“Lēsoni 189—Ko e Hoko ʻo Haohaoa ʻia Sīsū Kalaisí: Ko ha Founga ke Hoko ai ʻo Hangē Ange ko e Fakamoʻuí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko e Hoko ʻo Haohaoa ʻia Sīsū Kalaisí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 189—Tuʻunga Moʻui Lelei Fakatuʻasinó mo Fakaelotó
Ko e Hoko ʻo Haohaoa ʻia Sīsū Kalaisí
Ko ha Founga ke Hoko ai ʻo Hangē Ange ko e Fakamoʻuí
ʻE lava ke fakatupu ʻe he ngaahi hohaʻa mo e ngaahi ʻamanaki lahi ʻi he moʻuí ke tau fefaʻuhi mo e vilitaki ke haohaoá pe maʻuhala ʻo pehē ʻoku fiemaʻu ke tau haohaoa ʻiate kitautolu peé. Koeʻuhí ko e feilaulau maʻongoʻonga ʻa e Fakamoʻuí, te tau lava ai ʻo “hoko ʻo haohaoa ʻiate ia” (Molonai 10:32). ʻE lava ke tokoniʻi ʻe he lēsoni ko ʻení ʻa e kau akó ke nau fakatokangaʻi ʻa e ngaahi fehalaaki ʻi he fakakaukau ʻoku fekauʻaki mo e vilitaki ke haohaoá pea ʻe lava ʻo tokoniʻi kinautolu ke nau tafoki ki he ʻEikí.
Ngaahi ʻEkitivitī Ako ʻOku Ala Fakahokó
Vilitaki ke Haohaoá
Fakakaukau ke fakaʻaliʻali ha niʻihi ʻo e ngaahi fakakaukau ko ʻení ʻi he palakipoé pea lau fakataha fakakalasi kinautolu. Ongoʻi tauʻatāina ke liliu kinautolu ki ha ngaahi fakakaukau kehe ki he feinga ke haohaoá kapau ʻe lelei ange ia ki hoʻo kau akó.
-
“ʻOku ʻikai ke u fakapapauʻi pe te u toe lelei feʻunga nai.”
-
“ʻOku ʻikai ke u fuʻu lelei fēfē ʻi he meʻá ni ʻo hangē ko iá. ʻOku ʻikai ke u ʻilo pe ko e hā ʻa e ʻuhinga ʻoku ou feinga aí.”
-
“ʻOku ou ongoʻi ʻo hangē ʻoku fiemaʻu ke u fakangalingali ʻoku ou fiefia ange mo lelei ange ʻi he tuʻunga ʻoku ou ʻi aí.”
Ki ha sīpinga ʻo ha niʻihi ʻo e ngaahi fakakaukau ko ʻení, fakakaukau ke huluʻi ʻa e vitiō “Self-Compassion” (2:58) mei he taimi 0:00 ki he 0:53.
Fakaafeʻi ʻa e kau akó ke tafoki ki ha hoa pea aleaʻi ʻa e tali ki he ngaahi fehuʻí.
-
Ko e ha hono lahi hoʻo ongoʻi ʻa e ngaahi fakakaukau hangē ko ʻení?
-
Ko e hā ʻe ala ongoʻi ai ʻe he kakaí ʻoku ʻahiʻahiʻi kinautolu ke nau fakakaukau pehení?
Te ke lava ʻo fakamatalaʻi ange ʻe lava ke pehē ko e ngaahi fakamatala ko ʻení ko e ngaahi sīpinga ia ʻo e fakakaukau ki he haohaoá. Te ke lava ʻo hiki ʻa e vilitaki ke haohaoá ʻi he palakipoé pea fakaafeʻi ʻa e kau akó ke nau hiki takatakai ai ha ngaahi fakamatala ʻe malava ke hoko ko hano ngaahi ʻuhinga.
Fakakaukau ke fakaʻaliʻali ʻa e fakamatala ko ʻení. Poupouʻi ʻa e kau akó ke nau fekumi ki ha toe ngaahi fakakaukau kehe te nau lava ʻo tānaki atu ki he palakipoé.
