“Lesson 185—Ko Hono Langaki ha Mālohi Fakaeloto ʻi he ʻEikí: Ko Hono Fakatupulaki ʻEtau Falala ki he Tokoni ʻa e ʻEikí ʻi Hotau Ngaahi Faingataʻaʻia Fakaelotó,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Langaki ha Mālohi Fakaeloto ʻi he ʻEikí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 185: Moʻui Lelei Fakaesino mo Fakaelotó
Ko Hono Langaki ha Mālohi Fakaeloto ʻi he ʻEikí
Ko Hono Fakatupulaki ʻEtau Falala ki he Tokoni ʻa e ʻEikí ʻi Hotau Ngaahi Faingataʻaʻia Fakaelotó
Koeʻuhí ʻoku ʻofa ʻa e Tamai Hēvaní ʻiate kitautolu, naʻá Ne fekauʻi mai Hono ʻAlo ko Sīsū Kalaisí ke fakamālohia mo fakafiemālieʻi kitautolu lolotonga e ngaahi faingataʻa ʻo e moʻuí. ʻE lava ke tokoni e lēsoni ko ʻení ke ongoʻi ʻe he kau akó ha loto-falala ʻe poupouʻi kinautolu ʻe he Fakamoʻuí ʻi hono fakatupulaki ʻo e loto-vilitaki fakaelotó.
Ngaahi ʻEkitivitī Ako ʻOku Ala Fakahokó
Ngaahi tūkunga faingataʻa fakaelotó
Fakatokangaʻi ange: ʻOku fakataumuʻa ʻa e naunau ko ʻení ke tokoni ʻi hono langaki ha mālohi fakaeloto ʻi he ʻEikí, kae ʻikai ke siviʻi pe faitoʻo ha fokoutua fakaʻatamai mo fakaeloto. Pe ke fakataumuʻa e aʻusia ʻa e kalasí ke hoko ko ha faʻahinga faleʻi fakakulupu.
Ke tokoniʻi e kau akó ke teuteu ki he lēsoni ko ʻení, fakakaukau ke fakaafeʻi e kau akó ke nau ʻomi ha ngaahi fakakaukau pea hiki ʻi he palakipoé ha ngaahi tūkunga faingataʻa fakaeloto ʻe vavé ni haʻanau fehangahangai mo ia, pe ko e toʻu tupu hangē ko kinautolú. ʻE ala kau ʻi he ngaahi sīpingá ʻa e ongoʻi ʻoku manukiʻi kinautolu ʻe honau toʻú, ko ʻenau ʻi ha tūkunga kuo pau ke nau feohi ai mo ha kakai ʻoku ʻikai ke nau maheni, pe ko e taimi ʻoku ngata ai ha meʻa fakafiefia. Kole ki he kau akó ke ʻai ʻenau ngaahi tūkungá ke moʻoni mo felāveʻi.
Fakaafeʻi leva e kau akó ke fakahoko ʻeni ʻi heʻenau tohinoa akó:
Fakakaukau ki ha tūkunga faingataʻa fakaeloto ʻokú ke fehangahangai pe ʻe vave haʻo fehangahangai mo ia. Tali ‘a e ngaahi fehuʻi ko ‘ení ‘i hoʻo tohinoa ako folofolá:
-
Ko e hā hoʻo ongoʻi ki he tuʻunga hoʻo tali e ngaahi tūkunga faingataʻa fakaelotó? Ko e hā hono ʻuhingá?
-
ʻI ha meʻafua 1 ki he 10 (1 = ʻIkai teitei loto-falala; 10 = mātuʻaki loto-falala), ko e hā e tuʻunga hoʻo loto-falala ʻe lava ʻe he Fakamoʻuí ʻo tokoniʻi koe ʻi he ngaahi tūkunga ko ʻení? Ko e hā hono ʻuhingá?
