“Lēsoni 159—Ko e Fanongonongo ki he Fāmilí, Konga 2: ʻKo e Fānaú ko ha Tofiʻa mei he [ʻEikí],’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko e Fanongonongo ki he Fāmilí, Konga 2,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 159: “Ko e Fāmilí: Ko ha Fanongonongo ki Māmani”
Ko e Fanongonongo ki he Fāmilí, Konga 2
“Ko e Fānaú ko ha Tofiʻa mei he [ʻEikí]”
Naʻe fakahā ʻe he kau palōfita ʻa e ʻEikí ʻa e mahuʻinga ʻo e fānaú ʻi he palani ʻa e Tamai Hēvaní. ʻE lava ke kau ʻa e uaifí mo e husepānití ʻi he palani ʻa e ʻOtuá ʻaki hono ʻomi ha fānau ki he māmaní pea ohi hake kinautolu ʻi he ʻofa mo e māʻoniʻoni. ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo hono tokangaʻi ʻo e fānaú ʻi he palani ʻa e Tamai Hēvaní.
Ngaahi ʻEkitivitī Ako ʻOku Ala Fakahokó
Fakahinohino fakalangi mei he fanongonongo ki he fāmilí
Fakakaukau ke kamata e kalasí ʻaki hano vahevahe e tūkunga ko ʻení pe ko ha meʻa tatau ʻokú ne feau lelei taha e ngaahi fiemaʻu hoʻo kau akó. Te ke lava ʻo fokotuʻutuʻu tautau toko ua kinautolu ke aleaʻi ʻa e fehuʻí hili ʻa e tūkungá.
ʻOku aleaʻi ʻe Kalisitiane mo hono ongo kaungāmeʻá honau kahaʻú mo e meʻa ʻoku nau fiemaʻu ʻi he moʻuí. ʻI heʻenau talanoa fekauʻaki mo e ngaahi fāmilí, ʻoku pehē ʻe Kalisitiane ʻokú ne fiefia ke mali pea maʻu ha fānau ʻi heʻene matuʻotuʻa angé. ʻOku pehē ʻe ha taha ʻo hono ngaahi kaungāmeʻá, “ʻOku ou fie mali, ka he ʻikai ke u teitei ohi hake ʻe au ha fānau ʻi he māmani fakavalevale ko ʻení.” ʻOku pehē ʻe he kaungāmeʻa ʻe tahá, “ʻOku sai pē kia au ke ʻi ai haʻaku fānau ha ʻaho, ka ʻoku ʻikai ke u fie mali au.” Hili e fanongo ʻa Kalisitiane ki he ngaahi fakakaukau ʻa hono ongo kaungāmeʻá, ʻokú ne fifili pe ko e hā e ʻuhinga ʻoku matuʻaki kehekehe ai ʻene ngaahi ongo fekauʻaki mo e maʻu ha fānaú.
-
Ko e hā nai e ʻuhinga ka maʻu ai ʻe he ngaahi kaungāmeʻa ʻo Kalisitiané ʻa e faʻahinga ongo ʻoku nau maʻú?
Kole ki ha ngaahi hoa ʻe niʻihi ʻo e kau akó ke vahevahe ha niʻihi ʻo ʻenau ngaahi talí. Te ke lava foki ʻo fakaafeʻi kinautolu ke vahevahe ha toe ngaahi hohaʻa pe ngaahi fehuʻi ʻoku nau maʻu fekauʻaki mo e fānaú mo e tauhi fānaú. ʻOange ha ngaahi tatau ʻo e “Ko e Fāmilí: Ko ha Fanongonongo ki Māmani” ke fakaʻaongaʻi ʻe he kau akó. Fakaafeʻi e hoa takitaha ke ako e palakalafi 4–6, ʻo kumi e ngaahi foʻi lea pe kupuʻi lea ʻoku nau fakahaaʻi e tokāteline ʻa e ʻEikí fekauʻaki mo e fānaú mo e tauhi fānaú. Poupouʻi e kau akó ke fakaʻilongaʻi ha ngaahi foʻi lea pe kupuʻi lea ʻoku mahuʻingamālie ʻi heʻenau akó. Kapau ʻe fiemaʻu, fakamahinoʻi ange ʻoku ʻuhinga ʻa e kupuʻi lea “fakatokolahi mo fakakakai ʻa e māmaní” ki he maʻu ha fānaú pea ʻoku ʻuhinga ʻa e kupuʻi lea “ngaahi mālohi toputapu ʻo e fakatupú” ki he fetuʻutaki fakasekisualé. ʻE lava ke ke ʻeke ange ha ngaahi fehuʻi hangē ko ʻení.
