“Lesona 163: Ilay Kristy velona, Tapany 2: –Manolotra ny tenivavolombelonay izahay ny amin’ny fisian’ny fiainany tsy manam-paharoa,–” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Ilay Kristy velona, Tapany 2,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 163: Ilay Kristy velona
Ilay Kristy velona, Tapany 2
“Manolotra ny tenivavolombelonay izahay ny amin’ny fisian’ny fiainany tsy manam-paharoa”
Tahaka ny Fiadidiana Voalohany sy ny Kôlejin’ny Apôstôly Roambinifolo mijoro ho vavolombelona momba ilay Kristy velona dia afaka manambara ihany koa isika fa velona i Jesoa Kristy! Ity lesona ity dia afaka manampy ny mpianatra hizara ny eritreriny sy ny fahatsapany momba an’i Jesoa Kristy amin’ny hafa.
Ireo sahanasa fianarana azo atao
Antony tokony hizarana
Mba hanampiana ny mpianatra hiomana hianatra dia azonao atao ny mitondra zavatra tianao sy irinao hozaraina amin’ny mpianatrao. Mety ho sary, na zavatra niainana, na sakafo tiana indrindra izany. Asao ny mpianatra hieritreritra ireo zavatra nozarainy vao haingana na tiany hozaraina amin’olon-kafa.
-
Inona no tianao hozaraina?
-
Nahoana ianao no te hizara izany?
Ataovy lisitra eny amin’ny solaitrabe ireo antony nanirian’ny mpianatra hizara zavatra iray.
-
Inona amin’ireo antony ao amin’ilay lisitra no azo ampiharina amin’ny fizarana zavatra niainana na fijoroana ho vavolombelona momba an’i Jesoa Kristy amin’ny hafa?
-
Inona no azonao ampidirina ao amin’ny lisitrao ho antony manokana hijoroana ho vavolombelona momba an’i Jesoa Kristy?
Asao ny mpianatra hieritreritra ny zavatra tsapany momba ny firesahana bebe kokoa momba an’i Jesoa Kristy amin’ny hafa sy ny antony ahatsapan’izy ireo izany.
Miomana hijoro ho vavolombelona momba an’i Jesoa Kristy
Manasà mpianatra iray hamaky ity fanambarana manaraka ity.
Nampianatra izao ny Loholona Neil L. Andersen ao amin’ny Kôlejin’ny Apôstôly Roambinifolo:
Misy ny maro eto amin’izao tontolo izao izay tena kely no fantany momba an’i Jesoa Kristy, ary any amin’ny faritra sasany eto amin’izao tontolo izao izay efa nanambarana ny anarany nandritra ny taonjato maro, dia mihena ny finoana an’i Jesoa Kristy. … Nisy fikarohana [iray] hafa natao manerana an’izao tontolo izao … izay maminavina fa ao anatin’ny am-polo taonany maro ho avy dia mihoatra ny avo roa heny ny isan’ny olona hiala amin’ny Kristianisma noho izay hanaiky izany.
… Raha hihena ny firesahan’izao tontolo izao momba Azy, iza no handeha hiresaka betsaka momba Azy? Isika! (Neil L. Andersen, “Miresaka an’i Kristy isika,” Liahona, nôv. 2020, 88–89)
-
Inona no eritreritra na fahatsapana anananao momba ity teny nambaran’ny Loholona Andersen ity?
Ny Fiadidiana Voalohany sy ny Kôlejin’ny Apôstôly Roambinifolo dia ohatra amin’ny fizarana momba an’i Jesoa Kristy. Ohatra iray amin’izany ilay fanambarana hoe “Ilay Kristy velona.” Makà minitra vitsy hamerenana mijery ity antontan-taratasy ity, ary saintsaino ireo tombontsoa izay mety hiainantsika satria nizara ny fijoroana ho vavolombelona ananany momba an’i Jesoa Kristy izy ireo.
