Lesona 162: O Le Keriso Soifua

O Le Keriso Soifua, Vaega 1

“Matou te Molimau Atu, i le avea ai ma Ana Aposetolo Faauuina—O Iesu o le Keriso Soifua”

I le aso 1 o Ianuari, 2000, na tuuina mai ai e le Au Peresitene Sili ma le Korama a Aposetolo e Toasefululua se tautinoga ua taua “O Le Keriso Soifua: O Le Molimau a Aposetolo.” O la latou molimau na faamanatuina ai le 2,000 tausaga o le soifua mai o le Faaola. O lenei lesona e mafai ona fesoasoani i tagata aoga e faalolotoina lo latou malamalama ia Iesu Keriso.

Gaoioiga E Ono Mafai Ona Aoao Ai

O Iesu o le Keriso soifua

Faaali atu le ata o Iesu Keriso mai le amataga o lenei lesona po o se isi ata o le Faaola. Mafaufau e tuu atu i se tagata aoga i le ogatotonu o le potu se ata o le lalolagi. Valaaulia le vasega e faatonu lena tagata aoga e faalatalata atili atu pe aluese mai le ata o Iesu Keriso e faavae i o latou lagona e uiga i le tulaga o le lalolagi. Valaaulia i latou e faamatala mai pe aisea latou te lagona ai faapena.

• Aisea e taua ai pe ua latalata atili atu le lalolagi pe mamao ese mai le Alii?

Faaaoga sina taimi e manatunatu loloto ai i fesili nei:

• Aisea e taua ai ia te oe pe afai o loo e faalatalata atili atu pe mamao ese mai le Alii?

• O a nisi o auala e mafai ona fesoasoani ai le Faaola ia te oe i lou olaga i le taimi nei?

Valaaulia tagata aoga e mafaufau loloto i nei fesili a o latou suesue i le asō ma saili le taitaiga mai le Alii e fesoasoani ia i latou e tali ai.

“O Le Keriso Soifua”

Tufa atu kopi o le “O Le Keriso Soifua: O Le Molimau a Aposetolo” (ChurchofJesusChrist.org), pe valaaulia tagata aoga e sue i a latou api faamaumau mo suesuega.

Ina ia fesoasoani i tagata aoga e aoao atili e uiga i lenei tautinoga, uunaia i latou e tali fesili e pei o fesili nei: O le a se mea ua e matauina? O anafea na tuuina mai ai? O ai na sainia? E te iloaina igoa o soo se tasi o tagata na sainia?

O le isi auala, e mafai ona e tuu atu i se tagata aoga e faitau le parakalafa lenei o le talaaga.

I le avea ai ma molimau faapitoa a Keriso (tagai Mataupu Faavae ma Feagaiga 107:23), na tuuina mai ai e le Au Peresitene Sili ma le Korama a Aposetolo e Toasefululua se tautinoga i le aso 1 o Ianuari, 2000. O lenei tautinoga, ua lauiloa “O Le Keriso Soifua: O Le Molimau a Aposetolo,” na faamanatuina ai le 2,000 tausaga o le soifua mai o Iesu Keriso.

Faitau pe matamata i le saunoaga lenei a Elder Robert D. Hales (1932–2017) o le Korama a Aposetolo e Toasefululua, ma vaavaai pe aisea e taua ai lenei tautinoga:

O loo o ese le lalolagi mai le Alii i se saoasaoa faateleina nai lo se isi lava taimi muamua. Ua faasaolo solo le tiapolo i le lalolagi. Ua tatou matamata, faalogo, faitau, suesue, ma faasoa atu upu a perofeta ina ia muai lapataiina ma puipuia ai i tatou. Mo se faataitaiga, “O Le Aiga: O Se Folafolaga i le Lalolagi” ua leva ona tuuina mai ae tatou te le i taitai oo i luitau ua feagai nei ma aiga. “O Le Keriso Soifua: O Le Molimau a Aposetolo” ua leva ona tapena mo le taimi o le a sili ona tatou manaomia ai. (Robert D. Hales, “Konafesi Aoao: Faamalosia o le Faatuatua ma le Molimau,” Liahona, Nov. 2013, 7)

Valaaulia tagata aoga e faasoa mai se mea na tūmātila ia i latou mai le faamatalaga. Fesili atu ia i latou pe aisea latou te manatu ai atonu e sili atu ona manaomia molimau a Aposetolo e uiga i le Faaola i le taimi nei ma le lumanai nai lo le taimi na tuuina mai ai le tautinoga.

