“Lēsoni 188—Ko e Fekuki mo e Loto-mamahí mo e Loto-Taʻotaʻomiá: ʻE Lava ke Tokoniʻi Kitautolu ʻe he Tamai Hēvaní mo Hono ʻAlo ko Sīsū Kalaisí ke Tau Ikunaʻi ʻa e Ngaahi Faingataʻa Fakaeloto ʻo e Moʻuí” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko e Fekuki mo e Loto-mamahí mo e Loto-Taʻotaʻomiá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 188: Tuʻunga Moʻui Lelei Fakatuʻasinó mo Fakaelotó
Ko e Fekuki mo e Loto-mamahí mo e Loto-Taʻotaʻomiá
ʻE Lava ke Tokoniʻi Kitautolu ʻe he Tamai Hēvaní mo Hono ʻAlo ko Sīsū Kalaisí ke Tau Ikunaʻi ʻa e Ngaahi Faingataʻa Fakaeloto ʻo e Moʻuí
Naʻe talaʻofa ʻe he Fakamoʻuí te tau lava ʻo maʻu ʻiate Ia ʻa e fiefia kakató (vakai, Tokāteline mo e Ngaahi Fuakava 101:36). Ka neongo ia, ʻoku hoko ʻa e ngaahi momeniti ʻo e loto-mamahí mo e loto-foʻí ko ha konga angamaheni pē ia ʻo ʻetau moʻui fakamatelié. ʻOku ʻi ai ʻa e taimi ʻe niʻihi te tau aʻusia ai ha ngaahi ongoʻi mātuʻaki faingataʻa ange ʻo e siva ʻa e ʻamanakí mo e loto-taʻotaʻomiá. Naʻe ʻomi ʻe he Tamai Hēvaní mo Sīsū Kalaisi ha ngaahi maʻuʻanga tokoni ke tokoniʻi kitautolu ke tau laka ki muʻa ʻi he tui lolotonga ʻa e ngaahi taimi ʻo e faingataʻa fakaelotó. ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi founga te nau lava ai ʻo maʻu ha tokoni ki he ngaahi ongoʻi loto-mamahí mo e loto-taʻotaʻomiá.
Ngaahi ʻEkitivitī Ako ʻOku Ala Fakahokó
ʻOku hangē ʻa e ngaahi ongo fakaelotó ko e ngaahi peau ʻo e tahí
Fakatokangaʻi ange: Mahalo ʻe tokoni ke ke ʻiloʻi ʻoku ʻikai fiemaʻu ia ke ke taukei ʻi he kaveingá ni ke akoʻi ʻa e lēsoni ko ʻení. Lotua ʻa e tataki ʻa e Laumālie Māʻoniʻoní, muimui ʻi he ngaahi naunaú, pea falala ki hoʻo kau akó. Kapau ʻe fai atu ʻe he kau akó ha ngaahi fehuʻi ʻoku ʻikai ke ke ʻilo ʻa e founga ke tali aí pe kapau te nau vahevahe ha ngaahi faingataʻa fakataautaha ʻoku nau fehangahangai mo ia, fakaafeʻi kinautolu ke nau fekumi ki ha tokoni mei he ʻEikí, ʻenau mātuʻá, kau taki ʻo e Siasí, mo e kau mataotao ki he moʻui lelei fakaeʻatamaí.
Ke kamatá, fakaʻaliʻali ha fakatātā pe vitiō ʻo e ngaahi peau ʻo e tahí. Vahevahe pe fakamatalaʻi fakanounou ʻa e palakalafi ko ʻení.
Fakakaukauloto ʻokú ke tuʻu ʻi he matātahí ʻo siofi ʻa e ngaahi peau ʻo e tahí. ʻOku hangē ʻa e peaú ko ʻetau ngaahi ongó. ʻOku huki māmālie ha ngaahi peau ʻe niʻihi ʻi ho vaʻé ʻi hoʻo tuʻu pe aʻa atu ʻi he fukahi vaí. ʻI he taimi ʻe niʻihi mahalo ʻe loloto ange hoʻo ʻi he vaí, pea ʻe taaʻi mālohi ange koe ʻe he ngaahi peaú pe taʻeʻamanekina, ʻo tupu ai ha ʻikai ke ke tuʻu palanisi. ʻI he taimi ʻe niʻihi ʻe lava ke taaʻi mālohi koe ʻe ha ngaahi peau lalahi pea naʻa mo hokohoko hono taaʻi koé. Mahalo te ke faingataʻaʻia ke tuʻu lelei ho vaʻé pea mahalo te ke folo ʻa e tahí pe fāifeinga ke mānava.
