Lēsoni 178: Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí

Ngaahi Tāpuaki Fakapēteliaké

“Folofola Fakafoʻituitui kiate Koe”

ʻOku lahi ha ngaahi founga ʻoku ʻomi ai ʻe heʻetau Tamai Hēvani ʻofá ha tataki mo ha fakahinohino ki Heʻene fānaú. Ko ha founga ʻe taha ʻokú ne fakahoko ai ʻení ʻoku fakafou ia ʻi he ngaahi tāpuaki fakapēteliaké. ʻE lava ke tokoni e lēsoni ko ʻení ke ongoʻi ʻe he kau akó e finangalo ʻo e ʻEikí ke tataki kinautolu ʻo fakafou ʻi honau tāpuaki fakapēteliaké.

Ngaahi ʻEkitivitī Ako ʻOku Ala Fakahokó

Fakahinohino ʻi heʻetau moʻuí

Fakakaukau ke fakaʻaliʻali ʻa e fakatātā ko ʻení pe tā ha fakatātā hangē ko iá ʻi he palakipoé.

• Ko e hā ha ngaahi tafaʻaki ʻi hoʻo moʻuí te ke ala ongoʻi ai ʻo hangē ko e tokotaha ʻi he fakatātā ko ʻení? Ko e hā hono ʻuhingá?

• Ko e hā ʻe lava ʻo tokoni ke tau ʻiloʻi e meʻa ke fai ʻi he taimi ʻoku ʻikai ke tau fakapapauʻi ai e fakahinohino ʻoku totonu ke tau fai ʻi he moʻuí?

Fakamatalaʻi ange ʻoku akoʻi ʻe he folofolá ha ngaahi moʻoni mahuʻinga fekauʻaki mo e ʻOtuá te ne lava ʻo tokoniʻi kitautolu ʻi he taimi ʻoku tau fiemaʻu ai ha fakahinohinó.

Lau ʻa e Tokāteline mo e Ngaahi Fuakava 6:14; 42:61; mo e 112:10, ʻo kumi e ngaahi moʻoni ʻe lava ke tokoni kiate kitautolu ʻi heʻetau fehangahangai mo e ngaahi tūkunga taʻepaú.

Fakaafeʻi e kau akó ke vahevahe e ngaahi moʻoni naʻa nau maʻú. ʻI hono fakaʻaongaʻi ʻenau lea pē ʻanautolu, te nau lava ʻo vahevahe ha ngaahi moʻoni hangē ko ʻení:

ʻI he lahi ange ʻetau fehuʻi ki he ʻOtuá, te Ne fakahinohinoʻi kitautolu ʻo fakafou ʻi Hono Laumālié (Tokāteline mo e Ngaahi Fuakava 6:14).

Kapau te tau kole, ʻe tāpuakiʻi kitautolu ʻe he ʻOtuá ʻaki ha fakahā hoko mo e fakahā (Tokāteline mo e Ngaahi Fuakava 42:61).

ʻE tataki nima kitautolu ʻe he ʻOtuá mo ʻomi ha ngaahi tali ki heʻetau ngaahi lotú (Tokāteline mo e Ngaahi Fuakava 112:10).

Te ke lava foki ʻo kole ki he kau akó ke nau vahevahe ha ngaahi potufolofola kehe ʻoku nau ʻiloʻi ʻokú ne fakahaaʻi ʻa e vēkeveke ʻa e ʻOtuá ke ʻomi kiate kitautolu ha fakahinohino mo ha tataki.

• ʻE tokoni fēfē hono manatuʻi e ngaahi moʻoni ko ʻení ki hoʻo ngaahi ongo pe fakakaukau ki he ʻOtuá?

• Ko e hā ha ngaahi founga ʻoku ʻomi ai ʻe he ʻOtuá ha fakahinohino ki heʻetau moʻuí?