Naʻe fakamatalaʻi ʻe ʻEletā Veena P. Sitenifili ʻo e Kau Fitungofulú:
ʻOku fiemaʻu ki he vilitaki ke haohaoá ha tuʻunga moʻui māʻolunga fakaekita ʻoku taʻemalavá ʻa ia ʻoku fakahoa ai kitautolu ki he niʻihi kehé. ʻOku fakatupu heni ʻa e ongoʻi halaiá mo e loto-hohaʻá, mo ʻai ke tau fie holomui mo fie nofo mavahé. (Vern P. Stanfill, “Ko e Ututaʻu ʻOku ʻIkai Haohaoá,” Liahona, Mē 2023, 113)
Ke tokoni ke fakafuofuaʻi ʻe he kau akó ʻa e founga ʻoku nau vakai ai ki he vilitaki ke haohaoá ʻi heʻenau moʻuí mo e founga ke ikunaʻi ai iá, te ke lava ʻo fakaʻaliʻali ʻa e ngaahi fehuʻi ko ʻení pea fakaafeʻi ʻa e kau akó ke fakalaulauloto ki heʻenau ngaahi talí.
Fakakaukau ki he founga ʻe lava ke ke moʻulaloa ai ki he ngaahi fakakaukau ʻo e tuʻunga haohaoá. Mahalo te ke fie hiki hoʻo ngaahi tali ki ha niʻihi ʻo e ngaahi fehuʻi ko ʻení ʻi hoʻo tohinoa akó.
-
Ko e hā ha ngaahi tuʻunga moʻui taʻemalava te ke ala fokotuʻu maʻau?
-
ʻOkú ke fakafehoanaki fēfē koe ki he niʻihi kehé ʻi he ngaahi founga ʻoku ʻikai leleí?
-
Te ke lava fēfē ʻo tafoki ki he ʻEikí ke tali ʻaki ʻa e faʻahinga fakakaukau ko ʻení?
Poupouʻi ʻa e kau akó ke nau fekumi ki ha fakahā mei he Tamai Hēvaní ʻo fakafou ʻi he Laumālie Māʻoniʻoní ʻi heʻenau ako ʻa e ngaahi founga te nau lava ai ʻo tafoki ki he Fakamoʻuí ke ikunaʻi ʻa e fakakaukau haohaoá.
Ko e Fakahaohaoaʻi ʻia Sīsū Kalaisí
Naʻe vahevahe ʻe ʻEletā Veena P. Sitenifili ʻa e meʻa te tau lava ʻo tokanga taha ki ai ke ikunaʻi ai ʻa e fakakaukau haohaoá:
Manatuʻi ʻoku ʻikai tatau ʻa e vilitaki ke haohaoá pea mo e hoko ʻo haohaoa ʻia Kalaisí. …
Ko e hoko ʻo haohaoa ʻia Kalaisí … ko e founga ia—ʻo e hoko ʻo hangē ko e Fakamoʻuí—ʻoku tataki ʻi he ʻofa ʻe he Laumālie Māʻoniʻoní. ʻOku fokotuʻu ʻa e ngaahi tuʻunga moʻui māʻolungá ʻe ha Tamai Hēvani angaʻofa mo tokaimaʻananga pea ʻoku fakamatalaʻi mahino ia ʻi he ngaahi fuakava ʻoku fakaafeʻi kitautolu ke tau talí. ʻOku fakaʻatā ai kitautolu mei he ngaahi mafasia ʻo e halaiá mo e taʻetāú, ʻo fakamamafaʻi mai maʻu pē ko hai kitautolu ʻi he [fakamaau mo e finangalo] ʻo e ʻOtuá. (Vern P. Stanfill, “Ko e Ututaʻu ʻOku ʻIkai Haohaoá,” Liahona, Mē 2023, 113)
-
Ko e hā ha meʻa ʻokú ke pehē ʻoku mahuʻingamālie ʻi he fakamatala ko ʻení?
