʻi ha ngaahi hoa pe kulupu iiki, ke nau vahevahe ha ngaahi taumuʻa lalahi te nau ala maʻu ʻi he taʻu ʻe 10 pe 15 ka hokó. Hangē ko ʻení, te nau lava ʻo vahevahe kapau te nau palani ke ngāue fakafaifekau, feituʻu te nau fie hoko atu ki ai ʻi heʻenau akó, pe ko ʻenau ngaahi holi fekauʻaki mo e nofo-malí mo e fāmilí. Hili ʻa e vahevahe ʻa e kau akó, fakakaukau ke aleaʻi fakakalasi ʻa e fehuʻi ko ʻení:
-
Ko e fē ʻi hoʻo ngaahi taumuʻá ʻoku fiemaʻu ki ai ha teuteu fakapaʻanga?
-
ʻOkú ke pehē ko e fē taimi lelei taha ke kamata faʻu ai ha ngaahi palani fakapaʻanga ki ho kahaʻú? Ko e hā hono ʻuhingá?
Mahalo te ke fie mateuteu ke vahevahe nounou ʻa e ngaahi fakamole angamaheni ki he ngāue fakafaifekaú, ako fakaʻatamaí, pe ngaahi fakamole ʻo e nofo ʻi homou feituʻú. (Manatuʻi ʻoku ʻikai ko e taumuʻa ʻo e lēsoni ko ʻení ke ʻomi ʻa e lahi ʻo e ngaahi fakamole ki he meʻa kotoa pē, ka ke tokoniʻi ʻa e kau akó ke nau fekumi faivelenga kia Sīsū Kalaisi mo fakafeʻiloaki kiate kinautolu ʻa e ngaahi tefitoʻi moʻoni tefito ʻo e fatongia tokangaʻi ʻo e meʻa fakapaʻangá.)
Fakaafeʻi e kau akó ke nau tali ʻa e fehuʻi ko ʻení ʻi heʻenau tohinoa akó:
-
Ko e hā ʻa e lahi hoʻo falala ki ho kahaʻu fakapaʻangá? Ko e hā hono ʻuhingá?
ʻI he lēsoni ko ʻení, fekumi ʻi he faʻa lotu ki he tokoni ʻa e Tamai Hēvaní ke mahino ʻa e ngaahi tefitoʻi moʻoni ʻe lava ʻo tokoni atu ʻi he taimí ni mo e kahaʻú ke tokangaʻi fakapotopoto hoʻo ngaahi meʻa fakapaʻangá.
Ngaahi talaʻofa mei he ʻEikí
ʻI he 1834, naʻe faingataʻaʻia fakapaʻanga ai ʻa e Siasí, ko ha konga ʻo e ʻuhingá, ko hono langa ʻo e Temipale Ketilaní mo e ngaahi ngāue māʻoniʻoni kehé. Naʻe ʻoange ʻe he ʻEikí ha faleʻi ʻe lava foki ke fakaʻaongaʻi ia kiate kitautolu ʻi heʻetau fehangahangai mo e ngaahi fatongia fakapaʻanga ke aʻusia ʻetau ngaahi holi māʻoniʻoní.
Lau ʻa e Tokāteline mo e Ngaahi Fuakava 104:13–17, 78–79. Fakakaukau ki he founga ʻe lava ke felāveʻi ai ʻa e ngaahi akonaki ʻa e ʻEikí ki hoʻo ngaahi meʻa fakapaʻangá.
-
Ko e hā naʻá ke ako ʻe lava ke fakaʻaongaʻi ki heʻetau ngaahi fiemaʻu fakapaʻangá?
-
Ko e hā ha ngaahi foʻi lea pe kupuʻi lea ʻe lava ʻo tokoni ki ha taha ke falala ki he ʻEikí ʻi hono tokangaʻi ʻenau ngaahi meʻa fakapaʻangá?