Ngaahi tāpuaki fakapēteliaké

Kapau ʻe fiemaʻu, talaange ko e ngaahi tāpuaki fakapēteliaké ko ha founga ia ʻe taha ʻe lava ke tau maʻu ai ha fakahinohino mei he ʻOtuá. Ke tokoni ke fakafuofuaʻi ʻe he kau akó ʻenau ʻilo lolotonga fekauʻaki mo e ngaahi tāpuaki fakapēteliaké, fakakaukau ke fakaʻaliʻali ʻa e fakamatala ko ʻení pea ʻoange ha taimi ki he kau akó ke nau tali fakalongolongo ai e ngaahi fakamatalá pe ʻi heʻenau tohinoa akó.

ʻI hono fakaʻaongaʻi ha meʻafua mei he tahá (ʻikai moʻoni) ki he nimá (moʻoni ʻaupito), fakalaulauloto ki he moʻoni ʻo e ngaahi fakamatala takitaha ko ʻení kiate koé:

1. ʻOku mahino kiate au ko e hā ʻa e tāpuaki fakapēteliake.

2. ʻOku ou ʻilo ʻa e founga ʻe lava ke liliu ai ʻe ha tāpuaki fakapēteliake ʻeku moʻuí.

3. ʻOku ou tui ʻe lava ke ʻomi ʻe he ʻOtuá ha fakahinohino ki heʻeku moʻuí ʻo fakafou ʻi hoku tāpuaki fakapēteliaké.

ʻOange ha taimi ki he kau akó ke nau hiki ha ngaahi fehuʻi ʻoku nau maʻu fekauʻaki mo e ngaahi tāpuaki fakapēteliaké ʻi he palakipoé. ʻE lava ke nau maʻu ha ngaahi fehuʻi hangē ko ʻení:

• Ko e hā ʻa e tāpuaki fakapēteliake?

• ʻE lava fēfē ke liliu ʻe ha tāpuaki fakapēteliake hoku vā fetuʻutaki mo e Tamai Hēvaní mo Sīsū Kalaisí?

• Te u lava fēfē ʻo teuteu ki hoku tāpuaki fakapēteliaké?

• Ko e fē taimi ʻoku totonu ke u maʻu ai hoku tāpuaki fakapēteliaké?

Fili ha fehuʻi ʻe taha fekauʻaki mo e ngaahi tāpuaki fakapēteliaké ʻokú ke fie tali. Hiki hoʻo ngaahi fehuʻí ʻi ʻolunga ʻi ha peesi tohinoa pe ʻi ha peesi fakamatala ʻi hoʻo meʻangāue toʻotoʻó. Fekumi ki he fakahinohino ʻa e Tamai Hēvaní ʻo fakafou ʻi he Laumālie Māʻoniʻoní ke tokoni atu ke maʻu ha tali ki hoʻo ngaahi fehuʻí.

Ko hono tali ʻo e ngaahi fehuʻi fekauʻaki mo e ngaahi tāpuaki fakapēteliaké

ʻOange ha taimi ki he kau akó ke nau kumi ha tali ki heʻenau ngaahi fehuʻi fekauʻaki mo e tāpuaki fakapēteliaké. Fakakaukau ki he ngaahi fiemaʻu mo e ngaahi meʻa ʻoku malava ʻe hoʻo kau akó ʻi hono fakapapauʻi e founga te nau fekumi ai ki ha ngaahi talí. Mahalo ʻe tokoni ki ha niʻihi ke nau kumi e talí ʻi ha fanga kiʻi kulupu iiki.

Fili mei he ngaahi meʻa ko ʻení ke maʻu ha tali ki hoʻo ngaahi fehuʻi fekauʻaki mo e ngaahi tāpuaki fakapēteliaké:

1. Fekumi ʻi he ngaahi maʻuʻanga tokoni ʻoku maʻu ʻi he polokalama Gospel Library. Hangē ko ʻení, te ke lava ʻo ako ʻa e “Ngaahi Tāpuaki Fakapēteliaké” ʻi he Ngaahi Tefitó mo e Ngaahi Fehuʻí pe fekumi ki he “ngaahi tāpuaki fakapēteliaké” ʻi he ngaahi lea ʻo e konifelenisi lahí.

2. Ako ha taha ʻo e ngaahi lea ko ʻení mei he konifelenisi lahi ʻo ʻEpeleli 2023: “Taimi ke Maʻu ai Hoʻo Tāpuaki Fakapēteliaké” meia ʻEletā Kazuhiko Yamashita (Liahona, Mē 2023, 88–90) pe “Ko Hoʻo Tāpuaki Fakapēteliaké–Fakahinohino Fakalaumēlie mei he Tamai Hēvaní” meia ʻEletā Randall K. Bennett (Liahona, Mē 2023, 42–43).