Kapau ʻoku ʻikai vahevahe fakanatula ʻa e kau akó, fakakaukau ke fakaafeʻi kinautolu ke nau fakamatalaʻi fakanounou ʻa e ʻuhinga ʻo e hoko ʻo haohaoa ʻia Kalaisí. ʻI hono fakaʻaongaʻi ʻa e ngaahi lea ʻa e kau akó, hiki ha tefitoʻi moʻoni hangē ko ʻení ʻi he palakipoé: Ko e hoko ʻo haohaoa ʻia Sīsū Kalaisí ko e founga ia—ʻo e hoko ʻo hangē ko e Fakamoʻuí—ʻoku tataki ʻi he ʻofa ʻe he Laumālie Māʻoniʻoní. Fakakaukau ke hiki ʻa e Ko e hoko ʻo haohaoa ʻia Kalaisí ʻi he palakipoé ʻi he tafaʻaki ʻo e vilitaki ke haohaoá.
Lolotonga ʻa e ʻaʻahi ʻa e Fakamoʻuí ki he kakai naʻa nau nofoʻi ʻa e ongo ʻAmeliká ʻi he kuonga muʻá, naʻá Ne fakapapauʻi mai ko e hoko ʻo haohaoá ko ha meʻa ia ʻokú Ne finangalo mo ʻEne Tamaí ke tau maʻu kotoa. Lau ʻa e 3 Nīfai 12:48 (vakai foki, Mātiu 5:48), ʻo kumi ki he meʻa naʻe folofola ʻaki ʻe he Fakamoʻuí.
Mahalo ʻe fefaʻuhi ha kakai ʻe niʻihi mo e ngaahi fakakaukau ʻo e vilitaki ke haohaoá ʻi heʻenau lau ʻa e veesi ko ʻení.
-
ʻE lava fēfē ke tokoniʻi kitautolu ʻe he ngaahi fakamatala ʻa ʻEletā Sitenifilí ke mahino lelei ange kiate kitautolu ʻa e meʻa ʻoku akoʻi ʻe he Fakamoʻuí ʻi he veesi ko ʻení?
-
ʻE tokoni fēfē ʻeni ke tau tafoki ai ki he ʻEikí ʻi he taimi ʻoku tau fefaʻuhi ai mo e fakakaukau haohaoá?
Ko e Hoko ʻo hangē ange ko e Fakamoʻuí
Ke tokoni ke mahino lelei ange ki he kau akó ʻa e tefitoʻi moʻoní, fakakaukau ke tufa ʻa e laʻipepa tufa “Ko e Hoko ʻo Haohaoa ʻia Sīsū Kalaisí.”
ʻE lava ke ako ʻe he kau akó ʻa e ngaahi fakamoʻoni fakafolofolá mo e ngaahi fakamatalá ʻi ha fanga kiʻi kulupu iiki, pea ʻave ʻe he tokotaha takitaha ha fakamatala ʻe taha pe ua mo e ngaahi fakamoʻoni fakafolofolá. Pe te ke lava ʻo ʻoange ki he kulupu takitaha ha fakamatala ʻe taha mo ha potufolofola ke ako.
Ko e Hoko ʻo Haohaoa ʻia Sīsū Kalaisí
Lau ‘a e ngaahi fakamoʻoni fakafolofola ko ʻení. Kumi ha ngaahi kupuʻi lea ʻokú ne fakatupulaki hoʻo loto-falala ʻe lava ke tokoniʻi kitautolu ʻe he Fakamoʻuí ke tau ikunaʻi ʻetau ngaahi tōnounoú pea hoko ʻo hangē ange ko Iá. Te ke lava ʻo hiki ha lisi ʻo e meʻa ʻokú ke maʻú ʻi hoʻo tohinoa akó pe ʻi mui ʻi he laʻipepa tufá.
Lau ʻa e ngaahi fakamatala ko ʻení. Kumi ʻa e meʻa te tau lava ʻo fai ke ikunaʻi ʻaki ʻa e fakakaukau haohaoá mo tokanga taha ki he hoko ʻo lelei ange ʻia Sīsū Kalaisí. Te ke lava ʻo fakaʻilongaʻi ʻa e ngaahi kupuʻi lea ʻoku makehe kiate koé.
