“Lēsoni 161—Akoako Fakataukei Fakatokāteline 10: Fakaʻaongaʻi e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 10,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 161: “Ko e Fāmilí: Ko ha Fanongonongo ki Māmani”
Akoako Fakataukei Fakatokāteline 10
Fakaʻaongaʻi e Ngaahi Tefitoʻi Moʻoni ki Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga ki heʻenau moʻuí ʻia Sīsū Kalaisi mo ʻEne ongoongoleleí. ʻE ʻoange ʻe he lēsoni ko ʻení ki he kau akó ha faingamālie ke vahevahe ʻa e ngaahi potufolofola fakataukei fakatokāteline ʻoku ʻuhingamālie ʻi heʻenau moʻuí pea tokoniʻi kinautolu ke nau ako mo fakaʻaongaʻi e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Toe vakaiʻi ʻo e fakataukei fakatokāteliné: Vahevahé
Ke tokoni ke toe vakaiʻi nounou ʻe he kau akó ʻa e meʻa kuo nau ako he taʻu ní pea teuteuʻi kinautolu ke vahevahe ʻa e ngaahi potufolofola fakataukei fakatokāteline kuó ne liliu ʻenau moʻuí, fakakaukau ke hiki ʻi he palakipoé ʻa e kupuʻi lea taʻekakato Ko e taha ʻo e ngaahi meʻa ʻoku ou saiʻia taha aí ko e ….
Te ke lava ʻo fakaʻosi e kupuʻi leá ʻi ha ngaahi founga kehekehe, hangē ko e kakai ʻi he hisitōlia ʻo e Siasí, ngaahi talanoa ne tau ako he taʻu ní, pe ngaahi meʻa ne u ako mei ha kaungāako. ʻI he founga takitaha te ke fakaʻosi ai ʻa e kupuʻi leá, tuku ki he kau akó ke nau vahevahe nounou mo ha hoa ʻenau ngaahi talí pea mo e ʻuhinga naʻa nau fili ai kinautolú.
Fakaʻosí, fakakakato ʻa e kupuʻi leá ʻaki ʻa e ngaahi potufolofola fakataukei fakatokāteliné. ʻOange ha taimi ki he kau akó ke toe vakaiʻi e lisi ʻo e ngaahi potufolofola fakataukei fakatokāteline ʻi he Fakamatala ki he ʻElito ʻo e Fakataukei Fakatokāteliné (2023). Fakaafeʻi kinautolu ke vahevahe mo hanau hoa ʻa e potufolofola ne nau filí pea mo hono ʻuhinga kiate kinautolú. Fakapapauʻi ke tuku ha taimi feʻunga ki he ʻekitivitī akoako fakahoko ko ʻení.
Ako mo fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié
Kimuʻa pea fakafeʻiloaki ʻa e fakamatala ko ʻení, mahalo ʻe tokoni ke fakaʻatā e kau akó ke nau toe vakaiʻi nounou ʻa e ngaahi tefitoʻi moʻoni ʻi he palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné. (ʻOku fakakau atu e ngaahi ʻekitivitī fakamanatu ʻoku fokotuʻu atú ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné” ʻi he fakamatala fakalahi ʻo e tohi lēsoni ko ʻení.)
Fakatokangaʻi ange: ʻE lava ke mātuʻaki pelepelengesi mo fakataautaha ʻa e tefito ʻoku fokotuʻu atu ʻi he lēsoni ko ʻení ki ha kau ako tokolahi. ʻI hono aleaʻi ʻe he kalasí ʻa e fakamatala ko ʻení, fakamanatu kiate kinautolu e ʻofa ʻa e ʻOtuá ki Heʻene fānaú kotoa pea mo ʻEne finangalo ke tau fakaʻapaʻapaʻi mo ʻofa ki he kakai kotoa pē.