3. Ako ʻa e ngaahi fakamatala ʻi he laʻipepa tufa “Ko Hono Tali ʻo e Ngaahi Fehuʻi fekauʻaki mo e Ngaahi Tāpuaki Fakapēteliaké.”

Ko Hono Tali ʻo e Ngaahi Fehuʻi fekauʻaki mo e Ngaahi Tāpuaki Fakapēteliaké

Naʻe vahevahe ʻe Palesiteni Lāsolo M. Nalesoni ʻo pehē:

ʻOku mahuʻinga [ha tāpuaki fakapēteliake]. Ko ha potufolofola fakataautaha ia kiate koe. ʻOkú ne fakahaaʻi ho hako makehé. ʻOkú ne fakamanatu atu kiate koe hoʻo fehokotaki mo e kuohilí. Pea ʻe tokoni ia ke ke ʻiloʻi ai e meʻa te ke malava ʻi he kahaʻú. Ko hono moʻoní, te ke lava ʻo ʻekea mei he ʻEikí ʻa hono fakahoko ʻo e ngaahi tāpuaki ko iá ʻo fakafou ʻi hoʻo faivelengá. (Russell M. Nelson, “Thanks for the Covenant” [fakataha lotu ʻa e ʻUnivēsiti Pilikihami ʻIongí, 22 Nōvema 1988], 5)

Naʻe fakamoʻoni ʻa ʻEletā Kasuko Iāmasitā ʻo e Kau Fitungofulú ʻo pehē:

ʻOku ou toutou lau ʻi he faʻa lotu hoku tāpuaki fakapēteliaké; ʻokú ne fakalotolahiʻi maʻu pē au. ʻOku ou ʻiloʻi ʻa e meʻa ʻoku finangalo ʻa e ʻEikí ke u faí, pea kuó ne tokoniʻi au ke u fakatomala mo loto-fakatōkilalo. ʻI heʻeku lau mo fakalaulauloto ki aí, ʻoku ou maʻu ha loto-holi ke moʻui taau ke maʻu hono ngaahi tāpuaki kuo talaʻofa maí. …

… ʻE kāinga, ʻoku ou fakamoʻoni ʻoku moʻui ʻa e Tamai Hēvaní mo Hono ʻAlo ʻOfaʻanga pē Taha naʻe Fakatupú, ʻa e ʻEiki ko Sīsū Kalaisí. ʻOkú Na ʻofa ʻiate kitautolu. Ko e ngaahi tāpuaki fakapēteliaké ko ha meʻa-foaki toputapu ia meiate Kinaua. ʻI he taimi te ke maʻu ai hoʻo tāpuakí, te ke ʻilo mo ongoʻi ai ʻa ʻEna ʻofa ʻiate koé mo e anga ʻEna tokanga taha fakafoʻituitui kiate koé. (Kazuhiko Yamashita, “Taimi ke Maʻu ai Hoʻo Tāpuaki Fakapēteliaké,” Liahona, Mē 2023, 90)

Naʻe vahevahe ʻe Sisitā Poni H. Kōtoni ko e Palesiteni Lahi mālōlō ʻo e Kau Finemuí:

ʻI ha konifelenisi KFT, ne u fetaulaki ai mo ha ongo finemui ne na faingataʻaʻia, ʻa ia ne na fakatou ongoʻi hē mo tuenoa. Naʻe fakatou lave e ongo finemuí ki haʻana tafoki ki hona tāpuaki fakapēteliaké ke toe fekumi ki he ʻofa mo e tataki ʻa e ʻEikí kiate kinaua fakatāutahá. Kumi ho tāpuaki faka-pēteliaké, kapau kuo fuoloa hono tukú, ako maʻu pē ia. Kapau ʻoku teʻeki ke ke maʻu ia, feinga leva ke maʻu ia ʻi he vave tahá. ʻOua naʻa fakatatali hoʻo fekumi ki he meʻa ʻoku finangalo ʻa e ʻEikí ke talaatu he taimí ni fekauʻaki mo koé. (Bonnie H. Cordon, “Haʻu kia Kalaisi pea ʻOua Naʻá Ke Haʻu Toko Taha,” Liahona, Nōvema 2021, 11)

© 2024 by Intellectual Reserve, Inc. All rights reserved.

