Lesona 163: O Le Keriso Soifua

O Le Keriso Soifua, Vaega 2

“Matou te Ofoina Atu La Matou Molimau i le Moni o Lona Soifuaga e Le Mafaatusalia”

E pei lava ona molimau mai le Au Peresitene Sili ma le Korama a Aposetolo e Toasefululua e uiga i le Keriso soifua, e mafai foi ona tatou tautino atu o loo soifua Iesu Keriso! E mafai ona fesoasoani lenei lesona i tagata aoga e faasoa atu ai o latou manatu ma lagona e uiga ia Iesu Keriso i isi.

Gaoioiga E Ono Mafai Ona Aoao Ai

Mafuaaga e faasoa ai

Ina ia fesoasoani i tagata aoga e sauni e aoao, e mafai ona e aumaia se mea e te fiafia i ai ma e te manao e faasoa atu i lau vasega. E mafai ona avea lenei mea o se ata, se aafiaga, po o se meaai e sili ona fiafia i ai. Valaaulia tagata aoga e mafaufau i mea na latou faasoaina talu ai nei pe mananao foi e faasoa atu i se isi tagata.

• O le a se mea na e manao e faasoa atu?

• Aisea na e manao ai e faasoa atu?

  I luga o le laupapa fai se lisi o mafuaaga na mananao ai tagata aoga e faasoa mai se mea.

• O a mafuaaga o loo i le lisi e mafai ona faatatau i le faasoaina atu o se aafiaga po o se molimau ia Iesu Keriso i isi?

• O le a se mea e mafai ona e faaopoopo i lau lisi o ni mafuaaga patino e molimau atu ai ia Iesu Keriso?

Valaaulia tagata aoga e mafaufau pe o a ni o latou lagona e uiga i le talanoa atili e uiga ia Iesu Keriso ma isi ma pe aisea foi latou te lagona ai faapena.

Sauni e molimau atu ia Iesu Keriso

Valaaulia se tagata aoga e faitau le faamatalaga lenei.

Ua aoao mai Elder Neil L. Andersen o le Korama a Aposetolo e Toasefululua:

E toatele o i le lalolagi e itiiti so latou iloa e uiga ia Iesu Keriso, ma i nisi vaega o le lalolagi lea sa folafolaina ai Lona suafa mo le tele o seneturi, ua faaitiitia le faatuatua ia Iesu Keriso. … [O] se … suesega i le lalolagi atoa, ua valoia ai e faapea, o le tele o tausaga o lumanai, e sili atu i le faaluaina le toatele o le a tuua le faa-Kerisiano nai lo i latou o le a taliaina. …

… Afai o le a faaitiitia ona tautalatala le lalolagi e uiga ia te Ia, o ai o le a talanoa atili e uiga ia te Ia? O i tatou! (Neil L. Andersen, “Ua Matou Tautatala e uiga ia Keriso,” Liahona, Nov. 2020, 88–89)

• O a ni mafaufauga po o ni lagona o loo ia te oe e uiga i le faamatalaga lenei a Elder Andersen?

O le Au Peresitene Sili ma le Korama a Aposetolo e Toasefululua o ni faataitaiga o le faasoa atu e uiga ia Iesu Keriso. O se tasi o faataitaiga o le folafolaga “O Le Keriso Soifua.” Faaalu ni nai minute e toe faamanatu ai lenei pepa o faamatalaga, ma mafaufau loloto i faamanuiaga atonu tatou te oo i ai aua sa latou faasoa mai la latou molimau ia Iesu Keriso.

Valaaulia tagata aoga e faasoa mai ni manuia latou te mafaufau i ai.

O manatu ma lagona o tagata aoga e uiga i le talanoa atili e uiga i le Faaola e ono matuai eseese lava. O le faailoaina o se mataupu faavae mai mau e mafai ona fesoasoani ia i latou ia malamalama ai i le taua o le faia o lenei mea. E mafai ona e faasoa atu le mau lenei.

Faitau le 2 Nifae 25:26, ma vaavaai mo se mafuaaga faaopoopo e molimau atu ai ia Iesu Keriso.

• O a ni upumoni e mafai ona tatou aoao mai i mafuaaga a Nifae?