ʻE lava ke vahevahe ʻe he kau akó ha ngaahi fakakaukau kehekehe, kau ai ʻa e moʻoni ko ʻení: ʻE feau ʻe he ʻEikí ʻetau ngaahi fiemaʻú kapau te tau muimui faivelenga ki Heʻene faleʻí.
-
Ko e hā ʻe ala fakalotolahi ai ʻa e foʻi moʻoni ko ʻení ʻi hoʻo feinga ke mateuteu fakapaʻanga ki ho kahaʻú?
Kapau ʻe fiemaʻu, tokoni ke mahino ki he kau akó ʻoku ʻikai talaʻofa mai ʻe he ʻEikí ha tauʻatāina mei he ngaahi faingataʻa fakapaʻangá pe ngaahi faingataʻa kehé. Ka neongo ia, ʻoku ʻafioʻi ʻe he ʻEikí ʻa e meʻa ʻoku tau fiemaʻú; ʻi heʻetau faivelengá, te Ne tokonaki maʻatautolu ʻo fakatatau ki Hono finangaló mo ʻEne taimí.
Ko e ngaahi tefitoʻi moʻoni fakapaʻanga ʻa e ʻEikí
Fakamatala ange kuo ʻomi ʻe he ʻEikí ʻa e faleʻi ʻo fakafou ʻi he ngaahi folofolá mo e kau taki ʻo Hono Siasí, ke tokoniʻi kitautolu ke tau fakaʻaongaʻi fakapotopoto hotau ngaahi tāpuaki fakamāmaní, kau ai ʻetau ngaahi meʻa fakapaʻangá. Ke tokoni ke mahino ki he kau akó ʻa e faleʻi ʻa e ʻEikí, fakakaukau ke fakaafeʻi kinautolu ke nau fili ha taha ʻo e ngaahi potufolofola ko ʻení ke nau ako. ʻI heʻenau ʻosí, te nau lava ʻo tānaki fakataha mo e kau ako ne nau ako ʻa e ngaahi potufolofola kehé pea vahevahe ʻa e meʻa ne nau akó.
Lau ʻa e ngaahi veesi ko ʻení pea feinga ke ʻiloʻi ʻa e ngaahi tefitoʻi moʻoni ʻoku akoʻi ʻe he ʻEikí ʻe lava ʻo tokoni ki ha tokotaha taʻu hongofulu tupu ke teuteu ki honau kahaʻu fakapaʻangá.
-
Tokāteline mo e Ngaahi Fuakava 48:4 (ʻI he taimi ko ʻení, naʻe fiemaʻu ke fakatau ʻe he Kāingalotú ha kelekele, kae mahalo te tau fakatatau ʻeni ki hotau ngaahi fatongia ʻi he kahaʻú.)
ʻI he ʻosi ʻa e fevahevaheʻaki ʻa e kau akó, fakakaukau ke fai ha ngaahi fehuʻi hangē ko ʻení:
-
ʻE tokoniʻi fēfē koe ʻe he ngaahi tefitoʻi moʻoni ʻi he ngaahi potufolofola ko ʻení ke ke fakaʻaongaʻi ʻa e tui kia Sīsū Kalaisí ʻi hoʻo teuteu ki hoʻo ngaahi fiemaʻu fakapaʻangá?
-
ʻOkú ke pehē ko e hā ʻoku hoko ai ʻa e totongi vahehongofulú ko ha konga mahuʻinga ʻo hono tokangaʻi ʻetau ngaahi meʻa fakapaʻangá? (vakai, Malakai 3:8–10).
-
Makehe mei he totongi vahehongofulú, ko e hā ha ngaahi founga ʻe lava ke tau fakamuʻomuʻa ai ʻa e fekumi ki he puleʻanga ʻo e ʻOtuá ʻi he fekumi ki he koloá?
-
ʻE lava fēfē ʻe hono fakatupulaki ʻo e ʻulungaanga fakahū ha paʻangá ʻi hoʻo kei talavoú ʻo faitāpuekina koe ʻi hoʻo moʻuí kotoa?
