“Lēsoni 190—Ko Hono Fakatupulaki ha Ngaahi Vā Fetuʻutaki ʻOku Leleí: Ko Hono Fokotuʻu ha Ngaahi Fehokotaki Mālohi mo e Fāmilí mo e Ngaahi Kaungāmeʻá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Fakatupulaki ha Ngaahi Vā Fetuʻutaki ʻOku Leleí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 190—Tuʻunga Moʻui Lelei Fakatuʻasinó mo Fakaelotó
Ko Hono Fakatupulaki ha Ngaahi Vā Fetuʻutaki ʻOku Leleí
Ko Hono Fokotuʻu ha Ngaahi Fehokotaki Mālohi mo e Fāmilí mo e Ngaahi Kaungāmeʻá
ʻOku finangalo ʻa e Tamai Hēvaní ke tau ʻofa ʻiate Ia mo e niʻihi ʻoku tau feohí. ʻI heʻetau fakatupulaki ha fehokotaki vāofi mo e fāmilí mo e ngaahi kaungāmeʻá, ʻe lava ke tāpuekina kitautolu ʻaki ʻa e fiemālie, mālohi, mo e poupou ʻoku fiemaʻú lolotonga e taimi nongá mo e faingataʻá fakatouʻosi. ʻE lava ke tokoni ʻa e lēsoni ko ʻení ki he kau akó ke nau fekumi ki he tokoni ʻa e ʻEikí ke fokotuʻu ha ngaahi vā fetuʻutaki ʻoku tokoni ki heʻenau moʻui lelei fakalūkufuá mo e tuʻunga leleí.
Ngaahi ʻEkitivitī Ako ʻOku Ala Fakahokó
Ko e hā ʻa e meʻa ʻoku mahuʻinga tahá?
Fakakaukau ke fakaafeʻi e kau akó ke nau hiki ʻi he palakipoé ʻa e ngaahi meʻa ʻoku nau ongoʻi ʻoku mahuʻinga taha ʻi he moʻuí.
Fakaʻaliʻali ʻa e fakamatala ko ʻení pea fakaafeʻi ha tokotaha ako ke ne lau ia.
Naʻe akonaki ʻa Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, fekauʻaki mo e meʻa ʻoku mahuʻinga tahá:
ʻI heʻetau tafoki ki he Tamai Hēvaní mo fekumi ki Hono potó ʻi he ngaahi meʻa mahuʻinga tahá, ʻoku tau toutou ako ai hono mahuʻinga ʻo e tefitoʻi vā fetuʻutaki ʻe faá: mo hotau ʻOtuá, mo hotau ngaahi fāmilí, mo hotau kāingá, pea mo kitautolu pē. (Dieter F. Uchtdorf, “ʻO e Meʻa Mahuʻinga Tahá,” Liahona, Nōvema 2010, 21)
-
Ko e hā ʻokú ke ako mei he fakamatala ‘a Palesiteni ʻUkitofá?
Fakaafeʻi ʻa e kau akó ke siakaleʻi ʻa e ngaahi kupuʻi lea naʻa nau tohi ʻi he palakipoé ʻokú ne fakahaaʻi ko hotau vā fetuʻutaki mo e ʻOtuá mo e niʻihi kehé ʻoku kau ia ʻi he ngaahi meʻa ʻoku mahuʻinga taha ʻi he moʻuí. Kapau ʻe fiemaʻu, tānaki atu “ko hotau vā fetuʻutaki mo e ʻOtuá mo e niʻihi kehé” ki he lisi ʻi he palakipoé.
Fakamatalaʻi ange ʻe nofotaha ʻa e lēsoni ko ʻení ʻi hotau ngaahi vā fetuʻutaki mo e niʻihi kehé. Fakaafeʻi e kau akó ke nau fakakaukau ki ha niʻihi ʻo honau ngaahi vā fetuʻutaki lolotongá pea fakakaukau pe ʻoku ʻomi nai kinautolu ʻe he ngaahi vā fetuʻutaki ko ʻení ke nau ofi ange ki he ʻOtuá mo ʻoange kiate kinautolu ʻa e mālohi mo e poupou ʻoku nau fiemaʻu ʻi heʻenau moʻuí. Te nau lava foki ʻo fakalaulauloto ki he founga ʻe ala finangalo ai e ʻEikí ke nau fakamālohia ʻa e ngaahi vā fetuʻutaki lolotongá pe fakatupulaki ha ngaahi vā fetuʻutaki foʻou.
