Seminelí
Tuʻunga Moʻui Lelei Fakatuʻasinó mo Fakaelotó: Vakai Fakalūkufuá

“Tuʻunga Moʻui Lelei Fakatuʻasinó mo Fakaelotó: Vakai Fakalūkufuá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)

“Tuʻunga Moʻui Lelei Fakatuʻasinó mo Fakaelotó,” Tokāteline mo e Ngaahi Fuakava – Tohi Lēsoni ʻa e Faiako Seminelí

Tuʻunga Moʻui Lelei Fakatuʻasinó mo Fakaelotó

Tuʻunga Moʻui Lelei Fakatuʻasinó mo Fakaelotó

Vakai Fakalūkufuá

ʻI heʻetau fononga ʻi he moʻuí, ʻoku tau fehangahangai ai mo ha ngaahi tūkunga lahi ʻoku faingataʻa fakaeloto. Te tau lava ʻo tafoki ki he ʻEikí ke maʻu ha tokoni ke tau maʻu ha ivi matuʻuaki fakaeloto ʻoku lahi angé. ʻOku poupouʻi ʻe he ngaahi lēsoni ko ʻení ʻa e kau akó ke nau tokangaʻi honau sino fakamatelié; fakatupulaki ha ngaahi sīpinga fakakaukau lelei; fekumi ki he tokoni ʻa e ʻEikí ʻi he loto-mafasiá, loto-hohaʻá, loto-mamahí, mo e loto-taʻotaʻomiá; pea faʻu mo fakamālohia ʻa e ngaahi vā fetuʻutakí.

Fokotuʻu ki he vave hono akoʻí: ʻE lava ke akoʻi ʻa e ngaahi lēsoni ko ʻení ʻi ha faʻahinga taimi pē ʻi he taʻu fakaakó pe ʻi ha faʻahinga uike pē ʻi he taimi fakahokohoko ʻo hono akoʻi ʻo e Haʻu, ʻo Muimui ʻIate Aú. Ka neongo ia, mahalo ʻe lelei taha pē ke akoʻi vāofi ʻa e “Ko Hono Fakatupulaki ʻa e Ivi Fakaeloto ʻi he ʻEikí” pea mo e ngaahi lēsoni hokó. ʻE lava ke tokoni lelei ange ʻeni ki he kau akó ke nau ako mo akoako fakahoko e ngaahi taukei ʻoku fakapatonu ki he ngaahi lēsoni ko ʻení.

Teuteu ke Akoʻí

ʻOku ʻomi ʻe he fakamatala ko ʻení ha ngaahi fakakaukau ʻo e meʻa ʻe ala fiemaʻu ke teuteuʻi kimuʻa ‘i he lēsoni takitaha.

Ko Hono Tokangaʻi Hotau Sino Fakamatelié

Taumuʻa ʻo e lēsoní: Ke tokoni ki he kau akó ke fakahaaʻi ʻenau houngaʻia ki he Tamai Hēvaní mo Sīsū Kalaisi ʻaki hono tokangaʻi honau sino fakamatelié.

  • Teuteu ʻa e tokotaha akó: Fakaafeʻi e kau akó ke nau fakalaulauloto ki he ongo ʻoku nau maʻu fekauʻaki mo honau sinó pea mo e meʻa ʻoku nau fai ke tokangaʻi ʻaki kinautolú. Te nau lava foki ʻo fakalaulauloto ki he founga ʻoku uesia ai ʻe heʻenau ngaahi tōʻonga mo e ngāue ki honau sino fakamatelié ʻa ʻenau fiefiá, iví, ola leleí, mo e ngaahi vā fetuʻutaki mo e ʻOtuá.

  • Laʻipepa tufá: “Ko Hono Tokangaʻi Hotau Sino Fakamatelié”

Ko Hono Tanumaki ʻo e Ivi Fakaelotó ʻi he ʻEikí

Taumuʻa ʻo e lēsoní: Ke tokoni ke ongoʻi ʻe he kau akó ha loto-falala ʻe poupouʻi kinautolu ʻe he Fakamoʻuí ʻi heʻenau tanumaki ʻa e ivi fakatuʻasinó mo fakaelotó.

  • Teuteu ʻa e tokotaha akó: Fakaafeʻi e kau akó ke fakalaulauloto ki he ngaahi tūkunga faingataʻa fakaeloto ʻoku nau fehangahangai mo iá, pe te nau fehangahangai mo ia ʻi he kahaʻú, pea ko e hā te nau lava ʻo fai ʻi he ngaahi tūkunga ko iá. Mahalo te nau fie aleaʻi ʻenau ngaahi fakakaukaú mo ha mātuʻa pe mēmipa ʻo e fāmilí. Te ke lava ʻo fakamahinoʻi ange ʻe lava ke tokoni ha fakakaukau mei tuʻa ʻi he taimi ʻe niʻihi ʻi he fehangahangai mo e ngaahi faingataʻa fakaelotó.