-
Ko e hā ha ngaahi moʻoni fekauʻaki mo e fānaú mo e tauhi fānaú naʻá ke ʻilo?
-
ʻOkú ke pehē ko e hā e ʻuhinga ʻoku finangalo ai ʻa e ʻEikí ke maʻu ʻe he husepānití mo e uaifí ha fānau kapau te na lavá?
-
Ko e hā ha ngaahi ʻuhinga he ʻikai fiemaʻu ai ʻe ha ongomeʻa mali ha fānau?
Kimuʻa pea hoko atú, te ke lava ʻo fakaafeʻi e kau akó ke hiki ha niʻihi ʻo ʻenau ngaahi fakakaukau mo e ongo fekauʻaki mo e tokāteline ʻa e ʻEikí kau ki he fānaú mo e tauhi fānaú. Poupouʻi e kau akó ke nau fekumi ki he ivi tākiekina ʻo e Laumālie Māʻoniʻoní ke tokoni ke mahino kiate kinautolu ʻa e mahuʻinga ʻo hono maʻu mo tokangaʻi ʻo e fānaú ko ha konga ʻo e palani ʻa e Tamai Hēvaní.
Ko e fekumi ki ha ngaahi maʻuʻanga tokoni fakalangi kehe ke maʻu ha mahino
Fakakaukau ke fakaʻaliʻali ʻa e fakamatala ʻe tolu ko ʻeni mei he fanongonongo ki he fāmilí. Fakamatalaʻi ange ʻe fakaʻaongaʻi ʻe he kau akó ʻa e ngaahi fakamatala ko ʻení ke akoako fekumi ki he ngaahi maʻuʻanga tokoni kuo fokotuʻu fakalangí ke maʻu ha mahino lahi ange. Te ke lava ʻo fokotuʻutuʻu ʻa e kau akó ki ha ngaahi kulupu tautau toko tolu, pea ako ʻe he tokotaha ako takitaha ha foʻi moʻoni kehe. ʻE lava ke mohu founga ʻa e kau akó ʻi hono fili ʻenau ngaahi fakamatalá; hangē ko ʻení, ko e siʻisiʻi taha pe tokotaha ako lōloa taha ʻi he kulupu takitaha ʻe lava ke ʻuluaki fili pe ko e fē ʻa e fakamatala ke nau akó.
-
“ʻOku kei tuʻu maʻu pē ʻa e fekau ko ia ʻa e ʻOtuá ki Heʻene fānaú ke nau fanafanau mo fakatokolahi ʻa māmaní.”
-
“[ʻE] toki ngāue ʻaki pē ʻa e ngaahi mālohi toputapu ʻo e fakatupú ʻe ha tangata mo ha fefine, kuó na ʻosi mali fakalao ko ha husepāniti mo ha uaifi.”
-
“ʻOku maʻu ʻe he mātuʻá ha fatongia toputapu ke ohi hake ʻa ʻenau fānaú ʻi he ʻofa mo e māʻoniʻoni.”
Poupouʻi e kau akó ke nau fakaʻaongaʻi ha ngaahi maʻuʻanga tokoni hangē ko e Fakahinohino ki he Ngaahi Folofolá pe ko e polokalama Gospel Library ke maʻu ha fakamatala lahi ange fekauʻaki mo ʻenau ngaahi fakamatala ʻo e moʻoní. Kapau ʻoku nau fiemaʻu ha fakahinohino, fokotuʻu ange ha ngaahi foʻi lea fekumi hangē ko e “fakatokolahi mo fakakakai,” “ngaahi mālohi ʻo e fakatupú,” pe “mātuʻa angatonú.” Fakaafeʻi ke nau kumi ha ngaahi fakamatala ʻa e kau taki ʻo e Siasí, ngaahi potufolofola, pe ngaahi fakamatala ʻi he makasini ʻa e Siasí ʻokú ne fakaloloto ʻenau mahinó.
ʻI he ʻosi e teuteu ʻa e kau akó, fakaafeʻi ke nau vahevahe mo ʻenau kulupú ʻa e meʻa ne nau tohí. Fakakaukau ke ʻeke ange ha niʻihi ʻo e ngaahi fehuʻi ko ʻení.
-
Ko e hā ha meʻa naʻá ke ako fekauʻaki mo e ngaahi fakamatala ko ʻeni ʻo e moʻoní ʻokú ke ongoʻi ʻoku mahuʻinga?
-
Ko e hā e ʻuhinga ʻoku fiemaʻu ai ʻa e tui kia Sīsū Kalaisí ke moʻui ʻaki ʻa e ngaahi moʻoni ko ʻení ʻi he māmani ʻo e ʻaho ní?