Hili hono maʻu ʻe he kau akó ha faingamālie ke akó, fakakaukau ke fakaafeʻi kinautolu ke vahevahe ʻa e meʻa ne nau akó ʻaki ʻenau ʻeke ha fehuʻi hangē ko ʻení:

• Ko e hā naʻá ke ʻilo mei hoʻo akó ʻokú ke pehē naʻe ʻaonga tahá?

• Ko e hā ha ngaahi tali naʻá ke maʻu ki hoʻo ngaahi fehuʻí?

• ʻOkú ke pehē ʻe tokoniʻi fēfē ʻe ha tāpuaki fakapēteliake ho vā fetuʻutaki mo e Tamai Hēvaní mo Sīsū Kalaisí?

Fakakaukau ke vahevahe ʻa e founga kuo tāpuekina pe tataki ai koe ʻe he ʻOtuá ʻo fakafou ʻi ho tāpuaki fakapēteliaké. Te ke lava foki ʻo poupouʻi e kau ako kuo maʻu honau tāpuaki fakapēteliaké ke vahevahe ʻenau ngaahi aʻusiá. Fakapapauʻi ʻoku mahino ki he kau akó ʻoku ʻikai totonu ke nau vahevahe ʻa e fakaikiiki ʻo honau ngaahi tāpuakí. Ka neongo ia, ʻoku taau ke vahevahe ʻenau ngaahi aʻusia ʻi hono maʻu ha tāpuaki fakapēteliaké mo e founga kuó ne tāpuekina ai ʻenau moʻuí.

Te ke lava foki ʻo huluʻi ha taha ʻo e ngaahi vitiō ko ʻení, ʻoku maʻu ʻi he ChurchofJesusChrist.org, ke fakaʻaliʻali ha ngaahi sīpinga ʻo e founga naʻe maʻu ai ʻe ha niʻihi fakafoʻituitui ha fakahinohino mei he ʻOtuá ʻo fakafou ʻi honau ngaahi tāpuaki fakapēteliaké.

• “Enemy Territory” (taimi 0:00 ki he 2:25) — Ko ha fakamatala mei he moʻui ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá (1924–2015).

• “Without Fear” (3:30) — Ko e fakamatalaʻi ʻe ha talavou mei ʻĪtali ʻa e founga naʻe tokoniʻi ai ia ʻe hono tāpuaki fakapēteliaké ke fili ke ʻalu ʻo ngāue fakafaifekaú.

Fakakaukau ki he meʻa kuó ke akó

Ke tokoni ke fakakaukau ʻa e kau akó ki he meʻa kuo nau ako mo ongoʻí, fakakaukau ke fakaafeʻi kinautolu ke fai ʻeni:

Fakalaulauloto ki he ngaahi ueʻi pe fakakaukau kuó ke ongoʻi he ʻahó ni mei he Laumālie Māʻoniʻoní. Hiki ʻi hoʻo tohinoa akó ha ngaahi sētesi fekauʻaki mo e fakahinohino mo e tataki kuo ʻoatu ʻe he Tamai Hēvaní he ʻahó ni mo e founga te ke lava ʻo ngāueʻi ai e ngaahi ueʻi ko iá.

Poupouʻi e kau akó ke ngāueʻi e ngaahi ueʻi kuo nau ongoʻi he ʻaho ní. Fakamoʻoni ki he fakahinohino mo e tataki mei he Tamai Hēvaní ʻe lava ke tau maʻu ʻo fakafou ʻi he ngaahi tāpuaki fakapēteliaké.

Ngaahi Maʻuʻanga Tokoni Kehé

Ko e hā ʻa e tāpuaki fakapēteliake?

