“Lēsoni 184—Ko Hono Tokangaʻi Hotau Sino Fakamatelié: Ko Hono Tauhi e Ngaahi Fono ʻo e Moʻui Lelei Fakaesinó,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Tokangaʻi Hotau Sino Fakamatelié,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
Lēsoni 184: Moʻui Lelei Fakaesino mo Fakaelotó
Ko Hono Tokangaʻi Hotau Sino Fakamatelié
Ko Hono Tauhi e Ngaahi Fono ʻo e Moʻui Lelei Fakaesinó
Ko hotau sino fakamatelié ko ha meʻaʻofa fakaofo ia mei ha Tamai Hēvani ʻofa. ʻOku tau fakaʻapaʻapaʻi e meʻaʻofa ko ʻení ʻaki ʻetau fai ha ngaahi fili fakapotopoto ʻi hono tokangaʻi hotau sinó. ʻE lava ke tokoni e lēsoni ko ʻení ke fakahaaʻi ʻe he kau akó ʻenau houngaʻia ki he Tamai Hēvaní mo Sīsū Kalaisi ʻaki hono tokangaʻi honau sino fakamatelié.
Ngaahi ʻEkitivitī Ako ʻOku Ala Fakahokó
Ko hotau sino fakamatelié
Fakatokangaʻi ange: Lolotonga hono akoʻi ʻo e lēsoni ko ʻení, ʻoku mahuʻinga ke manatuʻi ʻe lava ke faingataʻa ʻa e kaveinga ko ʻení ki ha kau ako ʻe niʻihi. ʻOku mātuʻaki faingataʻa hono tokangaʻi honau sino fakamatelié kiate kinautolu ʻoku ʻi ai honau ngaahi faingataʻaʻia kau ki he maʻu meʻatokoní, faingataʻaʻia fakaesinó, puke lahí, mo ha ngaahi tūkunga kehe.
Tokoni ki he kau akó ke nau teuteu ke ako ʻa e lēsoni ko ʻení ʻaki hono fakaafeʻi kinautolu ke vahevahe ʻa e ngaahi ongo ʻoku maʻu ʻe he kakaí mo e ngaahi ʻulungaanga ʻoku maʻu ʻe he kakaí fekauʻaki mo honau fōtunga fakatuʻasinó. Ko e founga ʻe taha ke fai ai ʻení ko hono hiki e ongo foʻi lea sino fakamatelié ʻi he palakipoé pea fakaafeʻi e kau akó ke vahevahe ʻenau ngaahi fakakaukau fekauʻaki mo e ngaahi fehuʻi ko ʻení:
-
Ko e hā ha ngaahi faingataʻa kehekehe ʻe ala ongoʻi ʻe he kakaí fekauʻaki mo honau sinó?
-
Ko e hā ha ngaahi tōʻonga fakakaukau kehekehe ʻoku maʻu ʻe he kakaí fekauʻaki mo honau sinó?
Fakaafeʻi ʻa e kau akó ke tali ʻa e ngaahi fehuʻi ko ʻení ʻi heʻenau tohinoa akó:
-
Ko e hā hoʻo ongo fekauʻaki mo ho sinó? Ko e hā hono ʻuhingá?
-
Ko e hā hoʻo ongo ki he tuʻunga hoʻo tokangaekina ho sinó? Ko e hā hono ʻuhingá?
ʻI hoʻo ako e lēsoni ko ʻení, fekumi ki ha ueʻi mei he Laumālie Māʻoniʻoní ke ʻiloʻi e founga te ke lava ai ʻo tokangaʻi ho sino fakamatelié.
Moʻoni mei he ʻEikí fekauʻaki mo hotau sinó
Lau ʻa e palakalafi ʻuluaki ʻo e konga “ʻOku Toputapu ho Sinó” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ([2022], 23).
-
Ko e hā ʻa e meʻa naʻe mahuʻinga kiate koé?