  O se tasi o upumoni e mafai ona faailoa mai e tagata aoga o le a o tatou talanoa ma olioli e uiga ia Iesu Keriso, e mafai e isi ona iloa e mafai ona Ia laveaiina i latou mai a latou agasala.

• E mafai faapefea e le iloaina o mea e mafai ona faia e Iesu Keriso mo isi ona tosinaina ai lou manao e tuuina atu se molimau pe faasoa atu ou manatu ma lagona e uiga ia te Ia?

Toe mafaufau i upumoni na e maua e uiga i le Faaola i le “O Le Keriso Soifua” i le lesona na muamua atu. E mafai ona e filifilia le lesona sa e taulai atu i ai i lena lesona pe filifili se isi lesona e te manao e faasoa atu i isi.

O faataitaiga nei o le tele o upumoni e mafai ona faailoa mai e tagata aoga:

• I lalo o le taitaiga a le Tama, na foafoaina ai e Iesu Keriso le lalolagi.

• O Iesu Keriso na tuuina atu Lona soifua e togiolaina ai agasala a tagata uma.

• Sa toetu Iesu Keriso ma o loo soifua nei.

• O Iesu Keriso o le malamalama, o le ola, ma le faamoemoega o le lalolagi.

• O ala o Iesu Keriso o le auala e tau atu i le fiafia i lenei olaga ma le ola e faavavau i le lalolagi a sau.

O gaoioiga nei e mafai ona alu ai le taimi o totoe o le vasega ma e mafai ona fesoasoani e saunia ai tagata aoga e faasoa atu. Filifili se gaoioiga se tasi e te lagona e aoga mo au tagata aoga, pe tuuina atu gaoioiga taitasi e fai ma filifiliga mo tagata aoga e filifili ai. Ina ia fesoasoani i tagata aoga e filifili le gaoioiga e sili ona talafeagai, e mafai ona latou mafaufau po o ai latou te mananao e faasoa atu i ai a latou molimau.

Gaoioiga A: Tauloto

O se tasi o auala e saunia ai e faasoa atu e uiga ia Iesu Keriso o le taulotoina lea o se vaega “O Le Keriso Soifua.”

Faaalu ni nai minute e tauloto ai se vaega o loo aoao mai ai le upumoni na e filifilia. E mafai ona e tusia i lalo, toe fai mo ni nai taimi, pe faamaumau oe lava o faitauina ma faalogologo i ai mo ni nai taimi. (E mafai foi ona e taulotoina ni vaega o mau na e maua i le lesona na muamua atu e molimau mai ai i le upumoni lava lea e tasi.)

Ina ia fesoasoani e musuia tagata aoga e tauloto se vaega “O Le Keriso Soifua,” e mafai ona e faaali atu le “Memorize the Living Christ: Goal Setting Ideas” (2:05).

Ona tusi lea i lalo po o afea ma pe faapefea ona e faasoa atu i se isi tagata mea na e taulotoina. Ia aofia ai le mafuaaga e taua ai fuaitau na e filifilia ia te oe ma le auala e te faamoemoe o le a fesoasoani ai i isi e liliu atu ia Iesu Keriso.

Gaoioiga E: Fai se pepa lautele o i ai se savali, ata, po o se ata faakomepiuta

O se tasi o auala e fesoasoani ai ia te oe e faasoa atu ou manatu ma lagona e uiga ia Iesu Keriso o le faia lea o se pepa lautele o i ai se savali, ata, po o se ata faakomepiuta.

Mafaufau e filifili ni ata eseese e pueina ai le uiga o le upumoni na e filifilia. Mo se faataitaiga, atonu e te filifili e faasoa atu le upumoni ma le taua o le papatisoga o Iesu Keriso. O loo faaalia lenei mea i le fuaitau lenei mai le “O Le Keriso Soifua”: “E ui ina leai se agasala, ae sa papatisoina o Ia e faataunuu ai le amiotonu uma.” Atonu e te manao e faaaofia ai le laina lenei i lau galuega faatino faatasi ai ma se ata e sili ona e fiafia i ai o loo faaalia ai le papatisoga o le Faaola. E mafai foi ona e faaaofia ai laina mai mau e faalolotoina ai lou malamalama.

Ona faaopoopo lea o lau faamalamalamaga i le mafuaaga e taua ai lenei malamalama ia te oe.