Naʻe akoʻi ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa ʻoku ʻamanaki mo ʻikai ʻamanaki mai ʻa e ʻEikí ke tau faí:
ʻOku ʻikai fiemaʻu ʻe he ʻOtuá ha kakai ʻoku haohaoa. ʻOkú Ne fekumi kiate kinautolu te nau foaki ʻa e “loto mo e ʻatamai fie [ngāué]” [Tokāteline mo e Ngaahi Fuakava 64:34], pea te Ne ngaohi kinautolu ke “haohaoa ʻia Kalaisi” [Molonai 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University Education Week devotional, Aug. 17, 2021], 3, speeches.byu.edu)
Naʻe fakamatala ʻe Palesiteni Lāsolo M. Nalesoni ʻa e meʻa te tau lava ʻo fai ʻi he taimi ʻoku tau vakai ai ki heʻetau ngaahi tōnounoú:
Tau fai muʻa ʻa e lelei taha te tau lavá mo feinga ke fakalakalaka ʻi he ʻaho kotoa pē. ʻI he taimi ʻoku hā ai ʻetau ngaahi fehalaākí, ʻe lava ke tau kei feinga pē ke fakatonutonu kinautolu. Te tau lava ʻo faʻa fakamolemoleʻi ange ʻa e ngaahi tōnounou ʻoku ʻiate kitautolú pea mo ia ʻoku ʻiate kinautolu ʻoku tau ʻofa aí. (Russell M. Nelson, “Perfection Pending, Ensign, Nov. 1995, 88)
Hili ʻa e ako ʻa e kau akó, fakaafeʻi kinautolu ke vahevahe mo ʻenau kulupú ʻa e meʻa kuo nau akó. Tokoniʻi kinautolu ke nau aleaʻi ʻa e founga ʻoku felāveʻi ai ʻa e ngaahi potufolofola mo e ngaahi fakamatala ko ʻení kia kinautolú.
Aleaʻi ʻa e ngaahi kupuʻi lea naʻá ke maʻu ʻi he ngaahi potufolofola pe fakamatala ko ʻení ʻa ia:
-
Kuó ne tokoniʻi koe ʻi he kuohilí ʻi he ngaahi ongo ʻo e ʻikai ke fuatautau ki he ngaahi meʻa ʻoku fai ki ai ʻa e ʻamanakí.
-
ʻOku ʻi ai haʻo ngaahi fehuʻi fekauʻaki mo ia.
-
ʻOkú ke fie fakaʻaongaʻi ki hoʻo moʻuí.
Ko hono fetongi ʻo e vilitaki ke haohaoá ʻaki ʻa e hoko ʻo haohaoa ʻia Sīsū Kalaisí
ʻE lava ke tokoniʻi kitautolu ʻe he taukei ko ʻení ke fakatonutonu ʻa e fakakaukau haohaoá mo tokanga taha ki he feinga ke hoko ʻo lelei ange ʻia Sīsū Kalaisí.
Fakaʻuhingaʻí: Fakapapauʻi ʻoku mahino ʻa e taukei ko ʻení ki he kau akó. Fakakaukau ke hiki ʻa e ngaahi fehuʻí ʻi he palakipoé.
ʻI he taimi ʻokú ke fakatokangaʻi ai ha fakakaukau ʻoku haohaoá, fai pē kiate koe ʻa e ngaahi fehuʻi ko ʻení:
-
Ko e hā nai ha founga ʻe finangalo ai ʻe he Fakamoʻuí ke u fakakaukau kiate au ʻi he manavaʻofa mo e faʻa kātakí?
-
Te u lava fēfē ʻo fakahaaʻi mo falala ki he Fakamoʻuí mo Hono mālohi ke tokoniʻi aú, kae ʻikai feinga ke fai ʻa e meʻa kotoa pē ʻiate au pē?
Sīpingá: Fili ha taha ʻo e ngaahi fakakaukau haohaoá mei he kamataʻanga ʻo e lēsoní, hangē ko e “ʻOku ʻikai ke u fuʻu lelei fēfē ʻi he meʻá ni ʻo hangē ko iá. ʻOku ʻikai ke u ʻilo pe ko e hā ʻa e ʻuhinga ʻoku ou feinga aí.” Manatuʻi ʻa e fakakaukau ko ʻení, ʻeke ki he kau akó ʻa e fehuʻi ʻuluakí (“Ko e hā nai ha founga ʻe finangalo ai ʻe he Fakamoʻuí ke u fakakaukau kiate au ʻi he manavaʻofa mo e faʻa kātakí?”). Ke fanongo ki ha ngaahi tali, mamata ʻi he toenga ʻo e foʻi vitiō “Self-Compassion” (2:58) mei he taimi 0:54 ki he 2:58.
