“Lēsoni 186—Ko Hono Fakatupulaki ha Ngaahi Sīpinga Fakakaukau ʻOku Leleí: ʻE Lava ke Tokoniʻi Kitautolu ʻe Sīsū Kalaisi ke Fakatonutonu ʻa e Ngaahi Fakakaukau Taʻeʻaongá,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko Hono Fakatupulaki ha Ngaahi Sīpinga Fakakaukau ʻOku Leleí,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 186: Moʻui Lelei Fakaesino mo Fakaelotó
Ko Hono Fakatupulaki ha Ngaahi Sīpinga Fakakaukau ʻOku Leleí
ʻE Lava ke Tokoniʻi Kitautolu ʻe Sīsū Kalaisi ke Fakatonutonu ʻa e Ngaahi Fakakaukau Taʻeʻaongá
ʻE lava ke maʻu ʻe heʻetau ngaahi fakakaukaú ha mālohi lahi ki heʻetau ngaahi ongó mo ʻetau ngaahi tōʻongá. ʻI he taimi ʻoku tau fakaafeʻi ai ʻa e Fakamoʻuí ki heʻetau ngaahi fakakaukaú, te Ne lava ʻo tokoniʻi kitautolu ke ikunaʻi ʻa e fakakaukau ʻoku ʻikai leleí. ʻE lava ke tokoni ʻa e lēsoni ko ʻení ki he kau akó ke fakatupulaki ʻenau fakatokangaʻi ʻenau ngaahi fakakaukaú mo fokotuʻu ha ngaahi sīpinga fakakaukau ʻoku leleí.
Ngaahi ʻEkitivitī Ako ʻOku Ala Fakahokó
Fakafeangai ki ha ʻaho ʻoku kovi
Ke kamata e kalasí, te ke lava ʻo fakaʻaliʻali e ngaahi tūkunga ko ʻení pea fakaafeʻi e kau akó ke hiki e ngaahi fakakaukau te nau ala maʻu fakanatula ʻi he ngaahi tūkunga takitaha ko iá. Fai ha ngaahi liliu ki ha taha ʻo e ngaahi tūkunga ko ʻení ke feau lelei ange ai e ngaahi fiemaʻu ʻa e kau akó.
-
ʻOku ou ʻalu ki ha fakataha fakasōsiale ʻo fakatokangaʻi ʻoku ʻikai ke u fuʻu ʻiloʻi ha taha.
-
Kuo pau ke u feohi mo ha taha ʻoku ʻikai ke ma maheni lelei.
-
ʻOku ou fanongo ki hano fakaangaʻi ʻe ha taha ʻa e Siasí.
-
ʻOku ʻikai fuʻu sai hoku māká ʻi ha sivi naʻá ku ako lahi ki ai.
-
Ko e hā nai ha niʻihi ʻo e ngaahi fakakaukau ʻokú ke maʻu ko e tali ki he ngaahi tūkunga ko ʻení?
-
ʻOku ʻaonga nai ʻa e ngaahi fakakaukau ko ʻení? ʻOku nau tonu nai? ʻOkú ke lava fēfē ʻo talá?
Fakaafeʻi ʻa e kau akó ke fakalaulauloto ki he tuʻo lahi ʻo ʻenau fakatokangaʻi ʻenau ngaahi sīpinga fakakaukaú pea ʻoku faʻa tokoni pe tonu nai ʻa e ngaahi sīpinga ko iá.
Te ke lava ʻo vahevahe mo e kau akó te nau akoako fakaafeʻi ʻa e tokoni ʻa e Fakamoʻuí ke fakatonutonu ʻa e ngaahi fakakaukau taʻetotonú pe ʻikai leleí. Fakaafeʻi ʻa e kau akó ke nau fekumi ki ha fakahinohino ʻo fakafou ʻi he Laumālie Māʻoniʻoní ke mahino lelei ange ʻenau ngaahi sīpinga fakakaukaú, tautautefito ki he taimi ʻoku nau tali ai e ngaahi tūkunga faingataʻá.
Sio kia Kalaisi
Lau ʻa e Tokāteline mo e Ngaahi Fuakava 6:36, ʻo kumi ʻa e meʻa ʻoku fakaafeʻi kitautolu ʻe he ʻEikí ke tau fakahokó.
-
Ko e hā e meʻa naʻá ke maʻú?
-
ʻOkú ke pehē ʻoku ʻuhinga ki he hā ke hanga ki he Fakamoʻuí ʻi heʻetau ngaahi fakakaukaú?