Fakaʻaongaʻi ha kiʻi taimi ke fakalaulauloto ai ki he founga ʻe lava ke fakaʻaongaʻi ai ʻa e fakatātā ko ʻení ki he ngaahi fefaʻuhi fakaeloto hangē ko e loto-mamahí, loto-foʻí, mo e loto-taʻotaʻomiá.
Ke tokoni ke vakaiʻi ʻe he kau akó ʻenau mahino ki he tefito ko ʻení, te ke lava ʻo ʻoange ha niʻihi ʻo e ngaahi fakamatala ko ʻení ke fakakaukau ki ai ʻa e kau akó.
Fakakaukau ʻi he faʻa lotu ki he ngaahi fakamatala ko ʻení. Hiki ʻi hoʻo tohinoá ʻa e lahi ʻo e kaunga ʻa e fakamatala takitaha kiate koé (ʻo fakaʻaongaʻi ʻa e ngaahi tali “ʻio,” “lahi taha,” “meimei pē,” mo e “ʻikai ʻaupito”).
-
ʻOku ou ʻiloʻi ʻa e faikehekehe ʻo e loto-mamahí, loto-foʻí, mo e loto-taʻotaʻomiá.
-
ʻOku ou ʻiloʻi ʻa e ngaahi fakaʻilonga ʻo e loto-taʻotaʻomiá.
-
ʻOku ou ʻiloʻi ʻa e feituʻu ke maʻu mei ai ha tokoni kapau ʻoku ou ongoʻi loto-taʻotaʻomia.
-
ʻOku ou ʻiloʻi ʻa e founga ʻe lava ke tokoniʻi ai au ʻe he Tamai Hēvaní mo Sīsū Kalaisi ʻi he taimi ʻoku ou loto-mamahi pe loto-taʻotaʻomia aí.
Loto-mamahí mo e loto-taʻotaʻomiá
Tokoni ke mahino ki he kau akó ʻoku faingataʻa ʻa e loto-mamahí mo e loto-foʻí ka ko ha ngaahi ʻelemēniti mahuʻinga ia ʻo ʻetau tupulakí. ʻOku nau hangē ko e fanga kiʻi peau iiki angé, ko e ngaahi tali angamaheni ki he ngaahi faingataʻa mo e ngaahi meʻa fakamamahi ʻo e moʻuí. Fakamatalaʻi ange ko e loto-taʻotaʻomiá ʻoku mahulu hake ia ʻi he loto-mamahí pē. ʻOku ʻikai lelei mo uesia maʻu pē ʻe he loto-taʻotaʻomiá ʻa e anga ʻo e fakakaukaú, ongó, mo e tōʻonga ʻa ha taha (hangē ko e ngaahi peau lalahi angé). ʻOku kau ʻi he ngaahi fakaʻilonga ʻo e loto-taʻotaʻomiá ʻa e toutou loto-mamahí, siva ʻo e ʻamanakí, ongoʻi ʻikai haʻate mahuʻingá, siʻisiʻi ʻo e iví, mole ʻo e tokanga ki he ngaahi ʻekitivitī ne faʻa fakafiefia kimuʻá, ongoʻi hangē ha kavenga kiate kinautolu ʻoku mou feohí, mo e ngaahi fakakaukau ʻo e maté mo e taonakitá. ʻIkai ngata aí, ko e taimi ʻoku loto-taʻotaʻomia ai ha niʻihi mahalo te nau ongoʻi ʻoku taʻofi ʻenau malava ke ʻiloʻi ʻa e Laumālié. (Vakai, “Ko Hono Maʻu ha Mahino ki he Loto-Mamahí mo e Kulukiatamakí,” ʻi he Ko Hono Maʻu ha Mālohi ʻi he ʻEikí: Ivi Matuʻuaki Fakaelotó [2021], 75.)
Fakakaukau ki hoʻo moʻuí, fakalaulauloto pe ko e hā ʻa e faʻahinga peau te ne lava ʻo fakamatalaʻi ho tuʻunga fakaeloto lolotongá.
ʻI hoʻo ako ʻi he ʻaho ní, fekumi ʻi he faʻa lotu ki he ngaahi ueʻi ʻa e Laumālié ke tokoniʻi koe mo kinautolu ʻokú ke ʻilo ʻoku nau aʻusia ʻa e loto-mamahí mo e loto-taʻotaʻomiá.