Poupouʻi e kau akó ʻi he lolotonga e lēsoní ke nau fekumi ʻi he faʻa lotu ke ongoʻi loto-falala ki he ivi malava ʻo e Fakamoʻuí ke tokoniʻi kinautolu ʻi he ngaahi tūkunga faingataʻa fakaelotó pea hoko ʻo loto-vilitaki fakaeloto ange.
Matuʻuaki fakaelotó
Fakakaukau ke hiki ʻa e foʻi lea Matuʻuaki Fakaelotó ʻi he palakipoé. ʻEke ki he kau akó pe ko e hā ʻoku mahino kiate kinautolu fekauʻaki mo iá. Te ke lava foki ʻo fakaʻaliʻali ʻa e fakamatala ko ʻení:
Ko e konga ʻo e palani ʻa e Tamai Hēvaní, te tau fehangahangai kotoa mo ha ngaahi faingataʻa ʻi he moʻuí ni. Ka neongo ia, ʻi heʻetau tafoki kia Sīsū Kalaisi pea falala ki Heʻene ʻaloʻofá mo e manavaʻofá, te Ne lava ʻo tokoniʻi kitautolu ke langaki ʻa e loto-vilitaki fakaelotó. Ko e matuʻuaki fakaelotó:
-
Ko e malava ke matatali e ngaahi faingataʻa fakaelotó ʻi he loto-toʻa mo e tui ʻoku fakatefito ʻia Sīsū Kalaisí.
-
Ko hono tokoniʻi koe mo e niʻihi kehé ʻi he lelei taha te mou ala lavá.
-
Ko hano kole ha tokoni lahi ange ʻo ka fiemaʻu.
Ko e sīpinga ʻa e Fakamoʻuí
Fakamatalaʻi ange naʻe aʻusia ʻe Sīsū ʻi Heʻene moʻui fakamatelié, ha ngaahi ongo fakaeloto hangē ko e loto-mamahí mo e mamahí. Te ke lava ʻo ʻeke ki he kau akó pe te nau lava ʻo fakakaukau ki ha sīpinga pē. ʻI he ʻekitivitī ko ʻení, fakakaukau ke vahe tautau toko ua ʻa e kau akó pea fakaafeʻi kinautolu ke tā ʻa e saati ʻoku ʻoatú ʻi heʻenau tohinoá. Poupouʻi ʻa e hoa takitaha ke ako ha taha ʻo e ngaahi potufolofola ʻi he sātí. ʻI heʻene ʻosí, fakaafeʻi kinautolu ke fevahevaheʻaki ʻa e meʻa ne nau akó.
Lau ʻa e ngaahi potufolofola ko ʻení, ʻo kumi e tali ʻa e Fakamoʻuí ʻi he tūkunga takitaha. Lekooti ha faʻahinga ongo naʻe fakahaaʻi ʻe he Fakamoʻuí mo e ngaahi ngāue naʻá Ne faí.
|
Tūkunga faingataʻa fakaeloto |
Founga tali ʻa e Fakamoʻuí |
|---|---|
Tūkunga faingataʻa fakaeloto Naʻe tāmateʻi ʻa Sione Papitaiso ʻe Hēlota ʻAnitipasi. | Founga tali ʻa e Fakamoʻuí |
Tūkunga faingataʻa fakaeloto Naʻe fononga ʻa Sīsū ke nofo mo Mele mo Māʻata hili e mate hona tuongaʻane ko Lāsalosí. | Founga tali ʻa e Fakamoʻuí |
-
Ko e hā naʻá ke ako pe ongoʻi fekauʻaki mo Sīsū Kalaisi mei he ongo talanoa fakafolofola ko ʻení?
-
Te ke muimui fēfē ki he sīpinga ʻa e Fakamoʻuí lolotonga ha tūkunga faingataʻa fakaeloto?