Ko Hono Fakatupulaki ʻo e Ngaahi Sīpinga ʻo e Fakakaukau Moʻui Leleí

Taumuʻa ʻo e lēsoní: Ke tokoniʻi e kau akó ke fakatupulaki ʻenau ʻiloʻi ʻo ʻenau ngaahi fakakaukaú mo fokotuʻu ha ngaahi sīpinga ʻo e fakakaukau moʻui leleí.

Teuteu ʻa e tokotaha akó: Fakakaukau ke fakaafeʻi ʻa e kau akó ke nau tokanga pea hiki ʻa e faʻahinga fakakaukau ʻoku nau maʻu ʻi he taimi ʻoku nau tali ai ki ha ngaahi tūkunga faingataʻa pe feohi mo e niʻihi kehé.

Laʻipepa tufá: “Ko Hono Fakatonutonu ʻo e Ngaahi Fakakaukau Taʻeʻaonga pe ʻIkai Totonú”

Ko Hono Mapuleʻi ʻo e Loto-Mafasiá mo e Loto-Hohaʻá

Ngaahi taumuʻa ʻo e lēsoní: Ke tokoni ke ʻiloʻi mo akoako fakahoko ʻe he kau akó ʻa e ngaahi taukei ke tafoki ki he ʻEikí ke mapuleʻi ʻa e loto-mafasiá mo e loto-hohaʻá.

  • Teuteu ʻa e tokotaha akó: Fakaafeʻi e kau akó ke fakakaukau ki ha taimi ne nau ongoʻi mafasia pe hohaʻa ai fekauʻaki mo ha meʻa. Poupouʻi kinautolu ke fakalaulauloto ki he ngaahi lavameʻa mo e ngaahi faingataʻa kuo nau fekuki mo ia ʻi he fehangahangai mo e loto-mafasiá mo e loto-hohaʻá.

  • Laʻipepa tufá: “Tuʻunga ʻe Fā ʻo e Loto-Mafasiá”

Fekuki mo e Loto-Mamahí mo e Loto-Taʻotaʻomiá

Ngaahi taumuʻa ʻo e lēsoní: Ke tokoni ke mahino ki he kau akó ʻa e ngaahi founga te nau lava ai ʻo maʻu ha tokoni ki he ngaahi ongoʻi mamahí mo e loto-taʻomiá.

  • Teuteu ʻa e tokotaha akó: Ke teuteuʻi ʻa e kau akó ke nau ako ʻa e ngaahi founga totonu ke fehangahangai ai mo e mamahí mo e loto-taʻotaʻomiá, ʻoange ʻa e fakamatala ko ʻení: “ʻOku ou ʻiloʻi ʻa e founga ʻe lava ke tokoniʻi ai au ʻe he Tamai Hēvaní mo Sīsū Kalaisi ʻi he taimi ʻoku ou ongoʻi loto-mamahi pe loto-taʻotaʻomia aí.” Fakaafeʻi e kau akó ke nau vakaiʻi ʻi he faʻa lotu ʻa e tuʻunga lelei ʻo hono fakaʻaongaʻi ʻo e fakamatala ko ʻení kiate kinautolú pea mo ʻenau tuʻunga loto-falala ke lava ʻo vahevahe ia mo e niʻihi kehé.

  • Ngaahi meʻa ke fakaʻaliʻalí: Ko ha ʻīmisi pe vitiō ʻo e ngaahi peau ʻo e tahí

  • Laʻipepa tufá: “Kumi Tokoni”

Hoko ʻo Haohaoa ʻia Sīsū Kalaisi

Ngaahi taumuʻa ʻo e lēsoní: Ke tokoni ke mahino ki he kau akó ʻa e fakakaukau fehalaaki ʻoku fekauʻaki mo e feinga ke haohaoá mo e founga te nau lava ai ʻo tafoki ki he ʻEikí.

  • Teuteu ʻa e tokotaha akó: Fakaafeʻi ʻa e kau akó ke nau fakakaukau ki he founga te nau ala fakamatalaʻi ai ʻa e faikehekehe ʻo e feinga ke haohaoá mo e hoko ʻo haohaoa ʻia Kalaisí. Te nau lava ʻo fakalaulauloto ki he ngaahi founga te nau ala ongoʻi ʻoku ʻahiʻahiʻi ai kinautolu ke nau fakakaukau kuo pau ke nau haohaoa ʻiate kinautolu pē.

  • Vitiō: “Self-Compassion” (2:58); “Ko e Ututaʻu ʻOku ʻIkai Haohaoá” (11:01; mamata mei he taimi 2:37 ki he 3:04)

  • Laʻipepa tufá: “Ko e Hoko ʻo Haohaoa ʻia Sīsū Kalaisí”

Ko Hono Fakatupulaki ha Ngaahi Vā Fetuʻutaki ʻoku Moʻui Leleí

Ngaahi taumuʻa ʻo e lēsoní: Ke tokoniʻi ʻa e kau akó ke nau fekumi ki he tokoni ʻa e ʻEikí ke fokotuʻu ha ngaahi vā fetuʻutaki ʻoku tokoni ki heʻenau moʻui lelei fakalūkufuá mo e tuʻunga leleí.