ʻOku fakamatalaʻi ʻi he ʻĪsaia 61:1–3 ʻa e ngaahi founga lahi ʻe lava ke tokoniʻi ai kitautolu ʻe he Fakamoʻuí. Lau ʻa e ngaahi veesi ko ʻení, ʻo kumi ʻa e ngaahi kupuʻi lea ʻokú ke pehē ʻe lava ke fakaʻaongaʻi ʻi hono tokoniʻi ha taha ʻoku loto-mamahi pe loto-taʻotaʻomia. ʻOku ʻuhinga ʻa e foʻi lea “ko au” ʻi he ngaahi veesi ko ʻení kia Sīsū Kalaisi, ko e Mīsaiá.
-
Ko e hā ha ngaahi foʻi lea pe kupuʻi lea naʻe mahuʻinga kiate koe? Ko e hā naʻá ke ʻilo ʻe lava ʻo tokoni ki ha taha ʻoku fefaʻuhi mo e loto-mamahí pe loto-taʻotaʻomiá?
ʻE lava ke lave ʻa e kau akó ki he malava ʻa e Fakamoʻuí ke tokoni, fakafiemālieʻi, mo hiki hake ʻa e loto-mamahí, ʻa kinautolu ʻoku pōpula pe ongoʻi pōpulá, kinautolu ʻoku tangí, pea mo kinautolu ʻoku nau ongoʻi ha laumālie ʻo e mafasiá.
Hili hono ʻoange ha faingamālie ki he kau akó ke nau vahevahé, fakaʻaliʻali ʻa e lea ko ʻeni ʻa Sisitā Leina I. ʻĀpetó. ʻE lava ke tokoni ʻene fakamatalá ke ʻiloʻi ʻe he kau akó ʻa e meʻa te nau lava ʻo fai ke fekumi ki ha fakafiemālié.
Naʻe akoʻi ʻe Sisitā Leina I. ʻĀpeto, ko ha Tokoni Ua kimuʻa ʻi he Kau Palesitenisī Lahi ʻo e Fineʻofá:
[Lolotonga e Ngaahi Faingataʻá, ʻEiki Ta Feʻao Pē]!
ʻOku fakamoʻoni ʻa Sisitā ʻApeto ʻe lava ke tokoniʻi ʻe he Fakamoʻuí ʻa e fānau kotoa ʻa e ʻOtuá ke nau kātekina e ngaahi vaivai fakaeʻatamai mo fakatuʻasinó.
ʻOku hangē pē ʻa e ʻutó ko e ngaahi konga kehe ʻo e sinó, ʻoku moʻulaloa ki he mahamahakí, ngaahi faingataʻaʻiá, pea mo e fetōʻaki ʻa e ngaahi kemikalé. Ko e taimi ʻoku faingataʻaʻia ai hotau ʻatamaí, ʻoku lelei ke tau kole ha tokoni mei he ʻOtuá, kinautolu ʻoku tau feohí, pea mo e kau mataotao fakafaitoʻo mo fakaeʻatamaí. …
… ʻOku angamaheni pē ke ke ongoʻi loto-mamahi pe hohaʻa ʻi he ngaahi taimi ʻe niʻihi. Ko e loto-mamahí mo e loto-taʻotaʻomiá, ko ha ongo fakanatula ia ki he tangatá. Ka neongo ia, kapau ʻoku tau loto-mamahi maʻu pē pea kapau ʻoku taʻofi ʻe heʻetau mamahí ʻa ʻetau malava ko ia ke ongoʻi e ʻofa ʻa ʻetau Tamai Hēvaní mo Hono ʻAló pea mo e ivi tākiekina ʻo e Laumālie Māʻoniʻoní, pea mahalo ʻoku tau moʻua kitautolu ʻi he loto-taʻotaʻomiá, loto-hohaʻá, pe ko ha tūkunga fakaeloto kehe. (Reyna I. Aburto, “[Lolotonga e Ngaahi Faingataʻá, ʻEiki Ta Feʻao Pē]!,” Liahona, Nōvema 2019, 57)
-
Ko e hā ha ngaahi moʻoni te tau lava ʻo ako mei he pōpoaki ʻa Sisitā ʻĀpetó?
Tokoni ke mahino ki he kau akó ʻa e moʻoni ko e taimi ʻoku faingataʻaʻia ai hotau ʻatamaí, ʻoku totonu ke tau fekumi ki ha tokoni mei he ʻOtuá, mei he niʻihi ʻoku tau feohí, pea mei he kau mataotao fakafaitoʻo mo fakaʻatamaí.