“Ko e moʻoni kuó ne toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí”
Fakamatalaʻi ange ʻoku ʻikai ngata pē ʻi he hoko ʻa Sīsū Kalaisi ko e sīpinga taupotu taha ʻo e loto-vilitaki fakaelotó, ka ʻoku mahino lelei foki kiate Ia ʻa e ngaahi ongo mo e faingataʻa fakamatelie kotoa pē. Kapau ʻe lava, fakaʻaliʻali ha fakatātā ʻi he palakipoé ʻo e mamahi ʻa e Fakamoʻuí ʻi Ketisemaní. ʻI hono fai ʻe he kau akó ʻa e ʻekitivitī ko ʻení, fakaafeʻi kinautolu ke tohi ha ngaahi foʻi lea pe kupuʻi lea ʻuhingamālie mei he ʻĪsaia 53:3–5 ʻo takatakai ʻi he fakatātaá. Te ke lava ʻo fakamahinoʻi ange ko e ʻĪsaia 53:3–5 ko ha potufolofola fakataukei fakatokāteline ia pea fakaafeʻi e kau akó ke fakaʻilongaʻi ia ʻi heʻenau folofolá.
Lau ʻa e ʻĪsaia 53:3–5, ʻo kumi e fakamoʻoni ʻoku mahino lelei ki he Fakamoʻuí hotau ngaahi faingataʻaʻia fakaelotó.
-
Ko e fē ngaahi lea pe ngaahi kupuʻi lea naʻe ʻuhingamālie taha kiate koé? Ko e hā hono ʻuhingá?
Ke tokoniʻi e kau akó ke nau fakatokangaʻi lelei ange ʻa e malava ko ia ʻe Sīsū ke kaungā-mamahi mo fakafiemālieʻi kinautolú, fakakaukau ke vahevahe ʻa e fakamatala ko ʻení:
Naʻe pehē ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá:
Sīsū Kalaisi: Ko e Tauhi ʻo Hotau Laumālié
ʻOku akoʻi ʻe ʻEletā Soalesi fekauʻaki mo Sīsū Kalaisi, ko ʻEne Fakaleleí, pea mo e meʻaʻofa ʻo e fakatomalá.
Makehe mei hono ʻomi ʻo e meʻafoaki fakaʻeiʻeiki ko ʻeni ʻo e fakamoʻuí, ʻoku toe ʻomi ʻe he Fakamoʻuí e fakafiemālie mo e nonga ʻi heʻetau fehangahangai mo e mamahí, ʻahiʻahí, mo e ngaahi vaivai ʻo e moʻui fakamatelié. … Te u lava ke fakapapauʻi atu ʻoku ʻafioʻi maʻu pē ʻe Kalaisi e ngaahi faingataʻa ʻoku tau aʻusia ʻi he moʻui matelié. ʻOku mahino kiate Ia e koná, mamahí, mo e mamahiʻia fakatuʻasinó kae pehē ki he ngaahi pole fakaeloto mo fakalaumālie ʻoku tau fehangahangai mo iá. ʻOku fonu e loto ʻo e Fakamoʻuí ʻi he ʻaloʻofá, pea ʻokú Ne mateuteu maʻu pē ke tokoniʻi kitautolu. ʻOku malava ʻení koeʻuhí he naʻá Ne aʻusia fakataautaha pea toʻo kiate Ia ʻi he kakanó ʻa e faingataʻa ʻo hotau vaivaí mo e mamahí.
Naʻá Ne hifo ʻo maʻulalo ange ʻi he meʻa kotoa pē ʻi he loto-vaivai mo e angamalū, pea talia hono fehiʻanekiná, fakafisingaʻí, mo ngaohikovia ʻe he tangatá, pea fakalaveaʻi koeʻuhi ko ʻetau ngaahi angahalá mo e ngaahi hiá. Naʻá Ne mamahiʻia ʻi he ngaahi meʻá ni maʻatautolu kotoa, ʻo toʻo kiate Ia e ngaahi angahala kotoa ʻa e māmaní, peá Ne hoko leva ko e tokotaha ke ne tokangaekina fakalaumālie kakato kitautolú.