Ko hotau vā fetuʻutakí
Tufa ʻa e laʻipepa tufa ko e “Ngaahi Sīpinga ʻo e Ngaahi Vā Fetuʻutaki Mahuʻingamālie ʻi he Hisitōlia ʻo e Siasí mo e Tokāteline mo e Ngaahi Fuakavá,” pea fakaafeʻie kau akó ke nau kumi ha fakamoʻoni ʻo e moʻoni ko ʻení: Ko e founga ʻe taha ʻe lava ke tāpuekina ai ʻe he ʻOtuá ʻetau moʻuí mo fakamālohia ʻetau tuí ʻoku fakafou ia ʻi ha ngaahi vā fetuʻutaki mahuʻingamālie mo e niʻihi kehé. (Mahalo te ke fiemaʻu ke hiki ʻa e moʻoni ko ʻení ʻi he palakipoé.)
Fakakaukau ki ha ngaahi founga ke tokoniʻi ai ʻa e kau akó ke nau fakaʻaongaʻi ʻa e laʻipepa tufá. Ko e founga ʻe taha ko hono fokotuʻutuʻu kinautolu ki ha ngaahi kulupu tautau toko tolu pea vahe ki he mēmipa takitaha ʻo e kulupú ke nau ako ha taha ʻo e ngaahi sīpinga ʻi he laʻipepa tufá. ʻI he ʻosi hono ako ʻe he kau akó ʻenau sīpingá, poupouʻi kinautolu ke nau taufetongi ʻi hono vahevahe mo ʻenau kulupú ʻa e meʻa ne nau ako fekauʻaki mo e founga ʻe lava ke tāpuekina ai kitautolu ʻe he ʻOtuá ʻo fakafou ʻi hotau ngaahi vā fetuʻutaki mo e niʻihi kehé.
Ngaahi Sīpinga ʻo e Ngaahi Vā Fetuʻutaki Mahuʻingamālie ʻi he Hisitōlia ʻo e Siasí mo e Tokāteline mo e Ngaahi Fuakavá
Sīpinga 1
Hili ʻa e ʻaʻahi ʻa Siosefa Sāmita ki he Moʻunga ko Komolá ʻi Sepitema 1823, naʻá ne vahevahe ha ngaahi fakaikiiki fekauʻaki mo ʻene aʻusiá pea mo e ʻaʻahi ʻa e ʻāngelo ko Molonaí ki hono fāmilí. Naʻe hokohoko atu hono vahevahe ʻe Siosefa ʻene ngaahi aʻusiá mo e mata meʻa-hā-maí mo kinautolu naʻe ofi taha kiate iá. ʻI he manatu ʻa e faʻē ʻa e Palōfitá ko Lusi Meki Sāmita ki he ngaahi aʻusia toputapú ni, naʻá ne hiki ai ʻa e ngaahi meʻá ni:
Naʻá ma fakatahatahaʻi ʻema fānaú ʻi he efiafi kotoa pē. Te u pehē na‘a mau hoko ko ha fāmili mātu‘aki makehe ‘i ha toe fāmili kuo faifaiangé pea mo‘ui ‘i māmaní, ‘o tangutu fuopotopoto kotoa, ‘a e tangata‘eikí, fine‘eikí, ngaahi foha, mo e ngaahi ‘ofefiné kotoa ‘o fanongo fakalongolongo mo tokanga ki he ngaahi akonaki fakalotu ‘a ha tamasi‘i. …
… Na‘e nofo‘ia ‘e he feohi‘anga lelei mo fakafiefia tahá ‘a homau ‘apí. Na‘e ‘ikai ha fefūsiaki pe feta‘emahino‘aki te ne uesia ‘emau nofo nongá, pea na‘e toka ‘a e melinó ‘i homau lotolotongá. (Lucy Mack Smith, ʻi he Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 563)
-
Ko e hā ʻoku makehe kiate koe fekauʻaki mo e fāmili Sāmitá mei he fakamatala ko ʻení?
-
Naʻe tokoniʻi fēfē nai ʻa Siosefa Sāmita ʻe he ʻofa naʻá ne ongoʻi ʻi hono ʻapí ke ne fakahoko hono uiuiʻi mahuʻingá?
-
Ko e hā ʻokú ke ako mei he sīpinga ko ʻení fekauʻaki mo e founga ʻe lava ke tāpuekina ai koe ʻe he ʻOtuá, pe ko e founga te ke lava ai ʻo tokoniʻi ʻa e niʻihi kehé ke tāpuekina kinautolu, ʻo fakafou ʻi ha ngaahi vā fetuʻutaki ʻoku mahuʻingamālié?
Sīpinga 2
Lolotonga ʻene nofo ʻi Nāvū, ʻIlinoí, naʻe fakakaukauloto ʻa Siosefa Sāmita ki he ngaahi lelei ʻo e ngaahi vā fetuʻutaki ʻoku mahuʻingamālié:
Te u lau ia ko e taha ʻo e ngaahi tāpuaki maʻongoʻonga tahá, kapau ʻe fakamamahiʻi au ʻi māmani, ‘o kapau ko hoku tufakangá ke ‘i ha feitu‘u ‘e lava ke takatakai‘i kotoa ai au ‘e hoku ngaahi tokouá mo e ngaahi kaungāme‘á. (Ngaahi Akonakí: Siosefa Sāmita, 539)
-
ʻE lava fēfē ke tokoniʻi kitautolu ʻe he fāmilí mo e ngaahi kaungāmeʻá ʻi he taimi ʻoku tau aʻusia ai ha ngaahi pole faingataʻá?