ʻI he fevahevaheʻaki ʻa e kau akó, hiki ʻi he palakipoé ha ngaahi moʻoni pē te nau talaatu. Fakakaukau ke kole ki he kau akó ke fakamatalaʻi e ʻuhinga ʻoku nau ongoʻi ai ʻoku mahuʻinga ʻa e moʻoní ki he toʻu tupu he ʻaho ní.
Kapau he ʻikai talaatu ia ʻe he kau akó, tānaki atu ʻa e moʻoni ko ʻení ki he lisi ʻi he palakipoé: Ko ho sinó ko ha meʻaʻofa fakaofo ia mei he Tamai Hēvaní.
-
ʻE liliu fēfē ʻetau fakakaukaú ʻi heʻetau ʻiloʻi ko hotau sinó ko ha meʻaʻofa ia mei he ʻOtuá?
-
ʻE liliu fēfē ʻe he ʻiloʻi ʻo e moʻoni ko ʻení ʻa e founga ʻoku tau tokangaʻi ai hotau sinó?
Ke tokoni ke mahino ki he kau akó ʻa e tefitoʻi moʻoni ko ʻení mo e founga ke tokangaʻi ʻaki e meʻaʻofa ʻo hotau sino fakamatelié, te ke lava ʻo fakamavahevaheʻi ʻa e laʻipepa tufa “Ko Hono Tokangaʻi Hotau Sino Fakamatelié” ki ha ngaahi feituʻu ako ʻe fā. Te ke lava ʻo fokotuʻutuʻu ʻa e kalasí ki ha fanga kiʻi kulupu iiki ʻoku vilo ʻi he ʻekitivitī ako takitaha. Te ke lava ʻo ʻoange ha laʻipepa ʻe tuku maʻu ʻi he feituʻu takitaha maʻá e kau akó ke nau fakakakato ʻa e konga tohí ʻi he fakaʻosinga ʻo e konga takitaha. Hili iá, ʻe lava leva ke lau ʻe he kau akó ʻa e meʻa naʻe tohi ʻe he ngaahi kulupu kehé pea tānaki atu ki ai
Ko Hono Tokangaʻi hotau Sino Fakamatelié
Ko e ʻĪmisi ʻo Hotau Sinó
-
ʻE tākiekina fēfē ʻe he ngaahi fakakaukau ʻa e niʻihi kehé ʻa e anga ʻo ʻetau ongo fekauʻaki mo hotau sinó?
-
ʻOku kehe fēfē ʻa e ngaahi moʻoni ʻoku finangalo e ʻEikí ke tau ʻilo ʻi he Sēnesi 1:26–27 mo e 1 Kolinitō 6:19–20 mei he ngaahi pōpoaki te tau ala maʻu mei he niʻihi kehé?
Ako ʻa e faleʻi ko ʻeni naʻe fai ʻe he ʻEikí ʻo fakafou ʻia Palesiteni Lāsolo M. Nalesoni mo ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi e meʻa ʻe lava ʻo tokoni ki he ʻīmisi hotau sinó:
Ko e taimi kotoa pē te ke sio ai he sioʻatá, fakakaukau ko ho temipalé ho sinó. ʻE lava heʻetau houngaʻia—he moʻoni ko iá he ʻaho kotoa pē—ʻo tākiekina lelei hoʻo ngaahi fili kau ki he anga hoʻo tokangaʻi ho sinó mo hoʻo fakaʻaongaʻi iá. Pea ʻe makatuʻunga ho ikuʻangá mei he ngaahi fili ko iá. (Russell M. Nelson, “Ngaahi Fili ki ʻItānití,” Liahona, Nōvema 2013, 107)