ʻOku kau ʻi he ngaahi sīpinga ʻe niʻihi ʻa e ngaahi meʻá ni: fakalaulauloto ki he founga ʻe ala ngāue ai ʻa e Fakamoʻuí ʻi he ngaahi tūkunga ʻoku tau fehangahangai mo iá, ʻo kumi ʻa e founga ʻe ala fakaʻaongaʻi ai ʻEne ngaahi akonakí ki he tūkungá, mo hono manatuʻi ʻEne ʻofá.
-
Ko e hā e ʻuhinga ʻe faingataʻa ai ke tau sio ki he Fakamoʻuí ʻi heʻetau ngaahi fakakaukaú?
ʻI heʻetau talanoa fekauʻaki mo e folofola ko ʻení, naʻe akoʻi ʻe Palesiteni Lāsolo M. Nalesoni:
Kuo pau ke fakamaʻu ʻetau tokangá ʻi he Fakamoʻuí mo ʻEne ongoongoleleí. ʻOku mafatukituki fakaeʻatamai ke hanga kiate Ia ʻi he fakakaukau kotoa pē. Ka ʻi heʻetau fai iá, ʻoku mole atu ʻetau veiveiuá mo e manavasiʻí. (Russell M. Nelson, “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 41)
-
Ko e hā e meʻa ʻoku mahuʻinga kiate koe mei he fakamatala ʻa Palesiteni Nalesoní?
ʻI he ngaahi moʻoni kehekehe ʻe ala ʻilo ʻe he kau akó, tokoni ke nau ʻiloʻi, ʻi heʻetau feinga ke vakai ki he Fakamoʻuí ʻi he fakakaukau kotoa peé, ʻe mole ʻetau veiveiuá mo e manavasiʻí.
-
Ko e hā e ʻuhinga ʻe ala fakatupu ai ʻe heʻetau hanga ki he Fakamoʻuí ʻi heʻetau ngaahi fakakaukaú ke mole ai ʻetau veiveiuá mo e ilifiá?
Ke vakai ki he founga ʻe lava ke tākiekina ai ʻe he sio ki he ʻEikí ʻa e ngaahi fakakaukaú, fakakaukau ke fakaafeʻi ʻa e kau akó ke nau toe fakamatalaʻi ʻa e ngaahi tūkunga naʻe ʻi he Fale Fakapōpula Lipetií ai ʻa e Palōfita ko Siosefá. Fakapapauʻi ʻoku mahino ki he kau akó naʻe tuku pōpula taʻetotonu ia lolotonga e faingataʻaʻia lahi ʻa e Kāingalotú ʻi he fakatangá. ʻE lava ke lau ʻe he kau akó ʻa e kotoa pe konga ʻo e Tokāteline mo e Ngaahi Fuakava 121:1–9, ʻo kumi e founga naʻe tokoniʻi ai ʻe he ʻEikí ʻa Siosefa ʻi heʻene veiveiuá mo e manavaheé.
Ngaahi sīpinga fakakaukau taʻeʻaongá
Ke mahino ʻa e founga ʻe ala tokoniʻi ai kitautolu ʻe he tafoki ki he ʻEikí ʻi heʻetau ngaahi fakakaukaú, fakakaukau ke fai ʻa e ʻekitivitī ko ʻení:
Fakaʻaliʻali ʻa e saati ko ʻení naʻe toʻo mei he Ko Hono Maʻu ha Mālohi ʻi he ʻEikí: Ivi Matuʻuaki Fakaelotó pea fokotuʻutuʻu e kau akó ki ha fanga kiʻi kulupu iiki pe tauhoa. Te ke lava ʻo fakaafeʻi e kau akó ke nau fili ha sīpinga fakakaukau taʻetotonu ʻe taha pe ua pea aleaʻi ʻa e fehuʻi ʻoku hoko mai aí. ʻIkai ngata aí, ʻe lava ke feinga ʻa e kau akó ke ʻiloʻi ha toe ngaahi sīpinga fakakaukau taʻetotonu kuo nau fakatokangaʻi.
ʻOku ʻi ai mo ha ngaahi sīpinga fakakaukau taʻetotonu kehe te ke lava ʻo fakaʻaongaʻi ʻo fetongi ʻaki pe fakalahi atu ki he ngaahi sīpinga ʻoku hā atu hení. Ki ha ngaahi sīpinga ʻo ha toe ngaahi tōʻonga fakakaukau taʻetotonu, vakai ki he Ko Hono Maʻu ha Mālohi ʻi he ʻEikí: Ivi Matuʻuaki Fakaelotó.