Afai e mananao tagata aoga e faia lenei mea i a latou telefoni, o i latou e iloa le auala e faaaoga ai le potutusi o ala o faasalalauga a le Ekalesia e mafai ona aoaoina isi i le auala e sue ai ata. Afai e mananao tagata aoga e fai a latou galuega faatino i luga o se pepa, e mafai ona e aumaia mekasini a le Ekalesia ma faataga tamaiti aoga e oti ese ata po o upu.

Gaoioiga I: Saunia se lauga

O se tasi o auala e tau atu ai i isi e uiga ia Iesu Keriso o le tuuina atu lea o se tautalaga .

Vaai faalemafaufau faapea ua e malie e lauga i le Aso Sa i lau uarota po o le paranesi. E mafai ona e faasoa atu mea ua e aoaoina e uiga ia Iesu Keriso ma le mafuaaga e taua ai ia te oe. Tusi ni nai parakalafa e mafai ona e faaaogaina i lau lauga. Ia mautinoa e aofia ai faamatalaga mai le “O Le Keriso Soifua,” fuaitau o mau, ma le mafuaaga e taua ai ia te oe.

Taimi e faasoa ai

Valaaulia tagata aoga e faasoa mai mea na latou saunia. Uunaia tagata aoga eseese e auai. Mafaufau e taofi i nisi taimi e fesili atu po o le a se mea e fiafia i ai tagata aoga pe manatu foi e anoa e uiga i mea o loo faasoa mai e a latou uo. Faamamafa atu o nei malamalamaaga o ni faamanuiaga o le tautala ma molimau atu e uiga i le Faaola.

Uunaia tagata aoga e vaavaai mo ni auala e faasoa atu ai nei mea i fafo atu o le vasega. Afai e talafeagai, e mafai ona e faasoa atu faamanuiaga na e maua mai le talanoa atu i isi e uiga ia Iesu Keriso. Pe mafai foi ona e faasoa atu mea na molimau mai ai isi ia te oe. Fuafua e faaiu le vasega i le fai atu i tagata aoga o le fesili lenei:

• E mafai faapefea ona faaleleia lau sootaga ma Iesu Keriso a o e faasoa atu ou manatu ma lagona e uiga ia te Ia i isi?

Punaoa Faaopoopo

O ai e valaaulia e Iesu Keriso e molimau atu ia te Ia?

Na faasoa mai Elder Gary E. Stevenson o le Korama a Aposetolo e Toasefululua:

Mafaufau faatasi ma a‘u, mo sina taimi, o tutu i luga o se mauga i Kalilaia, ma molimauina le ofoofogia ma le mamalu o le Faaola toetu o loo asiasi atu i Ona soo. E maeu le maofa o le mafaufau i le faalogo patino atu i nei upu, lea na Ia faasoa atu ia te i latou, o Lana poloaiga paia ia “outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia” [Mataio 28:19]. E mautinoa lava, o nei upu o le a faamanaina, musuia, ma uunaia ai i tatou taitoatasi, e pei ona faia e Ana Aposetolo. O le mea moni, sa latou tuuto atu o latou olaga atoa i le faia o lena mea.

O le mea e mataina ai, sa le na o Aposetolo na teulotoina afioga a Iesu. O tagata o le Ekalesia anamua, mai tagata sili ona fou e oo atu i tagata ua lava le tomai, sa auai i le galuega sili a le Faaola, ma faasoa atu le tala fiafia o le talalelei ia i latou sa latou feiloai i ai ma iloa. O le naunautaiga e faasoa atu a latou molimau ia Iesu Keriso na fesoasoani e faatupulaia tele ai Lana Ekalesia faatoa faavae.

O i tatou foi, i le avea ai ma soo o Keriso, ua valaaulia e uai atu i Lana poloaiga i aso nei, e peiseai o tatou i ai iina i lena mauga i Kalilaia i Lona muai folafolaina mai. (Gary E. Stevenson, “Alofa, Faasoa Atu, Valaaulia,” Liahona, Me 2022, 84–85)

Gaoioiga Faaopoopo e Aoao Ai

Molimau atu i faatulagaga eseese

Fesoasoani i tagata aoga e aoao pe faapefea ona molimau atu i nofoaga aloaia ma faasamasamanoa. Atonu e te manao e faasoa atu le saunoaga lenei mai ia Elder Gary E. Bednar o le Korama a Aposetolo e Toasefululua.