ʻI heʻetau ʻunu ke ofi ange kiate Iá, mo tau tukulolo fakalaumālie ki Heʻene tauhí, ʻe lava leva ke tau toʻo kiate kitautolu ʻEne haʻamongá, ʻa ia ʻoku faingofua, pea mo ʻEne kavengá, ʻa ia ʻoku maʻamaʻa, ʻo maʻu leva e fiemālie mo e nonga naʻe talaʻofa maí. Makehe mei aí, te tau maʻu e mālohi ʻoku tau fie maʻu kotoa ke ikunaʻi ʻaki e ngaahi faingataʻá, vaivaí, mo e mamahi ʻo e moʻuí, ʻa ia ʻoku matuʻaki faingataʻa ke kātekina taʻe kau ai ʻEne tokoní mo e mālohi faifakamoʻuí. (Ulisses Soares, “Sīsū Kalaisi: Ko e Tauhi ʻo Hotau Laumālié,” Liahona, Mē 2021, 83–84)
-
Mei heʻetau akó, ko e hā ha ngaahi moʻoni te tau lava ʻo ako fekauʻaki mo Sīsū Kalaisi mo ʻEne malava ke tokoniʻi kitautolú?
Hiki e ngaahi tali ʻa e kau akó ʻi he palakipoé. Ko e taha ʻeni ʻo e ngaahi moʻoni ʻe ala ʻiloʻi ʻe he kau akó: ʻE lava ke fakafiemālieʻi mo fakamālohia kitautolu ʻe Sīsū Kalaisi ʻi hotau ngaahi faingataʻaʻia fakaelotó he kuó Ne aʻusia foki mo kinautolu.
-
ʻE tokoni fēfē ʻa e tafoki ki he Fakamoʻuí mo muimui ki Heʻene sīpingá ʻi he tuí ke fakatupulaki ʻe ha taha ha loto-vilitaki fakaeloto lahi ange?
Fakakaukauloto ki he tokoni ʻa e Fakamoʻuí
Ke tokoni ke mahino ki he kau akó ʻa e founga ʻe lava ke tokoniʻi ai kinautolu ʻe he tefitoʻi moʻoni ko ʻení, ʻe lava ke ʻaonga ʻa e taukei ko ʻení. Fai ʻa e ngaahi meʻa ko ʻení ke fakamatalaʻi, faʻifaʻitaki, pea akoako fakahoko ʻa e taukeí:
-
Fakamatalaʻi ʻa e taukeí: Fakamatalaʻi ange ki he kau akó ko e fakakaukauloto ko ia ʻoku ʻiate kitautolu ʻa e Fakamoʻuí mo tokoniʻi kitautolu lolotonga hotau ngaahi tūkunga faingataʻa fakaelotó ʻe lava ʻo fakaafea ai ʻEne tokoní mo e fakahinohinó.
-
Fakatātaaʻi ʻa e taukeí: Fakakaukau ki ha tūkunga faingataʻa fakaeloto kuó ke fehangahangai mo ia pe te ke fehangahangai mo ia ʻi he kahaʻú te ke loto-fiemālie ke vahevahe mo e kau akó. ʻI hono fakaʻaongaʻi e ngaahi sitepu ʻi laló, vahevahe e founga hoʻo fakakaukauloto ki hoʻo feʻao mo e Fakamoʻuí, ʻokú Ne fakamālohia koe, mo e founga te ke lava ʻo tali ʻaki ha niʻihi ʻo e ngaahi fehuʻi ʻi laló. Mahalo te ke fie fakakaukau fakalelei ki he meʻá ni ko ha konga ʻo hoʻo teuteu lēsoní.
-
Akoako Fakahoko: Ke tokoni ke akoako fakahoko ʻe he kau akó e taukei ko ʻení, fakakaukau ke vahe kinautolu ki ha fanga kiʻi kulupu iiki pea fakaafeʻi e kulupu takitaha ke fakakaukau ki ha tūkunga faingataʻa fakaeloto ki ha toʻu tupu. ʻI he taimi pē kuo nau fakakaukau ai ki ha tūkunga ʻe ala felāveʻi mo iá, fakaafeʻi kinautolu ke fai ʻa e ngaahi meʻa ko ʻení ʻiate kinautolu pē pea vahevahe leva ʻenau ngaahi talí mo ʻenau kulupú. Mahalo te ke fie fakatokanga ki he kau akó fekauʻaki mo hono vahevahe ha meʻa ʻoku fuʻu fakataautaha mei heʻenau moʻuí.