-
Ko e hā ha ngaahi founga kehe ʻe lava ke tāpuekina ai ʻe he fāmilí mo e ngaahi kaungāmeʻá ʻetau moʻuí?
Sīpinga 3
Lau ʻa e Tokāteline mo e Ngaahi Fuakava 108:7, ʻo kumi ha faleʻi naʻe fai ʻe he ʻEikí kia Laimani Selamani ʻo e Kau Fitungofulú.
-
Ko e hā ʻe faingataʻa ai ʻi he taimi ʻe niʻihi ke muimui ki he faleʻi ko ʻení?
-
Ko e fē ha taimi kuó ke ongoʻi ai kuo fakamālohia pe fakatupulaki koe ʻe ha feohi mo ha taha kehe?
Fakaafeʻi ʻa e kau akó ke nau vahevahe mo e kalasí ʻa e meʻa ne nau akó mo e founga ʻe lava ke tāpuekina ai kitautolu ʻe he ʻOtuá ʻi hotau ngaahi vā fetuʻutakí.
-
Ko e hā kuó ke ako fekauʻaki mo e mahuʻinga ʻo hono fakatupulaki ha ngaahi vā fetuʻutaki mahuʻingamālie mo e niʻihi kehe ʻi hoʻo moʻuí?
-
ʻE uesia fēfē ʻe hono fakatupulaki mo fakamālohia ʻa e ngaahi vā fetuʻutaki mo e niʻihi kehé hotau vā fetuʻutaki mo e ʻOtuá pea pehē ki heʻetau moʻui lelei fakalūkufuá mo e tuʻunga leleí?
Ko hono fakatupulaki ʻo e vā fetuʻutakí
Mahalo te ke fie fakaʻaongaʻi ha taimi ke aleaʻi ai ʻa e ngaahi taukei ki hono fakatupulaki ʻo e vā fetuʻutakí. Fakakaukau ke ʻoange ha laʻipepa ʻoku teʻeki tohi ai ha meʻa maʻá e tokotaha ako kotoa pē. Poupouʻi kinautolu ke nau tohi ha meʻa ʻe taha pe lahi ange ʻe lava ʻo tokoni ki ha taha ke ne fakatupulaki pe fakamālohia ha vā fetuʻutaki mo ha taha kehe. Tānaki ʻa e ngaahi laʻipepá pea lau leʻolahi ia ki he kalasí. Kapau ʻe fiemaʻu, vahevahe ha niʻihi pe kotoa ʻo e ngaahi fakakaukau ko ʻení mo e kau akó.
-
Kumi ha faitatau ʻi he ngaahi meʻa ʻokú mo saiʻia taha aí.
-
Ako mo fakaʻaongaʻi ʻa e hingoa ʻo e kakaí.
-
Malimali.
-
Fakafanongo fakalelei kae lea ʻa e niʻihi kehé.
-
Fakalāngilangiʻi mo fakahīkihikiʻi moʻoni ʻa e kakaí.
-
Fakaʻehiʻehi mei hono fakamāuʻi pe kumi ha fehalaākí.
-
Fakahaaʻi ha tokanga moʻoni.
-
Lotua ʻa e kakaí ʻaki honau hingoá.
-
Fekumi ki he ʻofa faka-Kalaisí.
-
Faʻa kātaki.
-
Kumi ha ngaahi faingamālie ngāue tokoni.
Fakakaukau ke ʻoange ki he kau akó ha taimi ʻi he kalasí ke nau akoako fakahoko ai ha niʻihi ʻo e ngaahi taukei ko ʻeni ki hono fakatupulaki ʻo e vā fetuʻutakí. ʻE lava ke tokoni ʻa e sīpinga ko ʻení kapau ʻoku ʻikai ke feʻiloʻaki lelei ʻe he kau akó honau ngaahi hingoá. Kapau kuo ʻosi feʻilongaki hoʻo kau akó, fakakaukau ke fili ha taukei kehe ke akoako fakahoko.
Fakaʻuhingaʻí: Fakamatalaʻi ange ko hono fakaʻaongaʻi ʻa e hingoa ʻo e kakaí ko ha taukei ʻaonga ia ki hono fakatupulaki ha ngaahi vā fetuʻutaki ʻoku leleí. Fakamatalaʻi ange ʻoku ui kitautolu ʻe he ʻEikí ʻaki hotau hingoá (vakai, Sēnesi 35:10; Luke 19:5; ʻĪnosi 1:5; Siosefa Sāmita—Hisitōlia 1:17). Fakakaukau ke fehuʻi ki he kau akó pe ʻoku fēfē ʻenau ongoʻi ʻi he taimi ʻoku ʻilo mo ui ʻaki ai kinautolu ʻe he niʻihi kehé honau hingoá.