Vakai ki he konga “Fulifulihi ʻa e ngaahi tūkungá” ʻi he “Ngaahi ʻEkitivitī Fakalahi ki he Akó” kapau ʻokú ke ongoʻi ʻe lelei ange ke akoako fakaʻaongaʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga kehe.
Naʻe fakamatalaʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ha talavou naʻe fehangahangai mo ha faingataʻa lahi. ʻI hoʻo lau fekauʻaki mo e tūkunga ʻo e talavou ko ʻení, fakalaulauloto ki he ʻuhinga ʻe mahuʻinga ai kiate ia hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié.
ʻOku ou lea kau ki ha talavou naʻe hū moʻui taau ki he malaʻe ʻo e ngāue fakafaifekaú ka naʻá ne fili ʻiate ia pē ke foki vave ki ʻapi tuʻunga ʻi heʻene fetokangaʻaki faka-homosekisualé pea mo ha palopalema naʻá ne foua ai. Naʻá ne kei moʻui taau pē, ka naʻe [ʻi ha tuʻunga fakatuʻutāmaki ʻa] ʻene tuí, pea fakaʻau ke mafasia fakaeloto ange, pea fakautuutu ʻaupito ʻene faingataʻaʻia fakalaumālié. Naʻá ne iku ʻo loto-mamahi, puputuʻu, ʻita, mo ongoʻi tuēnoa. (Jeffrey R. Holland, “Vakai ki Hoʻo Faʻeé,” Liahona, Nōvema 2015, 49)
Te ke lava ʻo tokoni ke teuteuʻi e kau akó ke nau vakai ki he mahuʻinga ʻo e lēsoni ko ʻení ʻaki hono fakaʻatā ke ngāueʻi ʻenau mahino mo e ngaahi ongo ʻoku fekauʻaki mo e ngaahi tūkunga pehení. Te ke lava ʻo poupouʻi e kau akó ke hiki ʻenau ngaahi fakakaukaú ʻi heʻenau tohinoa akó ʻaki hano fakaʻaliʻali ha ngaahi tūkunga fakakaukau hangē ko ʻení:
-
Ko e hā ha ngaahi fehuʻi pe hohaʻa fekauʻaki mo e palani ʻa e Tamai Hēvaní pe fekauʻaki mo e Siasí ʻokú ke pehē ʻe ala maʻu ʻe he talavou ko ʻení?
-
ʻE liliu fēfē hono vā fetuʻutaki mo e Tamai Hēvaní ʻe he ngaahi fehuʻi pe hohaʻa ko ʻení?
-
Ko e hā e ʻuhinga ʻoku mahuʻinga ai ki he kakai ʻi ha ngaahi tūkunga tataú ke mahino kiate kinautolu mo nau fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié? Ko e hā e ʻuhinga ʻoku mahuʻinga ai ki honau kaungāmeʻá mo e fāmilí ke nau toe fakaʻaongaʻi foki mo e ngaahi tefitoʻi moʻoni ko iá?
Manatuʻi he ʻikai lava ke tali ʻe he lēsoni ko ʻení ʻa e fehuʻi kotoa pē ʻe ala maʻu ʻe he kau akó. Kuo teʻeki ke fakahā mai ʻe he ʻOtuá ʻa e tali kotoa pē. ʻOku fakataumuʻa ʻa e lēsoni ko ʻení ke tokoniʻi e kau akó ke nau hoko ko ha kau ākonga faivelenga ange ʻa Sīsū Kalaisi ʻo fakafou ʻi hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi heʻenau fehangahangai mo e ngaahi fehuʻi mo e ngaahi hohaʻa ʻi heʻenau moʻuí.
Fakaafeʻi e kau akó ke vahevahe mo e kalasí ʻa e meʻa kuo nau ako fekauʻaki mo e ngaahi tefitoʻi moʻoni ʻo hono maʻu ʻo e ʻilo fakalaumālié ʻa ia ʻoku nau ongoʻi ʻe ʻaonga taha ki he talavou ko ʻení, hono ngaahi kaungāmeʻá, pe ko hono fāmilí. Tuku ha taimi lahi ki he fealeaʻaki ko ʻení.