Naʻe akonaki ʻa Sisitā Lepeka L. Kuleiveni, ko ha tokoni mālōlō ʻi he Kau Palesitenisī Lahi ʻo e Kau Finemuí ʻo pehē:

Ko e tāpuaki fakapēteliaké ko ha tāpuaki fakalaumālie ia mei he Tamai Hēvaní kuo foaki ʻe ha pēteliake kuo fakanofo, ko e angamahení mei hoʻo siteikí. Ko ha pōpoaki fakataautaha ia ʻo e fakahā maʻau pē. ʻE ʻoatu ʻe hoʻo tāpuakí ha faleʻi, fakatokanga, talatalaifale, mo ha ngaahi talaʻofa ke tokoni ki hono tataki hoʻo moʻuí. (Rebecca L. Craven, “Your Book of Possibilities,” For the Strength of Youth, Aug. 2022, 26)

ʻE tāpuekina fēfē au ʻe he Tamai Hēvaní ʻo fakafou ʻi ha tāpuaki fakapēteliake?

ʻI ʻEpeleli 2020, naʻe fakaafeʻi ha finemui ko Loti Lute Keioki ke lea ʻi he konifelenisi lahí. Naʻá ne fakamoʻoni ʻo pehē:

Kuó u ako ke tafoki ki hoku tāpuaki fakapēteliaké ʻi ha taimi pē ʻoku ou ongoʻi mamahi ai pe taʻelata. ʻOku tokoniʻi au ʻe hoku tāpuaki fakapēteliaké ke u ʻilo e tuʻunga te u lava ʻo aʻusiá pea mo e palani pau ʻa e ʻOtuá maʻakú. ʻOkú ne fakanonga mo tokoniʻi au ke u sio fakalaka atu ʻi heʻeku fakakaukau fakamāmaní. ʻOkú ne fakamanatu mai ʻeku ngaahi meʻafoakí pea mo e ngaahi tāpuaki te u maʻu ʻo kapau te u moʻui taau. ʻOku toe tokoni foki ke u manatuʻi mo ongoʻi nonga, ʻe ʻomi ʻe he ʻOtuá ʻa e ngaahi talí mo fakaava mai ʻa e ngaahi matapaá ʻi he taimi pē ko ia te u fiemaʻu taha ai iá.

ʻOku tokoni ʻa e ngaahi tāpuaki fakapēteliaké ke teuteuʻi kitautolu ke tau foki ʻo toe nofo mo ʻetau Tamai Hēvaní. ʻOku ou ʻilo ʻoku maʻu ʻa e ngaahi tāpuaki fakapēteliaké mei he ʻOtuá pea te ne lava ʻo tokoniʻi kitautolu ke liliu hotau ngaahi vaivaí ko e ngaahi mālohinga. ʻOku ʻikai ko ha pōpoaki ʻeni mei ha taha fie mana; ʻoku talamai ʻe he ngaahi tāpuakí ni e meʻa ʻoku fie maʻu ke tau fanongo ki aí. ʻOku nau hangē ko ha Liahona kiate kitautolu takitaha. Ko e taimi ʻoku tau fakamuʻomuʻa ai e ʻOtuá pea tui kiate Iá, te Ne tataki kitautolu ʻi hotau ngaahi faingataʻaʻiá. (Laudy Ruth Kaouk, “Founga ʻOku Tāpuekina ai ʻa e Toʻu Tupú ʻe he Lakanga Fakataulaʻeikí,” Liahona, Mē 2020, 56–57)

Te u maʻu fēfē ha tāpuaki fakapēteliake?

ʻOku fakamatalaʻi ʻa e ngaahi fakahinohino ko ʻení ʻi he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní:

ʻE ʻinitaviu ʻe he pīsopé pe ʻe ha tokoni naʻe vahe ki ai, ʻa e kāingalotu ʻoku fakaʻamu ke maʻu honau tāpuaki fakapēteliaké. Kapau ʻoku moʻui taau ʻa e mēmipá, ʻe teuteu ʻe he taha fakahoko ʻinitaviú ha Fakaongoongolelei Tāpuaki Fakapēteliake. …

Ka hili hano maʻu ʻo ha fakaongoongolelei, ʻe fetuʻutaki leva ʻa e mēmipá ki he pēteliaké ke fokotuʻu ha taimi ke maʻu ai hono tāpuaki fakapēteliaké. ʻI he ʻaho ne alea ki aí, ʻoku totonu ke ʻalu ʻa e mēmipá ki he pēteliaké ʻi he loto faʻa lotu pea ʻi he teunga ʻo e Sāpaté. ʻE lava pē ke ʻaukai ʻa e mēmipá, ka ko e ʻaukaí ʻoku ʻikai ko ha meʻa pau ʻoku fiemaʻu. (Tohi Tuʻutuʻuni Fakakātoa, 18.17; 18.17.1, ChurchofJesusChrist.org).