Asao ny mpianatra hizara izay tombontsoa rehetra eritreretiny.
Mety hiovaova ny eritreritra sy ny fahatsapan’ny mpianatra momba ny firesahana bebe kokoa momba ny Mpamonjy. Ny famantarana fitsipika iray avy ao amin’ny soratra masina dia afaka manampy azy ireo hahatakatra ny maha-zava-dehibe ny fanaovana izany. Azonao ampiasaina ity soratra masina manaraka ity.
Vakio ny 2 Nefia 25:26, ka tadiavo ny antony fanampiny hijoroana ho vavolombelona momba an’i Jesoa Kristy.
-
Inona no fahamarinana azontsika ianarana avy amin’ny antony nolazain’i Nefia?
Iray amin’ireo fahamarinana mety ho hitan’ny mpianatra ny hoe rehefa miresaka sy mifaly momba an’i Jesoa Kristy isika dia afaka mahafantatra ny hafa fa afaka mamonjy azy ireo amin’ny fahotany Izy.
-
Ahoana no ahafahan’ny fahafantarana ny zavatra azon’i Jesoa Kristy atao ho an’ny hafa hisy fiantraikany eo amin’ny fanirianao hijoro ho vavolombelona na hizara ny eritreritrao sy ny fahatsapanao momba Azy?
Tsarovy ireo fahamarinana hitanao momba ny Mpamonjy ao amin’ny “Ilay Kristy velona” nandritra ny lesona teo aloha. Azonao atao ny misafidy ilay iray izay nifantohanao tao amin’io lesona io na misafidy iray hafa tianao hozaraina amin’ny hafa.
Ohatra amin’ireo fahamarinana maro mety ho hitan’ny mpianatra ireto:
-
Nahary ny tany teo ambanin’ny fitarihan’ny Ray i Jesoa Kristy.
-
Nanolotra ny ainy i Jesoa Kristy mba hanonitra ny fahotan’ny zanak’olombelona rehetra.
-
Nitsangana tamin’ny maty i Jesoa Kristy ary velona ankehitriny.
-
I Jesoa Kristy no fahazavana, fiainana ary fanantenan’izao tontolo izao.
-
Ny lalan’i Jesoa Kristy no lalana mitondra mankany amin’ny fahasambarana eto amin’izao fiainana izao sy mankany amin’ny fiainana mandrakizay any amin’ny tontolo ho avy.
Ireto sahanasa manaraka ireto dia afaka mameno ny fotoam-pianarana sisa tavela ary afaka manampy amin’ny fanomanana ny mpianatra hizara. Misafidiana sahanasa iray tsapanao fa mety hanampy ny mpianatrao, na atolory ho toy ny safidy azon’ny mpianatra isafidianana ny sahanasa tsirairay. Mba hanampiana ny mpianatra hisafidy ny sahanasa tena mifanaraka amin’ny zavatra ilaina dia azon’izy ireo atao ny mieritreritra hoe iza no tian’izy ireo hizarana ny fijoroana ho vavolombelona ananany.
Sahanasa A: Fanaovana tsianjery
Fomba iray hiomanana amin’ny fizarana momba an’i Jesoa Kristy ny fanaovana tsianjery ny ampahany iray amin’ny “Ilay Kristy velona.”
Makà minitra maromaro hitadidiana ampahany iray izay mampianatra ny fahamarinana nosafidinao. Azonao soratana izany, na averina imbetsaka, na raketo am-peo ny tenanao mamaky izany ary henoy imbetsaka izany. (Azonao atao ihany koa ny manao tsianjery ireo sombin-tsoratra masina hitanao tao amin’ny lesona teo aloha izay mijoro ho vavolombelona ny amin’io fahamarinana io ihany.)
Avy eo dia soraty ny fotoana sy ny fomba ahafahanao mizara amin’ny olona iray hafa ny zavatra nataonao tsianjery. Ampidiro ao anatin’izany ny antony maha-manan-danja ireo andian-teny nosafidinao aminao sy ny fomba antenainao fa hanampian’izy ireo ny hafa hitodika amin’i Jesoa Kristy.