Makatuʻunga ʻi he taimi ʻatā hili ʻa e fealēleaʻakí, te ke lava ʻo fili mei he toenga ʻo e lēsoní ke tokoni ke mahino lelei ange ki he kau akó ʻa e ngaahi tefitoʻi moʻoni ko ʻení.
Ko e hā e meʻa naʻe fai ʻe he talavoú?
Fakakaukau ke kole ki he kau mēmipa ʻo e kalasí ke kumi ha hoa pea ʻoange ki he hoa takitaha ha tatau ʻo e toenga ʻo e talanoa naʻe fai ʻe ʻEletā Hōlaní. Fakaafeʻi kinautolu ke laineʻi ʻa e fakamoʻoni ki he founga naʻe fakaʻaongaʻi ai ʻe he talavoú ni mo e niʻihi kehé ʻa e ngaahi tefitoʻi moʻoni ki hono maʻu ʻo e ʻilo fakalaumālié.
Hili iá peá ke fakakaukau ke fakaʻaliʻali ʻa e ngaahi fehuʻi ʻi laló ke aleaʻi ʻe he ngaahi hoá.
Naʻe fakamoleki ʻe heʻene palesiteni fakamisioná, palesiteni fakasiteikí, mo ʻene pīsopé ha ngaahi houa lahi he fekumi mo tangi pea mo tāpuakiʻi iá. … Naʻe tekaki ʻe he [faʻē] ʻofeina ʻi he talanoá ni ʻene moʻuí kotoa ke tokoniʻi ʻa e fohá ni. Naʻá ne fakamoʻoniʻi ange ʻi he taimi tatau pē ʻa ʻene ʻofa ʻaufuatō, mo taʻe-tūkua maʻaná foki. …
Pea te u tala atu, naʻe ʻikai liliu fakafokifā e fetokangaʻaki fakahomosekisuale ʻa e [talavou] ko ʻení—naʻe ʻikai fakakaukau ha taha ia ʻe malava. Ka naʻe liliu māmālie ʻa hono lotó.
Naʻe kamata ke ne toe foki ki he lotú. Naʻá ne fili loto fiemālie ke ne kai he moʻui taau e sākalamēnití. Naʻá ne toe maʻu ha lekomeni temipale mo tali ha fatongia ke hoko ko ha faiako semineli he pongipongí, pea kuó ne fakahoko lelei moʻoni ia. Ko e taimi ní, hili ʻeni ha taʻu ʻe nima mei ai, naʻá ne kole ʻiate ia pē, pea ʻi he tokoni lahi kiate ia ʻa e Siasí, kuó ne toe hū ki he malaʻe ʻo e ngāue fakafaifekaú, ke fakakakato hono fatongia ki he ʻEikí. Kuó u tangi-ʻa-loʻimata koeʻuhí ko e loto-toʻa, angatonu mo e loto-vilitaki ʻa e talavoú ni. (Jeffrey R. Holland, “Vakai ki Hoʻo Faʻeé,” Liahona, Nōvema 2015, 49)
-
ʻOku fakahaaʻi fēfē ʻe he ngaahi fili naʻe fai ʻe he talavoú ʻa ʻene tui kia Sīsū Kalaisí? ʻOkú ke pehē naʻe liliu fēfē ʻe Heʻene ngaahi filí ʻa hono vā mo e Tamai Hēvaní?
-
ʻOkú ke pehē ko e hā e ʻuhinga ʻoku mahuʻinga ai ke fili ʻene faʻeé ke fakamoʻoniʻi kiate ia ʻa e ʻofa ʻa e ʻOtuá kiate iá?