|
Sīpinga ʻo e Fakakaukau Taʻeʻaongá |
Fakamatala |
Sīpinga |
|---|---|---|
Sīpinga ʻo e Fakakaukau Taʻeʻaongá Fakahingoa Halá | Fakamatala Ko hono tali ha meʻa naʻe hoko ʻaki hono fakahoko ha fakamahamahalo tāumamaʻo pe hala. | Sīpinga “Naʻá ku tō ʻi he sivi ko ʻení; ʻoku ou vale ʻi he fiká.” |
Sīpinga ʻo e Fakakaukau Taʻeʻaongá Fakavave ki he Aofangatukú | Fakamatala Ko hono fai ha fakamahamahalo fekauʻaki mo e ngaahi fakakaukau ʻa e niʻihi kehé pe fakakaukauloto ki he ola kovi taha ʻe ala hokó. | Sīpinga “Pau pē ʻoku nau kataʻi au.” |
Sīpinga ʻo e Fakakaukau Taʻeʻaongá Fakataʻeʻaongaʻi e Meʻa Leleí | Fakamatala Ko hono fakafisingaʻi e ngaahi aʻusia lelei kotoa pē koeʻuhí he ʻoku ʻikai te ke mahuʻingaʻia ai. | Sīpinga “Naʻe pehe ʻe heʻeku mātuʻá ne u sai ʻaupito, ka ʻoku ou ʻiloʻi ʻokú na feinga pe kinaua ke ʻai ke u ongoʻi lelei ange fekauʻaki mo e ngaahi fehalaaki naʻá ku faí.” |
Sīpinga ʻo e Fakakaukau Taʻeʻaongá Fakalahi | Fakamatala Ko hono fakalahi ho ngaahi vaivaí pe fakafehoanaki ia ki he mālohinga ʻo e niʻihi kehé. | Sīpinga “ʻOku ʻikai ke u faʻa lava ʻo talanoa ki he kakai, pea ʻi heʻeku fai iá, ʻoku ʻikai ke u teitei fakaoli au ʻo hangē ko iá.” |
-
Ko e hā ha niʻihi ʻo e ngaahi tāpuaki ʻo hono maʻu ha ngaahi fakakaukau hangē ko ʻení?
Akoako e fakafeangai ki he ngaahi fakakaukau taʻeʻaongá
Fakakaukau ke tufa ki he tokotaha ako takitaha ʻa e laʻipepa tufa “Ko Hono Fakatonutonu e Ngaahi Fakakaukau Taʻeʻaonga pe ʻIkai Totonú” ki he tokotaha ako takitaha. Fakamahinoʻi ange te nau akoako fakaʻaongaʻi ʻa e ngaahi meʻa naʻe aleaʻi ʻi he kamataʻanga ʻo e kalasí.
Fakakaukau ke fai ʻeni ke fakaʻuhingaʻi, fakatātaaʻi, pea mo akoako fakahoko ha taukei ke fakatonutonu ʻa e ngaahi fakakaukau taʻeʻaonga pe taʻetotonú:
Fakaʻuhingaʻí: ʻI he taimi ʻoku tau maʻu ai ha fakakaukau taʻeʻaonga, te tau lava ʻo tākiekina ia ʻi ha ngaahi founga lelei ʻaki hono:
-
ʻIloʻi ʻa e fakakaukau taʻeʻaongá pe taʻetotonú.
-
ʻEke ha taha ʻo e ongo fehuʻi ko ʻení pe fakatouʻosi:
-
Kapau naʻe maʻu ʻe ha kaungāmeʻa ʻa e ngaahi fakakaukau ko ʻení, ko e hā te u talaange ki aí?
-
ʻE tokoniʻi fēfē au ʻe he fakakaukau ki he Fakamoʻuí mo ʻEne ngaahi akonakí ke fakatonutonu ʻa e fakakaukau ko ʻení?
Sipinga: Fakakaukau ke fakatātaaʻi ʻa e taukei ko ʻení ʻaki haʻamou ngāue fakakalasi ki he ʻotu ʻuluaki ʻi he saati ʻi laló.
Feinga ke ʻiloʻi ha fakakaukau taʻeʻaonga pe taʻetotonu te tau lava ʻo maʻu ko ha tali ki he meʻa ne hokó. ʻE lava ke kau ʻi he ngaahi sīpingá ʻa e “ʻoku fakamaauʻi au ʻe he tokotaha kotoa pē” pe “ʻOku ʻikai ke u sai ʻi he ngaahi tūkunga pehení. ʻE lelei ange ki he tokotaha kotoa pē kapau he ʻikai ke u ʻalu.”