Sahanasa B: Manaova peta-drindrina, na mème, na sary nomerika
Fomba iray hanampiana anao hizara ny eritreritrao sy ny zavatra tsapanao momba an’i Jesoa Kristy ny fanaovana peta-drindrina, na mème, na sary nomerika.
Hevero ny hisafidy sary samihafa izay mampiseho ny hevitry ny fahamarinana nofidinao. Ohatra, azonao atao ny misafidy ny hizara ny fahamarinana momba ny batisan’i Jesoa Kristy sy ny maha-zava-dehibe izany. Hita ao amin’ity andian-teny avy ao amin’ny “Ilay Kristy velona” manaraka ity izany: “Na dia tsy nanam-pahotana aza Izy dia natao batisa mba hanatanteraka ny fahamarinana rehetra.” Azonao atao ny mampiditra io andalana io ao amin’ny tetikasanao miaraka amin’ny sary tianao indrindra izay maneho ny batisan’ny Mpamonjy. Azonao atao ihany koa ny mampiditra andalana avy ao amin’ny soratra masina izay mampitombo ny fahatakaranao.
Avy eo dia ampidiro ao ny fanazavanao ny antony maha-manan-danja izany fahalalana izany aminao.
Raha te hanao izany amin’ny findain’izy ireo ny mpianatra dia afaka mampianatra ny hafa ny fomba hahitana sary ireo izay mahafantatra ny fomba fampiasana ny médiathèque an’ny Fiangonana. Raha te hanao ny tetikasan’izy ireo amin’ny taratasy ny mpianatra dia azonao atao ny mitondra gazetibokin’ny Fiangonana ary mamela ny mpianatra hanapaka sary na teny.
Sahanasa D: Manomàna lahateny iray
Fomba iray hilazana amin’ny hafa momba an’i Jesoa Kristy ny manao lahateny.
Alaivo sary an-tsaina hoe nanaiky ny handray fitenenana ianao ny alahady ao amin’ny paroasy na sampana misy anao. Azonao zaraina ny zavatra nianaranao momba an’i Jesoa Kristy sy ny antony maha-manan-danja izany aminao. Manorata andiam-pehezan-teny vitsivitsy farafahakeliny izay azonao ampiasaina ao amin’ny lahateninao. Aza hadino ny mampiditra teny nambara avy ao amin’ny “Ilay Kristy velona,” andinin-tsoratra masina, sy ny antony maha-manan-danja an’ireo zavatra ireo aminao.
Fotoana hizarana
Omeo fotoana ny mpianatra hizarana ny zavatra nomaniny. Mamporisiha mpianatra maro mba handray anjara. Hevero ny hiato tsindraindray mba hanontaniana hoe inona no tian’ny mpianatra na eritreretiny ho manan-danja momba ny zavatra zarain’ireo mpiara-mianatra aminy. Antitrantero fa ireo hevi-baovao ireo dia fitahiana avy amin’ny fitenenana sy fijoroana ho vavolombelona momba ny Mpamonjy.
Amporisiho ny mpianatra hitady fomba hizarana ireo zavatra ireo any ivelan’ny kilasy. Raha mety dia azonao atao ny mizara ireo fitahiana azonao avy amin’ny firesahana amin’ny hafa momba an’i Jesoa Kristy. Na azonao atao ny mizara ny zavatra nijoroan’ny hafa ho vavolombelona taminao. Eritrereto ny hamarana ny fotoam-pianarana amin’ny fametrahana ireto fanontaniana manaraka ireto amin’ny mpianatra:
-
Ahoana no mety hivoaran’ny fifandraisanao amin’i Jesoa Kristy rehefa mizara ny eritreritrao sy ny fahatsapanao momba Azy amin’ny hafa ianao?