-
Ko e hā ha fakamoʻoni ʻokú ke vakai ai naʻá ne tafoki ki ha ngaahi maʻuʻanga tokoni kuo fokotuʻu fakalangi? ʻOkú ke pehē naʻe tākiekina fēfē ʻe he ngaahi maʻuʻanga tokoni naʻá ne filí ʻa ʻene tui kia Sīsū Kalaisí?
-
Tau pehē pē ʻoku ʻikai lava ʻe he talavoú ni ʻo maʻu ha tali ki ha niʻihi ʻo ʻene ngaahi fehuʻí pe ngaahi meʻa ʻoku hohaʻa ki aí. Ko e hā e meʻa ʻokú ke ʻilo fekauʻaki mo e Tamai Hēvaní mo ʻEne palaní ʻe ala ʻaonga ke ne manatuʻí?
Fakafonu ʻa e konga ʻoku ʻataá
ʻI he ʻekitivitī ko ʻení, fakakaukau ke hiki ʻi he palakipoé ʻa e ngaahi fakamatala taʻekakato ʻe tolu ʻi laló.
Fili ha taha ʻo e ngaahi fakamatala ko ʻení mei he Fakamatala ki he ʻElito ʻo e Fakataukei Fakatokāteliné pea feinga ke fakakakato ia mei hoʻo manatú. Vakaiʻi leva hoʻo talí ʻo fakaʻaongaʻi e palakalafi 5–12 ʻo e konga “Ko Hono Maʻu ʻo e ʻIlo Fakalaumālié”.
-
“Lolotonga e ngaahi taimi he ʻikai ke tau maʻu vave ai e tali ki heʻetau ngaahi fehuʻí …”
-
“ʻOku tau fekumi ki he tokoni ʻa e Laumālie Māʻoniʻoní kae lava ke …”
-
“ʻE lava ke hoko ʻa e ako ke ʻiloʻi mo fakaʻehiʻehi mei he ngaahi maʻuʻanga tokoni taʻefalalaʻangá …”
Fakakaukau ki he ʻuhinga ʻoku mahuʻinga ai ke mahino ki he talavoú mo hono ngaahi kaungāmeʻá mo e fāmilí ʻa e ngaahi tefitoʻi moʻoni ʻi he fakamatala naʻá ke filí.
Fakaafeʻi e kau akó ke nau ʻunu takai ʻi he lokí pea fevahevaheʻaki ʻenau ngaahi fakakaukaú. Te ke lava ʻo poupouʻi kinautolu ke hokohoko atu ʻenau kumi hanau hoa foʻou kae ʻoua kuo nau vahevahe ʻenau ngaahi fakakaukaú mo ha toko taha pe tokolahi ange naʻa nau fili ʻa e fili 1, ko ha taha naʻá ne fili ʻa e fili fika 2, mo ha tokotaha naʻá ne fili ʻa e fili 3.
Ngaahi maʻuʻanga tokoni kuo fokotuʻu fakalangí
Fakakaukau ke fakaʻaliʻali ange ʻa e ngaahi fehuʻi ko ʻení. Hili iá pea ʻoange ha taimi feʻunga ki he kau akó ke nau fekumi ki he folofolá mo e ngaahi fakamatalá kimuʻa pea fakaafeʻi kinautolu ke nau tali leʻolahí.
Kapau ʻe fiemaʻu, te ke lava ʻo ʻoange ki he kau akó ʻa e ngaahi maʻuʻanga tokoni ʻoku fokotuʻu atu ʻi he konga “Ngaahi Maʻuʻanga Tokoni Kehé”.
-
Ko e potufolofola fakataukei fakatokāteline fē mei he Tokāteline mo e Ngaahi Fuakavá (pe ngaahi tohi folofola kehé) ʻokú ke pehē ʻe lava ʻo tokoni ki he talavou ko ʻení?
-
Ko e hā ha ngaahi fakamatala mei he kau taki ʻo e Siasí ʻe ʻaonga kiate ia pe ko e niʻihi ʻokú ne ʻofa aí ke nau akó?