Faamalamalama atu o le a maua e tagata aoga se avanoa i le lesona o le asō e latalata atili atu ai i le Faaola e ala i le faalolotoina o lo latou malamalama ia te Ia e ala i lenei folafolaga faaperofeta.

Suesue le, “O Le Keriso Soifua”

Fesoasoani i Tagata Aoga ia Iloa Iesu Keriso: O le gaoioiga lenei ua mamanuina e fesoasoani ai i tagata aoga ia iloa lelei Keriso. Mo nisi faataitaiga i lenei mea, tagai i le aoaoga ua faaulutalaina “Aoao atu e uiga i faalagiga, matafaioi, ma uiga o Iesu Keriso,” e maua i le Tomai o le Atinaega o Faiaoga: Taulai atu ia Iesu Keriso. Mafaufau e faataitai le tomai “Fatu ni fesili sailiili e fesoasoani ai i tagata aoga e faailoa mai matafaioi, faalagiga, faatusa, uiga faalia, ma uiga o Iesu Keriso.”

Suesue i le “O Le Keriso Soifua: O Le Molimau a Aposetolo,,” vaavaai mo upumoni e uiga ia Iesu Keriso. O le faamalamalama o se tasi pe sili atu o nei mea e mafai ona fesoasoani:

• O suafa eseese o Iesu Keriso o loo faaaogaina i le pepa o faamatalaga

• O mea e te lagona o fuaitau autu ia i le pepa o faamatalaga

• Faamatalaga o loo faailoa ai mea na faia e Iesu Keriso mo oe

• Matafaioi ma uiga auaumama o Iesu Keriso

Mafaufau e asiasi atu i tagata aoga taitoatasi e ofo atu le fesoasoani ma le faamalosiauga a o latou suesue.

Afai e aoga, e mafai e tagata aoga ona mulimuli i le faitauga ma faailoga a latou kopi “O Le Keriso Soifua” a o matamata i le vitio lenei o le Au Peresitene Sili ma le Korama a Aposetolo e Toasefululua o loo taulotoina mai ai ni vaega mai le vitio. Pe mafai foi e tagata aoga ona matamata i le vitio pe a uma a latou suesuega e faamalosia ai mea na latou aoaoina pe maua ai foi ni malamalamaaga fou. O le vitio “Excerpts from ‘The Living Christ: The Testimony of the Apostles” (2:45), o loo maua i le ChurchofJesusChrist.org.

Tuu atu i tagata aoga ni nai minute e faasoa mai ai mea na latou aoaoina a o latou suesueina le “O Le Keriso Soifua.” Uunaia tagata aoga e faalogo ma aoao mai i le tasi ma le isi . E mafai ona latou faamatala mai pe aisea latou te faatauaina ai faamatalaga a se tamaitiiti o le vasega pe fai atu foi se fesili e fesoasoani e faaloloto ai le malamalama.

E tele upumoni e mafai ona faailoa mai e tagata aoga. O nisi nei o faataitaiga:

• I lalo o le taitaiga a le Tama, na foafoaina ai e Iesu Keriso le lalolagi.

• O Iesu Keriso na tuuina atu Lona soifua e togiola ai mo agasala a tagata uma.

• Sa toetu Iesu Keriso ma o loo soifua nei.

• O Iesu Keriso o le malamalama, o le ola, ma le faamoemoega o le lalolagi.

• O ala o Iesu Keriso o le auala e tau atu i le fiafia i lenei olaga ma le ola e faavavau i le lalolagi a sau.

Filifili se tasi o upumoni na e faailoaina po o isi e uiga ia Iesu Keriso e te fia aoao atili i ai.

Faalautele lo tatou malamalama i upumoni

E mafai ona e faitauina le faamatalaga lenei e fautua atu ai se auala se tasi e faaloloto ai le malamalama i nei upumoni.