Ngaahi meʻa fakapaʻanga ʻoku fakamuʻomuʻá
ʻOku fakafofongaʻi ʻe he ngaahi ʻīmisi ko ʻení ha ngaahi meʻa ne hoko pe ngaahi fili ʻoku fekauʻaki mo e ngaahi meʻa fakapaʻangá. ʻE lava ke tokoni hono tuku ki he kau akó ke nau fakakaukau ki he fakahokohoko ʻo e ngaahi meʻa ʻoku hoko pe ngaahi fili ko ʻení ke nau ʻiloʻi ai ʻa e ngaahi meʻa ke fakamuʻomuʻá ʻi he taimi ʻoku fai ai ha fili ki he meʻa fakapaʻangá. Fakakaukau ke paaki ʻa e ngaahi ʻīmisí, kosi ʻo toʻo takitaha ʻa e ngaahi faʻahinga ʻe nimá, pea fakapipiki kinautolu ki he palakipoé ʻi ha hokohoko kehekehe. Fakaafeʻi ʻa e kau akó ke nau aleaʻi ʻa e hokohoko ʻoku nau pehē ʻoku totonu ke ʻi ai ʻa e ngaahi faʻahingá. Ko ha founga ʻe taha ko hono paaki mo kosi ha ngaahi tatau feʻunga ʻo e fakatātā ko ʻení ki he fanga kiʻi kulupu iiki ʻo e kau akó ke fokotuʻutuʻu ʻi he hokohoko totonú pea aleaʻi fakataha. Mahalo ʻe tokoni ke fakamahinoʻi ange neongo ʻoku ngali mahino ʻoku totonu ke ʻuluaki maʻu mai ʻa e paʻanga hū maí ʻi he tūkunga moʻoni ʻo e moʻuí, ka ʻoku tokolahi ha kakai ʻoku nau nō mo fakamoleki ha paʻanga kimuʻa pea nau toki maʻu iá. ʻOku ui ʻeni ko e fakamoʻua, pea ʻoku totonu ke tau feinga ke fakaʻehiʻehi mei ai.
Pe, te ke lava ʻo fakaafeʻi ʻa e kau akó ke nau hiki ha ngaahi fakamole angamaheni ʻoku nau maʻu ʻi he taimí ni pe te nau ala maʻu ʻi he kahaʻú ʻi he palakipoé. ʻE lava ke fakaafeʻi fakakalasi pe fakakulupu ʻa e kau akó ke fakahokohoko ʻa e ngaahi fakamolé mei he meʻa mahuʻinga tahá ki he meʻa mahuʻinga siʻisiʻi tahá, ʻo fakaʻaongaʻi ʻa e ngaahi tefitoʻi moʻoni ne nau toki ako ʻi he ʻekitivitī fakafolofola kimuʻá.
-
Te ke fakamuʻomuʻa fēfē ʻa e ngaahi meʻa fakapaʻanga pe ngaahi fili ko ʻení? Ko e hā naʻá ke ako mei he ngaahi akonaki ʻa e ʻEikí ʻi he folofolá ke poupouʻi hoʻo talí?
-
Ko e hā ha ngaahi faingataʻa ʻe lava ke tupu mei he ʻikai hokohoko totonu ʻetau ngaahi meʻa fakapaʻangá?
-
Ko e hā te ke talaange ki ha taha ʻokú ne ongoʻi ʻoku totonu ke fakamuʻomuʻa ʻenau fakamole lolotonga ki heʻenau nofó ʻi he totongi vahehongofulú?
Fakakaukau ke kole ki he kau akó ke nau vahevahe ʻa e founga kuo tāpuekina ai kinautolu pe ko e kau mēmipa honau fāmilí ʻe he ʻEikí ʻi heʻenau fakamuʻomuʻa ʻa e vahehongofulú ʻi he ngaahi fakamole kehé. ʻI ha sīpinga ʻe taha, te ke lava ʻo vahevahe ʻa e aʻusia ʻa ʻEletā Valeli V. Kōtoni ʻo e Kau Fitungofulú ʻi heʻene lea “Ko e Lea Fakafonua ʻo e Ongoongoleleí” mei he taimi 6:10 ki he 7:40, ʻoku maʻu ʻi he ChurchofJesusChrist.org.