Fakakaukau ki ha meʻa te ke talaange ki haʻo kaungāmeʻa naʻá ne talaatu ʻene fakakaukau taʻeʻaonga pe taʻetotonú ko ʻení. ʻE lava ke kau ʻi he ngaahi sīpingá ʻa e “ʻOkú ke pehē ʻoku tonu pēseti ʻe 100 nai ʻoku fakamāuʻi koe ʻe he niʻihi kehé? ʻOku ʻi ai nai ha faingamālie ʻoku pehē ʻoku nau hohaʻa pē kiate kinautolú?” mo e “ʻOku ou saiʻia ʻiate koe. ʻOku mahuʻinga ke u maheni mo koe. ”
Fakakaukau ki he founga ʻe ala tokoni ai ʻa e fakakaukau ki he Fakamoʻuí mo ʻEne ngaahi akonakí ke fakatonutonu ʻa e fakakaukau ko ʻení. Hangē ko ʻení, ʻe lava ke fakakaukau e kau akó ki he angalelei ʻa e Fakamoʻuí ki he niʻihi kehé pe ko e potufolofola, “ʻOku ou tuku ʻa e fekau foʻou kiate kimoutolu, koeʻuhí ke mou feʻofaʻaki kiate kimoutolu; pea hangē ko ʻeku ʻofa kiate kimoutolú, ke mou feʻofaʻaki foki kiate kimoutolu” (Sione 13:34). ʻE lava foki ke ke vahevahe ko ha konga ʻo e fakatātā ko ʻení ʻa e meʻa naʻe folofola ʻaki ʻe he ʻEikí ʻi he ʻĪsaia 55:8, ke tokoni ki he kau akó ke nau ʻiloʻi ʻoku faʻa kehe ʻEne ngaahi fakakaukau fekauʻaki mo kitautolú mei heʻetau fakakaukaú.
Akoako fakahokó: Fakaafeʻi e kau akó ke nau ngāue ʻi ha fanga kiʻi kulupu iiki ke ngāueʻi e toenga ʻo e sātí, ʻo hiki e meʻa te nau ala talaange ki hanau kaungāmeʻa ʻaki e fakakaukau ko ʻení mo e founga ʻe lava ke fakatonutonu ai ʻe he Fakamoʻuí ʻi he ʻofa ʻa e fakakaukau ko ʻení.
ʻI he fakaʻosinga ʻo e lēsoní, ʻe fakafonu ʻe he kau akó ʻa e ʻotu ʻoku ʻataá ʻi he konga ki lalo ʻo e laʻipepa tufá.
Ko Hono Fakatonutonu e Ngaahi Fakakaukau Taʻeʻaonga pe ʻIkai Totonú
|
Meʻa ʻOku Hokó |
Ko e hā ha fakakaukau taʻeʻaonga pe taʻetotonu te ke ala maʻu? |
Kapau naʻe maʻu ʻe ha kaungāmeʻa ʻa e fakakaukau ko ʻení, ko e hā te ke talaange ki aí? |
ʻE fakatonutonu fēfē nai ʻe he Fakamoʻuí ʻa e fakakaukau ko ʻení? |
|
ʻOkú ke ʻalu ki ha fakatahaʻanga fakasōsiale ʻoku ʻikai ke ke maheni ai mo ha taha. | |||
|
ʻOku pau ke ke feohi ai mo ha taha ʻoku ʻikai ke mo fetaulaki lelei. | |||
|
ʻOkú ke fanongo ki hano fakaangaʻi ʻe ha taha ʻa e Siasí. | |||
|
ʻOku ʻikai sai ho māká ʻi ha sivi naʻá ke ako lahi ki ai. |
Hili hono maʻu ʻe he kau akó e faingamālie ke vahevahe e meʻa ne nau tohi ʻi he laʻipepa tufá, fakakaukau ke fakaafeʻi kinautolu ke fakakaukau ki ha fakakaukau taʻeʻaonga pe taʻetotonu ʻoku nau maʻu pea hiki ia ʻi he kōlomu totonu ʻi he ʻotu fakaʻosí. Poupouʻi kinautolu ke nau tānaki atu ʻa e meʻa ʻe lava ke iku ki he fakakaukau ko ʻení. Fakaafeʻi e kau akó ke hokohoko atu ʻenau akoako e taukei ko ʻení ʻaki hono fakafonu ʻa e ongo foʻi konga kehe ʻe ua ʻoku ʻatā ʻi he ʻotu ko ʻení.
-
Ko e hā ha meʻa kuó ke ako pe ongoʻi he ʻahó ni fekauʻaki mo e ngaahi sīpinga fakakaukau lelei ʻe lava ke hoko ko ha tāpuaki kiate koe?
Te ke lava ʻo vahevahe hoʻo fakamoʻoni ki he finangalo mo e malava ʻa e Fakamoʻuí ke tokoniʻi kitautolu ke tau ngāueʻi ʻetau fakakaukau faingataʻa mo taʻetotonú ʻi heʻetau vakai kiate Ia ʻi heʻetau ngaahi fakakaukaú.