Sīpingá: Talaange ki he kau akó ʻe fakatukupaaʻi kinautolu ke nau feakoʻaki honau hingoá mo feuiʻaki honau hingoá. Fakamatalaʻi ange ko e founga ʻe taha ke manatuʻi ai ʻa e hingoa ʻo e kakaí ko hono hiki kinautolu pea toe fakamanatu kinautolu. ʻI hoʻo fakahingoa ʻa e mēmipa takitaha ʻo e kalasí, fakaafeʻi ʻa e kau akó ke hiki ha faʻahinga hingoa ne ʻikai ke nau ʻilo.
ʻE lava foki ke tokoni ke fehuʻi ki he kau akó pe ko e hā ʻa e meʻa ʻokú ne taʻofi kinautolu mei hono manatuʻi ʻo e hingoa ʻo e kakaí pea mo e founga te nau lava ai ʻo ikunaʻi ʻa e ngaahi faingataʻa ko ʻení.
Akoako Fakahoko: ʻOange ki he kau akó ha ngaahi miniti siʻi ke nau toe vakaiʻi ai ʻa e ngaahi hingoa kuo nau hikí. Tuku leva ke nau akoako fakahoko ia. ʻE lava ke ke fakatauhoa kinautolu ʻo vakai pe te nau lava ʻo ngāue fakataha ke fakahingoa ʻa e tokotaha kotoa ʻi he kalasí. Fehuʻi ange pe ko hai te ne lava ʻo fakahingoa ʻa e tokotaha kotoa pē ʻi he kalasí ʻiate kinautolu pē, pea kapau ʻe lava ʻe ha taha, fakaafeʻi kinautolu ke nau fai ia. Kapau ʻoku ʻi ai ha faingataʻa kehe ʻoku feʻunga, fakaafeʻi ʻa e kau akó ke nau liliu ʻa e feituʻu ʻoku nau tangutu aí, pea vakai pe ʻe kei lava pē ʻe he kau akó ʻo fakahingoa ʻa e tokotaha kotoa pē.
Kapau ʻoku ʻi ai ha taimi feʻunga, fili ha taukei kehe. Hangē ko ʻení, fakaafeʻi ʻa e kau akó ke nau kumi ʻa e ngaahi meʻa ʻoku nau faitatau ai mo e niʻihi kehé. Te nau lava ʻo ngāue mo ha taha ʻi he lokí ʻoku ʻikai ke nau faʻa ngāue mo ia pea feʻekeʻaki ha ngaahi fehuʻi ke ʻiloʻi ʻa e ngaahi saiʻia ʻoku nau faitatau aí. Te nau lava leva ʻo hiki ki ha tokotaha ako kehe ke toe fai ʻa e meʻa tatau. (Ke fakatahaʻi ʻa e ongo taukeí fakatouʻosi, poupouʻi ʻa e kau akó ke nau feuiʻaki honau hingoá ʻi he lolotonga ʻenau fehuʻiʻakí.)
Fakaʻaongaʻi fakatāutahá
Fakakaukau ke fakamoʻoni ki he ʻofa ʻoku maʻu ʻe he Tamai Hēvaní mo Sīsū Kalaisi ki he tokotaha ako takitaha. Fakamoʻoniʻi ange ʻe lava ʻe he ʻOtuá ʻo tāpuakiʻi mo fakamālohia ʻenau moʻuí ʻo fakafou ʻi he ngaahi vā fetuʻutaki mahuʻingamālie ʻoku nau feinga ke fakatupulaki mo tanumakí. Te ke lava foki ʻo vahevahe ha sīpinga ʻo hono tāpuekina mo fakamālohia koe ʻe ha vā fetuʻutaki ʻi hoʻo moʻuí.
Fakaafeʻi ʻa e kau akó ke nau fekumi ki he fakahinohino ʻa e Laumālie Māʻoniʻoní ke fai ʻa e ngaahi meʻá ni:
Fakakaukau ki he founga ʻe ala fie tokoniʻi ai koe ʻe he ʻEikí ke fakamālohia ha vā fetuʻutaki lolotonga pe fakatupulaki ha vā fetuʻutaki foʻou. Fakaʻaongaʻi ʻa e meʻa naʻá ke ako ʻi he ʻaho ní, faʻu ha palani ke fakaloloto hoʻo fehokotaki mo e tokotaha ko ʻení. Fakakau ʻa e founga te ke tafoki ai ki he ʻEikí ke maʻu ha tokoni ʻi he founga ko ʻení.