“Lēsoni 187—Ko Hono Mapuleʻi ʻo e Loto-Mafasiá mo e Loto-Hohaʻá: ʻE Lava ke Fakamālohia Kitautolu ʻe Sīsū Kalaisi,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Mapuleʻi ʻo e Loto-Mafasiá mo e Loto-Hohaʻá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 187—Moʻui Lelei Fakaesino mo Fakaelotó
Ko Hono Mapuleʻi ʻo e Loto-Mafasiá mo e Loto-Hohaʻá
ʻE Lava ke Fakamālohia Kitautolu ʻe Sīsū Kalaisi
ʻOku tau ongoʻi loto-mafasia kotoa pē. ʻE lava ke tokoniʻi kitautolu ʻe he loto-mafasiá ke tau lavaʻi ʻa e ngaahi ngāue fakaʻahó mo fehangahangai mo e ngaahi faingataʻa ʻo e moʻuí. Ka neongo ia, ʻe lava ke uesia kovi kitautolu ʻe he loto-mafasia mo e loto-hohaʻa ʻoku fuoloá. ʻE lava ke tokoniʻi kitautolu ʻe he ʻEikí. ʻE lava ke tokoni ʻa e lēsoni ko ʻení ke ʻiloʻi mo akoako ʻe he kau akó ʻa e ngaahi taukei ke tafoki ki he ʻEikí ke mapuleʻi ʻa e loto-mafasiá mo e loto-hohaʻá.
Ngaahi ʻEkitivitī Ako ʻOku Ala Fakahokó
Loto-mafasiá mo e loto-hohaʻá
Fakatokangaʻi ange: Mahalo ʻe tokoni ke ke ʻiloʻi ʻoku ʻikai fiemaʻu ia ke ke taukei ʻi he kaveingá ni ke akoʻi ʻa e lēsoni ko ʻení. Lotua e tataki ʻa e Laumālie Māʻoniʻoní, muimui ʻi he naunaú, pea falala ki hoʻo kau akó. Kapau ʻe fai atu ʻe he kau akó ha ngaahi fehuʻi ʻoku ʻikai ke ke ʻilo e talí pe kapau te nau vahevahe ha ngaahi faingataʻa fakataautaha ʻoku nau fehangahangai mo ia, fakaafeʻi kinautolu ke nau fekumi ki ha tokoni mei he ʻEikí, ko ʻenau mātuʻá, kau taki ʻo e Siasí, mo e kau mataotao ki he moʻui lelei fakaeʻatamaí.
Ke tokoniʻi e kau akó ke nau teuteu ke ako fekauʻaki mo e loto-mafasiá mo e loto-hohaʻá, fakaafeʻi kinautolu ke hiki ha lisi ʻi he palakipoé ʻo e ngaahi meʻa ʻokú ne fakatupu ʻa e loto-mafasia pe loto-hohaʻa ʻa ha taha taʻu hongofulu tupu. Kapau ʻe ʻaonga, te nau lava ʻo siakaleʻi ʻa e meʻa ʻoku nau ongoʻi ko e meʻa angamaheni ʻe tolu pe fā ʻoku nau loto-mafasia aí.
Fakamatalaʻi ʻeni:
Ko e loto-mafasiá mo e loto-hohaʻá ko ha konga angamaheni pē ia ʻo e moʻuí. Ko e founga ʻeni ʻoku fakafeangai ai ʻa e ʻatamaí mo e sinó ki ha faʻahinga fiemaʻu, hangē ko ha palopalema ʻi ʻapi, ko ha sivi ʻi he akó, pe ko ha fili mahuʻinga. ʻE lava ke tokoniʻi kitautolu ʻe he loto-mafasia mo e loto-hohaʻa ʻoku lahi feʻunga peé ke tukutaha ʻetau tokangá, aʻusia e ngaahi taumuʻá, mo maluʻi e sinó. Ka neongo ia, ʻe lava ke hoko ha palopalema ʻi he fuʻu lahi ʻa e loto-mafasiá pe loto-hohaʻá.