Na valaaulia i tatou e Peresitene M. Russell Ballard o le Korama a Aposetolo e Toasefululua ina ia “mafaufau e suesue i tusitusiga paia e faalautele ai [lo tatou] malamalamaaga i upumoni patino o loo maua i le ‘O Le Keriso Soifua’” (M. Russell Ballard, “Toe Foi Mai ma Maua,” Liahona, Me 2017, 65).

Valaaulia tagata aoga e faaaoga a latou tusitusiga paia e faalautele ai lo latou malamalama i se tasi o upumoni e uiga ia Iesu Keriso. E mafai ona latou suea upu autu po o fasifuaitau i le Taiala i Tusitusiga Paia po o Taiala Autu. Pe mafai foi ona latou filifilia se tala i le Faaola e faaalia ai le upumoni na latou filifilia.

E mafai foi e tagata aoga ona faia mea nei e faalautele ai lo latou malamalama:

• Suesue i le tusi o viiga i autu, ma vaavaai mo mea o loo aoao mai e viiga e uiga ia Iesu Keriso ma Ana matafaioi eseese.

• Faaaoga se tusi mo uiga o upu e faamatala ai upu faigata.

• Vaavaaai i faamatalaga mai taitai o le Ekalesia.

Atonu e te manao e faaali atu faatonuga nei e taiala ai tagata aoga a o latou suesue.

1. Tusi i lalo mau na e suesueina ma ni malamalamaaga faaopoopo e faalautele ai lou malamalama i le upumoni na e filifilia e uiga ia Iesu Keriso.

2. Mafaufau loloto pe aisea e taua ai le malamalama i lena upumoni e uiga ia Iesu Keriso.

3. Talu ai ua toetu Iesu ma o loo soifua i le asō, o lea ua Ia faataunuuina ai pea le upumoni sa e suesueina. Tusi pe faapefea ona Ia faia lenei mea i lou olaga pe faapefea foi ona faia se eseesega ia te oe.

E mafai e tagata aoga ona tusi mea latou te maua i a latou kopi o “O Le Keriso Soifua.”

Valaaulia tagata aoga e faasoa atu i isi mea ua latou aoaoina i le asō. O se tasi o auala o le feoai solo lea i le potu e sue se tasi latou te lei galulue faatasi talu ai nei. Valaaulia tagata aoga e faasoa mai mea na latou maua ma o latou manatu e faatatau iai. Ona mafai lea ona latou siitia atu i se isi tagata aoga ma toe faasoa atu. E ono fesoasoani lenei mea ia i latou e faamasani ai i nisi tagata aoga ma faalogo i manatu eseese.

Mafaufau e faalogo atu i tagata aoga e faasoa mai mea sa latou mauaina. A o e faalogologo, atonu e te manao e fai atu i nisi o i latou e faasoa atu i le vasega atoa. O le a latou maua se avanoa e faasoa atili mai ai i le lesona o sosoo mai.

• E te manatu e mafai faapefea ona fesoasoani upumoni o loo aoaoina i le “O Le Keriso Soifua” ia i tatou ia malamalama ma latalata atili atu ia Iesu Keriso?

• E faapefea ona fesoasoani le malamalama lelei i le Faaola ia te oe i lou olaga?

Punaoa Faaopoopo

Aisea e suesue ai e uiga i le Faaola?

I le avea ai ma se tasi o molimau faapitoa e 15 o e na sainia le “O Le Keriso Soifua,” na aoao mai ai e Peresitene Russell M. Nelson mea nei:

A o e saili e aoao atili e uiga ia Iesu Keriso, ou te uunaia oe e suesue i le “O Le Keriso Soifua.”

A tatou faaalu aoga le taimi e aoao ai e uiga i le Faaola ma Lana taulaga togiola, tatou te tosina atu e auai i se isi elemene autu o le mauaina o Lona mana: tatou te filifili ia maua le faatuatua ia te Ia ma mulimuli ia te Ia. (Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 40)

O le a le mea na taitai atu ai i le Au Peresitene Sili ma le Korama a Aposetolo e Toasefululua i le tuuina atu o le “O le Keriso Soifua”?