I le avea ai o se tagata o le Ekalesia, ua e maua ni avanoa e tuu atu ai lau molimau tautala i sauniga aloaia a le Ekalesia po o i sauniga e le aloaia, i talanoaga faafesagai taitoatasi ma aiga, uo ma isi. …

O taimi uma e te tuu atu ai se molimau faaleoina pe faaalia e ala i au amioga lou tautino e mulimuli ia Iesu Keriso, ua e valaaulia isi e “o mai ia Keriso” [Moronae 10:32]. (Gary E. Stevenson, “Fafagaina ma le Tuuina Atu o Lau Molimau,” Liahona, Nov. 2022, 112)

Valaaulia tagata aoga e lisi ni nofoaga eseese e mafai ona latou molimau atu ai ia Iesu Keriso i isi. E mafai e tagata aoga ona filifili ni laina anoa mai le “O Le Keriso Soifua” ma mafaufau i faatulagaga latou te ono faasoa atu ai lenei savali.

Faamalosia e ala i le molimau a Aposetolo a Iesu Keriso

Valaaulia tagata aoga e faamatala pe faapefea ona faamalosia a latou molimau e ala i le faalogo i le molimau a Aposetolo a Iesu Keriso. E mafai ona latou sueina vitio o taitai o le Ekalesia o loo tuuina atu molimau ia Iesu Keriso. E mafai ona latou faasoaina atu se tasi o nei vitio i luga o ala o faasalalauga faaagafesootai pe taina foi mo tagata o le aiga po o uo. Faamalosiau tagata aoga e faaopoopo a latou lava molimau i le Faaola. O vitio nei o ni faataitaiga o Aposetolo a Iesu Keriso o loo faasoaina atu a latou molimau.

“Molimau Aposetolo Soifua ia Iesu Keriso” (2:16)

Vitio i le itulau “Molimau Faapitoa a Keriso” i le ChurchofJesusChrist.org

Faamatala tala ia Iesu e faaaoga ai vitio o le Tusi Paia ma le Tusi a Mamona

Afai e fiafia tagata aoga e faamatala tala e uiga ia Iesu, e mafai ona latou faamasani i faamatalaga auiliili e ala i le suesueina o fuaiupu o mau ma matamata i vitio. E mafai ona latou faaaogaina Vitio o le Tusi Paia o Le Soifuaga o Iesu Keriso (faasologa o vitio) po o Vitio o le Tusi a Mamona o loo faaalia ai le 3 Nifae.

Mafaufau e valaaulia tagata aoga e filifili se laina mai le “O Le Keriso Soifua” ma sue se vitio o loo faaalia ai lena laina. E mafai e tagata aoga ona faasoa atu le vitio faatasi ai ma a latou molimau patino i le Faaola.

• Vitio o le Tusi Paia—O Le Soifuaga o Iesu Keriso

• Vitio o le Tusi Paia a Tamaiti

• Vitio o le Tusi a Mamona

Faasoa pe faapefea ona manatua pea Iesu Keriso

O se laina taua i le “O Le Keriso Soifua” ua molimau mai ai na “faatuina e Iesu Keriso le faamanatuga e fai ma faamanatu o Lana taulaga togiola sili.” E mafai ona saunia tagata aoga e fesoasoani i se tasi e manatua mea na faia e Iesu Keriso mo i tatou e ala i Lana Togiola. Valaaulia tagata aoga e faasino i Autu ma Fesili, “Togiola a Iesu Keriso,” ChurchofJesusChrist.org. E mafai ona latou faaaogaina punaoa o loo lisiina i le faaiuga o le itulau e filifili ai po o le a le mea e faasoa atu i isi. O se tasi o filifiliga o le fatuina lea o se tamai tusi mo tamaiti Peraimeri e i ai ata ma savali e fesoasoani ia i latou e taulai filemu atu ai o latou mafaufau ma loto i le Faaola. O le isi filifiliga o le fatuina lea o se mea mo talavou e aofia ai mau, viiga, ata, ma molimau. Fesoasoani i tagata aoga e mafaufau i ni auala anoa e faasoa atu ai o latou manatu ma lagona e uiga ia Iesu Keriso ma Lana taulaga togiola.