Ngaahi ʻEkitivitī Fakalahi ki he Akó

Ko hono likuesi ha tatau ʻo ho Tāpuaki Fakapēteliaké

Fakakaukau ke akoʻi e kau akó ʻi he founga ke maʻu ai honau ngaahi tāpuaki fakapēteliaké, pe tāpuaki ʻo e kau mēmipa ʻo e fāmilí kuo pekiá, ʻi he ChurchofJesusChrist.org. Te ke lava ʻo vahevahe ʻa e uepisaiti ko ʻení mo kinautolu, pe ʻoange ia kiate kinautolu ko ha kouti QR, pea ʻai ke nau hū ki loto ʻaki honau hingoa ngāue mo e lea fufū ʻi he ʻakauni ʻi he Siasí.

https://pb.churchofjesuschrist.org/pbrequest/home/personal

Te ke lava foki ʻo fakaʻaliʻali e ngaahi fakahinohino ko ʻení ke tataki kinautolu.

1. ʻAlu ki he ChurchofJesusChrist.org.

2. Lomiʻi ʻi he Hū ki he Polokalamá.

3. Hū ki loto ʻaki ho ʻakauni ʻi he Siasí.

4. Fili ʻa e Tāpuaki Fakapēteliaké mei he ngaahi meʻangāué.

5. Lomiʻi ʻi he fakaʻilonga lanu pulū Ko Hoku Tāpuaki Fakapēteliaké.

6. Lomiʻi ʻi he Kole ha Tāpuaki Fakataautaha pe Kole ha Tāpuaki Fakafāmili pea fakakakato ʻa e fōmú. (ʻI he taimi ʻoku likuesi ai ha tāpuaki fakafāmilí, mateuteu ke ʻomi ha ngaahi hingoa mo fakafuofuaʻi e ʻaho fāʻeleʻí.)

ʻE lava ke fakaʻaongaʻi ʻe he kau akó ha ngaahi miniti siʻi pea likuesi ha tatau ʻo honau tāpuaki fakapēteliaké pe ko ha tatau ʻo ha mēmipa ʻo e fāmilí kuo pekia. Te mou lava ʻo aleaʻi mo e kau akó ʻa e founga ʻe lava ke tokoniʻi ai kinautolu ʻi hano lau ha tāpuaki fakapēteliake ʻo ha mēmipa ʻo e fāmilí kuo pekia ke nau ofi ange ai ki heʻenau ngaahi kuí.

Ko hono fakahā ʻo e hakó

Mahalo ʻe fifili ha kau ako ʻe niʻihi pe ko e hā ʻoku mahuʻinga ai ke maʻu ha fakahā ʻo e hakó ʻi ha tāpuaki fakapēteliake. Ke tokoni ke mahino kiate kinautolu ʻa e ʻuhinga ʻoku mahuʻinga ai honau hakó, te ke lava ʻo fakaʻaliʻali ʻa e fakamatala ko ʻení:

ʻI hono fakahā atu ko ia hoʻo hakó, te ke ʻilo ai ʻokú ke ʻo e fale ʻo ʻIsilelí pea mo e hako ʻo ʻĒpalahamé [vakai, ʻĒpalahame 2:10]. Ke mahino hono mahuʻinga ʻo e meʻá ni, tokanga taha ki he ngaahi talaʻofa naʻe fai ʻe he ʻEikí ki he fale ʻo ʻIsilelí ʻo fakafou ʻia ʻĒpalahamé.

ʻOku kau ʻi he ngaahi talaʻofa ko iá ʻa e:

• “ʻE tokolahi hono hakó (vakai, Sēnesi 17:5–6; ʻĒpalahame 2:9; 3:14).