Sa aoao mai e Peresitene Russell M. Nelson le mea lenei:

O le taua o le misiona a le Faaola na faamamafa mai e le Perofeta o Iosefa Samita, o lē na tautino mai ma le malosi e faapea, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, e faapea na Ia maliu, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai” [Aoaoga a Peresitene o le Ekalesia: Iosefa Samita (2007), 49].

O le saunoaga patino lava lenei a le Perofeta na maua ai se uunaiga mo perofeta, tagatavāai, ma tagata tali faaaliga e toa 15 ia tuuina mai ma sainia la latou molimau e faamanatu ai le 2,000 tausaga o le soifua mai o le Alii. O lea molimau iloga ua faaulutalaina “O Le Keriso Soifua.” (Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 40)

E mafai faapefea ona manuia lo‘u olaga e ala i le suesueina “O Le Keriso Soifua”?

Na faasoa mai Sister Jean B. Bingham, sa avea ma Peresitene Aoao o le Aualofa:

Ao ou suesueina le soifuaga ma aoaoga a Iesu Keriso ma taulai atili ma tautino atu e tauloto le “O Le Keriso Soifua, sa faateleina lo’u lotofaafetai ma le alofa mo lo tatou Faaola. O fuaiupu taitasi o lena tusiga musuia o loo i ai se lauga ma ua faalauteleina ai lo’u malamalama i Ana matafaioi paia ma le misiona i le lalolagi nei. O mea sa ou aoaoina ma lagonaina i lea vaitau o le suesue ma toe tomanatu i ai, ua faamautu ai e moni lava o Iesu “o le malamalama, o le ola, ma le faamoemoe o le lalolagi.” (Jean B. Bingham, “Ina Ia Atoa Lo Outou Olioli,” Liahona, Nov. 2017, 85)

Gaoioiga Faaopoopo e Aoao Ai

Isi filifiliga o suesuega mo le “O Le Keriso Soifua”

Ina ia fesoasoani i tagata aoga ia iloa le natura e faavavau o Iesu Keriso, mafaufau e tusi ni koluma se tolu i luga o le laupapa ma faaigoa i latou i le muai olaga, olaga nei, ma le olaga pe a mavae le oti. E mafai ona e tuuina tagata aoga i ni vaega taitoatolu pe vaevae le vasega i ni vaetolu, ma o vaetolu taitasi e ave se tasi o koluma. Ona mafai lea e tagata aoga ona suesue le “O Le Keriso Soifua” mo upumoni o loo aoao mai ai e uiga i le galuega a le Faaola i le muai olaga, olaga nei, ma le olaga pe a mavae le oti.

O se vitio e mafai ona matamata ai

A uma ona suesue ma faasoa mai e tagata aoga mea na latou aoaoina mai le “O Le Keriso Soifua,” e mafai ona e faaali atu le “Living Apostles Testify of Jesus Christ” (2:16). O loo faaalia i lenei vitio ni molimau faaopoopo ia Keriso mai perofeta soifua.

O le faatagata o Keriso i le Malumalu o Pale Farani

Ina ia fesoasoani i tagata aoga ia iloa le taua o le taulai atu o tatou olaga ma le faatuatua ia Iesu Keriso, mafaufau e matamata i le “O Se Molimau Ola o le Keriso Soifua” mai le faailo taimi 0:00 i le 0:50. I le vitio lenei, o loo faasoa mai ai e Epikopo Gérald Caussé, le Epikopo Pulefaamalumalu, le mea na tupu i se tamaloa a o tuuina se faatagata o Keriso i le Malumalu o Pale Farani. E mafai ona vaavaai tagata aoga mo le auala na suia ai lagona o le tamaloa e uiga i le Ekalesia a o ia malamalama atili e uiga i lo tatou taulai atu ia Iesu Keriso.

E mafai ona e talanoaina pe faapefea e upumoni o loo i ai i le “O Le Keriso Soifua” ona fesoasoani ia i tatou e faamatala atu i isi mea tatou te talitonu i ai e uiga ia Iesu Keriso.