-
ʻOkú ke pehē te ke lava fēfē ʻo tala ʻa e taimi ʻoku angamaheni mo moʻui lelei ai pē ʻa e loto-mafasiá mo e loto-hohaʻá pea mo e taimi ʻoku fuʻu tōtuʻa aí?
Fanongo ki he ngaahi tali ʻa e kau akó pea tānaki atu ha taha ʻo e ngaahi meʻa ko ʻení.
Kapau ʻoku tōtuʻa hoʻo fekuki mo e loto-mafasiá pe loto-hohaʻá, mahalo te ke faʻa puke, langa ʻulu, ongoʻi ʻita ʻi he taimi lahi, hoko ha ngaahi liliu lahi ʻi ho uʻá, pe aʻusia ha mole ʻa e tokangá. ʻE lava foki ke hāsino ʻa e loto-hohaʻa ʻoku ʻikai moʻui leleí ʻi he ngaahi fakaʻilonga ko ʻení: lēlea e lotó, vave ʻa e mānavá, tā vaivaia mo ʻikai ha mālohi, faingataʻa ke mohe, ngaahi palopalema he kaí, tokanga taha ki he loto-hohaʻá, pe faingataʻa ke fakakaukau lelei.
Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Tokanga ki he ngaahi fakaʻilonga ʻo e loto taʻotaʻomiá pe mafasiá ʻoku hā ʻiate koe mo e niʻihi kehe te ke ala tokoni ki aí. Hangē ko hono tokangaʻi hoʻo meʻalelé, tokanga kapau ʻoku fakaʻau ke fuʻu mafana e mīsini ʻo e meʻalelé, fuʻu vave ʻene lelé pe mei maha ʻa e penisiní. … Fai leva ʻa e ngaahi liliu ʻoku fiemaʻú. Ko e ongosiá ko e fili ia ʻoku tau tofuhia kotoa ai. (Jeffrey R. Holland, “Hangē ha Ipu Kuo Maumaú,” Liahona, Nōvema 2013, 41)
Fakamatalaʻi ange mahalo te tau ala aʻusia ha ngaahi tuʻunga kehekehe ʻo e loto-mafasiá mo e loto-hohaʻá ʻi ha ngaahi taimi kehekehe. Fakaʻaliʻali ʻa e saati ko ʻení, pea fakaafeʻi e kau akó ke nau fetongitongi ʻi he laukonga mo ha hoa ʻi he ngaahi tuʻunga ʻe fā ʻo e loto-mafasiá. Fakaafeʻi kinautolu ke fevahevaheʻaki ha meʻa ʻe taha ʻoku nau fie manatuʻi fekauʻaki mo e tuʻunga takitaha.
Tuʻunga ʻe Fā ʻo e Loto-Mafasiá
ʻOange ki he kau akó ha ngaahi miniti siʻi ke nau fakalaulauloto mo fakafuofuaʻi ai honau tuʻunga loto-mafasia mo e loto-hohaʻa lolotongá. Fakaafeʻi kinautolu ke nau fakalaulauloto ki he ngaahi fehuʻi ko ʻení:
-
ʻI hono fakalūkufuá, ko e tuʻunga fē ʻo e loto-mafasiá ʻokú ke ongoʻi ʻokú ne fakamatalaʻi lelei taha koé?
-
ʻOku fēfē hoʻo ongoʻi fekauʻaki mo hoʻo malava ke holoki hoʻo loto-mafasiá ʻi he taimi ʻoku fiemaʻu aí?
Te tau lava kotoa ʻo fakaleleiʻi ʻetau malava ke ʻiloʻi ʻa e taimi ʻoku tau fuʻu loto-mafasia pe loto-hohaʻa aí. Te tau lava foki ʻo fakatupulaki ʻetau malava ke tafoki ki he ʻEikí ke maʻu ha tokoní. ʻI hoʻo ako ʻa e lēsoni ko ʻení, kumi ha ngaahi founga ke fakaafeʻi ai e tokoni ʻa e ʻEikí ʻi hoʻo mapuleʻi ʻa e loto-mafasiá mo e loto-hohaʻá.