-
Ko e hā ha ngaahi sīpinga kuó ke mamata ai ki he founga ʻe lava ke iku hono moʻui ʻaki e ngaahi moʻoni ko ʻení ki ha ʻofa ʻoku lahi angé, kae iku hono liʻaki e ngaahi moʻoni ko ʻení ki he mamahí pe fakaʻiseʻisá?
-
Ko e hā ha meʻa te ke lava ʻo fai he taimí ni ke teuteu ai ke moʻui faivelenga ʻaki e ngaahi moʻoni ko ʻení ʻi he kahaʻú?
Tokāteline taʻengata fekauʻaki mo e fānaú
Fakakaukau ke fakamoʻoni ki he mahuʻinga ʻo e fānaú ʻi he palani taʻengata ʻa e ʻOtuá pea vahevahe ʻa e fakamatala ko ʻení.
Naʻe fakamatala ʻa Palesiteni Tāleni H. ʻOakesi ʻo e Kau Palesitenisī ʻUluakí ki he mahuʻinga ʻo e fānaú ʻi he palani ʻa e ʻOtuá.
ʻOku ʻomi … ʻe he tokāteline taʻengatá ha fakakaukau makehe ki he fānaú. ʻOku tau vakai ʻi he fakakaukaú ni ki hono maʻu mo ohi ʻo e fānaú ko e konga ia ʻo e palani fakalangí. Ko ha fatongia fakafiefia mo toputapu ia ʻa kinautolu kuo foaki ange ʻa e mālohi ke nau kau aí. Ko ia ai, ʻoku fekauʻi kitautolu ke akoʻi mo taukaveʻi e ngaahi tefitoʻi moʻoni mo e founga ngāue ʻoku maʻu ai e tūkunga lelei taha ki he fakalakalaka mo e fiefia ʻa e fānaú ʻi he palani ʻa e ʻOtuá. (Dallin H. Oaks, “ʻOfa Fakalangi ʻi he Palani ʻa e Tamaí,” Liahona, Mē 2022, 102)
-
Ko e hā ha founga kuó ke mamata ai ki hono tāpuekina ʻe he fānaú ho fāmilí pe niʻihi kehe ʻokú ke ʻiló?
-
ʻE tokoni fēfē hono ʻomi e fānaú ki he māmaní mo hono ʻohake kinautolu ʻi he ʻofá, ke ke hoko ai ʻo hangē ange ko ʻetau mātuʻa fakalangí?
Fakakaukau ke fakaʻaliʻali e ngaahi ueʻi ko ʻení pea fakaafeʻi e kau akó ke vakaiʻi fakalongolongo ʻenau mahino fekauʻaki mo e meʻa ne nau ako he ʻaho ní.
Fakafuofuaʻi e mahino ʻokú ke maʻu ki he ngaahi fakamatala ko ʻení ʻaki haʻo tali ʻi hoʻo tohinoa akó ʻokú ke loto-fiemālie ʻaupito, loto-fiemālie, tui ki ai, pe ʻikai fakapapauʻi. Hiki nounou ʻa e ʻuhinga naʻá ke fili ai ʻa e tali takitaha.
-
ʻOku mahino kiate au ʻa e ʻuhinga ʻoku kei fakamamafaʻi ai he ʻahó ni e fekau ʻa e ʻOtuá ke fakatokolahi mo fakakakai ʻa e māmaní.
-
ʻOku mahino kiate au ʻa e ʻuhinga ʻoku toki fakaʻaongaʻi ai pē ʻa e ngaahi mālohi toputapu ʻo e fakatupú ʻi he vahaʻa ʻo ha fefine mo ha tangata kuó na mali fakalao.
-
ʻOku mahino kiate au ʻa e ʻuhinga ʻoku fiemaʻu ai ke ohi hake ʻe he mātuʻá ʻenau fānaú ʻi he ʻofa mo e māʻoniʻoni.
Kapau ʻoku ʻi ai ha toe ngaahi fehuʻi pe hohaʻa ʻa e kau akó fekauʻaki mo e tokāteline ʻa e ʻEikí kau ki he fānaú pe fekauʻaki mo e fono ʻo e angamaʻá, poupouʻi kinautolu ke toe vakaiʻi mo ʻenau mātuʻá pe kau taki ʻo e Siasí.
Ke fakaʻosí, fakaafeʻi ha niʻihi ʻo e kau akó ke fakamatalaʻi fakanounou e meʻa ne nau ako fekauʻaki mo e mahuʻinga ʻo hono maʻu mo tokangaʻi e fānaú ko ha konga ʻo e palani ʻa e Tamai Hēvaní.