Mahalo ʻe vahevahe ʻe he kau akó ha niʻihi ʻo e ngaahi meʻá ni: ʻOku ʻikai tokanga ʻa e ʻEikí ki he founga ʻoku tau fai ʻi hono fakafehoanaki ki he niʻihi kehé. ʻE lava ke tau faʻa kātakiʻi pē kiate kitautolu kapau ʻoku ʻikai vave ʻetau fakalakalaká ʻo hangē ko e niʻihi kehé mo ʻiloʻi ʻoku ʻi ai pē ʻa e ngaahi faingataʻaʻia ʻa e niʻihi kehé. Te tau lava ʻo ʻiloʻi ko e lahi taha ʻo e fakalakalaká ʻoku māmālie. Te tau lava ʻo fekumi ki he ngaahi ueʻi ʻa e Laumālié ke tafoki ki he ʻEikí mo ʻiloʻi te tau fakalakalaka ʻi he taimi ʻa e ʻEikí.
ʻEke ʻa e fehuʻi hono ua ʻi ʻolungá (“ʻE anga fēfē haʻaku fakahaaʻi mo falala ki he Fakamoʻuí mo Hono mālohi ke tokoniʻi aú, kae ʻikai feinga ke fai ʻa e meʻa kotoa pē ʻiate au pē?”). Mahalo ʻe vahevahe ʻe he kau akó ko e taimi ʻoku tau fakatomala ai mo tafoki ki he Fakamoʻuí, ʻokú Ne maʻu ʻa e mālohi ke fakamaʻa kitautolu mei he angahalá pea tokoni ke tau fakalakalaka pea hoko ʻo hangē ko Iá. ʻOkú Ne fakaafeʻi kitautolu ke tau tokanga taha kiate Ia, kae ʻikai ko e niʻihi kehé, ke maʻu ha tokoni. Te tau lava ʻo feinga ke muimui ʻi he sīpinga ʻa e Fakamoʻuí mo lotua ke faitāpuekina ʻe he Tamai Hēvaní ʻetau ngaahi feingá. ʻOku tau fekumi ʻi he faʻa lotu ki ha fakamoʻoni ʻo ʻEne tokoní mo e ngaahi founga ʻoku tau fakalakalaka aí.
Akoako Fakahoko: Fakaafeʻi e kau akó ke nau tauhoa ʻo fakahoko ʻa e ʻekitivitī ko ʻení, pea fakapapauʻi ʻoku maʻu ʻe he tokotaha ako takitaha ha faingamālie ke akoako fakahoko.
Fili ha taha ʻo e ngaahi sīpinga ʻo e ngaahi fakakaukau haohaoá ʻi he kamataʻanga ʻo e lēsoní. Fakakaukau ki he fakakaukau ko ʻení, tali ʻa e ngaahi fehuʻi ʻi ʻolungá.
Hili ha taimi feʻunga, fakaafeʻi ha ngaahi hoa ʻe niʻihi ke vahevahe ʻa e meʻa ne nau ako mei heʻenau akoako fakahokó. Mahalo ʻe fakatokangaʻi ʻe ha niʻihi ʻoku tokoni hono fakaafeʻi ʻo e Fakamoʻuí ki heʻenau ngaahi fakakaukaú ke nau ongoʻi ʻEne ʻofá mo e faʻa kātakí.
Fakaafeʻi ʻa e kau akó ke nau fakalaulauloto ki he founga te nau lava ai ke fakaʻaongaʻi ʻa e ngaahi taukei ko ʻení ʻi heʻenau moʻuí. Fakaafeʻi kinautolu ke nau ngāueʻi ʻa e ngaahi ongo ne nau maʻu ʻi heʻenau fekumi ki he tokoni ʻa e Fakamoʻuí.
ʻE lava ke ke fakaʻosi ʻa e kalasí ʻaki hono fakamoʻoniʻi ʻa e ngaahi tāpuaki ʻoku maʻu ʻi heʻetau feinga maʻu pē ke hoko ʻo hangē ko Sīsū Kalaisí.