Ko e tokoni ʻa e ʻEikí
Lau ha niʻihi ʻo e ngaahi veesi ko ʻení, ʻo kumi e founga te nau ala ʻaonga ai kiate kitautolu ʻi he taimi ʻoku tau ongoʻi mafasia pe hohaʻa lahi aí: Saame 55:22; ʻĪsaia 40:29; Mātiu 11:28; Mōsaia 24:14–15.
-
Ko e hā naʻá ke ako mei he folofola ko ʻení?
ʻE lava ke ʻilo ʻe he kau akó ha ngaahi moʻoni hangē ko ʻení: ʻi heʻetau haʻu ki he Fakamoʻuí mo ʻetau ngaahi kavengá, te Ne lava ʻo foaki mai ʻa e melinó mo e fiemālié kiate kitautolu; pe ʻi heʻetau tafoki ki he ʻEikí, te Ne lava ʻo fakamaʻamaʻa ʻetau ngaahi kavengá mo fakamālohia kitautolu.
-
ʻE fakaʻaongaʻi fēfē ʻa e ngaahi moʻoni ko ʻení ki he loto-mafasiá mo e loto-hohaʻá?
Ko ha sīpinga ʻi he folofolá
Mahalo ʻe tokoni ke aleaʻi ha ngaahi sīpinga ʻe niʻihi ʻo e ngaahi moʻoni ko ʻení. Fakaʻaongaʻi ha ngaahi miniti siʻi ke fekumi ʻi he folofolá ki ha ngaahi sīpinga ʻo ha niʻihi fakafoʻituitui ne nau aʻusia ha loto-mafasia pe loto-hohaʻa.
ʻOku kau heni ʻa e ngaahi meʻá ni: Taniela ʻi he ʻana ʻo e fanga laioné (vakai, Taniela 6); Mele ʻi he taimi naʻe fakahā ai ʻe he ʻāngeló te ne hoko ko e faʻē ʻa e ʻAlo ʻo e ʻOtuá (vakai, Luke 1:26–56); ko e “hohaʻa lahi” ʻa Sēkopé ʻi heʻene ui hono kakaí ke fakatomalá (Sēkope 4:18; vakai foki, Sēkope 1:4–5; 2:3); Siosefa Sāmita ʻi he taimi naʻe ʻikai ke ne ʻilo ai pe ko e fē ʻa e siasi ke muimui ki aí (vakai, Siosefa Sāmita—Hisitōlia 1:1–20) pe ko e taimi naʻe tuku pōpula ai ia ʻi he Fale Fakapōpula Lipetií (vakai, Tokāteline mo e Ngaahi Fuakava 121).
ʻI hono maʻu pē ʻe he kau akó ha sīpingá, poupouʻi kinautolu ke toe vakaiʻi ʻa e fakamatala ʻi he folofolá pea tali ʻa e ngaahi fehuʻi ko ʻení mo ha tokotaha ako kehe. Hili ha taimi feʻunga, fakaafeʻi ha kau ako ʻe niʻihi ke vahevahe mo e kalasí e meʻa ne nau ʻiló.
-
Ko e hā e tuʻunga ʻo e loto-mafasiá ʻokú ke ongoʻi ʻe angamaheni ʻi he tūkunga ko ʻení?
-
Kuo tākiekina fēfē nai ʻe he loto-mafasia mo e loto-hohaʻa ʻi he tūkunga ko ʻení ʻa e ʻulungaanga ʻo e fakafoʻituituí?
-
Ko e hā naʻe fai ʻe he tokotaha fakafoʻituituí ke tafoki ki he ʻEikí ke maʻu ha tokoni ki heʻenau loto-mafasiá pe loto-hohaʻá?
Fakakaukau ke fehuʻi ki he kau akó pe ʻe founga fēfē haʻanau tafoki ki he ʻEikí ke maʻu ha tokoni ki heʻenau loto-mafasiá mo e loto-hohaʻá. Te nau lava ʻo mamata ʻi he “Reach Up to Him in Faith” (3:54) ki ha ngaahi fakakaukau lahi ange.
Reach Up to Him in Faith
President Russell M. Nelson teaches that just as the woman who was healed by touching the robe of Jesus, we can receive strength and direction by reaching out to Him as well.