ʻOku ou kōlenga atu … ke mou kātaki ʻo tali ange kimoutolu pē, kau ai e fōtunga homou sinó mo e ākengá, pea siʻi ange hoʻo feinga ke hangē ko ha taha kehé. ʻOku tau kehekehe kotoa pē. ʻOku māʻolunga e niʻihi, pea nounou e niʻihi. ʻOku sino lahi ha niʻihi, pea sino iiki ʻa e niʻihi. Pea ʻoku ʻi ai e taimi ʻe niʻihi ʻoku fie hoko e meimei tokotaha kotoa pē ko ha meʻa ʻoku ʻikai ko kinautolu ia! Ka ʻi he pehē ʻe ha ʻetivaisa ʻe taha ki ha tamaiki fefine taʻu hongofulu tupú: “He ʻikai lava ke ke moʻui mo hohaʻa pe ʻoku siofi nai koe ʻe he māmaní. ʻI he taimi ʻokú ke tuku ai ke hanga ʻe he ngaahi fakakaukau ʻa e kakaí ʻo puleʻi koé, ʻokú ke tukuange ai ho mālohí. … Ko e kī ki he ongoʻi [loto-falalá] ko e fakafanongo maʻu pē ki ho lotó—[ʻa koe moʻoni.]” Pea ʻi he puleʻanga ʻo e ʻOtuá, ko ho tuʻunga moʻoní ʻoku “mahuʻinga hake ia ʻi he ngaahi maka koloá” [Lea Fakatātā 3:15]. (Jeffrey R. Holland, “To Young Women,” Liahona, Nov. 2005, 29)
-
Ko e hā naʻá ke ako mei he ngaahi fakamatala ko ʻení?
Hiki ha meʻa ʻokú ke pehē ʻe fiemaʻu ʻe he ʻEikí ke ke lea ʻaki ki ha taha ʻoku fāifeinga ke ongoʻi lelei fekauʻaki mo hono sinó.
Mohe
Lau ʻa e Tokāteline mo e Ngaahi Fuakava 88:124, ʻo kumi e meʻa naʻe akoʻi ʻe he ʻEikí fekauʻaki mo e mohé.
-
ʻOkú ke pehē ko e hā ʻoku mahuʻinga ai ʻa e mohé?
ʻE lava ke hoko ʻa e ʻikai maʻu ha mohe feʻungá ko ha palopalema fakaemoʻui lelei. ʻOku pehē ʻe he tokolahi taha ʻo e kau mataotaó ko e lelei tahá ke maʻu ʻe he toʻu tupú ha houa mohe ʻe 8–10 ʻi he poʻulí (vakai, National Sleep Foundation, “How Much Sleep Do You Really Need?,” Oct 1, 2020, thensf.org). Ko e ʻikai maʻu ha mohe feʻungá ʻe lava ke ne ʻai ha taha ke helaʻia, ngāue kovi, pea tuʻu laveangofua ki he ngaahi palopalema fakaesino mo fakaʻatamaí. ʻOku hanga ʻe he ongoʻi helaʻiá ʻo ʻai ke tau moʻulaloa ange ki he ʻahiʻahí.
-
Kuó ke fakatokangaʻi fēfē hono hanga ʻe he ngaahi tōʻonga mohé ʻo liliu hoʻo moʻuí?
-
ʻE lava fēfē ʻe he ngaahi tōʻonga mohe leleí ʻo fakatupulaki ʻetau malava ke ngāue maʻá e ʻEikí?
Aleaʻi mo hoʻo kulupú ha faleʻi te ke fai ki ha taha ʻokú ne fie fakaleleiʻi ʻene tōʻonga mohé pe ko ha taha te ke fokotuʻu ange ke nau kumi faleʻi mei ai. Hiki hoʻo ngaahi fakakaukaú ʻi he laʻipepa ʻoku ʻoatú.
Fakamālohisinó mo ha Tōʻonga Moʻui Longomoʻui
ʻOku ʻuhinga ʻa e nofo noá ki hono maumauʻi hotau taimí, fakapikopikó, pe fakaʻehiʻehi mei he ngāué. Lau ha veesi ʻe taha pe ua ʻo e ngaahi veesi ko ʻení, ʻo kumi e ngaahi ongo ʻa e ʻEikí fekauʻaki mo e nofo noa ʻene fānaú: Tokāteline mo e Ngaahi Fuakava 42:42; 60:13; 75:3.