Fekumi ki ha tokoni mei he ʻOtuá, niʻihi kehé, mo e kau mataotaó
Ke tokoni ke mahino lelei ange ki he kau akó ʻa e tefitoʻi moʻoni ko ʻení, fakaafeʻi kinautolu ke peluki ha laʻipepa ki ha konga ʻe tolu ke faʻu ha kiʻi tohi tufa. Te nau lava ʻo lekooti ʻi he kiʻi tohí ʻa e meʻa ne nau ako fekauʻaki mo e fekumi ki ha tokoni ki he loto-mamahí pe loto-taʻotaʻomiá. ʻE lava ke tokoni ʻeni ʻi he taimí ni pe ʻi he kahaʻú kiate kinautolu pe ko ha taha ʻoku nau ʻofa ai. ʻE lava ke fakahingoa ʻe he kau akó ʻa e konga ʻe tolú ko e “Kumi tokoni mei he ʻOtuá,” “Kumi tokoni mei he niʻihi kehé,” mo e “Kumi tokoni mei he kau mataotaó.” Pea ʻoange leva ʻa e laʻipepa tufa ʻoku ui ko e “Kumi Tokoni.” ʻE lava ke ngāue fakafoʻituitui pe fakakulupu iiki ʻa e kau akó pea hiki ʻenau tali ki he ngaahi fehuʻi ʻi he laʻipepa tufá ʻi heʻenau kiʻi tohi tufá.
Kumi Tokoni
Kumi tokoni mei he ʻOtuá
Kuo talaʻofa mai ʻe he Tamai Hēvaní ha tokoni fakalangi koeʻuhí ke tau lava ʻo kātekina ʻa e ngaahi faingataʻa fakamatelie kotoa pē. Kuó Ne talaʻofa mai ha ngaahi founga lahi ʻe hoko mai ai ʻEne tokoní. Kapau ʻoku ʻikai ke tau sio ki Heʻene tokoní ʻi ha founga pē ʻe taha, ʻoku mahuʻinga maʻu pē ke ʻoua naʻa tau foʻi. Hokohoko atu hoʻo kumí. ʻOkú Ne ʻi ai.
-
Ko e hā ʻokú ke ʻilo fekauʻaki mo e Tamai Hēvaní mo Sīsū Kalaisi ʻokú ne ʻoatu kiate koe ʻa e loto-falala te Na lava ʻo tokoni ʻi he loto-mamahí mo e loto-taʻotaʻomiá?
Lau ʻa e Sēkope 2:8; ʻAlamā 26:27–28; Tokāteline mo e Ngaahi Fuakava 6:36; 136:29. Kumi ha ngaahi founga te tau lava ai ʻo fekumi ki he tokoni ʻa e ʻEikí ʻi he taimi ʻoku tau loto-mamahi pe loto-taʻotaʻomia aí.
-
Ko e hā ʻoku akoʻi mai ʻe he ngaahi veesi ko ʻení ke tau fai ʻi he taimi ʻoku tau loto-mamahi pe loto-taʻotaʻomia aí?
-
Ko e hā ha ngaahi founga kehe te tau lava ai ʻo kumi tokoni mei he Tamai Hēvaní mo Sīsū Kalaisi?
Kapau ʻoku ʻikai fuʻu fakataautaha, vahevahe ha meʻa kuó ke aʻusia ʻi hoʻo fekumi ki ha tokoni mei he Tamai Hēvaní mo Sīsū Kalaisi.
Kumi tokoni mei he niʻihi kehé
Naʻe akoʻi ʻe Palesiteni Sipenisā W. Kimipolo ʻo pehē:
ʻOku ʻafioʻi kitautolu ʻe he ʻOtuá, pea ʻokú Ne tokanga mai. Ka ‘okú ne fa‘a feau ʻetau ngaahi fiemaʻú ʻo fakafou mai ʻi ha taha kehe. (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 100)
ʻI he taimi ʻoku tau ongoʻi loto-mamahi pe loto-taʻotaʻomia aí, ʻe lava ke tau ongoʻi ʻoku ʻahiʻahiʻi kitautolu ke tau mavahe pe fakamavaheʻi kitautolu mei he niʻihi kehé. ʻI hono fai ʻení ʻe lava ke fakangatangata ʻa ʻetau malava ke vakai ki he tokoni ʻoku ʻomi ʻe he Tamai Hēvaní kiate kitautolú. ʻE lava ke kau ʻi he tokoni ki he niʻihi kehé ʻa e talanoa ki he mātuʻá, kau mēmipa falalaʻanga ʻo e fāmilí, pe kau taki ʻo e Siasí.