Ngaahi taukei ki hono mapuleʻi ʻo e loto-mafasiá mo e loto-hohaʻá
Ke tokoni ke akoako ʻe he kau akó ʻa e ngaahi taukei ʻe lava ʻo tokoni ke nau mapuleʻi ʻa e loto-mafasiá mo e loto-hohaʻá, fakakaukau ke fakahoko ha taha pe fakatouʻosi ʻo e ongo ʻekitivitī ko ʻení.
Fakakaukau ki he loto-mafasia pe loto-hohaʻa ʻokú ke ongoʻí. ʻI hoʻo ʻahiʻahiʻi e ngaahi taukei ko ʻení, kumi ha faʻahinga fakaʻilonga ʻoku nau tokoniʻi koe.
-
Akoako ʻa e fakalaulauloto tokangá.
Fakaʻuhingá: Fakamatalaʻi ange ko e tokangá ko e tuku e fakakaukaú ki he momeniti ko iá, ʻo ʻikai ha fakaʻuhinga pe fakakaukau ki he meʻa ʻoku tau aʻusiá. Ko e founga ʻe taha hono fai ʻení ko e tokanga taha ki heʻetau mānavá ʻaki hono fai ha fanga kiʻi fakamālohisino mānava faingofua.
Sīpingá: Neongo te ke ongoʻi taʻefiemālie mo e kau akó ʻi hono fakahoko fakakalasi ʻení, kae fakahaaʻi ʻoku mahuʻinga ke ʻahiʻahi ʻa e taukei ko ʻení pea ʻoku lahi hono ngaahi ʻaongá. Fakamatalaʻi ange ʻe fai ʻeni ʻe he kau akó:
-
Toutou mihiʻi lahi, mo māmālie ki loto ho mānavá ʻaki ho ihú, pea kiʻi taʻofi ʻi he ʻosi e foʻi mānava takitaha.
-
Fakamolū hoʻo ongo umá. Feinga ke mānava ke ngaue ho keté, kae ʻikai ko ho ongo umá.
-
Feinga ke ke tokanga taha ki ho‘o mānavá. Kapau ʻoku hē atu hoʻo fakakaukaú, fakafoki māmālie hoʻo tokangá ki he ngaahi ongo ʻo hoʻo mānavá.
Ka ʻikai, te ke lava ʻo fakaafeʻi e kau akó ke mihiʻi ʻenau mānavá ʻo tuku ai ʻi ha sekoni ʻe fā, pea tukuange ia ʻi ha sekoni ʻe ono. (ʻE lava ke liliu ʻe he kau akó ʻa e ngāue ko ʻení ʻo ka fiemaʻu.)
Kimuʻa pea kamata e kalasí, fakakaukau ke akoako fakahoko ʻa e taukei ko ʻení ʻiate koe pē. Te ke lava foki ʻo vakaiʻi e tā ho mafú kimuʻa pea mo e ʻosi hono fakaangaanga e taukei ko ʻení ke vakai pe ʻoku holo hifo ʻene taá, ko ha fakaʻilonga ʻoku holo ai hoʻo loto-mafasiá. Fakakaukau ke vahevahe mo hoʻo kalasí ʻa e founga naʻe liliu ai koe ʻe he pōtoʻi ngāué.
Akoakó: Fakaafeʻi e kau akó ke fakakakato e ʻekitivitií. ʻI heʻenau fai iá, poupouʻi kinautolu ke fakatokangaʻi ʻa e ngāue honau maʻamaʻá ʻi heʻene fakalahi mo mingi ʻi heʻenau mānavá. Fakaafeʻi kinautolu ke nau fakatokangaʻi pe ʻoku tohoakiʻi ʻenau tokangá pea ko e hā e faʻahinga fakakaukau mo e ongo ʻokú ne tohoakiʻi kinautolú. Vakavakaiʻi e kau akó ʻo ʻikai feinga ke puleʻi pe fakamaauʻi kinautolu, kae fakafoki pē hoʻo tokangá ki hoʻo mānavá.
Fakaafeʻi e kau akó ke vahevahe ʻa e meʻa naʻa nau ongoʻí. Kapau te ke loto ki ai, te ke lava ʻo ʻai ke nau fakaongo e tā honau mafú kimuʻa mo e hili ʻa e fakamālohisinó pea lipooti kapau ʻe holo.