Fakakaukau ke aleaʻi ʻa e fakamatala ʻi lalo meia ʻEletā Sitenilī G. ʻĒlisí.
Kapau ʻe ʻaonga, fakakaukau ke tuku ha taimi ke akoʻi ai ʻa e kau akó ki he founga hono totongi ʻo e vahehongofulú mo e ngaahi foakí ʻaki ha laʻipepa vahehongofulu pe ʻi he ʻinitanetí ʻi he donations.ChurchofJesusChrist.org.
Naʻe fehuʻi ʻe ʻEletā Sitenilī G. ʻĒlisi ʻo e Kau Fitungofulú ʻa e meʻá ni fekauʻaki mo e totongi vahehongofulú:
ʻOku tau maʻu nai ʻa e tui ke falala ki Heʻene ngaahi talaʻofa [ʻa e ʻEikí] fekauʻaki mo e vahehongofulú te tau iku lelei ange kitautolu ʻi he peseti ʻe 90 ʻo ʻetau tupú fakatahaʻi mo e tokoni ʻa e ʻEikí, kae ʻikai ko e peseti ʻe 100 ʻo ʻetau tupu fakataʻú ʻiate kitautolu peé? (Stanley G. Ellis, “ʻOku Tau Falala Nai Kiate Ia? ʻOku Lelei e Faingataʻá,” Liahona, Nōvema 2017, 114)
Ke fakaʻaliʻali ki he kau akó ha sīpinga ʻo ha kakai ʻoku nau moʻui ʻaki ʻa e ngaahi tefitoʻi moʻoni ʻi he lēsoni ko ʻení, fakakaukau ke vahevahe ʻa e “Fononga ʻa Setilikí” (2:32) ʻoku maʻu ʻi he ChurchofJesusChrist.org.
Te ke lava ʻo tokoni ke mahino ki he kau akó kuo ʻomi ʻe he ʻEikí ha ngaahi founga ke tokoni ai ki hotau kahaʻu fakapaʻangá ʻa ia ʻoku ʻikai ʻoatu ʻi he lēsoni ko ʻení. Hangē ko ʻení, te Ne lava ʻo ueʻi fakalaumālie kitautolu ki ha ngaahi founga kehe ke maʻu pe fakahū ai ha paʻanga. ʻE lava ke talanoa ʻa e toʻu tupú ki heʻenau pīsopé pe kau takí fekauʻaki mo ha tokoni fakapaʻanga ki ha ngāue fakafaifekaú pe ngaahi founga maʻamaʻa ange ke fakahoko ai ha ako māʻolunga angé.
Fakaʻosí
ʻE lava ke fakaafeʻi ʻa e kau akó ke nau tali ʻa e ngaahi fehuʻi ko ʻení ʻi heʻenau tohinoa akó pe aleaʻi kinautolu mo hanau hoa:
-
Te ke fakamatalaʻi fakanounou fēfē ʻa e meʻa naʻá ke ako fekauʻaki mo hono tokangaʻi fakapotopoto hoʻo ngaahi meʻa fakapaʻangá?
-
Ko e hā ha meʻa ʻe taha ʻokú ke ongoʻi ʻoku finangalo ʻe he ʻEikí ke ke ako ʻi he ʻaho ní?
Fakakaukau ke fakaafeʻi ha kau ako ʻe niʻihi ke nau vahevahe ʻenau talí. Vahevahe hoʻo fakamoʻoni ki he finangalo ʻa e ʻEikí ke tokonaki maʻa Hono Kāingalotú (vakai, Tokāteline mo e Ngaahi Fuakava 104:15). Poupouʻi ʻa e kau akó ke nau falala ki he ʻOtuá pea fakakau Ia ʻi he ngaahi tuʻutuʻuni fakapaʻangá ʻi he kotoa ʻo ʻenau moʻuí.