Hiki ha meʻa ʻe ua pe tolu ʻe lava ke fai ʻe ha taha ʻoku faingataʻaʻia ke tokoni ki he niʻihi kehé pe tuku ke tokoniʻi kinautolu ʻe he niʻihi kehé.
Kapau ʻoku ʻikai fuʻu fakataautaha, vahevahe ha taimi kuo tokoniʻi ai koe ʻe ha mēmipa ʻo e fāmilí pe kaungāmeʻa lolotonga ʻa e ngaahi taimi ʻo e loto-mamahí pe loto-taʻotaʻomiá.
Kumi tokoni mei he kau mataotaó
Ko e maʻuʻanga tokoni mahuʻinga ʻe taha te tau lava ʻo fekumi ki aí ko e fakapotopoto ʻo e ngaahi kautaha fakafaitoʻo mo fakaʻatamai ʻoku falalaʻangá. Fakakaukau ki hono fakafehoanaki kimuʻa ʻo e loto-mamahí mo e loto-taʻotaʻomiá ki he ngaahi peau ʻo e tahí. ʻI he taimi ʻoku tau loto-mamahi aí (fekuki mo e fanga kiʻi peau iiki angé), ʻoku totonu ke tau muimui ki he fakahinohino ʻa e Laumālie Māʻoniʻoní ke ʻiloʻi ʻa e taimi ke fekumi ai ki ha tokoni fakapalōfesinalé. Ka neongo ia, kapau te tau ongoʻi loto-taʻotaʻomia pe taonakita (fehangahangai mo ha ngaahi peau lalahi), ʻoku mātuʻaki mahuʻinga ʻa e fekumi ki ha tokoni fakapalōfesinalé.
Lau ʻa e lea ko ʻeni naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi ki he meʻa kuo ʻomi ʻe he Tamai Hēvaní ke tokoniʻi kitautolu ʻi he taimi ʻoku tau faingataʻaʻia aí:
Fekumi ki he faleʻi ʻa ha kakai falalaʻanga kuo fakamoʻoniʻi ʻenau akó, taukei fakapalōfesinalé, mo e ngaahi tuʻunga ʻulungaanga leleí. Tala totonu kiate kinautolu ho hisitōliá mo ho ngaahi faingataʻaʻiá. Fakakaukauʻi ʻi he faʻa lotu mo e fakapotopoto ʻa e faleʻi ʻoku nau ʻoatú mo e ngaahi founga ʻoku nau pehē ʻe fakaleleiʻi ʻakí. Kapau ʻokú ke puke ʻi he ʻapenitikí, ʻe finangalo ʻa e ʻOtuá ke ke feinga ke maʻu ha tāpuaki ʻo e lakanga fakataulaʻeikí pea maʻu mo e tokoni fakafaitoʻo lelei taha ʻe ala maʻú. ʻOku pehē pē ʻa e ngaahi palopalema fakaelotó. ʻOku finangalo ʻa e Tamai Hēvaní ke tau fakaʻaongaʻi ʻa e ngaahi meʻa-foaki fakaofo kotoa pē kuó Ne foaki mai ʻi he kuonga fakakōsipeli nāunauʻiá ni. (Jeffrey R. Holland, “Hangē ha Ipu Kuo Maumaú,” Liahona, Nōvema 2013, 41)
Hiki ʻi hoʻo kiʻi tohi tufá ha konga ʻo e lea ʻa ʻEletā Hōlani naʻe ʻuhingamālie kiate koé.
-
ʻOkú ke pehē ko e hā ʻoku mahuʻinga ai ki ha taha ke fekumi ki ha tokoni fakapalōfesinale ki he loto-taʻotaʻomiá?