Kuikui ho matá pea fakakaukauloto ki he Fakamoʻui kuo toetuʻú mo koe lolotonga hoʻo faingataʻaʻiá. Tali ʻa e ngaahi fehuʻi ko ʻení:
-
Ko e fē ʻe ʻi ai ʻa e Fakamoʻuí ʻi heʻene fekauʻaki mo koe lolotonga hoʻo faingataʻaʻiá? Ko e hā te Ne mei fai kapau naʻá Ne ʻiate koe?
-
Ko e hā nai te ke fakakaukau ki ai pe ongoʻi lolotonga hoʻo ofi kia Sīsū Kalaisí?
-
ʻE tokoniʻi fēfē koe ʻe Heʻene ʻi aí, ʻofá, mo e poupoú ke ke mapuleʻi mo ikunaʻi hoʻo loto-mafasia fakaelotó?
-
Mei he meʻa ʻokú ke ʻilo fekauʻaki mo e Fakamoʻuí, ko e hā te Ne mei folofola ʻaki kiate koé? (Te ke lava ʻo fakaʻaongaʻi ha ngaahi kupuʻi lea mei he folofolá kuó Ne folofola ʻaki ki he niʻihi kehé.) Ko e hā te Ne kole atu ke ke faí? Ko hai te Ne kole atu ke ke fetuʻutaki ki ai ki ha tokoni lahi angé?
Fakaafeʻi ha ngaahi kulupu lahi ke vahevahe ʻa e meʻa ne nau aleaʻí mo e founga ʻe ala tokoni aí. Te ke lava ʻo fakamahinoʻi ange ʻoku totonu ke fekumi ʻa e kau akó ki ha tokoni mo ha fakahinohino mei he mātuʻá, kau taki ʻo e Siasí, pea mo ha kau mataotao laiseni, ki ha ngaahi faingataʻaʻia fakaeloto lalahi pe fuoloa.
Fakakaukau ke fai ange e ngaahi fehuʻi ko ʻení pea vahevahe hoʻo ngaahi ongo fekauʻaki mo e mālohi mo e fakafiemālie ʻoku maʻu mei he Tamai Hēvaní mo Sīsū Kalaisí:
-
Ko e fē ha taimi kuó ke ongoʻi ai pe ko ha taha ʻokú ke ʻiloʻi e tokoni ʻa e Fakamoʻuí lolotonga ha tūkunga faingataʻa fakaeloto?
-
ʻOkú ke pehē ko e hā ʻoku ngaohi ai kitautolu ʻe he tafoki ki he ʻEikí ke tau loto-vilitaki fakaeloto angé?
Ke fakaʻosí, fakaafeʻi e kau akó ke nau hiki ha faʻahinga ongo pe fakakaukau kuo nau maʻu fekauʻaki mo e Tamai Hēvaní mo Sīsū Kalaisi pea mo ʻEna malava ke tokoniʻi kinautolu mo honau ngaahi ʻofaʻangá ke langaki ʻa e loto-vilitaki fakaelotó.
Poupouʻi e kau akó ke nau falala kia Sīsū Kalaisi ki ha tokoni mo ha mālohi lolotonga e ngaahi faingataʻa fakaelotó. ʻE nofotaha ʻa e ngaahi lēsoni ʻi he kahaʻú ʻi ha ngaahi founga pau te nau lava ai ʻo fekumi ki he tokoni ʻa e ʻEikí ʻi heʻenau ngaahi fakakaukaú, loto-mafasiá, loto-hohaʻá mo ha ngaahi meʻa lahi ange.