• “ʻE maʻu ʻe hono hakó ʻa e ongoongoleleí pea maʻu ʻa e lakanga fakataulaʻeikí (vakai, ʻĒpalahame 2:9).

• “Tuʻunga ʻi he ngāue ʻo hono hakó, ‘ʻe tāpuekina ʻa e ngaahi faʻahinga kotoa pē ʻo e māmaní, ʻio ʻaki ʻa e ngaahi tāpuaki ʻo e Ongoongoleleí, ʻa ia ko e ngaahi tāpuaki ʻo e fakamoʻuí, ʻio ʻo e moʻui taʻengatá’ (ʻĒpalahame 2:11)” [Ngaahi Tefitó mo e Ngaahi Fehuʻí, “Fuakava Faka-ʻĒpalahamé,” Gospel Library].

(Kazuhiko Yamashita, “Taimi ke Maʻu ai Hoʻo Tāpuaki Fakapēteliaké,” Liahona, Mē 2023, 89)

ʻE lava ke lau ʻe he kau akó ʻa e “You are part of the house of Israel” (Inspiration, ChurchofJesusChrist.org) pe “Ko Hono Fakahā ʻo e Hakó” (ʻi he Ngaahi Tefitó mo e Ngaahi Fehuʻí, “Ngaahi Tāpuaki Fakapēteliaké,” Gospel Library) ke ako lahi ange fekauʻaki mo e hakó.

Hili iá, te ke lava ʻo kole ki he kau akó ke fakamatalaʻi ʻa e ʻuhinga ʻoku nau pehē ai ʻoku hoko hono fakahā ʻo e hakó ko ha konga mahuʻinga ʻo ha tāpuaki fakapēteliake.

Ngaahi sīpinga ʻi he hisitōlia ʻo e Siasí

Ke tokoni ke ʻilo ʻe he kau akó ʻa e founga naʻe liliu ai ʻe he ngaahi tāpuaki fakapēteliaké ʻa e moʻui ʻa ha niʻihi fakafoʻituitui ʻi he hisitōlia ʻo e siasí, fakakaukau ke vahevahe ha talanoa ʻe taha pe lahi ange mei he ngaahi talanoa ko ʻení. Te ke lava ʻo faʻu ha ngaahi kouti QR ki he talanoa takitaha pea fakaʻaliʻali kinautolu ʻi he palakipoé. ʻE lava leva ke fili e kau akó ke ako ha talanoa ʻe taha pe lahi ange.

• Naʻe tokoni e tui ʻa Fīpē Kata Utalafi ki hono tāpuaki fakapēteliaké ke ne laka ki muʻa neongo naʻe teʻeki ke ne maʻu e ngaahi meʻa naʻá ne fiemaʻú (vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 286–88).

• Naʻe hanga ʻe he tui ʻa Koni Teilá mo ʻene faimateakí ʻo ai ke ne mamata ki hono fakahoko ʻo e ngaahi talaʻofa ʻi hono tāpuaki fakapēteliaké (vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 3, Loto-toʻa, Anga Fakaʻeiʻeiki, mo e Tauʻatāina, 1893–1955, 421–24, 640–41).

• Naʻe hanga ʻe he tāpuaki fakapēteliake ʻo ʻEletā Niila A. Mekisuelé ʻo tokoniʻi ia ke tuʻu maʻu mo faivelenga ʻi he ngaahi fakatamaki naʻá ne fehangahangai mo ia lolotonga ʻene kau atu ki he Tau Lahi ʻa Māmani Hono II (vakai, Kau Māʻoniʻoní, 3:554–57).

• Naʻe liliu e moʻui ʻa Lūpeni Kepeisí pea naʻe tali ʻene ngaahi lotú koeʻuhí ko hono tāpuaki fakapēteliaké (vakai, Global Histories, Philippines, “Growing While Serving the Lord,” Gospel Library).

• Naʻe mamata ʻa ʻEva Henanitasi ki hono fakahoko ha talaʻofa ʻi hono tāpuaki fakapēteliaké (vakai, Global Histories, Spain, “A Blessing Fulfilled,” Gospel Library).