Tokoni ke ʻiloʻi ʻe he kau akó ʻa e feituʻu te nau tafoki ki ai ke fekumi ki ha tokoni fakapalōfesinalé. ʻE lava ke faingofua pē ʻa e ngaahi fakakaukaú ʻo hangē ko haʻo talanoa ki ha faifaleʻi fakaako, mātuʻa, pe taki falalaʻanga ʻo e Siasí ke tokoniʻi kinautolu ke maʻu ha palōfesinale ʻoku feʻungá. Te ke lava ʻo fakaafeʻi ʻa e kau akó ke nau feinga ke ʻiloʻi ʻa e laine tokoni ki he fakaʻehiʻehi mei he taonakitá pe uepisaiti ki homou feituʻú (vakai, suicide.ChurchofJesusChrist.org ki he ngaahi laine tokoní mo e maʻuʻanga tokoní). Te nau lava ʻo hiki ʻa e ngaahi maʻuʻanga tokoni ko ʻení ʻi heʻenau kiʻi tohi tufá. ʻE lava ke fakaʻilongaʻi ʻe he kau akó ʻa e peesi fakaʻehiʻehi mei he taonakitá mei he uepisaiti ʻa e Siasí ʻi ha meʻangāue fakaʻilekitulōnika.
ʻE lava ke maʻu ʻa e ngaahi maʻuʻanga tokoni ki he talanoa fekauʻaki mo e taonakitá ʻi he suicide.ChurchofJesusChrist.org pea ʻi he “Ngaahi ʻEkitivitī ʻOku Tānaki Atu ki he Akó” ʻi he lēsoni ko ʻení.
Mahalo ʻe ongoʻi ʻe ha niʻihi ʻoku fefaʻuhi mo e loto-taʻotaʻomiá ʻoku fuʻu tōtuʻa ʻenau fakatupu ha kavenga mafasia ki he niʻihi kehé pea aʻu pē ki he ʻEikí. Tokoniʻi ʻa e kau akó ke nau manatuʻi ʻa e ʻofa, faʻa kātaki, mo e mālohi haohaoa ʻa e ʻEikí ʻi heʻenau moʻuí pea ʻokú Ne finangalo ke tokoniʻi kitautolu ke tau fuesia ʻetau ngaahi kavengá. Te ke lava ʻo fakamanatu ʻi he ʻofa ki he kau akó ʻoku ʻi ai maʻu pē ha ʻamanaki lelei ki ha taha ʻokú ne aʻusia ʻa e loto-taʻotaʻomiá pe ngaahi fakakaukau ʻo e taonakitá.
Toe vakaiʻi ʻa e meʻa kuó ke akó
Fakaafeʻi ʻa e kau akó ke nau aleaʻi ʻa e ʻuhinga ʻoku mahuʻinga kotoa ai ʻa e fekumi ki ha tokoni mei he ʻOtuá, niʻihi kehé, mo e kau mataotaó ʻi he taimi ʻoku fekuki ai mo e loto-mamahí mo e loto-taʻotaʻomiá. ʻE lava ke vahevahe ʻe ha kau ako ʻe niʻihi ʻa e meʻa kuo nau ako mo ongoʻi ʻi he ʻaho ní, kapau ʻoku ʻikai fuʻu fakataautaha.
Fakaafeʻi ʻa e kau akó ke nau fekumi ki he fakahinohino ʻa e Laumālie Māʻoniʻoní ʻi heʻenau fakakakato ʻa e ngaahi meʻá ni.
Hiki ʻeni ʻi hoʻo tohinoa akó pe ʻi hoʻo kiʻi tohi tufá:
-
Ko e hā te ke fai ke fekumi ai ki he tokoni ʻa e ʻEikí kapau ʻokú ke ongoʻi loto-mamahi pe loto-taʻotaʻomia (ʻe lava ke kau heni ʻa e ngaahi potufolofola te ke lau pe hiva toputapu ʻokú ne ʻomi kiate koe ʻa e ʻamanaki leleí)
-
Meʻa te ke fai ke ke tokoni ai ki he niʻihi kehé ʻi he taimi ʻokú ke ongoʻi loto-mamahi pe loto-taʻotaʻomia aí
-
Meʻa te ke lava ʻo fai ke tokoniʻi ha taha ʻoku ongoʻi loto-mamahi pe loto-taʻotaʻomia
-
Ko e hā te ke lea ʻaki ki ha taha ʻoku faingataʻaʻia mo fifili pe ʻoku totonu nai ke ne fekumi ki ha faifaleʻi ki he moʻui lelei fakaeʻatamaí
Fakakaukau ke fakamanatu ki he kau akó ʻe lava ʻe he Tamai Hēvaní mo Sīsū Kalaisi ʻo “holoholoʻi ʻa e loʻimata kotoa pē mei [hotau] matá” (Fakahā 21:4) mo e “takatakaiʻi [kitautolu] ʻaki ʻa e ongo nima ʻo [ʻEne] ʻofá” (Tokāteline mo e Ngaahi Fuakava 6:20).