-
Ko e hā ʻe ala tokoni ai e taukei ko ʻení ʻi he taimi ʻoku tau ongoʻi loto-mafasia pe loto-hohaʻa aí?
-
-
Tukutaha ʻa e tokangá ki he loto-houngaʻiá.
Fakaʻuhingá: Tuku ha taimi ke fakatokangaʻi ai ʻa e meʻa ʻoku lelei mo sai fekauʻaki mo koe pea mo e māmaní. Fakalaulauloto ki he meʻa kuo fai ʻe he ʻEikí maʻau mo kinautolu ʻoku mou feohí (vakai, Tokāteline mo e Ngaahi Fuakava 59:7). Ko e founga ʻe taha ke fai ai ʻení ko hono hiki ha ngaahi meʻa ʻe nima ʻokú ke houngaʻia ai ʻi he ʻaho takitaha ʻi ha tohinoa loto-houngaʻia.
Sīpingá: Fakamatalaʻi ange ʻe lava ke ʻi ai ha tohinoa mavahe ʻa e kau akó pe fakaʻaongaʻi ha konga ʻo ha tohinoa kuo nau ʻosi maʻu, ʻo hangē ko ʻenau tohinoa ako ki he seminelí. Te nau lava foki ʻo hiki ʻenau ngaahi fakakaukaú ʻi ha kiʻi nouti ʻi heʻenau telefoní. ʻOku kau ʻi he ʻekitivitī ko ʻení ʻa e ngaahi sitepú ni:
-
Hiki ha ngaahi meʻa pau ʻe nima pe lahi ange ʻokú ke houngaʻia ai, tautautefito ki he ngaahi meʻa kuo fai ʻe he ʻEikí maʻaú.
-
Hiki ʻa e ʻuhinga ʻokú ke houngaʻia ai ʻi he ngaahi meʻa ko ʻení.
-
Feinga ke hokohoko atu ʻa e akoakó ʻi he ʻaho takitaha.
Fakakaukau ke ke ʻahiʻahiʻi ʻa e taukei ko ʻení kimuʻa ʻi he kalasí. Te ke lava ʻo vahevahe ha konga ʻo hoʻo aʻusiá mo e ongo naʻá ke maʻú.
Akoakó: Fakaafeʻi e kau akó ke hiki ha ngaahi meʻa pau ʻe nima ʻoku nau houngaʻia ai, tautautefito ki he ngaahi meʻa kuo fai ʻe he ʻEikí maʻanautolu, honau fāmilí, mo e niʻihi kehe ʻoku nau ʻofa aí. Kole ange foki ke nau tohi ʻa e ʻuhinga ʻoku nau houngaʻia ai ʻi he ngaahi meʻa ko iá.
-
Ko e hā hoʻo ongó hili hoʻo akoako e taukei ko ʻení?
-
Ko e hā ʻe ala tokoni ai e taukei ko ʻení ʻi he taimi ʻokú ke ongoʻi loto-mafasia pe loto-hohaʻa aí?
-
Fakaafeʻi e kau akó ke vahevahe ha ngaahi taukei kehe ʻoku nau fakaʻaongaʻi ke tokoni ki hono mapuleʻi ʻenau loto-mafasiá mo e loto-hohaʻá. Ko ha ngaahi sīpinga ʻeni ʻe niʻihi: lotu ki he ʻEikí, fakangatangata hono fakaʻaongaʻi ʻo e tekinolosiá, kiʻi mālōlō taimi nounou, longomoʻui, vakavakaiʻi e ngaahi meʻa ʻokú ke ʻamanaki ki aí, angaʻofa kiate koe, pea tokanga taha ki ha taha kehe.
Fakaʻosi ʻaki haʻo fekumi ki ha fakahinohino mei he ʻEikí ke faʻu ha palani ʻo e meʻa ke faí mo e taimi mo e tuʻo lahi hono fakaafeʻi ʻo e Fakamoʻuí ke tokoni atu ke mapuleʻi hoʻo loto-mafasiá mo e loto-hohaʻá.