-
ʻOkú ke pehē ko e hā ʻoku finangalo ai e ʻEikí ke tau longomoʻui mo ngāue mālohi kae ʻikai nofo noá?
-
Kuo tāpuekina fēfē koe ʻe he ʻEikí ʻi hoʻo feinga ke longomoʻui mo ngāue mālohí?
-
ʻE fakatupulaki fēfē ʻe he fakamālohisinó mo e tōʻonga moʻui longomoʻuí ʻetau moʻui lelei fakaeʻatamaí? ʻE tokoni fēfē ʻeni ke tau ngāue maʻá e ʻEikí?
Hiki hoʻo faleʻi ki ha taha taʻu hongofulu tupu ʻokú ne fie fakatupulaki ʻene fakamālohisinó mo e tuʻunga longomoʻuí.
Founga Kai ʻOku Fakatupu Moʻui Leleí
Lau ʻa e ngaahi veesi ko ʻení, ʻo kumi e faleʻi ʻa e Fakamoʻuí fekauʻaki mo e ngaahi fili ki he meʻakai fakatupu moʻui leleí: Tokāteline mo e Ngaahi Fuakava 59:16–20; 89:10–16.
-
Ko e hā e ola ʻo ʻetau ngaahi fili ki he meʻakaí ʻi heʻetau moʻuí?
Aleaʻi ha niʻihi ʻo e ngaahi faingataʻa ki he maʻu meʻatokoni fakatupu moʻui leleí. Vahevahe ha ngaahi founga te tau lava ai ʻo fekumi ki he tokoni ʻa e ʻEikí mo ikunaʻi ʻa e ngaahi fakafeʻātungia ko ʻení.
-
Ko e hā ha ngaahi lelei taimi lōloa ʻe lava ke maʻu ʻi he muimui ki he faleʻi ʻa e Fakamoʻuí fekauʻaki mo e maʻu meʻatokoni lelei lolotonga hoʻo kei siʻí?
Hiki fakakulupu ha lisi ʻe tolu ʻo ui ko e “Fakaʻehiʻehi,” “ʻI he Taimi ʻe Niʻihi,” mo e “Moʻui Lelei.” ʻI hoʻomou ngāue fakatahá, fili ha ngaahi meʻakai angamaheni ʻokú ke sio ki ai he ʻaho kotoa pē. Aleaʻi pe ko e fē kulupu ʻe feʻunga mo e meʻakai ko iá.
Hili e takaí, fakaafeʻi e kau akó ke vahevahe e meʻa ne nau akó mo ha faʻahinga meʻa pē ʻoku nau hohaʻa ki ai. ʻE lava ke ʻaonga mo e ngaahi fehuʻi ko ʻení:
-
Ko e hā ʻe lava ke faingataʻa ai ke fakatupulaki ha tōʻonga moʻui lelei mo tokangaʻi lelei hotau sinó?
-
ʻOkú ke pehē ʻe tokoni fēfē hono manatuʻi ko hotau sinó ko ha meʻaʻofa ia mei he ʻOtuá?
-
Kuo tokoniʻi fēfē koe pe ko ha taha ʻokú ke ʻilo ʻe he ʻEikí ke fakatupulaki ha tōʻonga moʻui lelei?
Fakaafeʻi e kalasí ke vahevahe ha ngaahi moʻoni pe ngaahi aʻusia ʻe ala tokoni ki he ngaahi faingataʻa pe ngaahi meʻa ʻoku hohaʻa ki ai e kau akó.
Ke fakaʻosí, fakaafeʻi e kau akó ke hiki ʻi heʻenau tohinoa akó ʻa e meʻa ʻoku nau ongoʻi ʻoku finangalo e ʻEikí ke nau fai ke tokangaʻi lelei ange ai honau sinó